Shri Narasimha Kavacham

ॐ

ಶ್ರೀ ನರಸಿಂಹ ಕವಚಮ್

Narasimha Kavacham Kannada

ನೃಸಿಂಹಕವಚಂ ವಕ್ಷ್ಯೇ ಪ್ರಹ್ಲಾದೇನೋದಿತಂ ಪುರಾ ।

ಸರ್ವರಕ್ಷಾಕರಂ ಪುಣ್ಯಂ ಸರ್ವೋಪದ್ರವನಾಶನಮ್ ॥ 1 ॥

ಸರ್ವಸಮ್ಪತ್ಕರಂ ಚೈವ ಸ್ವರ್ಗಮೋಕ್ಷಪ್ರದಾಯಕಮ್ ।

ಧ್ಯಾತ್ವಾ ನೃಸಿಂಹಂ ದೇವೇಶಂ ಹೇಮಸಿಂಹಾಸನಸ್ಥಿತಮ್ ॥ 2 ॥

ವಿವೃತಾಸ್ಯಂ ತ್ರಿನಯನಂ ಶರದಿನ್ದುಸಮಪ್ರಭಮ್ ।

ಲಕ್ಷ್ಮ್ಯಾಲಿಙ್ಗಿತವಾಮಾಙ್ಗಂ ವಿಭೂತಿಭಿರುಪಾಶ್ರಿತಮ್ ॥ 3 ॥

ಚತುರ್ಭುಜಂ ಕೋಮಲಾಙ್ಗಂ ಸ್ವರ್ಣಕುಣ್ಡಲಶೋಭಿತಮ್ ।

ಸರೋಜಶೋಭಿತೋರಸ್ಕಂ ರತ್ನಕೇಯೂರಮುದ್ರಿತಮ್ ॥ 4 ॥ [ರತ್ನಕೇಯೂರಶೋಭಿತಮ್]

