Sakala Janani Stavah — InfoLyter.in

ॐ

ಸಕಲ ಜನನೀ ಸ್ತವಃ

Sakala Janani Stavah

Kannada

ಅಜಾನನ್ತೋ ಯಾನ್ತಿ ಕ್ಷಯಮವಶಮನ್ಯೋನ್ಯಕಲಹೈ-

-ರಮೀ ಮಾಯಾಗ್ರನ್ಥೌ ತವ ಪರಿಲುಠನ್ತಃ ಸಮಯಿನಃ ।

ಜಗನ್ಮಾತರ್ಜನ್ಮಜ್ವರಭಯತಮಃ ಕೌಮುದಿ ವಯಂ

ನಮಸ್ತೇ ಕುರ್ವಾಣಾಃ ಶರಣಮುಪಯಾಮೋ ಭಗವತೀಮ್ ॥ 1 ॥

ವಚಸ್ತರ್ಕಾಗಮ್ಯಸ್ವರಸಪರಮಾನನ್ದವಿಭವ-

-ಪ್ರಬೋಧಾಕಾರಾಯ ದ್ಯುತಿತುಲಿತನೀಲೋತ್ಪಲರುಚೇ ।

ಶಿವಾದ್ಯಾರಾಧ್ಯಾಯ ಸ್ತನಭರವಿನಮ್ರಾಯ ಸತತಂ

ನಮಸ್ತಸ್ಮೈ ಕಸ್ಮೈಚನ ಭವತು ಮುಗ್ಧಾಯ ಮಹಸೇ ॥ 2 ॥

ಅನಾದ್ಯನ್ತಾಭೇದಪ್ರಣಯರಸಿಕಾಪಿ ಪ್ರಣಯಿನೀ

ಶಿವಸ್ಯಾಸೀರ್ಯತ್ತ್ವಂ ಪರಿಣಯವಿಧೌ ದೇವಿ ಗೃಹಿಣೀ ।

ಸವಿತ್ರೀ ಭೂತಾನಾಮಪಿ ಯದುದಭೂಃ ಶೈಲತನಯಾ

ತದೇತತ್ಸಂಸಾರಪ್ರಣಯನಮಹಾನಾಟಕಮುಖಮ್ ॥ 3 ॥

ಬ್ರುವನ್ತ್ಯೇಕೇ ತತ್ತ್ವಂ ಭಗವತಿ ಸದನ್ಯೇ ವಿದುರಸ-

-ತ್ಪರೇ ಮಾತಃ ಪ್ರಾಹುಸ್ತವ ಸದಸದನ್ಯೇ ಸುಕವಯಃ ।

ಪರೇ ನೈತತ್ಸರ್ವಂ ಸಮಭಿದಧತೇ ದೇವಿ ಸುಧಿಯ-

-ಸ್ತದೇತತ್ತ್ವನ್ಮಾಯಾವಿಲಸಿತಮಶೇಷಂ ನನು ಶಿವೇ ॥ 4 ॥

ಲುಠದ್ಗುಞ್ಜಾಹಾರಸ್ತನಭರನಮನ್ಮಧ್ಯಲತಿಕಾ-

-ಮುದಞ್ಚದ್ಧರ್ಮಾಮ್ಭಃ ಕಣಗುಣಿತವಕ್ತ್ರಾಮ್ಬುಜರುಚಮ್ ।

ಶಿವಂ ಪಾರ್ಥತ್ರಾಣಪ್ರವಣಮೃಗಯಾಕಾರಗುಣಿತಂ

ಶಿವಾಮನ್ವಗ್ಯಾನ್ತೀಂ ಶರಣಮಹಮನ್ವೇಮಿ ಶಬರೀಮ್ ॥ 5 ॥

ಮಿಥಃ ಕೇಶಾಕೇಶಿಪ್ರಥನನಿಧನಾಸ್ತರ್ಕಘಟನಾಃ

ಬಹುಶ್ರದ್ಧಾಭಕ್ತಿಪ್ರಣತಿವಿಷಯಾಃ ಶಾಸ್ತ್ರವಿಧಯಃ ।

ಪ್ರಸೀದ ಪ್ರತ್ಯಕ್ಷೀಭವ ಗಿರಿಸುತೇ ದೇಹಿ ಶರಣಂ

ನಿರಾಲಮ್ಬಂ ಚೇತಃ ಪರಿಲುಠತಿ ಪಾರಿಪ್ಲವಮಿದಮ್ ॥ 6 ॥

ಶುನಾಂ ವಾ ವಹ್ನೇರ್ವಾ ಖಗಪರಿಷದೋ ವಾ ಯದಶನಂ

ಕದಾ ಕೇನ ಕ್ವೇತಿ ಕ್ವಚಿದಪಿ ನ ಕಶ್ಚಿತ್ಕಲಯತಿ ।

ಅಮುಷ್ಮಿನ್ವಿಶ್ವಾಸಂ ವಿಜಹಿಹಿ ಮಮಾಹ್ನಾಯ ವಪುಷಿ

ಪ್ರಪದ್ಯೇಥಾಶ್ಚೇತಃ ಸಕಲಜನನೀಮೇವ ಶರಣಮ್ ॥ 7 ॥

ತಟಿತ್ಕೋಟಿಜ್ಯೋತಿರ್ದ್ಯುತಿದಲಿತಷಡ್ಗ್ರನ್ಥಿಗಹನಂ

ಪ್ರವಿಷ್ಟಂ ಸ್ವಾಧಾರಂ ಪುನರಪಿ ಸುಧಾವೃಷ್ಟಿವಪುಷಾ ।

ಕಿಮಪ್ಯಷ್ಟಾವಿಂಶತ್ಕಿರಣಸಕಲೀಭೂತಮನಿಶಂ

ಭಜೇ ಧಾಮ ಶ್ಯಾಮಂ ಕುಚಭರನತಂ ಬರ್ಬರಕಚಮ್ ॥ 8 ॥

ಚತುಷ್ಪತ್ರಾನ್ತಃ ಷಡ್ದಲಪುಟಭಗಾನ್ತಸ್ತ್ರಿವಲಯ-

-ಸ್ಫುರದ್ವಿದ್ಯುದ್ವಹ್ನಿದ್ಯುಮಣಿನಿಯುತಾಭದ್ಯುತಿಲತೇ ।

ಷಡಶ್ರಂ ಭಿತ್ತ್ವಾದೌ ದಶದಲಮಥ ದ್ವಾದಶದಲಂ

ಕಲಾಶ್ರಂ ಚ ದ್ವ್ಯಶ್ರಂ ಗತವತಿ ನಮಸ್ತೇ ಗಿರಿಸುತೇ ॥ 9 ॥

ಕುಲಂ ಕೇಚಿತ್ಪ್ರಾಹುರ್ವಪುರಕುಲಮನ್ಯೇ ತವ ಬುಧಾಃ

ಪರೇ ತತ್ಸಮ್ಭೇದಂ ಸಮಭಿದಧತೇ ಕೌಲಮಪರೇ ।

ಚತುರ್ಣಾಮಪ್ಯೇಷಾಮುಪರಿ ಕಿಮಪಿ ಪ್ರಾಹುರಪರೇ

ಮಹಾಮಾಯೇ ತತ್ತ್ವಂ ತವ ಕಥಮಮೀ ನಿಶ್ಚಿನುಮಹೇ ॥ 10 ॥

ಷಡಧ್ವಾರಣ್ಯಾನೀಂ ಪ್ರಲಯರವಿಕೋಟಿಪ್ರತಿರುಚಾ

