Shri Bagalamukhi Stotram - 1

ॐ

ಶ್ರೀ ಬಗಲಾಮುಖೀ ಸ್ತೋತ್ರಮ್ - 1

Stotram Kannada

ಓಂ ಅಸ್ಯ ಶ್ರೀಬಗಲಾಮುಖೀಸ್ತೋತ್ರಸ್ಯ

ನಾರದೃಷಿಃ

ಶ್ರೀ ಬಗಲಾಮುಖೀ ದೇವತಾ

ಮಮ ಸನ್ನಿಹಿತಾನಾಂ ವಿರೋಧಿನಾಂ ವಾಙ್ಮುಖ-ಪದಬುದ್ಧೀನಾಂ ಸ್ತಮ್ಭನಾರ್ಥೇ ಸ್ತೋತ್ರಪಾಠೇ ವಿನಿಯೋಗಃ

ಮಧ್ಯೇಸುಧಾಬ್ಧಿ ಮಣಿಮಣ್ಟಪ ರತ್ನವೇದಿ

ಸಿಂಹಾಸನೋಪರಿಗತಾಂ ಪರಿಪೀತವರ್ಣಾಮ್ ।

ಪೀತಾಮ್ಬರಾಭರಣ ಮಾಲ್ಯವಿಭೂಷಿತಾಙ್ಗೀಂ

ದೇವೀಂ ಭಜಾಮಿ ಧೃತಮುದ್ಗರವೈರಿ ಜಿಹ್ವಾಮ್ ॥ 1 ॥

ಜಿಹ್ವಾಗ್ರಮಾದಾಯ ಕರೇಣ ದೇವೀಂ

ವಾಮೇನ ಶತ್ರೂನ್ ಪರಿಪೀಡಯನ್ತೀಮ್ ।

ಗದಾಭಿಘಾತೇನ ಚ ದಕ್ಷಿಣೇನ

ಪೀತಾಮ್ಬರಾಢ್ಯಾಂ ದ್ವಿಭುಜಾಂ ಭಜಾಮಿ ॥ 2 ॥

ಚಲತ್ಕನಕಕುಣ್ಡಲೋಲ್ಲಸಿತಚಾರುಗಣ್ಡಸ್ಥಲಾಂ

ಲಸತ್ಕನಕಚಮ್ಪಕ ದ್ಯುತಿಮದಿನ್ದುಬಿಮ್ಬಾನನಾಮ್ ।

ಗದಾಹತ ವಿಪಕ್ಷಕಾಂ ಕಲಿತಲೋಲಜಿಹ್ವಾಞ್ಚಲಾಂ

ಸ್ಮರಾಮಿ ಬಗಲಾಮುಖೀಂ ವಿಮುಖವಾಙ್ಮನಸ್ಸ್ತಮ್ಭಿನೀಮ್ ॥ 3 ॥

ಪೀಯೂಷೋ ದಧಿಮಧ್ಯಚಾರು ವಿಲಸ ದ್ರಕ್ತೋತ್ಪಲೇ ಮಣ್ಟಪೇ

ಸತ್ಸಿಂಹಾಸನ ಮೌಲಿಪಾತಿತರಿಪುಂ ಪ್ರೇತಾಸನಾಧ್ಯಾಸಿನೀಮ್ ।

ಸ್ವರ್ಣಾಭಾಂ ಕರಪೀಡಿತಾರಿರಸನಾಂ ಭ್ರಾಮ್ಯದ್ಗದಾಂ ವಿಭ್ರಮಾಂ

ಇತ್ಥಂ ಧ್ಯಾಯತಿ ಯಾನ್ತಿ ತಸ್ಯ ವಿಲಯಂ ಸದ್ಯೋಥ ಸರ್ವಾಪದಃ ॥ 4 ॥

