Narayaniyam Dashaka 36 - Parashuramavataram

ॐ

ನಾರಾಯಣೀಯಂ ದಶಕ 36 - ಪರಶುರಾಮಾವತಾರಮ್

Vishnu Kannada

ಅತ್ರೇಃ ಪುತ್ರತಯಾ ಪುರಾ ತ್ವಮನಸೂಯಾಯಾಂ ಹಿ ದತ್ತಾಭಿಧೋ

ಜಾತಃ ಶಿಷ್ಯನಿಬನ್ಧತನ್ದ್ರಿತಮನಾಃ ಸ್ವಸ್ಥಶ್ಚರನ್ ಕಾನ್ತಯಾ ।

ದೃಷ್ಟೋ ಭಕ್ತತಮೇನ ಹೇಹಯಮಹೀಪಾಲೇನ ತಸ್ಮೈ ವರಾ-

ನಷ್ಟೈಶ್ವರ್ಯಮುಖಾನ್ ಪ್ರದಾಯ ದದಿಥ ಸ್ವೇನೈವ ಚಾನ್ತೇ ವಧಮ್ ॥1॥

ಸತ್ಯಂ ಕರ್ತುಮಥಾರ್ಜುನಸ್ಯ ಚ ವರಂ ತಚ್ಛಕ್ತಿಮಾತ್ರಾನತಂ

ಬ್ರಹ್ಮದ್ವೇಷಿ ತದಾಖಿಲಂ ನೃಪಕುಲಂ ಹನ್ತುಂ ಚ ಭೂಮೇರ್ಭರಮ್ ।

ಸಞ್ಜಾತೋ ಜಮದಗ್ನಿತೋ ಭೃಗುಕುಲೇ ತ್ವಂ ರೇಣುಕಾಯಾಂ ಹರೇ

ರಾಮೋ ನಾಮ ತದಾತ್ಮಜೇಷ್ವವರಜಃ ಪಿತ್ರೋರಧಾಃ ಸಮ್ಮದಮ್ ॥2॥

ಲಬ್ಧಾಮ್ನಾಯಗಣಶ್ಚತುರ್ದಶವಯಾ ಗನ್ಧರ್ವರಾಜೇ ಮನಾ-

ಗಾಸಕ್ತಾಂ ಕಿಲ ಮಾತರಂ ಪ್ರತಿ ಪಿತುಃ ಕ್ರೋಧಾಕುಲಸ್ಯಾಜ್ಞಯಾ ।

ತಾತಾಜ್ಞಾತಿಗಸೋದರೈಃ ಸಮಮಿಮಾಂ ಛಿತ್ವಾಽಥ ಶಾನ್ತಾತ್ ಪಿತು-

ಸ್ತೇಷಾಂ ಜೀವನಯೋಗಮಾಪಿಥ ವರಂ ಮಾತಾ ಚ ತೇಽದಾದ್ವರಾನ್ ॥3॥

ಪಿತ್ರಾ ಮಾತೃಮುದೇ ಸ್ತವಾಹೃತವಿಯದ್ಧೇನೋರ್ನಿಜಾದಾಶ್ರಮಾತ್

ಪ್ರಸ್ಥಾಯಾಥ ಭೃಗೋರ್ಗಿರಾ ಹಿಮಗಿರಾವಾರಾಧ್ಯ ಗೌರೀಪತಿಮ್ ।

ಲಬ್ಧ್ವಾ ತತ್ಪರಶುಂ ತದುಕ್ತದನುಜಚ್ಛೇದೀ ಮಹಾಸ್ತ್ರಾದಿಕಂ

ಪ್ರಾಪ್ತೋ ಮಿತ್ರಮಥಾಕೃತವ್ರಣಮುನಿಂ ಪ್ರಾಪ್ಯಾಗಮಃ ಸ್ವಾಶ್ರಮಮ್ ॥4॥

ಆಖೇಟೋಪಗತೋಽರ್ಜುನಃ ಸುರಗವೀಸಮ್ಪ್ರಾಪ್ತಸಮ್ಪದ್ಗಣೈ-

ಸ್ತ್ವತ್ಪಿತ್ರಾ ಪರಿಪೂಜಿತಃ ಪುರಗತೋ ದುರ್ಮನ್ತ್ರಿವಾಚಾ ಪುನಃ ।

ಗಾಂ ಕ್ರೇತುಂ ಸಚಿವಂ ನ್ಯಯುಙ್ಕ್ತ ಕುಧಿಯಾ ತೇನಾಪಿ ರುನ್ಧನ್ಮುನಿ-

ಪ್ರಾಣಕ್ಷೇಪಸರೋಷಗೋಹತಚಮೂಚಕ್ರೇಣ ವತ್ಸೋ ಹೃತಃ ॥5॥

ಶುಕ್ರೋಜ್ಜೀವಿತತಾತವಾಕ್ಯಚಲಿತಕ್ರೋಧೋಽಥ ಸಖ್ಯಾ ಸಮಂ

ಬಿಭ್ರದ್ಧ್ಯಾತಮಹೋದರೋಪನಿಹಿತಂ ಚಾಪಂ ಕುಠಾರಂ ಶರಾನ್ ।

ಆರೂಢಃ ಸಹವಾಹಯನ್ತೃಕರಥಂ ಮಾಹಿಷ್ಮತೀಮಾವಿಶನ್

ವಾಗ್ಭಿರ್ವತ್ಸಮದಾಶುಷಿ ಕ್ಷಿತಿಪತೌ ಸಮ್ಪ್ರಾಸ್ತುಥಾಃ ಸಙ್ಗರಮ್ ॥6॥

ಪುತ್ರಾಣಾಮಯುತೇನ ಸಪ್ತದಶಭಿಶ್ಚಾಕ್ಷೌಹಿಣೀಭಿರ್ಮಹಾ-

ಸೇನಾನೀಭಿರನೇಕಮಿತ್ರನಿವಹೈರ್ವ್ಯಾಜೃಮ್ಭಿತಾಯೋಧನಃ ।

ಸದ್ಯಸ್ತ್ವತ್ಕಕುಠಾರಬಾಣವಿದಲನ್ನಿಶ್ಶೇಷಸೈನ್ಯೋತ್ಕರೋ

ಭೀತಿಪ್ರದ್ರುತನಷ್ಟಶಿಷ್ಟತನಯಸ್ತ್ವಾಮಾಪತತ್ ಹೇಹಯಃ ॥7॥

ಲೀಲಾವಾರಿತನರ್ಮದಾಜಲವಲಲ್ಲಙ್ಕೇಶಗರ್ವಾಪಹ-

ಶ್ರೀಮದ್ಬಾಹುಸಹಸ್ರಮುಕ್ತಬಹುಶಸ್ತ್ರಾಸ್ತ್ರಂ ನಿರುನ್ಧನ್ನಮುಮ್ ।

