📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
ആദ്യ കാലികാ അഷ്ടോത്തര ശത നാമാവലിഃ
Adya Kalika Ashtottara Shata Namavalih
Kali Ashtottara Sata Namavali Malayalam
ശ്രീസദാശിവ ഉവാച
ശൃണു ദേവി ജഗദ്വന്ദ്യേ സ്തോത്രമേതദനുത്തമമ് ।
പഠനാച്ഛ്രവണാദ്യസ്യ സര്വസിദ്ധീശ്വരോ ഭവേത് ॥ 1 ॥
അസൌഭാഗ്യപ്രശമനം സുഖസമ്പദ്വിവര്ധനമ് ।
അകാലമൃത്യുഹരണം സര്വാപദ്വിനിവാരണമ് ॥ 2 ॥
ശ്രീമദാദ്യാകാലികായാഃ സുഖസാന്നിധ്യകാരണമ് ।
സ്തവസ്യാസ്യ പ്രസീദേന ത്രിപുരാരിരഹം പ്രിയേ ॥ 3 ॥
സ്തോത്രസ്യാസ്യ ഋഷിര്ദേവി സദാശിവ ഉദാഹൃതഃ ।
ഛന്ദോഽനുഷ്ടുബ്ദേവതാദ്യാ കാലികാ പരികീര്തിതാ ।
ധര്മകാമാര്ഥമോക്ഷേഷു വിനിയോഗഃ പ്രകീര്തിതഃ ॥ 4 ॥
അഥ സ്തോത്രമ്
ഹ്രീം കാലീ ശ്രീം കരാലീ ച ക്രീം കല്യാണീ കലാവതീ ।
കമലാ കലിദര്പഘ്നീ കപര്ദീശകൃപാന്വിതാ ॥ 5 ॥
കാലികാ കാലമാതാ ച കാലാനലസമദ്യുതിഃ ।
കപര്ദിനീ കരാലാസ്യാ കരുണാമൃതസാഗരാ ॥ 6 ॥
കൃപാമയീ കൃപാധാരാ കൃപാപാരാ കൃപാഗമാ ।
കൃശാനുഃ കപിലാ കൃഷ്ണാ കൃഷ്ണാനന്ദവിവര്ധിനീ ॥ 7 ॥
കാലരാത്രിഃ കാമരൂപാ കാമപാശവിമോചിനീ ।
കാദമ്ബിനീ കലാധാരാ കലികല്മഷനാശിനീ ॥ 8 ॥
കുമാരീപൂജനപ്രീതാ കുമാരീപൂജകാലയാ ।
കുമാരീഭോജനാനന്ദാ കുമാരീരൂപധാരിണീ ॥ 9 ॥
കദമ്ബവനസഞ്ചാരാ കദമ്ബവനവാസിനീ ।
കദമ്ബപുഷ്പസന്തോഷാ കദമ്ബപുഷ്പമാലിനീ ॥ 10 ॥
കിശോരീ കലകണ്ഠാ ച കലനാദനിനാദിനീ ।
കാദമ്ബരീപാനരതാ തഥാ കാദമ്ബരീപ്രിയാ ॥ 11 ॥
കപാലപാത്രനിരതാ കങ്കാലമാല്യധാരിണീ ।
കമലാസനസന്തുഷ്ടാ കമലാസനവാസിനീ ॥ 12 ॥
കമലാലയമധ്യസ്ഥാ കമലാമോദമോദിനീ ।
കലഹംസഗതിഃ ക്ലൈബ്യനാശിനീ കാമരൂപിണീ ॥ 13 ॥
കാമരൂപകൃതാവാസാ കാമപീഠവിലാസിനീ ।
കമനീയാ കല്പലതാ കമനീയവിഭൂഷണാ ॥ 14 ॥
കമനീയഗുണാരാധ്യാ കോമലാങ്ഗീ കൃശോദരീ ।
കാരണാമൃതസന്തോഷാ കാരണാനന്ദസിദ്ധിദാ ॥ 15 ॥
കാരണാനന്ദജാപേഷ്ടാ കാരണാര്ചനഹര്ഷിതാ ।
കാരണാര്ണവസമ്മഗ്നാ കാരണവ്രതപാലിനീ ॥ 16 ॥
കസ്തൂരീസൌരഭാമോദാ കസ്തൂരീതിലകോജ്ജ്വലാ ।
കസ്തൂരീപൂജനരതാ കസ്തൂരീപൂജകപ്രിയാ ॥ 17 ॥
കസ്തൂരീദാഹജനനീ കസ്തൂരീമൃഗതോഷിണീ ।
കസ്തൂരീഭോജനപ്രീതാ കര്പൂരാമോദമോദിതാ ॥ 18 ॥
കര്പൂരമാലാഭരണാ കര്പൂരചന്ദനോക്ഷിതാ ।
