Shri Krishna Krita Durga Stotram

ॐ

ಶ್ರೀ ಕೃಷ್ಣ ಕೃತ ದುರ್ಗಾ ಸ್ತೋತ್ರಮ್

Krishna Stotram Kannada

ಶ್ರೀಕೃಷ್ಣ ಉವಾಚ ।

ತ್ವಮೇವ ಸರ್ವಜನನೀ ಮೂಲಪ್ರಕೃತಿರೀಶ್ವರೀ ।

ತ್ವಮೇವಾದ್ಯಾ ಸೃಷ್ಟಿವಿಧೌ ಸ್ವೇಚ್ಛಯಾ ತ್ರಿಗುಣಾತ್ಮಿಕಾ ॥ 1 ॥

ಕಾರ್ಯಾರ್ಥೇ ಸಗುಣಾ ತ್ವಂ ಚ ವಸ್ತುತೋ ನಿರ್ಗುಣಾ ಸ್ವಯಮ್ ।

ಪರಬ್ರಹ್ಮಸ್ವರೂಪಾ ತ್ವಂ ಸತ್ಯಾ ನಿತ್ಯಾ ಸನಾತನೀ ॥ 2 ॥

ತೇಜಃ ಸ್ವರೂಪಾ ಪರಮಾ ಭಕ್ತಾನುಗ್ರವಿಗ್ರಹಾ ।

ಸರ್ವಸ್ವರೂಪಾ ಸರ್ವೇಶಾ ಸರ್ವಾಧಾರಾ ಪರಾತ್ಪರಾ ॥ 3 ॥

ಸರ್ವಬೀಜಸ್ವರೂಪಾ ಚ ಸರ್ವಪೂಜ್ಯಾ ನಿರಾಶ್ರಯಾ ।

ಸರ್ವಜ್ಞಾ ಸರ್ವತೋಭದ್ರಾ ಸರ್ವಮಙ್ಗಲಮಙ್ಗಲಾ ॥ 4 ॥

ಸರ್ವಬುದ್ಧಿಸ್ವರೂಪಾ ಚ ಸರ್ವಶಕ್ತಿಸ್ವರೂಪಿಣೀ ।

ಸರ್ವಜ್ಞಾನಪ್ರದಾ ದೇವೀ ಸರ್ವಜ್ಞಾ ಸರ್ವಭಾವಿನೀ ॥ 5 ॥

ತ್ವಂ ಸ್ವಾಹಾ ದೇವದಾನೇ ಚ ಪಿತೃದಾನೇ ಸ್ವಧಾ ಸ್ವಯಮ್ ।

ದಕ್ಷಿಣಾ ಸರ್ವದಾನೇ ಚ ಸರ್ವಶಕ್ತಿಸ್ವರೂಪಿಣೀ ॥ 6 ॥

ನಿದ್ರಾ ತ್ವಂ ಚ ದಯಾ ತ್ವಂ ಚ ತೃಷ್ಣಾ ತ್ವಂ ಚಾತ್ಮನಃ ಪ್ರಿಯಾ ।

ಕ್ಷುತ್ ಕ್ಷಾನ್ತಿಃ ಶಾನ್ತಿರೀಶಾ ಚ ಕಾನ್ತಿಸ್ತುಷ್ಟಿಶ್ಚ ಶಾಶ್ವತೀ ॥ 7 ॥

ಶ್ರದ್ಧಾ ಪುಷ್ಟಿಶ್ಚ ತನ್ದ್ರಾ ಚ ಲಜ್ಜಾ ಶೋಭಾ ದಯಾ ತಥಾ ।

ಸತಾಂ ಸಮ್ಪತ್ಸ್ವರೂಪಾ ಶ್ರೀರ್ವಿಪತ್ತಿರಸತಾಮಿಹ ॥ 8 ॥

ಪ್ರೀತಿರೂಪಾ ಪುಣ್ಯವತಾಂ ಪಾಪಿನಾಂ ಕಲಹಾಙ್ಕುರಾ ।

ಶಶ್ವತ್ಕರ್ಮಮಯೀ ಶಕ್ತಿಃ ಸರ್ವದಾ ಸರ್ವಜೀವಿನಾಮ್ ॥ 9 ॥

ದೇವೇಭ್ಯಃ ಸ್ವಪದೋ ದಾತ್ರೀ ಧಾತುರ್ಧಾತ್ರೀ ಕೃಪಾಮಯೀ ।

ಹಿತಾಯ ಸರ್ವದೇವಾನಾಂ ಸರ್ವಾಸುರವಿನಾಶಿನೀ ॥ 10 ॥

ಯೋಗಿನಿದ್ರಾ ಯೋಗರೂಪಾ ಯೋಗದಾತ್ರೀ ಚ ಯೋಗಿನಾಮ್ ।

