Shri Venkateshvara Sharanagati Gadyam

ॐ

ಶ್ರೀ ವೇಙ್ಕಟೇಶ್ವರ ಶರಣಾಗತಿ ಗದ್ಯಮ್

Vishnu Kannada

ಯೋ ನಿತ್ಯಮಚ್ಯುತಪದಾಮ್ಬುಜಯುಗ್ಮರುಕ್ಮ

ವ್ಯಾಮೋಹತಸ್ತದಿತರಾಣಿ ತೃಣಾಯ ಮೇನೇ ।

ಅಸ್ಮದ್ಗುರೋರ್ಭಗವತೋಽಸ್ಯ ದಯೈಕಸಿನ್ಧೋಃ

ರಾಮಾನುಜಸ್ಯ ಚರಣೌ ಶರಣಂ ಪ್ರಪದ್ಯೇ ॥

ವನ್ದೇ ವೇದಾನ್ತಕರ್ಪೂರಚಾಮೀಕರ ಕರಣ್ಡಕಮ್ ।

ರಾಮಾನುಜಾರ್ಯಮಾರ್ಯಾಣಾಂ ಚೂಡಾಮಣಿಮಹರ್ನಿಶಮ್ ॥

ಓಮ್ ॥ ಭಗವನ್ನಾರಾಯಣಾಭಿಮತಾನುರೂಪ ಸ್ವರೂಪರೂಪ ಗುಣವಿಭವೈಶ್ವರ್ಯ ಶೀಲಾದ್ಯನವಧಿಕಾತಿಶಯ ಅಸಙ್ಖ್ಯೇಯ ಕಲ್ಯಾಣಗುಣಗಣಾಂ ಪದ್ಮವನಾಲಯಾಂ ಭಗವತೀಂ ಶ್ರಿಯಂ ದೇವೀಂ ನಿತ್ಯಾನಪಾಯಿನೀಂ ನಿರವದ್ಯಾಂ ದೇವದೇವದಿವ್ಯಮಹಿಷೀಂ ಅಖಿಲಜಗನ್ಮಾತರಂ ಅಸ್ಮನ್ಮಾತರಂ ಅಶರಣ್ಯಶರಣ್ಯಾಂ ಅನನ್ಯಶರಣಃ ಶರಣಮಹಂ ಪ್ರಪದ್ಯೇ ॥

ಪಾರಮಾರ್ಥಿಕ ಭಗವಚ್ಚರಣಾರವಿನ್ದ ಯುಗಲೈಕಾನ್ತಿಕಾತ್ಯನ್ತಿಕ ಪರಭಕ್ತಿ ಪರಜ್ಞಾನ ಪರಮಭಕ್ತಿಕೃತ ಪರಿಪೂರ್ಣಾನವರತ ನಿತ್ಯವಿಶದತಮಾನನ್ಯ ಪ್ರಯೋಜನಾನವಧಿಕಾತಿಶಯ ಪ್ರಿಯ ಭಗವದನುಭವಜನಿತಾನವಧಿಕಾತಿಶಯ ಪ್ರೀತಿಕಾರಿತಾಶೇಷಾವಸ್ಥೋಚಿತ ಅಶೇಷಶೇಷತೈಕರತಿರೂಪ ನಿತ್ಯಕೈಙ್ಕರ್ಯಪ್ರಾಪ್ತ್ಯಪೇಕ್ಷಯಾ ಪಾರಮಾರ್ಥಿಕೀ ಭಗವಚ್ಚರಣಾರವಿನ್ದ ಶರಣಾಗತಿಃ ಯಥಾವಸ್ಥಿತಾ ಅವಿರತಾಽಸ್ತು ಮೇ ॥

ಅಸ್ತು ತೇ । ತಯೈವ ಸರ್ವಂ ಸಮ್ಪತ್ಸ್ಯತೇ ॥

ಅಖಿಲಹೇಯಪ್ರತ್ಯನೀಕ ಕಲ್ಯಾಣೈಕತಾನ, ಸ್ವೇತರ ಸಮಸ್ತವಸ್ತುವಿಲಕ್ಷಣಾನನ್ತ ಜ್ಞಾನಾನನ್ದೈಕಸ್ವರೂಪ, ಸ್ವಾಭಿಮತಾನುರೂಪೈಕರೂಪಾಚಿನ್ತ್ಯ ದಿವ್ಯಾದ್ಭುತ ನಿತ್ಯನಿರವದ್ಯ ನಿರತಿಶಯೌಜ್ಜ್ವಲ್ಯ ಸೌನ್ದರ್ಯ ಸೌಗನ್ಧ್ಯ ಸೌಕುಮಾರ್ಯ ಲಾವಣ್ಯ ಯೌವನಾದ್ಯನನ್ತಗುಣನಿಧಿ ದಿವ್ಯರೂಪ, ಸ್ವಾಭಾವಿಕಾನವಧಿಕಾತಿಶಯ ಜ್ಞಾನ ಬಲೈಶ್ವರ್ಯ ವೀರ್ಯ ಶಕ್ತಿ ತೇಜಸ್ಸೌಶೀಲ್ಯ ವಾತ್ಸಲ್ಯ ಮಾರ್ದವಾರ್ಜವ ಸೌಹಾರ್ದ ಸಾಮ್ಯ ಕಾರುಣ್ಯ ಮಾಧುರ್ಯ ಗಾಮ್ಭೀರ್ಯೌದಾರ್ಯ ಚಾತುರ್ಯ ಸ್ಥೈರ್ಯ ಧೈರ್ಯ ಶೌರ್ಯ ಪರಾಕ್ರಮ ಸತ್ಯಕಾಮ ಸತ್ಯಸಙ್ಕಲ್ಪ ಕೃತಿತ್ವ ಕೃತಜ್ಞತಾದ್ಯಸಙ್ಖ್ಯೇಯ ಕಲ್ಯಾಣಗುಣಗಣೌಘ ಮಹಾರ್ಣವ,

