1.20 Balakanda - Vimsha Sargah

ॐ

1.20 ಬಾಲಕಾಣ್ಡ - ವಿಂಶ ಸರ್ಗಃ

Valmiki Kannada

ಶ್ರೀಮದ್ವಾಲ್ಮೀಕೀಯ ರಾಮಾಯಣೇ ಬಾಲಕಾಣ್ಡಮ್ ।

ಅಥ ವಿಂಶಸ್ಸರ್ಗಃ ।

ತಚ್ಛ್ರುತ್ವಾ ರಾಜಶಾರ್ದೂಲೋ ವಿಶ್ವಾಮಿತ್ರಸ್ಯ ಭಾಷಿತಮ್ ।

ಮುಹೂರ್ತಮಿವ ನಿಸ್ಸಞ್ಜ್ಞಸ್ಸಞ್ಜ್ಞಾವಾನಿದಮಬ್ರವೀತ್ ॥ 1 ॥

ಊನಷೋಡಶವರ್ಷೋ ಮೇ ರಾಮೋ ರಾಜೀವಲೋಚನಃ ।

ನ ಯುದ್ಧಯೋಗ್ಯತಾಮಸ್ಯ ಪಶ್ಯಾಮಿ ಸಹ ರಾಕ್ಷಸೈಃ ॥ 2 ॥

ಇಯಮಕ್ಷೌಹಿಣೀ ಪೂರ್ಣಾ ಯಸ್ಯಾಹಂ ಪತಿರೀಶ್ವರಃ ।

ಅನಯಾ ಸಂವೃತೋ ಗತ್ವಾ ಯೋದ್ಧಾಽಹಂ ತೈರ್ನಿಶಾಚರೈಃ ॥ 3 ॥

ಇಮೇ ಶೂರಾಶ್ಚ ವಿಕ್ರಾನ್ತಾ ಭೃತ್ಯಾ ಮೇಽಸ್ತ್ರವಿಶಾರದಾಃ ।

ಯೋಗ್ಯಾ ರಕ್ಷೋಗಣೈರ್ಯೋದ್ಧುಂ ನ ರಾಮಂ ನೇತುಮರ್ಹಸಿ ॥ 4 ॥

ಅಹಮೇವ ಧನುಷ್ಪಾಣಿರ್ಗೋಪ್ತಾ ಸಮರಮೂರ್ಧನಿ ।

ಯಾವತ್ಪ್ರಾಣಾನ್ಧರಿಷ್ಯಾಮಿ ತಾವದ್ಯೋತ್ಸ್ಯೇ ನಿಶಾಚರೈಃ ॥ 5 ॥

ನಿರ್ವಿಘ್ನಾ ವ್ರತಚರ್ಯಾ ಸಾ ಭವಿಷ್ಯತಿ ಸುರಕ್ಷಿತಾ ।

ಅಹಂ ತತ್ರಾಗಮಿಷ್ಯಾಮಿ ನ ರಾಮಂ ನೇತುಮರ್ಹಸಿ ॥ 6 ॥

ಬಾಲೋ ಹ್ಯಕೃತವಿದ್ಯಶ್ಚ ನ ಚ ವೇತ್ತಿ ಬಲಾಬಲಮ್ ।

ನ ಚಾಸ್ತ್ರಬಲಸಂಯುಕ್ತೋ ನ ಚ ಯುದ್ಧವಿಶಾರದಃ ॥ 7 ॥

ನ ಚಾಸೌ ರಕ್ಷಸಾಂ ಯೋಗ್ಯಃ ಕೂಟಯುದ್ಧಾ ಹಿ ತೇ ಧ್ರುವಮ್ ।

ವಿಪ್ರಯುಕ್ತೋ ಹಿ ರಾಮೇಣ ಮುಹೂರ್ತಮಪಿ ನೋತ್ಸಹೇ ॥ 8 ॥

ಜೀವಿತುಂ ಮುನಿಶಾರ್ದೂಲ ನ ರಾಮಂ ನೇತುಮರ್ಹಸಿ ।

ಯದಿ ವಾ ರಾಘವಂ ಬ್ರಹ್ಮನ್ನೇತುಮಿಚ್ಛಸಿ ಸುವ್ರತ ॥ 9 ॥

