Narayaniyam Dashaka 49 - Vrindavanapravesham

ॐ

ನಾರಾಯಣೀಯಂ ದಶಕ 49 - ವೃನ್ದಾವನಪ್ರವೇಶಮ್

Vishnu Kannada

ಭವತ್ಪ್ರಭಾವಾವಿದುರಾ ಹಿ ಗೋಪಾಸ್ತರುಪ್ರಪಾತಾದಿಕಮತ್ರ ಗೋಷ್ಠೇ ।

ಅಹೇತುಮುತ್ಪಾತಗಣಂ ವಿಶಙ್ಕ್ಯ ಪ್ರಯಾತುಮನ್ಯತ್ರ ಮನೋ ವಿತೇನುಃ ॥1॥

ತತ್ರೋಪನನ್ದಾಭಿಧಗೋಪವರ್ಯೋ ಜಗೌ ಭವತ್ಪ್ರೇರಣಯೈವ ನೂನಮ್ ।

ಇತಃ ಪ್ರತೀಚ್ಯಾಂ ವಿಪಿನಂ ಮನೋಜ್ಞಂ ವೃನ್ದಾವನಂ ನಾಮ ವಿರಾಜತೀತಿ ॥2॥

ಬೃಹದ್ವನಂ ತತ್ ಖಲು ನನ್ದಮುಖ್ಯಾ ವಿಧಾಯ ಗೌಷ್ಠೀನಮಥ ಕ್ಷಣೇನ ।

ತ್ವದನ್ವಿತತ್ವಜ್ಜನನೀನಿವಿಷ್ಟಗರಿಷ್ಠಯಾನಾನುಗತಾ ವಿಚೇಲುಃ ॥3॥

ಅನೋಮನೋಜ್ಞಧ್ವನಿಧೇನುಪಾಲೀಖುರಪ್ರಣಾದಾನ್ತರತೋ ವಧೂಭಿಃ ।

ಭವದ್ವಿನೋದಾಲಪಿತಾಕ್ಷರಾಣಿ ಪ್ರಪೀಯ ನಾಜ್ಞಾಯತ ಮಾರ್ಗದೈರ್ಘ್ಯಮ್ ॥4॥

ನಿರೀಕ್ಷ್ಯ ವೃನ್ದಾವನಮೀಶ ನನ್ದತ್ಪ್ರಸೂನಕುನ್ದಪ್ರಮುಖದ್ರುಮೌಘಮ್ ।

ಅಮೋದಥಾಃ ಶಾದ್ವಲಸಾನ್ದ್ರಲಕ್ಷ್ಮ್ಯಾ ಹರಿನ್ಮಣೀಕುಟ್ಟಿಮಪುಷ್ಟಶೋಭಮ್ ॥5॥

ನವಾಕನಿರ್ವ್ಯೂಢನಿವಾಸಭೇದೇಷ್ವಶೇಷಗೋಪೇಷು ಸುಖಾಸಿತೇಷು ।

ವನಶ್ರಿಯಂ ಗೋಪಕಿಶೋರಪಾಲೀವಿಮಿಶ್ರಿತಃ ಪರ್ಯಗಲೋಕಥಾಸ್ತ್ವಮ್ ॥6॥

ಅರಾಲಮಾರ್ಗಾಗತನಿರ್ಮಲಾಪಾಂ ಮರಾಲಕೂಜಾಕೃತನರ್ಮಲಾಪಾಮ್ ।

ನಿರನ್ತರಸ್ಮೇರಸರೋಜವಕ್ತ್ರಾಂ ಕಲಿನ್ದಕನ್ಯಾಂ ಸಮಲೋಕಯಸ್ತ್ವಮ್ ॥7॥

ಮಯೂರಕೇಕಾಶತಲೋಭನೀಯಂ ಮಯೂಖಮಾಲಾಶಬಲಂ ಮಣೀನಾಮ್ ।

ವಿರಿಞ್ಚಲೋಕಸ್ಪೃಶಮುಚ್ಚಶೃಙ್ಗೈರ್ಗಿರಿಂ ಚ ಗೋವರ್ಧನಮೈಕ್ಷಥಾಸ್ತ್ವಮ್ ॥8॥

ಸಮಂ ತತೋ ಗೋಪಕುಮಾರಕೈಸ್ತ್ವಂ ಸಮನ್ತತೋ ಯತ್ರ ವನಾನ್ತಮಾಗಾಃ ।

ತತಸ್ತತಸ್ತಾಂ ಕುಟಿಲಾಮಪಶ್ಯಃ ಕಲಿನ್ದಜಾಂ ರಾಗವತೀಮಿವೈಕಾಮ್ ॥9॥

ತಥಾವಿಧೇಽಸ್ಮಿನ್ ವಿಪಿನೇ ಪಶವ್ಯೇ ಸಮುತ್ಸುಕೋ ವತ್ಸಗಣಪ್ರಚಾರೇ ।

ಚರನ್ ಸರಾಮೋಽಥ ಕುಮಾರಕೈಸ್ತ್ವಂ ಸಮೀರಗೇಹಾಧಿಪ ಪಾಹಿ ರೋಗಾತ್ ॥10॥

Roman (IAST) Transliteration

bhavatprabhāvāvidurā hi gopāstaruprapātādikamatra goṣṭhe |

ahetumutpātagaṇaṃ viśaṅkya prayātumanyatra mano vitenuḥ ||1||

tatropanandābhidhagopavaryo jagau bhavatpreraṇayaiva nūnam |

itaḥ pratīcyāṃ vipinaṃ manojñaṃ vṛndāvanaṃ nāma virājatīti ||2||

bṛhadvanaṃ tat khalu nandamukhyā vidhāya gauṣṭhīnamatha kṣaṇena |

tvadanvitatvajjananīniviṣṭagariṣṭhayānānugatā viceluḥ ||3||

anomanojñadhvanidhenupālīkhurapraṇādāntarato vadhūbhiḥ |

bhavadvinodālapitākṣarāṇi prapīya nājñāyata mārgadairghyam ||4||

nirīkṣya vṛndāvanamīśa nandatprasūnakundapramukhadrumaugham |

amodathāḥ śādvalasāndralakṣmyā harinmaṇīkuṭṭimapuṣṭaśobham ||5||

navākanirvyūḍhanivāsabhedeṣvaśeṣagopeṣu sukhāsiteṣu |

vanaśriyaṃ gopakiśorapālīvimiśritaḥ paryagalokathāstvam ||6||

arālamārgāgatanirmalāpāṃ marālakūjākṛtanarmalāpām |

nirantarasmerasarojavaktrāṃ kalindakanyāṃ samalokayastvam ||7||

mayūrakekāśatalobhanīyaṃ mayūkhamālāśabalaṃ maṇīnām |

viriñcalokaspṛśamuccaśṛṅgairgiriṃ ca govardhanamaikṣathāstvam ||8||

samaṃ tato gopakumārakaistvaṃ samantato yatra vanāntamāgāḥ |

tatastatastāṃ kuṭilāmapaśyaḥ kalindajāṃ rāgavatīmivaikām ||9||

tathāvidhe'smin vipine paśavye samutsuko vatsagaṇapracāre |

caran sarāmo'tha kumārakaistvaṃ samīragehādhipa pāhi rogāt ||10||