Shri Shitala Devi Ashtakam (shitalashtakam)

ॐ

ಶ್ರೀ ಶೀತಲಾ ದೇವೀ ಅಷ್ಟಕಮ್ (ಶೀತಲಾಷ್ಟಕಮ್)

Devi Ashtakam Kannada

ಅಸ್ಯ ಶ್ರೀಶೀತಲಾಸ್ತೋತ್ರಸ್ಯ ಮಹಾದೇವ ಋಷಿಃ ಅನುಷ್ಟುಪ್ ಛನ್ದಃ ಶೀತಲಾ ದೇವತಾ ಲಕ್ಷ್ಮೀರ್ಬೀಜಂ ಭವಾನೀ ಶಕ್ತಿಃ ಸರ್ವವಿಸ್ಫೋಟಕನಿವೃತ್ಯರ್ಥೇ ಜಪೇ ವಿನಿಯೋಗಃ ॥

ಈಶ್ವರ ಉವಾಚ ।

ವನ್ದೇಽಹಂ ಶೀತಲಾಂ ದೇವೀಂ ರಾಸಭಸ್ಥಾಂ ದಿಗಮ್ಬರಾಮ್ ।

ಮಾರ್ಜನೀಕಲಶೋಪೇತಾಂ ಶೂರ್ಪಾಲಙ್ಕೃತಮಸ್ತಕಾಮ್ ॥ 1 ॥

ವನ್ದೇಽಹಂ ಶೀತಲಾಂ ದೇವೀಂ ಸರ್ವರೋಗಭಯಾಪಹಾಮ್ ।

ಯಾಮಾಸಾದ್ಯ ನಿವರ್ತೇತ ವಿಸ್ಫೋಟಕಭಯಂ ಮಹತ್ ॥ 2 ॥

ಶೀತಲೇ ಶೀತಲೇ ಚೇತಿ ಯೋ ಬ್ರೂಯಾದ್ದಾಹಪೀಡಿತಃ ।

ವಿಸ್ಫೋಟಕಭಯಂ ಘೋರಂ ಕ್ಷಿಪ್ರಂ ತಸ್ಯ ಪ್ರಣಶ್ಯತಿ ॥ 3 ॥

ಯಸ್ತ್ವಾಮುದಕಮಧ್ಯೇ ತು ಧ್ಯಾತ್ವಾ ಸಮ್ಪೂಜಯೇನ್ನರಃ ।

ವಿಸ್ಫೋಟಕಭಯಂ ಘೋರಂ ಗೃಹೇ ತಸ್ಯ ನ ಜಾಯತೇ ॥ 4 ॥

ಶೀತಲೇ ಜ್ವರದಗ್ಧಸ್ಯ ಪೂತಿಗನ್ಧಯುತಸ್ಯ ಚ ।

ಪ್ರಣಷ್ಟಚಕ್ಷುಷಃ ಪುಂಸಸ್ತ್ವಾಮಾಹುರ್ಜೀವನೌಷಧಮ್ ॥ 5 ॥

ಶೀತಲೇ ತನುಜಾನ್ ರೋಗಾನ್ ನೃಣಾಂ ಹರಸಿ ದುಸ್ತ್ಯಜಾನ್ ।

ವಿಸ್ಫೋಟಕವಿದೀರ್ಣಾನಾಂ ತ್ವಮೇಕಾಽಮೃತವರ್ಷಿಣೀ ॥ 6 ॥

ಗಲಗಣ್ಡಗ್ರಹಾ ರೋಗಾ ಯೇ ಚಾನ್ಯೇ ದಾರುಣಾ ನೃಣಾಮ್ ।

ತ್ವದನುಧ್ಯಾನಮಾತ್ರೇಣ ಶೀತಲೇ ಯಾನ್ತಿ ಸಙ್ಕ್ಷಯಮ್ ॥ 7 ॥

ನ ಮನ್ತ್ರೋ ನೌಷಧಂ ತಸ್ಯ ಪಾಪರೋಗಸ್ಯ ವಿದ್ಯತೇ ।

ತ್ವಾಮೇಕಾಂ ಶೀತಲೇ ಧಾತ್ರೀಂ ನಾನ್ಯಾಂ ಪಶ್ಯಾಮಿ ದೇವತಾಮ್ ॥ 8 ॥

ಮೃಣಾಲತನ್ತುಸದೃಶೀಂ ನಾಭಿಹೃನ್ಮಧ್ಯಸಂಸ್ಥಿತಾಮ್ ।

ಯಸ್ತ್ವಾಂ ಸಞ್ಚಿನ್ತಯೇದ್ದೇವಿ ತಸ್ಯ ಮೃತ್ಯುರ್ನ ಜಾಯತೇ ॥ 9 ॥

ಅಷ್ಟಕಂ ಶೀತಲಾದೇವ್ಯಾ ಯೋ ನರಃ ಪ್ರಪಠೇತ್ಸದಾ ।

ವಿಸ್ಫೋಟಕಭಯಂ ಘೋರಂ ಗೃಹೇ ತಸ್ಯ ನ ಜಾಯತೇ ॥ 10 ॥

ಶ್ರೋತವ್ಯಂ ಪಠಿತವ್ಯಂ ಚ ಶ್ರದ್ಧಾಭಕ್ತಿಸಮನ್ವಿತೈಃ ।

ಉಪಸರ್ಗವಿನಾಶಾಯ ಪರಂ ಸ್ವಸ್ತ್ಯಯನಂ ಮಹತ್ ॥ 11 ॥

ಶೀತಲೇ ತ್ವಂ ಜಗನ್ಮಾತಾ ಶೀತಲೇ ತ್ವಂ ಜಗತ್ಪಿತಾ ।

ಶೀತಲೇ ತ್ವಂ ಜಗದ್ಧಾತ್ರೀ ಶೀತಲಾಯೈ ನಮೋ ನಮಃ ॥ 12 ॥

ರಾಸಭೋ ಗರ್ದಭಶ್ಚೈವ ಖರೋ ವೈಶಾಖನನ್ದನಃ ।

ಶೀತಲಾವಾಹನಶ್ಚೈವ ದೂರ್ವಾಕನ್ದನಿಕೃನ್ತನಃ ॥ 13 ॥

ಏತಾನಿ ಖರನಾಮಾನಿ ಶೀತಲಾಗ್ರೇ ತು ಯಃ ಪಠೇತ್ ।

ತಸ್ಯ ಗೇಹೇ ಶಿಶೂನಾಂ ಚ ಶೀತಲಾರುಙ್ ನ ಜಾಯತೇ ॥ 14 ॥

ಶೀತಲಾಷ್ಟಕಮೇವೇದಂ ನ ದೇಯಂ ಯಸ್ಯಕಸ್ಯಚಿತ್ ।

ದಾತವ್ಯಂ ಚ ಸದಾ ತಸ್ಮೈ ಶ್ರದ್ಧಾಭಕ್ತಿಯುತಾಯ ವೈ ॥ 15 ॥

ಇತಿ ಶ್ರೀಸ್ಕಾನ್ದಪುರಾಣೇ ಶೀತಲಾಷ್ಟಕಮ್ ॥

Roman (IAST) Transliteration

