Narayaniyam Dashaka 70 - Sudarshanashapamoksham Tatha Shankhachuda-arishtavadham

ॐ

ನಾರಾಯಣೀಯಂ ದಶಕ 70 - ಸುದರ್ಶನಶಾಪಮೋಕ್ಷಂ ತಥಾ ಶಙ್ಖಚೂಡ-ಅರಿಷ್ಟವಧಮ್

Vishnu Kannada

ಇತಿ ತ್ವಯಿ ರಸಾಕುಲಂ ರಮಿತವಲ್ಲಭೇ ವಲ್ಲವಾಃ

ಕದಾಪಿ ಪುರಮಮ್ಬಿಕಾಮಿತುರಮ್ಬಿಕಾಕಾನನೇ ।

ಸಮೇತ್ಯ ಭವತಾ ಸಮಂ ನಿಶಿ ನಿಷೇವ್ಯ ದಿವ್ಯೋತ್ಸವಂ

ಸುಖಂ ಸುಷುಪುರಗ್ರಸೀದ್ವ್ರಜಪಮುಗ್ರನಾಗಸ್ತದಾ ॥1॥

ಸಮುನ್ಮುಖಮಥೋಲ್ಮುಕೈರಭಿಹತೇಽಪಿ ತಸ್ಮಿನ್ ಬಲಾ-

ದಮುಞ್ಚತಿ ಭವತ್ಪದೇ ನ್ಯಪತಿ ಪಾಹಿ ಪಾಹೀತಿ ತೈಃ ।

ತದಾ ಖಲು ಪದಾ ಭವಾನ್ ಸಮುಪಗಮ್ಯ ಪಸ್ಪರ್ಶ ತಂ

ಬಭೌ ಸ ಚ ನಿಜಾಂ ತನುಂ ಸಮುಪಸಾದ್ಯ ವೈದ್ಯಧರೀಮ್ ॥2॥

ಸುದರ್ಶನಧರ ಪ್ರಭೋ ನನು ಸುದರ್ಶನಾಖ್ಯೋಽಸ್ಮ್ಯಹಂ

ಮುನೀನ್ ಕ್ವಚಿದಪಾಹಸಂ ತ ಇಹ ಮಾಂ ವ್ಯಧುರ್ವಾಹಸಮ್ ।

ಭವತ್ಪದಸಮರ್ಪಣಾದಮಲತಾಂ ಗತೋಽಸ್ಮೀತ್ಯಸೌ

ಸ್ತುವನ್ ನಿಜಪದಂ ಯಯೌ ವ್ರಜಪದಂ ಚ ಗೋಪಾ ಮುದಾ ॥3॥

ಕದಾಪಿ ಖಲು ಸೀರಿಣಾ ವಿಹರತಿ ತ್ವಯಿ ಸ್ತ್ರೀಜನೈ-

ರ್ಜಹಾರ ಧನದಾನುಗಃ ಸ ಕಿಲ ಶಙ್ಖಚೂಡೋಽಬಲಾಃ ।

ಅತಿದ್ರುತಮನುದ್ರುತಸ್ತಮಥ ಮುಕ್ತನಾರೀಜನಂ

ರುರೋಜಿಥ ಶಿರೋಮಣಿಂ ಹಲಭೃತೇ ಚ ತಸ್ಯಾದದಾಃ ॥4॥

ದಿನೇಷು ಚ ಸುಹೃಜ್ಜನೈಸ್ಸಹ ವನೇಷು ಲೀಲಾಪರಂ

ಮನೋಭವಮನೋಹರಂ ರಸಿತವೇಣುನಾದಾಮೃತಮ್ ।

ಭವನ್ತಮಮರೀದೃಶಾಮಮೃತಪಾರಣಾದಾಯಿನಂ

ವಿಚಿನ್ತ್ಯ ಕಿಮು ನಾಲಪನ್ ವಿರಹತಾಪಿತಾ ಗೋಪಿಕಾಃ ॥5॥

ಭೋಜರಾಜಭೃತಕಸ್ತ್ವಥ ಕಶ್ಚಿತ್ ಕಷ್ಟದುಷ್ಟಪಥದೃಷ್ಟಿರರಿಷ್ಟಃ ।

ನಿಷ್ಠುರಾಕೃತಿರಪಷ್ಠುನಿನಾದಸ್ತಿಷ್ಠತೇ ಸ್ಮ ಭವತೇ ವೃಷರೂಪೀ ॥6॥

ಶಾಕ್ವರೋಽಥ ಜಗತೀಧೃತಿಹಾರೀ ಮೂರ್ತಿಮೇಷ ಬೃಹತೀಂ ಪ್ರದಧಾನಃ ।

ಪಙ್ಕ್ತಿಮಾಶು ಪರಿಘೂರ್ಣ್ಯ ಪಶೂನಾಂ ಛನ್ದಸಾಂ ನಿಧಿಮವಾಪ ಭವನ್ತಮ್ ॥7॥

ತುಙ್ಗಶೃಙ್ಗಮುಖಮಾಶ್ವಭಿಯನ್ತಂ ಸಙ್ಗೃಹಯ್ಯ ರಭಸಾದಭಿಯಂ ತಮ್ ।

ಭದ್ರರೂಪಮಪಿ ದೈತ್ಯಮಭದ್ರಂ ಮರ್ದಯನ್ನಮದಯಃ ಸುರಲೋಕಮ್ ॥8॥

ಚಿತ್ರಮದ್ಯ ಭಗವನ್ ವೃಷಘಾತಾತ್ ಸುಸ್ಥಿರಾಽಜನಿ ವೃಷಸ್ಥಿತಿರುರ್ವ್ಯಾಮ್ ।

ವರ್ಧತೇ ಚ ವೃಷಚೇತಸಿ ಭೂಯಾನ್ ಮೋದ ಇತ್ಯಭಿನುತೋಽಸಿ ಸುರೈಸ್ತ್ವಮ್ ॥9॥

ಔಕ್ಷಕಾಣಿ ಪರಿಧಾವತ ದೂರಂ ವೀಕ್ಷ್ಯತಾಮಯಮಿಹೋಕ್ಷವಿಭೇದೀ ।

ಇತ್ಥಮಾತ್ತಹಸಿತೈಃ ಸಹ ಗೋಪೈರ್ಗೇಹಗಸ್ತ್ವಮವ ವಾತಪುರೇಶ ॥10॥

Roman (IAST) Transliteration

iti tvayi rasākulaṃ ramitavallabhe vallavāḥ

