Lakshmi Nrisimha Karavalamba Stotram

ॐ

ലക്ഷ്മീ നൃസിംഹ കരാവലമ്ബ സ്തോത്രമ്

Lakshmi Stotram Adi Shankaracharya Malayalam

ശ്രീമത്പയോനിധിനികേതന ചക്രപാണേ ഭോഗീന്ദ്രഭോഗമണിരാജിത പുണ്യമൂര്തേ ।

യോഗീശ ശാശ്വത ശരണ്യ ഭവാബ്ധിപോത ലക്ഷ്മീനൃസിംഹ മമ ദേഹി കരാവലമ്ബമ് ॥ 1 ॥

ബ്രഹ്മേന്ദ്രരുദ്രമരുദര്കകിരീടകോടി സങ്ഘട്ടിതാങ്ഘ്രികമലാമലകാന്തികാന്ത ।

ലക്ഷ്മീലസത്കുചസരോരുഹരാജഹംസ ലക്ഷ്മീനൃസിംഹ മമ ദേഹി കരാവലമ്ബമ് ॥ 2 ॥

സംസാരദാവദഹനാകരഭീകരോരു-ജ്വാലാവലീഭിരതിദഗ്ധതനൂരുഹസ്യ ।

ത്വത്പാദപദ്മസരസീരുഹമാഗതസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 3 ॥

സംസാരജാലപതിതതസ്യ ജഗന്നിവാസ സര്വേന്ദ്രിയാര്ഥ ബഡിശാഗ്ര ഝഷോപമസ്യ ।

പ്രോത്കമ്പിത പ്രചുരതാലുക മസ്തകസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 4 ॥

സംസാരകൂമപതിഘോരമഗാധമൂലം സമ്പ്രാപ്യ ദുഃഖശതസര്പസമാകുലസ്യ ।

ദീനസ്യ ദേവ കൃപയാ പദമാഗതസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 5 ॥

സംസാരഭീകരകരീന്ദ്രകരാഭിഘാത നിഷ്പീഡ്യമാനവപുഷഃ സകലാര്തിനാശ ।

പ്രാണപ്രയാണഭവഭീതിസമാകുലസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 6 ॥

സംസാരസര്പവിഷദിഗ്ധമഹോഗ്രതീവ്ര ദംഷ്ട്രാഗ്രകോടിപരിദഷ്ടവിനഷ്ടമൂര്തേഃ ।

നാഗാരിവാഹന സുധാബ്ധിനിവാസ ശൌരേ ലക്ഷ്മീനൃസിംഹ മമ ദേഹി കരാവലമ്ബമ് ॥ 7 ॥

സംസാരവൃക്ഷബീജമനന്തകര്മ-ശാഖായുതം കരണപത്രമനങ്ഗപുഷ്പമ് ।

ആരുഹ്യ ദുഃഖഫലിതഃ ചകിതഃ ദയാലോ ലക്ഷ്മീനൃസിംഹ മമ ദേഹി കരാവലമ്ബമ് ॥ 8 ॥

സംസാരസാഗരവിശാലകരാലകാല നക്രഗ്രഹഗ്രസിതനിഗ്രഹവിഗ്രഹസ്യ ।

വ്യഗ്രസ്യ രാഗനിചയോര്മിനിപീഡിതസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 9 ॥

സംസാരസാഗരനിമജ്ജനമുഹ്യമാനം ദീനം വിലോകയ വിഭോ കരുണാനിധേ മാമ് ।

പ്രഹ്ലാദഖേദപരിഹാരപരാവതാര ലക്ഷ്മീനൃസിംഹ മമ ദേഹി കരാവലമ്ബമ് ॥ 10 ॥

സംസാരഘോരഗഹനേ ചരതോ മുരാരേ മാരോഗ്രഭീകരമൃഗപ്രചുരാര്ദിതസ്യ ।

ആര്തസ്യ മത്സരനിദാഘസുദുഃഖിതസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 11 ॥

