Narayaniyam Dashaka 71 - Keshi Tatha Vyomasuravadham

ॐ

ನಾರಾಯಣೀಯಂ ದಶಕ 71 - ಕೇಶೀ ತಥಾ ವ್ಯೋಮಾಸುರವಧಮ್

Vishnu Kannada

ಯತ್ನೇಷು ಸರ್ವೇಷ್ವಪಿ ನಾವಕೇಶೀ ಕೇಶೀ ಸ ಭೋಜೇಶಿತುರಿಷ್ಟಬನ್ಧುಃ ।

ತ್ವಾಂ ಸಿನ್ಧುಜಾವಾಪ್ಯ ಇತೀವ ಮತ್ವಾ ಸಮ್ಪ್ರಾಪ್ತವಾನ್ ಸಿನ್ಧುಜವಾಜಿರೂಪಃ ॥1॥

ಗನ್ಧರ್ವತಾಮೇಷ ಗತೋಽಪಿ ರೂಕ್ಷೈರ್ನಾದೈಃ ಸಮುದ್ವೇಜಿತಸರ್ವಲೋಕಃ ।

ಭವದ್ವಿಲೋಕಾವಧಿ ಗೋಪವಾಟೀಂ ಪ್ರಮರ್ದ್ಯ ಪಾಪಃ ಪುನರಾಪತತ್ತ್ವಾಮ್ ॥2॥

ತಾರ್ಕ್ಷ್ಯಾರ್ಪಿತಾಙ್ಘ್ರೇಸ್ತವ ತಾರ್ಕ್ಷ್ಯ ಏಷ ಚಿಕ್ಷೇಪ ವಕ್ಷೋಭುವಿ ನಾಮ ಪಾದಮ್ ।

ಭೃಗೋಃ ಪದಾಘಾತಕಥಾಂ ನಿಶಮ್ಯ ಸ್ವೇನಾಪಿ ಶಕ್ಯಂ ತದಿತೀವ ಮೋಹಾತ್ ॥3॥

ಪ್ರವಞ್ಚಯನ್ನಸ್ಯ ಖುರಾಞ್ಚಲಂ ದ್ರಾಗಮುಞ್ಚ ಚಿಕ್ಷೇಪಿಥ ದೂರದೂರಮ್

ಸಮ್ಮೂರ್ಚ್ಛಿತೋಽಪಿ ಹ್ಯತಿಮೂರ್ಚ್ಛಿತೇನ ಕ್ರೋಧೋಷ್ಮಣಾ ಖಾದಿತುಮಾದ್ರುತಸ್ತ್ವಾಮ್ ॥4॥

ತ್ವಂ ವಾಹದಣ್ಡೇ ಕೃತಧೀಶ್ಚ ವಾಹಾದಣ್ಡಂ ನ್ಯಧಾಸ್ತಸ್ಯ ಮುಖೇ ತದಾನೀಮ್ ।

ತದ್ ವೃದ್ಧಿರುದ್ಧಶ್ವಸನೋ ಗತಾಸುಃ ಸಪ್ತೀಭವನ್ನಪ್ಯಯಮೈಕ್ಯಮಾಗಾತ್ ॥5॥

ಆಲಮ್ಭಮಾತ್ರೇಣ ಪಶೋಃ ಸುರಾಣಾಂ ಪ್ರಸಾದಕೇ ನೂತ್ನ ಇವಾಶ್ವಮೇಧೇ ।

ಕೃತೇ ತ್ವಯಾ ಹರ್ಷವಶಾತ್ ಸುರೇನ್ದ್ರಾಸ್ತ್ವಾಂ ತುಷ್ಟುವುಃ ಕೇಶವನಾಮಧೇಯಮ್ ॥6॥

ಕಂಸಾಯ ತೇ ಶೌರಿಸುತತ್ವಮುಕ್ತ್ವಾ ತಂ ತದ್ವಧೋತ್ಕಂ ಪ್ರತಿರುಧ್ಯ ವಾಚಾ।

ಪ್ರಾಪ್ತೇನ ಕೇಶಿಕ್ಷಪಣಾವಸಾನೇ ಶ್ರೀನಾರದೇನ ತ್ವಮಭಿಷ್ಟುತೋಽಭೂಃ ॥7॥

ಕದಾಪಿ ಗೋಪೈಃ ಸಹ ಕಾನನಾನ್ತೇ ನಿಲಾಯನಕ್ರೀಡನಲೋಲುಪಂ ತ್ವಾಮ್ ।

ಮಯಾತ್ಮಜಃ ಪ್ರಾಪ ದುರನ್ತಮಾಯೋ ವ್ಯೋಮಾಭಿಧೋ ವ್ಯೋಮಚರೋಪರೋಧೀ ॥8॥

ಸ ಚೋರಪಾಲಾಯಿತವಲ್ಲವೇಷು ಚೋರಾಯಿತೋ ಗೋಪಶಿಶೂನ್ ಪಶೂಂಶ್ಚ

ಗುಹಾಸು ಕೃತ್ವಾ ಪಿದಧೇ ಶಿಲಾಭಿಸ್ತ್ವಯಾ ಚ ಬುದ್ಧ್ವಾ ಪರಿಮರ್ದಿತೋಽಭೂತ್ ॥9॥

ಏವಂ ವಿಧೈಶ್ಚಾದ್ಭುತಕೇಲಿಭೇದೈರಾನನ್ದಮೂರ್ಚ್ಛಾಮತುಲಾಂ ವ್ರಜಸ್ಯ ।

ಪದೇ ಪದೇ ನೂತನಯನ್ನಸೀಮಾಂ ಪರಾತ್ಮರೂಪಿನ್ ಪವನೇಶ ಪಾಯಾಃ ॥10॥