ಚಕ್ರೇ ತ್ವಯ್ಯಥ ವೈಷ್ಣವೇಽಪಿ ವಿಫಲೇ ಬುದ್ಧ್ವಾ ಹರಿಂ ತ್ವಾಂ ಮುದಾ

ಧ್ಯಾಯನ್ತಂ ಛಿತಸರ್ವದೋಷಮವಧೀಃ ಸೋಽಗಾತ್ ಪರಂ ತೇ ಪದಮ್ ॥8॥

ಭೂಯೋಽಮರ್ಷಿತಹೇಹಯಾತ್ಮಜಗಣೈಸ್ತಾತೇ ಹತೇ ರೇಣುಕಾ-

ಮಾಘ್ನಾನಾಂ ಹೃದಯಂ ನಿರೀಕ್ಷ್ಯ ಬಹುಶೋ ಘೋರಾಂ ಪ್ರತಿಜ್ಞಾಂ ವಹನ್ ।

ಧ್ಯಾನಾನೀತರಥಾಯುಧಸ್ತ್ವಮಕೃಥಾ ವಿಪ್ರದ್ರುಹಃ ಕ್ಷತ್ರಿಯಾನ್

ದಿಕ್ಚಕ್ರೇಷು ಕುಠಾರಯನ್ ವಿಶಿಖಯನ್ ನಿಃಕ್ಷತ್ರಿಯಾಂ ಮೇದಿನೀಮ್ ॥9॥

ತಾತೋಜ್ಜೀವನಕೃನ್ನೃಪಾಲಕಕುಲಂ ತ್ರಿಸ್ಸಪ್ತಕೃತ್ವೋ ಜಯನ್

ಸನ್ತರ್ಪ್ಯಾಥ ಸಮನ್ತಪಞ್ಚಕಮಹಾರಕ್ತಹೃದೌಘೇ ಪಿತೃನ್

ಯಜ್ಞೇ ಕ್ಷ್ಮಾಮಪಿ ಕಾಶ್ಯಪಾದಿಷು ದಿಶನ್ ಸಾಲ್ವೇನ ಯುಧ್ಯನ್ ಪುನಃ

ಕೃಷ್ಣೋಽಮುಂ ನಿಹನಿಷ್ಯತೀತಿ ಶಮಿತೋ ಯುದ್ಧಾತ್ ಕುಮಾರೈರ್ಭವಾನ್ ॥10॥

ನ್ಯಸ್ಯಾಸ್ತ್ರಾಣಿ ಮಹೇನ್ದ್ರಭೂಭೃತಿ ತಪಸ್ತನ್ವನ್ ಪುನರ್ಮಜ್ಜಿತಾಂ

ಗೋಕರ್ಣಾವಧಿ ಸಾಗರೇಣ ಧರಣೀಂ ದೃಷ್ಟ್ವಾರ್ಥಿತಸ್ತಾಪಸೈಃ ।

ಧ್ಯಾತೇಷ್ವಾಸಧೃತಾನಲಾಸ್ತ್ರಚಕಿತಂ ಸಿನ್ಧುಂ ಸ್ರುವಕ್ಷೇಪಣಾ-

ದುತ್ಸಾರ್ಯೋದ್ಧೃತಕೇರಲೋ ಭೃಗುಪತೇ ವಾತೇಶ ಸಂರಕ್ಷ ಮಾಮ್ ॥11॥

Roman (IAST) Transliteration

atreḥ putratayā purā tvamanasūyāyāṃ hi dattābhidho

jātaḥ śiṣyanibandhatandritamanāḥ svasthaścaran kāntayā |

dṛṣṭo bhaktatamena hehayamahīpālena tasmai varā-

naṣṭaiśvaryamukhān pradāya daditha svenaiva cānte vadham ||1||

satyaṃ kartumathārjunasya ca varaṃ tacchaktimātrānataṃ

brahmadveṣi tadākhilaṃ nṛpakulaṃ hantuṃ ca bhūmerbharam |

sañjāto jamadagnito bhṛgukule tvaṃ reṇukāyāṃ hare

rāmo nāma tadātmajeṣvavarajaḥ pitroradhāḥ sammadam ||2||

labdhāmnāyagaṇaścaturdaśavayā gandharvarāje manā-

gāsaktāṃ kila mātaraṃ prati pituḥ krodhākulasyājñayā |

tātājñātigasodaraiḥ samamimāṃ chitvā'tha śāntāt pitu-

steṣāṃ jīvanayogamāpitha varaṃ mātā ca te'dādvarān ||3||

pitrā mātṛmude stavāhṛtaviyaddhenornijādāśramāt

prasthāyātha bhṛgorgirā himagirāvārādhya gaurīpatim |

labdhvā tatparaśuṃ taduktadanujacchedī mahāstrādikaṃ