ಚತುರಙ್ಗಸಮಾಯುಕ್ತಂ ಮಯಾ ಚ ಸಹಿತಂ ನಯ ।

ಷಷ್ಟಿರ್ವರ್ಷಸಹಸ್ರಾಣಿ ಜಾತಸ್ಯ ಮಮ ಕೌಶಿಕ ॥ 10 ॥

ದುಃಖೇನೋತ್ಪಾದಿತಶ್ಚಾಯಂ ನ ರಾಮಂ ನೇತುಮರ್ಹಸಿ ।

ಚತುರ್ಣಾಮಾತ್ಮಜಾನಾಂ ಹಿ ಪ್ರೀತಿಃಪರಮಿಕಾ ಮಮ ॥ 11 ॥

ಜ್ಯೇಷ್ಠಂ ಧರ್ಮಪ್ರಧಾನಂ ಚ ನ ರಾಮಂ ನೇತುಮರ್ಹಸಿ ।

ಕಿಂವೀರ್ಯಾ ರಾಕ್ಷಸಾಸ್ತೇ ಚ ಕಸ್ಯ ಪುತ್ರಾಶ್ಚ ತೇ ಚ ಕೇ ॥ 12 ॥

ಕಥಂ ಪ್ರಮಾಣಾಃ ಕೇ ಚೈತಾನ್ರಕ್ಷನ್ತಿ ಮುನಿಪುಙ್ಗವ ।

ಕಥಂ ಚ ಪ್ರತಿಕರ್ತವ್ಯಂ ತೇಷಾಂ ರಾಮೇಣ ರಕ್ಷಸಾಮ್ ॥ 13 ॥

ಮಾಮಕೈರ್ವಾ ಬಲೈರ್ಬ್ರಹ್ಮನ್ಮಯಾ ವಾ ಕೂಟಯೋಧಿನಾಮ್ ।

3 ಸರ್ವಂ ಮೇ ಶಂಸ ಭಗವನ್ಕಥಂ ತೇಷಾಂ ಮಯಾ ರಣೇ ॥ 14 ॥

ಸ್ಥಾತವ್ಯಂ ದುಷ್ಟಭಾವಾನಾಂ ವೀರ್ಯೋತ್ಸಿಕ್ತಾ ಹಿ ರಾಕ್ಷಸಾಃ ।

4 ತಸ್ಯ ತದ್ವಚನಂ ಶ್ರುತ್ವಾ ವಿಶ್ವಾಮಿತ್ರೋಽಭ್ಯಭಾಷತ ॥ 15 ॥

ಪೌಲಸ್ತ್ಯವಂಶಪ್ರಭವೋ ರಾವಣೋ ನಾಮ ರಾಕ್ಷಸಃ ।

ಸ ಬ್ರಹ್ಮಣಾ ದತ್ತವರಸ್ತ್ರೈಲೋಕ್ಯಂ ಬಾಧತೇ ಭೃಶಮ್ ॥ 16 ॥

ಮಹಾಬಲೋ ಮಹಾವೀರ್ಯೋ ರಾಕ್ಷಸೈರ್ಬಹುಭಿರ್ವೃತಃ ।

ಶ್ರೂಯತೇ ಹಿ ಮಹಾವೀರ್ಯೋ ರಾವಣೋ ರಾಕ್ಷಸಾಧಿಪಃ ॥ 17 ॥

ಸಾಕ್ಷಾದ್ವೈಶ್ರವಣಭ್ರಾತಾ ಪುತ್ರೋ ವಿಶ್ರವಸೋ ಮುನೇಃ ।

ಯದಾ ಸ್ವಯಂ ನ ಯಜ್ಞಸ್ಯ ವಿಘ್ನಕರ್ತಾ ಮಹಾಬಲಃ ॥ 18 ॥

ತೇನ ಸಞ್ಚೋದಿತೌ ದ್ವೌ ತು ರಾಕ್ಷಸೌ ವೈ ಮಹಾಬಲೌ ।

ಮಾರೀಚಶ್ಚ ಸುಬಾಹುಶ್ಚ ಯಜ್ಞವಿಘ್ನಂ ಕರಿಷ್ಯತಃ ॥ 19 ॥

ಇತ್ಯುಕ್ತೋ ಮುನಿನಾ ತೇನ ರಾಜೋವಾಚ ಮುನಿಂ ತದಾ ।

