Narayaniyam Dashaka 32 - Matsyavataram

ॐ

ನಾರಾಯಣೀಯಂ ದಶಕ 32 - ಮತ್ಸ್ಯಾವತಾರಮ್

Vishnu Melpathur Narayana Bhattathiri Kannada

ಪುರಾ ಹಯಗ್ರೀವಮಹಾಸುರೇಣ ಷಷ್ಠಾನ್ತರಾನ್ತೋದ್ಯದಕಾಣ್ಡಕಲ್ಪೇ ।

ನಿದ್ರೋನ್ಮುಖಬ್ರಹ್ಮಮುಖಾತ್ ಹೃತೇಷು ವೇದೇಷ್ವಧಿತ್ಸಃ ಕಿಲ ಮತ್ಸ್ಯರೂಪಮ್ ॥1॥

ಸತ್ಯವ್ರತಸ್ಯ ದ್ರಮಿಲಾಧಿಭರ್ತುರ್ನದೀಜಲೇ ತರ್ಪಯತಸ್ತದಾನೀಮ್ ।

ಕರಾಞ್ಜಲೌ ಸಞ್ಜ್ವಲಿತಾಕೃತಿಸ್ತ್ವಮದೃಶ್ಯಥಾಃ ಕಶ್ಚನ ಬಾಲಮೀನಃ ॥2॥

ಕ್ಷಿಪ್ತಂ ಜಲೇ ತ್ವಾಂ ಚಕಿತಂ ವಿಲೋಕ್ಯ ನಿನ್ಯೇಽಮ್ಬುಪಾತ್ರೇಣ ಮುನಿಃ ಸ್ವಗೇಹಮ್ ।

ಸ್ವಲ್ಪೈರಹೋಭಿಃ ಕಲಶೀಂ ಚ ಕೂಪಂ ವಾಪೀಂ ಸರಶ್ಚಾನಶಿಷೇ ವಿಭೋ ತ್ವಮ್ ॥3॥

ಯೋಗಪ್ರಭಾವಾದ್ಭವದಾಜ್ಞಯೈವ ನೀತಸ್ತತಸ್ತ್ವಂ ಮುನಿನಾ ಪಯೋಧಿಮ್ ।

ಪೃಷ್ಟೋಽಮುನಾ ಕಲ್ಪದಿದೃಕ್ಷುಮೇನಂ ಸಪ್ತಾಹಮಾಸ್ವೇತಿ ವದನ್ನಯಾಸೀಃ ॥4॥

ಪ್ರಾಪ್ತೇ ತ್ವದುಕ್ತೇಽಹನಿ ವಾರಿಧಾರಾಪರಿಪ್ಲುತೇ ಭೂಮಿತಲೇ ಮುನೀನ್ದ್ರಃ ।

ಸಪ್ತರ್ಷಿಭಿಃ ಸಾರ್ಧಮಪಾರವಾರಿಣ್ಯುದ್ಘೂರ್ಣಮಾನಃ ಶರಣಂ ಯಯೌ ತ್ವಾಮ್ ॥5॥

ಧರಾಂ ತ್ವದಾದೇಶಕರೀಮವಾಪ್ತಾಂ ನೌರೂಪಿಣೀಮಾರುರುಹುಸ್ತದಾ ತೇ

ತತ್ಕಮ್ಪಕಮ್ಪ್ರೇಷು ಚ ತೇಷು ಭೂಯಸ್ತ್ವಮಮ್ಬುಧೇರಾವಿರಭೂರ್ಮಹೀಯಾನ್ ॥6॥

ಝಷಾಕೃತಿಂ ಯೋಜನಲಕ್ಷದೀರ್ಘಾಂ ದಧಾನಮುಚ್ಚೈಸ್ತರತೇಜಸಂ ತ್ವಾಮ್ ।

ನಿರೀಕ್ಷ್ಯ ತುಷ್ಟಾ ಮುನಯಸ್ತ್ವದುಕ್ತ್ಯಾ ತ್ವತ್ತುಙ್ಗಶೃಙ್ಗೇ ತರಣಿಂ ಬಬನ್ಧುಃ ॥7॥

ಆಕೃಷ್ಟನೌಕೋ ಮುನಿಮಣ್ಡಲಾಯ ಪ್ರದರ್ಶಯನ್ ವಿಶ್ವಜಗದ್ವಿಭಾಗಾನ್ ।

ಸಂಸ್ತೂಯಮಾನೋ ನೃವರೇಣ ತೇನ ಜ್ಞಾನಂ ಪರಂ ಚೋಪದಿಶನ್ನಚಾರೀಃ ॥8॥

ಕಲ್ಪಾವಧೌ ಸಪ್ತಮುನೀನ್ ಪುರೋವತ್ ಪ್ರಸ್ಥಾಪ್ಯ ಸತ್ಯವ್ರತಭೂಮಿಪಂ ತಮ್ ।

ವೈವಸ್ವತಾಖ್ಯಂ ಮನುಮಾದಧಾನಃ ಕ್ರೋಧಾದ್ ಹಯಗ್ರೀವಮಭಿದ್ರುತೋಽಭೂಃ ॥9॥

ಸ್ವತುಙ್ಗಶೃಙ್ಗಕ್ಷತವಕ್ಷಸಂ ತಂ ನಿಪಾತ್ಯ ದೈತ್ಯಂ ನಿಗಮಾನ್ ಗೃಹೀತ್ವಾ ।

ವಿರಿಞ್ಚಯೇ ಪ್ರೀತಹೃದೇ ದದಾನಃ ಪ್ರಭಞ್ಜನಾಗಾರಪತೇ ಪ್ರಪಾಯಾಃ ॥10॥

