5.36 Sundarakanda - Shattrimsha Sargah

ॐ

5.36 ಸುನ್ದರಕಾಣ್ಡ - ಷಟ್ತ್ರಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಸುನ್ದರಕಾಣ್ಡಮ್ ।

ಅಥ ಷಟ್ತ್ರಿಂಶಸ್ಸರ್ಗಃ ।

ಭೂಯ ಏವ ಮಹಾತೇಜಾ ಹನೂಮಾನ್ಪವನಾತ್ಮಜಃ ।

ಅಬ್ರವೀತ್ಪ್ರಶ್ರಿತಂ ವಾಕ್ಯಂ ಸೀತಾಪ್ರತ್ಯಯಕಾರಣಾತ್ ॥ 1 ॥

ವಾನರೋಽಹಂ ಮಹಾಭಾಗೇ ದೂತೋ ರಾಮಸ್ಯ ಧೀಮತಃ ।

ರಾಮನಾಮಾಙ್ಕಿತಂ ಚೇದಂ ಪಶ್ಯ ದೇವ್ಯಙ್ಗುಲೀಯಕಮ್ ॥ 2 ॥

ಪ್ರತ್ಯಯಾರ್ಥಂ ತವಾಽನೀತಂ ತೇನ ದತ್ತಂ ಮಹಾತ್ಮನಾ ।

ಸಮಾಶ್ವಸಿಹಿ ಭದ್ರಂ ತೇ ಕ್ಷೀಣದುಃಖಫಲಾ ಹ್ಯಸಿ ॥ 3 ॥

ಗೃಹೀತ್ವಾ ಪ್ರೇಕ್ಷಮಾಣಾ ಸಾ ಭರ್ತುಃ ಕರವಿಭೂಷಣಮ್ ।

ಭರ್ತಾರಮಿವ ಸಮ್ಪ್ರಾಪ್ತಾ ಜಾನಕೀ ಮುದಿತಾಽಭವತ್ ॥ 4 ॥

ಚಾರು ತದ್ವದನಂ ತಸ್ಯಾಸ್ತಾಮ್ರಶುಕ್ಲಾಯತೇಕ್ಷಣಮ್ ।

ಅಶೋಭತ ವಿಶಾಲಾಕ್ಷ್ಯಾ ರಾಹುಮುಕ್ತ ಇವೋಡುರಾಟ್ ॥ 5 ॥

ತತಸ್ಸಾ ಹ್ರೀಮತೀ ಬಾಲಾ ಭರ್ತೃಸನ್ದೇಶಹರ್ಷಿತಾ ।

ಪರಿತುಷ್ಟಾ ಪ್ರಿಯಂ ಕೃತ್ವಾ ಪ್ರಶಶಂಸ ಮಹಾಕಪಿಮ್ ॥ 6 ॥

ವಿಕ್ರಾನ್ತಸ್ತ್ವಂ ಸಮರ್ಥಸ್ತ್ವಂ ಪ್ರಾಜ್ಞಸ್ತ್ವಂ ವಾನರೋತ್ತಮ ।

ಯೇನೇದಂ ರಾಕ್ಷಸಪದಂ ತ್ವಯೈಕೇನ ಪ್ರಧರ್ಷಿತಮ್ ॥ 7 ॥

ಶತಯೋಜನವಿಸ್ತೀರ್ಣ ಸ್ಸಾಗರೋ ಮಕರಾಲಯಃ ।

ವಿಕ್ರಮಶ್ಲಾಘನೀಯೇನ ಕ್ರಮತಾ ಗೋಷ್ಪದೀಕೃತಃ ॥ 8 ॥

ನ ಹಿ ತ್ವಾಂ ಪ್ರಾಕೃತಂ ಮನ್ಯೇ ವಾನರಂ ವಾನರರ್ಷಭ ।

ಯಸ್ಯ ತೇ ನಾಸ್ತಿ ಸನ್ತ್ರಾಸೋ ರಾವಣಾನ್ನಾಪಿ ಸಮ್ಭ್ರಮಃ ॥ 9 ॥

