2.6 - Sautramanih Kaukili Hotram Cha - Krishna Yajurveda Taittiriya Brahmana Pathah - Svadvim Tva

ॐ

2.6 - ಸೌತ್ರಾಮಣಿಃ ಕೌಕಿಲೀ ಹೋತ್ರಂ ಚ - ಕೃಷ್ಣ ಯಜುರ್ವೇದ ತೈತ್ತಿರೀಯ ಬ್ರಾಹ್ಮಣ ಪಾಠಃ - ಸ್ವಾದ್ವೀಂ ತ್ವಾ

Rama Kannada

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಷಷ್ಠಃ ಪ್ರಪಾಠಕಃ - ಸೌತ್ರಾಮಣಿಃ ಕೌಕಿಲೀ ಹೋತ್ರ-ಞ್ಚ

ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹ॒ರಿಃ॒ ಓಮ್ ॥

ಅನುವಾಕಂ 1 - ಗ್ರಹಾಃ

ಸ್ವಾ॒ದ್ವೀ-ನ್ತ್ವಾ᳚ ಸ್ವಾ॒ದುನಾ᳚ । ತೀ॒ವ್ರಾ-ನ್ತೀ॒ವ್ರೇಣ॑ । ಅ॒ಮೃತಾ॑-ಮ॒ಮೃತೇ॑ನ । ಮಧು॑ಮತೀ॒-ಮ್ಮಧು॑ಮತಾ । ಸೃ॒ಜಾಮಿ॒ ಸಗ್ಂ ಸೋಮೇ॑ನ । ಸೋಮೋ᳚-ಽಸ್ಯ॒ಶ್ವಿಭ್ಯಾ᳚-ಮ್ಪಚ್ಯಸ್ವ । ಸರ॑ಸ್ವತ್ಯೈ ಪಚ್ಯಸ್ವ । ಇನ್ದ್ರಾ॑ಯ ಸು॒ತ್ರಾಮ್ಣೇ॑ ಪಚ್ಯಸ್ವ ॥ ಪರೀ॒ತೋಷಿ॑ಞ್ಚತಾ ಸು॒ತಮ್ । ಸೋಮೋ॒ ಯ ಉ॑ತ್ತ॒ಮಗ್ಂ ಹ॒ವಿಃ ॥ 1 ॥

ದ॒ಧ॒ನ್ವಾ ಯೋ ನರ್ಯೋ॑ ಅ॒ಫ್ಸ್ವ॑ನ್ತರಾ । ಸು॒ಷಾವ॒ ಸೋಮ॒ಮದ್ರಿ॑ಭಿಃ ॥ ಪು॒ನಾತು॑ ತೇ ಪರಿ॒ಸ್ರುತ᳚ಮ್ । ಸೋಮ॒ಗ್ಂ॒ ಸೂರ್ಯ॑ಸ್ಯ ದುಹಿ॒ತಾ । ವಾರೇ॑ಣ॒ ಶಶ್ವ॑ತಾ॒ ತನಾ᳚ । ವಾ॒ಯುಃ ಪೂ॒ತಃ ಪ॒ವಿತ್ರೇ॑ಣ । ಪ್ರಾಙ್ಖ್ಸೋಮೋ॒ ಅತಿ॑ದ್ರುತಃ । ಇನ್ದ್ರ॑ಸ್ಯ॒ ಯುಜ್ಯ॒-ಸ್ಸಖಾ᳚ ॥ ವಾ॒ಯುಃ ಪೂ॒ತಃ ಪ॒ವಿತ್ರೇ॑ಣ । ಪ್ರ॒ತ್ಯಙ್ಖ್ಸೋಮೋ॒ ಆತಿ॑ದ್ರುತಃ ॥ 2 ॥

ಇನ್ದ್ರ॑ಸ್ಯ॒ ಯುಜ್ಯ॒-ಸ್ಸಖಾ᳚ ॥ ಬ್ರಹ್ಮ॑ ಕ್ಷ॒ತ್ರ-ಮ್ಪ॑ವತೇ॒ ತೇಜ॑ ಇನ್ದ್ರಿ॒ಯಮ್ । ಸುರ॑ಯಾ॒ ಸೋಮಃ॑ ಸು॒ತ ಆಸು॑ತೋ॒ ಮದಾ॑ಯ । ಶು॒ಕ್ರೇಣ॑ ದೇವ ದೇ॒ವತಾಃ᳚ ಪಿಪೃಗ್ಧಿ । ರಸೇ॒ನಾನ್ನಂ॒-ಯಁಜ॑ಮಾನಾಯ ಧೇಹಿ ॥ ಕು॒ವಿದ॒ಙ್ಗ ಯವ॑ಮನ್ತೋ॒ ಯವ॑-ಞ್ಚಿತ್ । ಯಥಾ॒ ದಾನ್ತ್ಯ॑ನುಪೂ॒ರ್ವಂ-ವಿಁ॒ಯೂಯ॑ । ಇ॒ಹೇಹೈ॑ಷಾ-ಙ್ಕೃಣುತ॒ ಭೋಜ॑ನಾನಿ । ಯೇ ಬ॒ರ॒ಃಇಷೋ॒ ನಮೋ॑ವೃಕ್ತಿ॒-ನ್ನ ಜ॒ಗ್ಮುಃ ॥ ಉ॒ಪ॒ಯಾ॒ಮ-ಗೃ॑ಹೀತೋ-ಽಸ್ಯ॒ಶ್ವಿಭ್ಯಾ᳚-ನ್ತ್ವಾ॒ ಜುಷ್ಟ॑-ಙ್ಗೃಹ್ಣಾಮಿ ॥ 3 ॥

ಸರ॑ಸ್ವತ್ಯಾ॒ ಇನ್ದ್ರಾ॑ಯ ಸು॒ತ್ರಾಮ್ಣೇ᳚ ॥ ಏ॒ಷ ತೇ॒ ಯೋನಿ॒ಸ್ತೇಜ॑ಸೇ ತ್ವಾ । ವೀ॒ರ್ಯಾ॑ಯ ತ್ವಾ॒ ಬಲಾ॑ಯ ತ್ವಾ ॥ ತೇಜೋ॑-ಽಸಿ॒ ತೇಜೋ॒ ಮಯಿ॑ ಧೇಹಿ । ವೀ॒ರ್ಯ॑ಮಸಿ ವೀ॒ರ್ಯ॑-ಮ್ಮಯಿ॑ ಧೇಹಿ । ಬಲ॑ಮಸಿ॒ ಬಲ॒-ಮ್ಮಯಿ॑ ಧೇಹಿ ॥ ನಾನಾ॒ ಹಿ ವಾ᳚-ನ್ದೇ॒ವಹಿ॑ತ॒ಗ್ಂ॒ ಸದಃ॑ ಕೃ॒ತಮ್ । ಮಾ ಸಗ್ಂಸೃ॑ಕ್ಷಾಥಾ-ಮ್ಪರ॒ಮೇ ವ್ಯೋ॑ಮನ್ನ್ । ಸುರಾ॒ ತ್ವಮಸಿ॑ ಶು॒ಷ್ಮಿಣೀ॒ ಸೋಮ॑ ಏ॒ಷಃ । ಮಾ ಮಾ॑ ಹಿಗ್ಂಸೀ॒-ಸ್ಸ್ವಾಂ-ಯೋಁನಿ॑ಮಾವಿ॒ಶನ್ನ್ ॥ 4 ॥

ಉ॒ಪ॒ಯಾ॒ಮಗೃ॑ಹೀತೋ-ಽಸ್ಯಾಶ್ವಿ॒ನ-ನ್ತೇಜಃ॑ । ಸಾ॒ರ॒ಸ್ವ॒ತಂ-ವೀಁ॒ರ್ಯ᳚ಮ್ । ಐ॒ನ್ದ್ರ-ಮ್ಬಲ᳚ಮ್ ॥ ಏ॒ಷ ತೇ॒ ಯೋನಿ॒ರ್ಮೋದಾ॑ಯ ತ್ವಾ । ಆ॒ನ॒ನ್ದಾಯ॑ ತ್ವಾ॒ ಮಹ॑ಸೇ ತ್ವಾ ॥ ಓಜೋ॒-ಽಸ್ಯೋಜೋ॒ ಮಯಿ॑ ಧೇಹಿ । ಮ॒ನ್ಯುರ॑ಸಿ ಮ॒ನ್ಯು-ಮ್ಮಯಿ॑ ಧೇಹಿ । ಮಹೋ॑-ಽಸಿ॒ ಮಹೋ॒ ಮಯಿ॑ ಧೇಹಿ । ಸಹೋ॑-ಽಸಿ॒ ಸಹೋ॒ ಮಯಿ॑ ಧೇಹಿ ॥ ಯಾ ವ್ಯಾ॒ಘ್ರಂ-ವಿಁಷೂ॑ಚಿಕಾ । ಉ॒ಭೌ ವೃಕ॑-ಞ್ಚ॒ ರಕ್ಷ॑ತಿ । ಶ್ಯೇ॒ನ-ಮ್ಪ॑ತ॒ತ್ರಿಣಗ್ಂ॑ ಸಿ॒ಗ್ಂ॒ಹಮ್ । ಸೇಮ-ಮ್ಪಾ॒ತ್ವಗ್ಂಹ॑ಸಃ ॥ ಸ॒-ಮ್ಪೃಚಃ॑ ಸ್ಥ॒ ಸ-ಮ್ಮಾ॑ ಭ॒ದ್ರೇಣ॑ ಪೃಙ್ಕ್ತ । ವಿ॒ಪೃಚಃ॑ ಸ್ಥ॒ ವಿ ಮಾ॑ ಪಾ॒ಪ್ಮನಾ॑ ಪೃಙ್ಕ್ತ ॥ 5 ॥

(ಹ॒ವಿಃ - ಪ್ರ॒ತ್ಯಙ್ಖ್ಸೋಮೋ॒ ಆತಿ॑ದ್ರುತೋ - ಗೃಹ್ಣಾ - ಮ್ಯಾವಿ॒ಶನ್ - ವಿಷೂ॑ಚಿಕಾ॒ ಪಞ್ಚ॑ ಚ) (ಅ. 1)

ಅನುವಾಕಂ 2 - ಗ್ರಹೋಪಸ್ಥಾನಮ್

ಸೋಮೋ॒ ರಾಜಾ॒-ಽಮೃತಗ್ಂ॑ ಸು॒ತಃ । ಋ॒ಜೀ॒ಷೇಣಾ॑ಜಹಾನ್ಮೃ॒ತ್ಯುಮ್ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ । ವಿಪಾನಗ್ಂ॑ ಶು॒ಕ್ರಮನ್ಧ॑ಸಃ । ಇನ್ದ್ರ॑ಸ್ಯೇನ್ದ್ರಿ॒ಯಮ್ । ಇ॒ದ-ಮ್ಪಯೋ॒-ಽಮೃತ॒-ಮ್ಮಧು॑ ॥ ಸೋಮ॑ಮ॒ದ್ಭ್ಯೋ ವ್ಯ॑ಪಿಬತ್ । ಛನ್ದ॑ಸಾ ಹ॒ಗ್ಂ॒ಸ-ಶ್ಶು॑ಚಿ॒ಷತ್ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ । ಅ॒ದ್ಭ್ಯಃ, ಕ್ಷೀ॒ರಂ-ವ್ಯಁ॑ಪಿಬತ್ ॥ 6 ॥

ಕ್ರುಙ್ಙಾ᳚ಙ್ಗಿರ॒ಸೋ ಧಿ॒ಯಾ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ । ಅನ್ನಾ᳚-ತ್ಪರಿ॒ಸ್ರುತೋ॒ ರಸ᳚ಮ್ । ಬ್ರಹ್ಮ॑ಣಾ॒ ವ್ಯ॑ಪಿಬ-ತ್ಕ್ಷ॒ತ್ರಮ್ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ ॥ ರೇತೋ॒ ಮೂತ್ರಂ॒-ವಿಁಜ॑ಹಾತಿ । ಯೋನಿ॑-ಮ್ಪ್ರವಿ॒ಶದಿ॑ನ್ದ್ರಿ॒ಯಮ್ । ಗರ್ಭೋ॑ ಜ॒ರಾಯು॒ಣಾ-ಽಽವೃ॑ತಃ । ಉಲ್ಬ॑-ಞ್ಜಹಾತಿ॒ ಜನ್ಮ॑ನಾ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ ॥ 7 ॥