Roman (IAST) Transliteration

purā hayagrīvamahāsureṇa ṣaṣṭhāntarāntodyadakāṇḍakalpe |

nidronmukhabrahmamukhāt hṛteṣu vedeṣvadhitsaḥ kila matsyarūpam ||1||

satyavratasya dramilādhibharturnadījale tarpayatastadānīm |

karāñjalau sañjvalitākṛtistvamadṛśyathāḥ kaścana bālamīnaḥ ||2||

kṣiptaṃ jale tvāṃ cakitaṃ vilokya ninye'mbupātreṇa muniḥ svageham |

svalpairahobhiḥ kalaśīṃ ca kūpaṃ vāpīṃ saraścānaśiṣe vibho tvam ||3||

yogaprabhāvādbhavadājñayaiva nītastatastvaṃ muninā payodhim |

pṛṣṭo'munā kalpadidṛkṣumenaṃ saptāhamāsveti vadannayāsīḥ ||4||

prāpte tvadukte'hani vāridhārāpariplute bhūmitale munīndraḥ |

saptarṣibhiḥ sārdhamapāravāriṇyudghūrṇamānaḥ śaraṇaṃ yayau tvām ||5||

dharāṃ tvadādeśakarīmavāptāṃ naurūpiṇīmāruruhustadā te

tatkampakampreṣu ca teṣu bhūyastvamambudherāvirabhūrmahīyān ||6||

jhaṣākṛtiṃ yojanalakṣadīrghāṃ dadhānamuccaistaratejasaṃ tvām |

nirīkṣya tuṣṭā munayastvaduktyā tvattuṅgaśṛṅge taraṇiṃ babandhuḥ ||7||

ākṛṣṭanauko munimaṇḍalāya pradarśayan viśvajagadvibhāgān |

saṃstūyamāno nṛvareṇa tena jñānaṃ paraṃ copadiśannacārīḥ ||8||

kalpāvadhau saptamunīn purovat prasthāpya satyavratabhūmipaṃ tam |

vaivasvatākhyaṃ manumādadhānaḥ krodhād hayagrīvamabhidruto'bhūḥ ||9||

svatuṅgaśṛṅgakṣatavakṣasaṃ taṃ nipātya daityaṃ nigamān gṛhītvā |

viriñcaye prītahṛde dadānaḥ prabhañjanāgārapate prapāyāḥ ||10||