ದೇವಿತ್ತ್ವಚ್ಚರಣಾಮ್ಬುಜಾರ್ಚನಕೃತೇ ಯಃ ಪೀತ ಪುಷ್ಪಾಞ್ಜಲೀನ್

ಭಕ್ತ್ಯಾ ವಾಮಕರೇ ನಿಧಾಯ ಚ ಮನುಂ ಮನ್ತ್ರೀ ಮನೋಜ್ಞಾಕ್ಷರಮ್ ।

ಪೀಠಧ್ಯಾನಪರೋಽಥ ಕುಮ್ಭಕವಶಾದ್ಬೀಜಂ ಸ್ಮರೇತ್ಪಾರ್ಥಿವ-

ಸ್ತಸ್ಯಾಮಿತ್ರಮುಖಸ್ಯ ವಾಚಿ ಹೃದಯೇ ಜಾಡ್ಯಂ ಭವೇತ್ತತ್‍ಕ್ಷಣಾತ್ ॥ 5 ॥

ವಾದೀ ಮೂಕತಿ ಕಙ್ಕತಿ ಕ್ಷಿತಿಪತಿರ್ವೈಶ್ವಾನರಶ್ಶೀತಿತಿ

ಕ್ರೋಧೀಶಾಮ್ಯತಿ ದುರ್ಜನಸ್ಸುಜನತಿ ಕ್ಷಿಪ್ರಾನುಗಃ ಖಞ್ಜತಿ ।

ಗರ್ವೀ ಖರ್ವತಿ ಸರ್ವವಿಚ್ಚ ಜಡತಿ ತ್ವದ್ಯನ್ತ್ರಣಾ ಯನ್ತ್ರಿತಃ

ಶ್ರೀನಿತ್ಯೇ ಬಗಲಾಮುಖಿ ಪ್ರತಿದಿನಂ ಕಲ್ಯಾಣಿ ತುಭ್ಯಂ ನಮಃ ॥ 6 ॥

ಮನ್ತ್ರಸ್ತಾವದಯಂ ವಿಪಕ್ಷದಲನೇ ಸ್ತೋತ್ರಂ ಪವಿತ್ರಂ ಚ ತೇ

ಯನ್ತ್ರಂ ವಾದಿನಿಯನ್ತ್ರಣಂ ತ್ರಿಜಗತಾಂ ಜೈತ್ರಂ ಚ ಚಿತ್ರಂ ಚ ತೇ ।

ಮಾತಃ ಶ್ರೀಬಗಲೇತಿ ನಾಮ ಲಲಿತಂ ಯಸ್ಯಾಸ್ತಿ ಜನ್ತೋರ್ಮುಖೇ

ತ್ವನ್ನಾಮಗ್ರಹಣೇನ ಸಂಸದಿ ಮುಖ ಸ್ತಮ್ಭೋ ಭವೇದ್ವಾದಿನಾಮ್ ॥ 7 ॥

ದುಷ್ಟಸ್ತಮ್ಭನಮುಗ್ರವಿಘ್ನಶಮನಂ ದಾರಿದ್ರ್ಯವಿದ್ರಾವಣಂ

ಭೂಭೃದ್ಭೀಶಮನಂ ಚಲನ್ಮೃಗದೃಶಾಂ ಚೇತಸ್ಸಮಾಕರ್ಷಣಮ್ ।

ಸೌಭಾಗ್ಯೈಕನಿಕೇತನಂ ಸಮದೃಶಃ ಕಾರುಣ್ಯಪೂರ್ಣಾಮೃತಂ

ಮೃತ್ಯೋರ್ಮಾರಣಮಾವಿರಸ್ತು ಪುರತೋ ಮಾತಸ್ತ್ವದೀಯಂ ವಪುಃ ॥ 8 ॥