ಅರ್ಹಸೇ ಚ ಕಪಿಶ್ರೇಷ್ಠ ಮಯಾ ಸಮಭಿಭಾಷಿತುಮ್ ।

ಯದ್ಯಸಿ ಪ್ರೇಷಿತಸ್ತೇನ ರಾಮೇಣ ವಿದಿತಾತ್ಮನಾ ॥ 10 ॥

ಪ್ರೇಷಯಿಷ್ಯತಿ ದುರ್ಧರ್ಷೋ ರಾಮೋ ನ ಹ್ಯಪರೀಕ್ಷಿತಮ್ ।

ಪರಾಕ್ರಮಮವಿಜ್ಞಾಯ ಮತ್ಸಕಾಶಂ ವಿಶೇಷತಃ ॥ 11 ॥

ದಿಷ್ಟ್ಯಾ ಚ ಕುಶಲೀ ರಾಮೋ ಧರ್ಮಾತ್ಮಾ ಸತ್ಯಸಙ್ಗರಃ ।

ಲಕ್ಷ್ಮಣಶ್ಚ ಮಹಾತೇಜಾಸ್ಸುಮಿತ್ರಾನನ್ದವರ್ಧನಃ ॥ 12 ॥

ಕುಶಲೀ ಯದಿ ಕಾಕುತ್ಸ್ಥಃ ಕಿಂ ನು ಸಾಗರಮೇಖಲಾಮ್ ।

ಮಹೀಂ ದಹತಿ ಕೋಪೇನ ಯುಗಾನ್ತಾಗ್ನಿರಿವೋತ್ಥಿತಃ ॥ 13 ॥

ಅಥವಾ ಶಕ್ತಿಮನ್ತೌ ತೌ ಸುರಾಣಾಮಪಿ ನಿಗ್ರಹೇ ।

ಮಮೈವ ತು ನ ದುಃಖಾನಾಮಸ್ತಿ ಮನ್ಯೇ ವಿಪರ್ಯಯಃ ॥ 14 ॥

ಕಚ್ಚಿನ್ನ ವ್ಯಥಿತೋ ರಾಮಃ ಕಚ್ಚಿನ್ನ ಪರಿತಪ್ಯತೇ ।

ಉತ್ತರಾಣಿ ಚ ಕಾರ್ಯಾಣಿ ಕುರುತೇ ಪುರುಷೋತ್ತಮಃ ॥ 15 ॥

ಕಚ್ಚಿನ್ನ ದೀನ ಸ್ಸಮ್ಭ್ರಾನ್ತಃ ಕಾರ್ಯೇಷು ನ ಚ ಮುಹ್ಯತಿ ।

ಕಚ್ಚಿತ್ಪುರುಷಕಾರ್ಯಾಣಿ ಕುರುತೇ ನೃಪತೇಸ್ಸುತಃ ॥ 16 ॥

ದ್ವಿವಿಧಂ ತ್ರಿವಿಧೋಪಾಯಮುಪಾಯಮಪಿ ಸೇವತೇ ।

ವಿಜಿಗೀಷುಸ್ಸುಹೃತ್ಕಚ್ಚಿನ್ಮಿತ್ರೇಷು ಚ ಪರನ್ತಪಃ ॥ 17 ॥

ಕಚ್ಚಿನ್ಮಿತ್ರಾಣಿ ಲಭತೇ ಮಿತ್ರೈಶ್ಚಾಪ್ಯಭಿಗಮ್ಯತೇ ।

ಕಚ್ಚಿತ್ಕಲ್ಯಾಣಮಿತ್ತ್ರಶ್ಚ ಮಿತ್ರತ್ತ್ರೈಶ್ಚಾಪಿ ಪುರಸ್ಕೃತಃ ॥ 18 ॥

ಕಚ್ಚಿದಾಶಾಸ್ತಿ ದೇವಾನಾಂ ಪ್ರಸಾದಂ ಪಾರ್ಥಿವಾತ್ಮಜಃ ।

ಕಚ್ಚಿತ್ಪುರುಷಕಾರಂ ಚ ದೈವಂ ಚ ಪ್ರತಿಪದ್ಯತೇ ॥ 19 ॥

