Laghu Stavah — InfoLyter.in

ॐ

ಲಘು ಸ್ತವಃ

Laghu Stavah

Kannada

ಐನ್ದ್ರಸ್ಯೇವ ಶರಾಸನಸ್ಯ ದಧತೀ ಮಧ್ಯೇಲಲಾಟಂ ಪ್ರಭಾಂ

ಶೌಕ್ಲೀಂ ಕಾನ್ತಿಮನುಷ್ಣಗೋರಿವ ಶಿರಸ್ಯಾತನ್ವತೀ ಸರ್ವತಃ ।

ಏಷಾಸೌ ತ್ರಿಪುರಾ ಹೃದಿ ದ್ಯುತಿರಿವೋಷ್ಣಾಂಶೋಃ ಸದಾಹಃ ಸ್ಥಿತಾತ್

ಛಿನ್ದ್ಯಾನ್ನಃ ಸಹಸಾ ಪದೈಸ್ತ್ರಿಭಿರಘಂ ಜ್ಯೋತಿರ್ಮಯೀ ವಾಙ್ಮಯೀ ॥ 1 ॥

ಯಾ ಮಾತ್ರಾ ತ್ರಪುಸೀಲತಾತನುಲಸತ್ತನ್ತೂತ್ಥಿತಿಸ್ಪರ್ಧಿನೀ

ವಾಗ್ಬೀಜೇ ಪ್ರಥಮೇ ಸ್ಥಿತಾ ತವ ಸದಾ ತಾಂ ಮನ್ಮಹೇ ತೇ ವಯಮ್ ।

ಶಕ್ತಿಃ ಕುಣ್ಡಲಿನೀತಿ ವಿಶ್ವಜನನವ್ಯಾಪಾರಬದ್ಧೋದ್ಯಮಾಃ

ಜ್ಞಾತ್ವೇತ್ಥಂ ನ ಪುನಃ ಸ್ಪೃಶನ್ತಿ ಜನನೀಗರ್ಭೇಽರ್ಭಕತ್ವಂ ನರಾಃ ॥ 2 ॥

ದೃಷ್ಟ್ವಾ ಸಮ್ಭ್ರಮಕಾರಿ ವಸ್ತು ಸಹಸಾ ಐ ಐ ಇತಿ ವ್ಯಾಹೃತಂ

ಯೇನಾಕೂತವಶಾದಪೀಹ ವರದೇ ಬಿನ್ದುಂ ವಿನಾಪ್ಯಕ್ಷರಮ್ ।

ತಸ್ಯಾಪಿ ಧ್ರುವಮೇವ ದೇವಿ ತರಸಾ ಜಾತೇ ತವಾನುಗ್ರಹೇ

ವಾಚಃಸೂಕ್ತಿಸುಧಾರಸದ್ರವಮುಚೋ ನಿರ್ಯಾನ್ತಿ ವಕ್ತ್ರಾಮ್ಬುಜಾತ್ ॥ 3 ॥

ಯನ್ನಿತ್ಯೇ ತವ ಕಾಮರಾಜಮಪರಂ ಮನ್ತ್ರಾಕ್ಷರಂ ನಿಷ್ಕಲಂ

ತತ್ಸಾರಸ್ವತಮಿತ್ಯವೈತಿ ವಿರಲಃ ಕಶ್ಚಿದ್ಬುಧಶ್ಚೇದ್ಭುವಿ ।

ಆಖ್ಯಾನಂ ಪ್ರತಿಪರ್ವ ಸತ್ಯತಪಸೋ ಯತ್ಕೀರ್ತಯನ್ತೋ ದ್ವಿಜಾಃ

ಪ್ರಾರಮ್ಭೇ ಪ್ರಣವಾಸ್ಪದಪ್ರಣಯಿತಾಂ ನೀತ್ವೋಚ್ಚರನ್ತಿ ಸ್ಫುಟಮ್ ॥ 4 ॥

ಯತ್ಸದ್ಯೋ ವಚಸಾಂ ಪ್ರವೃತ್ತಿಕರಣೇ ದೃಷ್ಟಪ್ರಭಾವಂ ಬುಧೈಃ

ತಾರ್ತೀಯಂ ತದಹಂ ನಮಾಮಿ ಮನಸಾ ತ್ವದ್ಬೀಜಮಿನ್ದುಪ್ರಭಮ್ ।

ಅಸ್ತ್ಯೌರ್ವೋಽಪಿ ಸರಸ್ವತೀಮನುಗತೋ ಜಾಡ್ಯಾಮ್ಬುವಿಚ್ಛಿತ್ತಯೇ

ಗೋಶಬ್ದೋ ಗಿರಿ ವರ್ತತೇ ಸನಿಯತಂ ಯೋಗಂ ವಿನಾ ಸಿದ್ಧಿದಃ ॥ 5 ॥

ಏಕೈಕಂ ತವ ದೇವಿ ಬೀಜಮನಘಂ ಸವ್ಯಞ್ಜನಾವ್ಯಞ್ಜನಂ

ಕೂಟಸ್ಥಂ ಯದಿ ವಾ ಪೃಥಕ್ ಕ್ರಮಗತಂ ಯದ್ವಾ ಸ್ಥಿತಂ ವ್ಯುತ್ಕ್ರಮಾತ್ ।

ಯಂ ಯಂ ಕಾಮಮಪೇಕ್ಷ್ಯ ಯೇನ ವಿಧಿನಾ ಕೇನಾಪಿ ವಾ ಚಿನ್ತಿತಂ

ಜಪ್ತಂ ವಾ ಸಫಲೀಕರೋತಿ ಸತತಂ ತಂ ತಂ ಸಮಸ್ತಂ ನೃಣಾಮ್ ॥ 6 ॥

ವಾಮೇ ಪುಸ್ತಕಧಾರಿಣೀಮಭಯದಾಂ ಸಾಕ್ಷಸ್ರಜಂ ದಕ್ಷಿಣೇ