kadāpi puramambikāmiturambikākānane |

sametya bhavatā samaṃ niśi niṣevya divyotsavaṃ

sukhaṃ suṣupuragrasīdvrajapamugranāgastadā ||1||

samunmukhamatholmukairabhihate'pi tasmin balā-

damuñcati bhavatpade nyapati pāhi pāhīti taiḥ |

tadā khalu padā bhavān samupagamya pasparśa taṃ

babhau sa ca nijāṃ tanuṃ samupasādya vaidyadharīm ||2||

sudarśanadhara prabho nanu sudarśanākhyo'smyahaṃ

munīn kvacidapāhasaṃ ta iha māṃ vyadhurvāhasam |

bhavatpadasamarpaṇādamalatāṃ gato'smītyasau

stuvan nijapadaṃ yayau vrajapadaṃ ca gopā mudā ||3||

kadāpi khalu sīriṇā viharati tvayi strījanai-

rjahāra dhanadānugaḥ sa kila śaṅkhacūḍo'balāḥ |

atidrutamanudrutastamatha muktanārījanaṃ

rurojitha śiromaṇiṃ halabhṛte ca tasyādadāḥ ||4||

dineṣu ca suhṛjjanaissaha vaneṣu līlāparaṃ

manobhavamanoharaṃ rasitaveṇunādāmṛtam |

bhavantamamarīdṛśāmamṛtapāraṇādāyinaṃ

vicintya kimu nālapan virahatāpitā gopikāḥ ||5||

bhojarājabhṛtakastvatha kaścit kaṣṭaduṣṭapathadṛṣṭirariṣṭaḥ |

niṣṭhurākṛtirapaṣṭhuninādastiṣṭhate sma bhavate vṛṣarūpī ||6||

śākvaro'tha jagatīdhṛtihārī mūrtimeṣa bṛhatīṃ pradadhānaḥ |

paṅktimāśu parighūrṇya paśūnāṃ chandasāṃ nidhimavāpa bhavantam ||7||

tuṅgaśṛṅgamukhamāśvabhiyantaṃ saṅgṛhayya rabhasādabhiyaṃ tam |

bhadrarūpamapi daityamabhadraṃ mardayannamadayaḥ suralokam ||8||

citramadya bhagavan vṛṣaghātāt susthirā'jani vṛṣasthitirurvyām |

vardhate ca vṛṣacetasi bhūyān moda ityabhinuto'si suraistvam ||9||

aukṣakāṇi paridhāvata dūraṃ vīkṣyatāmayamihokṣavibhedī |

itthamāttahasitaiḥ saha gopairgehagastvamava vātapureśa ||10||