ವೇದೇ॑ನ ರೂ॒ಪೇ ವ್ಯ॑ಕರೋತ್ । ಸ॒ತಾ॒ಸ॒ತೀ ಪ್ರ॒ಜಾಪ॑ತಿಃ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ ॥ ಸೋಮೇ॑ನ॒ ಸೋಮೌ॒ ವ್ಯ॑ಪಿಬತ್ । ಸು॒ತಾ॒ಸು॒ತೌ ಪ್ರ॒ಜಾಪ॑ತಿಃ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ । ದೃ॒ಷ್ಟ್ವಾ ರೂ॒ಪೇ ವ್ಯಾಕ॑ರೋತ್ । ಸ॒ತ್ಯಾ॒ನೃ॒ತೇ ಪ್ರ॒ಜಾಪ॑ತಿಃ । ಅಶ್ರ॑ದ್ಧಾ॒-ಮನೃ॒ತೇ-ಽದ॑ಧಾತ್ । ಶ್ರ॒ದ್ಧಾಗ್ಂ ಸ॒ತ್ಯೇ ಪ್ರ॒ಜಾಪ॑ತಿಃ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ ॥ ದೃ॒ಷ್ಟ್ವಾ ಪ॑ರಿ॒ಸ್ರುತೋ॒ ರಸ᳚ಮ್ । ಶು॒ಕ್ರೇಣ॑ ಶು॒ಕ್ರಂ-ವ್ಯಁ॑ಪಿಬತ್ । ಪಯ॒-ಸ್ಸೋಮ॑-ಮ್ಪ್ರ॒ಜಾಪ॑ತಿಃ । ಋ॒ತೇನ॑ ಸ॒ತ್ಯಮಿ॑ನ್ದ್ರಿ॒ಯಮ್ । ವಿಪಾನಗ್ಂ॑ ಶು॒ಕ್ರಮನ್ಧ॑ಸಃ । ಇನ್ದ್ರ॑ಸ್ಯೇನ್ದ್ರಿ॒ಯಮ್ । ಇ॒ದ-ಮ್ಪಯೋ॒-ಽಮೃತ॒-ಮ್ಮಧು॑ ॥ 8 ॥

(ಅ॒ದ್ಭ್ಯಃ, ಕ್ಷೀ॒ರಂ-ವ್ಯಁ॑ಪಿಬ॒ - ಜ್ಜನ್ಮ॑ನ॒ರ್ತೇನ॑ ಸ॒ತ್ಯಮಿ॑ನ್ದ್ರಿ॒ಯಗ್ಗ್ - ಶ್ರ॒ದ್ಧಾಗ್ಂ ಸ॒ತ್ಯೇ ಪ್ರ॒ಜಾಪ॑ತಿರ॒ಷ್ಟೌ ಚ॑) (ಅ. 2)

(ಸೋಮೋ॒ ರಾಜಾ॒ ವಿಪಾನ॒ಗ್ಂ॒ ಸೋಮ॑ಮ॒ದ್ಭ್ಯೋ-ಽನ್ನಾ॒-ದ್ರೇತೋ॒ ಮೂತ್ರಂ॒-ವೇಁದೇ॑ನ ಸತಾಸ॒ತೀ ಸೋಮೇ॑ನ ಸುತಾಸು॒ತೌ ದೃ॒ಷ್ಟ್ವಾ ರೂ॒ಪೇ ದೃ॒ಷ್ಟ್ವಾ ಪ॑ರಿ॒ಸ್ರುತೋ॒ ರಸಂ॒-ವಿಁಪಾನ॒-ನ್ದಶ॑ )

ಅನುವಾಕಂ 3 - ಗ್ರಹಹೋಮಃ

ಸುರಾ॑ವನ್ತ-ಮ್ಬರ್ಹಿ॒ಷದಗ್ಂ॑ ಸು॒ವೀರ᳚ಮ್ । ಯ॒ಜ್ಞಗ್ಂ ಹಿ॑ನ್ವನ್ತಿ ಮಹಿ॒ಷಾ ನಮೋ॑ಭಿಃ । ದಧಾ॑ನಾ॒-ಸ್ಸೋಮ॑-ನ್ದಿ॒ವಿ ದೇ॒ವತಾ॑ಸು । ಮದೇ॒ಮೇನ್ದ್ರಂ॒-ಯಁಜ॑ಮಾನಾ-ಸ್ಸ್ವ॒ರ್ಕಾಃ ॥ ಯಸ್ತೇ॒ ರಸ॒-ಸ್ಸಮ್ಭೃ॑ತ॒ ಓಷ॑ಧೀಷು । ಸೋಮ॑ಸ್ಯ॒ ಶುಷ್ಮ॒-ಸ್ಸುರ॑ಯಾ ಸು॒ತಸ್ಯ॑ । ತೇನ॑ ಜಿನ್ವ॒ ಯಜ॑ಮಾನ॒-ಮ್ಮದೇ॑ನ । ಸರ॑ಸ್ವತೀ-ಮ॒ಶ್ವಿನಾ॒-ವಿನ್ದ್ರ॑-ಮ॒ಗ್ನಿಮ್ ॥ ಯಮ॒ಶ್ವಿನಾ॒ ನಮು॑ಚೇರಾಸು॒ರಾದಧಿ॑ । ಸರ॑ಸ್ವ॒ತ್ಯಸ॑ನೋದಿನ್ದ್ರಿ॒ಯಾಯ॑ ॥ 9 ॥

ಇ॒ಮ-ನ್ತಗ್ಂ ಶು॒ಕ್ರ-ಮ್ಮಧು॑ಮನ್ತ॒-ಮಿನ್ದು᳚ಮ್ । ಸೋಮ॒ಗ್ಂ॒ ರಾಜಾ॑ನಮಿ॒ಹ ಭ॑ಕ್ಷಯಾಮಿ ॥ ಯದತ್ರ॑ ರಿ॒ಪ್ತಗ್ಂ ರ॒ಸಿನಃ॑ ಸು॒ತಸ್ಯ॑ । ಯದಿನ್ದ್ರೋ॒ ಅಪಿ॑ಬ॒ಚ್ಛಚೀ॑ಭಿಃ । ಅ॒ಹ-ನ್ತದ॑ಸ್ಯ॒ ಮನ॑ಸಾ ಶಿ॒ವೇನ॑ । ಸೋಮ॒ಗ್ಂ॒ ರಾಜಾ॑ನಮಿ॒ಹ ಭ॑ಕ್ಷಯಾಮಿ ॥ ಪಿ॒ತೃಭ್ಯಃ॑ ಸ್ವಧಾ॒ವಿಭ್ಯಃ॑ ಸ್ವ॒ಧಾ ನಮಃ॑ । ಪಿ॒ತಾ॒ಮ॒ಹೇಭ್ಯಃ॑ ಸ್ವಧಾ॒ವಿಭ್ಯಃ॑ ಸ್ವ॒ಧಾ ನಮಃ॑ । ಪ್ರಪಿ॑ತಾಮಹೇಭ್ಯ-ಸ್ಸ್ವಧಾ॒ವಿಭ್ಯಃ॑ ಸ್ವ॒ಧಾ ನಮಃ॑ । ಅಕ್ಷ॑-ನ್ಪಿ॒ತರಃ॑ ॥ 10 ॥

ಅಮೀ॑ಮದನ್ತ ಪಿ॒ತರಃ॑ । ಅತೀ॑ತೃಪನ್ತ ಪಿ॒ತರಃ॑ । ಅಮೀ॑ಮೃಜನ್ತ ಪಿ॒ತರಃ॑ । ಪಿತ॑ರ॒-ಶ್ಶುನ್ಧ॑ದ್ಧ್ವಮ್ ॥ ಪು॒ನನ್ತು॑ ಮಾ ಪಿ॒ತರಃ॑ ಸೋ॒ಮ್ಯಾಸಃ॑ । ಪು॒ನನ್ತು॑ ಮಾ ಪಿತಾಮ॒ಹಾಃ । ಪು॒ನನ್ತು॒ ಪ್ರಪಿ॑ತಾಮಹಾಃ । ಪ॒ವಿತ್ರೇ॑ಣ ಶ॒ತಾಯು॑ಷಾ । ಪು॒ನನ್ತು॑ ಮಾ ಪಿತಾಮ॒ಹಾಃ । ಪು॒ನನ್ತು॒ ಪ್ರಪಿ॑ತಾಮಹಾಃ ॥ 11 ॥

ಪ॒ವಿತ್ರೇ॑ಣ ಶ॒ತಾಯು॑ಷಾ ॥ ವಿಶ್ವ॒ಮಾಯು॒-ರ್ವ್ಯ॑ಶ್ನವೈ । ಅಗ್ನ॒ ಆಯೂಗ್ಂ॑ಷಿ ಪವಸ॒ ಆ ಸು॒ವೋರ್ಜ॒ಮಿಷ॑-ಞ್ಚ ನಃ । ಆ॒ರೇ ಬಾ॑ಧಸ್ವ ದು॒ಚ್ಛುನಾ᳚ಮ್ ॥ ಅಗ್ನೇ॒ ಪವ॑ಸ್ವ॒ ಸ್ವಪಾ॑ ಅ॒ಸ್ಮೇ ವರ್ಚಃ॑ ಸು॒ವೀರ್ಯ᳚ಮ್ । ದಧ॒-ತ್ಪೋಷಗ್ಂ॑ ರ॒ಯಿ-ಮ್ಮಯಿ॑ ॥। ಪವ॑ಮಾನ॒-ಸ್ಸುವ॒ರ್ಜನಃ॑ । ಪ॒ವಿತ್ರೇ॑ಣ॒ ವಿಚ॑ರ್ಷಣಿಃ । ಯಃ ಪೋತಾ॒ ಸ ಪು॑ನಾತು ಮಾ ॥ ಪು॒ನನ್ತು॑ ಮಾ ದೇವಜ॒ನಾಃ । ಪು॒ನನ್ತು॒ ಮನ॑ ವೋ ಧಿ॒ಯಾ । ಪು॒ನನ್ತು॒ ವಿಶ್ವ॑ ಆ॒ಯವಃ॑ ॥। ಜಾತ॑ವೇದಃ ಪ॒ವಿತ್ರ॑ವತ್ । ಪ॒ವಿತ್ರೇ॑ಣ ಪುನಾಹಿ ಮಾ । ಶು॒ಕ್ರೇಣ॑ ದೇವ॒ ದೀದ್ಯ॑ತ್ । ಅಗ್ನೇ॒ ಕ್ರತ್ವಾ॒ ಕ್ರತೂ॒ಗ್ಂ॒ರನು॑ ॥ ಯತ್ತೇ॑ ಪ॒ವಿತ್ರ॑-ಮ॒ರ್ಚಿಷಿ॑ । ಅಗ್ನೇ॒ ವಿತ॑ತಮನ್ತ॒ರಾ । ಬ್ರಹ್ಮ॒ ತೇನ॑ ಪುನೀಮಹೇ ॥। ಉ॒ಭಾಭ್ಯಾ᳚-ನ್ದೇವ ಸವಿತಃ । ಪ॒ವಿತ್ರೇ॑ಣ ಸ॒ವೇನ॑ ಚ । ಇ॒ದ-ಮ್ಬ್ರಹ್ಮ॑ ಪುನೀಮಹೇ ॥ ವೈ॒ಶ್ವ॒ದೇ॒ವೀ ಪು॑ನ॒ತೀ ದೇ॒ವ್ಯಾಗಾ᳚ತ್ । ಯಸ್ಯೈ॑ ಬ॒ಹ್ವೀ-ಸ್ತ॒ನುವೋ॑ ವೀ॒ತಪೃ॑ಷ್ಠಾಃ । ತಯಾ॒ ಮದ॑ನ್ತ-ಸ್ಸಧ॒ಮಾದ್ಯೇ॑ಷು । ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥॥ ಯೇ ಸ॑ಮಾ॒ನಾ-ಸ್ಸಮ॑ನಸಃ । ಪಿ॒ತರೋ॑ ಯಮ॒ರಾಜ್ಯೇ᳚ । ತೇಷಾಂ᳚-ಲೋಁ॒ಕ-ಸ್ಸ್ವ॒ಧಾ ನಮಃ॑ । ಯ॒ಜ್ಞೋ ದೇ॒ವೇಷು॑ ಕಲ್ಪತಾಮ್ ॥ 12 ॥

