Narayaniyam Dashaka 50 - Vatsasura-bakasurayoh Vadham

ॐ

ನಾರಾಯಣೀಯಂ ದಶಕ 50 - ವತ್ಸಾಸುರ-ಬಕಾಸುರಯೋಃ ವಧಮ್

Vishnu Kannada

ತರಲಮಧುಕೃತ್ ವೃನ್ದೇ ವೃನ್ದಾವನೇಽಥ ಮನೋಹರೇ

ಪಶುಪಶಿಶುಭಿಃ ಸಾಕಂ ವತ್ಸಾನುಪಾಲನಲೋಲುಪಃ ।

ಹಲಧರಸಖೋ ದೇವ ಶ್ರೀಮನ್ ವಿಚೇರಿಥ ಧಾರಯನ್

ಗವಲಮುರಲೀವೇತ್ರಂ ನೇತ್ರಾಭಿರಾಮತನುದ್ಯುತಿಃ ॥1॥

ವಿಹಿತಜಗತೀರಕ್ಷಂ ಲಕ್ಷ್ಮೀಕರಾಮ್ಬುಜಲಾಲಿತಂ

ದದತಿ ಚರಣದ್ವನ್ದ್ವಂ ವೃನ್ದಾವನೇ ತ್ವಯಿ ಪಾವನೇ ।

ಕಿಮಿವ ನ ಬಭೌ ಸಮ್ಪತ್ಸಮ್ಪೂರಿತಂ ತರುವಲ್ಲರೀ-

ಸಲಿಲಧರಣೀಗೋತ್ರಕ್ಷೇತ್ರಾದಿಕಂ ಕಮಲಾಪತೇ ॥2॥

ವಿಲಸದುಲಪೇ ಕಾನ್ತಾರಾನ್ತೇ ಸಮೀರಣಶೀತಲೇ

ವಿಪುಲಯಮುನಾತೀರೇ ಗೋವರ್ಧನಾಚಲಮೂರ್ಧಸು ।

ಲಲಿತಮುರಲೀನಾದಃ ಸಞ್ಚಾರಯನ್ ಖಲು ವಾತ್ಸಕಂ

ಕ್ವಚನ ದಿವಸೇ ದೈತ್ಯಂ ವತ್ಸಾಕೃತಿಂ ತ್ವಮುದೈಕ್ಷಥಾಃ ॥3॥

ರಭಸವಿಲಸತ್ಪುಚ್ಛಂ ವಿಚ್ಛಾಯತೋಽಸ್ಯ ವಿಲೋಕಯನ್

ಕಿಮಪಿ ವಲಿತಸ್ಕನ್ಧಂ ರನ್ಧ್ರಪ್ರತೀಕ್ಷಮುದೀಕ್ಷಿತಮ್ ।

ತಮಥ ಚರಣೇ ಬಿಭ್ರದ್ವಿಭ್ರಾಮಯನ್ ಮುಹುರುಚ್ಚಕೈಃ

ಕುಹಚನ ಮಹಾವೃಕ್ಷೇ ಚಿಕ್ಷೇಪಿಥ ಕ್ಷತಜೀವಿತಮ್ ॥4॥

ನಿಪತತಿ ಮಹಾದೈತ್ಯೇ ಜಾತ್ಯಾ ದುರಾತ್ಮನಿ ತತ್ಕ್ಷಣಂ

ನಿಪತನಜವಕ್ಷುಣ್ಣಕ್ಷೋಣೀರುಹಕ್ಷತಕಾನನೇ ।

ದಿವಿ ಪರಿಮಿಲತ್ ವೃನ್ದಾ ವೃನ್ದಾರಕಾಃ ಕುಸುಮೋತ್ಕರೈಃ

ಶಿರಸಿ ಭವತೋ ಹರ್ಷಾದ್ವರ್ಷನ್ತಿ ನಾಮ ತದಾ ಹರೇ ॥5॥

ಸುರಭಿಲತಮಾ ಮೂರ್ಧನ್ಯೂರ್ಧ್ವಂ ಕುತಃ ಕುಸುಮಾವಲೀ

ನಿಪತತಿ ತವೇತ್ಯುಕ್ತೋ ಬಾಲೈಃ ಸಹೇಲಮುದೈರಯಃ ।

ಝಟಿತಿ ದನುಜಕ್ಷೇಪೇಣೋರ್ಧ್ವಂ ಗತಸ್ತರುಮಣ್ಡಲಾತ್

ಕುಸುಮನಿಕರಃ ಸೋಽಯಂ ನೂನಂ ಸಮೇತಿ ಶನೈರಿತಿ ॥6॥

ಕ್ವಚನ ದಿವಸೇ ಭೂಯೋ ಭೂಯಸ್ತರೇ ಪರುಷಾತಪೇ

ತಪನತನಯಾಪಾಥಃ ಪಾತುಂ ಗತಾ ಭವದಾದಯಃ ।

ಚಲಿತಗರುತಂ ಪ್ರೇಕ್ಷಾಮಾಸುರ್ಬಕಂ ಖಲು ವಿಸ್ಮ್ರೃತಂ

ಕ್ಷಿತಿಧರಗರುಚ್ಛೇದೇ ಕೈಲಾಸಶೈಲಮಿವಾಪರಮ್ ॥7॥

ಪಿಬತಿ ಸಲಿಲಂ ಗೋಪವ್ರಾತೇ ಭವನ್ತಮಭಿದ್ರುತಃ

ಸ ಕಿಲ ನಿಗಿಲನ್ನಗ್ನಿಪ್ರಖ್ಯಂ ಪುನರ್ದ್ರುತಮುದ್ವಮನ್ ।

ದಲಯಿತುಮಗಾತ್ತ್ರೋಟ್ಯಾಃ ಕೋಟ್ಯಾ ತದಾಽಽಶು ಭವಾನ್ ವಿಭೋ

ಖಲಜನಭಿದಾಚುಞ್ಚುಶ್ಚಞ್ಚೂ ಪ್ರಗೃಹ್ಯ ದದಾರ ತಮ್ ॥8॥

ಸಪದಿ ಸಹಜಾಂ ಸನ್ದ್ರಷ್ಟುಂ ವಾ ಮೃತಾಂ ಖಲು ಪೂತನಾ-

ಮನುಜಮಘಮಪ್ಯಗ್ರೇ ಗತ್ವಾ ಪ್ರತೀಕ್ಷಿತುಮೇವ ವಾ ।

ಶಮನನಿಲಯಂ ಯಾತೇ ತಸ್ಮಿನ್ ಬಕೇ ಸುಮನೋಗಣೇ

ಕಿರತಿ ಸುಮನೋವೃನ್ದಂ ವೃನ್ದಾವನಾತ್ ಗೃಹಮೈಯಥಾಃ ॥9॥

ಲಲಿತಮುರಲೀನಾದಂ ದೂರಾನ್ನಿಶಮ್ಯ ವಧೂಜನೈ-

ಸ್ತ್ವರಿತಮುಪಗಮ್ಯಾರಾದಾರೂಢಮೋದಮುದೀಕ್ಷಿತಃ ।

ಜನಿತಜನನೀನನ್ದಾನನ್ದಃ ಸಮೀರಣಮನ್ದಿರ-

ಪ್ರಥಿತವಸತೇ ಶೌರೇ ದೂರೀಕುರುಷ್ವ ಮಮಾಮಯಾನ್ ॥10॥

Roman (IAST) Transliteration

taralamadhukṛt vṛnde vṛndāvane'tha manohare