ಸ್ವೋಚಿತ ವಿವಿಧ ವಿಚಿತ್ರಾನನ್ತಾಶ್ಚರ್ಯ ನಿತ್ಯ ನಿರವದ್ಯ ನಿರತಿಶಯ ಸುಗನ್ಧ ನಿರತಿಶಯ ಸುಖಸ್ಪರ್ಶ ನಿರತಿಶಯೌಜ್ಜ್ವಲ್ಯ ಕಿರೀಟ ಮಕುಟ ಚೂಡಾವತಂಸ ಮಕರಕುಣ್ಡಲ ಗ್ರೈವೇಯಕ ಹಾರ ಕೇಯೂರ ಕಟಕ ಶ್ರೀವತ್ಸ ಕೌಸ್ತುಭ ಮುಕ್ತಾದಾಮೋದರಬನ್ಧನ ಪೀತಾಮ್ಬರ ಕಾಞ್ಚೀಗುಣ ನೂಪುರಾದ್ಯಪರಿಮಿತ ದಿವ್ಯಭೂಷಣ, ಸ್ವಾನುರೂಪಾಚಿನ್ತ್ಯಶಕ್ತಿ ಶಙ್ಖಚಕ್ರಗದಾಽಸಿ ಶಾರ್ಙ್ಗಾದ್ಯಸಙ್ಖ್ಯೇಯ

ನಿತ್ಯನಿರವದ್ಯ ನಿರತಿಶಯ ಕಲ್ಯಾಣದಿವ್ಯಾಯುಧ,

ಸ್ವಾಭಿಮತ ನಿತ್ಯನಿರವದ್ಯಾನುರೂಪ ಸ್ವರೂಪರೂಪಗುಣ ವಿಭವೈಶ್ವರ್ಯ ಶೀಲಾದ್ಯನವಧಿಕಾತಿಶಯಾಸಙ್ಖ್ಯೇಯ ಕಲ್ಯಾಣಗುಣಗಣಶ್ರೀವಲ್ಲಭ, ಏವಮ್ಭೂತ ಭೂಮಿನೀಲಾನಾಯಕ, ಸ್ವಚ್ಛನ್ದಾನುವರ್ತಿ ಸ್ವರೂಪಸ್ಥಿತಿ ಪ್ರವೃತ್ತಿಭೇದಾಶೇಷ ಶೇಷತೈಕರತಿರೂಪ

ನಿತ್ಯನಿರವದ್ಯನಿರತಿಶಯ ಜ್ಞಾನ ಕ್ರಿಯೈಶ್ವರ್ಯಾದ್ಯನನ್ತ ಕಲ್ಯಾಣಗುಣಗಣ ಶೇಷ ಶೇಷಾಶನ

ಗರುಡಪ್ರಮುಖ ನಾನಾವಿಧಾನನ್ತ ಪರಿಜನ ಪರಿಚಾರಿಕಾ ಪರಿಚರಿತ ಚರಣಯುಗಲ, ಪರಮಯೋಗಿ ವಾಙ್ಮನಸಾಽಪರಿಚ್ಛೇದ್ಯ ಸ್ವರೂಪ ಸ್ವಭಾವ ಸ್ವಾಭಿಮತ ವಿವಿಧವಿಚಿತ್ರಾನನ್ತಭೋಗ್ಯ ಭೋಗೋಪಕರಣ ಭೋಗಸ್ಥಾನ ಸಮೃದ್ಧಾನನ್ತಾಶ್ಚರ್ಯಾನನ್ತ ಮಹಾವಿಭವಾನನ್ತ ಪರಿಮಾಣ ನಿತ್ಯ ನಿರವದ್ಯ ನಿರತಿಶಯ ಶ್ರೀವೈಕುಣ್ಠನಾಥ, ಸ್ವಸಙ್ಕಲ್ಪಾನುವಿಧಾಯಿ ಸ್ವರೂಪಸ್ಥಿತಿ ಪ್ರವೃತ್ತಿ ಸ್ವಶೇಷತೈಕಸ್ವಭಾವ ಪ್ರಕೃತಿ ಪುರುಷ ಕಾಲಾತ್ಮಕ ವಿವಿಧ ವಿಚಿತ್ರಾನನ್ತ ಭೋಗ್ಯ ಭೋಕ್ತೃವರ್ಗ ಭೋಗೋಪಕರಣ ಭೋಗಸ್ಥಾನರೂಪ