ಕಚ್ಚಿನ್ನ ವಿಗತಸ್ನೇಹಃ ಪ್ರವಾಸಾನ್ಮಯಿ ರಾಘವಃ ।

ಕಚ್ಚಿನ್ಮಾಂ ವ್ಯಸನಾದಸ್ಮಾನ್ಮೋಕ್ಷಯಿಷ್ಯತಿ ವಾನರ ॥ 20 ॥

ಸುಖಾನಾಮುಚಿತೋ ನಿತ್ಯಮಸುಖಾನಾಮನೌಚಿತಃ ।

ದುಃಖಮುತ್ತರಮಾಸಾದ್ಯ ಕಚ್ಚಿದ್ರಾಮೋ ನ ಸೀದತಿ ॥ 21 ॥

ಕೌಸಲ್ಯಾಯಾಸ್ತಥಾ ಕಚ್ಚಿತ್ಸುಮಿತ್ರಾಯಾಸ್ತಥೈವ ಚ ।

ಅಭೀಕ್ಷ್ಣಂ ಶ್ರೂಯತೇ ಕಚ್ಚಿತ್ಕುಶಲಂ ಭರತಸ್ಯ ಚ ॥ 22 ॥

ಮನ್ನಿಮಿತ್ತೇನ ಮಾನಾರ್ಹಃ ಕಚ್ಚಿಚ್ಛೋಕೇನ ರಾಘವಃ ।

ಕಚ್ಚಿನ್ನಾನ್ಯಮನಾ ರಾಮಃ ಕಚ್ಚಿನ್ಮಾಂ ತಾರಯಿಷ್ಯತಿ ॥ 23 ॥

ಕಚ್ಚಿದಕ್ಷೌಹಿಣೀಂ ಭೀಮಾಂ ಭರತೋ ಭ್ರಾತೃವತ್ಸಲಃ ।

ಧ್ವಜಿನೀಂ ಮನ್ತ್ರಿಭಿರ್ಗುಪ್ತಾಂ ಪ್ರೇಷಯಿಷ್ಯತಿ ಮತ್ಕೃತೇ ॥ 24 ॥

ವಾನರಾಧಿಪತಿಶ್ಶೀಮಾನ್ಸುಗ್ರೀವಃ ಕಚ್ಚಿದೇಷ್ಯತಿ ।

ಮತ್ಕೃತೇ ಹರಿಭಿರ್ವೀರೈರ್ವೃತೋ ದನ್ತನಖಾಯುಧೈಃ ॥ 25 ॥

ಕಚ್ಚಿಚ್ಛ ಲಕ್ಷ್ಮಣಶ್ಶೂರಸ್ಸುಮಿತ್ರಾನನ್ದವರ್ಧನಃ ।

ಅಸ್ತ್ರವಿಚ್ಛರಜಾಲೇನ ರಾಕ್ಷಸಾನ್ವಿಧಮಿಷ್ಯತಿ ॥ 26 ॥

ರೌದ್ರೇಣ ಕಚ್ಚಿದಸ್ತ್ರೇಣ ಜ್ವಲತಾ ನಿಹತಂ ರಣೇ ।

ದ್ರಕ್ಷ್ಯಾಮ್ಯಲ್ಪೇನ ಕಾಲೇನ ರಾವಣಂ ಸಸುಹೃಜ್ಜನಮ್ ॥ 27 ॥

ಕಚ್ಚಿನ್ನ ತದ್ಧೇಮಸಮಾನವರ್ಣಂ ತಸ್ಯಾನನಂ ಪದ್ಮಸಮಾನಗನ್ಧಿ ।

ಮಯಾ ವಿನಾ ಶುಷ್ಯತಿ ಶೋಕದೀನಂ ಜಲಕ್ಷಯೇ ಪದ್ಮಮಿವಾತಪೇನ ॥ 28 ॥

ಧರ್ಮಾಪದೇಶಾತ್ತ್ಯಜತಶ್ಚ ರಾಜ್ಯಂ ಮಾಂ ಚಾಪ್ಯರಣ್ಯಂ ನಯತಃ ಪದಾತಿಮ್ ।

ನಾಸೀದ್ವ್ಯಥಾ ಯಸ್ಯ ನ ಭೀರ್ನ ಶೋಕಃ ಕಚ್ಚಿತ್ಸ ಧೈರ್ಯಂ ಹೃದಯೇ ಕರೋತಿ ॥ 29 ॥

