Narayaniyam Dashaka 53 - Dhenukasuravadham

ॐ

ನಾರಾಯಣೀಯಂ ದಶಕ 53 - ಧೇನುಕಾಸುರವಧಮ್

Vishnu Kannada

ಅತೀತ್ಯ ಬಾಲ್ಯಂ ಜಗತಾಂ ಪತೇ ತ್ವಮುಪೇತ್ಯ ಪೌಗಣ್ಡವಯೋ ಮನೋಜ್ಞಮ್ ।

ಉಪೇಕ್ಷ್ಯ ವತ್ಸಾವನಮುತ್ಸವೇನ ಪ್ರಾವರ್ತಥಾ ಗೋಗಣಪಾಲನಾಯಾಮ್ ॥1॥

ಉಪಕ್ರಮಸ್ಯಾನುಗುಣೈವ ಸೇಯಂ ಮರುತ್ಪುರಾಧೀಶ ತವ ಪ್ರವೃತ್ತಿಃ ।

ಗೋತ್ರಾಪರಿತ್ರಾಣಕೃತೇಽವತೀರ್ಣಸ್ತದೇವ ದೇವಾಽಽರಭಥಾಸ್ತದಾ ಯತ್ ॥2॥

ಕದಾಪಿ ರಾಮೇಣ ಸಮಂ ವನಾನ್ತೇ ವನಶ್ರಿಯಂ ವೀಕ್ಷ್ಯ ಚರನ್ ಸುಖೇನ ।

ಶ್ರೀದಾಮನಾಮ್ನಃ ಸ್ವಸಖಸ್ಯ ವಾಚಾ ಮೋದಾದಗಾ ಧೇನುಕಕಾನನಂ ತ್ವಮ್ ॥3॥

ಉತ್ತಾಲತಾಲೀನಿವಹೇ ತ್ವದುಕ್ತ್ಯಾ ಬಲೇನ ಧೂತೇಽಥ ಬಲೇನ ದೋರ್ಭ್ಯಾಮ್ ।

ಮೃದುಃ ಖರಶ್ಚಾಭ್ಯಪತತ್ಪುರಸ್ತಾತ್ ಫಲೋತ್ಕರೋ ಧೇನುಕದಾನವೋಽಪಿ ॥4॥

ಸಮುದ್ಯತೋ ಧೈನುಕಪಾಲನೇಽಹಂ ಕಥಂ ವಧಂ ಧೈನುಕಮದ್ಯ ಕುರ್ವೇ ।

ಇತೀವ ಮತ್ವಾ ಧ್ರುವಮಗ್ರಜೇನ ಸುರೌಘಯೋದ್ಧಾರಮಜೀಘನಸ್ತ್ವಮ್ ॥5॥

ತದೀಯಭೃತ್ಯಾನಪಿ ಜಮ್ಬುಕತ್ವೇನೋಪಾಗತಾನಗ್ರಜಸಂಯುತಸ್ತ್ವಮ್ ।

ಜಮ್ಬೂಫಲಾನೀವ ತದಾ ನಿರಾಸ್ಥಸ್ತಾಲೇಷು ಖೇಲನ್ ಭಗವನ್ ನಿರಾಸ್ಥಃ ॥6॥

ವಿನಿಘ್ನತಿ ತ್ವಯ್ಯಥ ಜಮ್ಬುಕೌಘಂ ಸನಾಮಕತ್ವಾದ್ವರುಣಸ್ತದಾನೀಮ್ ।

ಭಯಾಕುಲೋ ಜಮ್ಬುಕನಾಮಧೇಯಂ ಶ್ರುತಿಪ್ರಸಿದ್ಧಂ ವ್ಯಧಿತೇತಿ ಮನ್ಯೇ ॥7॥

ತವಾವತಾರಸ್ಯ ಫಲಂ ಮುರಾರೇ ಸಞ್ಜಾತಮದ್ಯೇತಿ ಸುರೈರ್ನುತಸ್ತ್ವಮ್ ।

ಸತ್ಯಂ ಫಲಂ ಜಾತಮಿಹೇತಿ ಹಾಸೀ ಬಾಲೈಃ ಸಮಂ ತಾಲಫಲಾನ್ಯಭುಙ್ಕ್ಥಾಃ ॥8॥

ಮಧುದ್ರವಸ್ರುನ್ತಿ ಬೃಹನ್ತಿ ತಾನಿ ಫಲಾನಿ ಮೇದೋಭರಭೃನ್ತಿ ಭುಕ್ತ್ವಾ ।

ತೃಪ್ತೈಶ್ಚ ದೃಪ್ತೈರ್ಭವನಂ ಫಲೌಘಂ ವಹದ್ಭಿರಾಗಾಃ ಖಲು ಬಾಲಕೈಸ್ತ್ವಮ್ ॥9॥

ಹತೋ ಹತೋ ಧೇನುಕ ಇತ್ಯುಪೇತ್ಯ ಫಲಾನ್ಯದದ್ಭಿರ್ಮಧುರಾಣಿ ಲೋಕೈಃ ।

ಜಯೇತಿ ಜೀವೇತಿ ನುತೋ ವಿಭೋ ತ್ವಂ ಮರುತ್ಪುರಾಧೀಶ್ವರ ಪಾಹಿ ರೋಗಾತ್ ॥10॥

Roman (IAST) Transliteration

atītya bālyaṃ jagatāṃ pate tvamupetya paugaṇḍavayo manojñam |

upekṣya vatsāvanamutsavena prāvartathā gogaṇapālanāyām ||1||

upakramasyānuguṇaiva seyaṃ marutpurādhīśa tava pravṛttiḥ |

gotrāparitrāṇakṛte'vatīrṇastadeva devā''rabhathāstadā yat ||2||

kadāpi rāmeṇa samaṃ vanānte vanaśriyaṃ vīkṣya caran sukhena |

śrīdāmanāmnaḥ svasakhasya vācā modādagā dhenukakānanaṃ tvam ||3||

uttālatālīnivahe tvaduktyā balena dhūte'tha balena dorbhyām |

mṛduḥ kharaścābhyapatatpurastāt phalotkaro dhenukadānavo'pi ||4||

samudyato dhainukapālane'haṃ kathaṃ vadhaṃ dhainukamadya kurve |

itīva matvā dhruvamagrajena suraughayoddhāramajīghanastvam ||5||

tadīyabhṛtyānapi jambukatvenopāgatānagrajasaṃyutastvam |

jambūphalānīva tadā nirāsthastāleṣu khelan bhagavan nirāsthaḥ ||6||

vinighnati tvayyatha jambukaughaṃ sanāmakatvādvaruṇastadānīm |

bhayākulo jambukanāmadheyaṃ śrutiprasiddhaṃ vyadhiteti manye ||7||

tavāvatārasya phalaṃ murāre sañjātamadyeti surairnutastvam |

satyaṃ phalaṃ jātamiheti hāsī bālaiḥ samaṃ tālaphalānyabhuṅkthāḥ ||8||

madhudravasrunti bṛhanti tāni phalāni medobharabhṛnti bhuktvā |

tṛptaiśca dṛptairbhavanaṃ phalaughaṃ vahadbhirāgāḥ khalu bālakaistvam ||9||

hato hato dhenuka ityupetya phalānyadadbhirmadhurāṇi lokaiḥ |

jayeti jīveti nuto vibho tvaṃ marutpurādhīśvara pāhi rogāt ||10||