asya śrīśītalāstotrasya mahādeva ṛṣiḥ anuṣṭup chandaḥ śītalā devatā lakṣmīrbījaṃ bhavānī śaktiḥ sarvavisphoṭakanivṛtyarthe jape viniyogaḥ ||

īśvara uvāca |

vande'haṃ śītalāṃ devīṃ rāsabhasthāṃ digambarām |

mārjanīkalaśopetāṃ śūrpālaṅkṛtamastakām || 1 ||

vande'haṃ śītalāṃ devīṃ sarvarogabhayāpahām |

yāmāsādya nivarteta visphoṭakabhayaṃ mahat || 2 ||

śītale śītale ceti yo brūyāddāhapīḍitaḥ |

visphoṭakabhayaṃ ghoraṃ kṣipraṃ tasya praṇaśyati || 3 ||

yastvāmudakamadhye tu dhyātvā sampūjayennaraḥ |

visphoṭakabhayaṃ ghoraṃ gṛhe tasya na jāyate || 4 ||

śītale jvaradagdhasya pūtigandhayutasya ca |

praṇaṣṭacakṣuṣaḥ puṃsastvāmāhurjīvanauṣadham || 5 ||

śītale tanujān rogān nṛṇāṃ harasi dustyajān |

visphoṭakavidīrṇānāṃ tvamekā'mṛtavarṣiṇī || 6 ||

galagaṇḍagrahā rogā ye cānye dāruṇā nṛṇām |

tvadanudhyānamātreṇa śītale yānti saṅkṣayam || 7 ||

na mantro nauṣadhaṃ tasya pāparogasya vidyate |

tvāmekāṃ śītale dhātrīṃ nānyāṃ paśyāmi devatām || 8 ||

mṛṇālatantusadṛśīṃ nābhihṛnmadhyasaṃsthitām |

yastvāṃ sañcintayeddevi tasya mṛtyurna jāyate || 9 ||

aṣṭakaṃ śītalādevyā yo naraḥ prapaṭhetsadā |

visphoṭakabhayaṃ ghoraṃ gṛhe tasya na jāyate || 10 ||

śrotavyaṃ paṭhitavyaṃ ca śraddhābhaktisamanvitaiḥ |

upasargavināśāya paraṃ svastyayanaṃ mahat || 11 ||

śītale tvaṃ jaganmātā śītale tvaṃ jagatpitā |

śītale tvaṃ jagaddhātrī śītalāyai namo namaḥ || 12 ||

rāsabho gardabhaścaiva kharo vaiśākhanandanaḥ |

śītalāvāhanaścaiva dūrvākandanikṛntanaḥ || 13 ||

etāni kharanāmāni śītalāgre tu yaḥ paṭhet |

tasya gehe śiśūnāṃ ca śītalāruṅ na jāyate || 14 ||

śītalāṣṭakamevedaṃ na deyaṃ yasyakasyacit |

dātavyaṃ ca sadā tasmai śraddhābhaktiyutāya vai || 15 ||

iti śrīskāndapurāṇe śītalāṣṭakam ||