📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
ഗീതഗോവിന്ദം ഏകാദശഃ സര്ഗഃ - സാനന്ദ ദാമോദരഃ
Gitagovindam Ekadashah Sargah - Sananda Damodarah
Vishnu Gita Jayadeva Malayalam
॥ ഏകാദശഃ സര്ഗഃ ॥
॥ സാനന്ദദാമോദരഃ ॥
സുചിരമനുനയനേ പ്രീണയിത്വാ മൃഗാക്ഷീം ഗതവതി കൃതവേശേ കേശവേ കുഞ്ജശയ്യാമ് ।
രചിതരുചിരഭൂഷാം ദൃഷ്ടിമോഷേ പ്രദോഷേ സ്ഫുരതി നിരവസാദാം കാപി രാധാം ജഗാദ ॥ 59 ॥
॥ ഗീതം 20 ॥
വിരചിതചാടുവചനരചനം ചരണേ രചിതപ്രണിപാതമ് ।
സമ്പ്രതി മഞ്ജുലവഞ്ജുലസീമനി കേലിശയനമനുയാതമ് ॥
മുഗ്ധേ മധുമഥനമനുഗതമനുസര രാധികേ ॥ 1 ॥
ഘനജഘനസ്തനഭാരഭരേ ദരമന്ഥരചരണവിഹാരമ് ।
മുഖരിതമണീമഞ്ജീരമുപൈഹി വിധേഹി മരാലവികാരമ് ॥ 2 ॥
ശൃണു രമണീയതരം തരുണീജനമോഹനമധുപവിരാവമ് ।
കുസുമശരാസനശാസനബന്ദിനി പികനികരേ ഭജ ഭാവമ് ॥ 3 ॥
അനിലതരലകിസലയനികരേണ കരേണ ലതാനികുരമ്ബമ് ।
പ്രേരണമിവ കരഭോരു കരോതി ഗതിം പ്രതിമുഞ്ച വിലമ്ബമ് ॥ 4 ॥
സ്ഫുരിതമനങ്ഗതരങ്ഗവശാദിവ സൂചിതഹരിപരിരമ്ഭമ് ।
പൃച്ഛ മനോഹരഹാരവിമലജലധാരമമും കുചകുമ്ഭമ് ॥ 5 ॥
അധിഗതമഖിലസഖീഭിരിദം തവ വപുരപി രതിരണസജ്ജമ് ।
ചണ്ഡി രസിതരശനാരവഡിണ്ഡിമമഭിസര സരസമലജ്ജമ് ॥ 6 ॥
സ്മരശരസുഭഗനഖേന കരേണ സഖീമവലമ്ബ്യ സലീലമ് ।
ചല വലയക്വണീതൈരവബോധയ ഹരമപി നിജഗതിശീലമ് ॥ 7 ॥
ശ്രീജയദേവഭണിതമധരീകൃതഹാരമുദാസിതവാമമ് ।
ഹരിവിനിഹിതമനസാമധിതിഷ്ഠതു കണ്ഠതടീമവിരാമമ് ॥ 8 ॥
സാ മാം ദ്രക്ഷ്യതി വക്ഷ്യതി സ്മരകഥാം പ്രത്യങ്ഗമാലിങ്ഗനൈഃ പ്രീതിം യാസ്യതി രമ്യതേ സഖി സമാഗത്യേതി ചിന്താകുലഃ ।
സ ത്വാം പശ്യതി വേപതേ പുലകയത്യാനന്ദതി സ്വിദ്യതി പ്രത്യുദ്ഗച്ഛതി മൂര്ച്ഛതി സ്ഥിരതമഃപുഞ്ജേ നികുഞ്ജേ പ്രിയഃ ॥ 60 ॥
അക്ഷ്ണോര്നിക്ഷിപദഞ്ജനം ശ്രവണയോസ്താപിച്ഛഗുച്ഛാവലീം മൂര്ധ്നി ശ്യാമസരോജദാമ കുചയോഃ കസ്തൂരികാപാത്രകമ് ।
ധൂര്താനാമഭിസാരസത്വരഹൃദാം വിഷ്വങ്നികുഞ്ജേ സഖി ധ്വാന്തം നീലനിചോലചാരു സദൃശാം പ്രത്യങ്ഗമാലിങ്ഗതി ॥ 61 ॥
കാശ്മീരഗൌരവപുഷാമഭിസാരികാണാം ആബദ്ധരേഖമഭിതോ രുചിമഞ്ജരീഭിഃ ।
ഏതത്തമാലദലനീലതമം തമിശ്രം തത്പ്രേമഹേമനികഷോപലതാം തനോതി ॥ 62 ॥
ഹാരാവലീതരലകാഞ്ചനകാഞ്ചിദാമ-കേയൂരകങ്കണമണിദ്യുതിദീപിതസ്യ ।
ദ്വാരേ നികുഞ്ജനിലയസ്യഹരിം നിരീക്ഷ്യ വ്രീഡാവതീമഥ സഖീ നിജഗാഹ രാധാമ് ॥ 63 ॥
॥ ഗീതം 21 ॥
മഞ്ജുതരകുഞ്ജതലകേലിസദനേ ।
വിലസ രതിരഭസഹസിതവദനേ ॥
പ്രവിശ രാധേ മാധവസമീപമിഹ ॥ 1 ॥
നവഭവദശോകദലശയനസാരേ ।
വിലസ കുചകലശതരലഹാരേ ॥ 2 ॥
കുസുമചയരചിതശുചിവാസഗേഹേ ।
വിലസ കുസുമസുകുമാരദേഹേ ॥ 3 ॥
ചലമലയവനപവനസുരഭിശീതേ ।
വിലസ രസവലിതലലിതഗീതേ ॥ 4 ॥