ನ ಚಾಸ್ಯ ಮಾತಾ ನ ಪಿತಾ ಚ ನಾನ್ಯಃ ಸ್ನೇಹಾದ್ವಿಶಿಷ್ಟೋಽಸ್ತಿ ಮಯಾ ಸಮೋ ವಾ ।

ತಾವತ್ತ್ವಹಂ ದೂತ ಜಿಜೀವಿಷೇಯಂ ಯಾವತ್ಪ್ರವೃತ್ತಿಂ ಶೃಣುಯಾಂ ಪ್ರಿಯಸ್ಯ ॥ 30 ॥

ಇತೀವ ದೇವೀ ವಚನಂ ಮಹಾರ್ಥಂ ತಂ ವಾನರೇನ್ದ್ರಂ ಮಧುರಾರ್ಥಮುಕ್ತ್ವಾ ।

ಶ್ರೋತುಂ ಪುನಸ್ತಸ್ಯ ವಚೋಽಭಿರಾಮಂ ರಾಮಾರ್ಥಯುಕ್ತಂ ವಿರರಾಮ ರಾಮಾ ॥ 31 ॥

ಸೀತಾಯಾ ವಚನಂ ಶ್ರುತ್ವಾ ಮಾರುತಿರ್ಭೀಮವಿಕ್ರಮಃ ।

ಶಿರಸ್ಯಞ್ಜಲಿಮಾಧಾಯ ವಾಕ್ಯಮುತ್ತರಮಬ್ರವೀತ್ ॥ 32 ॥

ನ ತ್ವಾಮಿಹಸ್ಥಾಂ ಜಾನೀತೇ ರಾಮಃ ಕಮಲಲೋಚನೇ ।

ತೇನ ತ್ವಾಂ ನಾನಯತ್ಯಾಶು ಶಚೀಮಿವ ಪುರನ್ದರಃ ॥ 33 ॥

ಶ್ರುತ್ವೈವ ತು ವಚೋ ಮಹ್ಯಂ ಕ್ಷಿಪ್ರಮೇಷ್ಯತಿ ರಾಘವಃ ।

ಚಮೂಂ ಪ್ರಕರ್ಷನ್ಮಹತೀಂ ಹರ್ಯೃಕ್ಷಗಣಸಙ್ಕುಲಾಮ್ ॥ 34 ॥

ವಿಷ್ಟಮ್ಭಯಿತ್ವಾ ಬಾಣೌಘೈರಕ್ಷೋಭ್ಯಂ ವರುಣಾಲಯಮ್ ।

ಕರಿಷ್ಯತಿ ಪುರೀಂ ಲಙ್ಕಾಂ ಕಾಕುತ್ಸ್ಥಃ ಶಾನ್ತರಾಕ್ಷಸಾಮ್ ॥ 35 ॥

ತತ್ರ ಯದ್ಯನ್ತರಾ ಮೃತ್ಯುರ್ಯದಿ ದೇವಾಸ್ಸಹಾಸುರಾಃ ।

ಸ್ಥಾಸ್ಯನ್ತಿ ಪಥಿ ರಾಮಸ್ಯ ಸ ತಾನಪಿ ವಧಿಷ್ಯತಿ ॥ 36 ॥

ತವಾದರ್ಶನಜೇನಾರ್ಯೇ ಶೋಕೇನ ಸ ಪರಿಪ್ಲುತಃ ।

ನ ಶರ್ಮ ಲಭತೇ ರಾಮಸ್ಸಿಂಹಾರ್ದಿತ ಇವ ದ್ವಿಪಃ ॥ 37 ॥

ಮಲಯೇನ ಚ ವಿನ್ಧ್ಯೇನ ಮೇರುಣಾ ಮನ್ದರೇಣ ಚ ।

ದರ್ದುರೇಣ ಚ ತೇ ದೇವಿ ಶಪೇ ಮೂಲಫಲೇನ ಚ ॥ 38 ॥

ಯಥಾ ಸುನಯನಂ ವಲ್ಗು ಬಿಮ್ಬೋಷ್ಠಂ ಚಾರು ಕುಣ್ಡಲಮ್ ।