ಭಕ್ತೇಭ್ಯೋ ವರದಾನಪೇಶಲಕರಾಂ ಕರ್ಪೂರಕುನ್ದೋಜ್ಜ್ವಲಾಮ್ ।

ಉಜ್ಜೃಮ್ಭಾಮ್ಬುಜಪತ್ರಕಾನ್ತಿನಯನಸ್ನಿಗ್ಧಪ್ರಭಾಲೋಕಿನೀಂ

ಯೇ ತ್ವಾಮಮ್ಬ ನ ಶೀಲಯನ್ತಿ ಮನಸಾ ತೇಷಾಂ ಕವಿತ್ವಂ ಕುತಃ ॥ 7 ॥

ಯೇ ತ್ವಾಂ ಪಾಣ್ಡುರಪುಣ್ಡರೀಕಪಟಲಸ್ಪಷ್ಟಾಭಿರಾಮಪ್ರಭಾಂ

ಸಿಞ್ಚನ್ತೀಮಮೃತದ್ರವೈರಿವ ಶಿರೋ ಧ್ಯಾಯನ್ತಿ ಮೂರ್ಧ್ನಿ ಸ್ಥಿತಾಮ್ ।

ಅಶ್ರಾನ್ತಾ ವಿಕಟಸ್ಫುಟಾಕ್ಷರಪದಾ ನಿರ್ಯಾತಿ ವಕ್ತ್ರಾಮ್ಬುಜಾತ್

ತೇಷಾಂ ಭಾರತಿ ಭಾರತೀ ಸುರಸರಿತ್ಕಲ್ಲೋಲಲೋಲೋರ್ಮಿವತ್ ॥ 8 ॥

ಯೇ ಸಿನ್ದೂರಪರಾಗಪಿಞ್ಜಪಿಹಿತಾಂ ತ್ವತ್ತೇಜಸಾದ್ಯಾಮಿಮಾಂ

ಉರ್ವೀಂ ಚಾಪಿ ವಿಲೀನಯಾವಕರಸಪ್ರಸ್ತಾರಮಗ್ನಾಮಿವ ।

ಪಶ್ಯನ್ತಿ ಕ್ಷಣಮಪ್ಯನನ್ಯಮನಸಸ್ತೇಷಾಮನಙ್ಗಜ್ವರ-

-ಕ್ಲಾನ್ತಸ್ರಸ್ತಕುರಙ್ಗಶಾಬಕದೃಶೋ ವಶ್ಯಾ ಭವನ್ತಿ ಸ್ಫುಟಮ್ ॥ 9 ॥

ಚಞ್ಚತ್ಕಾಞ್ಚನಕುಣ್ಡಲಾಙ್ಗದಧರಾಮಾಬದ್ಧಕಾಞ್ಚೀಸ್ರಜಂ

ಯೇ ತ್ವಾಂ ಚೇತಸಿ ತದ್ಗತೇ ಕ್ಷಣಮಪಿ ಧ್ಯಾಯನ್ತಿ ಕೃತ್ವಾ ಸ್ಥಿರಾಮ್ ।

ತೇಷಾಂ ವೇಶ್ಮಸು ವಿಭ್ರಮಾದಹರಹಃ ಸ್ಫಾರೀಭವನ್ತ್ಯಶ್ಚಿರಂ

ಮಾದ್ಯತ್ಕುಞ್ಜರಕರ್ಣತಾಲತರಲಾಃ ಸ್ಥೈರ್ಯಂ ಭಜನ್ತೇ ಶ್ರಿಯಃ ॥ 10 ॥

ಆರ್ಭಟ್ಯಾ ಶಶಿಖಣ್ಡಮಣ್ಡಿತಜಟಾಜೂಟಾಂ ನೃಮುಣ್ಡಸ್ರಜಂ

ಬನ್ಧೂಕಪ್ರಸವಾರುಣಾಮ್ಬರಧರಾಂ ಪ್ರೇತಾಸನಾಧ್ಯಾಸಿನೀಮ್ ।

ತ್ವಾಂ ಧ್ಯಾಯನ್ತಿ ಚತುರ್ಭುಜಾಂ ತ್ರಿನಯನಾಮಾಪೀನತುಙ್ಗಸ್ತನೀಂ

ಮಧ್ಯೇ ನಿಮ್ನವಲಿತ್ರಯಾಙ್ಕಿತತನುಂ ತ್ವದ್ರೂಪಸಂವಿತ್ತಯೇ ॥ 11 ॥

ಜಾತೋಽಪ್ಯಲ್ಪಪರಿಚ್ಛದೇ ಕ್ಷಿತಿಭುಜಾಂ ಸಾಮಾನ್ಯಮಾತ್ರೇ ಕುಲೇ

ನಿಃಶೇಷಾವನಿಚಕ್ರವರ್ತಿಪದವೀಂ ಲಬ್ಧ್ವಾ ಪ್ರತಾಪೋನ್ನತಃ ।

ಯದ್ವಿದ್ಯಾಧರ ಬೃನ್ದವನ್ದಿತಪದಃ ಶ್ರೀವತ್ಸರಾಜೋಽಭವತ್

ದೇವಿ ತ್ವಚ್ಚರಣಾಮ್ಬುಜ ಪ್ರಣತಿಜಃ ಸೋಽಯಂ ಪ್ರಸಾದೋದಯಃ ॥ 12 ॥

ಚಣ್ಡಿ ತ್ವಚ್ಚರಣಾಮ್ಬುಜಾರ್ಚನಕೃತೇ ಬಿಲ್ವಾದಿಲೋಲ್ಲುಣ್ಠನ-

-ತ್ರುಟ್ಯತ್ಕಣ್ಟಕಕೋಟಿಭಿಃ ಪರಿಚಯಂ ಯೇಷಾಂ ನ ಜಗ್ಮುಃ ಕರಾಃ ।

ತೇ ದಣ್ಡಾಙ್ಕುಶಚಕ್ರಚಾಪಕುಲಿಶಶ್ರೀವತ್ಸಮತ್ಸ್ಯಾಙ್ಕಿತೈಃ

