Narayaniyam Dashaka 41 - Putanadahanam Tatha Krishnalalanahladam

ॐ

ನಾರಾಯಣೀಯಂ ದಶಕ 41 - ಪೂತನಾದಹನಂ ತಥಾ ಕೃಷ್ಣಲಾಲನಾಹ್ಲಾದಮ್

Vishnu Kannada

ವ್ರಜೇಶ್ವರೈಃ ಶೌರಿವಚೋ ನಿಶಮ್ಯ ಸಮಾವ್ರಜನ್ನಧ್ವನಿ ಭೀತಚೇತಾಃ ।

ನಿಷ್ಪಿಷ್ಟನಿಶ್ಶೇಷತರುಂ ನಿರೀಕ್ಷ್ಯ ಕಞ್ಚಿತ್ಪದಾರ್ಥಂ ಶರಣಂ ಗತಸ್ವಾಮ್ ॥1॥

ನಿಶಮ್ಯ ಗೋಪೀವಚನಾದುದನ್ತಂ ಸರ್ವೇಽಪಿ ಗೋಪಾ ಭಯವಿಸ್ಮಯಾನ್ಧಾಃ ।

ತ್ವತ್ಪಾತಿತಂ ಘೋರಪಿಶಾಚದೇಹಂ ದೇಹುರ್ವಿದೂರೇಽಥ ಕುಠಾರಕೃತ್ತಮ್ ॥2॥

ತ್ವತ್ಪೀತಪೂತಸ್ತನತಚ್ಛರೀರಾತ್ ಸಮುಚ್ಚಲನ್ನುಚ್ಚತರೋ ಹಿ ಧೂಮಃ ।

ಶಙ್ಕಾಮಧಾದಾಗರವಃ ಕಿಮೇಷ ಕಿಂ ಚಾನ್ದನೋ ಗೌಲ್ಗುಲವೋಽಥವೇತಿ ॥3॥

ಮದಙ್ಗಸಙ್ಗಸ್ಯ ಫಲಂ ನ ದೂರೇ ಕ್ಷಣೇನ ತಾವತ್ ಭವತಾಮಪಿ ಸ್ಯಾತ್ ।

ಇತ್ಯುಲ್ಲಪನ್ ವಲ್ಲವತಲ್ಲಜೇಭ್ಯಃ ತ್ವಂ ಪೂತನಾಮಾತನುಥಾಃ ಸುಗನ್ಧಿಮ್ ॥4॥

ಚಿತ್ರಂ ಪಿಶಾಚ್ಯಾ ನ ಹತಃ ಕುಮಾರಃ ಚಿತ್ರಂ ಪುರೈವಾಕಥಿ ಶೌರಿಣೇದಮ್ ।

ಇತಿ ಪ್ರಶಂಸನ್ ಕಿಲ ಗೋಪಲೋಕೋ ಭವನ್ಮುಖಾಲೋಕರಸೇ ನ್ಯಮಾಙ್ಕ್ಷೀತ್ ॥5॥

ದಿನೇದಿನೇಽಥ ಪ್ರತಿವೃದ್ಧಲಕ್ಷ್ಮೀರಕ್ಷೀಣಮಾಙ್ಗಲ್ಯಶತೋ ವ್ರಜೋಽಯಮ್ ।

ಭವನ್ನಿವಾಸಾದಯಿ ವಾಸುದೇವ ಪ್ರಮೋದಸಾನ್ದ್ರಃ ಪರಿತೋ ವಿರೇಜೇ ॥6॥

ಗೃಹೇಷು ತೇ ಕೋಮಲರೂಪಹಾಸಮಿಥಃಕಥಾಸಙ್ಕುಲಿತಾಃ ಕಮನ್ಯಃ ।

ವೃತ್ತೇಷು ಕೃತ್ಯೇಷು ಭವನ್ನಿರೀಕ್ಷಾಸಮಾಗತಾಃ ಪ್ರತ್ಯಹಮತ್ಯನನ್ದನ್ ॥7॥

ಅಹೋ ಕುಮಾರೋ ಮಯಿ ದತ್ತದೃಷ್ಟಿಃ ಸ್ಮಿತಂ ಕೃತಂ ಮಾಂ ಪ್ರತಿ ವತ್ಸಕೇನ ।

ಏಹ್ಯೇಹಿ ಮಾಮಿತ್ಯುಪಸಾರ್ಯ ಪಾಣೀ ತ್ವಯೀಶ ಕಿಂ ಕಿಂ ನ ಕೃತಂ ವಧೂಭಿಃ ॥8॥

ಭವದ್ವಪುಃಸ್ಪರ್ಶನಕೌತುಕೇನ ಕರಾತ್ಕರಂ ಗೋಪವಧೂಜನೇನ ।

ನೀತಸ್ತ್ವಮಾತಾಮ್ರಸರೋಜಮಾಲಾವ್ಯಾಲಮ್ಬಿಲೋಲಮ್ಬತುಲಾಮಲಾಸೀಃ ॥9॥

ನಿಪಾಯಯನ್ತೀ ಸ್ತನಮಙ್ಕಗಂ ತ್ವಾಂ ವಿಲೋಕಯನ್ತೀ ವದನಂ ಹಸನ್ತೀ ।

ದಶಾಂ ಯಶೋದಾ ಕತಮಾಂ ನ ಭೇಜೇ ಸ ತಾದೃಶಃ ಪಾಹಿ ಹರೇ ಗದಾನ್ಮಾಮ್ ॥10॥

Roman (IAST) Transliteration

