(तै-आ-10-38ः40)
ओ-म्ब्रह्म॑मेतु॒ माम् । मधु॑मेतु॒ माम् ।
ब्रह्म॑मे॒व मधु॑मेतु॒ माम् ।
यास्ते॑ सोम प्र॒जा व॒थ्सो-ऽभि॒ सो अ॒हम् ।
दुष्ष्व॑प्न॒हन्दु॑रुष्व॒ह ।
यास्ते॑ सोम प्रा॒णाग्ंस्ताञ्जु॑होमि ।
त्रिसु॑पर्ण॒मया॑चित-म्ब्राह्म॒णाय॑ दद्यात् ।
ब्र॒ह्म॒ह॒त्यां-वाँ ए॒ते घ्न॑न्ति ।
ये ब्रा᳚ह्म॒णास्त्रिसु॑पर्ण॒-म्पठ॑न्ति ।
ते सोम॒-म्प्राप्नु॑वन्ति ।
आ॒स॒ह॒स्रात्प॒ङ्क्ति-म्पुन॑न्ति ।
ब्रह्म॑ मे॒धया᳚ ।
मधु॑ मे॒धया᳚ ।
ब्रह्म॑मे॒व मधु॑ मे॒धया᳚ ।
अ॒द्या नो॑ देव सवितः प्र॒जाव॑त्सावी॒स्सौभ॑गम् ।
परा॑ दु॒ष्वप्नि॑यग्ं सुव ।
विश्वा॑नि देव सवितर्दुरि॒तानि॒ परा॑सुव ।
यद्भ॒द्र-न्तन्म॒ आसु॑व ।
मधु॒ वाता॑ ऋताय॒ते मधु॑ क्षरन्ति॒ सिन्ध॑वः ।
माध्वी᳚र्नस्स॒न्त्वोष॑धीः ।
मधु॒ नक्त॑मु॒तोषसि॒ मधु॑म॒त्पार्थि॑व॒ग्ं॒ रजः॑ ।
मधु॒ द्यौर॑स्तु नः पि॒ता ।
मधु॑ मान्नो॒ वन॒स्पति॒र्मधु॑माग्ं अस्तु॒ सूर्यः॑ ।
माध्वी॒र्गावो॑ भवन्तु नः ।
य इ॒म-न्त्रिसु॑पर्ण॒मया॑चित-म्ब्राह्म॒णाय॑ दद्यात् ।
भ्रू॒ण॒ह॒त्यां-वाँ ए॒ते घ्न॑न्ति ।
ये ब्रा᳚ह्म॒णास्त्रिसु॑पर्ण॒-म्पठ॑न्ति ।
ते सोम॒-म्प्राप्नु॑वन्ति ।
आ॒स॒ह॒स्रात्प॒ङ्क्ति-म्पुन॑न्ति ।
ब्रह्म॑ मे॒धवा᳚ ।
मधु॑ मे॒धवा᳚ ।
ब्रह्म॑मे॒व मधु॑ मे॒धवा᳚ ।
ब्र॒ह्मा दे॒वाना᳚-म्पद॒वीः क॑वी॒नामृषि॒र्विप्रा॑णा-म्महि॒षो मृ॒गाणा᳚म् ।
श्ये॒नो गृद्ध्रा॑णा॒ग्ं॒ स्वधि॑ति॒र्वना॑ना॒ग्ं॒ सोमः॑ प॒वित्र॒मत्ये॑ति॒ रेभन्न्॑ ।
ह॒ग्ं॒सश्शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।
नृ॒षद्व॑र॒सदृ॑त॒सद्व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒त-म्बृ॒हत् ।
ऋ॒चे त्वा॑ रु॒चे त्वा॒ समित्स्र॑वन्ति स॒रितो॒ न धेनाः᳚ ।
अ॒न्तर्हृ॒दा मन॑सा पू॒यमा॑नाः ।
घृ॒तस्य॒ धारा॑ अ॒भिचा॑कशीमि ।
हि॒र॒ण्ययो॑ वेत॒सो मद्ध्य॑ आसाम् ।
तस्मि᳚न्थ्सुप॒र्णो म॑धु॒कृ-त्कु॑ला॒यी भज॑न्नास्ते॒ मधु॑ दे॒वता᳚भ्यः ।
तस्या॑सते॒ हर॑यस्स॒प्त तीरे᳚ स्व॒धा-न्दुहा॑ना अ॒मृत॑स्य॒ धारा᳚म् ।
य इ॒द-न्त्रिसु॑पर्ण॒मया॑चित-म्ब्राह्म॒णाय॑ दद्यात् ।
वी॒र॒ह॒त्यां-वाँ ए॒ते घ्नन्ति ।
ये ब्रा᳚ह्म॒णास्त्रिसु॑पर्ण॒-म्पठ॑न्ति ।
ते सोम॒-म्प्राप्नु॑वन्ति ।
आ॒स॒ह॒स्रात्प॒ङ्क्ति-म्पुन॑न्ति ।
ॐ शान्ति॒-श्शान्ति॒-श्शान्तिः॑ ॥
Roman (IAST) Transliteration
(tai-ā-10-38ḥ40)