ರುಚಾ ಭಸ್ಮೀಕೃತ್ಯ ಸ್ವಪದಕಮಲಪ್ರಹ್ವಶಿರಸಾಮ್ ।

ವಿತನ್ವಾನಃ ಶೈವಂ ಕಿಮಪಿ ವಪುರಿನ್ದೀವರರುಚಿಃ

ಕುಚಾಭ್ಯಾಮಾನಮ್ರಸ್ತವ ಪುರುಷಕಾರೋ ವಿಜಯತೇ ॥ 11 ॥

ಪ್ರಕಾಶಾನನ್ದಾಭ್ಯಾಮವಿದಿತಚರೀಂ ಮಧ್ಯಪದವೀಂ

ಪ್ರವಿಶ್ಯೈತದ್ದ್ವನ್ದ್ವಂ ರವಿಶಶಿಸಮಾಖ್ಯಂ ಕಬಲಯನ್ ।

ಪ್ರಪದ್ಯೋರ್ಧ್ವಂ ನಾದಂ ಲಯದಹನಭಸ್ಮೀಕೃತಕುಲಃ

ಪ್ರಸಾದಾತ್ತೇ ಜನ್ತುಃ ಶಿವಮಕುಲಮಮ್ಬ ಪ್ರವಿಶತಿ ॥ 12 ॥

ಮನುಷ್ಯಾಸ್ತಿರ್ಯಞ್ಚೋ ಮರುತ ಇತಿ ಲೋಕತ್ರಯಮಿದಂ

ಭವಾಮ್ಭೋಧೌ ಮಗ್ನಂ ತ್ರಿಗುಣಲಹರೀಕೋಟಿಲುಠಿತಮ್ ।

ಕಟಾಕ್ಷಶ್ಚೇದ್ಯತ್ರ ಕ್ವಚನ ತವ ಮಾತಃ ಕರುಣಯಾ

ಶರೀರೀ ಸದ್ಯೋಽಯಂ ವ್ರಜತಿ ಪರಮಾನನ್ದತನುತಾಮ್ ॥ 13 ॥

ಪ್ರಿಯಙ್ಗುಶ್ಯಾಮಾಙ್ಗೀಮರುಣತರವಾಸಂ ಕಿಸಲಯಾಂ

ಸಮುನ್ಮೀಲನ್ಮುಕ್ತಾಫಲವಹಲನೇಪಥ್ಯಸುಭಗಾಮ್ ।

ಸ್ತನದ್ವನ್ದ್ವಸ್ಫಾರಸ್ತಬಕನಮಿತಾಂ ಕಲ್ಪಲತಿಕಾಂ

ಸಕೃದ್ಧ್ಯಾಯನ್ತಸ್ತ್ವಾಂ ದಧತಿ ಶಿವಚಿನ್ತಾಮಣಿಪದಮ್ ॥ 14 ॥

ಷಡಾಧಾರಾವರ್ತೈರಪರಿಮಿತಮನ್ತ್ರೋರ್ಮಿಪಟಲೈಃ

ಲಸನ್ಮುದ್ರಾಫೇನೈರ್ಬಹುವಿಧಲಸದ್ದೈವತಝಷೈಃ ।

ಕ್ರಮಸ್ರೋತೋಭಿಸ್ತ್ವಂ ವಹಸಿ ಪರನಾದಾಮೃತನದೀ

ಭವಾನಿ ಪ್ರತ್ಯಗ್ರಾ ಶಿವಚಿದಮೃತಾಬ್ಧಿಪ್ರಣಯಿನೀ ॥ 15 ॥

ಮಹೀಪಾಥೋವಹ್ನಿಶ್ವಸನವಿಯದಾತ್ಮೇನ್ದುರವಿಭಿ-

-ರ್ವಪುರ್ಭಿಗ್ರಸ್ತಾಶೈರಪಿ ತವ ಕಿಯಾನಮ್ಬ ಮಹಿಮಾ ।

ಅಮೂನ್ಯಾಲೋಕ್ಯನ್ತೇ ಭಗವತಿ ನ ಕುತ್ರಾಪ್ಯಣುತಮಾ-

-ಮವಸ್ಥಾಂ ಪ್ರಾಪ್ತಾನಿ ತ್ವಯಿ ತು ಪರಮವ್ಯೋಮವಪುಷಿ ॥ 16 ॥

ಕಲಾಮಾಜ್ಞಾಂ ಪ್ರಜ್ಞಾಂ ಸಮಯಮನುಭೂತಿಂ ಸಮರಸಂ

ಗುರುಂ ಪಾರಮ್ಪರ್ಯಂ ವಿನಯಮುಪದೇಶಂ ಶಿವಪದಮ್ ।

ಪ್ರಮಾಣಂ ನಿರ್ವಾಣಂ ಪ್ರಕೃತಿಮಭಿಭೂತಿಂ ಪರಗುಹಾಂ

ವಿಧಿಂ ವಿದ್ಯಾಮಾಹುಃ ಸಕಲಜನನೀಮೇವ ಮುನಯಃ ॥ 17 ॥

ಪ್ರಲೀನೇ ಶಬ್ದೌಘೇ ತದನು ವಿರತೇ ಬಿನ್ದುವಿಭವೇ

ತತಸ್ತತ್ತ್ವೇ ಚಾಷ್ಟಧ್ವನಿಭಿರನಪಾಯಿನ್ಯಧಿಗತೇ ।

ಶ್ರಿತೇ ಶಾಕ್ತೇ ಪರ್ವಣ್ಯನುಕಲಿತಚಿನ್ಮಾತ್ರ ಗಹನಾಂ

ಸ್ವಸಂವಿತ್ತಿಂ ಯೋಗೀ ರಸಯತಿ ಶಿವಾಖ್ಯಾಂ ಭಗವತೀಮ್ ॥ 18 ॥

ಪರಾನನ್ದಾಕಾರಾಂ ನಿರವಧಿಶಿವೈಶ್ವರ್ಯವಪುಷಂ

ನಿರಾಕಾರಾಂ ಜ್ಞಾನಪ್ರಕೃತಿಮಪರಿಚ್ಛಿನ್ನಕರುಣಾಮ್ ।

ಸವಿತ್ರೀಂ ಲೋಕಾನಾಂ ನಿರತಿಶಯಧಾಮಾಸ್ಪದಪದಾಂ

ಭವೋ ವಾ ಮೋಕ್ಷೋ ವಾ ಭವತು ಭವತೀಮೇವ ಭಜತಾಮ್ ॥ 19 ॥

ಜಗತ್ಕಾಯೇ ಕೃತ್ವಾ ತದಪಿ ಹೃದಯೇ ತಚ್ಚ ಪುರುಷೇ

ಪುಮಾಂಸಂ ಬಿನ್ದುಸ್ಥಂ ತದಪಿ ವಿಯದಾಖ್ಯೇ ಚ ಗಹನೇ ।

ತದೇತದ್ಜ್ಞಾನಾಖ್ಯೇ ತದಪಿ ಪರಮಾನನ್ದಗಹನೇ

ಮಹಾವ್ಯೋಮಾಕಾರೇ ತ್ವದನುಭವಶೀಲೋ ವಿಜಯತೇ ॥ 20 ॥

ವಿಧೇ ವೇದ್ಯೇ ವಿದ್ಯೇ ವಿವಿಧಸಮಯೇ ವೇದಗುಲಿಕೇ

ವಿಚಿತ್ರೇ ವಿಶ್ವಾದ್ಯೇ ವಿನಯಸುಲಭೇ ವೇದಜನನಿ ।

ಶಿವಜ್ಞೇ ಶೂಲಸ್ಥೇ ಶಿವಪದವದಾನ್ಯೇ ಶಿವನಿಧೇ