ನಿಖಿಲಜಗದುದಯ ವಿಭವ ಲಯಲೀಲ, ಸತ್ಯಕಾಮ, ಸತ್ಯಸಙ್ಕಲ್ಪ, ಪರಬ್ರಹ್ಮಭೂತ, ಪುರುಷೋತ್ತಮ,ಮಹಾವಿಭೂತೇ,

ಶ್ರೀಮನ್ ನಾರಾಯಣ, ವೈಕುಣ್ಠನಾಥ, ಅಪಾರ ಕಾರುಣ್ಯ ಸೌಶೀಲ್ಯ ವಾತ್ಸಲ್ಯೌದಾರ್ಯೈಶ್ವರ್ಯ ಸೌನ್ದರ್ಯ ಮಹೋದಧೇ, ಅನಾಲೋಚಿತವಿಶೇಷಾಶೇಷಲೋಕ ಶರಣ್ಯ, ಪ್ರಣತಾರ್ತಿಹರ, ಆಶ್ರಿತ ವಾತ್ಸಲ್ಯೈಕಜಲಧೇ, ಅನವರತವಿದಿತ ನಿಖಿಲಭೂತಜಾತಯಾಥಾತ್ಮ್ಯ, ಅಶೇಷಚರಾಚರಭೂತ ನಿಖಿಲನಿಯಮನ ನಿರತ, ಅಶೇಷಚಿದಚಿದ್ವಸ್ತು ಶೇಷಿಭೂತ, ನಿಖಿಲಜಗದಾಧಾರ, ಅಖಿಲಜಗತ್ಸ್ವಾಮಿನ್, ಅಸ್ಮತ್ಸ್ವಾಮಿನ್, ಸತ್ಯಕಾಮ,

ಸತ್ಯಸಙ್ಕಲ್ಪ, ಸಕಲೇತರವಿಲಕ್ಷಣ, ಅರ್ಥಿಕಲ್ಪಕ, ಆಪತ್ಸಖ, ಶ್ರೀಮನ್, ನಾರಾಯಣ, ಅಶರಣ್ಯಶರಣ್ಯ, ಅನನ್ಯಶರಣಸ್ತ್ವತ್ಪಾದಾರವಿನ್ದ ಯುಗಲಂ ಶರಣಮಹಂ ಪ್ರಪದ್ಯೇ ॥

ಅತ್ರ ದ್ವಯಮ್ ।

ಪಿತರಂ ಮಾತರಂ ದಾರಾನ್ ಪುತ್ರಾನ್ ಬನ್ಧೂನ್ ಸಖೀನ್ ಗುರೂನ್ ।

ರತ್ನಾನಿ ಧನಧಾನ್ಯಾನಿ ಕ್ಷೇತ್ರಾಣಿ ಚ ಗೃಹಾಣಿ ಚ ॥ 1

ಸರ್ವಧರ್ಮಾಂಶ್ಚ ಸನ್ತ್ಯಜ್ಯ ಸರ್ವಕಾಮಾಂಶ್ಚ ಸಾಕ್ಷರಾನ್ ।

ಲೋಕವಿಕ್ರಾನ್ತಚರಣೌ ಶರಣಂ ತೇಽವ್ರಜಂ ವಿಭೋ ॥ 2

ತ್ವಮೇವ ಮಾತಾ ಚ ಪಿತಾ ತ್ವಮೇವ

ತ್ವಮೇವ ಬನ್ಧುಶ್ಚ ಗುರುಸ್ತ್ವಮೇವ ।

ತ್ವಮೇವ ವಿದ್ಯಾ ದ್ರವಿಣಂ ತ್ವಮೇವ

ತ್ವಮೇವ ಸರ್ವಂ ಮಮ ದೇವದೇವ ॥ 3

ಪಿತಾಽಸಿ ಲೋಕಸ್ಯ ಚರಾಚರಸ್ಯ

ತ್ವಮಸ್ಯ ಪೂಜ್ಯಶ್ಚ ಗುರುರ್ಗರೀಯಾನ್ ।

ನ ತ್ವತ್ಸಮೋಽಸ್ತ್ಯಭ್ಯಧಿಕಃ ಕುತೋಽನ್ಯೋ

ಲೋಕತ್ರಯೇಽಪ್ಯಪ್ರತಿಮಪ್ರಭಾವ ॥ 4

ತಸ್ಮಾತ್ಪ್ರಣಮ್ಯ ಪ್ರಣಿಧಾಯ ಕಾಯಂ

ಪ್ರಸಾದಯೇ ತ್ವಾಮಹಮೀಶಮೀಡ್ಯಮ್ ।

ಪಿತೇವ ಪುತ್ರಸ್ಯ ಸಖೇವ ಸಖ್ಯುಃ

ಪ್ರಿಯಃ ಪ್ರಿಯಾಯಾರ್ಹಸಿ ದೇವ ಸೋಢುಮ್ ॥

ಮನೋವಾಕ್ಕಾಯೈರನಾದಿಕಾಲ ಪ್ರವೃತ್ತಾನನ್ತಾಕೃತ್ಯಕರಣ ಕೃತ್ಯಾಕರಣ ಭಗವದಪಚಾರ ಭಾಗವತಾಪಚಾರಾಸಹ್ಯಾಪಚಾರರೂಪ ನಾನಾವಿಧಾನನ್ತಾಪಚಾರಾನ್ ಆರಬ್ಧಕಾರ್ಯಾನ್ ಅನಾರಬ್ಧಕಾರ್ಯಾನ್ ಕೃತಾನ್ ಕ್ರಿಯಮಾಣಾನ್ ಕರಿಷ್ಯಮಾಣಾಂಶ್ಚ ಸರ್ವಾನಶೇಷತಃ ಕ್ಷಮಸ್ವ ।