കര്പൂരകാരണാഹ്ലാദാ കര്പൂരാമൃതപായിനീ ॥ 19 ॥
കര്പൂരസാഗരസ്നാതാ കര്പൂരസാഗരാലയാ ।
കൂര്ചബീജജപപ്രീതാ കൂര്ചജാപപരായണാ ॥ 20 ॥
കുലീനാ കൌലികാരാധ്യാ കൌലികപ്രിയകാരിണീ ।
കുലാചാരാ കൌതുകിനീ കുലമാര്ഗപ്രദര്ശിനീ ॥ 21 ॥
കാശീശ്വരീ കഷ്ടഹര്ത്രീ കാശീശവരദായിനീ ।
കാശീശ്വരകൃതാമോദാ കാശീശ്വരമനോരമാ ॥ 22 ॥
കലമഞ്ജീരചരണാ ക്വണത്കാഞ്ചീവിഭൂഷണാ ।
കാഞ്ചനാദ്രികൃതാഗാരാ കാഞ്ചനാചലകൌമുദീ ॥ 23 ॥
കാമബീജജപാനന്ദാ കാമബീജസ്വരൂപിണീ ।
കുമതിഘ്നീ കുലീനാര്തിനാശിനീ കുലകാമിനീ ॥ 24 ॥
ക്രീം ഹ്രീം ശ്രീം മന്ത്രവര്ണേന കാലകണ്ടകഘാതിനീ ।
ഇത്യാദ്യാകാലികാദേവ്യാഃ ശതനാമ പ്രകീര്തിതമ് ॥ 25 ॥
കകാരകൂടഘടിതം കാലീരൂപസ്വരൂപകമ് ।
പൂജാകാലേ പഠേദ്യസ്തു കാലികാകൃതമാനസഃ ॥ 26 ॥
മന്ത്രസിദ്ധിര്ഭവേദാശു തസ്യ കാലീ പ്രസീദതി ।
ബുദ്ധിം വിദ്യാം ച ലഭതേ ഗുരോരാദേശമാത്രതഃ ॥ 27 ॥
ധനവാന് കീര്തിമാന് ഭൂയാദ്ദാനശീലോ ദയാന്വിതഃ ।
പുത്രപൌത്രസുഖൈശ്വര്യൈര്മോദതേ സാധകോ ഭുവി ॥ 28 ॥
ഭൌമാവാസ്യാനിശാഭാഗേ മപഞ്ചകസമന്വിതഃ ।
പൂജയിത്വാ മഹാകാലീമാദ്യാം ത്രിഭുവനേശ്വരീമ് ॥ 29 ॥
പഠിത്വാ ശതനാമാനി സാക്ഷാത്കാലീമയോ ഭവേത് ।
നാസാധ്യം വിദ്യതേ തസ്യ ത്രിഷു ലോകേഷു കിഞ്ചന ॥ 30 ॥
വിദ്യായാം വാക്പതിഃ സാക്ഷാത് ധനേ ധനപതിര്ഭവേത് ।
സമുദ്ര ഇവ ഗാമ്ഭീര്യേ ബലേ ച പവനോപമഃ ॥ 31 ॥
തിഗ്മാംശുരിവ ദുഷ്പ്രേക്ഷ്യഃ ശശിവച്ഛുഭദര്ശനഃ ।
രൂപേ മൂര്തിധരഃ കാമോ യോഷിതാം ഹൃദയങ്ഗമഃ ॥ 32 ॥
സര്വത്ര ജയമാപ്നോതി സ്തവസ്യാസ്യ പ്രസാദതഃ ।
യം യം കാമം പുരസ്കൃത്യ സ്തോത്രമേതദുദീരയേത് ॥ 33 ॥
തം തം കാമമവാപ്നോതി ശ്രീമദാദ്യാപ്രസാദതഃ ।
രണേ രാജകുലേ ദ്യൂതേ വിവാദേ പ്രാണസങ്കടേ ॥ 34 ॥
ദസ്യുഗ്രസ്തേ ഗ്രാമദാഹേ സിംഹവ്യാഘ്രാവൃതേ തഥാ ।
അരണ്യേ പ്രാന്തരേ ദുര്ഗേ ഗ്രഹരാജഭയേഽപി വാ ॥ 35 ॥
ജ്വരദാഹേ ചിരവ്യാധൌ മഹാരോഗാദിസങ്കുലേ ।
ബാലഗ്രഹാദി രോഗേ ച തഥാ ദുഃസ്വപ്നദര്ശനേ ॥ 36 ॥
ദുസ്തരേ സലിലേ വാപി പോതേ വാതവിപദ്ഗതേ ।
വിചിന്ത്യ പരമാം മായാമാദ്യാം കാലീം പരാത്പരാമ് ॥ 37 ॥
യഃ പഠേച്ഛതനാമാനി ദൃഢഭക്തിസമന്വിതഃ ।
സര്വാപദ്ഭ്യോ വിമുച്യേത ദേവി സത്യം ന സംശയഃ ॥ 38 ॥
ന പാപേഭ്യോ ഭയം തസ്യ ന രോഗോഭ്യോ ഭയം ക്വചിത് ।