Roman (IAST) Transliteration

yatneṣu sarveṣvapi nāvakeśī keśī sa bhojeśituriṣṭabandhuḥ |

tvāṃ sindhujāvāpya itīva matvā samprāptavān sindhujavājirūpaḥ ||1||

gandharvatāmeṣa gato'pi rūkṣairnādaiḥ samudvejitasarvalokaḥ |

bhavadvilokāvadhi gopavāṭīṃ pramardya pāpaḥ punarāpatattvām ||2||

tārkṣyārpitāṅghrestava tārkṣya eṣa cikṣepa vakṣobhuvi nāma pādam |

bhṛgoḥ padāghātakathāṃ niśamya svenāpi śakyaṃ taditīva mohāt ||3||

pravañcayannasya khurāñcalaṃ drāgamuñca cikṣepitha dūradūram

sammūrcchito'pi hyatimūrcchitena krodhoṣmaṇā khāditumādrutastvām ||4||

tvaṃ vāhadaṇḍe kṛtadhīśca vāhādaṇḍaṃ nyadhāstasya mukhe tadānīm |

tad vṛddhiruddhaśvasano gatāsuḥ saptībhavannapyayamaikyamāgāt ||5||

ālambhamātreṇa paśoḥ surāṇāṃ prasādake nūtna ivāśvamedhe |

kṛte tvayā harṣavaśāt surendrāstvāṃ tuṣṭuvuḥ keśavanāmadheyam ||6||

kaṃsāya te śaurisutatvamuktvā taṃ tadvadhotkaṃ pratirudhya vācā|

prāptena keśikṣapaṇāvasāne śrīnāradena tvamabhiṣṭuto'bhūḥ ||7||

kadāpi gopaiḥ saha kānanānte nilāyanakrīḍanalolupaṃ tvām |

mayātmajaḥ prāpa durantamāyo vyomābhidho vyomacaroparodhī ||8||

sa corapālāyitavallaveṣu corāyito gopaśiśūn paśūṃśca

guhāsu kṛtvā pidadhe śilābhistvayā ca buddhvā parimardito'bhūt ||9||

evaṃ vidhaiścādbhutakelibhedairānandamūrcchāmatulāṃ vrajasya |

pade pade nūtanayannasīmāṃ parātmarūpin pavaneśa pāyāḥ ||10||