ಅನಾದಿಕಾಲಪ್ರವೃತ್ತವಿಪರೀತ ಜ್ಞಾನಮಾತ್ಮವಿಷಯಂ ಕೃತ್ಸ್ನ ಜಗದ್ವಿಷಯಂ ಚ ವಿಪರೀತವೃತ್ತಂ ಚಾಶೇಷವಿಷಯಮದ್ಯಾಪಿ ವರ್ತಮಾನಂ ವರ್ತಿಷ್ಯಮಾಣಂ ಚ ಸರ್ವಂ ಕ್ಷಮಸ್ವ ।

ಮದೀಯಾನಾದಿಕರ್ಮ ಪ್ರವಾಹಪ್ರವೃತ್ತಾಂ ಭಗವತ್ಸ್ವರೂಪ ತಿರೋಧಾನಕರೀಂ ವಿಪರೀತಜ್ಞಾನಜನನೀಂ ಸ್ವವಿಷಯಾಯಾಶ್ಚ ಭೋಗ್ಯಬುದ್ಧೇರ್ಜನನೀಂ ದೇಹೇನ್ದ್ರಿಯತ್ವೇನ ಭೋಗ್ಯತ್ವೇನ ಸೂಕ್ಷ್ಮರೂಪೇಣ ಚಾವಸ್ಥಿತಾಂ ದೈವೀಂ ಗುಣಮಯೀಂ ಮಾಯಾಂ ದಾಸಭೂತಂ ಶರಣಾಗತೋಽಸ್ಮಿ ತವಾಸ್ಮಿ ದಾಸಃ ಇತಿ ವಕ್ತಾರಂ ಮಾಂ ತಾರಯ ।

ತೇಷಾಂ ಜ್ಞಾನೀ ನಿತ್ಯಯುಕ್ತಃ ಏಕಭಕ್ತಿರ್ವಿಶಿಷ್ಯತೇ ।

ಪ್ರಿಯೋ ಹಿ ಜ್ಞಾನಿನೋಽತ್ಯರ್ಥಮಹಂ ಸ ಚ ಮಮ ಪ್ರಿಯಃ ॥

ಉದಾರಾಃ ಸರ್ವ ಏವೈತೇ ಜ್ಞಾನೀ ತ್ವಾತ್ಮೈವ ಮೇ ಮತಮ್ ।

ಆಸ್ಥಿತಃ ಸ ಹಿ ಯುಕ್ತಾತ್ಮಾ ಮಾಮೇವಾನುತ್ತಮಾಂ ಗತಿಮ್ ॥

ಬಹೂನಾಂ ಜನ್ಮನಾಮನ್ತೇ ಜ್ಞಾನವಾನ್ಮಾಂ ಪ್ರಪದ್ಯತೇ ।

ವಾಸುದೇವಃ ಸರ್ವಮಿತಿ ಸ ಮಹಾತ್ಮಾ ಸುದುರ್ಲಭಃ ॥

ಇತಿ ಶ್ಲೋಕತ್ರಯೋದಿತಜ್ಞಾನಿನಂ ಮಾಂ ಕುರುಷ್ವ ।

ಪುರುಷಃ ಸ ಪರಃ ಪಾರ್ಥ ಭಕ್ತ್ಯಾ ಲಭ್ಯಸ್ತ್ವನನ್ಯಯಾ ।

ಭಕ್ತ್ಯಾ ತ್ವನನ್ಯಯಾ ಶಕ್ಯಃ ಮದ್ಭಕ್ತಿಂ ಲಭತೇ ಪರಾಮ್ ।

ಇತಿ ಸ್ಥಾನತ್ರಯೋದಿತ ಪರಭಕ್ತಿಯುಕ್ತಂ ಮಾಂ ಕುರುಷ್ವ ।

ಪರಭಕ್ತಿ ಪರಜ್ಞಾನ ಪರಮಭಕ್ತ್ಯೇಕಸ್ವಭಾವಂ ಮಾಂ ಕುರುಷ್ವ ।

ಪರಭಕ್ತಿ ಪರಜ್ಞಾನ ಪರಮಭಕ್ತಿಕೃತ ಪರಿಪೂರ್ಣಾನವರತ ನಿತ್ಯವಿಶದತಮಾನನ್ಯ ಪ್ರಯೋಜನಾನವಧಿಕಾತಿಶಯ ಪ್ರಿಯ ಭಗವದನುಭವೋಽಹಂ ತಥಾವಿಧ ಭಗವದನುಭವ ಜನಿತಾನವಧಿಕಾತಿಶಯ ಪ್ರೀತಿಕಾರಿತಾಶೇಷಾವಸ್ಥೋಚಿತಾಶೇಷ ಶೇಷತೈಕರತಿರೂಪ ನಿತ್ಯಕಿಙ್ಕರೋ ಭವಾನಿ ।