ಶಿವೇ ಮಾತರ್ಮಹ್ಯಂ ತ್ವಯಿ ವಿತರ ಭಕ್ತಿಂ ನಿರುಪಮಾಮ್ ॥ 21 ॥

ವಿಧೇರ್ಮುಣ್ಡಂ ಹೃತ್ವಾ ಯದಕುರುತ ಪಾತ್ರಂ ಕರತಲೇ

ಹರಿಂ ಶೂಲಪ್ರೋತಂ ಯದಗಮಯದಂಸಾಭರಣತಾಮ್ ।

ಅಲಞ್ಚಕ್ರೇ ಕಣ್ಠಂ ಯದಪಿ ಗರಲೇನಾಮ್ಬ ಗಿರಿಶಃ

ಶಿವಸ್ಥಾಯಾಃ ಶಕ್ತೇಸ್ತದಿದಮಖಿಲಂ ತೇ ವಿಲಸಿತಮ್ ॥ 22 ॥

ವಿರಿಞ್ಚ್ಯಾಖ್ಯಾ ಮಾತಃ ಸೃಜಸಿ ಹರಿಸಞ್ಜ್ಞಾ ತ್ವಮವಸಿ

ತ್ರಿಲೋಕೀಂ ರುದ್ರಾಖ್ಯಾ ಹರಸಿ ವಿದಧಾಸೀಶ್ವರದಶಾಮ್ ।

ಭವನ್ತೀ ನಾದಾಖ್ಯಾ ವಿಹರಸಿ ಚ ಪಾಶೌಘದಲನೀ

ತ್ವಮೇವೈಕಾಽನೇಕಾ ಭವಸಿ ಕೃತಿಭೇದೈರ್ಗಿರಿಸುತೇ ॥ 23 ॥

ಮುನೀನಾಂ ಚೇತೋಭಿಃ ಪ್ರಮೃದಿತಕಷಾಯೈರಪಿ ಮನಾ-

-ಗಶಕ್ಯಂ ಸಂಸ್ಪ್ರಷ್ಟುಂ ಚಕಿತಚಕಿತೈರಮ್ಬ ಸತತಮ್ ।

ಶ್ರುತೀನಾಂ ಮೂರ್ಧಾನಃ ಪ್ರಕೃತಿಕಠಿನಾಃ ಕೋಮಲತರೇ

ಕಥಂ ತೇ ವಿನ್ದನ್ತೇ ಪದಕಿಸಲಯೇ ಪಾರ್ವತಿ ಪದಮ್ ॥ 24 ॥

ತಟಿದ್ವಲ್ಲೀಂ ನಿತ್ಯಾಮಮೃತಸರಿತಂ ಪಾರರಹಿತಾಂ

ಮಲೋತ್ತೀರ್ಣಾಂ ಜ್ಯೋತ್ಸ್ನಾಂ ಪ್ರಕೃತಿಮಗುಣಗ್ರನ್ಥಿಗಹನಾಮ್ ।

ಗಿರಾಂ ದೂರಾಂ ವಿದ್ಯಾಮವಿನತಕುಚಾಂ ವಿಶ್ವಜನನೀ-

-ಮಪರ್ಯನ್ತಾಂ ಲಕ್ಷ್ಮೀಮಭಿದಧತಿ ಸನ್ತೋ ಭಗವತೀಮ್ ॥ 25 ॥

ಶರೀರಂ ಕ್ಷಿತ್ಯಮ್ಭಃ ಪ್ರಭೃತಿರಚಿತಂ ಕೇವಲಮಚಿತ್

ಸುಖಂ ದುಃಖಂ ಚಾಯಂ ಕಲಯತಿ ಪುಮಾಂಶ್ಚೇತನ ಇತಿ ।

ಸ್ಫುಟಂ ಜಾನಾನೋಽಪಿ ಪ್ರಭವತಿ ನ ದೇಹೀ ರಹಯಿತುಂ

ಶರೀರಾಹಙ್ಕಾರಂ ತವ ಸಮಯಬಾಹ್ಯೋ ಗಿರಿಸುತೇ ॥ 26 ॥

ಪಿತಾ ಮಾತಾ ಭ್ರಾತಾ ಸುಹೃದನುಚರಃ ಸದ್ಮ ಗೃಹಿಣೀ

ವಪುಃ ಕ್ಷೇತ್ರಂ ಮಿತ್ರಂ ಧನಮಪಿ ಯದಾ ಮಾಂ ವಿಜಹತಿ ।

ತದಾ ಮೇ ಭಿನ್ದಾನಾ ಸಪದಿ ಭಯಮೋಹಾನ್ಧತಮಸಂ

ಮಹಾಜ್ಯೋತ್ಸ್ನೇ ಮಾತರ್ಭವ ಕರುಣಯಾ ಸನ್ನಿಧಿಕರೀ ॥ 27 ॥

ಸುತಾ ದಕ್ಷಸ್ಯಾದೌ ಕಿಲ ಸಕಲಮಾತಸ್ತ್ವಮುದಭೂಃ

ಸದೋಷಂ ತಂ ಹಿತ್ವಾ ತದನು ಗಿರಿರಾಜಸ್ಯ ದುಹಿತಾ ।

ಅನಾದ್ಯನ್ತಾ ಶಮ್ಭೋರಪೃಥಗಪಿ ಶಕ್ತಿರ್ಭಗವತೀ

ವಿವಾಹಾಜ್ಜಾಯಾಸೀತ್ಯಹಹ ಚರಿತಂ ವೇತ್ತಿ ತವ ಕಃ ॥ 28 ॥

ಕಣಾಸ್ತ್ವದ್ದೀಪ್ತೀನಾಂ ರವಿಶಶಿಕೃಶಾನುಪ್ರಭೃತಯಃ

ಪರಂ ಬ್ರಹ್ಮ ಕ್ಷುದ್ರಂ ತವ ನಿಯತಮಾನನ್ದಕಣಿಕಾ ।

ಶಿವಾದಿ ಕ್ಷಿತ್ಯನ್ತಂ ತ್ರಿವಲಯತನೋಃ ಸರ್ವಮುದರೇ

ತವಾಸ್ತೇ ಭಕ್ತಸ್ಯ ಸ್ಫುರಸಿ ಹೃದಿ ಚಿತ್ರಂ ಭಗವತಿ ॥ 29 ॥

ಪುರಃ ಪಶ್ಚಾದನ್ತರ್ಬಹಿರಪರಿಮೇಯಂ ಪರಿಮಿತಂ

ಪರಂ ಸ್ಥೂಲಂ ಸೂಕ್ಷ್ಮಂ ಸಕಲಮಕುಲಂ ಗುಹ್ಯಮಗುಹಮ್ ।

ದವೀಯೋ ನೇದೀಯಃ ಸದಸದಿತಿ ವಿಶ್ವಂ ಭಗವತೀ

ಸದಾ ಪಶ್ಯನ್ತ್ಯಾಖ್ಯಾಂ ವಹಸಿ ಭುವನಕ್ಷೋಭಜನನೀಮ್ ॥ 30 ॥

ಪ್ರವಿಶ್ಯ ತ್ವನ್ಮಾರ್ಗಂ ಸಹಜದಯಯಾ ದೇಶಿಕದೃಶಾ

ಷಡಧ್ವಧ್ವಾನ್ತೌಘಚ್ಛಿದುರಗಣನಾತೀತಕರುಣಾಮ್ ।

ಪರಾಮಾಜ್ಞಾಕಾರಾಂ ಸಪದಿ ಶಿವಯನ್ತೀಂ ಶಿವತನುಂ

ಸ್ವಮಾತ್ಮಾನಂ ಧನ್ಯಾಶ್ಚಿರಮುಪಲಭನ್ತೇ ಭಗವತೀಮ್ ॥ 31 ॥

