Narayaniyam Dashaka 27 - Kshirabdhimathanam Tatha Kurmavataram

ॐ

ನಾರಾಯಣೀಯಂ ದಶಕ 27 - ಕ್ಷೀರಾಬ್ಧಿಮಥನಂ ತಥಾ ಕೂರ್ಮಾವತಾರಮ್

Vishnu Kannada

ದೂರ್ವಾಸಾಸ್ಸುರವನಿತಾಪ್ತದಿವ್ಯಮಾಲ್ಯಂ

ಶಕ್ರಾಯ ಸ್ವಯಮುಪದಾಯ ತತ್ರ ಭೂಯಃ ।

ನಾಗೇನ್ದ್ರಪ್ರತಿಮೃದಿತೇ ಶಶಾಪ ಶಕ್ರಂ

ಕಾ ಕ್ಷಾನ್ತಿಸ್ತ್ವದಿತರದೇವತಾಂಶಜಾನಾಮ್ ॥1॥

ಶಾಪೇನ ಪ್ರಥಿತಜರೇಽಥ ನಿರ್ಜರೇನ್ದ್ರೇ

ದೇವೇಷ್ವಪ್ಯಸುರಜಿತೇಷು ನಿಷ್ಪ್ರಭೇಷು ।

ಶರ್ವಾದ್ಯಾಃ ಕಮಲಜಮೇತ್ಯ ಸರ್ವದೇವಾ

ನಿರ್ವಾಣಪ್ರಭವ ಸಮಂ ಭವನ್ತಮಾಪುಃ ॥2॥

ಬ್ರಹ್ಮಾದ್ಯೈಃ ಸ್ತುತಮಹಿಮಾ ಚಿರಂ ತದಾನೀಂ

ಪ್ರಾದುಷ್ಷನ್ ವರದ ಪುರಃ ಪರೇಣ ಧಾಮ್ನಾ ।

ಹೇ ದೇವಾ ದಿತಿಜಕುಲೈರ್ವಿಧಾಯ ಸನ್ಧಿಂ

ಪೀಯೂಷಂ ಪರಿಮಥತೇತಿ ಪರ್ಯಶಾಸ್ತ್ವಮ್ ॥3॥

ಸನ್ಧಾನಂ ಕೃತವತಿ ದಾನವೈಃ ಸುರೌಘೇ

ಮನ್ಥಾನಂ ನಯತಿ ಮದೇನ ಮನ್ದರಾದ್ರಿಮ್ ।

ಭ್ರಷ್ಟೇಽಸ್ಮಿನ್ ಬದರಮಿವೋದ್ವಹನ್ ಖಗೇನ್ದ್ರೇ

ಸದ್ಯಸ್ತ್ವಂ ವಿನಿಹಿತವಾನ್ ಪಯಃಪಯೋಧೌ ॥4॥

ಆಧಾಯ ದ್ರುತಮಥ ವಾಸುಕಿಂ ವರತ್ರಾಂ

ಪಾಥೋಧೌ ವಿನಿಹಿತಸರ್ವಬೀಜಜಾಲೇ ।

ಪ್ರಾರಬ್ಧೇ ಮಥನವಿಧೌ ಸುರಾಸುರೈಸ್ತೈ-

ರ್ವ್ಯಾಜಾತ್ತ್ವಂ ಭುಜಗಮುಖೇಽಕರೋಸ್ಸುರಾರೀನ್ ॥5॥

ಕ್ಷುಬ್ಧಾದ್ರೌ ಕ್ಷುಭಿತಜಲೋದರೇ ತದಾನೀಂ

ದುಗ್ಧಾಬ್ಧೌ ಗುರುತರಭಾರತೋ ನಿಮಗ್ನೇ ।

ದೇವೇಷು ವ್ಯಥಿತತಮೇಷು ತತ್ಪ್ರಿಯೈಷೀ

ಪ್ರಾಣೈಷೀಃ ಕಮಠತನುಂ ಕಠೋರಪೃಷ್ಠಾಮ್ ॥6॥

ವಜ್ರಾತಿಸ್ಥಿರತರಕರ್ಪರೇಣ ವಿಷ್ಣೋ

ವಿಸ್ತಾರಾತ್ಪರಿಗತಲಕ್ಷಯೋಜನೇನ ।

ಅಮ್ಭೋಧೇಃ ಕುಹರಗತೇನ ವರ್ಷ್ಮಣಾ ತ್ವಂ

ನಿರ್ಮಗ್ನಂ ಕ್ಷಿತಿಧರನಾಥಮುನ್ನಿನೇಥ ॥7॥

ಉನ್ಮಗ್ನೇ ಝಟಿತಿ ತದಾ ಧರಾಧರೇನ್ದ್ರೇ

ನಿರ್ಮೇಥುರ್ದೃಢಮಿಹ ಸಮ್ಮದೇನ ಸರ್ವೇ ।

ಆವಿಶ್ಯ ದ್ವಿತಯಗಣೇಽಪಿ ಸರ್ಪರಾಜೇ

ವೈವಶ್ಯಂ ಪರಿಶಮಯನ್ನವೀವೃಧಸ್ತಾನ್ ॥8॥

ಉದ್ದಾಮಭ್ರಮಣಜವೋನ್ನಮದ್ಗಿರೀನ್ದ್ರ-

ನ್ಯಸ್ತೈಕಸ್ಥಿರತರಹಸ್ತಪಙ್ಕಜಂ ತ್ವಾಮ್ ।

ಅಭ್ರಾನ್ತೇ ವಿಧಿಗಿರಿಶಾದಯಃ ಪ್ರಮೋದಾ-

ದುದ್ಭ್ರಾನ್ತಾ ನುನುವುರುಪಾತ್ತಪುಷ್ಪವರ್ಷಾಃ ॥9॥

ದೈತ್ಯೌಘೇ ಭುಜಗಮುಖಾನಿಲೇನ ತಪ್ತೇ

ತೇನೈವ ತ್ರಿದಶಕುಲೇಽಪಿ ಕಿಞ್ಚಿದಾರ್ತೇ ।

ಕಾರುಣ್ಯಾತ್ತವ ಕಿಲ ದೇವ ವಾರಿವಾಹಾಃ

ಪ್ರಾವರ್ಷನ್ನಮರಗಣಾನ್ನ ದೈತ್ಯಸಙ್ಘಾನ್ ॥10॥

ಉದ್ಭ್ರಾಮ್ಯದ್ಬಹುತಿಮಿನಕ್ರಚಕ್ರವಾಲೇ

ತತ್ರಾಬ್ಧೌ ಚಿರಮಥಿತೇಽಪಿ ನಿರ್ವಿಕಾರೇ ।

ಏಕಸ್ತ್ವಂ ಕರಯುಗಕೃಷ್ಟಸರ್ಪರಾಜಃ

ಸಂರಾಜನ್ ಪವನಪುರೇಶ ಪಾಹಿ ರೋಗಾತ್ ॥11॥

Roman (IAST) Transliteration