ಏವಮ್ಭೂತ ಮತ್ಕೈಙ್ಕರ್ಯಪ್ರಾಪ್ತ್ಯುಪಾಯತಯಾಽವಕ್ಲುಪ್ತಸಮಸ್ತ ವಸ್ತುವಿಹೀನೋಽಪಿ, ಅನನ್ತ ತದ್ವಿರೋಧಿಪಾಪಾಕ್ರಾನ್ತೋಽಪಿ, ಅನನ್ತ ಮದಪಚಾರಯುಕ್ತೋಽಪಿ, ಅನನ್ತ ಮದೀಯಾಪಚಾರಯುಕ್ತೋಽಪಿ, ಅನನ್ತಾಸಹ್ಯಾಪಚಾರ ಯುಕ್ತೋಽಪಿ, ಏತತ್ಕಾರ್ಯಕಾರಣ ಭೂತಾನಾದಿ ವಿಪರೀತಾಹಙ್ಕಾರ ವಿಮೂಢಾತ್ಮ ಸ್ವಭಾವೋಽಪಿ, ಏತದುಭಯಕಾರ್ಯಕಾರಣಭೂತಾನಾದಿ ವಿಪರೀತವಾಸನಾ ಸಮ್ಬದ್ಧೋಽಪಿ, ಏತದನುಗುಣ ಪ್ರಕೃತಿ ವಿಶೇಷಸಮ್ಬದ್ಧೋಽಪಿ, ಏತನ್ಮೂಲಾಧ್ಯಾತ್ಮಿಕಾಧಿಭೌತಿಕಾಧಿದೈವಿಕ ಸುಖದುಃಖ ತದ್ಧೇತು

ತದಿತರೋಪೇಕ್ಷಣೀಯ ವಿಷಯಾನುಭವ ಜ್ಞಾನಸಙ್ಕೋಚರೂಪ ಮಚ್ಚರಣಾರವಿನ್ದಯುಗಲೈಕಾನ್ತಿಕಾತ್ಯನ್ತಿಕ ಪರಭಕ್ತಿ ಪರಜ್ಞಾನ ಪರಮಭಕ್ತಿ ವಿಘ್ನಪ್ರತಿಹತೋಽಪಿ, ಯೇನ ಕೇನಾಪಿ ಪ್ರಕಾರೇಣ ದ್ವಯವಕ್ತಾ ತ್ವಂ ಕೇವಲಂ ಮದೀಯಯೈವ ದಯಯಾ ನಿಶ್ಶೇಷವಿನಷ್ಟ ಸಹೇತುಕ ಮಚ್ಚರಣಾರವಿನ್ದಯುಗಲೈಕಾನ್ತಿಕಾತ್ಯನ್ತಿಕ ಪರಭಕ್ತಿ ಪರಜ್ಞಾನ ಪರಮಭಕ್ತಿವಿಘ್ನಃ ಮತ್ಪ್ರಸಾದಲಬ್ಧ ಮಚ್ಚರಣಾರವಿನ್ದಯುಗಲೈಕಾನ್ತಿಕಾತ್ಯನ್ತಿಕ ಪರಭಕ್ತಿ ಪರಜ್ಞಾನ ಪರಮಭಕ್ತಿಃ ಮತ್ಪ್ರಸಾದಾದೇವ ಸಾಕ್ಷಾತ್ಕೃತ ಯಥಾವಸ್ಥಿತ ಮತ್ಸ್ವರೂಪರೂಪಗುಣವಿಭೂತಿ ಲೀಲೋಪಕರಣವಿಸ್ತಾರಃ ಅಪರೋಕ್ಷಸಿದ್ಧ ಮನ್ನಿಯಾಮ್ಯತಾ ಮದ್ದಾಸ್ಯೈಕ ಸ್ವಭಾವಾತ್ಮ ಸ್ವರೂಪಃ ಮದೇಕಾನುಭವಃ ಮದ್ದಾಸ್ಯೈಕಪ್ರಿಯಃ ಪರಿಪೂರ್ಣಾನವರತ ನಿತ್ಯವಿಶದತಮಾನನ್ಯ ಪ್ರಯೋಜನಾನವಧಿಕಾತಿಶಯಪ್ರಿಯ ಮದನುಭವಸ್ತ್ವಂ ತಥಾವಿಧ ಮದನುಭವ ಜನಿತಾನವಧಿಕಾತಿಶಯ ಪ್ರೀತಿಕಾರಿತಾಶೇಷಾವಸ್ಥೋಚಿತಾಶೇಷ ಶೇಷತೈಕರತಿರೂಪ ನಿತ್ಯಕಿಙ್ಕರೋ ಭವ ।

ಏವಮ್ಭೂತೋಽಸಿ । ಆಧ್ಯಾತ್ಮಿಕಾಧಿಭೌತಿಕಾಧಿದೈವಿಕ ದುಃಖವಿಘ್ನಗನ್ಧರಹಿತಸ್ತ್ವಂ ದ್ವಯಮರ್ಥಾನುಸನ್ಧಾನೇನ ಸಹ ಸದೈವಂ ವಕ್ತಾ ಯಾವಚ್ಛರೀರಪಾತಮತ್ರೈವ ಶ್ರೀರಙ್ಗೇ ಸುಖಮಾಸ್ವ ॥

