Narayaniyam Dashaka 4 - Yogabhyasah Tatha Yogasiddhih

ॐ

ನಾರಾಯಣೀಯಂ ದಶಕ 4 - ಯೋಗಾಭ್ಯಾಸಃ ತಥಾ ಯೋಗಸಿದ್ಧಿಃ

Vishnu Kannada

ಕಲ್ಯತಾಂ ಮಮ ಕುರುಷ್ವ ತಾವತೀಂ ಕಲ್ಯತೇ ಭವದುಪಾಸನಂ ಯಯಾ ।

ಸ್ಪಷ್ಟಮಷ್ಟವಿಧಯೋಗಚರ್ಯಯಾ ಪುಷ್ಟಯಾಶು ತವ ತುಷ್ಟಿಮಾಪ್ನುಯಾಮ್ ॥1॥

ಬ್ರಹ್ಮಚರ್ಯದೃಢತಾದಿಭಿರ್ಯಮೈರಾಪ್ಲವಾದಿನಿಯಮೈಶ್ಚ ಪಾವಿತಾಃ ।

ಕುರ್ಮಹೇ ದೃಢಮಮೀ ಸುಖಾಸನಂ ಪಙ್ಕಜಾದ್ಯಮಪಿ ವಾ ಭವತ್ಪರಾಃ ॥2॥

ತಾರಮನ್ತರನುಚಿನ್ತ್ಯ ಸನ್ತತಂ ಪ್ರಾಣವಾಯುಮಭಿಯಮ್ಯ ನಿರ್ಮಲಾಃ ।

ಇನ್ದ್ರಿಯಾಣಿ ವಿಷಯಾದಥಾಪಹೃತ್ಯಾಸ್ಮಹೇ ಭವದುಪಾಸನೋನ್ಮುಖಾಃ ॥3॥

ಅಸ್ಫುಟೇ ವಪುಷಿ ತೇ ಪ್ರಯತ್ನತೋ ಧಾರಯೇಮ ಧಿಷಣಾಂ ಮುಹುರ್ಮುಹುಃ ।

ತೇನ ಭಕ್ತಿರಸಮನ್ತರಾರ್ದ್ರತಾಮುದ್ವಹೇಮ ಭವದಙ್ಘ್ರಿಚಿನ್ತಕಾ ॥4॥

ವಿಸ್ಫುಟಾವಯವಭೇದಸುನ್ದರಂ ತ್ವದ್ವಪುಃ ಸುಚಿರಶೀಲನಾವಶಾತ್ ।

ಅಶ್ರಮಂ ಮನಸಿ ಚಿನ್ತಯಾಮಹೇ ಧ್ಯಾನಯೋಗನಿರತಾಸ್ತ್ವದಾಶ್ರಯಾಃ ॥5॥

ಧ್ಯಾಯತಾಂ ಸಕಲಮೂರ್ತಿಮೀದೃಶೀಮುನ್ಮಿಷನ್ಮಧುರತಾಹೃತಾತ್ಮನಾಮ್ ।

ಸಾನ್ದ್ರಮೋದರಸರೂಪಮಾನ್ತರಂ ಬ್ರಹ್ಮ ರೂಪಮಯಿ ತೇಽವಭಾಸತೇ ॥6॥

ತತ್ಸಮಾಸ್ವದನರೂಪಿಣೀಂ ಸ್ಥಿತಿಂ ತ್ವತ್ಸಮಾಧಿಮಯಿ ವಿಶ್ವನಾಯಕ ।

ಆಶ್ರಿತಾಃ ಪುನರತಃ ಪರಿಚ್ಯುತಾವಾರಭೇಮಹಿ ಚ ಧಾರಣಾದಿಕಮ್ ॥7॥

ಇತ್ಥಮಭ್ಯಸನನಿರ್ಭರೋಲ್ಲಸತ್ತ್ವತ್ಪರಾತ್ಮಸುಖಕಲ್ಪಿತೋತ್ಸವಾಃ ।

ಮುಕ್ತಭಕ್ತಕುಲಮೌಲಿತಾಂ ಗತಾಃ ಸಞ್ಚರೇಮ ಶುಕನಾರದಾದಿವತ್ ॥8॥

ತ್ವತ್ಸಮಾಧಿವಿಜಯೇ ತು ಯಃ ಪುನರ್ಮಙ್ಕ್ಷು ಮೋಕ್ಷರಸಿಕಃ ಕ್ರಮೇಣ ವಾ ।

ಯೋಗವಶ್ಯಮನಿಲಂ ಷಡಾಶ್ರಯೈರುನ್ನಯತ್ಯಜ ಸುಷುಮ್ನಯಾ ಶನೈಃ ॥9॥

ಲಿಙ್ಗದೇಹಮಪಿ ಸನ್ತ್ಯಜನ್ನಥೋ ಲೀಯತೇ ತ್ವಯಿ ಪರೇ ನಿರಾಗ್ರಹಃ ।

ಊರ್ಧ್ವಲೋಕಕುತುಕೀ ತು ಮೂರ್ಧತಃ ಸಾರ್ಧಮೇವ ಕರಣೈರ್ನಿರೀಯತೇ ॥10॥

ಅಗ್ನಿವಾಸರವಲರ್ಕ್ಷಪಕ್ಷಗೈರುತ್ತರಾಯಣಜುಷಾ ಚ ದೈವತೈಃ ।

ಪ್ರಾಪಿತೋ ರವಿಪದಂ ಭವತ್ಪರೋ ಮೋದವಾನ್ ಧ್ರುವಪದಾನ್ತಮೀಯತೇ ॥11॥

ಆಸ್ಥಿತೋಽಥ ಮಹರಾಲಯೇ ಯದಾ ಶೇಷವಕ್ತ್ರದಹನೋಷ್ಮಣಾರ್ದ್ಯತೇ ।

ಈಯತೇ ಭವದುಪಾಶ್ರಯಸ್ತದಾ ವೇಧಸಃ ಪದಮತಃ ಪುರೈವ ವಾ ॥12॥

ತತ್ರ ವಾ ತವ ಪದೇಽಥವಾ ವಸನ್ ಪ್ರಾಕೃತಪ್ರಲಯ ಏತಿ ಮುಕ್ತತಾಮ್ ।

ಸ್ವೇಚ್ಛಯಾ ಖಲು ಪುರಾ ವಿಮುಚ್ಯತೇ ಸಂವಿಭಿದ್ಯ ಜಗದಣ್ಡಮೋಜಸಾ ॥13॥

ತಸ್ಯ ಚ ಕ್ಷಿತಿಪಯೋಮಹೋಽನಿಲದ್ಯೋಮಹತ್ಪ್ರಕೃತಿಸಪ್ತಕಾವೃತೀಃ ।

ತತ್ತದಾತ್ಮಕತಯಾ ವಿಶನ್ ಸುಖೀ ಯಾತಿ ತೇ ಪದಮನಾವೃತಂ ವಿಭೋ ॥14॥

ಅರ್ಚಿರಾದಿಗತಿಮೀದೃಶೀಂ ವ್ರಜನ್ ವಿಚ್ಯುತಿಂ ನ ಭಜತೇ ಜಗತ್ಪತೇ ।

ಸಚ್ಚಿದಾತ್ಮಕ ಭವತ್ ಗುಣೋದಯಾನುಚ್ಚರನ್ತಮನಿಲೇಶ ಪಾಹಿ ಮಾಮ್ ॥15॥

Roman (IAST) Transliteration

kalyatāṃ mama kuruṣva tāvatīṃ kalyate bhavadupāsanaṃ yayā |

