Gitagovindam Dashamah Sargah - Chatura Chaturbhujah

ॐ

ഗീതഗോവിന്ദം ദശമഃ സര്ഗഃ - ചതുര ചതുര്ഭുജഃ

Vishnu Gita Jayadeva Malayalam

॥ ദശമഃ സര്ഗഃ ॥

॥ ചതുരചതുര്ഭുജഃ ॥

അത്രാന്തരേ മസൃണരോഷവശാമസീമ്-നിഃശ്വാസനിഃസഹമുഖീം സുമുഖീമുപേത്യ ।

സവ്രീഡമീക്ഷിതസഖീവദനാം ദിനാന്തേ സാനന്ദഗദ്ഗദപദം ഹരിരിത്യുവാച ॥ 53 ॥

॥ ഗീതം 19 ॥

വദസി യദി കിഞ്ചിദപി ദന്തരുചികൌമുദീ ഹരതി ദരതിമിരമതിഘോരമ് ।

സ്ഫുരദധരസീധവേ തവ വദനചന്ദ്രമാ രോചയതു ലോചനചകോരമ് ॥

പ്രിയേ ചാരുശീലേ മുഞ്ച മയി മാനമനിദാനം സപദി മദനാനലോ ദഹതി മമ മാനസം ദേഹി മുഖകമലമധുപാനമ് ॥ 1 ॥

സത്യമേവാസി യദി സുദതി മയി കോപിനീ ദേഹി ഖരനഖശരഘാതമ് ।

ഘടയ ഭുജബന്ധനം ജനയ രദഖണ്ഡനം യേന വാ ഭവതി സുഖജാതമ് ॥ 2 ॥

ത്വമസി മമ ഭൂഷണം ത്വമസി മമ ജീവനം ത്വമസി ഭവജലധിരത്നമ് ।

ഭവതു ഭവതീഹ മയി സതതമനോരോധിനി തത്ര മമ ഹൃദയമതിരത്നമ് ॥ 3 ॥

നീലനലിനാഭമപി തന്വി തവ ലോചനം ധാരയതി കോകനദരൂപമ് ।

കുസുമശരബാണഭാവേന യദി രഞ്ജയസി കൃഷ്ണമിദമേതദനുരൂപമ് ॥ 4 ॥

സ്ഫുരതു കുചകുമ്ഭയോരുപരി മണിമഞ്ജരീ രഞ്ജയതു തവ ഹൃദയദേശമ് ।

രസതു രശനാപി തവ ഘനജഘനമണ്ഡലേ ഘോഷയതു മന്മഥനിദേശമ് ॥ 5 ॥

സ്ഥലകമലഗഞ്ജനം മമ ഹൃദയരഞ്ജനം ജനിതരതിരങ്ഗപരഭാഗമ് ।

ഭണ മസൃണവാണി കരവാണി പദപങ്കജം സരസലസദലക്തകരാഗമ് ॥ 6 ॥

സ്മരഗരലഖണ്ഡനം മമ ശിരസി മണ്ഡനം ദേഹി പദപല്ലവമുദാരമ് ।

ജ്വലതി മയി ദാരുണോ മദനകദനാരുണോ ഹരതു തദുപാഹിതവികാരമ് ॥ 7 ॥

ഇതി ചടുലചാടുപടുചാരു മുരവൈരിണോ രാധികാമധി വചനജാതമ് ।

ജയതി പദ്മാവതീരമണജയദേവകവി-ഭാരതീഭണിതമതിശാതമ് ॥ 8 ॥

പരിഹര കൃതാതങ്കേ ശങ്കാം ത്വയാ സതതം ഘന-സ്തനജഘനയാക്രാന്തേ സ്വാന്തേ പരാനവകാശിനി ।

വിശതി വിതനോരന്യോ ധന്യോ ന കോഽപി മമാന്തരം സ്തനഭരപരീരമ്ഭാരമ്ഭേ വിധേഹി വിധേയതാമ് ॥ 54 ॥

മുഗ്ധേ വിധേഹി മയി നിര്ദയദന്തദംശ-ദോര്വല്ലിബന്ധനിബിഡസ്തനപീഡനാനി ।

ചണ്ഡി ത്വമേവ മുദമഞ്ച ന പഞ്ചബാണ-ചണ്ഡാലകാണ്ഡദലനാദസവഃ പ്രയാന്തു ॥ 55 ॥

വ്യഥയതി വൃഥാ മൌനം തന്വി പ്രപഞ്ചയ പഞ്ചമം തരുണീ മധുരാലാപൈസ്താപം വിനോദയ ദൃഷ്ടിഭിഃ ।

സുമുഖി വിമുഖീഭാവം താവദ്വിമുഞ്ച ന മുഞ്ച മാം സ്വയമതിശയസ്നിഗ്ധോ മുഗ്ധേ പ്രിയിഽഹമുപസ്ഥിതഃ ॥ 56 ॥

ബന്ധൂകദ്യുതിബാന്ധവോഽയമധരഃ സ്നിഗ്ധോ മധൂകച്ചവി-ര്ഗണ്ഡശ്ചണ്ഡി ചകാസ്തി നീലനലിനശ്രീമോചനം ലോചനമ് ।

