Narayaniyam Dashaka 44 - Namakaranasamskaradi

ॐ

ನಾರಾಯಣೀಯಂ ದಶಕ 44 - ನಾಮಕರಣಸಂಸ್ಕಾರಾದಿ

Vishnu Kannada

ಗೂಢಂ ವಸುದೇವಗಿರಾ ಕರ್ತುಂ ತೇ ನಿಷ್ಕ್ರಿಯಸ್ಯ ಸಂಸ್ಕಾರಾನ್ ।

ಹೃದ್ಗತಹೋರಾತತ್ತ್ವೋ ಗರ್ಗಮುನಿಸ್ತ್ವತ್ ಗೃಹಂ ವಿಭೋ ಗತವಾನ್ ॥1॥

ನನ್ದೋಽಥ ನನ್ದಿತಾತ್ಮಾ ವೃನ್ದಿಷ್ಟಂ ಮಾನಯನ್ನಮುಂ ಯಮಿನಾಮ್ ।

ಮನ್ದಸ್ಮಿತಾರ್ದ್ರಮೂಚೇ ತ್ವತ್ಸಂಸ್ಕಾರಾನ್ ವಿಧಾತುಮುತ್ಸುಕಧೀಃ ॥2॥

ಯದುವಂಶಾಚಾರ್ಯತ್ವಾತ್ ಸುನಿಭೃತಮಿದಮಾರ್ಯ ಕಾರ್ಯಮಿತಿ ಕಥಯನ್ ।

ಗರ್ಗೋ ನಿರ್ಗತಪುಲಕಶ್ಚಕ್ರೇ ತವ ಸಾಗ್ರಜಸ್ಯ ನಾಮಾನಿ ॥3॥

ಕಥಮಸ್ಯ ನಾಮ ಕುರ್ವೇ ಸಹಸ್ರನಾಮ್ನೋ ಹ್ಯನನ್ತನಾಮ್ನೋ ವಾ ।

ಇತಿ ನೂನಂ ಗರ್ಗಮುನಿಶ್ಚಕ್ರೇ ತವ ನಾಮ ನಾಮ ರಹಸಿ ವಿಭೋ ॥4॥

ಕೃಷಿಧಾತುಣಕಾರಾಭ್ಯಾಂ ಸತ್ತಾನನ್ದಾತ್ಮತಾಂ ಕಿಲಾಭಿಲಪತ್ ।

ಜಗದಘಕರ್ಷಿತ್ವಂ ವಾ ಕಥಯದೃಷಿಃ ಕೃಷ್ಣನಾಮ ತೇ ವ್ಯತನೋತ್ ॥5॥

ಅನ್ಯಾಂಶ್ಚ ನಾಮಭೇದಾನ್ ವ್ಯಾಕುರ್ವನ್ನಗ್ರಜೇ ಚ ರಾಮಾದೀನ್ ।

ಅತಿಮಾನುಷಾನುಭಾವಂ ನ್ಯಗದತ್ತ್ವಾಮಪ್ರಕಾಶಯನ್ ಪಿತ್ರೇ ॥6॥

ಸ್ನಿಹ್ಯತಿ ಯಸ್ತವ ಪುತ್ರೇ ಮುಹ್ಯತಿ ಸ ನ ಮಾಯಿಕೈಃ ಪುನಃ ಶೋಕೈಃ ।

ದ್ರುಹ್ಯತಿ ಯಃ ಸ ತು ನಶ್ಯೇದಿತ್ಯವದತ್ತೇ ಮಹತ್ತ್ವಮೃಷಿವರ್ಯಃ ॥7॥

ಜೇಷ್ಯತಿ ಬಹುತರದೈತ್ಯಾನ್ ನೇಷ್ಯತಿ ನಿಜಬನ್ಧುಲೋಕಮಮಲಪದಮ್ ।

ಶ್ರೋಷ್ಯಸಿ ಸುವಿಮಲಕೀರ್ತೀರಸ್ಯೇತಿ ಭವದ್ವಿಭೂತಿಮೃಷಿರೂಚೇ ॥8॥

ಅಮುನೈವ ಸರ್ವದುರ್ಗಂ ತರಿತಾಸ್ಥ ಕೃತಾಸ್ಥಮತ್ರ ತಿಷ್ಠಧ್ವಮ್ ।

ಹರಿರೇವೇತ್ಯನಭಿಲಪನ್ನಿತ್ಯಾದಿ ತ್ವಾಮವರ್ಣಯತ್ ಸ ಮುನಿಃ ॥9॥

ಗರ್ಗೇಽಥ ನಿರ್ಗತೇಽಸ್ಮಿನ್ ನನ್ದಿತನನ್ದಾದಿನನ್ದ್ಯಮಾನಸ್ತ್ವಮ್ ।

ಮದ್ಗದಮುದ್ಗತಕರುಣೋ ನಿರ್ಗಮಯ ಶ್ರೀಮರುತ್ಪುರಾಧೀಶ ॥10॥

Roman (IAST) Transliteration

gūḍhaṃ vasudevagirā kartuṃ te niṣkriyasya saṃskārān |

hṛdgatahorātattvo gargamunistvat gṛhaṃ vibho gatavān ||1||

nando'tha nanditātmā vṛndiṣṭaṃ mānayannamuṃ yaminām |

mandasmitārdramūce tvatsaṃskārān vidhātumutsukadhīḥ ||2||

yaduvaṃśācāryatvāt sunibhṛtamidamārya kāryamiti kathayan |

gargo nirgatapulakaścakre tava sāgrajasya nāmāni ||3||

kathamasya nāma kurve sahasranāmno hyanantanāmno vā |

iti nūnaṃ gargamuniścakre tava nāma nāma rahasi vibho ||4||

kṛṣidhātuṇakārābhyāṃ sattānandātmatāṃ kilābhilapat |

jagadaghakarṣitvaṃ vā kathayadṛṣiḥ kṛṣṇanāma te vyatanot ||5||

anyāṃśca nāmabhedān vyākurvannagraje ca rāmādīn |

atimānuṣānubhāvaṃ nyagadattvāmaprakāśayan pitre ||6||

snihyati yastava putre muhyati sa na māyikaiḥ punaḥ śokaiḥ |

druhyati yaḥ sa tu naśyedityavadatte mahattvamṛṣivaryaḥ ||7||

jeṣyati bahutaradaityān neṣyati nijabandhulokamamalapadam |

śroṣyasi suvimalakīrtīrasyeti bhavadvibhūtimṛṣirūce ||8||

amunaiva sarvadurgaṃ taritāstha kṛtāsthamatra tiṣṭhadhvam |

harirevetyanabhilapannityādi tvāmavarṇayat sa muniḥ ||9||

garge'tha nirgate'smin nanditanandādinandyamānastvam |

madgadamudgatakaruṇo nirgamaya śrīmarutpurādhīśa ||10||