ಜಾಯನ್ತೇ ಪೃಥಿವೀಭುಜಃ ಕಥಮಿವಾಮ್ಭೋಜಪ್ರಭೈಃ ಪಾಣಿಭಿಃ ॥ 13 ॥

ವಿಪ್ರಾಃ ಕ್ಷೋಣಿಭುಜೋ ವಿಶಸ್ತದಿತರೇ ಕ್ಷೀರಾಜ್ಯಮಧ್ವಾಸವೈಃ ।

ತ್ವಾಂ ದೇವಿ ತ್ರಿಪುರೇ ಪರಾಪರಮಯೀಂ ಸನ್ತರ್ಪ್ಯ ಪೂಜಾವಿಧೌ ।

ಯಾಂ ಯಾಂ ಪ್ರಾರ್ಥಯತೇ ಮನಃ ಸ್ಥಿರಧಿಯಾಂ ತೇಷಾಂ ತ ಏವ ಧ್ರುವಂ

ತಾಂ ತಾಂ ಸಿದ್ಧಿಮವಾಪ್ನುವನ್ತಿ ತರಸಾ ವಿಘ್ನೈರವಿಘ್ನೀಕೃತಾಃ ॥ 14 ॥

ಶಬ್ದಾನಾಂ ಜನನೀ ತ್ವಮತ್ರ ಭುವನೇ ವಾಗ್ವಾದಿನೀತ್ಯುಚ್ಯಸೇ

ತ್ವತ್ತಃ ಕೇಶವವಾಸವ ಪ್ರಭೃತಯೋಽಪ್ಯಾವಿರ್ಭವನ್ತಿ ಸ್ಫುಟಮ್ ।

ಲೀಯನ್ತೇ ಖಲು ಯತ್ರ ಕಲ್ಪವಿರಮೇ ಬ್ರಹ್ಮಾದಯಸ್ತೇಽಪ್ಯಮೀ

ಸಾ ತ್ವಂ ಕಾಚಿದಚಿನ್ತ್ಯರೂಪಮಹಿಮಾ ಶಕ್ತಿಃ ಪರಾ ಗೀಯಸೇ ॥ 15 ॥

ದೇವಾನಾಂ ತ್ರಿತಯಂ ತ್ರಯೀ ಹುತಭುಜಾಂ ಶಕ್ತಿತ್ರಯಂ ತ್ರಿಃ ಸ್ವರಾಃ

ತ್ರೈಲೋಕ್ಯಂ ತ್ರಿಪದೀ ತ್ರಿಪುಷ್ಕರಮಥೋ ತ್ರಿಬ್ರಹ್ಮ ವರ್ಣಾಸ್ತ್ರಯಃ ।

ಯತ್ಕಿಞ್ಚಿಜ್ಜಗತಿ ತ್ರಿಧಾ ನಿಯಮಿತಂ ವಸ್ತು ತ್ರಿವರ್ಗಾದಿಕಂ

ತತ್ಸರ್ವಂ ತ್ರಿಪುರೇತಿ ನಾಮ ಭಗವತ್ಯನ್ವೇತಿ ತೇ ತತ್ತ್ವತಃ ॥ 16 ॥

ಲಕ್ಷ್ಮೀಂ ರಾಜಕುಲೇ ಜಯಾಂ ರಣಭುವಿ ಕ್ಷೇಮಙ್ಕರೀಮಧ್ವನಿ

ಕ್ರವ್ಯಾದದ್ವಿಪಸರ್ಪಭಾಜಿ ಶಬರೀಂ ಕಾನ್ತಾರದುರ್ಗೇ ಗಿರೌ ।

ಭೂತಪ್ರೇತಪಿಶಾಚಜಮ್ಬುಕಭಯೇ ಸ್ಮೃತ್ವಾ ಮಹಾಭೈರವೀಂ

ವ್ಯಾಮೋಹೇ ತ್ರಿಪುರಾಂ ತರನ್ತಿ ವಿಪದಸ್ತಾರಾಂ ಚ ತೋಯಪ್ಲವೇ ॥ 17 ॥

ಮಾಯಾ ಕುಣ್ಡಲಿನೀ ಕ್ರಿಯಾ ಮಧುಮತೀ ಕಾಲೀ ಕಲಾಮಾಲಿನೀ

ಮಾತಙ್ಗೀ ವಿಜಯಾ ಜಯಾ ಭಗವತೀ ದೇವೀ ಶಿವಾ ಶಾಮ್ಭವೀ ।

ಶಕ್ತಿಃ ಶಙ್ಕರವಲ್ಲಭಾ ತ್ರಿನಯನಾ ವಾಗ್ವಾದಿನೀ ಭೈರವೀ

ಹ್ರೀಙ್ಕಾರೀ ತ್ರಿಪುರಾ ಪರಾಪರಮಯೀ ಮಾತಾ ಕುಮಾರೀತ್ಯಸಿ ॥ 18 ॥

ಆಈಪಲ್ಲವಿತೈಃ ಪರಸ್ಪರಯುತೈರ್ದ್ವಿತ್ರಿಕ್ರಮಾದ್ಯಕ್ಷರೈ

ಕಾದ್ಯೈಃ ಕ್ಷಾನ್ತಗತೈಃ ಸ್ವರಾದಿಭಿರಥ ಕ್ಷಾನ್ತೈಶ್ಚ ತೈಃ ಸಸ್ವರೈಃ ।

ನಾಮಾನಿ ತ್ರಿಪುರೇ ಭವನ್ತಿ ಖಲು ಯಾನ್ಯತ್ಯನ್ತಗುಹ್ಯಾನಿ ತೇ

ತೇಭ್ಯೋ ಭೈರವಪತ್ನಿ ವಿಂಶತಿಸಹಸ್ರೇಭ್ಯಃ ಪರೇಭ್ಯೋ ನಮಃ ॥ 19 ॥