ನ ಹಿ ಶಕ್ತೋಽಸ್ಮಿ ಸಙ್ಗ್ರಾಮೇ ಸ್ಥಾತುಂ ತಸ್ಯ ದುರಾತ್ಮನಃ ॥ 20 ॥

ಸ ತ್ವಂ ಪ್ರಸಾದಂ ಧರ್ಮಜ್ಞ ಕುರುಷ್ವ ಮಮ ಪುತ್ರಕೇ ।

ಮಮ ಚೈವಾಲ್ಪಭಾಗ್ಯಸ್ಯ ದೈವತಂ ಹಿ ಭವಾನ್ಗುರುಃ ॥ 21 ॥

ದೇವದಾನವಗನ್ಧರ್ವಾ ಯಕ್ಷಾಃಪತಗಪನ್ನಗಾಃ ।

ನ ಶಕ್ತಾ ರಾವಣಂ ಸೋಢುಂ ಕಿಂ ಪುನರ್ಮಾನವಾ ಯುಧಿ ॥ 22 ॥

ಸ ಹಿ ವೀರ್ಯವತಾಂ ವೀರ್ಯಮಾದತ್ತೇ ಯುಧಿ ರಾಕ್ಷಸಃ ।

ತೇನ ಚಾಹಂ ನ ಶಕ್ತೋಽಸ್ಮಿ ಸಂಯೋದ್ಧುಂ ತಸ್ಯ ವಾ ಬಲೈಃ ॥ 23 ॥

ಸಬಲೋ ವಾ ಮುನಿಶ್ರೇಷ್ಠ ಸಹಿತೋ ವಾ ಮಮಾತ್ಮಜೈಃ ।

ಕಥಮಪ್ಯಮರಪ್ರಖ್ಯಂ ಸಙ್ಗ್ರಾಮಾಣಾಮಕೋವಿದಮ್ ।

ಬಾಲಂ ಮೇ ತನಯಂ ಬ್ರಹ್ಮನ್ ನೈವ ದಾಸ್ಯಾಮಿ ಪುತ್ರಕಮ್ ॥ 24 ॥

ಅಥ ಕಾಲೋಪಮೌ ಯುಧ್ದೇ ಸುತೌ ಸುನ್ದೋಪಸುನ್ದಯೋಃ ॥ 25 ॥

ಯಜ್ಞವಿಘ್ನಕರೌ ತೌ ತೇ ನೈವ ದಾಸ್ಯಾಮಿ ಪುತ್ರಕಮ್ ।

ಮಾರೀಚಶ್ಚ ಸುಬಾಹುಶ್ಚ ವೀರ್ಯವನ್ತೌ ಸುಶಿಕ್ಷಿತೌ ।

ತಯೋರನ್ಯತರೇಣಾಹಂ ಯೋಧ್ದಾ ಸ್ಯಾಂ ಸಸುಹೃದ್ಗಣಃ ॥ 26 ॥

ಇತಿ ನರಪತಿಜಲ್ಪನಾದ್ದ್ವಿಜೇನ್ದ್ರಂ ಕುಶಿಕಸುತಂ ಸುಮಹಾನ್ವಿವೇಶ ಮನ್ಯುಃ ।

ಸುಹುತ ಇವ ಮಖೇಽಗ್ನಿರಾಜ್ಯಸಿಕ್ತ ಸ್ಸಮಭವದುಜ್ಜ್ವಲಿತೋ ಮಹರ್ಷಿವಹ್ನಿಃ ॥ 27 ॥

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ವಾಲ್ಮೀಕೀಯ ಆದಿಕಾವ್ಯೇ ಬಾಲಕಾಣ್ಡೇ ವಿಂಶಸ್ಸರ್ಗಃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha viṃśassargaḥ |