ತಪ್ತಕಾಞ್ಚನಸಙ್ಕಾಶಂ ಪೀತನಿರ್ಮಲವಾಸನಮ್ ।

ಇನ್ದ್ರಾದಿಸುರಮೌಲಿಸ್ಥಸ್ಫುರನ್ಮಾಣಿಕ್ಯದೀಪ್ತಿಭಿಃ ॥ 5 ॥

ವಿರಾಜಿತಪದದ್ವನ್ದ್ವಂ ಶಙ್ಖಚಕ್ರಾದಿಹೇತಿಭಿಃ ।

ಗರುತ್ಮತಾ ಸವಿನಯಂ ಸ್ತೂಯಮಾನಂ ಮುದಾನ್ವಿತಮ್ ॥ 6 ॥

ಸ್ವಹೃತ್ಕಮಲಸಂವಾಸಂ ಕೃತ್ವಾ ತು ಕವಚಂ ಪಠೇತ್ ।

ನೃಸಿಂಹೋ ಮೇ ಶಿರಃ ಪಾತು ಲೋಕರಕ್ಷಾತ್ಮಸಮ್ಭವಃ ॥ 7 ॥

ಸರ್ವಗೋಽಪಿ ಸ್ತಮ್ಭವಾಸಃ ಫಾಲಂ ಮೇ ರಕ್ಷತು ಧ್ವನಿಮ್ ।

ನೃಸಿಂಹೋ ಮೇ ದೃಶೌ ಪಾತು ಸೋಮಸೂರ್ಯಾಗ್ನಿಲೋಚನಃ ॥ 8 ॥

ಸ್ಮೃತಿಂ ಮೇ ಪಾತು ನೃಹರಿರ್ಮುನಿವರ್ಯಸ್ತುತಿಪ್ರಿಯಃ ।

ನಾಸಾಂ ಮೇ ಸಿಂಹನಾಸಸ್ತು ಮುಖಂ ಲಕ್ಷ್ಮೀಮುಖಪ್ರಿಯಃ ॥ 9 ॥

ಸರ್ವವಿದ್ಯಾಧಿಪಃ ಪಾತು ನೃಸಿಂಹೋ ರಸನಾಂ ಮಮ ।

ವಕ್ತ್ರಂ ಪಾತ್ವಿನ್ದುವದನಃ ಸದಾ ಪ್ರಹ್ಲಾದವನ್ದಿತಃ ॥ 10 ॥

ನೃಸಿಂಹಃ ಪಾತು ಮೇ ಕಣ್ಠಂ ಸ್ಕನ್ಧೌ ಭೂಭರಣಾನ್ತಕೃತ್ ।

ದಿವ್ಯಾಸ್ತ್ರಶೋಭಿತಭುಜೋ ನೃಸಿಂಹಃ ಪಾತು ಮೇ ಭುಜೌ ॥ 11 ॥

ಕರೌ ಮೇ ದೇವವರದೋ ನೃಸಿಂಹಃ ಪಾತು ಸರ್ವತಃ ।

ಹೃದಯಂ ಯೋಗಿಸಾಧ್ಯಶ್ಚ ನಿವಾಸಂ ಪಾತು ಮೇ ಹರಿಃ ॥ 12 ॥

ಮಧ್ಯಂ ಪಾತು ಹಿರಣ್ಯಾಕ್ಷವಕ್ಷಃಕುಕ್ಷಿವಿದಾರಣಃ ।

ನಾಭಿಂ ಮೇ ಪಾತು ನೃಹರಿಃ ಸ್ವನಾಭಿ ಬ್ರಹ್ಮಸಂಸ್ತುತಃ ॥ 13 ॥

ಬ್ರಹ್ಮಾಣ್ಡಕೋಟಯಃ ಕಟ್ಯಾಂ ಯಸ್ಯಾಸೌ ಪಾತು ಮೇ ಕಟಿಮ್ ।

ಗುಹ್ಯಂ ಮೇ ಪಾತು ಗುಹ್ಯಾನಾಂ ಮನ್ತ್ರಾಣಾಂ ಗುಹ್ಯರೂಪಧೃಕ್ ॥ 14 ॥

ಊರೂ ಮನೋಭವಃ ಪಾತು ಜಾನುನೀ ನರರೂಪಧೃಕ್ ।

ಜಙ್ಘೇ ಪಾತು ಧರಾಭಾರಹರ್ತಾ ಯೋಽಸೌ ನೃಕೇಸರೀ ॥ 15 ॥

ಸುರರಾಜ್ಯಪ್ರದಃ ಪಾತು ಪಾದೌ ಮೇ ನೃಹರೀಶ್ವರಃ ।

