Gitagovindam Tritiyah Sargah - Mugdha Madhusudanah

ॐ

ഗീതഗോവിന്ദം തൃതീയഃ സര്ഗഃ - മുഗ്ധ മധുസൂദനഃ

Vishnu Gita Jayadeva Malayalam

॥ തൃതീയഃ സര്ഗഃ ॥

॥ മുഗ്ധമധുസൂദനഃ ॥

കംസാരിരപി സംസാരവാസനാബന്ധശൃങ്ഖലാമ് ।

രാധാമാധായ ഹൃദയേ തത്യാജ വ്രജസുന്ദരീഃ ॥ 18 ॥

ഇതസ്തതസ്താമനുസൃത്യ രാധികാ-മനങ്ഗബാണവ്രണഖിന്നമാനസഃ ।

കൃതാനുതാപഃ സ കലിന്ദനന്ദിനീ-തടാന്തകുഞ്ജേ വിഷസാദ മാധവഃ ॥ 19 ॥

॥ ഗീതം 7 ॥

മാമിയം ചലിതാ വിലോക്യ വൃതം വധൂനിചയേന ।

സാപരാധതയാ മയാപി ന വാരിതാതിഭയേന ॥

ഹരി ഹരി ഹതാദരതയാ ഗതാ സാ കുപിതേവ ॥ 1 ॥

കിം കരിഷ്യതി കിം വദിഷ്യതി സാ ചിരം വിരഹേണ ।

കിം ധനേന ജനേന കിം മമ ജീവനേന ഗൃഹേണ ॥ 2 ॥

ചിന്തയാമി തദാനനം കുടിലഭ്രു കോപഭരേണ ।

ശോണപദ്മമിവോപരി ഭ്രമതാകുലം ഭ്രമരേണ ॥ 3 ॥

താമഹം ഹൃദി സങ്ഗതാമനിശം ഭൃശം രമയാമി ।

കിം വനേഽനുസരാമി താമിഹ കിം വൃഥാ വിലപാമി ॥ 4 ॥

തന്വി ഖിന്നമസൂയയാ ഹൃദയം തവാകലയാമി ।

തന്ന വേദ്മി കുതോ ഗതാസി ന തേന തേഽനുനയാമി ॥ 5 ॥

ദൃശ്യതേ പുരതോ ഗതാഗതമേവ മേ വിദധാസി ।

കിം പുരേവ സസമ്ഭ്രമം പരിരമ്ഭണം ന ദദാസി ॥ 6 ॥

ക്ഷമ്യതാമപരം കദാപി തവേദൃശം ന കരോമി ।

ദേഹി സുന്ദരി ദര്ശനം മമ മന്മഥേന ദുനോമി ॥ 7 ॥

വര്ണിതം ജയദേവകേന ഹരേരിദം പ്രവണേന ।

കിന്ദുബില്വസമുദ്രസമ്ഭവരോഹിണീരമണേന ॥ 8 ॥

ഹൃദി ബിസലതാഹാരോ നായം ഭുജങ്ഗമനായകഃ കുവലയദലശ്രേണീ കണ്ഠേ ന സാ ഗരലദ്യുതിഃ ।

മലയജരജോ നേദം ഭസ്മ പ്രിയാരഹിതേ മയി പ്രഹര ന ഹരഭ്രാന്ത്യാനങ്ഗ ക്രുധാ കിമു ധാവസി ॥ 20 ॥

പാണൌ മാ കുരു ചൂതസായകമമും മാ ചാപമാരോപയ ക്രീഡാനിര്ജിതവിശ്വ മൂര്ഛിതജനാഘാതേന കിം പൌരുഷമ് ।

തസ്യാ ഏവ മൃഗീദൃശോ മനസിജപ്രേങ്ഖത്കടാക്ഷാശുഗ-ശ്രേണീജര്ജരിതം മനാഗപി മനോ നാദ്യാപി സന്ധുക്ഷതേ ॥ 21 ॥

ഭ്രൂചാപേ നിഹിതഃ കടാക്ഷവിശിഖോ നിര്മാതു മര്മവ്യഥാം ശ്യാമാത്മാ കുടിലഃ കരോതു കബരീഭാരോഽപി മാരോദ്യമമ് ।

മോഹം താവദയം ച തന്വി തനുതാം ബിമ്ബാദരോ രാഗവാന് സദ്വൃത്തസ്തനമണ്ദലസ്തവ കഥം പ്രാണൈര്മമ ക്രീഡതി ॥ 22 ॥

താനി സ്പര്ശസുഖാനി തേ ച തരലാഃ സ്നിഗ്ധാ ദൃശോര്വിഭ്രമാ-സ്തദ്വക്ത്രാമ്ബുജസൌരഭം സ ച സുധാസ്യന്ദീ ഗിരാം വക്രിമാ ।

സാ ബിമ്ബാധരമാധുരീതി വിഷയാസങ്ഗേഽപി ചേന്മാനസം തസ്യാം ലഗ്നസമാധി ഹന്ത വിരഹവ്യാധിഃ കഥം വര്ധതേ ॥ 23 ॥

ഭ്രൂപല്ലവം ധനുരപാങ്ഗതരങ്ഗിതാനി ബാണാഃ ഗുണഃ ശ്രവണപാലിരിതി സ്മരേണ ।

തസ്യാമനങ്ഗജയജങ്ഗമദേവതായാം അസ്ത്രാണി നിര്ജിതജഗന്തി കിമര്പിതാനി ॥ 24 ॥

[ഏഷഃ ശ്ലോകഃ കേഷുചന സംസ്കരണേഷു വിദ്യതേ]