ಯೇ ಸ॑ಜಾ॒ತಾ-ಸ್ಸಮ॑ನಸಃ । ಜೀ॒ವಾ ಜೀ॒ವೇಷು॑ ಮಾಮ॒ಕಾಃ । ತೇಷಾ॒ಗ್॒ ಶ್ರೀರ್ಮಯಿ॑ ಕಲ್ಪತಾಮ್ । ಅ॒ಸ್ಮಿಲ್ ಁಲೋ॒ಕೇ ಶ॒ತಗ್ಂ ಸಮಾಃ᳚ ॥ ದ್ವೇ ಸ್ರು॒ತೀ ಅ॑ಶೃಣವ-ಮ್ಪಿತೃ॒ಣಾಮ್ । ಅ॒ಹ-ನ್ದೇ॒ವಾನಾ॑ಮು॒ತ ಮರ್ತ್ಯಾ॑ನಾಮ್ । ಯಾಭ್ಯಾ॑ಮಿ॒ದಂ-ವಿಁಶ್ವ॒ಮೇಜ॒-ಥ್ಸಮೇ॑ತಿ । ಯದ॑ನ್ತ॒ರಾ ಪಿ॒ತರ॑-ಮ್ಮಾ॒ತರ॑-ಞ್ಚ ॥ ಇ॒ದಗ್ಂ ಹ॒ವಿಃ ಪ್ರ॒ಜನ॑ನ-ಮ್ಮೇ ಅಸ್ತು । ದಶ॑ವೀರಗ್ಂ ಸ॒ರ್ವಗ॑ಣಗ್ಗ್ ಸ್ವ॒ಸ್ತಯೇ᳚ । ಆ॒ತ್ಮ॒ಸನಿ॑ ಪ್ರಜಾ॒ಸನಿ॑ । ಪ॒ಶು॒ಸನ್ಯ॑ಭಯ॒ಸನಿ॑ ಲೋಕ॒ಸನಿ॑ । ಅ॒ಗ್ನಿಃ ಪ್ರ॒ಜಾ-ಮ್ಬ॑ಹು॒ಲಾ-ಮ್ಮೇ॑ ಕರೋತು । ಅನ್ನ॒-ಮ್ಪಯೋ॒ ರೇತೋ॑ ಅ॒ಸ್ಮಾಸು॑ ಧತ್ತ । ರಾ॒ಯಸ್ಪೋಷ॒-ಮಿಷ॒ಮೂರ್ಜ॑ಮ॒ಸ್ಮಾಸು॑ ದೀಧರ॒-ಥ್ಸ್ವಾಹಾ᳚ ॥ 13 ॥

(ಇ॒ನ್ದ್ರಿ॒ಯಾಯ॑ - ಪಿ॒ತರಃ॑ - ಶ॒ತಾಯು॑ಷಾ ಪು॒ನನ್ತು॑ ಮಾ ಪಿತಾಮ॒ಹಾಃ ಪು॒ನನ್ತು॒ ಪ್ರಪಿ॑ತಾಮಹಾಃ-ಕಲ್ಪತಾಗ್-ಸ್ವ॒ಸ್ತಯೇ॒ ಪಞ್ಚ॑ ಚ) (ಅ. 3)

ಅನುವಾಕಂ 4 - ಉಪಹೋಮಾಃ

ಸೀಸೇ॑ನ॒ ತನ್ತ್ರ॒-ಮ್ಮನ॑ಸಾ ಮನೀ॒ಷಿಣಃ॑ । ಊ॒ರ್ಣಾ॒ಸೂ॒ತ್ರೇಣ॑ ಕ॒ವಯೋ॑ ವಯನ್ತಿ । ಅ॒ಶ್ವಿನಾ॑ ಯ॒ಜ್ಞಗ್ಂ ಸ॑ವಿ॒ತಾ ಸರ॑ಸ್ವತೀ । ಇನ್ದ್ರ॑ಸ್ಯ ರೂ॒ಪಂ-ವಁರು॑ಣೋ ಭಿಷ॒ಜ್ಯನ್ನ್ ॥ ತದ॑ಸ್ಯ ರೂ॒ಪಮ॒ಮೃತ॒ಗ್ಂ॒ ಶಚೀ॑ಭಿಃ । ತಿ॒ಸ್ರೋ ದ॑ಧುರ್ದೇ॒ವತಾ᳚-ಸ್ಸಗ್ಂರರಾ॒ಣಾಃ । ಲೋಮಾ॑ನಿ॒ ಶಷ್ಪೈ᳚-ರ್ಬಹು॒ಧಾ ನ ತೋಕ್ಮ॑ಭಿಃ । ತ್ವಗ॑ಸ್ಯ ಮಾ॒ಗ್ಂ॒ಸಮ॑ಭವ॒ನ್ನ ಲಾ॒ಜಾಃ ॥ ತದ॒ಶ್ವಿನಾ॑ ಭಿ॒ಷಜಾ॑ ರು॒ದ್ರವ॑ರ್ತನೀ । ಸರ॑ಸ್ವತೀ ವಯತಿ॒ ಪೇಶೋ॒ ಅನ್ತ॑ರಃ ॥ 14 ॥

ಅಸ್ಥಿ॑ ಮ॒ಜ್ಜಾನ॒-ಮ್ಮಾಸ॑ರೈಃ । ಕಾ॒ರೋ॒ತ॒ರೇಣ॒ ದಧ॑ತೋ॒ ಗವಾ᳚-ನ್ತ್ವ॒ಚಿ ॥ ಸರ॑ಸ್ವತೀ॒ ಮನ॑ಸಾ ಪೇಶ॒ಲಂ-ವಁಸು॑ । ನಾಸ॑ತ್ಯಾಭ್ಯಾಂ-ವಁಯತಿ ದರ್ಶ॒ತಂ-ವಁಪುಃ॑ । ರಸ॑-ಮ್ಪರಿ॒ಸ್ರುತಾ॒ ನ ರೋಹಿ॑ತಮ್ । ನ॒ಗ್ನಹು॒ರ್ಧೀರ॒ಸ್ತಸ॑ರ॒-ನ್ನ ವೇಮ॑ ॥ ಪಯ॑ಸಾ ಶು॒ಕ್ರಮ॒ಮೃತ॑-ಞ್ಜ॒ನಿತ್ರ᳚ಮ್ । ಸುರ॑ಯಾ॒ ಮೂತ್ರಾ᳚ಜ್ಜನಯನ್ತಿ॒ ರೇತಃ॑ । ಅಪಾಮ॑ತಿ-ನ್ದುರ್ಮ॒ತಿ-ಮ್ಬಾಧ॑ಮಾನಾಃ । ಊವ॑ದ್ಧ್ಯಂ॒-ವಾಁತಗ್ಂ॑ ಸ॒ಬುವ॒-ನ್ತದಾ॒ರಾತ್ ॥ 15 ॥

ಇನ್ದ್ರಃ॑ ಸು॒ತ್ರಾಮಾ॒ ಹೃದ॑ಯೇನ ಸ॒ತ್ಯಮ್ । ಪು॒ರೋ॒ಡಾಶೇ॑ನ ಸವಿ॒ತಾ ಜ॑ಜಾನ । ಯಕೃ॑-ತ್ಕ್ಲೋ॒ಮಾನಂ॒-ವಁರು॑ಣೋ ಭಿಷ॒ಜ್ಯನ್ನ್ । ಮತ॑ಸ್ನೇ ವಾಯ॒ವ್ಯೈ᳚ರ್ನ ಮಿ॑ನಾತಿ ಪಿ॒ತ್ತಮ್ ॥ ಆ॒ನ್ತ್ರಾಣಿ॑ ಸ್ಥಾ॒ಲೀ ಮಧು॒ ಪಿನ್ವ॑ಮಾನಾ । ಗುದಾ॒ ಪಾತ್ರಾ॑ಣಿ ಸು॒ದುಘಾ॒ ನ ಧೇ॒ನುಃ । ಶ್ಯೇ॒ನಸ್ಯ॒ ಪತ್ರ॒-ನ್ನ ಪ್ಲೀ॒ಹಾ ಶಚೀ॑ಭಿಃ । ಆ॒ಸ॒ನ್ದೀ ನಾಭಿ॑ರು॒ದರ॒-ನ್ನ ಮಾ॒ತಾ ॥ ಕು॒ಮ್ಭೋ ವ॑ನಿ॒ಷ್ಠುರ್ಜ॑ನಿ॒ತಾ ಶಚೀ॑ಭಿಃ । ಯಸ್ಮಿ॒ನ್ನಗ್ರೇ॒ ಯೋನ್ಯಾ॒-ಙ್ಗರ್ಭೋ॑ ಅ॒ನ್ತಃ ॥ 16 ॥

ಪ್ಲಾ॒ಶೀರ್ವ್ಯ॑ಕ್ತ-ಶ್ಶ॒ತಧಾ॑ರ॒ ಉಥ್ಸಃ॑ । ದು॒ಹೇ ನ ಕು॒ಮ್ಭೀಗ್ ಸ್ವ॒ಧಾ-ಮ್ಪಿ॒ತೃಭ್ಯಃ॑ ॥ ಮುಖ॒ಗ್ಂ॒ ಸದ॑ಸ್ಯ॒ ಶಿರ॒ ಇಥ್ಸದೇ॑ನ । ಜಿ॒ಹ್ವಾ ಪ॒ವಿತ್ರ॑ಮ॒ಶ್ವಿನಾ॒ ಸಗ್ಂ ಸರ॑ಸ್ವತೀ । ಚಪ್ಪ॒-ನ್ನ ಪಾ॒ಯುರ್ಭಿ॒ಷಗ॑ಸ್ಯ॒ ವಾಲಃ॑ । ವ॒ಸ್ತಿರ್ನ ಶೇಪೋ॒ ಹರ॑ಸಾ ತರ॒ಸ್ವೀ ॥ ಅ॒ಶ್ವಿಭ್ಯಾ॒-ಞ್ಚಕ್ಷು॑ರ॒ಮೃತ॒-ಙ್ಗ್ರಹಾ᳚ಭ್ಯಾಮ್ । ಛಾಗೇ॑ನ॒ ತೇಜೋ॑ ಹ॒ವಿಷಾ॑ ಶೃ॒ತೇನ॑ । ಪಕ್ಷ್ಮಾ॑ಣಿ ಗೋ॒ಧೂಮೈಃ॒ ಕ್ವ॑ಲೈರು॒ತಾನಿ॑ । ಪೇಶೋ॒ ನ ಶು॒ಕ್ಲಮಸಿ॑ತಂ-ವಁಸಾತೇ ॥ 17 ॥

ಅವಿ॒ರ್ನ ಮೇ॒ಷೋ ನ॒ಸಿ ವೀ॒ರ್ಯಾ॑ಯ । ಪ್ರಾ॒ಣಸ್ಯ॒ ಪನ್ಥಾ॑ ಅ॒ಮೃತೋ॒ ಗ್ರಹಾ᳚ಭ್ಯಾಮ್ । ಸರ॑ಸ್ವ॒ತ್ಯುಪ॒ವಾಕೈ᳚ರ್ವ್ಯಾ॒ನಮ್ । ನಸ್ಯಾ॑ನಿ ಬ॒ರ॒ಃಇ-ರ್ಬದ॑ರೈ-ರ್ಜಜಾನ ॥ ಇನ್ದ್ರ॑ಸ್ಯ ರೂ॒ಪಮೃ॑ಷ॒ಭೋ ಬಲಾ॑ಯ । ಕರ್ಣಾ᳚ಭ್ಯಾ॒ಗ್॒ ಶ್ರೋತ್ರ॑ಮ॒ಮೃತ॒-ಙ್ಗ್ರಹಾ᳚ಭ್ಯಾಮ್ । ಯವಾ॒ ನ ಬ॒ರ॒ಃಇ-ರ್ಭ್ರು॒ವಿ ಕೇಸ॑ರಾಣಿ । ಕ॒ರ್ಕನ್ಧು॑ ಜಜ್ಞೇ॒ ಮಧು॑ ಸಾರ॒ಘ-ಮ್ಮುಖಾ᳚ತ್ ॥ ಆ॒ತ್ಮನ್ನು॒ಪಸ್ಥೇ॒ ನ ವೃಕ॑ಸ್ಯ॒ ಲೋಮ॑ । ಮುಖೇ॒ ಶ್ಮಶ್ರೂ॑ಣಿ॒ ನ ವ್ಯಾ᳚ಘ್ರಲೋ॒ಮಮ್ ॥ 18 ॥