ಸಹಸ್ರಶೀರ್ಷಾ ಪುರುಷಃ ಪಾತು ಮೇ ಸರ್ವಶಸ್ತನುಮ್ ॥ 16 ॥

ಮಹೋಗ್ರಃ ಪೂರ್ವತಃ ಪಾತು ಮಹಾವೀರಾಗ್ರಜೋಽಗ್ನಿತಃ ।

ಮಹಾವಿಷ್ಣುರ್ದಕ್ಷಿಣೇ ತು ಮಹಾಜ್ವಾಲಸ್ತು ನೈರೃತೌ ॥ 17 ॥

ಪಶ್ಚಿಮೇ ಪಾತು ಸರ್ವೇಶೋ ದಿಶಿ ಮೇ ಸರ್ವತೋಮುಖಃ ।

ನೃಸಿಂಹಃ ಪಾತು ವಾಯವ್ಯಾಂ ಸೌಮ್ಯಾಂ ಭೂಷಣವಿಗ್ರಹಃ ॥ 18 ॥

ಈಶಾನ್ಯಾಂ ಪಾತು ಭದ್ರೋ ಮೇ ಸರ್ವಮಙ್ಗಲದಾಯಕಃ ।

ಸಂಸಾರಭಯದಃ ಪಾತು ಮೃತ್ಯೋರ್ಮೃತ್ಯುರ್ನೃಕೇಸರೀ ॥ 19 ॥

ಇದಂ ನೃಸಿಂಹಕವಚಂ ಪ್ರಹ್ಲಾದಮುಖಮಣ್ಡಿತಮ್ ।

ಭಕ್ತಿಮಾನ್ಯಃ ಪಠೇನ್ನಿತ್ಯಂ ಸರ್ವಪಾಪೈಃ ಪ್ರಮುಚ್ಯತೇ ॥ 20 ॥

ಪುತ್ರವಾನ್ ಧನವಾನ್ ಲೋಕೇ ದೀರ್ಘಾಯುರುಪಜಾಯತೇ ।

ಯಂ ಯಂ ಕಾಮಯತೇ ಕಾಮಂ ತಂ ತಂ ಪ್ರಾಪ್ನೋತ್ಯಸಂಶಯಮ್ ॥ 21 ॥

ಸರ್ವತ್ರ ಜಯಮಾಪ್ನೋತಿ ಸರ್ವತ್ರ ವಿಜಯೀ ಭವೇತ್ ।

ಭೂಮ್ಯನ್ತರಿಕ್ಷದಿವ್ಯಾನಾಂ ಗ್ರಹಾಣಾಂ ವಿನಿವಾರಣಮ್ ॥ 22 ॥

ವೃಶ್ಚಿಕೋರಗಸಮ್ಭೂತವಿಷಾಪಹರಣಂ ಪರಮ್ ।

ಬ್ರಹ್ಮರಾಕ್ಷಸಯಕ್ಷಾಣಾಂ ದೂರೋತ್ಸಾರಣಕಾರಣಮ್ ॥ 23 ॥

ಭೂರ್ಜೇ ವಾ ತಾಲಪತ್ರೇ ವಾ ಕವಚಂ ಲಿಖಿತಂ ಶುಭಮ್ ।

ಕರಮೂಲೇ ಧೃತಂ ಯೇನ ಸಿಧ್ಯೇಯುಃ ಕರ್ಮಸಿದ್ಧಯಃ ॥ 24 ॥

ದೇವಾಸುರಮನುಷ್ಯೇಷು ಸ್ವಂ ಸ್ವಮೇವ ಜಯಂ ಲಭೇತ್ ।

ಏಕಸನ್ಧ್ಯಂ ತ್ರಿಸನ್ಧ್ಯಂ ವಾ ಯಃ ಪಠೇನ್ನಿಯತೋ ನರಃ ॥ 25 ॥

ಸರ್ವಮಙ್ಗಲಮಾಙ್ಗಲ್ಯಂ ಭುಕ್ತಿಂ ಮುಕ್ತಿಂ ಚ ವಿನ್ದತಿ ।

ದ್ವಾತ್ರಿಂಶತಿಸಹಸ್ರಾಣಿ ಪಠೇಚ್ಛುದ್ಧಾತ್ಮನಾಂ ನೃಣಾಮ್ ॥ 26 ॥

ಕವಚಸ್ಯಾಸ್ಯ ಮನ್ತ್ರಸ್ಯ ಮನ್ತ್ರಸಿದ್ಧಿಃ ಪ್ರಜಾಯತೇ ।