ಮಾತರ್ಭಞ್ಜಯ ಮೇ ವಿಪಕ್ಷವದನಾಂ ಜಿಹ್ವಾಂ ಚ ಸಙ್ಕೀಲಯ

ಬ್ರಾಹ್ಮೀಂ ಮುದ್ರಯ ನಾಶಯಾಶುಧಿಷಣಾಮುಗ್ರಾಂ ಗತಿಂ ಸ್ತಮ್ಭಯ ।

ಶತ್ರೂಂಶ್ಚೂರ್ಣಯ ದೇವಿ ತೀಕ್ಷ್ಣಗದಯಾ ಗೌರಾಙ್ಗಿ ಪೀತಾಮ್ಬರೇ

ವಿಘ್ನೌಘಂ ಬಗಲೇ ಹರ ಪ್ರಣಮತಾಂ ಕಾರುಣ್ಯಪೂರ್ಣೇಕ್ಷಣೇ ॥ 9 ॥

ಮಾತರ್ಭೈರವಿ ಭದ್ರಕಾಲಿ ವಿಜಯೇ ವಾರಾಹಿ ವಿಶ್ವಾಶ್ರಯೇ

ಶ್ರೀವಿದ್ಯೇ ಸಮಯೇ ಮಹೇಶಿ ಬಗಲೇ ಕಾಮೇಶಿ ರಾಮೇ ರಮೇ ।

ಮಾತಙ್ಗಿ ತ್ರಿಪುರೇ ಪರಾತ್ಪರತರೇ ಸ್ವರ್ಗಾಪವರ್ಗಪ್ರದೇ

ದಾಸೋಽಹಂ ಶರಣಾಗತಃ ಕರುಣಯಾ ವಿಶ್ವೇಶ್ವರಿ ತ್ರಾಹಿಮಾಮ್ ॥ 10 ॥

ಸಂರಮ್ಭೇ ಸೌರಸಙ್ಘೇ ಪ್ರಹರಣಸಮಯೇ ಬನ್ಧನೇವಾರಿಮಧ್ಯೇ

ವಿದ್ಯಾವಾದೇವಿವಾದೇ ಪ್ರತಿಕೃತಿನೃಪತೌ ದಿವ್ಯಕಾಲೇ ನಿಶಾಯಾಮ್ ।

ವಶ್ಯೇ ವಾ ಸ್ತಮ್ಭನೇ ವಾ ರಿಪುವಧಸಮಯೇ ನಿರ್ಜನೇ ವಾ ವನೇ ವಾ

ಗಚ್ಛಂಸ್ತಿಷ್ಠಂಸ್ತ್ರಿಕಾಲಂ ಯದಿ ಪಠತಿ ಶಿವಂ ಪ್ರಾಪ್ನುಯಾದಾಶು ಧೀರಃ ॥ 11 ॥

ತ್ವಂ ವಿದ್ಯಾ ಪರಮಾ ತ್ರಿಲೋಕಜನನೀ ವಿಘ್ನೌಘಸಞ್ಛೇದಿನೀ

ಯೋಷಾಕರ್ಷಣಕಾರಿಣೀ ತ್ರಿಜಗತಾಮಾನನ್ದಸಂವರ್ಧಿನೀ ।

ದುಸ್ಫೋಟೋಚ್ಚಾಟನಕಾರಿಣೀ ಜನಮನಸ್ಸಮ್ಮೋಹಸನ್ದಾಯಿನೀ

ಜಿಹ್ವಾಕೀಲನಭೈರವೀ ವಿಜಯತೇ ಬ್ರಹ್ಮಾಸ್ತ್ರಮನ್ತ್ರೋ ಯಥಾ ॥ 12 ॥

ವಿದ್ಯಾಲಕ್ಷ್ಮೀಸ್ಸರ್ವಸೌಭಾಗ್ಯಮಾಯುಃ