ಬೋದ್ಧವ್ಯಾ ನಿಪುಣಂ ಬುಧೈಃ ಸ್ತುತಿರಿಯಂ ಕೃತ್ವಾ ಮನಸ್ತದ್ಗತಂ

ಭಾರತ್ಯಾಸ್ತ್ರಿಪುರೇತ್ಯನನ್ಯಮನಸಾ ಯತ್ರಾದ್ಯವೃತ್ತೇ ಸ್ಫುಟಮ್ ।

ಏಕದ್ವಿತ್ರಿಪದಕ್ರಮೇಣ ಕಥಿತಸ್ತತ್ಪಾದಸಙ್ಖ್ಯಾಕ್ಷರೈಃ

ಮನ್ತ್ರೋದ್ಧಾರ ವಿಧಿರ್ವಿಶೇಷಸಹಿತಃ ಸತ್ಸಮ್ಪ್ರದಾಯಾನ್ವಿತಃ ॥ 20 ॥

ಸಾವದ್ಯಂ ನಿರವದ್ಯಮಸ್ತು ಯದಿ ವಾ ಕಿಂ ವಾನಯಾ ಚಿನ್ತಯಾ

ನೂನಂ ಸ್ತೋತ್ರಮಿದಂ ಪಠಿಷ್ಯತಿ ಜನೋ ಯಸ್ಯಾಸ್ತಿ ಭಕ್ತಿಸ್ತ್ವಯಿ ।

ಸಞ್ಚಿನ್ತ್ಯಾಪಿ ಲಘುತ್ವಮಾತ್ಮನಿ ದೃಢಂ ಸಞ್ಜಾಯಮಾನಂ ಹಠಾತ್

ತ್ವದ್ಭಕ್ತ್ಯಾ ಮುಖರೀಕೃತೇನ ರಚಿತಂ ಯಸ್ಮಾನ್ಮಯಾಪಿ ಧೃವಮ್ ॥ 21 ॥

ಇತಿ ಶ್ರೀಕಾಲಿದಾಸ ವಿರಚಿತ ಪಞ್ಚಸ್ತವ್ಯಾಂ ಪ್ರಥಮಃ ಲಘುಸ್ತವಃ ।

Roman (IAST) Transliteration

aindrasyeva śarāsanasya dadhatī madhyelalāṭaṃ prabhāṃ

śauklīṃ kāntimanuṣṇagoriva śirasyātanvatī sarvataḥ |

eṣāsau tripurā hṛdi dyutirivoṣṇāṃśoḥ sadāhaḥ sthitāt

chindyānnaḥ sahasā padaistribhiraghaṃ jyotirmayī vāṅmayī || 1 ||

yā mātrā trapusīlatātanulasattantūtthitispardhinī

vāgbīje prathame sthitā tava sadā tāṃ manmahe te vayam |

śaktiḥ kuṇḍalinīti viśvajananavyāpārabaddhodyamāḥ

jñātvetthaṃ na punaḥ spṛśanti jananīgarbhe'rbhakatvaṃ narāḥ || 2 ||

dṛṣṭvā sambhramakāri vastu sahasā ai ai iti vyāhṛtaṃ

yenākūtavaśādapīha varade binduṃ vināpyakṣaram |

tasyāpi dhruvameva devi tarasā jāte tavānugrahe

vācaḥsūktisudhārasadravamuco niryānti vaktrāmbujāt || 3 ||

yannitye tava kāmarājamaparaṃ mantrākṣaraṃ niṣkalaṃ

tatsārasvatamityavaiti viralaḥ kaścidbudhaścedbhuvi |

ākhyānaṃ pratiparva satyatapaso yatkīrtayanto dvijāḥ