ಅನೇನ ಮನ್ತ್ರರಾಜೇನ ಕೃತ್ವಾ ಭಸ್ಮಾಭಿಮನ್ತ್ರಣಮ್ ॥ 27 ॥

ತಿಲಕಂ ವಿನ್ಯಸೇದ್ಯಸ್ತು ತಸ್ಯ ಗ್ರಹಭಯಂ ಹರೇತ್ ।

ತ್ರಿವಾರಂ ಜಪಮಾನಸ್ತು ದತ್ತಂ ವಾರ್ಯಭಿಮನ್ತ್ರ್ಯ ಚ ॥ 28 ॥

ಪ್ರಾಶಯೇದ್ಯೋ ನರೋ ಮನ್ತ್ರಂ ನೃಸಿಂಹಧ್ಯಾನಮಾಚರೇತ್ ।

ತಸ್ಯ ರೋಗಾಃ ಪ್ರಣಶ್ಯನ್ತಿ ಯೇ ಚ ಸ್ಯುಃ ಕುಕ್ಷಿಸಮ್ಭವಾಃ ॥ 29 ॥

ಕಿಮತ್ರ ಬಹುನೋಕ್ತೇನ ನೃಸಿಂಹಸದೃಶೋ ಭವೇತ್ ।

ಮನಸಾ ಚಿನ್ತಿತಂ ಯತ್ತು ಸ ತಚ್ಚಾಪ್ನೋತ್ಯಸಂಶಯಮ್ ॥ 30 ॥

ಗರ್ಜನ್ತಂ ಗರ್ಜಯನ್ತಂ ನಿಜಭುಜಪಟಲಂ ಸ್ಫೋಟಯನ್ತಂ ಹಠನ್ತಂ

ರೂಪ್ಯನ್ತಂ ತಾಪಯನ್ತಂ ದಿವಿ ಭುವಿ ದಿತಿಜಂ ಕ್ಷೇಪಯನ್ತಂ ಕ್ಷಿಪನ್ತಮ್ ।

ಕ್ರನ್ದನ್ತಂ ರೋಷಯನ್ತಂ ದಿಶಿ ದಿಶಿ ಸತತಂ ಸಂಹರನ್ತಂ ಭರನ್ತಂ

ವೀಕ್ಷನ್ತಂ ಘೂರ್ಣಯನ್ತಂ ಶರನಿಕರಶತೈರ್ದಿವ್ಯಸಿಂಹಂ ನಮಾಮಿ ॥

ಇತಿ ಶ್ರೀಬ್ರಹ್ಮಾಣ್ಡಪುರಾಣೇ ಪ್ರಹ್ಲಾದೋಕ್ತಂ ಶ್ರೀ ನೃಸಿಂಹ ಕವಚಮ್ ।

Roman (IAST) Transliteration

nṛsiṃhakavacaṃ vakṣye prahlādenoditaṃ purā |

sarvarakṣākaraṃ puṇyaṃ sarvopadravanāśanam || 1 ||

sarvasampatkaraṃ caiva svargamokṣapradāyakam |

dhyātvā nṛsiṃhaṃ deveśaṃ hemasiṃhāsanasthitam || 2 ||

vivṛtāsyaṃ trinayanaṃ śaradindusamaprabham |

lakṣmyāliṅgitavāmāṅgaṃ vibhūtibhirupāśritam || 3 ||

caturbhujaṃ komalāṅgaṃ svarṇakuṇḍalaśobhitam |

sarojaśobhitoraskaṃ ratnakeyūramudritam || 4 || [ratnakeyūraśobhitam]