ಕೇಶಾ॒ ನ ಶೀ॒ರ॒.ಷನ್. ಯಶ॑ಸೇ ಶ್ರಿ॒ಯೈ ಶಿಖಾ᳚ । ಸಿ॒ಗ್ಂ॒ಹಸ್ಯ॒ ಲೋಮ॒ ತ್ವಿಷಿ॑-ರಿನ್ದ್ರಿ॒ಯಾಣಿ॑ ॥ ಅಙ್ಗಾ᳚ನ್ಯಾ॒ತ್ಮನ್-ಭಿ॒ಷಜಾ॒ ತದ॒ಶ್ವಿನಾ᳚ । ಆ॒ತ್ಮಾನ॒ಮಙ್ಗೈ॒-ಸ್ಸಮ॑ಧಾ॒-ಥ್ಸರ॑ಸ್ವತೀ । ಇನ್ದ್ರ॑ಸ್ಯ ರೂ॒ಪಗ್ಂ ಶ॒ತಮಾ॑ನ॒ಮಾಯುಃ॑ । ಚ॒ನ್ದ್ರೇಣ॒ ಜ್ಯೋತಿ॑ರ॒ಮೃತ॒-ನ್ದಧಾ॑ನಾ ॥ ಸರ॑ಸ್ವತೀ॒ ಯೋನ್ಯಾ॒-ಙ್ಗರ್ಭ॑ಮ॒ನ್ತಃ । ಅ॒ಶ್ವಿಭ್ಯಾ॒-ಮ್ಪತ್ನೀ॒ ಸುಕೃ॑ತ-ಮ್ಬಿಭರ್ತಿ । ಅ॒ಪಾಗ್ಂ ರಸೇ॑ನ॒ ವರು॑ಣೋ॒ ನ ಸಾಮ್ನಾ᳚ । ಇನ್ದ್ರಗ್ಗ್॑ ಶ್ರಿ॒ಯೈ ಜ॒ನಯ॑ನ್ನ॒ಫ್ಸು ರಾಜಾ᳚ ॥ ತೇಜಃ॑ ಪಶೂ॒ನಾಗ್ಂ ಹ॒ವಿರಿ॑ನ್ದ್ರಿ॒ಯಾವ॑ತ್ । ಪ॒ರಿ॒ಸ್ರುತಾ॒ ಪಯ॑ಸಾ ಸಾರ॒ಘ-ಮ್ಮಧು॑ । ಅ॒ಶ್ವಿಭ್ಯಾ᳚-ನ್ದು॒ಗ್ಧ-ಮ್ಭಿ॒ಷಜಾ॒ ಸರ॑ಸ್ವತ್ಯಾ ಸುತಾಸು॒ತಾಭ್ಯಾ᳚ಮ್ । ಅ॒ಮೃತ॒-ಸ್ಸೋಮ॒ ಇನ್ದುಃ॑ ॥ 19 ॥

(ಅನ್ತ॑ರ - ಆ॒ರಾ - ದ॒ನ್ತ--ರ್ ವ॑ಸಾತೇ - ವ್ಯಾಘ್ರಲೋ॒ಮಗ್ಂ - ರಾಜಾ॑ ಚ॒ತ್ವಾರಿ॑ ಚ) (ಅ. 4)

ಅನುವಾಕಂ 5 - ಅಭಿಷೇಕಃ

ಮಿ॒ತ್ರೋ॑-ಽಸಿ॒ ವರು॑ಣೋ-ಽಸಿ । ಸಮ॒ಹಂ-ವಿಁಶ್ವೈ᳚ರ್ದೇ॒ವೈಃ ॥ ಕ್ಷ॒ತ್ರಸ್ಯ॒ ನಾಭಿ॑ರಸಿ । ಕ್ಷ॒ತ್ರಸ್ಯ॒ ಯೋನಿ॑ರಸಿ ॥ ಸ್ಯೋ॒ನಾಮಾಸೀ॑ದ । ಸು॒ಷದಾ॒ಮಾಸೀ॑ದ । ಮಾ ತ್ವಾ॑ ಹಿಗ್ಂಸೀತ್ । ಮಾ ಮಾ॑ ಹಿಗ್ಂಸೀತ್ ॥ ನಿಷ॑ಸಾದ ಧೃ॒ತವ್ರ॑ತೋ॒ ವರು॑ಣಃ । ಪ॒ಸ್ತ್ಯಾ᳚ಸ್ವಾ ॥ 20 ॥

ಸಾಮ್ರಾ᳚ಜ್ಯಾಯ ಸು॒ಕ್ರತುಃ॑ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ । ಪೂ॒ಷ್ಣೋ ಹಸ್ತಾ᳚ಭ್ಯಾಮ್ । ಅ॒ಶ್ವಿನೋ॒-ರ್ಭೈಷ॑ಜ್ಯೇನ । ತೇಜ॑ಸೇ ಬ್ರಹ್ಮವರ್ಚ॒ಸಾಯಾ॒ಭಿಷಿ॑ಞ್ಚಾಮಿ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ । ಪೂ॒ಷ್ಣೋ ಹಸ್ತಾ᳚ಭ್ಯಾಮ್ । ಸರ॑ಸ್ವತ್ಯೈ॒ ಭೈಷ॑ಜ್ಯೇನ ॥ 21 ॥

ವೀ॒ರ್ಯಾ॑ಯಾ॒ನ್ನಾದ್ಯಾ॑ಯಾ॒ಭಿಷಿ॑ಞ್ಚಾಮಿ ॥ ದೇ॒ವಸ್ಯ॑ ತ್ವಾ ಸವಿ॒ತುಃ ಪ್ರ॑ಸ॒ವೇ । ಅ॒ಶ್ವಿನೋ᳚-ರ್ಬಾ॒ಹುಭ್ಯಾ᳚ಮ್ । ಪೂ॒ಷ್ಣೋ ಹಸ್ತಾ᳚ಭ್ಯಾಮ್ । ಇನ್ದ್ರ॑ಸ್ಯೇನ್ದ್ರಿ॒ಯೇಣ॑ । ಶ್ರಿ॒ಯೈ ಯಶ॑ಸೇ॒ ಬಲಾ॑ಯಾ॒ಭಿಷಿ॑ಞ್ಚಾಮಿ ॥ ಕೋ॑-ಽಸಿ ಕತ॒ಮೋ॑-ಽಸಿ । ಕಸ್ಮೈ᳚ ತ್ವಾ॒ ಕಾಯ॑ ತ್ವಾ ॥ ಸುಶ್ಲೋ॒ಕಾಁ(4) ಸುಮ॑ಡ್ಗ॒ಲಾಁ(4) ಸತ್ಯ॑ರಾ॒ಜಾ(3)ನ್ ॥ ಶಿರೋ॑ ಮೇ॒ ಶ್ರೀಃ ॥ 22 ॥

ಯಶೋ॒ ಮುಖ᳚ಮ್ । ತ್ವಿಷಿಃ॒ ಕೇಶಾ᳚ಶ್ಚ॒ ಶ್ಮಶ್ರೂ॑ಣಿ । ರಾಜಾ॑ ಮೇ ಪ್ರಾ॒ಣೋ॑-ಽಮೃತ᳚ಮ್ । ಸ॒ಮ್ರಾಟ್ ಚಕ್ಷುಃ॑ । ವಿ॒ರಾಟ್ಛ್ರೋತ್ರ᳚ಮ್ । ಜಿ॒ಹ್ವಾ ಮೇ॑ ಭ॒ದ್ರಮ್ । ವಾಮ್ಮಹಃ॑ । ಮನೋ॑ ಮ॒ನ್ಯುಃ । ಸ್ವ॒ರಾಡ್ಭಾಮಃ॑ । ಮೋದಾಃ᳚ ಪ್ರಮೋ॒ದಾ ಅ॒ಙ್ಗುಲೀ॒ರಙ್ಗಾ॑ನಿ ॥ 23 ॥

ಚಿ॒ತ್ತ-ಮ್ಮೇ॒ ಸಹಃ॑ । ಬಾ॒ಹೂ ಮೇ॒ ಬಲ॑ಮಿನ್ದ್ರಿ॒ಯಮ್ । ಹಸ್ತೌ॑ ಮೇ॒ ಕರ್ಮ॑ ವೀ॒ರ್ಯ᳚ಮ್ । ಆ॒ತ್ಮಾ ಕ್ಷ॒ತ್ರಮುರೋ॒ ಮಮ॑ । ಪೃ॒ಷ್ಟೀರ್ಮೇ॑ ರಾ॒ಷ್ಟ್ರಮು॒ದರ॒ಮಗ್ಂಸೌ᳚ । ಗ್ರೀ॒ವಾಶ್ಚ॒ ಶ್ರೋಣ್ಯೌ᳚ । ಊ॒ರೂ ಅ॑ರ॒ತ್ನೀ ಜಾನು॑ನೀ । ವಿಶೋ॒ ಮೇ-ಽಙ್ಗಾ॑ನಿ ಸ॒ರ್ವತಃ॑ । ನಾಭಿ॑ರ್ಮೇ ಚಿ॒ತ್ತಂ-ವಿಁ॒ಜ್ಞಾನ᳚ಮ್ । ಪಾ॒ಯುರ್ಮೇ-ಽಪ॑ಚಿತಿರ್ಭ॒ಸತ್ ॥ 24 ॥

ಆ॒ನ॒ನ್ದ॒ನ॒ನ್ದಾವಾ॒ಣ್ಡೌ ಮೇ᳚ । ಭಗ॒-ಸ್ಸೌಭಾ᳚ಗ್ಯ॒-ಮ್ಪಸಃ॑ ॥ ಜಙ್ಘಾ᳚ಭ್ಯಾ-ಮ್ಪ॒ದ್ಭ್ಯಾ-ನ್ಧರ್ಮೋ᳚-ಽಸ್ಮಿ । ವಿ॒ಶಿ ರಾಜಾ॒ ಪ್ರತಿ॑ಷ್ಠಿತಃ ॥ ಪ್ರತಿ॑ ಕ್ಷ॒ತ್ರೇ ಪ್ರತಿ॑ತಿಷ್ಠಾಮಿ ರಾ॒ಷ್ಟ್ರೇ । ಪ್ರತ್ಯಶ್ವೇ॑ಷು॒ ಪ್ರತಿ॑ತಿಷ್ಠಾಮಿ॒ ಗೋಷು॑ । ಪ್ರತ್ಯಙ್ಗೇ॑ಷು॒ ಪ್ರತಿ॑ತಿಷ್ಠಾಮ್ಯಾ॒ತ್ಮನ್ನ್ । ಪ್ರತಿ॑ ಪ್ರಾ॒ಣೇಷು॒ ಪ್ರತಿ॑ತಿಷ್ಠಾಮಿ ಪು॒ಷ್ಟೇ । ಪ್ರತಿ॒ ದ್ಯಾವಾ॑ಪೃಥಿ॒ವ್ಯೋಃ । ಪ್ರತಿತಿ॑ಷ್ಠಾಮಿ ಯ॒ಜ್ಞೇ ॥ 25 ॥

ತ್ರ॒ಯಾ ದೇ॒ವಾ ಏಕಾ॑ದಶ । ತ್ರ॒ಯ॒ಸ್ತ್ರಿ॒ಗ್ಂ॒ಶಾ-ಸ್ಸು॒ರಾಧ॑ಸಃ । ಬೃಹ॒ಸ್ಪತಿ॑ ಪುರೋಹಿತಾಃ । ದೇ॒ವಸ್ಯ॑ ಸವಿ॒ತು-ಸ್ಸ॒ವೇ । ದೇ॒ವಾ ದೇ॒ವೈರ॑ವನ್ತು ಮಾ । ಪ್ರ॒ಥ॒ಮಾ ದ್ವಿ॒ತೀಯೈಃ᳚ । ದ್ವಿ॒ತೀಯಾ᳚ಸ್ತೃ॒ತೀಯೈಃ᳚ । ತೃ॒ತೀಯಾ᳚-ಸ್ಸ॒ತ್ಯೇನ॑ । ಸ॒ತ್ಯಂ-ಯಁ॒ಜ್ಞೇನ॑ ।ಯ॒ಜ್ಞೋ ಯಜು॑ರ್ಭಿಃ ॥ 26 ॥

ಯಜೂಗ್ಂ॑ಷಿ॒ ಸಾಮ॑ಭಿಃ । ಸಾಮಾ᳚ನ್ಯೃ॒ಗ್ಭಿಃ । ಋಚೋ॑ ಯಾ॒ಜ್ಯಾ॑ಭಿಃ । ಯಾ॒ಜ್ಯಾ॑ ವಷಟ್ಕಾ॒ರೈಃ । ವ॒ಷ॒ಟ್ಕಾ॒ರಾ ಆಹು॑ತಿಭಿಃ । ಆಹು॑ತಯೋ ಮೇ॒ ಕಾಮಾ॒ನ್-ಥ್ಸಮ॑ರ್ಧಯನ್ತು ॥ ಭೂ-ಸ್ಸ್ವಾಹಾ᳚ ॥ ಲೋಮಾ॑ನಿ॒ ಪ್ರಯ॑ತಿ॒ರ್ಮಮ॑ । ತ್ವಮ್ಮ॒ ಆನ॑ತಿ॒ರಾಗ॑ತಿಃ । ಮಾ॒ಗ್ಂ॒ಸ-ಮ್ಮ॒ ಉಪ॑ನತಿಃ । ವ ಸ್ವಸ್ಥಿ॑ । ಮ॒ಜ್ಜಾ ಮ॒ ಆನ॑ತಿಃ ॥ 27 ॥