o-mbrahma̭metu॒ mām | madhṷmetu॒ mām |
brahma̭me॒va madhṷmetu॒ mām |
yāstḙ soma pra॒jā va॒thso-'bhi॒ so a॒ham |
duṣṣva̭pna॒handṷruṣva॒ha |
yāstḙ soma prā॒ṇāgṃstāñjṷhomi |
trisṷparṇa॒mayā̭cita-mbrāhma॒ṇāya̭ dadyāt |
bra॒hma॒ha॒tyāṃ-vā~ e॒te ghna̭nti |
ye brā᳚hma॒ṇāstrisṷparṇa॒-mpaṭha̭nti |
te soma॒-mprāpnṷvanti |
ā॒sa॒ha॒srātpa॒ṅkti-mpuna̭nti |
om || 1
brahma̭ me॒dhayā᳚ |
madhṷ me॒dhayā᳚ |
brahma̭me॒va madhṷ me॒dhayā᳚ |
a॒dyā no̭ deva savitaḥ pra॒jāva̭tsāvī॒ssaubha̭gam |
parā̭ du॒ṣvapni̭yagṃ suva |
viśvā̭ni deva savitarduri॒tāni॒ parā̭suva |
yadbha॒dra-ntanma॒ āsṷva |
madhu॒ vātā̭ ṛtāya॒te madhṷ kṣaranti॒ sindha̭vaḥ |
mādhvī᳚rnassa॒ntvoṣa̭dhīḥ |
madhu॒ nakta̭mu॒toṣasi॒ madhṷma॒tpārthi̭va॒gṃ॒ rajaḥ̭ |
madhu॒ dyaura̭stu naḥ pi॒tā |
madhṷ mānno॒ vana॒spati॒rmadhṷmāgṃ astu॒ sūryaḥ̭ |
mādhvī॒rgāvo̭ bhavantu naḥ |
ya i॒ma-ntrisṷparṇa॒mayā̭cita-mbrāhma॒ṇāya̭ dadyāt |
bhrū॒ṇa॒ha॒tyāṃ-vā~ e॒te ghna̭nti |
ye brā᳚hma॒ṇāstrisṷparṇa॒-mpaṭha̭nti |
te soma॒-mprāpnṷvanti |
ā॒sa॒ha॒srātpa॒ṅkti-mpuna̭nti |
om || 2
brahma̭ me॒dhavā᳚ |
madhṷ me॒dhavā᳚ |
brahma̭me॒va madhṷ me॒dhavā᳚ |
bra॒hmā de॒vānā᳚-mpada॒vīḥ ka̭vī॒nāmṛṣi॒rviprā̭ṇā-mmahi॒ṣo mṛ॒gāṇā᳚m |
śye॒no gṛddhrā̭ṇā॒gṃ॒ svadhi̭ti॒rvanā̭nā॒gṃ॒ somaḥ̭ pa॒vitra॒matyḙti॒ rebhanṋ |
ha॒gṃ॒saśśṷci॒ṣadvasṷrantarikṣa॒saddhotā̭ vedi॒ṣadati̭thirduroṇa॒sat |
nṛ॒ṣadva̭ra॒sadṛ̭ta॒sadvyo̭ma॒sada॒bjā go॒jā ṛ̭ta॒jā a̭dri॒jā ṛ॒ta-mbṛ॒hat |
ṛ॒ce tvā̭ ru॒ce tvā॒ samitsra̭vanti sa॒rito॒ na dhenāḥ᳚ |
a॒ntarhṛ॒dā mana̭sā pū॒yamā̭nāḥ |
ghṛ॒tasya॒ dhārā̭ a॒bhicā̭kaśīmi |
hi॒ra॒ṇyayo̭ veta॒so maddhya̭ āsām |
tasmi᳚nthsupa॒rṇo ma̭dhu॒kṛ-tkṷlā॒yī bhaja̭nnāste॒ madhṷ de॒vatā᳚bhyaḥ |
tasyā̭sate॒ hara̭yassa॒pta tīre᳚ sva॒dhā-nduhā̭nā a॒mṛta̭sya॒ dhārā᳚m |
ya i॒da-ntrisṷparṇa॒mayā̭cita-mbrāhma॒ṇāya̭ dadyāt |
vī॒ra॒ha॒tyāṃ-vā~ e॒te ghnanti |
ye brā᳚hma॒ṇāstrisṷparṇa॒-mpaṭha̭nti |
te soma॒-mprāpnṷvanti |
ā॒sa॒ha॒srātpa॒ṅkti-mpuna̭nti |
om || 3
oṃ śānti॒-śśānti॒-śśāntiḥ̭ ||