tacchrutvā rājaśārdūlo viśvāmitrasya bhāṣitam |

muhūrtamiva nissañjñassañjñāvānidamabravīt || 1 ||

ūnaṣoḍaśavarṣo me rāmo rājīvalocanaḥ |

na yuddhayogyatāmasya paśyāmi saha rākṣasaiḥ || 2 ||

iyamakṣauhiṇī pūrṇā yasyāhaṃ patirīśvaraḥ |

anayā saṃvṛto gatvā yoddhā'haṃ tairniśācaraiḥ || 3 ||

ime śūrāśca vikrāntā bhṛtyā me'straviśāradāḥ |

yogyā rakṣogaṇairyoddhuṃ na rāmaṃ netumarhasi || 4 ||

ahameva dhanuṣpāṇirgoptā samaramūrdhani |

yāvatprāṇāndhariṣyāmi tāvadyotsye niśācaraiḥ || 5 ||

nirvighnā vratacaryā sā bhaviṣyati surakṣitā |

ahaṃ tatrāgamiṣyāmi na rāmaṃ netumarhasi || 6 ||

bālo hyakṛtavidyaśca na ca vetti balābalam |

na cāstrabalasaṃyukto na ca yuddhaviśāradaḥ || 7 ||

na cāsau rakṣasāṃ yogyaḥ kūṭayuddhā hi te dhruvam |

viprayukto hi rāmeṇa muhūrtamapi notsahe || 8 ||

jīvituṃ muniśārdūla na rāmaṃ netumarhasi |

yadi vā rāghavaṃ brahmannetumicchasi suvrata || 9 ||

caturaṅgasamāyuktaṃ mayā ca sahitaṃ naya |

ṣaṣṭirvarṣasahasrāṇi jātasya mama kauśika || 10 ||

duḥkhenotpāditaścāyaṃ na rāmaṃ netumarhasi |

caturṇāmātmajānāṃ hi prītiḥparamikā mama || 11 ||

jyeṣṭhaṃ dharmapradhānaṃ ca na rāmaṃ netumarhasi |

kiṃvīryā rākṣasāste ca kasya putrāśca te ca ke || 12 ||

kathaṃ pramāṇāḥ ke caitānrakṣanti munipuṅgava |

kathaṃ ca pratikartavyaṃ teṣāṃ rāmeṇa rakṣasām || 13 ||

māmakairvā balairbrahmanmayā vā kūṭayodhinām |

3 sarvaṃ me śaṃsa bhagavankathaṃ teṣāṃ mayā raṇe || 14 ||

sthātavyaṃ duṣṭabhāvānāṃ vīryotsiktā hi rākṣasāḥ |

4 tasya tadvacanaṃ śrutvā viśvāmitro'bhyabhāṣata || 15 ||

paulastyavaṃśaprabhavo rāvaṇo nāma rākṣasaḥ |

sa brahmaṇā dattavarastrailokyaṃ bādhate bhṛśam || 16 ||

mahābalo mahāvīryo rākṣasairbahubhirvṛtaḥ |

śrūyate hi mahāvīryo rāvaṇo rākṣasādhipaḥ || 17 ||

sākṣādvaiśravaṇabhrātā putro viśravaso muneḥ |

yadā svayaṃ na yajñasya vighnakartā mahābalaḥ || 18 ||

tena sañcoditau dvau tu rākṣasau vai mahābalau |

mārīcaśca subāhuśca yajñavighnaṃ kariṣyataḥ || 19 ||

ityukto muninā tena rājovāca muniṃ tadā |

na hi śakto'smi saṅgrāme sthātuṃ tasya durātmanaḥ || 20 ||

sa tvaṃ prasādaṃ dharmajña kuruṣva mama putrake |

mama caivālpabhāgyasya daivataṃ hi bhavānguruḥ || 21 ||

devadānavagandharvā yakṣāḥpatagapannagāḥ |

na śaktā rāvaṇaṃ soḍhuṃ kiṃ punarmānavā yudhi || 22 ||

sa hi vīryavatāṃ vīryamādatte yudhi rākṣasaḥ |

tena cāhaṃ na śakto'smi saṃyoddhuṃ tasya vā balaiḥ || 23 ||

sabalo vā muniśreṣṭha sahito vā mamātmajaiḥ |

kathamapyamaraprakhyaṃ saṅgrāmāṇāmakovidam |

bālaṃ me tanayaṃ brahman naiva dāsyāmi putrakam || 24 ||

atha kālopamau yudhde sutau sundopasundayoḥ || 25 ||

yajñavighnakarau tau te naiva dāsyāmi putrakam |

mārīcaśca subāhuśca vīryavantau suśikṣitau |

tayoranyatareṇāhaṃ yodhdā syāṃ sasuhṛdgaṇaḥ || 26 ||

iti narapatijalpanāddvijendraṃ kuśikasutaṃ sumahānviveśa manyuḥ |

suhuta iva makhe'gnirājyasikta ssamabhavadujjvalito maharṣivahniḥ || 27 ||

ityārṣe śrīmadrāmāyaṇe vālmīkīya ādikāvye bālakāṇḍe viṃśassargaḥ ||