(ಪ॒ಸ್ತ್ಯಾ᳚ಸ್ವಾ - ಸರ॑ಸ್ವತ್ಯೈ॒ ಭೈಷ॑ಜ್ಯೇನ॒ - ಶ್ರೀ - ರಙ್ಗಾ॑ನಿ - ಭ॒ಸ--ದ್ಯ॒ಜ್ಞೇ - ಯ॒ಜ್ಞೋ ಯಜು॑ರ್ಭಿ॒ - ರುಪ॑ನತಿ॒ರ್ದ್ವೇ ಚ॑) (ಅ. 5)

ಅನುವಾಕಂ 6 - ಅವಭೃಥಃ

ಯ-ದ್ದೇ॑ವಾ ದೇವ॒ಹೇಡ॑ನಮ್ । ದೇವಾ॑ಸಶ್ಚಕೃ॒ಮಾ ವ॒ಯಮ್ । ಅ॒ಗ್ನಿರ್ಮಾ॒ ತಸ್ಮಾ॒ದೇನ॑ಸಃ । ವಿಶ್ವಾ᳚-ನ್ಮುಞ್ಚ॒ತ್ವಗ್ಂಹ॑ಸಃ ॥ ಯದಿ॒ ದಿವಾ॒ ಯದಿ॒ ನಕ್ತ᳚ಮ್ । ಏನಾಗ್ಂ॑ಸಿ ಚಕೃ॒ಮಾ ವ॒ಯಮ್ । ವಾ॒ಯುರ್ಮಾ॒ ತಸ್ಮಾ॒ದೇನ॑ಸಃ । ವಿಶ್ವಾ᳚-ನ್ಮುಞ್ಚ॒ತ್ವಗ್ಂಹ॑ಸಃ ॥ ಯದಿ॒ ಜಾಗ್ರ॒-ದ್ಯದಿ॒ ಸ್ವಪ್ನೇ᳚ । ಏನಾಗ್ಂ॑ಸಿ ಚಕೃ॒ಮಾ ವ॒ಯಮ್ ॥ 28 ॥

ಸೂರ್ಯೋ॑ ಮಾ॒ ತಸ್ಮಾ॒ದೇನ॑ಸಃ । ವಿಶ್ವಾ᳚-ನ್ಮುಞ್ಚ॒ತ್ವಗ್ಂಹ॑ಸಃ ॥ ಯದ್ಗ್ರಾಮೇ॒ ಯದರ॑ಣ್ಯೇ । ಯ-ಥ್ಸ॒ಭಾಯಾಂ॒-ಯಁದಿ॑ನ್ದ್ರಿ॒ಯೇ । ಯಚ್ಛೂ॒ದ್ರೇ ಯದ॒ರ್ಯೇ᳚ । ಏನ॑ಶ್ಚಕೃ॒ಮಾ ವ॒ಯಮ್ । ಯದೇಕ॒ಸ್ಯಾಧಿ॒ ಧರ್ಮ॑ಣಿ । ತಸ್ಯಾ॑ವ॒ಯಜ॑ನಮಸಿ ॥ ಯದಾಪೋ॒ ಅಘ್ನಿ॑ಯಾ॒ ವರು॒ಣೇತಿ॒ ಶಪಾ॑ಮಹೇ । ತತೋ॑ ವರುಣ ನೋ ಮುಞ್ಚ ॥ 29 ॥

ಅವ॑ಭೃಥ ನಿಚಙ್ಕುಣ ನಿಚೇ॒ರುರ॑ಸಿ ನಿಚಙ್ಕುಣ । ಅವ॑ ದೇ॒ವೈ-ರ್ದೇ॒ವಕೃ॑ತ॒ಮೇನೋ॑-ಽಯಾಟ್ । ಅವ॒ ಮರ್ತ್ಯೈ॒ರ್ಮರ್ತ್ಯ॑ಕೃತಮ್ । ಉ॒ರೋರಾ ನೋ॑ ದೇವ ರಿ॒ಷಸ್ಪಾ॑ಹಿ ॥ ಸು॒ಮಿ॒ತ್ರಾ ನ॒ ಆಪ॒ ಓಷ॑ಧಯ-ಸ್ಸನ್ತು । ದು॒ರ್ಮಿ॒ತ್ರಾಸ್ತಸ್ಮೈ॑ ಭುಯಾಸುಃ । ಯೋ᳚-ಽಸ್ಮಾ-ನ್ದ್ವೇಷ್ಟಿ॑ । ಯ-ಞ್ಚ॑ ವ॒ಯ-ನ್ದ್ವಿ॒ಷ್ಮಃ ॥ ದ್ರು॒ಪ॒ದಾದಿ॒ವೇ-ನ್ಮು॑ಮುಚಾ॒ನಃ । ಸ್ವಿ॒ನ್ನ-ಸ್ಸ್ನಾ॒ತ್ವೀ ಮಲಾ॑ದಿವ ॥ 30 ॥

ಪೂ॒ತ-ಮ್ಪ॒ವಿತ್ರೇ॑ಣೇ॒ವಾಜ್ಯ᳚ಮ್ । ಆಪಃ॑ ಶುನ್ಧನ್ತು॒ ಮೈನ॑ಸಃ ॥ ಉದ್ವ॒ಯ-ನ್ತಮ॑ಸ॒ಸ್ಪರಿ॑ । ಪಶ್ಯ॑ನ್ತೋ॒ ಜ್ಯೋತಿ॒ರುತ್ತ॑ರಮ್ । ದೇ॒ವ-ನ್ದೇ॑ವ॒ತ್ರಾ ಸೂರ್ಯ᳚ಮ್ । ಅಗ॑ನ್ಮ॒ ಜ್ಯೋತಿ॑ರುತ್ತ॒ಮಮ್ ॥ ಪ್ರತಿ॑ಯುತೋ॒ ವರು॑ಣಸ್ಯ॒ ಪಾಶಃ॑ । ಪ್ರತ್ಯ॑ಸ್ತೋ॒ ವರು॑ಣಸ್ಯ॒ ಪಾಶಃ॑ ॥ ಏಧೋ᳚-ಽಸ್ಯೇಧಿಷೀ॒ಮಹಿ॑ । ಸ॒ಮಿದ॑ಸಿ ॥ 31 ॥

ತೇಜೋ॑-ಽಸಿ॒ ತೇಜೋ॒ ಮಯಿ॑ ಧೇಹಿ ॥ ಅ॒ಪೋ ಅನ್ವ॑ಚಾರಿಷಮ್ । ರಸೇ॑ನ॒ ಸಮ॑ಸೃಕ್ಷ್ಮಹಿ । ಪಯ॑ಸ್ವಾಗ್ಂ ಅಗ್ನ॒ ಆ-ಽಗ॑ಮಮ್ । ತ-ಮ್ಮಾ॒ ಸಗ್ಂಸೃ॑ಜ॒ ವರ್ಚ॑ಸಾ । ಪ್ರ॒ಜಯಾ॑ ಚ॒ ಧನೇ॑ನ ಚ ॥ ಸ॒ಮಾವ॑ವರ್ತಿ ಪೃಥಿ॒ವೀ । ಸಮು॒ಷಾಃ । ಸಮು॒ ಸೂರ್ಯಃ॑ । ಸಮು॒ ವಿಶ್ವ॑ಮಿ॒ದ-ಞ್ಜಗ॑ತ್ । ವೈ॒ಶ್ವಾ॒ನ॒ರ ಜ್ಯೋ॑ತಿ-ರ್ಭೂಯಾಸಮ್ । ವಿ॒ಭು-ಙ್ಕಾಮಂ॒-ವ್ಯಁ॑ಶ್ನವೈ ॥ ಭೂ-ಸ್ಸ್ವಾಹಾ᳚ ॥ 32 ॥

(ಸ್ವಪ್ನ॒ ಏನಾಗ್ಂ॑ಸಿ ಚಕೃ॒ಮಾ ವ॒ಯಂ - ಮು॑ಞ್ಚ॒ - ಮಲಾ॑ದಿವ - ಸ॒ಮಿದ॑ಸಿ॒ - ಜಗ॒-ತ್ತ್ರೀಣಿ॑ ಚ) (ಅ. 6)

ಅನುವಾಕಂ 7 - ಐನ್ದ್ರೇ ಪ್ರಶ್ನೌ ಪ್ರಯಾಜಾನಾಮೇಕಾದಶ ಮೈತ್ರಾವರುಣಪ್ರೈಷಾಃ

ಹೋತಾ॑ ಯಕ್ಷ-ಥ್ಸ॒ಮಿಧೇನ್ದ್ರ॑-ಮಿ॒ಡಸ್ಪ॒ದೇ । ನಾಭಾ॑ ಪೃಥಿ॒ವ್ಯಾ ಅಧಿ॑ । ದಿ॒ವೋ ವರ್ಷ್ಮ॒ನ್-ಥ್ಸಮಿ॑ದ್ಧ್ಯತೇ । ಓಜಿ॑ಷ್ಠಶ್ಚರ್ಷಣೀ॒ಸಹಾನ್॑ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ತ್ತನೂ॒ನಪಾ॑ತಮ್ । ಊ॒ತಿಭಿ॒-ರ್ಜೇತಾ॑ರ॒-ಮಪ॑ರಾಜಿತಮ್ । ಇನ್ದ್ರ॑-ನ್ದೇ॒ವಗ್ಂ ಸು॑ವ॒ರ್ವಿದ᳚ಮ್ । ಪ॒ಥಿಭಿ॒-ರ್ಮಧು॑ಮತ್ತಮೈಃ । ನರಾ॒ಶಗ್ಂಸೇ॑ನ॒ ತೇಜ॑ಸಾ ॥ 33 ॥

ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ದಿಡಾ॑ಭಿ॒-ರಿನ್ದ್ರ॑-ಮೀಡಿ॒ತಮ್ । ಆ॒ಜುಹ್ವಾ॑ನ॒-ಮಮ॑ರ್ತ್ಯಮ್ । ದೇ॒ವೋ ದೇ॒ವೈ-ಸ್ಸವೀ᳚ರ್ಯಃ । ವಜ್ರ॑ಹಸ್ತಃ ಪುರನ್ದ॒ರಃ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ದ್ಬ॒ರ॒ಃಇಷೀನ್ದ್ರ॑-ನ್ನಿಷದ್ವ॒ರಮ್ । ವೃ॒ಷ॒ಭ-ನ್ನರ್ಯಾ॑ಪಸಮ್ । ವಸು॑ಭೀ ರು॒ದ್ರೈರಾ॑ದಿ॒ತ್ಯೈಃ । ಸ॒ಯುಗ್ಭಿ॑-ರ್ಬ॒ರ॒ಃಇರಾ ಽಸ॑ದತ್ ॥ 34 ॥

ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ದೋಜೋ॒ ನ ವೀ॒ರ್ಯ᳚ಮ್ । ಸಹೋ॒ ದ್ವಾರ॒ ಇನ್ದ್ರ॑ಮವರ್ಧಯನ್ನ್ । ಸು॒ಪ್ರಾ॒ಯ॒ಣಾ ವಿಶ್ರ॑ಯನ್ತಾಮೃತಾ॒ವೃಧಃ॑ । ದ್ವಾರ॒ ಇನ್ದ್ರಾ॑ಯ ಮೀ॒ಢುಷೇ᳚ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷದು॒ಷೇ ಇನ್ದ್ರ॑ಸ್ಯ ಧೇ॒ನೂ । ಸು॒ದುಘೇ॑ ಮಾ॒ತರೌ॑ ಮ॒ಹೀ । ಸವಾ॒ತರೌ॒ ನ ತೇಜ॑ಸೀ । ವ॒ಥ್ಸಮಿನ್ದ್ರ॑-ಮವರ್ಧತಾಮ್ ॥ 35 ॥

ವೀ॒ತಾಮಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ದ್ದೈವ್ಯಾ॒ ಹೋತಾ॑ರಾ । ಭಿ॒ಷಜಾ॒ ಸಖಾ॑ಯಾ । ಹ॒ವಿಷೇನ್ದ್ರ॑-ಮ್ಭಿಷಜ್ಯತಃ । ಕ॒ವೀ ದೇ॒ವೌ ಪ್ರಚೇ॑ತಸೌ । ಇನ್ದ್ರಾ॑ಯ ಧತ್ತ ಇನ್ದ್ರಿ॒ಯಮ್ । ವೀ॒ತಾಮಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷತ್ತಿ॒ಸ್ರೋ ದೇ॒ವೀಃ । ತ್ರಯ॑ಸ್ತ್ರಿ॒ಧಾತ॑ವೋ॒-ಽಪಸಃ॑ । ಇಡಾ॒ ಸರ॑ಸ್ವತೀ॒ ಭಾರ॑ತೀ ॥ 36 ॥