ಮುಖಂ ದ್ರಕ್ಷ್ಯಸಿ ರಾಮಸ್ಯ ಪೂರ್ಣಚನ್ದ್ರಮಿವೋದಿತಮ್ ॥ 39 ॥

ಕ್ಷಿಪ್ರಂ ದ್ರಕ್ಷ್ಯಸಿ ವೈದೇಹಿ ರಾಮಂ ಪ್ರಸ್ರವಣೇ ಗಿರೌ ।

ಶತಕ್ರತುಮಿವಾಸೀನಂ ನಾಗರಾಜಸ್ಯ ಮೂರ್ಧನಿ ॥ 40 ॥

ನ ಮಾಂಸಂ ರಾಘವೋ ಭುಙಕ್ತೇ ನ ಚಾಽಪಿ ಮಧು ಸೇವತೇ ।

ವನ್ಯಂ ಸುವಿಹಿತಂ ನಿತ್ಯಂ ಭಕ್ತಮಶ್ನಾತಿ ಪಞ್ಚಮಮ್ ॥ 41 ॥

ನೈವ ದಂಶಾನ್ನ ಮಶಕಾನ್ನ ಕೀಟಾನ್ನ ಸರೀಸೃಪಾನ್ ।

ರಾಘವೋಽಪನಯೇದ್ಗಾತ್ರಾತ್ತ್ವದ್ಗತೇನಾನ್ತರಾತ್ಮನಾ ॥ 42 ॥

ನಿತ್ಯಂ ಧ್ಯಾನಪರೋ ರಾಮೋ ನಿತ್ಯಂ ಶೋಕಪರಾಯಣಃ ।

ನಾನ್ಯಚ್ಚಿನ್ತಯತೇ ಕಿಞ್ಚಿತ್ಸ ತು ಕಾಮವಶಂ ಗತಃ ॥ 43 ॥

ಅನಿದ್ರಸ್ಸತತಂ ರಾಮಸ್ಸುಪ್ತೋಽಪಿ ಚ ನರೋತ್ತಮಃ ।

ಸೀತೇತಿ ಮಧುರಾಂ ವಾಣೀಂ ವ್ಯಾಹರನ್ಪ್ರತಿಬುಧ್ಯತೇ ॥ 44 ॥

ದೃಷ್ಟ್ವಾ ಫಲಂ ವಾ ಪುಷ್ಪಂ ವಾ ಯದ್ವಾಽನ್ಯತ್ಸುಮನೋಹರಮ್ ।

ಬಹುಶೋ ಹಾ ಪ್ರಿಯೇತ್ಯೇವಂ ಶ್ವಸಂಸ್ತ್ವಾಮಭಿಭಾಷತೇ ॥ 45 ॥

ಸ ದೇವಿ ನಿತ್ಯಂ ಪರಿತಪ್ಯಮಾನ ಸ್ತ್ವಾಮೇವ ಸೀತೇತ್ಯಭಿಭಾಷಮಾಣಃ ।

ಧೃತವ್ರತೋ ರಾಜಸುತೋ ಮಹಾತ್ಮಾ ತವೈವ ಲಾಭಾಯ ಕೃತಪ್ರಯತ್ನಃ ॥ 46 ॥

ಸಾ ರಾಮಸಙ್ಕೀರ್ತನವೀತಶೋಕಾ ರಾಮಸ್ಯ ಶೋಕೇನ ಸಮಾನಶೋಕಾ ।

ಶರನ್ಮುಖೇ ಸಾಮ್ಬುದಶೇಷಚನ್ದ್ರಾ ನಿಶೇವ ವೈದೇಹಸುತಾ ಬಭೂವ ॥ 47 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಸುನ್ದರಕಾಣ್ಡೇ ಷಟ್ತ್ರಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ṣaṭtriṃśassargaḥ |

