Narayaniyam Dashaka 60 - Gopivastrapaharanam

ॐ

ನಾರಾಯಣೀಯಂ ದಶಕ 60 - ಗೋಪೀವಸ್ತ್ರಾಪಹರಣಮ್

Vishnu Kannada

ಮದನಾತುರಚೇತಸೋಽನ್ವಹಂ ಭವದಙ್ಘ್ರಿದ್ವಯದಾಸ್ಯಕಾಮ್ಯಯಾ ।

ಯಮುನಾತಟಸೀಮ್ನಿ ಸೈಕತೀಂ ತರಲಾಕ್ಷ್ಯೋ ಗಿರಿಜಾಂ ಸಮಾರ್ಚಿಚನ್ ॥1॥

ತವ ನಾಮಕಥಾರತಾಃ ಸಮಂ ಸುದೃಶಃ ಪ್ರಾತರುಪಾಗತಾ ನದೀಮ್ ।

ಉಪಹಾರಶತೈರಪೂಜಯನ್ ದಯಿತೋ ನನ್ದಸುತೋ ಭವೇದಿತಿ ॥2॥

ಇತಿ ಮಾಸಮುಪಾಹಿತವ್ರತಾಸ್ತರಲಾಕ್ಷೀರಭಿವೀಕ್ಷ್ಯ ತಾ ಭವಾನ್ ।

ಕರುಣಾಮೃದುಲೋ ನದೀತಟಂ ಸಮಯಾಸೀತ್ತದನುಗ್ರಹೇಚ್ಛಯಾ ॥3॥

ನಿಯಮಾವಸಿತೌ ನಿಜಾಮ್ಬರಂ ತಟಸೀಮನ್ಯವಮುಚ್ಯ ತಾಸ್ತದಾ ।

ಯಮುನಾಜಲಖೇಲನಾಕುಲಾಃ ಪುರತಸ್ತ್ವಾಮವಲೋಕ್ಯ ಲಜ್ಜಿತಾಃ ॥4॥

ತ್ರಪಯಾ ನಮಿತಾನನಾಸ್ವಥೋ ವನಿತಾಸ್ವಮ್ಬರಜಾಲಮನ್ತಿಕೇ ।

ನಿಹಿತಂ ಪರಿಗೃಹ್ಯ ಭೂರುಹೋ ವಿಟಪಂ ತ್ವಂ ತರಸಾಽಧಿರೂಢವಾನ್ ॥5॥

ಇಹ ತಾವದುಪೇತ್ಯ ನೀಯತಾಂ ವಸನಂ ವಃ ಸುದೃಶೋ ಯಥಾಯಥಮ್ ।

ಇತಿ ನರ್ಮಮೃದುಸ್ಮಿತೇ ತ್ವಯಿ ಬ್ರುವತಿ ವ್ಯಾಮುಮುಹೇ ವಧೂಜನೈಃ ॥6॥

ಅಯಿ ಜೀವ ಚಿರಂ ಕಿಶೋರ ನಸ್ತವ ದಾಸೀರವಶೀಕರೋಷಿ ಕಿಮ್ ।

ಪ್ರದಿಶಾಮ್ಬರಮಮ್ಬುಜೇಕ್ಷಣೇತ್ಯುದಿತಸ್ತ್ವಂ ಸ್ಮಿತಮೇವ ದತ್ತವಾನ್ ॥7॥

ಅಧಿರುಹ್ಯ ತಟಂ ಕೃತಾಞ್ಜಲೀಃ ಪರಿಶುದ್ಧಾಃ ಸ್ವಗತೀರ್ನಿರೀಕ್ಷ್ಯ ತಾಃ ।

ವಸನಾನ್ಯಖಿಲಾನ್ಯನುಗ್ರಹಂ ಪುನರೇವಂ ಗಿರಮಪ್ಯದಾ ಮುದಾ ॥8॥

ವಿದಿತಂ ನನು ವೋ ಮನೀಷಿತಂ ವದಿತಾರಸ್ತ್ವಿಹ ಯೋಗ್ಯಮುತ್ತರಮ್ ।

ಯಮುನಾಪುಲಿನೇ ಸಚನ್ದ್ರಿಕಾಃ ಕ್ಷಣದಾ ಇತ್ಯಬಲಾಸ್ತ್ವಮೂಚಿವಾನ್ ॥9॥

ಉಪಕರ್ಣ್ಯ ಭವನ್ಮುಖಚ್ಯುತಂ ಮಧುನಿಷ್ಯನ್ದಿ ವಚೋ ಮೃಗೀದೃಶಃ ।

ಪ್ರಣಯಾದಯಿ ವೀಕ್ಷ್ಯ ವೀಕ್ಷ್ಯ ತೇ ವದನಾಬ್ಜಂ ಶನಕೈರ್ಗೃಹಂ ಗತಾಃ ॥10॥

ಇತಿ ನನ್ವನುಗೃಹ್ಯ ವಲ್ಲವೀರ್ವಿಪಿನಾನ್ತೇಷು ಪುರೇವ ಸಞ್ಚರನ್ ।

ಕರುಣಾಶಿಶಿರೋ ಹರೇ ಹರ ತ್ವರಯಾ ಮೇ ಸಕಲಾಮಯಾವಲಿಮ್ ॥11॥

Roman (IAST) Transliteration

madanāturacetaso'nvahaṃ bhavadaṅghridvayadāsyakāmyayā |

yamunātaṭasīmni saikatīṃ taralākṣyo girijāṃ samārcican ||1||

tava nāmakathāratāḥ samaṃ sudṛśaḥ prātarupāgatā nadīm |

upahāraśatairapūjayan dayito nandasuto bhavediti ||2||

iti māsamupāhitavratāstaralākṣīrabhivīkṣya tā bhavān |

karuṇāmṛdulo nadītaṭaṃ samayāsīttadanugrahecchayā ||3||

niyamāvasitau nijāmbaraṃ taṭasīmanyavamucya tāstadā |

yamunājalakhelanākulāḥ puratastvāmavalokya lajjitāḥ ||4||

trapayā namitānanāsvatho vanitāsvambarajālamantike |

nihitaṃ parigṛhya bhūruho viṭapaṃ tvaṃ tarasā'dhirūḍhavān ||5||

iha tāvadupetya nīyatāṃ vasanaṃ vaḥ sudṛśo yathāyatham |

iti narmamṛdusmite tvayi bruvati vyāmumuhe vadhūjanaiḥ ||6||

ayi jīva ciraṃ kiśora nastava dāsīravaśīkaroṣi kim |

pradiśāmbaramambujekṣaṇetyuditastvaṃ smitameva dattavān ||7||

adhiruhya taṭaṃ kṛtāñjalīḥ pariśuddhāḥ svagatīrnirīkṣya tāḥ |

vasanānyakhilānyanugrahaṃ punarevaṃ giramapyadā mudā ||8||

viditaṃ nanu vo manīṣitaṃ vaditārastviha yogyamuttaram |

yamunāpuline sacandrikāḥ kṣaṇadā ityabalāstvamūcivān ||9||

upakarṇya bhavanmukhacyutaṃ madhuniṣyandi vaco mṛgīdṛśaḥ |

praṇayādayi vīkṣya vīkṣya te vadanābjaṃ śanakairgṛhaṃ gatāḥ ||10||

iti nanvanugṛhya vallavīrvipinānteṣu pureva sañcaran |

karuṇāśiśiro hare hara tvarayā me sakalāmayāvalim ||11||