തിര്യക്കണ്ഠ വിലോല മൌലി തരലോത്തം സസ്യ വംശോച്ചരദ്-

ദീപ്തിസ്ഥാന കൃതാവധാന ലലനാ ലക്ഷൈര്ന സംലക്ഷിതാഃ ।

സമ്മുഗ്ധേ മധുസൂദനസ്യ മധുരേ രാധാമുഖേന്ദൌ സുധാ-

സാരേ കന്ദലിതാശ്ചിരം ദധതു വഃ ക്ഷേമം കടാക്ഷോര്മ്മയ ॥ (25) ॥

॥ ഇതി ശ്രീഗീതഗോവിന്ദേ മുഗ്ധമധുസൂദനോ നാമ തൃതീയഃ സര്ഗഃ ॥

Roman (IAST) Transliteration

|| tṛtīyaḥ sargaḥ ||

|| mugdhamadhusūdanaḥ ||

kaṃsārirapi saṃsāravāsanābandhaśṛṅkhalām |

rādhāmādhāya hṛdaye tatyāja vrajasundarīḥ || 18 ||

itastatastāmanusṛtya rādhikā-manaṅgabāṇavraṇakhinnamānasaḥ |

kṛtānutāpaḥ sa kalindanandinī-taṭāntakuñje viṣasāda mādhavaḥ || 19 ||

|| gītaṃ 7 ||

māmiyaṃ calitā vilokya vṛtaṃ vadhūnicayena |

sāparādhatayā mayāpi na vāritātibhayena ||

hari hari hatādaratayā gatā sā kupiteva || 1 ||

kiṃ kariṣyati kiṃ vadiṣyati sā ciraṃ viraheṇa |

kiṃ dhanena janena kiṃ mama jīvanena gṛheṇa || 2 ||

cintayāmi tadānanaṃ kuṭilabhru kopabhareṇa |

śoṇapadmamivopari bhramatākulaṃ bhramareṇa || 3 ||

tāmahaṃ hṛdi saṅgatāmaniśaṃ bhṛśaṃ ramayāmi |

kiṃ vane'nusarāmi tāmiha kiṃ vṛthā vilapāmi || 4 ||

tanvi khinnamasūyayā hṛdayaṃ tavākalayāmi |

tanna vedmi kuto gatāsi na tena te'nunayāmi || 5 ||

dṛśyate purato gatāgatameva me vidadhāsi |

kiṃ pureva sasambhramaṃ parirambhaṇaṃ na dadāsi || 6 ||

kṣamyatāmaparaṃ kadāpi tavedṛśaṃ na karomi |

dehi sundari darśanaṃ mama manmathena dunomi || 7 ||

varṇitaṃ jayadevakena hareridaṃ pravaṇena |

kindubilvasamudrasambhavarohiṇīramaṇena || 8 ||

hṛdi bisalatāhāro nāyaṃ bhujaṅgamanāyakaḥ kuvalayadalaśreṇī kaṇṭhe na sā garaladyutiḥ |

malayajarajo nedaṃ bhasma priyārahite mayi prahara na harabhrāntyānaṅga krudhā kimu dhāvasi || 20 ||

pāṇau mā kuru cūtasāyakamamuṃ mā cāpamāropaya krīḍānirjitaviśva mūrchitajanāghātena kiṃ pauruṣam |

tasyā eva mṛgīdṛśo manasijapreṅkhatkaṭākṣāśuga-śreṇījarjaritaṃ manāgapi mano nādyāpi sandhukṣate || 21 ||

bhrūcāpe nihitaḥ kaṭākṣaviśikho nirmātu marmavyathāṃ śyāmātmā kuṭilaḥ karotu kabarībhāro'pi mārodyamam |

mohaṃ tāvadayaṃ ca tanvi tanutāṃ bimbādaro rāgavān sadvṛttastanamaṇdalastava kathaṃ prāṇairmama krīḍati || 22 ||

tāni sparśasukhāni te ca taralāḥ snigdhā dṛśorvibhramā-stadvaktrāmbujasaurabhaṃ sa ca sudhāsyandī girāṃ vakrimā |

sā bimbādharamādhurīti viṣayāsaṅge'pi cenmānasaṃ tasyāṃ lagnasamādhi hanta virahavyādhiḥ kathaṃ vardhate || 23 ||

bhrūpallavaṃ dhanurapāṅgataraṅgitāni bāṇāḥ guṇaḥ śravaṇapāliriti smareṇa |

tasyāmanaṅgajayajaṅgamadevatāyāṃ astrāṇi nirjitajaganti kimarpitāni || 24 ||

[eṣaḥ ślokaḥ keṣucana saṃskaraṇeṣu vidyate]

tiryakkaṇṭha vilola mauli taralottaṃ sasya vaṃśoccarad-

dīptisthāna kṛtāvadhāna lalanā lakṣairna saṃlakṣitāḥ |

sammugdhe madhusūdanasya madhure rādhāmukhendau sudhā-

sāre kandalitāściraṃ dadhatu vaḥ kṣemaṃ kaṭākṣormmaya || (25) ||

|| iti śrīgītagovinde mugdhamadhusūdano nāma tṛtīyaḥ sargaḥ ||