ಮ॒ಹೀನ್ದ್ರ॑ಪತ್ನೀರ್-ಹ॒ವಿಷ್ಮ॑ತೀಃ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ತ್ತ್ವಷ್ಟಾ॑ರ॒-ಮಿನ್ದ್ರ॑-ನ್ದೇ॒ವಮ್ । ಭಿ॒ಷಜಗ್ಂ॑ ಸು॒ಯಜ॑-ಙ್ಘೃತ॒ಶ್ರಿಯ᳚ಮ್ । ಪು॒ರು॒ರೂಪಗ್ಂ॑ ಸು॒ರೇತ॑ಸ-ಮ್ಮ॒ಘೋನಿ᳚ಮ್ । ಇನ್ದ್ರಾ॑ಯ॒ ತ್ವಷ್ಟಾ॒ ದಧ॑ದಿನ್ದ್ರಿ॒ಯಾಣಿ॑ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ದ್ವನ॒ಸ್ಪತಿ᳚ಮ್ । ಶ॒ಮಿ॒ತಾರಗ್ಂ॑ ಶ॒ತಕ್ರ॑ತುಮ್ । ಧಿ॒ಯೋ ಜೋ॒ಷ್ಟಾರ॑-ಮಿನ್ದ್ರಿ॒ಯಮ್ ॥ 37 ॥

ಮದ್ಧ್ವಾ॑ ಸಮ॒ಞ್ಜನ್ಪ॒ಥಿಭಿಃ॑ ಸು॒ಗೇಭಿಃ॑ । ಸ್ವದಾ॑ತಿ ಹ॒ವ್ಯ-ಮ್ಮಧು॑ನಾ ಘೃ॒ತೇನ॑ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ದಿನ್ದ್ರ॒ಗ್ಗ್॒ ಸ್ವಾಹಾ-ಽಽಜ್ಯ॑ಸ್ಯ । ಸ್ವಾಹಾ॒ ಮೇದ॑ಸಃ । ಸ್ವಾಹಾ᳚ ಸ್ತೋ॒ಕಾನಾ᳚ಮ್ । ಸ್ವಾಹಾ॒ ಸ್ವಾಹಾ॑ಕೃತೀನಾಮ್ । ಸ್ವಾಹಾ॑ ಹ॒ವ್ಯಸೂ᳚ಕ್ತೀನಾಮ್ । ಸ್ವಾಹಾ॑ ದೇ॒ವಾಗ್ಂ ಆ᳚ಜ್ಯ॒ಪಾನ್ । ಸ್ವಾಹೇನ್ದ್ರಗ್ಂ॑ ಹೋ॒ತ್ರಾಜ್ಜು॑ಷಾ॒ಣಾಃ । ಇನ್ದ್ರ॒ ಆಜ್ಯ॑ಸ್ಯ ವಿಯನ್ತು । ಹೋತ॒ರ್ಯಜ॑ ॥ 38 ॥

(ತೇಜ॑ಸಾ-ಽಸದ-ದವರ್ಧತಾಂ॒-ಭಾರ॑ತೀ-ನ್ದ್ರಿ॒ಯಂ-ಜು॑ಷಾ॒ಣಾ ದ್ವೇ ಚ॑) (ಅ. 7)

(ಸ॒ಮಿಧೇನ್ದ್ರ॒-ನ್ತನೂ॒ನಪಾ॑ತ॒ಮಿಡಾ॑ಭಿ-ರ್ಬ॒ರ್॒ಹಿಷ್ಯೋಜ॑ ಉ॒ಷೇ ದೈವ್ಯಾ॑ ತಿ॒ಸ್ರಸ್ತ್ವಷ್ಟಾ॑ರಂ॒-ವಁನ॒ಸ್ಪತಿ॒ಮಿನ್ದ್ರ᳚ಮ್ । ಸ॒ಮಿಧೇನ್ದ್ರ॑-ಞ್ಚ॒ತುರ್ವೇತ್ವೇಕೋ॑ ವಿ॒ಯನ್ತು॒ ದ್ವಿರ್ವೀ॒ತಾಮೇಕೋ॑ ವಿ॒ಯನ್ತು॒ ದ್ವಿರ್ವೇತ್ವೇಕೋ॑ ವಿ॒ಯನ್ತು॒ ಹೋತ॒ರ್ಯಜ॑ )

ಅನುವಾಕಂ 8 - ಐನ್ದ್ರೇ ಪ್ರಶ್ನೌ ಪ್ರಯಾಜಯಾಜ್ಯಾಃ

ಸಮಿ॑ದ್ಧ॒ ಇನ್ದ್ರ॑ ಉ॒ಷಸಾ॒ಮನೀ॑ಕೇ । ಪು॒ರೋ॒ರುಚಾ॑ ಪೂರ್ವ॒ಕೃದ್ವಾ॑ವೃಧಾ॒ನಃ । ತ್ರಿ॒ಭಿರ್ದೇ॒ವೈಸ್ತ್ರಿ॒ಗ್ಂ॒ಶತಾ॒ ವಜ್ರ॑ಬಾಹುಃ । ಜ॒ಘಾನ॑ ವೃ॒ತ್ರಂ-ವಿಁ ದುರೋ॑ ವವಾರ ॥ ನರಾ॒ಶಗ್ಂಸಃ॒ ಪ್ರತಿ॒ ಶೂರೋ॒ ಮಿಮಾ॑ನಃ । ತನೂ॒ನಪಾ॒ತ್-ಪ್ರತಿ॑ ಯ॒ಜ್ಞಸ್ಯ॒ ಧಾಮ॑ । ಗೋಭಿ॑-ರ್ವ॒ಪಾವಾ॒-ನ್ಮಧು॑ನಾ ಸಮ॒ಞ್ಜನ್ನ್ । ಹಿರ॑ಣ್ಯೈಶ್ಚ॒ನ್ದ್ರೀ ಯ॑ಜತಿ॒ ಪ್ರಚೇ॑ತಾಃ ॥ ಈ॒ಡಿ॒ತೋ ದೇ॒ವೈರ್ಹರಿ॑ವಾಗ್ಂ ಅಭಿ॒ಷ್ಟಿಃ । ಆ॒ಜುಹ್ವಾ॑ನೋ ಹ॒ವಿಷಾ॒ ಶರ್ಧ॑ಮಾನಃ ॥ 39 ॥

ಪು॒ರ॒ದಂ॒ರೋ ಮ॒ಘವಾ॒ನ್॒. ವಜ್ರ॑ಬಾಹುಃ । ಆಯಾ॑ತು ಯ॒ಜ್ಞಮುಪ॑ ನೋ ಜುಷಾ॒ಣಃ ॥ ಜು॒ಷಾ॒ಣೋ ಬ॒ರ॒ಃಇರ್ಹರಿ॑ವಾನ್ನ॒ ಇನ್ದ್ರಃ॑ । ಪ್ರಾ॒ಚೀನಗ್ಂ॑ ಸೀದತ್ಪ್ರ॒ದಿಶಾ॑ ಪೃಥಿ॒ವ್ಯಾಃ । ಉ॒ರು॒ವ್ಯಚಾಃ॒ ಪ್ರಥ॑ಮಾನಗ್ಗ್ ಸ್ಯೋ॒ನಮ್ । ಆ॒ದಿ॒ತ್ಯೈರ॒ಕ್ತಂ-ವಁಸು॑ಭಿ-ಸ್ಸ॒ಜೋಷಾಃ᳚ ॥ ಇನ್ದ್ರ॒-ನ್ದುರಃ॑ ಕವ॒ಷ್ಯೋ॑ ಧಾವ॑ಮಾನಾಃ । ವೃಷಾ॑ಣಂ-ಯಁನ್ತು॒ ಜನ॑ಯ-ಸ್ಸು॒ಪತ್ನೀಃ᳚ । ದ್ವಾರೋ॑ ದೇ॒ವೀರ॒ಭಿತೋ॒ ವಿಶ್ರ॑ಯನ್ತಾಮ್ । ಸು॒ವೀರಾ॑ ವೀ॒ರ-ಮ್ಪ್ರಥ॑ಮಾನಾ॒ ಮಹೋ॑ಭಿಃ ॥ 40 ॥

ಉ॒ಷಾಸಾ॒ ನಕ್ತಾ॑ ಬೃಹ॒ತೀ ಬೃ॒ಹನ್ತ᳚ಮ್ । ಪಯ॑ಸ್ವತೀ ಸು॒ದುಘೇ॒ ಶೂರ॒ಮಿನ್ದ್ರ᳚ಮ್ । ಪೇಶ॑ಸ್ವತೀ॒ ತನ್ತು॑ನಾ ಸಂ॒ವ್ಯಁಯ॑ನ್ತೀ । ದೇ॒ವಾನಾ᳚-ನ್ದೇ॒ವಂ-ಯಁ॑ಜತ-ಸ್ಸುರು॒ಕ್ಮೇ ॥ ದೈವ್ಯಾ॒ ಮಿಮಾ॑ನಾ॒ ಮನ॑ಸಾ ಪುರು॒ತ್ರಾ । ಹೋತಾ॑ರಾ॒ವಿನ್ದ್ರ॑-ಮ್ಪ್ರಥ॒ಮಾ ಸು॒ವಾಚಾ᳚ । ಮೂ॒ರ್ಧನ್. ಯ॒ಜ್ಞಸ್ಯ॒ ಮಧು॑ನಾ॒ ದಧಾ॑ನಾ । ಪ್ರಾ॒ಚೀನ॒-ಞ್ಜ್ಯೋತಿ॑ರ್ಹ॒ವಿಷಾ॑ ವೃಧಾತಃ ॥ ತಿ॒ಸ್ರೋ ದೇ॒ವೀರ್ಹ॒ವಿಷಾ॒ ವರ್ಧ॑ಮಾನಾಃ । ಇನ್ದ್ರ॑-ಞ್ಜುಷಾ॒ಣಾ ವೃಷ॑ಣ॒-ನ್ನ ಪತ್ನೀಃ᳚ ॥ 41 ॥

ಅಚ್ಛಿ॑ನ್ನ॒-ನ್ತನ್ತು॒-ಮ್ಪಯ॑ಸಾ॒ ಸರ॑ಸ್ವತೀ । ಇಡಾ॑ ದೇ॒ವೀ ಭಾರ॑ತೀ ವಿ॒ಶ್ವತೂ᳚ರ್ತಿಃ ॥ ತ್ವಷ್ಟಾ॒ ದಧ॒ದಿನ್ದ್ರಾ॑ಯ॒ ಶುಷ್ಮ᳚ಮ್ । ಅಪಾ॒ಕೋ-ಽಚಿ॑ಷ್ಟುರ್ಯ॒ಶಸೇ॑ ಪು॒ರೂಣಿ॑ । ವೃಷಾ॒ ಯಜ॒ನ್ ವೃಷ॑ಣ॒-ಮ್ಭೂರಿ॑ರೇತಾಃ । ಮೂ॒ರ್ಧನ್. ಯ॒ಜ್ಞಸ್ಯ॒ ಸಮ॑ನಕ್ತು ದೇ॒ವಾನ್ ॥ ವನ॒ಸ್ಪತಿ॒-ರವ॑ಸೃಷ್ಟೋ॒ ನ ಪಾಶೈಃ᳚ । ತ್ಮನ್ಯಾ॑ ಸಮ॒ಞ್ಜಞ್ಛ॑ಮಿ॒ತಾ ನ ದೇ॒ವಃ । ಇನ್ದ್ರ॑ಸ್ಯ ಹ॒ವ್ಯೈರ್ಜ॒ಠರ॑-ಮ್ಪೃಣಾ॒ನಃ । ಸ್ವದಾ॑ತಿ ಹ॒ವ್ಯ-ಮ್ಮಧು॑ನಾ ಘೃ॒ತೇನ॑ ॥ ಸ್ತೋ॒ಕಾನಾ॒ಮಿನ್ದು॒-ಮ್ಪ್ರತಿ॒ ಶೂರ॒ ಇನ್ದ್ರಃ॑ । ವೃ॒ಷಾ॒ಯಮಾ॑ಣೋ ವೃಷ॒ಭ-ಸ್ತು॑ರಾ॒ಷಾಟ್ । ಘೃ॒ತ॒ಪ್ರುಷಾ॒ ಮಧು॑ನಾ ಹ॒ವ್ಯಮು॒ನ್ದನ್ನ್ । ಮೂ॒ರ್ಧನ್. ಯ॒ಜ್ಞಸ್ಯ॑ ಜುಷತಾ॒ಗ್॒ ಸ್ವಾಹಾ᳚ ॥ 42 ॥

(ಶರ್ಧ॑ಮಾನೋ॒ - ಮಹೋ॑ಭಿಃ॒ - ಪತ್ನೀ᳚--ರ್ ಘೃ॒ತೇನ॑ ಚ॒ತ್ವಾರಿ॑ ಚ) (ಅ. 8)

