Narayaniyam Dashaka 78 - Dvarakavasah Tatha Rukmanisandeshapraptih

ॐ

ನಾರಾಯಣೀಯಂ ದಶಕ 78 - ದ್ವಾರಕಾವಾಸಃ ತಥಾ ರುಕ್ಮಣೀಸನ್ದೇಶಪ್ರಾಪ್ತಿಃ

Vishnu Kannada

ತ್ರಿದಿವವರ್ಧಕಿವರ್ಧಿತಕೌಶಲಂ ತ್ರಿದಶದತ್ತಸಮಸ್ತವಿಭೂತಿಮತ್ ।

ಜಲಧಿಮಧ್ಯಗತಂ ತ್ವಮಭೂಷಯೋ ನವಪುರಂ ವಪುರಞ್ಚಿತರೋಚಿಷಾ ॥1॥

ದದುಷಿ ರೇವತಭೂಭೃತಿ ರೇವತೀಂ ಹಲಭೃತೇ ತನಯಾಂ ವಿಧಿಶಾಸನಾತ್ ।

ಮಹಿತಮುತ್ಸವಘೋಷಮಪೂಪುಷಃ ಸಮುದಿತೈರ್ಮುದಿತೈಃ ಸಹ ಯಾದವೈಃ ॥2॥

ಅಥ ವಿದರ್ಭಸುತಾಂ ಖಲು ರುಕ್ಮಿಣೀಂ ಪ್ರಣಯಿನೀಂ ತ್ವಯಿ ದೇವ ಸಹೋದರಃ ।

ಸ್ವಯಮದಿತ್ಸತ ಚೇದಿಮಹೀಭುಜೇ ಸ್ವತಮಸಾ ತಮಸಾಧುಮುಪಾಶ್ರಯನ್ ॥3॥

ಚಿರಧೃತಪ್ರಣಯಾ ತ್ವಯಿ ಬಾಲಿಕಾ ಸಪದಿ ಕಾಙ್ಕ್ಷಿತಭಙ್ಗಸಮಾಕುಲಾ ।

ತವ ನಿವೇದಯಿತುಂ ದ್ವಿಜಮಾದಿಶತ್ ಸ್ವಕದನಂ ಕದನಙ್ಗವಿನಿರ್ಮಿತಮ್ ॥4॥

ದ್ವಿಜಸುತೋಽಪಿ ಚ ತೂರ್ಣಮುಪಾಯಯೌ ತವ ಪುರಂ ಹಿ ದುರಾಶದುರಾಸದಮ್ ।

ಮುದಮವಾಪ ಚ ಸಾದರಪೂಜಿತಃ ಸ ಭವತಾ ಭವತಾಪಹೃತಾ ಸ್ವಯಮ್ ॥5॥

ಸ ಚ ಭವನ್ತಮವೋಚತ ಕುಣ್ಡಿನೇ ನೃಪಸುತಾ ಖಲು ರಾಜತಿ ರುಕ್ಮಿಣೀ ।

ತ್ವಯಿ ಸಮುತ್ಸುಕಯಾ ನಿಜಧೀರತಾರಹಿತಯಾ ಹಿ ತಯಾ ಪ್ರಹಿತೋಽಸ್ಮ್ಯಹಮ್ ॥6॥

ತವ ಹೃತಾಽಸ್ಮಿ ಪುರೈವ ಗುಣೈರಹಂ ಹರತಿ ಮಾಂ ಕಿಲ ಚೇದಿನೃಪೋಽಧುನಾ ।

ಅಯಿ ಕೃಪಾಲಯ ಪಾಲಯ ಮಾಮಿತಿ ಪ್ರಜಗದೇ ಜಗದೇಕಪತೇ ತಯಾ ॥7॥

ಅಶರಣಾಂ ಯದಿ ಮಾಂ ತ್ವಮುಪೇಕ್ಷಸೇ ಸಪದಿ ಜೀವಿತಮೇವ ಜಹಾಮ್ಯಹಮ್ ।

ಇತಿ ಗಿರಾ ಸುತನೋರತನೋತ್ ಭೃಶಂ ಸುಹೃದಯಂ ಹೃದಯಂ ತವ ಕಾತರಮ್ ॥8॥

ಅಕಥಯಸ್ತ್ವಮಥೈನಮಯೇ ಸಖೇ ತದಧಿಕಾ ಮಮ ಮನ್ಮಥವೇದನಾ ।

ನೃಪಸಮಕ್ಷಮುಪೇತ್ಯ ಹರಾಮ್ಯಹಂ ತದಯಿ ತಾಂ ದಯಿತಾಮಸಿತೇಕ್ಷಣಾಮ್ ॥9॥

ಪ್ರಮುದಿತೇನ ಚ ತೇನ ಸಮಂ ತದಾ ರಥಗತೋ ಲಘು ಕುಣ್ಡಿನಮೇಯಿವಾನ್ ।

ಗುರುಮರುತ್ಪುರನಾಯಕ ಮೇ ಭವಾನ್ ವಿತನುತಾಂ ತನುತಾಂ ನಿಖಿಲಾಪದಾಮ್ ॥10॥

Roman (IAST) Transliteration

tridivavardhakivardhitakauśalaṃ tridaśadattasamastavibhūtimat |

jaladhimadhyagataṃ tvamabhūṣayo navapuraṃ vapurañcitarociṣā ||1||

daduṣi revatabhūbhṛti revatīṃ halabhṛte tanayāṃ vidhiśāsanāt |

mahitamutsavaghoṣamapūpuṣaḥ samuditairmuditaiḥ saha yādavaiḥ ||2||

atha vidarbhasutāṃ khalu rukmiṇīṃ praṇayinīṃ tvayi deva sahodaraḥ |

svayamaditsata cedimahībhuje svatamasā tamasādhumupāśrayan ||3||

ciradhṛtapraṇayā tvayi bālikā sapadi kāṅkṣitabhaṅgasamākulā |

tava nivedayituṃ dvijamādiśat svakadanaṃ kadanaṅgavinirmitam ||4||

dvijasuto'pi ca tūrṇamupāyayau tava puraṃ hi durāśadurāsadam |

mudamavāpa ca sādarapūjitaḥ sa bhavatā bhavatāpahṛtā svayam ||5||

sa ca bhavantamavocata kuṇḍine nṛpasutā khalu rājati rukmiṇī |

tvayi samutsukayā nijadhīratārahitayā hi tayā prahito'smyaham ||6||

tava hṛtā'smi puraiva guṇairahaṃ harati māṃ kila cedinṛpo'dhunā |

ayi kṛpālaya pālaya māmiti prajagade jagadekapate tayā ||7||

aśaraṇāṃ yadi māṃ tvamupekṣase sapadi jīvitameva jahāmyaham |

iti girā sutanoratanot bhṛśaṃ suhṛdayaṃ hṛdayaṃ tava kātaram ||8||

akathayastvamathainamaye sakhe tadadhikā mama manmathavedanā |

nṛpasamakṣamupetya harāmyahaṃ tadayi tāṃ dayitāmasitekṣaṇām ||9||

pramuditena ca tena samaṃ tadā rathagato laghu kuṇḍinameyivān |

gurumarutpuranāyaka me bhavān vitanutāṃ tanutāṃ nikhilāpadām ||10||