മധുമുദിതമധുപകുലകലിതരാവേ ।
വിലസ മദനരസസരസഭാവേ ॥ 5 ॥
മധുതരലപികനികരനിനദമുഖരേ ।
വിലസ ദശനരുചിരുചിരശിഖരേ ॥ 6 ॥
വിതത ബഹുവല്ലിനവപല്ലവഘനേ ।
വിലസ ചിരമലസപീനജഘനേ ॥ 7 ॥
വിഹിതപദ്മാവതീസുഖസമാജേ ।
ഭണതി ജയദേവകവിരാജേ ॥ 8 ॥
ത്വാം ചിത്തേന ചിരം വഹന്നയമതിശ്രാന്തോ ഭൃശം താപിതഃ കന്ദര്പേണ തു പാതുമിച്ഛതി സുധാസമ്ബാധബിമ്ബാധരമ് ।
അസ്യാങ്ഗം തദലങ്കുരു ക്ഷണമിഹ ഭ്രൂക്ഷേപലക്ഷ്മീലവ-ക്രീതേ ദാസ ഇവോപസേവിതപദാമ്ഭോജേ കുതഃ സമ്ഭ്രമഃ ॥ 64 ॥
സാ സസാധ്വസസാനന്ദം ഗോവിന്ദേ ലോലലോചനാ ।
സിഞ്ജാനമഞ്ജുമഞ്ജീരം പ്രവിവേശ നിവേശനമ് ॥ 65 ॥
॥ ഗീതം 22 ॥
രാധാവദനവിലോകനവികസിതവിവിധവികാരവിഭങ്ഗമ് ।
ജലനിധിമിവ വിധുമണ്ഡലദര്ശനതരലിതതുങ്ഗതരങ്ഗമ് ॥
ഹരിമേകരസം ചിരമഭിലഷിതവിലാസം സാ ദദാര്ശ ഗുരുഹര്ഷവശംവദവദനമനങ്ഗനിവാസമ് ॥ 1 ॥
ഹാരമമലതരതാരമുരസി ദധതം പരിരഭ്യ വിദൂരമ് ।
സ്ഫുടതരഫേനകദമ്ബകരമ്ബിതമിവ യമുനാജലപൂരമ് ॥ 2 ॥
ശ്യാമലമൃദുലകലേവരമണ്ഡലമധിഗതഗൌരദുകൂലമ് ।
നീലനലിനമിവ പീതപരാഗപതലഭരവലയിതമൂലമ് ॥ 3 ॥
തരലദൃഗഞ്ചലചലനമനോഹരവദനജനിതരതിരാഗമ് ।
സ്ഫുടകമലോദരഖേലിതഖഞ്ജനയുഗമിവ ശരദി തഡാഗമ് ॥ 4 ॥
വദനകമലപരിശീലനമിലിതമിഹിരസമകുണ്ഡലശോഭമ് ।
സ്മിതരുചിരുചിരസമുല്ലസിതാധരപല്ലവകൃതരതിലോഭമ് ॥ 5 ॥
ശശികിരണച്ഛുരിതോദരജലധരസുന്ദരസകുസുമകേശമ് ।
തിമിരോദിതവിധുമണ്ദലനിര്മലമലയജതിലകനിവേശമ് ॥ 6 ॥
വിപുലപുലകഭരദന്തുരിതം രതികേലികലാഭിരധീരമ് ।
മണിഗണകിരണസമൂഹസമുജ്ജ്വലഭൂഷണസുഭഗശരീരമ് ॥ 7 ॥
ശ്രീജയദേവഭണിതവിഭവദ്വിഗുണീകൃതഭൂഷണഭാരമ് ।
പ്രണമത ഹൃദി സുചിരം വിനിധായ ഹരിം സുകൃതോദയസാരമ് ॥ 8 ॥
അതിക്രമ്യാപാങ്ഗം ശ്രവണപഥപര്യന്തഗമന-പ്രയാസേനേവാക്ഷ്ണോസ്തരലതരതാരം പതിതയോഃ ।
ഇദാനീം രാധായാഃ പ്രിയതമസമാലോകസമയേ പപാത സ്വേദാമ്ബുപ്രസര ഇവ ഹര്ഷാശ്രുനികരഃ ॥ 66 ॥
ഭവന്ത്യാസ്തല്പാന്തം കൃതകപടകണ്ഡൂതിപിഹിത-സ്മിതം യാതേ ഗേഹാദ്ബഹിരവഹിതാലീപരിജനേ ।
പ്രിയാസ്യം പശ്യന്ത്യാഃ സ്മരശരസമാകൂലസുഭഗം സലജ്ജാ ലജ്ജാപി വ്യഗമദിവ ദൂരം മൃഗദൃശഃ ॥ 67 ॥
॥ ഇതി ശ്രീഗീതഗോവിന്ദേ രാധികാമിലനേ സാനന്ദദാമോദരോ നാമൈകാദശഃ സര്ഗഃ ॥
Roman (IAST) Transliteration
|| ekādaśaḥ sargaḥ ||
|| sānandadāmodaraḥ ||
suciramanunayane prīṇayitvā mṛgākṣīṃ gatavati kṛtaveśe keśave kuñjaśayyām |
racitarucirabhūṣāṃ dṛṣṭimoṣe pradoṣe sphurati niravasādāṃ kāpi rādhāṃ jagāda || 59 ||
|| gītaṃ 20 ||
viracitacāṭuvacanaracanaṃ caraṇe racitapraṇipātam |
samprati mañjulavañjulasīmani keliśayanamanuyātam ||