ಪುತ್ರೈಃ ಪೌತ್ರೈಃ ಸರ್ವಸಾಮ್ರಾಜ್ಯಸಿದ್ಧಿಃ ।

ಮಾನೋ ಭೋಗೋ ವಶ್ಯಮಾರೋಗ್ಯಸೌಖ್ಯಂ

ಪ್ರಾಪ್ತಂ ತತ್ತದ್ಭೂತಲೇಽಸ್ಮಿನ್ನರೇಣ ॥ 13 ॥

ಯತ್ಕೃತಂ ಚ ಜಪಂ ಹೋಮಂ ಗದಿತಂ ಪರಮೇಶ್ವರೀ ।

ದುಷ್ಟಾನಾಂ ನಿಗ್ರಹಾರ್ಥಾಯ ತದ್ಗೃಹಾಣ ನಮೋಽಸ್ತು ತೇ ॥ 14 ॥

ಪೀತಾಮ್ಬರಾಂ ತಾಂ ದ್ವಿಭುಜಾಂ ತ್ರಿನೇತ್ರಾಂ ಗಾತ್ರಗೋಜ್ಜ್ವಲಾಮ್ ।

ಶಿಲಾಮುದ್ಗರಹಸ್ತಾಂ ಚ ಸ್ಮರೇತ್ತಾಂ ಬಗಲಾಮುಖೀಮ್ ॥ 15 ॥

ಬ್ರಹ್ಮಾಸ್ತ್ರಮಿತಿ ವಿಖ್ಯಾತಂ ತ್ರಿಷು ಲೋಕೇಷು ವಿಶ್ರುತಮ್ ।

ಗುರುಭಕ್ತಾಯ ದಾತವ್ಯಂ ನದೇಯಂ ಯಸ್ಯ ಕಸ್ಯಚಿತ್ ॥ 16 ॥

ನಿತ್ಯಂ ಸ್ತೋತ್ರಮಿದಂ ಪವಿತ್ರಮಿಹ ಯೋ ದೇವ್ಯಾಃ ಪಠತ್ಯಾದರಾತ್

ಧೃತ್ವಾಯನ್ತ್ರಮಿದಂ ತಥೈವ ಸಮರೇ ಬಾಹೌ ಕರೇ ವಾ ಗಲೇ ।

ರಾಜಾನೋಽಪ್ಯರಯೋ ಮದಾನ್ಧಕರಿಣಸ್ಸರ್ಪಾ ಮೃಗೇನ್ದ್ರಾದಿಕಾಃ

ತೇ ವೈ ಯಾನ್ತಿ ವಿಮೋಹಿತಾ ರಿಪುಗಣಾ ಲಕ್ಷ್ಮೀಃ ಸ್ಥಿರಾಸ್ಸಿದ್ಧಯಃ ॥ 17 ॥

ಇತಿ ಶ್ರೀ ರುದ್ರಯಾಮಲೇ ತನ್ತ್ರೇ ಶ್ರೀ ಬಗಲಾಮುಖೀ ಸ್ತೋತ್ರಮ್ ॥

Roman (IAST) Transliteration

oṃ asya śrībagalāmukhīstotrasya

nāradṛṣiḥ

śrī bagalāmukhī devatā

mama sannihitānāṃ virodhināṃ vāṅmukha-padabuddhīnāṃ stambhanārthe stotrapāṭhe viniyogaḥ