ಮಯೂಖಾಃ ಪೂಷ್ಣೀವ ಜ್ವಲನ ಇವ ತದ್ದೀಪ್ತಿಕಣಿಕಾಃ

ಪಯೋಧೌ ಕಲ್ಲೋಲಾಃ ಪ್ರತಿಹತಮಹಿಮ್ನೀವ ಪೃಷತಃ ।

ಉದೇತ್ಯೋದೇತ್ಯಾಮ್ಬ ತ್ವಯಿ ಸಹ ನಿಜೈಃ ಸಾತ್ತ್ವಿಕಗುಣೈ-

-ರ್ಭಜನ್ತೇ ತತ್ತ್ವೌಘಾಃ ಪ್ರಶಮಮನುಕಲ್ಪಂ ಪರವಶಾಃ ॥ 32 ॥

ವಿಧುರ್ವಿಷ್ಣುರ್ಬ್ರಹ್ಮಾ ಪ್ರಕೃತಿರಣುರಾತ್ಮಾ ದಿನಕರಃ

ಸ್ವಭಾವೋ ಜೈನೇನ್ದ್ರಃ ಸುಗತಮುನಿರಾಕಾಶಮಲಿನಃ ।

ಶಿವಃ ಶಕ್ತಿಶ್ಚೇತಿ ಶ್ರುತಿವಿಷಯತಾಂ ತಾಮುಪಗತಾಂ

ವಿಕಲ್ಪೈರೇಭಿಸ್ತ್ವಾಮಭಿದಧತಿ ಸನ್ತೋ ಭಗವತೀಮ್ ॥ 33 ॥

ಶಿವಸ್ತ್ವಂ ಶಕ್ತಿಸ್ತ್ವಂ ತ್ವಮಸಿ ಸಮಯಾ ತ್ವಂ ಸಮಯಿನೀ

ತ್ವಮಾತ್ಮಾ ತ್ವಂ ದೀಕ್ಷಾ ತ್ವಮಯಮಣಿಮಾದಿರ್ಗುಣಗಣಃ ।

ಅವಿದ್ಯಾ ತ್ವಂ ವಿದ್ಯಾ ತ್ವಮಸಿ ನಿಖಿಲಂ ತ್ವಂ ಕಿಮಪರಂ

ಪೃಥಕ್ತತ್ತ್ವಂ ತ್ವತ್ತೋ ಭಗವತಿ ನ ವೀಕ್ಷಾಮಹ ಇಮೇ ॥ 34 ॥

ತ್ವಯಾಸೌ ಜಾನೀತೇ ರಚಯತಿ ಭವತ್ಯೈವ ಸತತಂ

ತ್ವಯೈವೇಚ್ಛತ್ಯಮ್ಬ ತ್ವಮಸಿ ನಿಖಿಲಾ ಯಸ್ಯ ತನವಃ ।

ಜಗತ್ಸಾಮ್ಯಂ ಶಮ್ಭೋರ್ವಹಸಿ ಪರಮವ್ಯೋಮವಪುಷಃ

ತಥಾಪ್ಯರ್ಧಂ ಭೂತ್ವಾ ವಿಹರಸಿ ಶಿವಸ್ಯೇತಿ ಕಿಮಿದಮ್ ॥ 35 ॥

ಅಸಙ್ಖ್ಯೈಃ ಪ್ರಾಚೀನೈರ್ಜನನಿ ಜನನೈಃ ಕರ್ಮವಿಲಯಾ-

-ತ್ಸಕೃಜ್ಜನ್ಮನ್ಯನ್ತೇ ಗುರುವಪುಷಮಾಸಾದ್ಯ ಗಿರಿಶಮ್ ।

ಅವಾಪ್ಯಾಜ್ಞಾಂ ಶೈವೀಂ ಶಿವತನುಮಪಿ ತ್ವಾಂ ವಿದಿತವಾ-

-ನ್ನಯೇಯಂ ತ್ವತ್ಪೂಜಾಸ್ತುತಿವಿರಚನೇನೈವ ದಿವಸಾನ್ ॥ 36 ॥

ಯತ್ಷಟ್ಪತ್ರಂ ಕಮಲಮುದಿತಂ ತಸ್ಯ ಯಾ ಕರ್ಣಿಕಾಖ್ಯಾ

ಯೋನಿಸ್ತಸ್ಯಾಃ ಪ್ರಥಿತಮುದರೇ ಯತ್ತದೋಙ್ಕಾರಪೀಠಮ್ ।

ತಸ್ಯಾಪ್ಯನ್ತಃ ಕುಚಭರನತಾಂ ಕುಣ್ಡಲೀತಿ ಪ್ರಸಿದ್ಧಾಂ

ಶ್ಯಾಮಾಕಾರಾಂ ಸಕಲಜನನೀಂ ಸನ್ತತಂ ಭಾವಯಾಮಿ ॥ 37 ॥

ಭುವಿ ಪಯಸಿ ಕೃಶಾನೌ ಮಾರುತೇ ಖೇ ಶಶಾಙ್ಕೇ

ಸವಿತರಿ ಯಜಮಾನೇಽಪ್ಯಷ್ಟಧಾ ಶಕ್ತಿರೇಕಾ ।

ವಹಸಿ ಕುಚಭರಾಭ್ಯಾಂ ಯಾವನಮ್ರಾಪಿ ವಿಶ್ವಂ

ಸಕಲಜನನಿ ಸಾ ತ್ವಂ ಪಾಹಿ ಮಾಮಿತ್ಯವಾಚ್ಯಮ್ ॥ 38 ॥

ಇತಿ ಶ್ರೀಕಾಲಿದಾಸ ವಿರಚಿತ ಪಞ್ಚಸ್ತವ್ಯಾಂ ಪಞ್ಚಮಃ ಸಕಲಜನನೀಸ್ತವಃ ।

Roman (IAST) Transliteration

ajānanto yānti kṣayamavaśamanyonyakalahai-

-ramī māyāgranthau tava pariluṭhantaḥ samayinaḥ |

jaganmātarjanmajvarabhayatamaḥ kaumudi vayaṃ

namaste kurvāṇāḥ śaraṇamupayāmo bhagavatīm || 1 ||

vacastarkāgamyasvarasaparamānandavibhava-

-prabodhākārāya dyutitulitanīlotpalaruce |

śivādyārādhyāya stanabharavinamrāya satataṃ

namastasmai kasmaicana bhavatu mugdhāya mahase || 2 ||

anādyantābhedapraṇayarasikāpi praṇayinī