ಶರೀರಪಾತಸಮಯೇ ತು ಕೇವಲಂ ಮದೀಯಯೈವ ದಯಯಾಽತಿಪ್ರಬುದ್ಧಃ ಮಾಮೇವಾವಲೋಕಯನ್ ಅಪ್ರಚ್ಯುತ ಪೂರ್ವಸಂಸ್ಕಾರಮನೋರಥಃ ಜೀರ್ಣಮಿವ ವಸ್ತ್ರಂ ಸುಖೇನೇಮಾಂ ಪ್ರಕೃತಿಂ ಸ್ಥೂಲಸೂಕ್ಷ್ಮರೂಪಾಂ ವಿಸೃಜ್ಯ ತದಾನೀಮೇವ ಮತ್ಪ್ರಸಾದಲಬ್ಧ ಮಚ್ಚರಣಾರವಿನ್ದ ಯುಗಲೈಕಾನ್ತಿಕಾತ್ಯನ್ತಿಕ ಪರಭಕ್ತಿ ಪರಜ್ಞಾನ ಪರಮಭಕ್ತಿಕೃತ ಪರಿಪೂರ್ಣಾನವರತ ನಿತ್ಯವಿಶದತಮಾನನ್ಯ ಪ್ರಯೋಜನಾನವಧಿಕಾತಿಶಯ ಪ್ರಿಯ ಮದನುಭವಸ್ತ್ವಂ ತಥಾವಿಧ ಮದನುಭವಜನಿತಾನವಧಿಕಾತಿಶಯ ಪ್ರೀತಿಕಾರಿತಾಶೇಷಾವಸ್ಥೋಚಿತಾಶೇಷಶೇಷತೈಕ ರತಿರೂಪ ನಿತ್ಯಕಿಙ್ಕರೋ ಭವಿಷ್ಯಸಿ । ಮಾತೇಽಭೂದತ್ರ ಸಂಶಯಃ ।

ಅನೃತಂ ನೋಕ್ತಪೂರ್ವಂ ಮೇ ನ ಚ ವಕ್ಷ್ಯೇ ಕದಾಚನ ।

ರಾಮೋ ದ್ವಿರ್ನಾಭಿಭಾಷತೇ ।

ಸಕೃದೇವ ಪ್ರಪನ್ನಾಯ ತವಾಸ್ಮೀತಿ ಚ ಯಾಚತೇ ।

ಅಭಯಂ ಸರ್ವಭೂತೇಭ್ಯೋ ದದಾಮ್ಯೇತದ್ವ್ರತಂ ಮಮ ॥

ಸರ್ವಧರ್ಮಾನ್ ಪರಿತ್ಯಜ್ಯ ಮಾಮೇಕಂ ಶರಣಂ ವ್ರಜ ।

ಅಹಂ ತ್ವಾ ಸರ್ವಪಾಪೇಭ್ಯೋ ಮೋಕ್ಷಯಿಷ್ಯಾಮಿ ಮಾ ಶುಚಃ ॥

ಇತಿ ಮಯೈವ ಹ್ಯುಕ್ತಮ್ ।

ಅತಸ್ತ್ವಂ ತವ ತತ್ತ್ವತೋ ಮತ್ ಜ್ಞಾನದರ್ಶನ ಪ್ರಾಪ್ತಿಷು ನಿಸ್ಸಂಶಯಃ ಸುಖಮಾಸ್ವ ॥

ಅನ್ತ್ಯಕಾಲೇ ಸ್ಮೃತಿರ್ಯಾತು ತವ ಕೈಙ್ಕರ್ಯಕಾರಿತಾ ।

ತಾಮೇನಾಂ ಭಗವನ್ನದ್ಯ ಕ್ರಿಯಮಾಣಾಂ ಕುರುಷ್ವ ಮೇ ॥

ಇತಿ ಶ್ರೀಭಗವದ್ರಾಮಾನುಜ ವಿರಚಿತಂ ಶರಣಾಗತಿ ಗದ್ಯಮ್ ।

Roman (IAST) Transliteration

yo nityamacyutapadāmbujayugmarukma

vyāmohatastaditarāṇi tṛṇāya mene |

asmadgurorbhagavato'sya dayaikasindhoḥ

rāmānujasya caraṇau śaraṇaṃ prapadye ||

vande vedāntakarpūracāmīkara karaṇḍakam |

rāmānujāryamāryāṇāṃ cūḍāmaṇimaharniśam ||

om || bhagavannārāyaṇābhimatānurūpa svarūparūpa guṇavibhavaiśvarya śīlādyanavadhikātiśaya asaṅkhyeya kalyāṇaguṇagaṇāṃ padmavanālayāṃ bhagavatīṃ śriyaṃ devīṃ nityānapāyinīṃ niravadyāṃ devadevadivyamahiṣīṃ akhilajaganmātaraṃ asmanmātaraṃ aśaraṇyaśaraṇyāṃ ananyaśaraṇaḥ śaraṇamahaṃ prapadye ||

pāramārthika bhagavaccaraṇāravinda yugalaikāntikātyantika parabhakti parajñāna paramabhaktikṛta paripūrṇānavarata nityaviśadatamānanya prayojanānavadhikātiśaya priya bhagavadanubhavajanitānavadhikātiśaya prītikāritāśeṣāvasthocita aśeṣaśeṣataikaratirūpa nityakaiṅkaryaprāptyapekṣayā pāramārthikī bhagavaccaraṇāravinda śaraṇāgatiḥ yathāvasthitā aviratā'stu me ||