ಅನುವಾಕಂ 9 - ಐನ್ದ್ರೇ ಪ್ರಶ್ನೌ ವಪಾದೀನಾಂ-ಯಾಁಜ್ಯಾನುವಾಕ್ಯಾಃ

ಆಚ॑ರ್ಷಣಿ॒ಪ್ರಾ ವೃ॑ಷ॒ಭೋ ಜನಾ॑ನಾಮ್ । ರಾಜಾ॑ ಕೃಷ್ಟೀ॒ನಾ-ಮ್ಪು॑ರುಹೂ॒ತ ಇನ್ದ್ರಃ॑ । ಸ್ತು॒ತ-ಶ್ಶ್ರ॑ವ॒ಸ್ಯನ್ನವ॒ಸೋಪ॑ಮ॒ದ್ರಿಕ್ । ಯು॒ಕ್ತ್ವಾ ಹರೀ॒ ವೃಷ॒ಣಾ ಽಽಯಾ᳚ಹ್ಯ॒ರ್ವಾಮ್ ॥, ವಿ॒ವೇಷ॒ ಯನ್ಮಾ॑ ಧಿ॒ಷಣಾ॑ ಜ॒ಜಾನ॒ ಸ್ತವೈ॑ ಪು॒ರಾ ಪಾರ್ಯಾ॒ದಿನ್ದ್ರ॒ ಮಹ್ನಃ॑ । ಅಗ್ಂಹ॑ಸೋ॒ ಯತ್ರ॑ ಪೀ॒ಪರ॒ದ್ಯಥಾ॑ ನೋ ನಾ॒ವೇವ॒ ಯಾನ್ತ॑ ಮು॒ಭಯೇ॑ ಹವನ್ತೇ ॥॥ ತಗ್ಂ ಸ॒ಧ್ರೀಚೀ॑ರೂ॒ತಯೋ॒ ವೃಷ್ಣಿ॑ಯಾನಿ । ಪೌಗ್ಗ್ಸ್ಯಾ॑ನಿ ನಿ॒ಯುತಃ॑ ಸಶ್ಚು॒ರಿನ್ದ್ರ᳚ಮ್ । ಸ॒ಮು॒ದ್ರ-ನ್ನ ಸಿನ್ಧ॑ವ ಉ॒ಕ್ಥಶು॑ಷ್ಮಾಃ । ಉ॒ರು॒ವ್ಯಚ॑ಸ॒ಗಿಂರ॒ ಆವಿ॑ಶನ್ತಿ ॥॥ ಸ॒ತ್ಯಮಿತ್ತನ್ನ ತ್ವಾವಾಗ್ಂ॑ ಅ॒ನ್ಯೋ ಅಸ್ತಿ॑ । ಇನ್ದ್ರ॑ ದೇ॒ವೋ ನ ಮರ್ತ್ಯೋ॒ ಜ್ಯಾಯಾನ್॑ । ಅಹ॒ನ್ನಹಿ॑-ಮ್ಪರಿ॒ಶಯಾ॑ನ॒ಮರ್ಣಃ॑ । ಅವಾ॑ಸೃಜೋ॒-ಽಪೋ ಅಚ್ಛಾ॑ ಸಮು॒ದ್ರಮ್ ॥ ಪ್ರಸ॑ಸಾಹಿಷೇ ಪುರುಹೂತ॒ ಶತ್ರೂನ್॑ । ಜ್ಯೇಷ್ಠ॑ಸ್ತೇ॒ ಶುಷ್ಮ॑ ಇ॒ಹ ರಾ॒ತಿರ॑ಸ್ತು । ಇನ್ದ್ರಾಭ॑ರ॒ ದಕ್ಷಿ॑ಣೇನಾ॒ ವಸೂ॑ನಿ । ಪತಿ॒-ಸ್ಸಿನ್ಧೂ॑ನಾಮಸಿ ರೇ॒ವತೀ॑ನಾಮ್ ॥ ಸ ಶೇವೃ॑ಧ॒ಮಧಿ॑ಧಾ ದ್ಯು॒ಮ್ನಮ॒ಸ್ಮೇ । ಮಹಿ॑ ಕ್ಷ॒ತ್ರ-ಞ್ಜ॑ನಾ॒ಷಾಡಿ॑ನ್ದ್ರ॒ ತವ್ಯ᳚ಮ್ । ರಕ್ಷಾ॑ ಚ ನೋ ಮ॒ಘೋನಃ॑ ಪಾ॒ಹಿ ಸೂ॒ರೀನ್ । ರಾ॒ಯೇ ಚ॑ ನ-ಸ್ಸ್ವಪ॒ತ್ಯಾ ಇ॒ಷೇ ಧಾಃ᳚ ॥ 43 ॥

(ರೇ॒ವತೀ॑ನಾ-ಞ್ಚ॒ತ್ವಾರಿ॑ ಚ) (ಅ. 9)

ಅನುವಾಕಂ 10 - ಐನ್ದ್ರೇ ಪ್ರಶ್ನೌ ಅನುಯಾಜಾನಾಮೇಕಾದಶ ಮೈತ್ರಾವರುಣಪ್ರೈಷಾಃ

ದೇ॒ವ-ಮ್ಬ॒ರ್॒ಹಿರಿನ್ದ್ರಗ್ಂ॑ ಸುದೇ॒ವ-ನ್ದೇ॒ವೈಃ । ವೀ॒ರವ॑-ಥ್ಸ್ತೀ॒ರ್ಣಂ-ವೇಁದ್ಯಾ॑ಮವರ್ಧಯತ್ । ವಸ್ತೋ᳚ರ್ವೃ॒ತ-ಮ್ಪ್ರಾಕ್ತೋ᳚ರ್ಭೃ॒ತಮ್ । ರಾ॒ಯಾ ಬ॒ರ್॒ಹಿಷ್ಮ॒ತೋ-ಽತ್ಯ॑ಗಾತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವೀರ್ದ್ವಾರ॒ ಇನ್ದ್ರಗ್ಂ॑ ಸಙ್ಘಾ॒ತೇ । ವಿ॒ಡ್ವೀರ್ಯಾಮ॑ನ್ನವರ್ಧಯನ್ನ್ । ಆ ವ॒ಥ್ಸೇನ॒ ತರು॑ಣೇನ ಕುಮಾ॒ರೇಣ॑ ಚ ಮೀವಿ॒ತಾ ಅಪಾರ್ವಾ॑ಣಮ್ । ರೇ॒ಣುಕ॑ಕಾಟ-ನ್ನುದನ್ತಾಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 44 ॥

ದೇ॒ವೀ ಉ॒ಷಾಸಾ॒ ನಕ್ತಾ᳚ । ಇನ್ದ್ರಂ॑-ಯಁ॒ಜ್ಞೇ ಪ್ರ॑ಯ॒ತ್ಯ॑ಹ್ವೇತಾಮ್ । ದೈವೀ॒ರ್ವಿಶಃ॒ ಪ್ರಾಯಾ॑ಸಿಷ್ಟಾಮ್ । ಸುಪ್ರೀ॑ತೇ॒ ಸುಧಿ॑ತೇ ಅಭೂತಾಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ ದೇ॒ವೀ ಜೋಷ್ಟ್ರೀ॒ ವಸು॑ಧಿತೀ । ದೇ॒ವಮಿನ್ದ್ರ॑ಮವರ್ಧತಾಮ್ । ಅಯಾ᳚ವ್ಯ॒ನ್ಯಾ-ಽಘಾ ದ್ವೇಷಾಗ್ಂ॑ಸಿ । ಆ-ಽನ್ಯಾ ವಾ᳚ಕ್ಷೀ॒-ದ್ವಸು॒ ವಾರ್ಯಾ॑ಣಿ । ಯಜ॑ಮಾನಾಯ ಶಿಕ್ಷಿ॒ತೇ ॥ 45 ॥

ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ ದೇ॒ವೀ ಊ॒ರ್ಜಾಹು॑ತೀ॒ ದುಘೇ॑ ಸು॒ದುಘೇ᳚ । ಪಯ॒ಸೇನ್ದ್ರ॑ಮವರ್ಧತಾಮ್ । ಇಷ॒ಮೂರ್ಜ॑ಮ॒ನ್ಯಾ ಽವಾ᳚ಕ್ಷೀತ್ । ಸಗ್ಧಿ॒ಗ್ಂ॒ ಸಪೀ॑ತಿಮ॒ನ್ಯಾ । ನವೇ॑ನ॒ ಪೂರ್ವ॒-ನ್ದಯ॑ಮಾನೇ । ಪು॒ರಾ॒ಣೇನ॒ ನವ᳚ಮ್ । ಅಧಾ॑ತಾ॒-ಮೂರ್ಜ॑ಮೂ॒ರ್ಜಾಹು॑ತೀ॒ ವಸು॒ ವಾರ್ಯಾ॑ಣಿ । ಯಜ॑ಮಾನಾಯ ಶಿಕ್ಷಿ॒ತೇ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ 46 ॥

ದೇ॒ವಾ ದೈವ್ಯಾ॒ ಹೋತಾ॑ರಾ । ದೇ॒ವಮಿನ್ದ್ರ॑ಮವರ್ಧತಾಮ್ । ಹ॒ತಾಘ॑ಶಗ್ಂ ಸಾ॒ವಾಭಾ᳚ರ್ಷ್ಟಾಂ॒-ವಁಸು॒ ವಾರ್ಯಾ॑ಣಿ । ಯಜ॑ಮಾನಾಯ ಶಿಕ್ಷಿ॒ತೌ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ ದೇ॒ವೀಸ್ತಿ॒ಸ್ರಸ್ತಿ॒ಸ್ರೋ ದೇ॒ವೀಃ । ಪತಿ॒ಮಿನ್ದ್ರ॑ಮವರ್ಧಯನ್ನ್ । ಅಸ್ಪೃ॑ಕ್ಷ॒ದ್ಭಾರ॑ತೀ॒ ದಿವ᳚ಮ್ । ರು॒ದ್ರೈರ್ಯ॒ಜ್ಞಗ್ಂ ಸರ॑ಸ್ವತೀ । ಇಡಾ॒ ವಸು॑ಮತೀ ಗೃ॒ಹಾನ್ ॥ 47 ॥

ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವ ಇನ್ದ್ರೋ॒ ನರಾ॒ಶಗ್ಂಸಃ॑ । ತ್ರಿ॒ವ॒ರೂ॒ಥ-ಸ್ತ್ರಿ॑ವನ್ಧು॒ರಃ । ದೇ॒ವಮಿನ್ದ್ರ॑ಮವರ್ಧಯತ್ । ಶ॒ತೇನ॑ ಶಿತಿಪೃ॒ಷ್ಠಾನಾ॒ಮಾಹಿ॑ತಃ । ಸ॒ಹಸ್ರೇ॑ಣ॒ ಪ್ರವ॑ರ್ತತೇ । ಮಿ॒ತ್ರಾವರು॒ಣೇದ॑ಸ್ಯ ಹೋ॒ತ್ರಮರ್ಹ॑ತಃ । ಬೃಹ॒ಸ್ಪತಿಃ॑ ಸ್ತೋ॒ತ್ರಮ್ । ಅ॒ಶ್ವಿನಾ-ಽಽದ್ಧ್ವ॑ರ್ಯವಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ 48 ॥

ದೇ॒ವ ಇನ್ದ್ರೋ॒ ವನ॒ಸ್ಪತಿಃ॑ । ಹಿರ॑ಣ್ಯಪರ್ಣೋ॒ ಮಧು॑ಶಾಖ-ಸ್ಸುಪಿಪ್ಪ॒ಲಃ । ದೇ॒ವಮಿನ್ದ್ರ॑ಮವರ್ಧಯತ್ । ದಿವ॒ಮಗ್ರೇ॑ಣಾಪ್ರಾತ್ । ಆ-ಽನ್ತರಿ॑ಕ್ಷ-ಮ್ಪೃಥಿ॒ವೀಮ॑ದೃಗ್ಂಹೀತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವ-ಮ್ಬ॒ರ॒ಃಇರ್ವಾರಿ॑ತೀನಾಮ್ । ದೇ॒ವಮಿನ್ದ್ರ॑ಮವರ್ಧಯತ್ । ಸ್ವಾ॒ಸ॒ಸ್ಥ-ಮಿನ್ದ್ರೇ॒ಣಾಸ॑ನ್ನಮ್ । ಅ॒ನ್ಯಾ ಬ॒ರ್॒ಹೀಗ್ಷ್ಯ॒ಭ್ಯ॑ಭೂತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃತ್ । ದೇ॒ವಮಿನ್ದ್ರ॑ಮವರ್ಧಯತ್ । ಸ್ವಿ॑ಷ್ಟ-ಙ್ಕು॒ರ್ವನ್-ಥ್ಸ್ವಿ॑ಷ್ಟ॒ಕೃತ್ । ಸ್ವಿ॑ಷ್ಟಮ॒ದ್ಯ ಕ॑ರೋತು ನಃ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜೇ॑ ॥ 49 ॥