ಸಿದ್ಧಿಸ್ವರೂಪಾ ಸಿದ್ಧಾನಾಂ ಸಿದ್ಧಿದಾ ಸಿದ್ಧಯೋಗಿನೀ ॥ 11 ॥

ಮಾಹೇಶ್ವರೀ ಚ ಬ್ರಹ್ಮಾಣೀ ವಿಷ್ಣುಮಾಯಾ ಚ ವೈಷ್ಣವೀ ।

ಭದ್ರದಾ ಭದ್ರಕಾಲೀ ಚ ಸರ್ವಲೋಕಭಯಙ್ಕರೀ ॥ 12 ॥

ಗ್ರಾಮೇ ಗ್ರಾಮೇ ಗ್ರಾಮದೇವೀ ಗೃಹದೇವೀ ಗೃಹೇ ಗೃಹೇ ।

ಸತಾಂ ಕೀರ್ತಿಃ ಪ್ರತಿಷ್ಠಾ ಚ ನಿನ್ದಾ ತ್ವಮಸತಾಂ ಸದಾ ॥ 13 ॥

ಮಹಾಯುದ್ಧೇ ಮಹಾಮಾರೀ ದುಷ್ಟಸಂಹಾರರೂಪಿಣೀ ।

ರಕ್ಷಾಸ್ವರೂಪಾ ಶಿಷ್ಟಾನಾಂ ಮಾತೇವ ಹಿತಕಾರಿಣೀ ॥ 14 ॥

ವನ್ದ್ಯಾ ಪೂಜ್ಯಾ ಸ್ತುತಾ ತ್ವಂ ಚ ಬ್ರಹ್ಮಾದೀನಾಂ ಚ ಸರ್ವದಾ ।

ಬ್ರಹ್ಮಣ್ಯರೂಪಾ ವಿಪ್ರಾಣಾಂ ತಪಸ್ಯಾ ಚ ತಪಸ್ವಿನಾಮ್ ॥ 15 ॥

ವಿದ್ಯಾ ವಿದ್ಯಾವತಾಂ ತ್ವಂ ಚ ಬುದ್ಧಿರ್ಬುದ್ಧಿಮತಾಂ ಸತಾಮ್ ।

ಮೇಧಾ ಸ್ಮೃತಿಸ್ವರೂಪಾ ಚ ಪ್ರತಿಭಾ ಪ್ರತಿಭಾವತಾಮ್ ॥ 16 ॥

ರಾಜ್ಞಾಂ ಪ್ರತಾಪರೂಪಾ ಚ ವಿಶಾಂ ವಾಣಿಜ್ಯರೂಪಿಣೀ ।

ಸೃಷ್ಟೌ ಸೃಷ್ಟಿಸ್ವರೂಪಾ ತ್ವಂ ರಕ್ಷಾರೂಪಾ ಚ ಪಾಲನೇ ॥ 17 ॥

ತಥಾನ್ತೇ ತ್ವಂ ಮಹಾಮಾರೀ ವಿಶ್ವೇ ವಿಶ್ವೈಶ್ಚ ಪೂಜಿತೇ ।

ಕಾಲರಾತ್ರಿರ್ಮಹಾರಾತ್ರಿರ್ಮೋಹರಾತ್ರಿಶ್ಚ ಮೋಹಿನೀ ॥ 18 ॥

ದುರತ್ಯಯಾ ಮೇ ಮಾಯಾ ತ್ವಂ ಯಯಾ ಸಮ್ಮೋಹಿತಂ ಜಗತ್ ।

ಯಯಾ ಮುಗ್ಧೋ ಹಿ ವಿದ್ವಾಂಶ್ಚ ಮೋಕ್ಷಮಾರ್ಗಂ ನ ಪಶ್ಯತಿ ॥ 19 ॥

ಇತ್ಯಾತ್ಮನಾ ಕೃತಂ ಸ್ತೋತ್ರಂ ದುರ್ಗಾಯಾ ದುರ್ಗನಾಶನಮ್ ।

ಪೂಜಾಕಾಲೇ ಪಠೇದ್ಯೋ ಹಿ ಸಿದ್ಧಿರ್ಭವತಿ ವಾಞ್ಛಿತಾ ॥ 20 ॥

ಇತಿ ಶ್ರೀಬ್ರಹ್ಮವೈವರ್ತೇ ಮಹಾಪುರಾಣೇ ದ್ವಿತೀಯೇ ಪ್ರಕೃತಿಖಣ್ಡೇ ನಾರದನಾರಾಯಣಸಂವಾದೇ ದುರ್ಗೋಪಾಖ್ಯಾನೇ ಷಟ್ಷಷ್ಟಿತಮೋಽಧ್ಯಾಯೇ ಶ್ರೀ ದುರ್ಗಾ ಸ್ತೋತ್ರಮ್ ।