സര്വത്ര വിജയസ്തസ്യ ന കുത്രാപി പരാഭവഃ ॥ 39 ॥
തസ്യ ദര്ശനമാത്രേണ പലായന്തേ വിപദ്ഗണാഃ ।
സ വക്താ സര്വശാസ്ത്രാണാം സ ഭോക്താ സര്വസമ്പദാമ് ॥ 40 ॥
സ കര്താ ജാതിധര്മാണാം ജ്ഞാതീനാം പ്രഭുരേവ സഃ ।
വാണീ തസ്യ വസേദ്വക്ത്രേ കമലാ നിശ്ചലാ ഗൃഹേ ॥ 41 ॥
തന്നാമ്നാ മാനവാഃ സര്വേ പ്രണമന്തി സസമ്ഭ്രമാഃ ।
ദൃഷ്ട്യാ തസ്യ തൃണായന്തേ ഹ്യണിമാദ്യഷ്ടസിദ്ധയഃ ॥ 42 ॥
ആദ്യാകാലീസ്വരൂപാഖ്യം ശതനാമ പ്രകീര്തിതമ് ।
അഷ്ടോത്തരശതാവൃത്യാ പുരശ്ചര്യാഽസ്യ ഗീയതേ ॥ 43 ॥
പുരസ്ക്രിയാന്വിതം സ്തോത്രം സര്വാഭീഷ്ടഫലപ്രദമ് ।
ശതനാമസ്തുതിമിമാമാദ്യാകാലീസ്വരൂപിണീമ് ॥ 44 ॥
പഠേദ്വാ പാഠയേദ്വാപി ശൃണുയാച്ഛ്രാവയേദപി ।
സര്വപാപവിനിര്മുക്തോ ബ്രഹ്മസായുജ്യമാപ്നുയാത് ॥ 45 ॥
ഇതി മഹാനിര്വാണതന്ത്രേ സപ്തമോല്ലാസാന്തര്ഗതം ശ്രീ ആദ്യാ കാലികാ ശതനാമ സ്തോത്രമ് ॥
Roman (IAST) Transliteration
śrīsadāśiva uvāca
śṛṇu devi jagadvandye stotrametadanuttamam |
paṭhanācchravaṇādyasya sarvasiddhīśvaro bhavet || 1 ||
asaubhāgyapraśamanaṃ sukhasampadvivardhanam |
akālamṛtyuharaṇaṃ sarvāpadvinivāraṇam || 2 ||
śrīmadādyākālikāyāḥ sukhasānnidhyakāraṇam |
stavasyāsya prasīdena tripurārirahaṃ priye || 3 ||
stotrasyāsya ṛṣirdevi sadāśiva udāhṛtaḥ |
chando'nuṣṭubdevatādyā kālikā parikīrtitā |
dharmakāmārthamokṣeṣu viniyogaḥ prakīrtitaḥ || 4 ||
atha stotram
hrīṃ kālī śrīṃ karālī ca krīṃ kalyāṇī kalāvatī |
kamalā kalidarpaghnī kapardīśakṛpānvitā || 5 ||
kālikā kālamātā ca kālānalasamadyutiḥ |
kapardinī karālāsyā karuṇāmṛtasāgarā || 6 ||
kṛpāmayī kṛpādhārā kṛpāpārā kṛpāgamā |
kṛśānuḥ kapilā kṛṣṇā kṛṣṇānandavivardhinī || 7 ||
kālarātriḥ kāmarūpā kāmapāśavimocinī |
kādambinī kalādhārā kalikalmaṣanāśinī || 8 ||
kumārīpūjanaprītā kumārīpūjakālayā |
kumārībhojanānandā kumārīrūpadhāriṇī || 9 ||
kadambavanasañcārā kadambavanavāsinī |
kadambapuṣpasantoṣā kadambapuṣpamālinī || 10 ||