mugdhe madhumathanamanugatamanusara rādhike || 1 ||
ghanajaghanastanabhārabhare daramantharacaraṇavihāram |
mukharitamaṇīmañjīramupaihi vidhehi marālavikāram || 2 ||
śṛṇu ramaṇīyataraṃ taruṇījanamohanamadhupavirāvam |
kusumaśarāsanaśāsanabandini pikanikare bhaja bhāvam || 3 ||
anilataralakisalayanikareṇa kareṇa latānikurambam |
preraṇamiva karabhoru karoti gatiṃ pratimuñca vilambam || 4 ||
sphuritamanaṅgataraṅgavaśādiva sūcitahariparirambham |
pṛccha manoharahāravimalajaladhāramamuṃ kucakumbham || 5 ||
adhigatamakhilasakhībhiridaṃ tava vapurapi ratiraṇasajjam |
caṇḍi rasitaraśanāravaḍiṇḍimamabhisara sarasamalajjam || 6 ||
smaraśarasubhaganakhena kareṇa sakhīmavalambya salīlam |
cala valayakvaṇītairavabodhaya haramapi nijagatiśīlam || 7 ||
śrījayadevabhaṇitamadharīkṛtahāramudāsitavāmam |
harivinihitamanasāmadhitiṣṭhatu kaṇṭhataṭīmavirāmam || 8 ||
sā māṃ drakṣyati vakṣyati smarakathāṃ pratyaṅgamāliṅganaiḥ prītiṃ yāsyati ramyate sakhi samāgatyeti cintākulaḥ |
sa tvāṃ paśyati vepate pulakayatyānandati svidyati pratyudgacchati mūrcchati sthiratamaḥpuñje nikuñje priyaḥ || 60 ||
akṣṇornikṣipadañjanaṃ śravaṇayostāpicchagucchāvalīṃ mūrdhni śyāmasarojadāma kucayoḥ kastūrikāpātrakam |
dhūrtānāmabhisārasatvarahṛdāṃ viṣvaṅnikuñje sakhi dhvāntaṃ nīlanicolacāru sadṛśāṃ pratyaṅgamāliṅgati || 61 ||
kāśmīragauravapuṣāmabhisārikāṇāṃ ābaddharekhamabhito rucimañjarībhiḥ |
etattamāladalanīlatamaṃ tamiśraṃ tatpremahemanikaṣopalatāṃ tanoti || 62 ||
hārāvalītaralakāñcanakāñcidāma-keyūrakaṅkaṇamaṇidyutidīpitasya |
dvāre nikuñjanilayasyahariṃ nirīkṣya vrīḍāvatīmatha sakhī nijagāha rādhām || 63 ||
|| gītaṃ 21 ||
mañjutarakuñjatalakelisadane |
vilasa ratirabhasahasitavadane ||
praviśa rādhe mādhavasamīpamiha || 1 ||
navabhavadaśokadalaśayanasāre |
vilasa kucakalaśataralahāre || 2 ||
kusumacayaracitaśucivāsagehe |
vilasa kusumasukumāradehe || 3 ||
calamalayavanapavanasurabhiśīte |
vilasa rasavalitalalitagīte || 4 ||
madhumuditamadhupakulakalitarāve |
vilasa madanarasasarasabhāve || 5 ||
madhutaralapikanikaraninadamukhare |