dūrvāsāssuravanitāptadivyamālyaṃ

śakrāya svayamupadāya tatra bhūyaḥ |

nāgendrapratimṛdite śaśāpa śakraṃ

kā kṣāntistvaditaradevatāṃśajānām ||1||

śāpena prathitajare'tha nirjarendre

deveṣvapyasurajiteṣu niṣprabheṣu |

śarvādyāḥ kamalajametya sarvadevā

nirvāṇaprabhava samaṃ bhavantamāpuḥ ||2||

brahmādyaiḥ stutamahimā ciraṃ tadānīṃ

prāduṣṣan varada puraḥ pareṇa dhāmnā |

he devā ditijakulairvidhāya sandhiṃ

pīyūṣaṃ parimathateti paryaśāstvam ||3||

sandhānaṃ kṛtavati dānavaiḥ suraughe

manthānaṃ nayati madena mandarādrim |

bhraṣṭe'smin badaramivodvahan khagendre

sadyastvaṃ vinihitavān payaḥpayodhau ||4||

ādhāya drutamatha vāsukiṃ varatrāṃ

pāthodhau vinihitasarvabījajāle |

prārabdhe mathanavidhau surāsuraistai-

rvyājāttvaṃ bhujagamukhe'karossurārīn ||5||

kṣubdhādrau kṣubhitajalodare tadānīṃ

dugdhābdhau gurutarabhārato nimagne |

deveṣu vyathitatameṣu tatpriyaiṣī

prāṇaiṣīḥ kamaṭhatanuṃ kaṭhorapṛṣṭhām ||6||

vajrātisthiratarakarpareṇa viṣṇo

vistārātparigatalakṣayojanena |

ambhodheḥ kuharagatena varṣmaṇā tvaṃ

nirmagnaṃ kṣitidharanāthamunninetha ||7||

unmagne jhaṭiti tadā dharādharendre

nirmethurdṛḍhamiha sammadena sarve |

āviśya dvitayagaṇe'pi sarparāje

vaivaśyaṃ pariśamayannavīvṛdhastān ||8||

uddāmabhramaṇajavonnamadgirīndra-

nyastaikasthiratarahastapaṅkajaṃ tvām |

abhrānte vidhigiriśādayaḥ pramodā-

dudbhrāntā nunuvurupāttapuṣpavarṣāḥ ||9||

daityaughe bhujagamukhānilena tapte

tenaiva tridaśakule'pi kiñcidārte |

kāruṇyāttava kila deva vārivāhāḥ

prāvarṣannamaragaṇānna daityasaṅghān ||10||

udbhrāmyadbahutiminakracakravāle

tatrābdhau ciramathite'pi nirvikāre |

ekastvaṃ karayugakṛṣṭasarparājaḥ

saṃrājan pavanapureśa pāhi rogāt ||11||