Narayaniyam Dashaka 56 - Kaliyagarvashamanam Tatha Bhagavadanugraham

ॐ

ನಾರಾಯಣೀಯಂ ದಶಕ 56 - ಕಾಲಿಯಗರ್ವಶಮನಂ ತಥಾ ಭಗವದನುಗ್ರಹಮ್

Vishnu Kannada

ರುಚಿರಕಮ್ಪಿತಕುಣ್ಡಲಮಣ್ಡಲಃ ಸುಚಿರಮೀಶ ನನರ್ತಿಥ ಪನ್ನಗೇ ।

ಅಮರತಾಡಿತದುನ್ದುಭಿಸುನ್ದರಂ ವಿಯತಿ ಗಾಯತಿ ದೈವತಯೌವತೇ ॥1॥

ನಮತಿ ಯದ್ಯದಮುಷ್ಯ ಶಿರೋ ಹರೇ ಪರಿವಿಹಾಯ ತದುನ್ನತಮುನ್ನತಮ್ ।

ಪರಿಮಥನ್ ಪದಪಙ್ಕರುಹಾ ಚಿರಂ ವ್ಯಹರಥಾಃ ಕರತಾಲಮನೋಹರಮ್ ॥2॥

ತ್ವದವಭಗ್ನವಿಭುಗ್ನಫಣಾಗಣೇ ಗಲಿತಶೋಣಿತಶೋಣಿತಪಾಥಸಿ ।

ಫಣಿಪತಾವವಸೀದತಿ ಸನ್ನತಾಸ್ತದಬಲಾಸ್ತವ ಮಾಧವ ಪಾದಯೋಃ ॥3॥

ಅಯಿ ಪುರೈವ ಚಿರಾಯ ಪರಿಶ್ರುತತ್ವದನುಭಾವವಿಲೀನಹೃದೋ ಹಿ ತಾಃ ।

ಮುನಿಭಿರಪ್ಯನವಾಪ್ಯಪಥೈಃ ಸ್ತವೈರ್ನುನುವುರೀಶ ಭವನ್ತಮಯನ್ತ್ರಿತಮ್ ॥4॥

ಫಣಿವಧೂಗಣಭಕ್ತಿವಿಲೋಕನಪ್ರವಿಕಸತ್ಕರುಣಾಕುಲಚೇತಸಾ ।

ಫಣಿಪತಿರ್ಭವತಾಽಚ್ಯುತ ಜೀವಿತಸ್ತ್ವಯಿ ಸಮರ್ಪಿತಮೂರ್ತಿರವಾನಮತ್ ॥5॥

ರಮಣಕಂ ವ್ರಜ ವಾರಿಧಿಮಧ್ಯಗಂ ಫಣಿರಿಪುರ್ನ ಕರೋತಿ ವಿರೋಧಿತಾಮ್ ।

ಇತಿ ಭವದ್ವಚನಾನ್ಯತಿಮಾನಯನ್ ಫಣಿಪತಿರ್ನಿರಗಾದುರಗೈಃ ಸಮಮ್ ॥6॥

ಫಣಿವಧೂಜನದತ್ತಮಣಿವ್ರಜಜ್ವಲಿತಹಾರದುಕೂಲವಿಭೂಷಿತಃ ।

ತಟಗತೈಃ ಪ್ರಮದಾಶ್ರುವಿಮಿಶ್ರಿತೈಃ ಸಮಗಥಾಃ ಸ್ವಜನೈರ್ದಿವಸಾವಧೌ ॥7॥

ನಿಶಿ ಪುನಸ್ತಮಸಾ ವ್ರಜಮನ್ದಿರಂ ವ್ರಜಿತುಮಕ್ಷಮ ಏವ ಜನೋತ್ಕರೇ ।

ಸ್ವಪತಿ ತತ್ರ ಭವಚ್ಚರಣಾಶ್ರಯೇ ದವಕೃಶಾನುರರುನ್ಧ ಸಮನ್ತತಃ ॥8॥

ಪ್ರಬುಧಿತಾನಥ ಪಾಲಯ ಪಾಲಯೇತ್ಯುದಯದಾರ್ತರವಾನ್ ಪಶುಪಾಲಕಾನ್ ।

ಅವಿತುಮಾಶು ಪಪಾಥ ಮಹಾನಲಂ ಕಿಮಿಹ ಚಿತ್ರಮಯಂ ಖಲು ತೇ ಮುಖಮ್ ॥9॥

ಶಿಖಿನಿ ವರ್ಣತ ಏವ ಹಿ ಪೀತತಾ ಪರಿಲಸತ್ಯಧುನಾ ಕ್ರಿಯಯಾಽಪ್ಯಸೌ ।

ಇತಿ ನುತಃ ಪಶುಪೈರ್ಮುದಿತೈರ್ವಿಭೋ ಹರ ಹರೇ ದುರಿತೈಃಸಹ ಮೇ ಗದಾನ್ ॥10॥

Roman (IAST) Transliteration

rucirakampitakuṇḍalamaṇḍalaḥ suciramīśa nanartitha pannage |

amaratāḍitadundubhisundaraṃ viyati gāyati daivatayauvate ||1||

namati yadyadamuṣya śiro hare parivihāya tadunnatamunnatam |

parimathan padapaṅkaruhā ciraṃ vyaharathāḥ karatālamanoharam ||2||

tvadavabhagnavibhugnaphaṇāgaṇe galitaśoṇitaśoṇitapāthasi |

phaṇipatāvavasīdati sannatāstadabalāstava mādhava pādayoḥ ||3||

ayi puraiva cirāya pariśrutatvadanubhāvavilīnahṛdo hi tāḥ |

munibhirapyanavāpyapathaiḥ stavairnunuvurīśa bhavantamayantritam ||4||

phaṇivadhūgaṇabhaktivilokanapravikasatkaruṇākulacetasā |

phaṇipatirbhavatā'cyuta jīvitastvayi samarpitamūrtiravānamat ||5||

ramaṇakaṃ vraja vāridhimadhyagaṃ phaṇiripurna karoti virodhitām |

iti bhavadvacanānyatimānayan phaṇipatirniragāduragaiḥ samam ||6||

phaṇivadhūjanadattamaṇivrajajvalitahāradukūlavibhūṣitaḥ |

taṭagataiḥ pramadāśruvimiśritaiḥ samagathāḥ svajanairdivasāvadhau ||7||

niśi punastamasā vrajamandiraṃ vrajitumakṣama eva janotkare |

svapati tatra bhavaccaraṇāśraye davakṛśānurarundha samantataḥ ||8||

prabudhitānatha pālaya pālayetyudayadārtaravān paśupālakān |

avitumāśu papātha mahānalaṃ kimiha citramayaṃ khalu te mukham ||9||

śikhini varṇata eva hi pītatā parilasatyadhunā kriyayā'pyasau |

iti nutaḥ paśupairmuditairvibho hara hare duritaiḥsaha me gadān ||10||