vrajeśvaraiḥ śaurivaco niśamya samāvrajannadhvani bhītacetāḥ |

niṣpiṣṭaniśśeṣataruṃ nirīkṣya kañcitpadārthaṃ śaraṇaṃ gatasvām ||1||

niśamya gopīvacanādudantaṃ sarve'pi gopā bhayavismayāndhāḥ |

tvatpātitaṃ ghorapiśācadehaṃ dehurvidūre'tha kuṭhārakṛttam ||2||

tvatpītapūtastanataccharīrāt samuccalannuccataro hi dhūmaḥ |

śaṅkāmadhādāgaravaḥ kimeṣa kiṃ cāndano gaulgulavo'thaveti ||3||

madaṅgasaṅgasya phalaṃ na dūre kṣaṇena tāvat bhavatāmapi syāt |

ityullapan vallavatallajebhyaḥ tvaṃ pūtanāmātanuthāḥ sugandhim ||4||

citraṃ piśācyā na hataḥ kumāraḥ citraṃ puraivākathi śauriṇedam |

iti praśaṃsan kila gopaloko bhavanmukhālokarase nyamāṅkṣīt ||5||

dinedine'tha prativṛddhalakṣmīrakṣīṇamāṅgalyaśato vrajo'yam |

bhavannivāsādayi vāsudeva pramodasāndraḥ parito vireje ||6||

gṛheṣu te komalarūpahāsamithaḥkathāsaṅkulitāḥ kamanyaḥ |

vṛtteṣu kṛtyeṣu bhavannirīkṣāsamāgatāḥ pratyahamatyanandan ||7||

aho kumāro mayi dattadṛṣṭiḥ smitaṃ kṛtaṃ māṃ prati vatsakena |

ehyehi māmityupasārya pāṇī tvayīśa kiṃ kiṃ na kṛtaṃ vadhūbhiḥ ||8||

bhavadvapuḥsparśanakautukena karātkaraṃ gopavadhūjanena |

nītastvamātāmrasarojamālāvyālambilolambatulāmalāsīḥ ||9||

nipāyayantī stanamaṅkagaṃ tvāṃ vilokayantī vadanaṃ hasantī |

daśāṃ yaśodā katamāṃ na bheje sa tādṛśaḥ pāhi hare gadānmām ||10||