spaṣṭamaṣṭavidhayogacaryayā puṣṭayāśu tava tuṣṭimāpnuyām ||1||

brahmacaryadṛḍhatādibhiryamairāplavādiniyamaiśca pāvitāḥ |

kurmahe dṛḍhamamī sukhāsanaṃ paṅkajādyamapi vā bhavatparāḥ ||2||

tāramantaranucintya santataṃ prāṇavāyumabhiyamya nirmalāḥ |

indriyāṇi viṣayādathāpahṛtyāsmahe bhavadupāsanonmukhāḥ ||3||

asphuṭe vapuṣi te prayatnato dhārayema dhiṣaṇāṃ muhurmuhuḥ |

tena bhaktirasamantarārdratāmudvahema bhavadaṅghricintakā ||4||

visphuṭāvayavabhedasundaraṃ tvadvapuḥ suciraśīlanāvaśāt |

aśramaṃ manasi cintayāmahe dhyānayoganiratāstvadāśrayāḥ ||5||

dhyāyatāṃ sakalamūrtimīdṛśīmunmiṣanmadhuratāhṛtātmanām |

sāndramodarasarūpamāntaraṃ brahma rūpamayi te'vabhāsate ||6||

tatsamāsvadanarūpiṇīṃ sthitiṃ tvatsamādhimayi viśvanāyaka |

āśritāḥ punarataḥ paricyutāvārabhemahi ca dhāraṇādikam ||7||

itthamabhyasananirbharollasattvatparātmasukhakalpitotsavāḥ |

muktabhaktakulamaulitāṃ gatāḥ sañcarema śukanāradādivat ||8||

tvatsamādhivijaye tu yaḥ punarmaṅkṣu mokṣarasikaḥ krameṇa vā |

yogavaśyamanilaṃ ṣaḍāśrayairunnayatyaja suṣumnayā śanaiḥ ||9||

liṅgadehamapi santyajannatho līyate tvayi pare nirāgrahaḥ |

ūrdhvalokakutukī tu mūrdhataḥ sārdhameva karaṇairnirīyate ||10||

agnivāsaravalarkṣapakṣagairuttarāyaṇajuṣā ca daivataiḥ |

prāpito ravipadaṃ bhavatparo modavān dhruvapadāntamīyate ||11||

āsthito'tha maharālaye yadā śeṣavaktradahanoṣmaṇārdyate |

īyate bhavadupāśrayastadā vedhasaḥ padamataḥ puraiva vā ||12||

tatra vā tava pade'thavā vasan prākṛtapralaya eti muktatām |

svecchayā khalu purā vimucyate saṃvibhidya jagadaṇḍamojasā ||13||

tasya ca kṣitipayomaho'niladyomahatprakṛtisaptakāvṛtīḥ |

tattadātmakatayā viśan sukhī yāti te padamanāvṛtaṃ vibho ||14||

arcirādigatimīdṛśīṃ vrajan vicyutiṃ na bhajate jagatpate |

saccidātmaka bhavat guṇodayānuccarantamanileśa pāhi mām ||15||