śivasyāsīryattvaṃ pariṇayavidhau devi gṛhiṇī |

savitrī bhūtānāmapi yadudabhūḥ śailatanayā

tadetatsaṃsārapraṇayanamahānāṭakamukham || 3 ||

bruvantyeke tattvaṃ bhagavati sadanye vidurasa-

-tpare mātaḥ prāhustava sadasadanye sukavayaḥ |

pare naitatsarvaṃ samabhidadhate devi sudhiya-

-stadetattvanmāyāvilasitamaśeṣaṃ nanu śive || 4 ||

luṭhadguñjāhārastanabharanamanmadhyalatikā-

-mudañcaddharmāmbhaḥ kaṇaguṇitavaktrāmbujarucam |

śivaṃ pārthatrāṇapravaṇamṛgayākāraguṇitaṃ

śivāmanvagyāntīṃ śaraṇamahamanvemi śabarīm || 5 ||

mithaḥ keśākeśiprathananidhanāstarkaghaṭanāḥ

bahuśraddhābhaktipraṇativiṣayāḥ śāstravidhayaḥ |

prasīda pratyakṣībhava girisute dehi śaraṇaṃ

nirālambaṃ cetaḥ pariluṭhati pāriplavamidam || 6 ||

śunāṃ vā vahnervā khagapariṣado vā yadaśanaṃ

kadā kena kveti kvacidapi na kaścitkalayati |

amuṣminviśvāsaṃ vijahihi mamāhnāya vapuṣi

prapadyethāścetaḥ sakalajananīmeva śaraṇam || 7 ||

taṭitkoṭijyotirdyutidalitaṣaḍgranthigahanaṃ

praviṣṭaṃ svādhāraṃ punarapi sudhāvṛṣṭivapuṣā |

kimapyaṣṭāviṃśatkiraṇasakalībhūtamaniśaṃ

bhaje dhāma śyāmaṃ kucabharanataṃ barbarakacam || 8 ||

catuṣpatrāntaḥ ṣaḍdalapuṭabhagāntastrivalaya-

-sphuradvidyudvahnidyumaṇiniyutābhadyutilate |

ṣaḍaśraṃ bhittvādau daśadalamatha dvādaśadalaṃ

kalāśraṃ ca dvyaśraṃ gatavati namaste girisute || 9 ||

kulaṃ kecitprāhurvapurakulamanye tava budhāḥ

pare tatsambhedaṃ samabhidadhate kaulamapare |

caturṇāmapyeṣāmupari kimapi prāhurapare

mahāmāye tattvaṃ tava kathamamī niścinumahe || 10 ||

ṣaḍadhvāraṇyānīṃ pralayaravikoṭipratirucā

rucā bhasmīkṛtya svapadakamalaprahvaśirasām |

vitanvānaḥ śaivaṃ kimapi vapurindīvararuciḥ

kucābhyāmānamrastava puruṣakāro vijayate || 11 ||

prakāśānandābhyāmaviditacarīṃ madhyapadavīṃ

praviśyaitaddvandvaṃ raviśaśisamākhyaṃ kabalayan |

