śrībhagavānuvāca |
jñānaṃ paramaguhyaṃ me yadvijñānasamanvitam |
sarahasyaṃ tadaṅgaṃ ca gṛhāṇa gaditaṃ mayā || 1 ||
yāvānahaṃ yathābhāvo yadrūpaguṇakarmakaḥ |
tathaiva tattvavijñānamastu te madanugrahāt || 2 ||
ahamevāsamevāgre nānyadyatsadasatparam |
paścādahaṃ yadetacca yo'vaśiṣyeta so'smyaham || 3 ||
ṛte'rthaṃ yatpratīyeta na pratīyeta cātmani |
tadvidyādātmano māyāṃ yathā'bhāso yathā tamaḥ || 4 ||
yathā mahānti bhūtāni bhūteṣūccāvaceṣvanu |
praviṣṭānyapraviṣṭāni tathā teṣu na teṣvaham || 5 ||
etāvadeva jijñāsyaṃ tattvajijñāsunā'tmanaḥ |
anvayavyatirekābhyāṃ yatsyātsarvatra sarvadā || 6 ||
etanmataṃ samātiṣṭha parameṇa samādhinā |
bhavānkalpavikalpeṣu na vimuhyati karhicit || 7 ||
.. iti śrīmadbhāgavate mahāpurāṇe'ṣṭādaśasāhasryāṃ
saṃhitāyāṃ vaiyasikyāṃ dvitīyaskandhe bhagavadbrahmasaṃvāde
navamādhyāyāntargataṃ catuḥślokībhāgavataṃ samāptam . |
bhāgavatapurāṇa . adhyāya 2/9/30-36 . |