prārambhe praṇavāspadapraṇayitāṃ nītvoccaranti sphuṭam || 4 ||

yatsadyo vacasāṃ pravṛttikaraṇe dṛṣṭaprabhāvaṃ budhaiḥ

tārtīyaṃ tadahaṃ namāmi manasā tvadbījaminduprabham |

astyaurvo'pi sarasvatīmanugato jāḍyāmbuvicchittaye

gośabdo giri vartate saniyataṃ yogaṃ vinā siddhidaḥ || 5 ||

ekaikaṃ tava devi bījamanaghaṃ savyañjanāvyañjanaṃ

kūṭasthaṃ yadi vā pṛthak kramagataṃ yadvā sthitaṃ vyutkramāt |

yaṃ yaṃ kāmamapekṣya yena vidhinā kenāpi vā cintitaṃ

japtaṃ vā saphalīkaroti satataṃ taṃ taṃ samastaṃ nṛṇām || 6 ||

vāme pustakadhāriṇīmabhayadāṃ sākṣasrajaṃ dakṣiṇe

bhaktebhyo varadānapeśalakarāṃ karpūrakundojjvalām |

ujjṛmbhāmbujapatrakāntinayanasnigdhaprabhālokinīṃ

ye tvāmamba na śīlayanti manasā teṣāṃ kavitvaṃ kutaḥ || 7 ||

ye tvāṃ pāṇḍurapuṇḍarīkapaṭalaspaṣṭābhirāmaprabhāṃ

siñcantīmamṛtadravairiva śiro dhyāyanti mūrdhni sthitām |

aśrāntā vikaṭasphuṭākṣarapadā niryāti vaktrāmbujāt

teṣāṃ bhārati bhāratī surasaritkallolalolormivat || 8 ||

ye sindūraparāgapiñjapihitāṃ tvattejasādyāmimāṃ

urvīṃ cāpi vilīnayāvakarasaprastāramagnāmiva |

paśyanti kṣaṇamapyananyamanasasteṣāmanaṅgajvara-

-klāntasrastakuraṅgaśābakadṛśo vaśyā bhavanti sphuṭam || 9 ||

cañcatkāñcanakuṇḍalāṅgadadharāmābaddhakāñcīsrajaṃ

ye tvāṃ cetasi tadgate kṣaṇamapi dhyāyanti kṛtvā sthirām |

teṣāṃ veśmasu vibhramādaharahaḥ sphārībhavantyaściraṃ