vilasa daśanaruciruciraśikhare || 6 ||
vitata bahuvallinavapallavaghane |
vilasa ciramalasapīnajaghane || 7 ||
vihitapadmāvatīsukhasamāje |
bhaṇati jayadevakavirāje || 8 ||
tvāṃ cittena ciraṃ vahannayamatiśrānto bhṛśaṃ tāpitaḥ kandarpeṇa tu pātumicchati sudhāsambādhabimbādharam |
asyāṅgaṃ tadalaṅkuru kṣaṇamiha bhrūkṣepalakṣmīlava-krīte dāsa ivopasevitapadāmbhoje kutaḥ sambhramaḥ || 64 ||
sā sasādhvasasānandaṃ govinde lolalocanā |
siñjānamañjumañjīraṃ praviveśa niveśanam || 65 ||
|| gītaṃ 22 ||
rādhāvadanavilokanavikasitavividhavikāravibhaṅgam |
jalanidhimiva vidhumaṇḍaladarśanataralitatuṅgataraṅgam ||
harimekarasaṃ ciramabhilaṣitavilāsaṃ sā dadārśa guruharṣavaśaṃvadavadanamanaṅganivāsam || 1 ||
hāramamalataratāramurasi dadhataṃ parirabhya vidūram |
sphuṭataraphenakadambakarambitamiva yamunājalapūram || 2 ||
śyāmalamṛdulakalevaramaṇḍalamadhigatagauradukūlam |
nīlanalinamiva pītaparāgapatalabharavalayitamūlam || 3 ||
taraladṛgañcalacalanamanoharavadanajanitaratirāgam |
sphuṭakamalodarakhelitakhañjanayugamiva śaradi taḍāgam || 4 ||
vadanakamalapariśīlanamilitamihirasamakuṇḍalaśobham |
smitarucirucirasamullasitādharapallavakṛtaratilobham || 5 ||
śaśikiraṇacchuritodarajaladharasundarasakusumakeśam |
timiroditavidhumaṇdalanirmalamalayajatilakaniveśam || 6 ||
vipulapulakabharadanturitaṃ ratikelikalābhiradhīram |
maṇigaṇakiraṇasamūhasamujjvalabhūṣaṇasubhagaśarīram || 7 ||
śrījayadevabhaṇitavibhavadviguṇīkṛtabhūṣaṇabhāram |
praṇamata hṛdi suciraṃ vinidhāya hariṃ sukṛtodayasāram || 8 ||
atikramyāpāṅgaṃ śravaṇapathaparyantagamana-prayāsenevākṣṇostaralataratāraṃ patitayoḥ |
idānīṃ rādhāyāḥ priyatamasamālokasamaye papāta svedāmbuprasara iva harṣāśrunikaraḥ || 66 ||
bhavantyāstalpāntaṃ kṛtakapaṭakaṇḍūtipihita-smitaṃ yāte gehādbahiravahitālīparijane |
priyāsyaṃ paśyantyāḥ smaraśarasamākūlasubhagaṃ salajjā lajjāpi vyagamadiva dūraṃ mṛgadṛśaḥ || 67 ||
|| iti śrīgītagovinde rādhikāmilane sānandadāmodaro nāmaikādaśaḥ sargaḥ ||
InfoLyter.in — Sacred Vedic Knowledge Portal · Free forever