kiśorī kalakaṇṭhā ca kalanādaninādinī |
kādambarīpānaratā tathā kādambarīpriyā || 11 ||
kapālapātraniratā kaṅkālamālyadhāriṇī |
kamalāsanasantuṣṭā kamalāsanavāsinī || 12 ||
kamalālayamadhyasthā kamalāmodamodinī |
kalahaṃsagatiḥ klaibyanāśinī kāmarūpiṇī || 13 ||
kāmarūpakṛtāvāsā kāmapīṭhavilāsinī |
kamanīyā kalpalatā kamanīyavibhūṣaṇā || 14 ||
kamanīyaguṇārādhyā komalāṅgī kṛśodarī |
kāraṇāmṛtasantoṣā kāraṇānandasiddhidā || 15 ||
kāraṇānandajāpeṣṭā kāraṇārcanaharṣitā |
kāraṇārṇavasammagnā kāraṇavratapālinī || 16 ||
kastūrīsaurabhāmodā kastūrītilakojjvalā |
kastūrīpūjanaratā kastūrīpūjakapriyā || 17 ||
kastūrīdāhajananī kastūrīmṛgatoṣiṇī |
kastūrībhojanaprītā karpūrāmodamoditā || 18 ||
karpūramālābharaṇā karpūracandanokṣitā |
karpūrakāraṇāhlādā karpūrāmṛtapāyinī || 19 ||
karpūrasāgarasnātā karpūrasāgarālayā |
kūrcabījajapaprītā kūrcajāpaparāyaṇā || 20 ||
kulīnā kaulikārādhyā kaulikapriyakāriṇī |
kulācārā kautukinī kulamārgapradarśinī || 21 ||
kāśīśvarī kaṣṭahartrī kāśīśavaradāyinī |
kāśīśvarakṛtāmodā kāśīśvaramanoramā || 22 ||
kalamañjīracaraṇā kvaṇatkāñcīvibhūṣaṇā |
kāñcanādrikṛtāgārā kāñcanācalakaumudī || 23 ||
kāmabījajapānandā kāmabījasvarūpiṇī |
kumatighnī kulīnārtināśinī kulakāminī || 24 ||
krīṃ hrīṃ śrīṃ mantravarṇena kālakaṇṭakaghātinī |
ityādyākālikādevyāḥ śatanāma prakīrtitam || 25 ||
kakārakūṭaghaṭitaṃ kālīrūpasvarūpakam |
pūjākāle paṭhedyastu kālikākṛtamānasaḥ || 26 ||
mantrasiddhirbhavedāśu tasya kālī prasīdati |
buddhiṃ vidyāṃ ca labhate gurorādeśamātrataḥ || 27 ||
dhanavān kīrtimān bhūyāddānaśīlo dayānvitaḥ |
putrapautrasukhaiśvaryairmodate sādhako bhuvi || 28 ||
bhaumāvāsyāniśābhāge mapañcakasamanvitaḥ |
pūjayitvā mahākālīmādyāṃ tribhuvaneśvarīm || 29 ||