mādyatkuñjarakarṇatālataralāḥ sthairyaṃ bhajante śriyaḥ || 10 ||

ārbhaṭyā śaśikhaṇḍamaṇḍitajaṭājūṭāṃ nṛmuṇḍasrajaṃ

bandhūkaprasavāruṇāmbaradharāṃ pretāsanādhyāsinīm |

tvāṃ dhyāyanti caturbhujāṃ trinayanāmāpīnatuṅgastanīṃ

madhye nimnavalitrayāṅkitatanuṃ tvadrūpasaṃvittaye || 11 ||

jāto'pyalpaparicchade kṣitibhujāṃ sāmānyamātre kule

niḥśeṣāvanicakravartipadavīṃ labdhvā pratāponnataḥ |

yadvidyādhara bṛndavanditapadaḥ śrīvatsarājo'bhavat

devi tvaccaraṇāmbuja praṇatijaḥ so'yaṃ prasādodayaḥ || 12 ||

caṇḍi tvaccaraṇāmbujārcanakṛte bilvādilolluṇṭhana-

-truṭyatkaṇṭakakoṭibhiḥ paricayaṃ yeṣāṃ na jagmuḥ karāḥ |

te daṇḍāṅkuśacakracāpakuliśaśrīvatsamatsyāṅkitaiḥ

jāyante pṛthivībhujaḥ kathamivāmbhojaprabhaiḥ pāṇibhiḥ || 13 ||

viprāḥ kṣoṇibhujo viśastaditare kṣīrājyamadhvāsavaiḥ |

tvāṃ devi tripure parāparamayīṃ santarpya pūjāvidhau |

yāṃ yāṃ prārthayate manaḥ sthiradhiyāṃ teṣāṃ ta eva dhruvaṃ

tāṃ tāṃ siddhimavāpnuvanti tarasā vighnairavighnīkṛtāḥ || 14 ||

śabdānāṃ jananī tvamatra bhuvane vāgvādinītyucyase

tvattaḥ keśavavāsava prabhṛtayo'pyāvirbhavanti sphuṭam |

līyante khalu yatra kalpavirame brahmādayaste'pyamī

sā tvaṃ kācidacintyarūpamahimā śaktiḥ parā gīyase || 15 ||

devānāṃ tritayaṃ trayī hutabhujāṃ śaktitrayaṃ triḥ svarāḥ

trailokyaṃ tripadī tripuṣkaramatho tribrahma varṇāstrayaḥ |

