📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
കുന്തീ സ്തുതിഃ (ഭാഗവത പുരാണ)
Kunti Stutih (bhagavata Purana)
Vyasa Malayalam
(ശ്രീമദ്ഭാഗവത മഹാപുരാണേ പ്രഥമസ്കന്ധേ അഷ്ടമാധ്യായഃ)
കുന്ത്യുവാച ।
നമസ്യേ പുരുഷം ത്വാദ്യമീശ്വരം പ്രകൃതേഃ പരമ് ।
അലക്ഷ്യം സര്വഭൂതാനാമന്തര്ബഹിരവസ്ഥിതമ് ॥ 18 ॥
മായാജവനികാച്ഛന്നമജ്ഞാധോക്ഷജമവ്യയമ് ।
ന ലക്ഷ്യസേ മൂഢദൃശാ നടോ നാട്യധരോ യഥാ ॥ 19 ॥
തഥാ പരമഹംസാനാം മുനീനാമമലാത്മനാമ് ।
ഭക്തിയോഗവിധാനാര്ഥം കഥം പശ്യേമ ഹി സ്ത്രിയഃ ॥ 20 ॥
കൃഷ്ണായ വാസുദേവായ ദേവകീനന്ദനായ ച ।
നന്ദഗോപകുമാരായ ഗോവിന്ദായ നമോ നമഃ ॥ 21 ॥
നമഃ പങ്കജനാഭായ നമഃ പങ്കജമാലിനേ ।
നമഃ പങ്കജനേത്രായ നമസ്തേ പങ്കജാങ്ഘ്രയേ ॥ 22 ॥
യഥാ ഹൃഷീകേശ ഖലേന ദേവകീ കംസേന രുദ്ധാതിചിരം ശുചാര്പിതാ ।
വിമോചിതാഹം ച സഹാത്മജാ വിഭോ ത്വയൈവ നാഥേന മുഹുര്വിപദ്ഗണാത് ॥ 23 ॥
വിഷാന്മഹാഗ്നേഃ പുരുഷാദദര്ശനാദസത്സഭായാ വനവാസകൃച്ഛ്രതഃ ।
മൃധേ മൃധേഽനേകമഹാറഥാസ്ത്രതോ ദ്രൌണ്യസ്ത്രതശ്ചാസ്മ ഹരേഽഭിരക്ഷിതാഃ ॥ 24 ॥
വിപദഃ സന്തു താഃ ശശ്വത്തത്ര തത്ര ജഗദ്ഗുരോ ।
ഭവതോ ദര്ശനം യത്സ്യാദപുനര്ഭവദര്ശനമ് ॥ 25 ॥
ജന്മൈശ്വര്യശ്രുതശ്രീഭിരേധമാനമദഃ പുമാന് ।
നൈവാര്ഹത്യഭിധാതും വൈ ത്വാമകിഞ്ചനഗോചരമ് ॥ 26 ॥
നമോഽകിഞ്ചനവിത്തായ നിവൃത്തഗുണവൃത്തയേ ।
ആത്മാരാമായ ശാന്തായ കൈവല്യപതയേ നമഃ ॥ 27 ॥
മന്യേ ത്വാം കാലമീശാനമനാദിനിധനം വിഭുമ് ।
സമം ചരന്തം സര്വത്ര ഭൂതാനാം യന്മിഥഃ കലിഃ ॥ 28 ॥
ന വേദ കശ്ചിദ്ഭഗവംശ്ചികീര്ഷിതം തവേഹമാനസ്യ നൃണാം വിഡമ്ബനമ് ।
ന യസ്യ കശ്ചിദ്ദയിതോഽസ്തി കര്ഹിചിദ്ദ്വേഷ്യശ്ച യസ്മിന്വിഷമാ മതിര്നൃണാമ് ॥ 29 ॥
ജന്മ കര്മ ച വിശ്വാത്മന്നജസ്യാകര്തുരാത്മനഃ ।
തിര്യന്നൃഷിഷു യാദഃസു തദത്യന്തവിഡമ്ബനമ് ॥ 30 ॥
ഗോപ്യാദദേ ത്വയി കൃതാഗസി ദാമ താവദ്യാതേ ദശാശ്രുകലിലാഞ്ജനസമ്ഭ്രമാക്ഷമ് ।
വക്ത്രം നിനീയ ഭയഭാവനയാ സ്ഥിതസ്യ സാ മാം വിമോഹയതി ഭീരപി യദ്ബിഭേതി ॥ 31 ॥
കേചിദാഹുരജം ജാതം പുണ്യശ്ലോകസ്യ കീര്തയേ ।
യദോഃ പ്രിയസ്യാന്വവായേ മലയസ്യേവ ചന്ദനമ് ॥ 32 ॥
അപരേ വസുദേവസ്യ ദേവക്യാം യാചിതോഽഭ്യഗാത് ।
അജസ്ത്വമസ്യ ക്ഷേമായ വധായ ച സുരദ്വിഷാമ് ॥ 33 ॥
ഭാരാവതാരണായാന്യേ ഭുവോ നാവ ഇവോദധൌ ।
സീദന്ത്യാ ഭൂരിഭാരേണ ജാതോ ഹ്യാത്മഭുവാര്ഥിതഃ ॥ 34 ॥
ഭവേസ്മിന്ക്ലിശ്യമാനാനാമവിദ്യാകാമകര്മഭിഃ ।
ശ്രവണസ്മരണാര്ഹാണി കരിഷ്യന്നിതി കേചന ॥ 35 ॥
ശൃണ്വന്തി ഗായന്തി ഗൃണന്ത്യഭീക്ഷ്ണശഃ സ്മരന്തി നന്ദന്തി തവേഹിതം ജനാഃ ।
ത ഏവ പശ്യന്ത്യചിരേണ താവകം ഭവപ്രവാഹോപരമം പദാമ്ബുജമ് ॥ 36 ॥