bhūya eva mahātejā hanūmānpavanātmajaḥ |

abravītpraśritaṃ vākyaṃ sītāpratyayakāraṇāt || 1 ||

vānaro'haṃ mahābhāge dūto rāmasya dhīmataḥ |

rāmanāmāṅkitaṃ cedaṃ paśya devyaṅgulīyakam || 2 ||

pratyayārthaṃ tavā'nītaṃ tena dattaṃ mahātmanā |

samāśvasihi bhadraṃ te kṣīṇaduḥkhaphalā hyasi || 3 ||

gṛhītvā prekṣamāṇā sā bhartuḥ karavibhūṣaṇam |

bhartāramiva samprāptā jānakī muditā'bhavat || 4 ||

cāru tadvadanaṃ tasyāstāmraśuklāyatekṣaṇam |

aśobhata viśālākṣyā rāhumukta ivoḍurāṭ || 5 ||

tatassā hrīmatī bālā bhartṛsandeśaharṣitā |

parituṣṭā priyaṃ kṛtvā praśaśaṃsa mahākapim || 6 ||

vikrāntastvaṃ samarthastvaṃ prājñastvaṃ vānarottama |

yenedaṃ rākṣasapadaṃ tvayaikena pradharṣitam || 7 ||

śatayojanavistīrṇa ssāgaro makarālayaḥ |

vikramaślāghanīyena kramatā goṣpadīkṛtaḥ || 8 ||

na hi tvāṃ prākṛtaṃ manye vānaraṃ vānararṣabha |

yasya te nāsti santrāso rāvaṇānnāpi sambhramaḥ || 9 ||

arhase ca kapiśreṣṭha mayā samabhibhāṣitum |

yadyasi preṣitastena rāmeṇa viditātmanā || 10 ||

preṣayiṣyati durdharṣo rāmo na hyaparīkṣitam |

parākramamavijñāya matsakāśaṃ viśeṣataḥ || 11 ||

diṣṭyā ca kuśalī rāmo dharmātmā satyasaṅgaraḥ |

lakṣmaṇaśca mahātejāssumitrānandavardhanaḥ || 12 ||

kuśalī yadi kākutsthaḥ kiṃ nu sāgaramekhalām |

mahīṃ dahati kopena yugāntāgnirivotthitaḥ || 13 ||

athavā śaktimantau tau surāṇāmapi nigrahe |

mamaiva tu na duḥkhānāmasti manye viparyayaḥ || 14 ||

kaccinna vyathito rāmaḥ kaccinna paritapyate |

uttarāṇi ca kāryāṇi kurute puruṣottamaḥ || 15 ||

kaccinna dīna ssambhrāntaḥ kāryeṣu na ca muhyati |

kaccitpuruṣakāryāṇi kurute nṛpatessutaḥ || 16 ||

dvividhaṃ trividhopāyamupāyamapi sevate |

vijigīṣussuhṛtkaccinmitreṣu ca parantapaḥ || 17 ||

kaccinmitrāṇi labhate mitraiścāpyabhigamyate |

kaccitkalyāṇamittraśca mitrattraiścāpi puraskṛtaḥ || 18 ||

kaccidāśāsti devānāṃ prasādaṃ pārthivātmajaḥ |

kaccitpuruṣakāraṃ ca daivaṃ ca pratipadyate || 19 ||

kaccinna vigatasnehaḥ pravāsānmayi rāghavaḥ |

kaccinmāṃ vyasanādasmānmokṣayiṣyati vānara || 20 ||

sukhānāmucito nityamasukhānāmanaucitaḥ |

duḥkhamuttaramāsādya kaccidrāmo na sīdati || 21 ||

kausalyāyāstathā kaccitsumitrāyāstathaiva ca |

abhīkṣṇaṃ śrūyate kaccitkuśalaṃ bharatasya ca || 22 ||

mannimittena mānārhaḥ kaccicchokena rāghavaḥ |

kaccinnānyamanā rāmaḥ kaccinmāṃ tārayiṣyati || 23 ||

kaccidakṣauhiṇīṃ bhīmāṃ bharato bhrātṛvatsalaḥ |

dhvajinīṃ mantribhirguptāṃ preṣayiṣyati matkṛte || 24 ||

vānarādhipatiśśīmānsugrīvaḥ kaccideṣyati |

matkṛte haribhirvīrairvṛto dantanakhāyudhaiḥ || 25 ||

