Vishnu Shatpadi — InfoLyter.in

ॐ

विष्णु षट्पदि

Vishnu Shatpadi

Vishnu Adi Shankaracharya Devanagari

अविनयमपनय विष्णो दमय मनः शमय विषयमृगतृष्णाम् ।

भूतदयां विस्तारय तारय संसारसागरतः ॥ 1 ॥

दिव्यधुनीमकरन्दे परिमलपरिभोगसच्चिदानन्दे ।

श्रीपतिपदारविन्दे भवभयखेदच्छिदे वन्दे ॥ 2 ॥

सत्यपि भेदापगमे नाथ तवाऽहं न मामकीनस्त्वम् ।

सामुद्रो हि तरङ्गः क्वचन समुद्रो न तारङ्गः ॥ 3 ॥

उद्धृतनग नगभिदनुज दनुजकुलामित्र मित्रशशिदृष्टे ।

दृष्टे भवति प्रभवति न भवति किं भवतिरस्कारः ॥ 4 ॥

मत्स्यादिभिरवतारैरवतारवताऽवता सदा वसुधाम् ।

परमेश्वर परिपाल्यो भवता भवतापभीतोऽहम् ॥ 5 ॥

दामोदर गुणमन्दिर सुन्दरवदनारविन्द गोविन्द ।

भवजलधिमथनमन्दर परमं दरमपनय त्वं मे ॥ 6 ॥

नारायण करुणामय शरणं करवाणि तावकौ चरणौ ।

इति षट्पदी मदीये वदनसरोजे सदा वसतु ॥

इति श्रीमच्चङ्कराचार्य विरचितं श्री विष्णु षट्पदी स्तोत्रं सम्पूर्णम्

Roman (IAST) Transliteration

avinayamapanaya viṣṇo damaya manaḥ śamaya viṣayamṛgatṛṣṇām |

bhūtadayāṃ vistāraya tāraya saṃsārasāgarataḥ || 1 ||

divyadhunīmakarande parimalaparibhogasaccidānande |

śrīpatipadāravinde bhavabhayakhedacchide vande || 2 ||

satyapi bhedāpagame nātha tavā'haṃ na māmakīnastvam |

sāmudro hi taraṅgaḥ kvacana samudro na tāraṅgaḥ || 3 ||

uddhṛtanaga nagabhidanuja danujakulāmitra mitraśaśidṛṣṭe |

dṛṣṭe bhavati prabhavati na bhavati kiṃ bhavatiraskāraḥ || 4 ||

matsyādibhiravatārairavatāravatā'vatā sadā vasudhām |

parameśvara paripālyo bhavatā bhavatāpabhīto'ham || 5 ||

dāmodara guṇamandira sundaravadanāravinda govinda |

bhavajaladhimathanamandara paramaṃ daramapanaya tvaṃ me || 6 ||

nārāyaṇa karuṇāmaya śaraṇaṃ karavāṇi tāvakau caraṇau |

iti ṣaṭpadī madīye vadanasaroje sadā vasatu ||

iti śrīmaccaṅkarācārya viracitaṃ śrī viṣṇu ṣaṭpadī stotraṃ sampūrṇam