paṭhitvā śatanāmāni sākṣātkālīmayo bhavet |
nāsādhyaṃ vidyate tasya triṣu lokeṣu kiñcana || 30 ||
vidyāyāṃ vākpatiḥ sākṣāt dhane dhanapatirbhavet |
samudra iva gāmbhīrye bale ca pavanopamaḥ || 31 ||
tigmāṃśuriva duṣprekṣyaḥ śaśivacchubhadarśanaḥ |
rūpe mūrtidharaḥ kāmo yoṣitāṃ hṛdayaṅgamaḥ || 32 ||
sarvatra jayamāpnoti stavasyāsya prasādataḥ |
yaṃ yaṃ kāmaṃ puraskṛtya stotrametadudīrayet || 33 ||
taṃ taṃ kāmamavāpnoti śrīmadādyāprasādataḥ |
raṇe rājakule dyūte vivāde prāṇasaṅkaṭe || 34 ||
dasyugraste grāmadāhe siṃhavyāghrāvṛte tathā |
araṇye prāntare durge graharājabhaye'pi vā || 35 ||
jvaradāhe ciravyādhau mahārogādisaṅkule |
bālagrahādi roge ca tathā duḥsvapnadarśane || 36 ||
dustare salile vāpi pote vātavipadgate |
vicintya paramāṃ māyāmādyāṃ kālīṃ parātparām || 37 ||
yaḥ paṭhecchatanāmāni dṛḍhabhaktisamanvitaḥ |
sarvāpadbhyo vimucyeta devi satyaṃ na saṃśayaḥ || 38 ||
na pāpebhyo bhayaṃ tasya na rogobhyo bhayaṃ kvacit |
sarvatra vijayastasya na kutrāpi parābhavaḥ || 39 ||
tasya darśanamātreṇa palāyante vipadgaṇāḥ |
sa vaktā sarvaśāstrāṇāṃ sa bhoktā sarvasampadām || 40 ||
sa kartā jātidharmāṇāṃ jñātīnāṃ prabhureva saḥ |
vāṇī tasya vasedvaktre kamalā niścalā gṛhe || 41 ||
tannāmnā mānavāḥ sarve praṇamanti sasambhramāḥ |
dṛṣṭyā tasya tṛṇāyante hyaṇimādyaṣṭasiddhayaḥ || 42 ||
ādyākālīsvarūpākhyaṃ śatanāma prakīrtitam |
aṣṭottaraśatāvṛtyā puraścaryā'sya gīyate || 43 ||
puraskriyānvitaṃ stotraṃ sarvābhīṣṭaphalapradam |
śatanāmastutimimāmādyākālīsvarūpiṇīm || 44 ||
paṭhedvā pāṭhayedvāpi śṛṇuyācchrāvayedapi |
sarvapāpavinirmukto brahmasāyujyamāpnuyāt || 45 ||
iti mahānirvāṇatantre saptamollāsāntargataṃ śrī ādyā kālikā śatanāma stotram ||
InfoLyter.in — Sacred Vedic Knowledge Portal · Free forever