astu te | tayaiva sarvaṃ sampatsyate ||

akhilaheyapratyanīka kalyāṇaikatāna, svetara samastavastuvilakṣaṇānanta jñānānandaikasvarūpa, svābhimatānurūpaikarūpācintya divyādbhuta nityaniravadya niratiśayaujjvalya saundarya saugandhya saukumārya lāvaṇya yauvanādyanantaguṇanidhi divyarūpa, svābhāvikānavadhikātiśaya jñāna balaiśvarya vīrya śakti tejassauśīlya vātsalya mārdavārjava sauhārda sāmya kāruṇya mādhurya gāmbhīryaudārya cāturya sthairya dhairya śaurya parākrama satyakāma satyasaṅkalpa kṛtitva kṛtajñatādyasaṅkhyeya kalyāṇaguṇagaṇaugha mahārṇava,

svocita vividha vicitrānantāścarya nitya niravadya niratiśaya sugandha niratiśaya sukhasparśa niratiśayaujjvalya kirīṭa makuṭa cūḍāvataṃsa makarakuṇḍala graiveyaka hāra keyūra kaṭaka śrīvatsa kaustubha muktādāmodarabandhana pītāmbara kāñcīguṇa nūpurādyaparimita divyabhūṣaṇa, svānurūpācintyaśakti śaṅkhacakragadā'si śārṅgādyasaṅkhyeya

nityaniravadya niratiśaya kalyāṇadivyāyudha,

svābhimata nityaniravadyānurūpa svarūparūpaguṇa vibhavaiśvarya śīlādyanavadhikātiśayāsaṅkhyeya kalyāṇaguṇagaṇaśrīvallabha, evambhūta bhūminīlānāyaka, svacchandānuvarti svarūpasthiti pravṛttibhedāśeṣa śeṣataikaratirūpa

nityaniravadyaniratiśaya jñāna kriyaiśvaryādyananta kalyāṇaguṇagaṇa śeṣa śeṣāśana

garuḍapramukha nānāvidhānanta parijana paricārikā paricarita caraṇayugala, paramayogi vāṅmanasā'paricchedya svarūpa svabhāva svābhimata vividhavicitrānantabhogya bhogopakaraṇa bhogasthāna samṛddhānantāścaryānanta mahāvibhavānanta parimāṇa nitya niravadya niratiśaya śrīvaikuṇṭhanātha, svasaṅkalpānuvidhāyi svarūpasthiti pravṛtti svaśeṣataikasvabhāva prakṛti puruṣa kālātmaka vividha vicitrānanta bhogya bhoktṛvarga bhogopakaraṇa bhogasthānarūpa

nikhilajagadudaya vibhava layalīla, satyakāma, satyasaṅkalpa, parabrahmabhūta, puruṣottama,mahāvibhūte,

śrīman nārāyaṇa, vaikuṇṭhanātha, apāra kāruṇya sauśīlya vātsalyaudāryaiśvarya saundarya mahodadhe, anālocitaviśeṣāśeṣaloka śaraṇya, praṇatārtihara, āśrita vātsalyaikajaladhe, anavaratavidita nikhilabhūtajātayāthātmya, aśeṣacarācarabhūta nikhilaniyamana nirata, aśeṣacidacidvastu śeṣibhūta, nikhilajagadādhāra, akhilajagatsvāmin, asmatsvāmin, satyakāma,

satyasaṅkalpa, sakaletaravilakṣaṇa, arthikalpaka, āpatsakha, śrīman, nārāyaṇa, aśaraṇyaśaraṇya, ananyaśaraṇastvatpādāravinda yugalaṃ śaraṇamahaṃ prapadye ||

atra dvayam |

pitaraṃ mātaraṃ dārān putrān bandhūn sakhīn gurūn |

ratnāni dhanadhānyāni kṣetrāṇi ca gṛhāṇi ca || 1

sarvadharmāṃśca santyajya sarvakāmāṃśca sākṣarān |

lokavikrāntacaraṇau śaraṇaṃ te'vrajaṃ vibho || 2

tvameva mātā ca pitā tvameva

tvameva bandhuśca gurustvameva |

tvameva vidyā draviṇaṃ tvameva

tvameva sarvaṃ mama devadeva || 3

pitā'si lokasya carācarasya

tvamasya pūjyaśca gururgarīyān |

na tvatsamo'styabhyadhikaḥ kuto'nyo

lokatraye'pyapratimaprabhāva || 4

tasmātpraṇamya praṇidhāya kāyaṃ

prasādaye tvāmahamīśamīḍyam |

piteva putrasya sakheva sakhyuḥ

priyaḥ priyāyārhasi deva soḍhum ||

manovākkāyairanādikāla pravṛttānantākṛtyakaraṇa kṛtyākaraṇa bhagavadapacāra bhāgavatāpacārāsahyāpacārarūpa nānāvidhānantāpacārān ārabdhakāryān anārabdhakāryān kṛtān kriyamāṇān kariṣyamāṇāṃśca sarvānaśeṣataḥ kṣamasva |

anādikālapravṛttaviparīta jñānamātmaviṣayaṃ kṛtsna jagadviṣayaṃ ca viparītavṛttaṃ cāśeṣaviṣayamadyāpi vartamānaṃ vartiṣyamāṇaṃ ca sarvaṃ kṣamasva |

madīyānādikarma pravāhapravṛttāṃ bhagavatsvarūpa tirodhānakarīṃ viparītajñānajananīṃ svaviṣayāyāśca bhogyabuddherjananīṃ dehendriyatvena bhogyatvena sūkṣmarūpeṇa cāvasthitāṃ daivīṃ guṇamayīṃ māyāṃ dāsabhūtaṃ śaraṇāgato'smi tavāsmi dāsaḥ iti vaktāraṃ māṃ tāraya |