അപ്യദ്യ നസ്ത്വം സ്വകൃതേഹിത പ്രഭോ ജിഹാസസി സ്വിത്സുഹൃദോഽനുജീവിനഃ ।
യേഷാം ന ചാന്യദ്ഭവതഃ പദാമ്ബുജാത്പരായണം രാജസു യോജിതാംഹസാമ് ॥ 37 ॥
കേ വയം നാമരൂപാഭ്യാം യദുഭിഃ സഹ പാണ്ഡവാഃ ।
ഭവതോഽദര്ശനം യര്ഹി ഹൃഷീകാണാമിവേശിതുഃ ॥ 38 ॥
നേയം ശോഭിഷ്യതേ തത്ര യഥേദാനീം ഗദാധര ।
ത്വത്പദൈരങ്കിതാ ഭാതി സ്വലക്ഷണവിലക്ഷിതൈഃ ॥ 39 ॥
ഇമേ ജനപദാഃ സ്വൃദ്ധാഃ സുപക്വൌഷധിവീരുധഃ ।
വനാദ്രിനദ്യുദന്വന്തോ ഹ്യേധന്തേ തവ വീക്ഷിതൈഃ ॥ 40 ॥
അഥ വിശ്വേശ വിശ്വാത്മന്വിശ്വമൂര്തേ സ്വകേഷു മേ ।
സ്നേഹപാശമിമം ഛിന്ധി ദൃഢം പാണ്ഡുഷു വൃഷ്ണിഷു ॥ 41 ॥
ത്വയി മേഽനന്യവിഷയാ മതിര്മധുപതേഽസകൃത് ।
രതിമുദ്വഹതാദദ്ധാ ഗങ്ഗേവൌഘമുദന്വതി ॥ 42 ॥
ശ്രീകൃഷ്ണ കൃഷ്ണസഖ വൃഷ്ണ്യൃഷഭാവനിദ്രുഗ്രാജന്യവംശദഹനാനപവര്ഗവീര്യ ।
ഗോവിന്ദ ഗോദ്വിജസുരാര്തിഹരാവതാര യോഗേശ്വരാഖിലഗുരോ ഭഗവന്നമസ്തേ ॥ 43 ॥
॥ ഇതി ശ്രീമദ്ഭാഗവതേ മഹാപുരാണേ പാരമഹംസ്യാം സംഹിതായാം പ്രഥമസ്കന്ധേ അഷ്ടമേഽധ്യായേ ശ്രീകുന്തീകൃതകൃഷ്ണസ്തുതിഃ സമ്പൂര്ണാ ॥
Roman (IAST) Transliteration
(śrīmadbhāgavata mahāpurāṇe prathamaskandhe aṣṭamādhyāyaḥ)
kuntyuvāca |
namasye puruṣaṃ tvādyamīśvaraṃ prakṛteḥ param |
alakṣyaṃ sarvabhūtānāmantarbahiravasthitam || 18 ||
māyājavanikācchannamajñādhokṣajamavyayam |
na lakṣyase mūḍhadṛśā naṭo nāṭyadharo yathā || 19 ||
tathā paramahaṃsānāṃ munīnāmamalātmanām |
bhaktiyogavidhānārthaṃ kathaṃ paśyema hi striyaḥ || 20 ||
kṛṣṇāya vāsudevāya devakīnandanāya ca |
nandagopakumārāya govindāya namo namaḥ || 21 ||
namaḥ paṅkajanābhāya namaḥ paṅkajamāline |
namaḥ paṅkajanetrāya namaste paṅkajāṅghraye || 22 ||
yathā hṛṣīkeśa khalena devakī kaṃsena ruddhāticiraṃ śucārpitā |
vimocitāhaṃ ca sahātmajā vibho tvayaiva nāthena muhurvipadgaṇāt || 23 ||
viṣānmahāgneḥ puruṣādadarśanādasatsabhāyā vanavāsakṛcchrataḥ |
mṛdhe mṛdhe'nekamahāṟathāstrato drauṇyastrataścāsma hare'bhirakṣitāḥ || 24 ||
vipadaḥ santu tāḥ śaśvattatra tatra jagadguro |
bhavato darśanaṃ yatsyādapunarbhavadarśanam || 25 ||
janmaiśvaryaśrutaśrībhiredhamānamadaḥ pumān |
naivārhatyabhidhātuṃ vai tvāmakiñcanagocaram || 26 ||
namo'kiñcanavittāya nivṛttaguṇavṛttaye |
ātmārāmāya śāntāya kaivalyapataye namaḥ || 27 ||