kacciccha lakṣmaṇaśśūrassumitrānandavardhanaḥ |

astraviccharajālena rākṣasānvidhamiṣyati || 26 ||

raudreṇa kaccidastreṇa jvalatā nihataṃ raṇe |

drakṣyāmyalpena kālena rāvaṇaṃ sasuhṛjjanam || 27 ||

kaccinna taddhemasamānavarṇaṃ tasyānanaṃ padmasamānagandhi |

mayā vinā śuṣyati śokadīnaṃ jalakṣaye padmamivātapena || 28 ||

dharmāpadeśāttyajataśca rājyaṃ māṃ cāpyaraṇyaṃ nayataḥ padātim |

nāsīdvyathā yasya na bhīrna śokaḥ kaccitsa dhairyaṃ hṛdaye karoti || 29 ||

na cāsya mātā na pitā ca nānyaḥ snehādviśiṣṭo'sti mayā samo vā |

tāvattvahaṃ dūta jijīviṣeyaṃ yāvatpravṛttiṃ śṛṇuyāṃ priyasya || 30 ||

itīva devī vacanaṃ mahārthaṃ taṃ vānarendraṃ madhurārthamuktvā |

śrotuṃ punastasya vaco'bhirāmaṃ rāmārthayuktaṃ virarāma rāmā || 31 ||

sītāyā vacanaṃ śrutvā mārutirbhīmavikramaḥ |

śirasyañjalimādhāya vākyamuttaramabravīt || 32 ||

na tvāmihasthāṃ jānīte rāmaḥ kamalalocane |

tena tvāṃ nānayatyāśu śacīmiva purandaraḥ || 33 ||

śrutvaiva tu vaco mahyaṃ kṣiprameṣyati rāghavaḥ |

camūṃ prakarṣanmahatīṃ haryṛkṣagaṇasaṅkulām || 34 ||

viṣṭambhayitvā bāṇaughairakṣobhyaṃ varuṇālayam |

kariṣyati purīṃ laṅkāṃ kākutsthaḥ śāntarākṣasām || 35 ||

tatra yadyantarā mṛtyuryadi devāssahāsurāḥ |

sthāsyanti pathi rāmasya sa tānapi vadhiṣyati || 36 ||

tavādarśanajenārye śokena sa pariplutaḥ |

na śarma labhate rāmassiṃhārdita iva dvipaḥ || 37 ||

malayena ca vindhyena meruṇā mandareṇa ca |

dardureṇa ca te devi śape mūlaphalena ca || 38 ||

yathā sunayanaṃ valgu bimboṣṭhaṃ cāru kuṇḍalam |

mukhaṃ drakṣyasi rāmasya pūrṇacandramivoditam || 39 ||

kṣipraṃ drakṣyasi vaidehi rāmaṃ prasravaṇe girau |

śatakratumivāsīnaṃ nāgarājasya mūrdhani || 40 ||

na māṃsaṃ rāghavo bhuṅakte na cā'pi madhu sevate |

vanyaṃ suvihitaṃ nityaṃ bhaktamaśnāti pañcamam || 41 ||

naiva daṃśānna maśakānna kīṭānna sarīsṛpān |

rāghavo'panayedgātrāttvadgatenāntarātmanā || 42 ||

nityaṃ dhyānaparo rāmo nityaṃ śokaparāyaṇaḥ |

nānyaccintayate kiñcitsa tu kāmavaśaṃ gataḥ || 43 ||

anidrassatataṃ rāmassupto'pi ca narottamaḥ |

sīteti madhurāṃ vāṇīṃ vyāharanpratibudhyate || 44 ||

dṛṣṭvā phalaṃ vā puṣpaṃ vā yadvā'nyatsumanoharam |

bahuśo hā priyetyevaṃ śvasaṃstvāmabhibhāṣate || 45 ||

sa devi nityaṃ paritapyamāna stvāmeva sītetyabhibhāṣamāṇaḥ |

dhṛtavrato rājasuto mahātmā tavaiva lābhāya kṛtaprayatnaḥ || 46 ||

sā rāmasaṅkīrtanavītaśokā rāmasya śokena samānaśokā |

śaranmukhe sāmbudaśeṣacandrā niśeva vaidehasutā babhūva || 47 ||

ityārṣe śrīmadrāmāyaṇe vālmīkīya ādikāvye sundarakāṇḍe ṣaṭtriṃśassargaḥ ||