Narayaniyam Dashaka 42 - Shakatasuravadham

ॐ

ನಾರಾಯಣೀಯಂ ದಶಕ 42 - ಶಕಟಾಸುರವಧಮ್

Vishnu Kannada

ಕದಾಪಿ ಜನ್ಮರ್ಕ್ಷದಿನೇ ತವ ಪ್ರಭೋ ನಿಮನ್ತ್ರಿತಜ್ಞಾತಿವಧೂಮಹೀಸುರಾ ।

ಮಹಾನಸಸ್ತ್ವಾಂ ಸವಿಧೇ ನಿಧಾಯ ಸಾ ಮಹಾನಸಾದೌ ವವೃತೇ ವ್ರಜೇಶ್ವರೀ ॥1॥

ತತೋ ಭವತ್ತ್ರಾಣನಿಯುಕ್ತಬಾಲಕಪ್ರಭೀತಿಸಙ್ಕ್ರನ್ದನಸಙ್ಕುಲಾರವೈಃ ।

ವಿಮಿಶ್ರಮಶ್ರಾವಿ ಭವತ್ಸಮೀಪತಃ ಪರಿಸ್ಫುಟದ್ದಾರುಚಟಚ್ಚಟಾರವಃ ॥2॥

ತತಸ್ತದಾಕರ್ಣನಸಮ್ಭ್ರಮಶ್ರಮಪ್ರಕಮ್ಪಿವಕ್ಷೋಜಭರಾ ವ್ರಜಾಙ್ಗನಾಃ ।

ಭವನ್ತಮನ್ತರ್ದದೃಶುಸ್ಸಮನ್ತತೋ ವಿನಿಷ್ಪತದ್ದಾರುಣದಾರುಮಧ್ಯಗಮ್ ॥3॥

ಶಿಶೋರಹೋ ಕಿಂ ಕಿಮಭೂದಿತಿ ದ್ರುತಂ ಪ್ರಧಾವ್ಯ ನನ್ದಃ ಪಶುಪಾಶ್ಚ ಭೂಸುರಾಃ ।

ಭವನ್ತಮಾಲೋಕ್ಯ ಯಶೋದಯಾ ಧೃತಂ ಸಮಾಶ್ವಸನ್ನಶ್ರುಜಲಾರ್ದ್ರಲೋಚನಾಃ ॥4॥

ಕಸ್ಕೋ ನು ಕೌತಸ್ಕುತ ಏಷ ವಿಸ್ಮಯೋ ವಿಶಙ್ಕಟಂ ಯಚ್ಛಕಟಂ ವಿಪಾಟಿತಮ್ ।

ನ ಕಾರಣಂ ಕಿಞ್ಚಿದಿಹೇತಿ ತೇ ಸ್ಥಿತಾಃ ಸ್ವನಾಸಿಕಾದತ್ತಕರಾಸ್ತ್ವದೀಕ್ಷಕಾಃ ॥5॥

ಕುಮಾರಕಸ್ಯಾಸ್ಯ ಪಯೋಧರಾರ್ಥಿನಃ ಪ್ರರೋದನೇ ಲೋಲಪದಾಮ್ಬುಜಾಹತಮ್ ।

ಮಯಾ ಮಯಾ ದೃಷ್ಟಮನೋ ವಿಪರ್ಯಗಾದಿತೀಶ ತೇ ಪಾಲಕಬಾಲಕಾ ಜಗುಃ ॥6॥

ಭಿಯಾ ತದಾ ಕಿಞ್ಚಿದಜಾನತಾಮಿದಂ ಕುಮಾರಕಾಣಾಮತಿದುರ್ಘಟಂ ವಚಃ ।

ಭವತ್ಪ್ರಭಾವಾವಿದುರೈರಿತೀರಿತಂ ಮನಾಗಿವಾಶಙ್ಕ್ಯತ ದೃಷ್ಟಪೂತನೈಃ ॥7॥

ಪ್ರವಾಲತಾಮ್ರಂ ಕಿಮಿದಂ ಪದಂ ಕ್ಷತಂ ಸರೋಜರಮ್ಯೌ ನು ಕರೌ ವಿರೋಜಿತೌ।

ಇತಿ ಪ್ರಸರ್ಪತ್ಕರುಣಾತರಙ್ಗಿತಾಸ್ತ್ವದಙ್ಗಮಾಪಸ್ಪೃಶುರಙ್ಗನಾಜನಾಃ ॥8॥

ಅಯೇ ಸುತಂ ದೇಹಿ ಜಗತ್ಪತೇಃ ಕೃಪಾತರಙ್ಗಪಾತಾತ್ಪರಿಪಾತಮದ್ಯ ಮೇ ।

ಇತಿ ಸ್ಮ ಸಙ್ಗೃಹ್ಯ ಪಿತಾ ತ್ವದಙ್ಗಕಂ ಮುಹುರ್ಮುಹುಃ ಶ್ಲಿಷ್ಯತಿ ಜಾತಕಣ್ಟಕಃ ॥9॥

ಅನೋನಿಲೀನಃ ಕಿಲ ಹನ್ತುಮಾಗತಃ ಸುರಾರಿರೇವಂ ಭವತಾ ವಿಹಿಂಸಿತಃ ।

ರಜೋಽಪಿ ನೋ ದೃಷ್ಟಮಮುಷ್ಯ ತತ್ಕಥಂ ಸ ಶುದ್ಧಸತ್ತ್ವೇ ತ್ವಯಿ ಲೀನವಾನ್ ಧ್ರುವಮ್ ॥10॥

ಪ್ರಪೂಜಿತೈಸ್ತತ್ರ ತತೋ ದ್ವಿಜಾತಿಭಿರ್ವಿಶೇಷತೋ ಲಮ್ಭಿತಮಙ್ಗಲಾಶಿಷಃ ।

ವ್ರಜಂ ನಿಜೈರ್ಬಾಲ್ಯರಸೈರ್ವಿಮೋಹಯನ್ ಮರುತ್ಪುರಾಧೀಶ ರುಜಾಂ ಜಹೀಹಿ ಮೇ ॥11॥

Roman (IAST) Transliteration

kadāpi janmarkṣadine tava prabho nimantritajñātivadhūmahīsurā |

mahānasastvāṃ savidhe nidhāya sā mahānasādau vavṛte vrajeśvarī ||1||

tato bhavattrāṇaniyuktabālakaprabhītisaṅkrandanasaṅkulāravaiḥ |

vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||

tatastadākarṇanasambhramaśramaprakampivakṣojabharā vrajāṅganāḥ |

bhavantamantardadṛśussamantato viniṣpataddāruṇadārumadhyagam ||3||

śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |

bhavantamālokya yaśodayā dhṛtaṃ samāśvasannaśrujalārdralocanāḥ ||4||

kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |

na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||

kumārakasyāsya payodharārthinaḥ prarodane lolapadāmbujāhatam |

mayā mayā dṛṣṭamano viparyagāditīśa te pālakabālakā jaguḥ ||6||

bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |

bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||

pravālatāmraṃ kimidaṃ padaṃ kṣataṃ sarojaramyau nu karau virojitau|

iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||

aye sutaṃ dehi jagatpateḥ kṛpātaraṅgapātātparipātamadya me |

iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||

anonilīnaḥ kila hantumāgataḥ surārirevaṃ bhavatā vihiṃsitaḥ |

rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||

prapūjitaistatra tato dvijātibhirviśeṣato lambhitamaṅgalāśiṣaḥ |

vrajaṃ nijairbālyarasairvimohayan marutpurādhīśa rujāṃ jahīhi me ||11||