prāpto mitramathākṛtavraṇamuniṃ prāpyāgamaḥ svāśramam ||4||

ākheṭopagato'rjunaḥ suragavīsamprāptasampadgaṇai-

stvatpitrā paripūjitaḥ puragato durmantrivācā punaḥ |

gāṃ kretuṃ sacivaṃ nyayuṅkta kudhiyā tenāpi rundhanmuni-

prāṇakṣepasaroṣagohatacamūcakreṇa vatso hṛtaḥ ||5||

śukrojjīvitatātavākyacalitakrodho'tha sakhyā samaṃ

bibhraddhyātamahodaropanihitaṃ cāpaṃ kuṭhāraṃ śarān |

ārūḍhaḥ sahavāhayantṛkarathaṃ māhiṣmatīmāviśan

vāgbhirvatsamadāśuṣi kṣitipatau samprāstuthāḥ saṅgaram ||6||

putrāṇāmayutena saptadaśabhiścākṣauhiṇībhirmahā-

senānībhiranekamitranivahairvyājṛmbhitāyodhanaḥ |

sadyastvatkakuṭhārabāṇavidalanniśśeṣasainyotkaro

bhītipradrutanaṣṭaśiṣṭatanayastvāmāpatat hehayaḥ ||7||

līlāvāritanarmadājalavalallaṅkeśagarvāpaha-

śrīmadbāhusahasramuktabahuśastrāstraṃ nirundhannamum |

cakre tvayyatha vaiṣṇave'pi viphale buddhvā hariṃ tvāṃ mudā

dhyāyantaṃ chitasarvadoṣamavadhīḥ so'gāt paraṃ te padam ||8||

bhūyo'marṣitahehayātmajagaṇaistāte hate reṇukā-

māghnānāṃ hṛdayaṃ nirīkṣya bahuśo ghorāṃ pratijñāṃ vahan |

dhyānānītarathāyudhastvamakṛthā vipradruhaḥ kṣatriyān

dikcakreṣu kuṭhārayan viśikhayan niḥkṣatriyāṃ medinīm ||9||

tātojjīvanakṛnnṛpālakakulaṃ trissaptakṛtvo jayan

santarpyātha samantapañcakamahāraktahṛdaughe pitṛn

yajñe kṣmāmapi kāśyapādiṣu diśan sālvena yudhyan punaḥ

kṛṣṇo'muṃ nihaniṣyatīti śamito yuddhāt kumārairbhavān ||10||

nyasyāstrāṇi mahendrabhūbhṛti tapastanvan punarmajjitāṃ

gokarṇāvadhi sāgareṇa dharaṇīṃ dṛṣṭvārthitastāpasaiḥ |

dhyāteṣvāsadhṛtānalāstracakitaṃ sindhuṃ sruvakṣepaṇā-

dutsāryoddhṛtakeralo bhṛgupate vāteśa saṃrakṣa mām ||11||