Roman (IAST) Transliteration

śrīkṛṣṇa uvāca |

tvameva sarvajananī mūlaprakṛtirīśvarī |

tvamevādyā sṛṣṭividhau svecchayā triguṇātmikā || 1 ||

kāryārthe saguṇā tvaṃ ca vastuto nirguṇā svayam |

parabrahmasvarūpā tvaṃ satyā nityā sanātanī || 2 ||

tejaḥ svarūpā paramā bhaktānugravigrahā |

sarvasvarūpā sarveśā sarvādhārā parātparā || 3 ||

sarvabījasvarūpā ca sarvapūjyā nirāśrayā |

sarvajñā sarvatobhadrā sarvamaṅgalamaṅgalā || 4 ||

sarvabuddhisvarūpā ca sarvaśaktisvarūpiṇī |

sarvajñānapradā devī sarvajñā sarvabhāvinī || 5 ||

tvaṃ svāhā devadāne ca pitṛdāne svadhā svayam |

dakṣiṇā sarvadāne ca sarvaśaktisvarūpiṇī || 6 ||

nidrā tvaṃ ca dayā tvaṃ ca tṛṣṇā tvaṃ cātmanaḥ priyā |

kṣut kṣāntiḥ śāntirīśā ca kāntistuṣṭiśca śāśvatī || 7 ||

śraddhā puṣṭiśca tandrā ca lajjā śobhā dayā tathā |

satāṃ sampatsvarūpā śrīrvipattirasatāmiha || 8 ||

prītirūpā puṇyavatāṃ pāpināṃ kalahāṅkurā |

śaśvatkarmamayī śaktiḥ sarvadā sarvajīvinām || 9 ||

devebhyaḥ svapado dātrī dhāturdhātrī kṛpāmayī |

hitāya sarvadevānāṃ sarvāsuravināśinī || 10 ||

yoginidrā yogarūpā yogadātrī ca yoginām |

siddhisvarūpā siddhānāṃ siddhidā siddhayoginī || 11 ||

māheśvarī ca brahmāṇī viṣṇumāyā ca vaiṣṇavī |

bhadradā bhadrakālī ca sarvalokabhayaṅkarī || 12 ||

grāme grāme grāmadevī gṛhadevī gṛhe gṛhe |

satāṃ kīrtiḥ pratiṣṭhā ca nindā tvamasatāṃ sadā || 13 ||

mahāyuddhe mahāmārī duṣṭasaṃhārarūpiṇī |

rakṣāsvarūpā śiṣṭānāṃ māteva hitakāriṇī || 14 ||

vandyā pūjyā stutā tvaṃ ca brahmādīnāṃ ca sarvadā |

brahmaṇyarūpā viprāṇāṃ tapasyā ca tapasvinām || 15 ||

vidyā vidyāvatāṃ tvaṃ ca buddhirbuddhimatāṃ satām |

medhā smṛtisvarūpā ca pratibhā pratibhāvatām || 16 ||

rājñāṃ pratāparūpā ca viśāṃ vāṇijyarūpiṇī |

sṛṣṭau sṛṣṭisvarūpā tvaṃ rakṣārūpā ca pālane || 17 ||

tathānte tvaṃ mahāmārī viśve viśvaiśca pūjite |

kālarātrirmahārātrirmoharātriśca mohinī || 18 ||

duratyayā me māyā tvaṃ yayā sammohitaṃ jagat |

yayā mugdho hi vidvāṃśca mokṣamārgaṃ na paśyati || 19 ||

ityātmanā kṛtaṃ stotraṃ durgāyā durganāśanam |

pūjākāle paṭhedyo hi siddhirbhavati vāñchitā || 20 ||

iti śrībrahmavaivarte mahāpurāṇe dvitīye prakṛtikhaṇḍe nāradanārāyaṇasaṃvāde durgopākhyāne ṣaṭṣaṣṭitamo'dhyāye śrī durgā stotram |