madhyesudhābdhi maṇimaṇṭapa ratnavedi

siṃhāsanoparigatāṃ paripītavarṇām |

pītāmbarābharaṇa mālyavibhūṣitāṅgīṃ

devīṃ bhajāmi dhṛtamudgaravairi jihvām || 1 ||

jihvāgramādāya kareṇa devīṃ

vāmena śatrūn paripīḍayantīm |

gadābhighātena ca dakṣiṇena

pītāmbarāḍhyāṃ dvibhujāṃ bhajāmi || 2 ||

calatkanakakuṇḍalollasitacārugaṇḍasthalāṃ

lasatkanakacampaka dyutimadindubimbānanām |

gadāhata vipakṣakāṃ kalitalolajihvāñcalāṃ

smarāmi bagalāmukhīṃ vimukhavāṅmanasstambhinīm || 3 ||

pīyūṣo dadhimadhyacāru vilasa draktotpale maṇṭape

satsiṃhāsana maulipātitaripuṃ pretāsanādhyāsinīm |

svarṇābhāṃ karapīḍitārirasanāṃ bhrāmyadgadāṃ vibhramāṃ

itthaṃ dhyāyati yānti tasya vilayaṃ sadyotha sarvāpadaḥ || 4 ||

devittvaccaraṇāmbujārcanakṛte yaḥ pīta puṣpāñjalīn

bhaktyā vāmakare nidhāya ca manuṃ mantrī manojñākṣaram |

pīṭhadhyānaparo'tha kumbhakavaśādbījaṃ smaretpārthiva-

stasyāmitramukhasya vāci hṛdaye jāḍyaṃ bhavettat‍kṣaṇāt || 5 ||

vādī mūkati kaṅkati kṣitipatirvaiśvānaraśśītiti

krodhīśāmyati durjanassujanati kṣiprānugaḥ khañjati |

garvī kharvati sarvavicca jaḍati tvadyantraṇā yantritaḥ

śrīnitye bagalāmukhi pratidinaṃ kalyāṇi tubhyaṃ namaḥ || 6 ||

mantrastāvadayaṃ vipakṣadalane stotraṃ pavitraṃ ca te

yantraṃ vādiniyantraṇaṃ trijagatāṃ jaitraṃ ca citraṃ ca te |

mātaḥ śrībagaleti nāma lalitaṃ yasyāsti jantormukhe

tvannāmagrahaṇena saṃsadi mukha stambho bhavedvādinām || 7 ||

duṣṭastambhanamugravighnaśamanaṃ dāridryavidrāvaṇaṃ

bhūbhṛdbhīśamanaṃ calanmṛgadṛśāṃ cetassamākarṣaṇam |

saubhāgyaikaniketanaṃ samadṛśaḥ kāruṇyapūrṇāmṛtaṃ

mṛtyormāraṇamāvirastu purato mātastvadīyaṃ vapuḥ || 8 ||

mātarbhañjaya me vipakṣavadanāṃ jihvāṃ ca saṅkīlaya

brāhmīṃ mudraya nāśayāśudhiṣaṇāmugrāṃ gatiṃ stambhaya |

śatrūṃścūrṇaya devi tīkṣṇagadayā gaurāṅgi pītāmbare

vighnaughaṃ bagale hara praṇamatāṃ kāruṇyapūrṇekṣaṇe || 9 ||

mātarbhairavi bhadrakāli vijaye vārāhi viśvāśraye

śrīvidye samaye maheśi bagale kāmeśi rāme rame |

mātaṅgi tripure parātparatare svargāpavargaprade

dāso'haṃ śaraṇāgataḥ karuṇayā viśveśvari trāhimām || 10 ||

saṃrambhe saurasaṅghe praharaṇasamaye bandhanevārimadhye

vidyāvādevivāde pratikṛtinṛpatau divyakāle niśāyām |

vaśye vā stambhane vā ripuvadhasamaye nirjane vā vane vā

gacchaṃstiṣṭhaṃstrikālaṃ yadi paṭhati śivaṃ prāpnuyādāśu dhīraḥ || 11 ||

tvaṃ vidyā paramā trilokajananī vighnaughasañchedinī

yoṣākarṣaṇakāriṇī trijagatāmānandasaṃvardhinī |

dusphoṭoccāṭanakāriṇī janamanassammohasandāyinī

jihvākīlanabhairavī vijayate brahmāstramantro yathā || 12 ||

vidyālakṣmīssarvasaubhāgyamāyuḥ

putraiḥ pautraiḥ sarvasāmrājyasiddhiḥ |

māno bhogo vaśyamārogyasaukhyaṃ

prāptaṃ tattadbhūtale'sminnareṇa || 13 ||

yatkṛtaṃ ca japaṃ homaṃ gaditaṃ parameśvarī |

duṣṭānāṃ nigrahārthāya tadgṛhāṇa namo'stu te || 14 ||

pītāmbarāṃ tāṃ dvibhujāṃ trinetrāṃ gātragojjvalām |

śilāmudgarahastāṃ ca smarettāṃ bagalāmukhīm || 15 ||

brahmāstramiti vikhyātaṃ triṣu lokeṣu viśrutam |

gurubhaktāya dātavyaṃ nadeyaṃ yasya kasyacit || 16 ||

nityaṃ stotramidaṃ pavitramiha yo devyāḥ paṭhatyādarāt

dhṛtvāyantramidaṃ tathaiva samare bāhau kare vā gale |

rājāno'pyarayo madāndhakariṇassarpā mṛgendrādikāḥ

te vai yānti vimohitā ripugaṇā lakṣmīḥ sthirāssiddhayaḥ || 17 ||

iti śrī rudrayāmale tantre śrī bagalāmukhī stotram ||