teṣāṃ jñānī nityayuktaḥ ekabhaktirviśiṣyate |

priyo hi jñānino'tyarthamahaṃ sa ca mama priyaḥ ||

udārāḥ sarva evaite jñānī tvātmaiva me matam |

āsthitaḥ sa hi yuktātmā māmevānuttamāṃ gatim ||

bahūnāṃ janmanāmante jñānavānmāṃ prapadyate |

vāsudevaḥ sarvamiti sa mahātmā sudurlabhaḥ ||

iti ślokatrayoditajñāninaṃ māṃ kuruṣva |

puruṣaḥ sa paraḥ pārtha bhaktyā labhyastvananyayā |

bhaktyā tvananyayā śakyaḥ madbhaktiṃ labhate parām |

iti sthānatrayodita parabhaktiyuktaṃ māṃ kuruṣva |

parabhakti parajñāna paramabhaktyekasvabhāvaṃ māṃ kuruṣva |

parabhakti parajñāna paramabhaktikṛta paripūrṇānavarata nityaviśadatamānanya prayojanānavadhikātiśaya priya bhagavadanubhavo'haṃ tathāvidha bhagavadanubhava janitānavadhikātiśaya prītikāritāśeṣāvasthocitāśeṣa śeṣataikaratirūpa nityakiṅkaro bhavāni |

evambhūta matkaiṅkaryaprāptyupāyatayā'vakluptasamasta vastuvihīno'pi, ananta tadvirodhipāpākrānto'pi, ananta madapacārayukto'pi, ananta madīyāpacārayukto'pi, anantāsahyāpacāra yukto'pi, etatkāryakāraṇa bhūtānādi viparītāhaṅkāra vimūḍhātma svabhāvo'pi, etadubhayakāryakāraṇabhūtānādi viparītavāsanā sambaddho'pi, etadanuguṇa prakṛti viśeṣasambaddho'pi, etanmūlādhyātmikādhibhautikādhidaivika sukhaduḥkha taddhetu

taditaropekṣaṇīya viṣayānubhava jñānasaṅkocarūpa maccaraṇāravindayugalaikāntikātyantika parabhakti parajñāna paramabhakti vighnapratihato'pi, yena kenāpi prakāreṇa dvayavaktā tvaṃ kevalaṃ madīyayaiva dayayā niśśeṣavinaṣṭa sahetuka maccaraṇāravindayugalaikāntikātyantika parabhakti parajñāna paramabhaktivighnaḥ matprasādalabdha maccaraṇāravindayugalaikāntikātyantika parabhakti parajñāna paramabhaktiḥ matprasādādeva sākṣātkṛta yathāvasthita matsvarūparūpaguṇavibhūti līlopakaraṇavistāraḥ aparokṣasiddha manniyāmyatā maddāsyaika svabhāvātma svarūpaḥ madekānubhavaḥ maddāsyaikapriyaḥ paripūrṇānavarata nityaviśadatamānanya prayojanānavadhikātiśayapriya madanubhavastvaṃ tathāvidha madanubhava janitānavadhikātiśaya prītikāritāśeṣāvasthocitāśeṣa śeṣataikaratirūpa nityakiṅkaro bhava |

evambhūto'si | ādhyātmikādhibhautikādhidaivika duḥkhavighnagandharahitastvaṃ dvayamarthānusandhānena saha sadaivaṃ vaktā yāvaccharīrapātamatraiva śrīraṅge sukhamāsva ||

śarīrapātasamaye tu kevalaṃ madīyayaiva dayayā'tiprabuddhaḥ māmevāvalokayan apracyuta pūrvasaṃskāramanorathaḥ jīrṇamiva vastraṃ sukhenemāṃ prakṛtiṃ sthūlasūkṣmarūpāṃ visṛjya tadānīmeva matprasādalabdha maccaraṇāravinda yugalaikāntikātyantika parabhakti parajñāna paramabhaktikṛta paripūrṇānavarata nityaviśadatamānanya prayojanānavadhikātiśaya priya madanubhavastvaṃ tathāvidha madanubhavajanitānavadhikātiśaya prītikāritāśeṣāvasthocitāśeṣaśeṣataika ratirūpa nityakiṅkaro bhaviṣyasi | māte'bhūdatra saṃśayaḥ |

anṛtaṃ noktapūrvaṃ me na ca vakṣye kadācana |

rāmo dvirnābhibhāṣate |

sakṛdeva prapannāya tavāsmīti ca yācate |

abhayaṃ sarvabhūtebhyo dadāmyetadvrataṃ mama ||

sarvadharmān parityajya māmekaṃ śaraṇaṃ vraja |

ahaṃ tvā sarvapāpebhyo mokṣayiṣyāmi mā śucaḥ ||

iti mayaiva hyuktam |

atastvaṃ tava tattvato mat jñānadarśana prāptiṣu nissaṃśayaḥ sukhamāsva ||

antyakāle smṛtiryātu tava kaiṅkaryakāritā |

tāmenāṃ bhagavannadya kriyamāṇāṃ kuruṣva me ||

iti śrībhagavadrāmānuja viracitaṃ śaraṇāgati gadyam |