നാസാഭ്യേതി തിലപ്രസൂനപദവീം കുന്ദാഭദാന്തി പ്രിയേ പ്രായസ്ത്വന്മുഖസേവയാ വിജയതേ വിശ്വം സ പുഷ്പായുധഃ ॥ 57 ॥

ദൃശൌ തവ മദാലസേ വദനമിന്ദുസന്ദീപകം ഗതിര്ജനമനോരമാ വിധുതരമ്ഭമൂരുദ്വയമ് ।

രതിസ്തവ കലാവതീ രുചിരചിത്രലേഖേ ഭ്രുവാ-വഹോ വിബുധയൌവനം വഹസി തന്വീ പൃഥ്വീഗതാ ॥ 58 ॥

॥ ഇതി ശ്രീഗീതഗോവിന്ദേ മാനിനീവര്ണനേ ചതുരചതുര്ഭുജോ നാമ ദശമഃ സര്ഗഃ ॥

Roman (IAST) Transliteration

|| daśamaḥ sargaḥ ||

|| caturacaturbhujaḥ ||

atrāntare masṛṇaroṣavaśāmasīm-niḥśvāsaniḥsahamukhīṃ sumukhīmupetya |

savrīḍamīkṣitasakhīvadanāṃ dinānte sānandagadgadapadaṃ harirityuvāca || 53 ||

|| gītaṃ 19 ||

vadasi yadi kiñcidapi dantarucikaumudī harati daratimiramatighoram |

sphuradadharasīdhave tava vadanacandramā rocayatu locanacakoram ||

priye cāruśīle muñca mayi mānamanidānaṃ sapadi madanānalo dahati mama mānasaṃ dehi mukhakamalamadhupānam || 1 ||

satyamevāsi yadi sudati mayi kopinī dehi kharanakhaśaraghātam |

ghaṭaya bhujabandhanaṃ janaya radakhaṇḍanaṃ yena vā bhavati sukhajātam || 2 ||

tvamasi mama bhūṣaṇaṃ tvamasi mama jīvanaṃ tvamasi bhavajaladhiratnam |

bhavatu bhavatīha mayi satatamanorodhini tatra mama hṛdayamatiratnam || 3 ||

nīlanalinābhamapi tanvi tava locanaṃ dhārayati kokanadarūpam |

kusumaśarabāṇabhāvena yadi rañjayasi kṛṣṇamidametadanurūpam || 4 ||

sphuratu kucakumbhayorupari maṇimañjarī rañjayatu tava hṛdayadeśam |

rasatu raśanāpi tava ghanajaghanamaṇḍale ghoṣayatu manmathanideśam || 5 ||

sthalakamalagañjanaṃ mama hṛdayarañjanaṃ janitaratiraṅgaparabhāgam |

bhaṇa masṛṇavāṇi karavāṇi padapaṅkajaṃ sarasalasadalaktakarāgam || 6 ||

smaragaralakhaṇḍanaṃ mama śirasi maṇḍanaṃ dehi padapallavamudāram |

jvalati mayi dāruṇo madanakadanāruṇo haratu tadupāhitavikāram || 7 ||

iti caṭulacāṭupaṭucāru muravairiṇo rādhikāmadhi vacanajātam |

jayati padmāvatīramaṇajayadevakavi-bhāratībhaṇitamatiśātam || 8 ||

parihara kṛtātaṅke śaṅkāṃ tvayā satataṃ ghana-stanajaghanayākrānte svānte parānavakāśini |

viśati vitanoranyo dhanyo na ko'pi mamāntaraṃ stanabharaparīrambhārambhe vidhehi vidheyatām || 54 ||

mugdhe vidhehi mayi nirdayadantadaṃśa-dorvallibandhanibiḍastanapīḍanāni |

caṇḍi tvameva mudamañca na pañcabāṇa-caṇḍālakāṇḍadalanādasavaḥ prayāntu || 55 ||

vyathayati vṛthā maunaṃ tanvi prapañcaya pañcamaṃ taruṇī madhurālāpaistāpaṃ vinodaya dṛṣṭibhiḥ |

sumukhi vimukhībhāvaṃ tāvadvimuñca na muñca māṃ svayamatiśayasnigdho mugdhe priyi'hamupasthitaḥ || 56 ||

bandhūkadyutibāndhavo'yamadharaḥ snigdho madhūkaccavi-rgaṇḍaścaṇḍi cakāsti nīlanalinaśrīmocanaṃ locanam |

nāsābhyeti tilaprasūnapadavīṃ kundābhadānti priye prāyastvanmukhasevayā vijayate viśvaṃ sa puṣpāyudhaḥ || 57 ||

dṛśau tava madālase vadanamindusandīpakaṃ gatirjanamanoramā vidhutarambhamūrudvayam |

ratistava kalāvatī ruciracitralekhe bhruvā-vaho vibudhayauvanaṃ vahasi tanvī pṛthvīgatā || 58 ||

|| iti śrīgītagovinde māninīvarṇane caturacaturbhujo nāma daśamaḥ sargaḥ ||