manye tvāṃ kālamīśānamanādinidhanaṃ vibhum |
samaṃ carantaṃ sarvatra bhūtānāṃ yanmithaḥ kaliḥ || 28 ||
na veda kaścidbhagavaṃścikīrṣitaṃ tavehamānasya nṛṇāṃ viḍambanam |
na yasya kaściddayito'sti karhiciddveṣyaśca yasminviṣamā matirnṛṇām || 29 ||
janma karma ca viśvātmannajasyākarturātmanaḥ |
tiryannṛṣiṣu yādaḥsu tadatyantaviḍambanam || 30 ||
gopyādade tvayi kṛtāgasi dāma tāvadyāte daśāśrukalilāñjanasambhramākṣam |
vaktraṃ ninīya bhayabhāvanayā sthitasya sā māṃ vimohayati bhīrapi yadbibheti || 31 ||
kecidāhurajaṃ jātaṃ puṇyaślokasya kīrtaye |
yadoḥ priyasyānvavāye malayasyeva candanam || 32 ||
apare vasudevasya devakyāṃ yācito'bhyagāt |
ajastvamasya kṣemāya vadhāya ca suradviṣām || 33 ||
bhārāvatāraṇāyānye bhuvo nāva ivodadhau |
sīdantyā bhūribhāreṇa jāto hyātmabhuvārthitaḥ || 34 ||
bhavesminkliśyamānānāmavidyākāmakarmabhiḥ |
śravaṇasmaraṇārhāṇi kariṣyanniti kecana || 35 ||
śṛṇvanti gāyanti gṛṇantyabhīkṣṇaśaḥ smaranti nandanti tavehitaṃ janāḥ |
ta eva paśyantyacireṇa tāvakaṃ bhavapravāhoparamaṃ padāmbujam || 36 ||
apyadya nastvaṃ svakṛtehita prabho jihāsasi svitsuhṛdo'nujīvinaḥ |
yeṣāṃ na cānyadbhavataḥ padāmbujātparāyaṇaṃ rājasu yojitāṃhasām || 37 ||
ke vayaṃ nāmarūpābhyāṃ yadubhiḥ saha pāṇḍavāḥ |
bhavato'darśanaṃ yarhi hṛṣīkāṇāmiveśituḥ || 38 ||
neyaṃ śobhiṣyate tatra yathedānīṃ gadādhara |
tvatpadairaṅkitā bhāti svalakṣaṇavilakṣitaiḥ || 39 ||
ime janapadāḥ svṛddhāḥ supakvauṣadhivīrudhaḥ |
vanādrinadyudanvanto hyedhante tava vīkṣitaiḥ || 40 ||
atha viśveśa viśvātmanviśvamūrte svakeṣu me |
snehapāśamimaṃ chindhi dṛḍhaṃ pāṇḍuṣu vṛṣṇiṣu || 41 ||
tvayi me'nanyaviṣayā matirmadhupate'sakṛt |
ratimudvahatādaddhā gaṅgevaughamudanvati || 42 ||
śrīkṛṣṇa kṛṣṇasakha vṛṣṇyṛṣabhāvanidrugrājanyavaṃśadahanānapavargavīrya |
govinda godvijasurārtiharāvatāra yogeśvarākhilaguro bhagavannamaste || 43 ||
|| iti śrīmadbhāgavate mahāpurāṇe pāramahaṃsyāṃ saṃhitāyāṃ prathamaskandhe aṣṭame'dhyāye śrīkuntīkṛtakṛṣṇastutiḥ sampūrṇā ||
InfoLyter.in — Sacred Vedic Knowledge Portal · Free forever