paśupaśiśubhiḥ sākaṃ vatsānupālanalolupaḥ |

haladharasakho deva śrīman viceritha dhārayan

gavalamuralīvetraṃ netrābhirāmatanudyutiḥ ||1||

vihitajagatīrakṣaṃ lakṣmīkarāmbujalālitaṃ

dadati caraṇadvandvaṃ vṛndāvane tvayi pāvane |

kimiva na babhau sampatsampūritaṃ taruvallarī-

saliladharaṇīgotrakṣetrādikaṃ kamalāpate ||2||

vilasadulape kāntārānte samīraṇaśītale

vipulayamunātīre govardhanācalamūrdhasu |

lalitamuralīnādaḥ sañcārayan khalu vātsakaṃ

kvacana divase daityaṃ vatsākṛtiṃ tvamudaikṣathāḥ ||3||

rabhasavilasatpucchaṃ vicchāyato'sya vilokayan

kimapi valitaskandhaṃ randhrapratīkṣamudīkṣitam |

tamatha caraṇe bibhradvibhrāmayan muhuruccakaiḥ

kuhacana mahāvṛkṣe cikṣepitha kṣatajīvitam ||4||

nipatati mahādaitye jātyā durātmani tatkṣaṇaṃ

nipatanajavakṣuṇṇakṣoṇīruhakṣatakānane |

divi parimilat vṛndā vṛndārakāḥ kusumotkaraiḥ

śirasi bhavato harṣādvarṣanti nāma tadā hare ||5||

surabhilatamā mūrdhanyūrdhvaṃ kutaḥ kusumāvalī

nipatati tavetyukto bālaiḥ sahelamudairayaḥ |

jhaṭiti danujakṣepeṇordhvaṃ gatastarumaṇḍalāt

kusumanikaraḥ so'yaṃ nūnaṃ sameti śanairiti ||6||

kvacana divase bhūyo bhūyastare paruṣātape

tapanatanayāpāthaḥ pātuṃ gatā bhavadādayaḥ |

calitagarutaṃ prekṣāmāsurbakaṃ khalu vismrṛtaṃ

kṣitidharagarucchede kailāsaśailamivāparam ||7||

pibati salilaṃ gopavrāte bhavantamabhidrutaḥ

sa kila nigilannagniprakhyaṃ punardrutamudvaman |

dalayitumagāttroṭyāḥ koṭyā tadā''śu bhavān vibho

khalajanabhidācuñcuścañcū pragṛhya dadāra tam ||8||

sapadi sahajāṃ sandraṣṭuṃ vā mṛtāṃ khalu pūtanā-

manujamaghamapyagre gatvā pratīkṣitumeva vā |

śamananilayaṃ yāte tasmin bake sumanogaṇe

kirati sumanovṛndaṃ vṛndāvanāt gṛhamaiyathāḥ ||9||

lalitamuralīnādaṃ dūrānniśamya vadhūjanai-

stvaritamupagamyārādārūḍhamodamudīkṣitaḥ |

janitajananīnandānandaḥ samīraṇamandira-

prathitavasate śaure dūrīkuruṣva mamāmayān ||10||