Shri Madhvacharya Krita Dvadasha Stotra - Chaturthastotram

ॐ

ಶ್ರೀ ಮಧ್ವಾಚಾರ್ಯ ಕೃತ ದ್ವಾದಶ ಸ್ತೋತ್ರ - ಚತುರ್ಥಸ್ತೋತ್ರಮ್

Stotram Madhvacharya Kannada

ಅಥ ಚತುರ್ಥಸ್ತೋತ್ರಮ್

ನಿಜಪೂರ್ಣಸುಖಾಮಿತಬೋಧತನುಃ ಪರಶಕ್ತಿರನನ್ತಗುಣಃ ಪರಮಃ ।

ಅಜರಾಮರಣಃ ಸಕಲಾರ್ತಿಹರಃ ಕಮಲಾಪತಿರೀಡ್ಯತಮೋಽವತು ನಃ ॥ 1॥

ಯದಸುಪ್ತಿಗತೋಽಪಿ ಹರಿಃ ಸುಖವಾನ್ ಸುಖರೂಪಿಣಮಾಹುರತೋ ನಿಗಮಾಃ ।

ಸ್ವಮತಿಪ್ರಭವಂ ಜಗದಸ್ಯ ಯತಃ ಪರಬೋಧತನುಂ ಚ ತತಃ ಖಪತಿಮ್ ॥ 2॥ (ಸುಮತಿಪ್ರಭವಮ್)

ಬಹುಚಿತ್ರಜಗತ್ ಬಹುಧಾಕರಣಾತ್ಪರಶಕ್ತಿರನನ್ತಗುಣಃ ಪರಮಃ ।

ಸುಖರೂಪಮಮುಷ್ಯಪದಂ ಪರಮಂ ಸ್ಮರತಸ್ತು ಭವಿಷ್ಯತಿ ತತ್ಸತತಮ್ ॥ 3॥

ಸ್ಮರಣೇ ಹಿ ಪರೇಶಿತುರಸ್ಯ ವಿಭೋರ್ಮಲಿನಾನಿ ಮನಾಂಸಿ ಕುತಃ ಕರಣಮ್ ।

ವಿಮಲಂ ಹಿ ಪದಂ ಪರಮಂ ಸ್ವರತಂ ತರುಣಾರ್ಕಸವರ್ಣಮಜಸ್ಯ ಹರೇಃ ॥ 4॥

ವಿಮಲೈಃ ಶ್ರುತಿಶಾಣನಿಶಾತತಮೈಃ ಸುಮನೋಽಸಿಭಿರಾಶು ನಿಹತ್ಯ ದೃಢಮ್ ।

ಬಲಿನಂ ನಿಜವೈರಿಣಮಾತ್ಮತಮೋಭಿದಮೀಶಮನನ್ತಮುಪಾಸ್ವ ಹರಿಮ್ ॥ 5॥

ನ ಹಿ ವಿಶ್ವಸೃಜೋ ವಿಭುಶಮ್ಭುಪುರನ್ದರ ಸೂರ್ಯಮುಖಾನಪರಾನಪರಾನ್ ।

ಸೃಜತೀಡ್ಯತಮೋಽವತಿ ಹನ್ತಿ ನಿಜಂ ಪದಮಾಪಯತಿ ಪ್ರಣತಾಂ ಸ್ವಧಿಯಾ ॥ 6॥

ಪರಮೋಽಪಿ ರಮೇಶಿತುರಸ್ಯ ಸಮೋ ನ ಹಿ ಕಶ್ಚಿದಭೂನ್ನ ಭವಿಷ್ಯತಿ ಚ ।

ಕ್ವಚಿದದ್ಯತನೋಽಪಿ ನ ಪೂರ್ಣಸದಾಗಣಿತೇಡ್ಯಗುಣಾನುಭವೈಕತನೋಃ ॥ 7॥

ಇತಿ ದೇವವರಸ್ಯ ಹರೇಃ ಸ್ತವನಂ ಕೃತವಾನ್ ಮುನಿರುತ್ತಮಮಾದರತಃ ।

ಸುಖತೀರ್ಥಪದಾಭಿಹಿತಃ ಪಠತಸ್ತದಿದಂ ಭವತಿ ಧ್ರುವಮುಚ್ಚಸುಖಮ್ ॥ 8॥

ಇತಿ ಶ್ರೀಮದಾನನ್ದತೀರ್ಥಭಗವತ್ಪಾದಾಚಾರ್ಯ ವಿರಚಿತಂ

ದ್ವಾದಶಸ್ತೋತ್ರೇಷು ಚತುರ್ಥಸ್ತೋತ್ರಂ ಸಮ್ಪೂರ್ಣಮ್

Roman (IAST) Transliteration

atha caturthastotram

nijapūrṇasukhāmitabodhatanuḥ paraśaktiranantaguṇaḥ paramaḥ |

ajarāmaraṇaḥ sakalārtiharaḥ kamalāpatirīḍyatamo'vatu naḥ || 1||

yadasuptigato'pi hariḥ sukhavān sukharūpiṇamāhurato nigamāḥ |

svamatiprabhavaṃ jagadasya yataḥ parabodhatanuṃ ca tataḥ khapatim || 2|| (sumatiprabhavam)

bahucitrajagat bahudhākaraṇātparaśaktiranantaguṇaḥ paramaḥ |

sukharūpamamuṣyapadaṃ paramaṃ smaratastu bhaviṣyati tatsatatam || 3||

smaraṇe hi pareśiturasya vibhormalināni manāṃsi kutaḥ karaṇam |

vimalaṃ hi padaṃ paramaṃ svarataṃ taruṇārkasavarṇamajasya hareḥ || 4||

vimalaiḥ śrutiśāṇaniśātatamaiḥ sumano'sibhirāśu nihatya dṛḍham |

balinaṃ nijavairiṇamātmatamobhidamīśamanantamupāsva harim || 5||

na hi viśvasṛjo vibhuśambhupurandara sūryamukhānaparānaparān |

sṛjatīḍyatamo'vati hanti nijaṃ padamāpayati praṇatāṃ svadhiyā || 6||

paramo'pi rameśiturasya samo na hi kaścidabhūnna bhaviṣyati ca |

kvacidadyatano'pi na pūrṇasadāgaṇiteḍyaguṇānubhavaikatanoḥ || 7||

iti devavarasya hareḥ stavanaṃ kṛtavān muniruttamamādarataḥ |

sukhatīrthapadābhihitaḥ paṭhatastadidaṃ bhavati dhruvamuccasukham || 8||

iti śrīmadānandatīrthabhagavatpādācārya viracitaṃ

dvādaśastotreṣu caturthastotraṃ sampūrṇam