yatkiñcijjagati tridhā niyamitaṃ vastu trivargādikaṃ

tatsarvaṃ tripureti nāma bhagavatyanveti te tattvataḥ || 16 ||

lakṣmīṃ rājakule jayāṃ raṇabhuvi kṣemaṅkarīmadhvani

kravyādadvipasarpabhāji śabarīṃ kāntāradurge girau |

bhūtapretapiśācajambukabhaye smṛtvā mahābhairavīṃ

vyāmohe tripurāṃ taranti vipadastārāṃ ca toyaplave || 17 ||

māyā kuṇḍalinī kriyā madhumatī kālī kalāmālinī

mātaṅgī vijayā jayā bhagavatī devī śivā śāmbhavī |

śaktiḥ śaṅkaravallabhā trinayanā vāgvādinī bhairavī

hrīṅkārī tripurā parāparamayī mātā kumārītyasi || 18 ||

āīpallavitaiḥ parasparayutairdvitrikramādyakṣarai

kādyaiḥ kṣāntagataiḥ svarādibhiratha kṣāntaiśca taiḥ sasvaraiḥ |

nāmāni tripure bhavanti khalu yānyatyantaguhyāni te

tebhyo bhairavapatni viṃśatisahasrebhyaḥ parebhyo namaḥ || 19 ||

boddhavyā nipuṇaṃ budhaiḥ stutiriyaṃ kṛtvā manastadgataṃ

bhāratyāstripuretyananyamanasā yatrādyavṛtte sphuṭam |

ekadvitripadakrameṇa kathitastatpādasaṅkhyākṣaraiḥ

mantroddhāra vidhirviśeṣasahitaḥ satsampradāyānvitaḥ || 20 ||

sāvadyaṃ niravadyamastu yadi vā kiṃ vānayā cintayā

nūnaṃ stotramidaṃ paṭhiṣyati jano yasyāsti bhaktistvayi |

sañcintyāpi laghutvamātmani dṛḍhaṃ sañjāyamānaṃ haṭhāt

tvadbhaktyā mukharīkṛtena racitaṃ yasmānmayāpi dhṛvam || 21 ||

iti śrīkālidāsa viracita pañcastavyāṃ prathamaḥ laghustavaḥ |