Narayaniyam Dashaka 57 - Pralambasuravadham

ॐ

ನಾರಾಯಣೀಯಂ ದಶಕ 57 - ಪ್ರಲಮ್ಬಾಸುರವಧಮ್

Vishnu Melpathur Narayana Bhattathiri Kannada

ರಾಮಸಖಃ ಕ್ವಾಪಿ ದಿನೇ ಕಾಮದ ಭಗವನ್ ಗತೋ ಭವಾನ್ ವಿಪಿನಮ್ ।

ಸೂನುಭಿರಪಿ ಗೋಪಾನಾಂ ಧೇನುಭಿರಭಿಸಂವೃತೋ ಲಸದ್ವೇಷಃ ॥1॥

ಸನ್ದರ್ಶಯನ್ ಬಲಾಯ ಸ್ವೈರಂ ವೃನ್ದಾವನಶ್ರಿಯಂ ವಿಮಲಾಮ್ ।

ಕಾಣ್ಡೀರೈಃ ಸಹ ಬಾಲೈರ್ಭಾಣ್ಡೀರಕಮಾಗಮೋ ವಟಂ ಕ್ರೀಡನ್ ॥2॥

ತಾವತ್ತಾವಕನಿಧನಸ್ಪೃಹಯಾಲುರ್ಗೋಪಮೂರ್ತಿರದಯಾಲುಃ ।

ದೈತ್ಯಃ ಪ್ರಲಮ್ಬನಾಮಾ ಪ್ರಲಮ್ಬಬಾಹುಂ ಭವನ್ತಮಾಪೇದೇ ॥3॥

ಜಾನನ್ನಪ್ಯವಿಜಾನನ್ನಿವ ತೇನ ಸಮಂ ನಿಬದ್ಧಸೌಹಾರ್ದಃ ।

ವಟನಿಕಟೇ ಪಟುಪಶುಪವ್ಯಾಬದ್ಧಂ ದ್ವನ್ದ್ವಯುದ್ಧಮಾರಬ್ಧಾಃ ॥4॥

ಗೋಪಾನ್ ವಿಭಜ್ಯ ತನ್ವನ್ ಸಙ್ಘಂ ಬಲಭದ್ರಕಂ ಭವತ್ಕಮಪಿ ।

ತ್ವದ್ಬಲಭೀರುಂ ದೈತ್ಯಂ ತ್ವದ್ಬಲಗತಮನ್ವಮನ್ಯಥಾ ಭಗವನ್ ॥5॥

ಕಲ್ಪಿತವಿಜೇತೃವಹನೇ ಸಮರೇ ಪರಯೂಥಗಂ ಸ್ವದಯಿತತರಮ್ ।

ಶ್ರೀದಾಮಾನಮಧತ್ಥಾಃ ಪರಾಜಿತೋ ಭಕ್ತದಾಸತಾಂ ಪ್ರಥಯನ್ ॥6॥

ಏವಂ ಬಹುಷು ವಿಭೂಮನ್ ಬಾಲೇಷು ವಹತ್ಸು ವಾಹ್ಯಮಾನೇಷು ।

ರಾಮವಿಜಿತಃ ಪ್ರಲಮ್ಬೋ ಜಹಾರ ತಂ ದೂರತೋ ಭವದ್ಭೀತ್ಯಾ ॥7॥

ತ್ವದ್ದೂರಂ ಗಮಯನ್ತಂ ತಂ ದೃಷ್ಟ್ವಾ ಹಲಿನಿ ವಿಹಿತಗರಿಮಭರೇ ।

ದೈತ್ಯಃ ಸ್ವರೂಪಮಾಗಾದ್ಯದ್ರೂಪಾತ್ ಸ ಹಿ ಬಲೋಽಪಿ ಚಕಿತೋಽಭೂತ್ ॥8॥

ಉಚ್ಚತಯಾ ದೈತ್ಯತನೋಸ್ತ್ವನ್ಮುಖಮಾಲೋಕ್ಯ ದೂರತೋ ರಾಮಃ ।

ವಿಗತಭಯೋ ದೃಢಮುಷ್ಟ್ಯಾ ಭೃಶದುಷ್ಟಂ ಸಪದಿ ಪಿಷ್ಟವಾನೇನಮ್ ॥9॥

ಹತ್ವಾ ದಾನವವೀರಂ ಪ್ರಾಪ್ತಂ ಬಲಮಾಲಿಲಿಙ್ಗಿಥ ಪ್ರೇಮ್ಣಾ ।

ತಾವನ್ಮಿಲತೋರ್ಯುವಯೋಃ ಶಿರಸಿ ಕೃತಾ ಪುಷ್ಪವೃಷ್ಟಿರಮರಗಣೈಃ ॥10॥

ಆಲಮ್ಬೋ ಭುವನಾನಾಂ ಪ್ರಾಲಮ್ಬಂ ನಿಧನಮೇವಮಾರಚಯನ್ ।

ಕಾಲಂ ವಿಹಾಯ ಸದ್ಯೋ ಲೋಲಮ್ಬರುಚೇ ಹರೇ ಹರೇಃ ಕ್ಲೇಶಾನ್ ॥11॥

Roman (IAST) Transliteration

rāmasakhaḥ kvāpi dine kāmada bhagavan gato bhavān vipinam |

sūnubhirapi gopānāṃ dhenubhirabhisaṃvṛto lasadveṣaḥ ||1||

sandarśayan balāya svairaṃ vṛndāvanaśriyaṃ vimalām |

kāṇḍīraiḥ saha bālairbhāṇḍīrakamāgamo vaṭaṃ krīḍan ||2||

tāvattāvakanidhanaspṛhayālurgopamūrtiradayāluḥ |

daityaḥ pralambanāmā pralambabāhuṃ bhavantamāpede ||3||

jānannapyavijānanniva tena samaṃ nibaddhasauhārdaḥ |

vaṭanikaṭe paṭupaśupavyābaddhaṃ dvandvayuddhamārabdhāḥ ||4||

gopān vibhajya tanvan saṅghaṃ balabhadrakaṃ bhavatkamapi |

tvadbalabhīruṃ daityaṃ tvadbalagatamanvamanyathā bhagavan ||5||

kalpitavijetṛvahane samare parayūthagaṃ svadayitataram |

śrīdāmānamadhatthāḥ parājito bhaktadāsatāṃ prathayan ||6||

evaṃ bahuṣu vibhūman bāleṣu vahatsu vāhyamāneṣu |

rāmavijitaḥ pralambo jahāra taṃ dūrato bhavadbhītyā ||7||

tvaddūraṃ gamayantaṃ taṃ dṛṣṭvā halini vihitagarimabhare |

daityaḥ svarūpamāgādyadrūpāt sa hi balo'pi cakito'bhūt ||8||

uccatayā daityatanostvanmukhamālokya dūrato rāmaḥ |

vigatabhayo dṛḍhamuṣṭyā bhṛśaduṣṭaṃ sapadi piṣṭavānenam ||9||

hatvā dānavavīraṃ prāptaṃ balamāliliṅgitha premṇā |

tāvanmilatoryuvayoḥ śirasi kṛtā puṣpavṛṣṭiramaragaṇaiḥ ||10||

ālambo bhuvanānāṃ prālambaṃ nidhanamevamāracayan |

kālaṃ vihāya sadyo lolambaruce hare hareḥ kleśān ||11||