taptakāñcanasaṅkāśaṃ pītanirmalavāsanam |

indrādisuramaulisthasphuranmāṇikyadīptibhiḥ || 5 ||

virājitapadadvandvaṃ śaṅkhacakrādihetibhiḥ |

garutmatā savinayaṃ stūyamānaṃ mudānvitam || 6 ||

svahṛtkamalasaṃvāsaṃ kṛtvā tu kavacaṃ paṭhet |

nṛsiṃho me śiraḥ pātu lokarakṣātmasambhavaḥ || 7 ||

sarvago'pi stambhavāsaḥ phālaṃ me rakṣatu dhvanim |

nṛsiṃho me dṛśau pātu somasūryāgnilocanaḥ || 8 ||

smṛtiṃ me pātu nṛharirmunivaryastutipriyaḥ |

nāsāṃ me siṃhanāsastu mukhaṃ lakṣmīmukhapriyaḥ || 9 ||

sarvavidyādhipaḥ pātu nṛsiṃho rasanāṃ mama |

vaktraṃ pātvinduvadanaḥ sadā prahlādavanditaḥ || 10 ||

nṛsiṃhaḥ pātu me kaṇṭhaṃ skandhau bhūbharaṇāntakṛt |

divyāstraśobhitabhujo nṛsiṃhaḥ pātu me bhujau || 11 ||

karau me devavarado nṛsiṃhaḥ pātu sarvataḥ |

hṛdayaṃ yogisādhyaśca nivāsaṃ pātu me hariḥ || 12 ||

madhyaṃ pātu hiraṇyākṣavakṣaḥkukṣividāraṇaḥ |

nābhiṃ me pātu nṛhariḥ svanābhi brahmasaṃstutaḥ || 13 ||

brahmāṇḍakoṭayaḥ kaṭyāṃ yasyāsau pātu me kaṭim |

guhyaṃ me pātu guhyānāṃ mantrāṇāṃ guhyarūpadhṛk || 14 ||

ūrū manobhavaḥ pātu jānunī nararūpadhṛk |

jaṅghe pātu dharābhārahartā yo'sau nṛkesarī || 15 ||

surarājyapradaḥ pātu pādau me nṛharīśvaraḥ |

sahasraśīrṣā puruṣaḥ pātu me sarvaśastanum || 16 ||

mahograḥ pūrvataḥ pātu mahāvīrāgrajo'gnitaḥ |

mahāviṣṇurdakṣiṇe tu mahājvālastu nairṛtau || 17 ||

paścime pātu sarveśo diśi me sarvatomukhaḥ |

nṛsiṃhaḥ pātu vāyavyāṃ saumyāṃ bhūṣaṇavigrahaḥ || 18 ||

īśānyāṃ pātu bhadro me sarvamaṅgaladāyakaḥ |

saṃsārabhayadaḥ pātu mṛtyormṛtyurnṛkesarī || 19 ||

idaṃ nṛsiṃhakavacaṃ prahlādamukhamaṇḍitam |

bhaktimānyaḥ paṭhennityaṃ sarvapāpaiḥ pramucyate || 20 ||

putravān dhanavān loke dīrghāyurupajāyate |

yaṃ yaṃ kāmayate kāmaṃ taṃ taṃ prāpnotyasaṃśayam || 21 ||

sarvatra jayamāpnoti sarvatra vijayī bhavet |

bhūmyantarikṣadivyānāṃ grahāṇāṃ vinivāraṇam || 22 ||

vṛścikoragasambhūtaviṣāpaharaṇaṃ param |

brahmarākṣasayakṣāṇāṃ dūrotsāraṇakāraṇam || 23 ||

bhūrje vā tālapatre vā kavacaṃ likhitaṃ śubham |

karamūle dhṛtaṃ yena sidhyeyuḥ karmasiddhayaḥ || 24 ||

devāsuramanuṣyeṣu svaṃ svameva jayaṃ labhet |

ekasandhyaṃ trisandhyaṃ vā yaḥ paṭhenniyato naraḥ || 25 ||

sarvamaṅgalamāṅgalyaṃ bhuktiṃ muktiṃ ca vindati |

dvātriṃśatisahasrāṇi paṭhecchuddhātmanāṃ nṛṇām || 26 ||

kavacasyāsya mantrasya mantrasiddhiḥ prajāyate |

anena mantrarājena kṛtvā bhasmābhimantraṇam || 27 ||

tilakaṃ vinyasedyastu tasya grahabhayaṃ haret |

trivāraṃ japamānastu dattaṃ vāryabhimantrya ca || 28 ||

prāśayedyo naro mantraṃ nṛsiṃhadhyānamācaret |

tasya rogāḥ praṇaśyanti ye ca syuḥ kukṣisambhavāḥ || 29 ||

kimatra bahunoktena nṛsiṃhasadṛśo bhavet |

manasā cintitaṃ yattu sa taccāpnotyasaṃśayam || 30 ||

garjantaṃ garjayantaṃ nijabhujapaṭalaṃ sphoṭayantaṃ haṭhantaṃ

rūpyantaṃ tāpayantaṃ divi bhuvi ditijaṃ kṣepayantaṃ kṣipantam |

krandantaṃ roṣayantaṃ diśi diśi satataṃ saṃharantaṃ bharantaṃ

vīkṣantaṃ ghūrṇayantaṃ śaranikaraśatairdivyasiṃhaṃ namāmi ||

iti śrībrahmāṇḍapurāṇe prahlādoktaṃ śrī nṛsiṃha kavacam |