ബദ്ധ്വാ ഗലേ യമഭടാ ബഹു തര്ജയന്ത കര്ഷന്തി യത്ര ഭവപാശശതൈര്യുതം മാമ് ।

ഏകാകിനം പരവശം ചകിതം ദയാലോ ലക്ഷ്മീനൃസിംഹ മമ ദേഹി കരാവലമ്ബമ് ॥ 12 ॥

ലക്ഷ്മീപതേ കമലനാഭ സുരേശ വിഷ്ണോ യജ്ഞേശ യജ്ഞ മധുസൂദന വിശ്വരൂപ ।

ബ്രഹ്മണ്യ കേശവ ജനാര്ദന വാസുദേവ ലക്ഷ്മീനൃസിംഹ മമ ദേഹി കരാവലമ്ബമ് ॥ 13 ॥

ഏകേന ചക്രമപരേണ കരേണ ശങ്ഖ-മന്യേന സിന്ധുതനയാമവലമ്ബ്യ തിഷ്ഠന് ।

വാമേതരേണ വരദാഭയപദ്മചിഹ്നം ലക്ഷ്മീനൃസിംഹ മമ ദേഹി കരാവലമ്ബമ് ॥ 14 ॥

അന്ധസ്യ മേ ഹൃതവിവേകമഹാധനസ്യ ചോരൈര്മഹാബലിഭിരിന്ദ്രിയനാമധേയൈഃ ।

മോഹാന്ധകാരകുഹരേ വിനിപാതിതസ്യ ലക്ഷ്മീനൃസിംഹ മമ ദേഹി കരാവലമ്ബമ് ॥ 15 ॥

പ്രഹ്ലാദനാരദപരാശരപുണ്ഡരീക-വ്യാസാദിഭാഗവതപുങ്ഗവഹൃന്നിവാസ ।

ഭക്താനുരക്തപരിപാലനപാരിജാത ലക്ഷ്മീനൃസിംഹ മമ ദേഹി കരാവലമ്ബമ് ॥ 16 ॥

ലക്ഷ്മീനൃസിംഹചരണാബ്ജമധുവ്രതേന സ്തോത്രം കൃതം ശുഭകരം ഭുവി ശങ്കരേണ ।

യേ തത്പഠന്തി മനുജാ ഹരിഭക്തിയുക്താ-സ്തേ യാന്തി തത്പദസരോജമഖണ്ഡരൂപമ് ॥ 17 ॥

Roman (IAST) Transliteration

śrīmatpayonidhiniketana cakrapāṇe bhogīndrabhogamaṇirājita puṇyamūrte |

yogīśa śāśvata śaraṇya bhavābdhipota lakṣmīnṛsiṃha mama dehi karāvalambam || 1 ||

brahmendrarudramarudarkakirīṭakoṭi saṅghaṭṭitāṅghrikamalāmalakāntikānta |

lakṣmīlasatkucasaroruharājahaṃsa lakṣmīnṛsiṃha mama dehi karāvalambam || 2 ||

saṃsāradāvadahanākarabhīkaroru-jvālāvalībhiratidagdhatanūruhasya |

tvatpādapadmasarasīruhamāgatasya lakṣmīnṛsiṃha mama dehi karāvalambam || 3 ||

saṃsārajālapatitatasya jagannivāsa sarvendriyārtha baḍiśāgra jhaṣopamasya |

protkampita pracuratāluka mastakasya lakṣmīnṛsiṃha mama dehi karāvalambam || 4 ||

saṃsārakūmapatighoramagādhamūlaṃ samprāpya duḥkhaśatasarpasamākulasya |

dīnasya deva kṛpayā padamāgatasya lakṣmīnṛsiṃha mama dehi karāvalambam || 5 ||

saṃsārabhīkarakarīndrakarābhighāta niṣpīḍyamānavapuṣaḥ sakalārtināśa |

prāṇaprayāṇabhavabhītisamākulasya lakṣmīnṛsiṃha mama dehi karāvalambam || 6 ||

saṃsārasarpaviṣadigdhamahogratīvra daṃṣṭrāgrakoṭiparidaṣṭavinaṣṭamūrteḥ |

nāgārivāhana sudhābdhinivāsa śaure lakṣmīnṛsiṃha mama dehi karāvalambam || 7 ||

saṃsāravṛkṣabījamanantakarma-śākhāyutaṃ karaṇapatramanaṅgapuṣpam |

āruhya duḥkhaphalitaḥ cakitaḥ dayālo lakṣmīnṛsiṃha mama dehi karāvalambam || 8 ||

saṃsārasāgaraviśālakarālakāla nakragrahagrasitanigrahavigrahasya |

vyagrasya rāganicayorminipīḍitasya lakṣmīnṛsiṃha mama dehi karāvalambam || 9 ||

saṃsārasāgaranimajjanamuhyamānaṃ dīnaṃ vilokaya vibho karuṇānidhe mām |

prahlādakhedaparihāraparāvatāra lakṣmīnṛsiṃha mama dehi karāvalambam || 10 ||

saṃsāraghoragahane carato murāre mārograbhīkaramṛgapracurārditasya |

ārtasya matsaranidāghasuduḥkhitasya lakṣmīnṛsiṃha mama dehi karāvalambam || 11 ||

baddhvā gale yamabhaṭā bahu tarjayanta karṣanti yatra bhavapāśaśatairyutaṃ mām |

ekākinaṃ paravaśaṃ cakitaṃ dayālo lakṣmīnṛsiṃha mama dehi karāvalambam || 12 ||

lakṣmīpate kamalanābha sureśa viṣṇo yajñeśa yajña madhusūdana viśvarūpa |

brahmaṇya keśava janārdana vāsudeva lakṣmīnṛsiṃha mama dehi karāvalambam || 13 ||

ekena cakramapareṇa kareṇa śaṅkha-manyena sindhutanayāmavalambya tiṣṭhan |

vāmetareṇa varadābhayapadmacihnaṃ lakṣmīnṛsiṃha mama dehi karāvalambam || 14 ||

andhasya me hṛtavivekamahādhanasya corairmahābalibhirindriyanāmadheyaiḥ |

mohāndhakārakuhare vinipātitasya lakṣmīnṛsiṃha mama dehi karāvalambam || 15 ||

prahlādanāradaparāśarapuṇḍarīka-vyāsādibhāgavatapuṅgavahṛnnivāsa |

bhaktānuraktaparipālanapārijāta lakṣmīnṛsiṃha mama dehi karāvalambam || 16 ||

lakṣmīnṛsiṃhacaraṇābjamadhuvratena stotraṃ kṛtaṃ śubhakaraṃ bhuvi śaṅkareṇa |

ye tatpaṭhanti manujā haribhaktiyuktā-ste yānti tatpadasarojamakhaṇḍarūpam || 17 ||