prapadyordhvaṃ nādaṃ layadahanabhasmīkṛtakulaḥ

prasādātte jantuḥ śivamakulamamba praviśati || 12 ||

manuṣyāstiryañco maruta iti lokatrayamidaṃ

bhavāmbhodhau magnaṃ triguṇalaharīkoṭiluṭhitam |

kaṭākṣaścedyatra kvacana tava mātaḥ karuṇayā

śarīrī sadyo'yaṃ vrajati paramānandatanutām || 13 ||

priyaṅguśyāmāṅgīmaruṇataravāsaṃ kisalayāṃ

samunmīlanmuktāphalavahalanepathyasubhagām |

stanadvandvasphārastabakanamitāṃ kalpalatikāṃ

sakṛddhyāyantastvāṃ dadhati śivacintāmaṇipadam || 14 ||

ṣaḍādhārāvartairaparimitamantrormipaṭalaiḥ

lasanmudrāphenairbahuvidhalasaddaivatajhaṣaiḥ |

kramasrotobhistvaṃ vahasi paranādāmṛtanadī

bhavāni pratyagrā śivacidamṛtābdhipraṇayinī || 15 ||

mahīpāthovahniśvasanaviyadātmenduravibhi-

-rvapurbhigrastāśairapi tava kiyānamba mahimā |

amūnyālokyante bhagavati na kutrāpyaṇutamā-

-mavasthāṃ prāptāni tvayi tu paramavyomavapuṣi || 16 ||

kalāmājñāṃ prajñāṃ samayamanubhūtiṃ samarasaṃ

guruṃ pāramparyaṃ vinayamupadeśaṃ śivapadam |

pramāṇaṃ nirvāṇaṃ prakṛtimabhibhūtiṃ paraguhāṃ

vidhiṃ vidyāmāhuḥ sakalajananīmeva munayaḥ || 17 ||

pralīne śabdaughe tadanu virate binduvibhave

tatastattve cāṣṭadhvanibhiranapāyinyadhigate |

śrite śākte parvaṇyanukalitacinmātra gahanāṃ

svasaṃvittiṃ yogī rasayati śivākhyāṃ bhagavatīm || 18 ||

parānandākārāṃ niravadhiśivaiśvaryavapuṣaṃ

nirākārāṃ jñānaprakṛtimaparicchinnakaruṇām |

savitrīṃ lokānāṃ niratiśayadhāmāspadapadāṃ

bhavo vā mokṣo vā bhavatu bhavatīmeva bhajatām || 19 ||

jagatkāye kṛtvā tadapi hṛdaye tacca puruṣe

pumāṃsaṃ bindusthaṃ tadapi viyadākhye ca gahane |

tadetadjñānākhye tadapi paramānandagahane

mahāvyomākāre tvadanubhavaśīlo vijayate || 20 ||

vidhe vedye vidye vividhasamaye vedagulike

vicitre viśvādye vinayasulabhe vedajanani |

śivajñe śūlasthe śivapadavadānye śivanidhe

śive mātarmahyaṃ tvayi vitara bhaktiṃ nirupamām || 21 ||

vidhermuṇḍaṃ hṛtvā yadakuruta pātraṃ karatale

hariṃ śūlaprotaṃ yadagamayadaṃsābharaṇatām |

alañcakre kaṇṭhaṃ yadapi garalenāmba giriśaḥ

śivasthāyāḥ śaktestadidamakhilaṃ te vilasitam || 22 ||

viriñcyākhyā mātaḥ sṛjasi harisañjñā tvamavasi

trilokīṃ rudrākhyā harasi vidadhāsīśvaradaśām |

bhavantī nādākhyā viharasi ca pāśaughadalanī

tvamevaikā'nekā bhavasi kṛtibhedairgirisute || 23 ||

munīnāṃ cetobhiḥ pramṛditakaṣāyairapi manā-

-gaśakyaṃ saṃspraṣṭuṃ cakitacakitairamba satatam |

śrutīnāṃ mūrdhānaḥ prakṛtikaṭhināḥ komalatare

kathaṃ te vindante padakisalaye pārvati padam || 24 ||

taṭidvallīṃ nityāmamṛtasaritaṃ pārarahitāṃ

malottīrṇāṃ jyotsnāṃ prakṛtimaguṇagranthigahanām |

girāṃ dūrāṃ vidyāmavinatakucāṃ viśvajananī-

-maparyantāṃ lakṣmīmabhidadhati santo bhagavatīm || 25 ||

śarīraṃ kṣityambhaḥ prabhṛtiracitaṃ kevalamacit

sukhaṃ duḥkhaṃ cāyaṃ kalayati pumāṃścetana iti |

sphuṭaṃ jānāno'pi prabhavati na dehī rahayituṃ

śarīrāhaṅkāraṃ tava samayabāhyo girisute || 26 ||

pitā mātā bhrātā suhṛdanucaraḥ sadma gṛhiṇī

vapuḥ kṣetraṃ mitraṃ dhanamapi yadā māṃ vijahati |

tadā me bhindānā sapadi bhayamohāndhatamasaṃ

mahājyotsne mātarbhava karuṇayā sannidhikarī || 27 ||

sutā dakṣasyādau kila sakalamātastvamudabhūḥ

sadoṣaṃ taṃ hitvā tadanu girirājasya duhitā |

anādyantā śambhorapṛthagapi śaktirbhagavatī

vivāhājjāyāsītyahaha caritaṃ vetti tava kaḥ || 28 ||

kaṇāstvaddīptīnāṃ raviśaśikṛśānuprabhṛtayaḥ

paraṃ brahma kṣudraṃ tava niyatamānandakaṇikā |

śivādi kṣityantaṃ trivalayatanoḥ sarvamudare

tavāste bhaktasya sphurasi hṛdi citraṃ bhagavati || 29 ||

puraḥ paścādantarbahiraparimeyaṃ parimitaṃ

paraṃ sthūlaṃ sūkṣmaṃ sakalamakulaṃ guhyamaguham |

davīyo nedīyaḥ sadasaditi viśvaṃ bhagavatī

sadā paśyantyākhyāṃ vahasi bhuvanakṣobhajananīm || 30 ||

praviśya tvanmārgaṃ sahajadayayā deśikadṛśā

ṣaḍadhvadhvāntaughacchiduragaṇanātītakaruṇām |

parāmājñākārāṃ sapadi śivayantīṃ śivatanuṃ

svamātmānaṃ dhanyāściramupalabhante bhagavatīm || 31 ||

mayūkhāḥ pūṣṇīva jvalana iva taddīptikaṇikāḥ

payodhau kallolāḥ pratihatamahimnīva pṛṣataḥ |

udetyodetyāmba tvayi saha nijaiḥ sāttvikaguṇai-

-rbhajante tattvaughāḥ praśamamanukalpaṃ paravaśāḥ || 32 ||

vidhurviṣṇurbrahmā prakṛtiraṇurātmā dinakaraḥ

svabhāvo jainendraḥ sugatamunirākāśamalinaḥ |

śivaḥ śaktiśceti śrutiviṣayatāṃ tāmupagatāṃ

vikalpairebhistvāmabhidadhati santo bhagavatīm || 33 ||

śivastvaṃ śaktistvaṃ tvamasi samayā tvaṃ samayinī

tvamātmā tvaṃ dīkṣā tvamayamaṇimādirguṇagaṇaḥ |

avidyā tvaṃ vidyā tvamasi nikhilaṃ tvaṃ kimaparaṃ

pṛthaktattvaṃ tvatto bhagavati na vīkṣāmaha ime || 34 ||

tvayāsau jānīte racayati bhavatyaiva satataṃ

tvayaivecchatyamba tvamasi nikhilā yasya tanavaḥ |

jagatsāmyaṃ śambhorvahasi paramavyomavapuṣaḥ

tathāpyardhaṃ bhūtvā viharasi śivasyeti kimidam || 35 ||

asaṅkhyaiḥ prācīnairjanani jananaiḥ karmavilayā-

-tsakṛjjanmanyante guruvapuṣamāsādya giriśam |

avāpyājñāṃ śaivīṃ śivatanumapi tvāṃ viditavā-

-nnayeyaṃ tvatpūjāstutiviracanenaiva divasān || 36 ||

yatṣaṭpatraṃ kamalamuditaṃ tasya yā karṇikākhyā

yonistasyāḥ prathitamudare yattadoṅkārapīṭham |

tasyāpyantaḥ kucabharanatāṃ kuṇḍalīti prasiddhāṃ

śyāmākārāṃ sakalajananīṃ santataṃ bhāvayāmi || 37 ||

bhuvi payasi kṛśānau mārute khe śaśāṅke

savitari yajamāne'pyaṣṭadhā śaktirekā |

vahasi kucabharābhyāṃ yāvanamrāpi viśvaṃ

sakalajanani sā tvaṃ pāhi māmityavācyam || 38 ||

iti śrīkālidāsa viracita pañcastavyāṃ pañcamaḥ sakalajananīstavaḥ |