(ವಿ॒ಯ॒ನ್ತು॒ ಯಜ॑ - ಶಿಕ್ಷಿ॒ತೇ - ಶಿ॑ಕ್ಷಿ॒ತೇ ವ॑ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑-ಗೃ॒ಹಾನ್.-ವೇ॑ತು॒ ಯಜಾ॑-ಭೂ॒-ಥ್ಷಟ್ಚ॑) (ಅ. 10)

ದೇ॒ವ-ಮ್ಬ॒ರ್॒ಹಿ-ರ್ದೇ॒ವೀರ್ದ್ವಾರೋ॑ ದೇ॒ವೀ ಉ॒ಷಾಸಾ॒ ನಕ್ತಾ॑ ದೇ॒ವೀ ಜೋಷ್ಟ್ರೀ॑ ದೇ॒ವೀ ಊ॒ರ್ಜಾಹು॑ತೀ ದೇ॒ವಾ ದೈವ್ಯಾ॒ ಹೋತಾ॑ರಾ ಶಿಕ್ಷಿ॒ತೌ ದೇ॒ವೀಸ್ತಿ॒ಸ್ರಸ್ತಿ॒ಸ್ರೋ ದೇ॒ವೀಃ ಪತಿ॑-ನ್ದೇ॒ವ ಇನ್ದ್ರೋ॒ ನರಾ॒ಶಗ್ಂಸೋ॑ ದೇ॒ವ ಇನ್ದ್ರೋ॒ ವನ॒ಸ್ಪತಿ॑-ರ್ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾ-ನ್ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃ-ದ್ದೇ॒ವಮ್ । ವೇ॒ತು॒ ವಿ॒ಯ॒ನ್ತು॒ ಚ॒ತುರ್ವೀ॑ತಾ॒ಮೇಕೋ॑ ವಿಯನ್ತು ಚ॒ತುರ್ವೇ॑ತು । ಅ॒ವ॒ರ್ಧ॒ಯ॒ದ॒ವ॒ರ್ಧ॒ಯ॒-ನ್ತ್ರಿರ॑ವರ್ಧತಾ॒ಮೇಕೋ॑ ಽವರ್ಧಯಗ್ಗ್ ಶ್ಚ॒ತುರ॑ವರ್ಧಯತ್ । ವಸ್ತೋ॒ರಾ ವ॒ಥ್ಸೇನ॒ ದೈವೀ॒ರಯಾ॒ವೀಷಗ್ಂ॑ ಹ॒ತಾಸ್ಪೃ॑ಕ್ಷಚ್ಛ॒ತೇನ॒ ದಿವ॒ಮಿನ್ದ್ರಗ್ಗ್॑ ಸ್ವಾಸ॒ಸ್ಥಗ್ಗ್ ಸ್ವಿ॑ಷ್ಟಮ್ । ಶಿಕ್ಷಿ॒ತೇ ಶಿ॑ಕ್ಷಿ॒ತೇ ಶಿ॑ಕ್ಷಿ॒ತೌ ।

ಅನುವಾಕಂ 11 - ಪಶುತ್ರಯೇ ಪ್ರಯ ಜಾರ್ಥಾ ಮೈತ್ರಾವರುಣಪ್ರೈಷಾಃ

ಹೋತಾ॑ ಯಕ್ಷ-ಥ್ಸ॒ಮಿಧಾ॒-ಽಗ್ನಿ-ಮಿ॒ಡಸ್ಪ॒ದೇ । ಅ॒ಶ್ವಿನೇನ್ದ್ರ॒ಗ್ಂ॒ ಸರ॑ಸ್ವತೀಮ್ । ಅ॒ಜೋ ಧೂ॒ಮ್ರೋ ನ ಗೋ॒ಧೂಮೈಃ॒ ಕ್ವ॑ಲೈರ್ಭೇಷ॒ಜಮ್ । ಮಧು॒ ಶಷ್ಪೈ॒ರ್ನ ತೇಜ॑ ಇನ್ದ್ರಿ॒ಯಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ತ್ತನೂ॒ನಪಾ॒-ಥ್ಸರ॑ಸ್ವತೀ । ಅವಿ॑ರ್ಮೇ॒ಷೋ ನ ಭೇ॑ಷ॒ಜಮ್ । ಪ॒ಥಾ ಮಧು॑ಮ॒ತಾ ಽಽಭ॑ರನ್ನ್ । ಅ॒ಶ್ವಿನೇನ್ದ್ರಾ॑ಯ ವೀ॒ರ್ಯ᳚ಮ್ ॥ 50 ॥

ಬದ॑ರೈರುಪ॒ವಾಕಾ॑ಭಿ-ರ್ಭೇಷ॒ಜ-ನ್ತೋಕ್ಮ॑ಭಿಃ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ನ್ನರಾ॒ಶಗ್ಂಸ॒ನ-ನ್ನ॒ಗ್ನಹು᳚ಮ್ । ಪತಿ॒ಗ್ಂ॒ ಸುರಾ॑ಯೈ ಭೇಷ॒ಜಮ್ । ಮೇ॒ಷ-ಸ್ಸರ॑ಸ್ವತೀ ಭಿ॒ಷಕ್ । ರಥೋ॒ ನ ಚ॒ನ್ದ್ರ್ಯ॑ಶ್ವಿನೋ᳚ರ್ವ॒ಪಾ ಇನ್ದ್ರ॑ಸ್ಯ ವೀ॒ರ್ಯ᳚ಮ್ । ಬದ॑ರೈರುಪ॒ವಾಕಾ॑ಭಿ-ರ್ಭೇಷ॒ಜ-ನ್ತೋಕ್ಮ॑ಭಿಃ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ 51 ॥

ಹೋತಾ॑ ಯಕ್ಷದಿ॒ಡೇಡಿ॒ತ ಆ॒ಜುಹ್ವಾ॑ನ॒-ಸ್ಸರ॑ಸ್ವತೀಮ್ । ಇನ್ದ್ರ॒-ಮ್ಬಲೇ॑ನ ವ॒ರ್ಧಯನ್ನ್॑ । ಋ॒ಷ॒ಭೇಣ॒ ಗವೇ᳚ನ್ದ್ರಿ॒ಯಮ್ । ಅ॒ಶ್ವಿನೇನ್ದ್ರಾ॑ಯ ವೀ॒ರ್ಯ᳚ಮ್ । ಯವೈಃ᳚ ಕ॒ರ್ಕನ್ಧು॑ಭಿಃ । ಮಧು॑ ಲಾ॒ಜೈರ್ನ ಮಾಸ॑ರಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ದ್ಬ॒ರ॒ಃಇ-ಸ್ಸು॒ಷ್ಟರೀ॒ಮೋ-ಽರ್ಣ॑ಮ್ರದಾಃ । ಭಿ॒ಷನ್ನಾಸ॑ತ್ಯಾ ॥ 52 ॥

ಭಿ॒ಷಜಾ॒-ಽಶ್ವಿನಾ-ಽಶ್ವಾ॒ ಶಿಶು॑ಮತೀ । ಭಿ॒ಷಗ್ಧೇ॒ನು-ಸ್ಸರ॑ಸ್ವತೀ । ಭಿ॒ಷಗ್ದು॒ಹ ಇನ್ದ್ರಾ॑ಯ ಭೇಷ॒ಜಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ದ್ದುರೋ॒ ದಿಶಃ॑ । ಕ॒ವ॒ಷ್ಯೋ॑ ನ ವ್ಯಚ॑ಸ್ವತೀಃ । ಅ॒ಶ್ವಿಭ್ಯಾ॒-ನ್ನ ದುರೋ॒ ದಿಶಃ॑ । ಇನ್ದ್ರೋ॒ ನ ರೋದ॑ಸೀ॒ ದುಘೇ᳚ । ದು॒ಹೇ ಕಾಮಾ॒ನ್-ಥ್ಸರ॑ಸ್ವತೀ ॥ 53 ॥

ಅ॒ಶ್ವಿನೇನ್ದ್ರಾ॑ಯ ಭೇಷ॒ಜಮ್ । ಶು॒ಕ್ರ-ನ್ನ ಜ್ಯೋತಿ॑ರಿನ್ದ್ರಿ॒ಯಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ಥ್ಸು॒ಪೇಶ॑ಸೋ॒ಷೇ ನಕ್ತ॒-ನ್ದಿವಾ᳚ । ಅ॒ಶ್ವಿನಾ॑ ಸಞ್ಜಾನಾ॒ನೇ । ಸಮ॑ಞ್ಜಾತೇ॒ ಸರ॑ಸ್ವತ್ಯಾ । ತ್ವಿಷಿ॒ಮಿನ್ದ್ರೇ॒ ನ ಭೇ॑ಷ॒ಜಮ್ । ಶ್ಯೇ॒ನೋ ನ ರಜ॑ಸಾ ಹೃ॒ದಾ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ ॥ 54 ॥

ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ದ್ದೈವ್ಯಾ॒ ಹೋತಾ॑ರಾ ಭಿ॒ಷಜಾ॒-ಽಶ್ವಿನಾ᳚ । ಇನ್ದ್ರ॒-ನ್ನ ಜಾಗೃ॑ವೀ॒ ದಿವಾ॒ ನಕ್ತ॒-ನ್ನ ಭೇ॑ಷ॒ಜೈಃ । ಶೂಷ॒ಗ್ಂ॒ ಸರ॑ಸ್ವತೀ ಭಿ॒ಷಕ್ । ಸೀಸೇ॑ನ ದುಹ ಇನ್ದ್ರಿ॒ಯಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ತ್ತಿ॒ಸ್ರೋ ದೇ॒ವೀರ್ನ ಭೇ॑ಷ॒ಜಮ್ । ತ್ರಯ॑ಸ್ತ್ರಿ॒ಧಾತ॑ವೋ॒-ಽಪಸಃ॑ । ರೂ॒ಪಮಿನ್ದ್ರೇ॑ ಹಿರ॒ಣ್ಯಯ᳚ಮ್ ॥ 55 ॥

ಅ॒ಶ್ವಿನೇಡಾ॒ ನ ಭಾರ॑ತೀ । ವಾ॒ಚಾ ಸರ॑ಸ್ವತೀ । ಮಹ॒ ಇನ್ದ್ರಾ॑ಯ ದಧುರಿನ್ದ್ರಿ॒ಯಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ತ್ತ್ವಷ್ಟಾ॑ರ॒-ಮಿನ್ದ್ರ॑ಮ॒ಶ್ವಿನಾ᳚ । ಭಿ॒ಷಜ॒-ನ್ನ ಸರ॑ಸ್ವತೀಮ್ । ಓಜೋ॒ ನ ಜೂ॒ತಿರಿ॑ನ್ದ್ರಿ॒ಯಮ್ । ವೃಕೋ॒ ನ ರ॑ಭ॒ಸೋ ಭಿ॒ಷಕ್ । ಯಶ॒-ಸ್ಸುರ॑ಯಾ ಭೇಷ॒ಜಮ್ ॥ 56 ॥

ಶ್ರಿ॒ಯಾ ನ ಮಾಸ॑ರಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ದ್ವನ॒ಸ್ಪತಿ᳚ಮ್ । ಶ॒ಮಿ॒ತಾರಗ್ಂ॑ ಶ॒ತಕ್ರ॑ತುಮ್ । ಭೀ॒ಮ-ನ್ನ ಮ॒ನ್ಯುಗ್ಂ ರಾಜಾ॑ನಂ-ವ್ಯಾಁ॒ಘ್ರ-ನ್ನಮ॑ಸಾ॒-ಽಶ್ವಿನಾ॒ ಭಾಮ᳚ಮ್ । ಸರ॑ಸ್ವತೀ ಭಿ॒ಷಕ್ । ಇನ್ದ್ರಾ॑ಯ ದುಹ ಇನ್ದ್ರಿ॒ಯಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ 57 ॥

ಹೋತಾ॑ ಯಕ್ಷದ॒ಗ್ನಿಗ್ಗ್ ಸ್ವಾಹಾ-ಽಽಜ್ಯ॑ಸ್ಯ ಸ್ತೋ॒ಕಾನಾ᳚ಮ್ । ಸ್ವಾಹಾ॒ ಮೇದ॑ಸಾ॒-ಮ್ಪೃಥ॑ಕ್ । ಸ್ವಾಹಾ॒ ಛಾಗ॑ಮ॒ಶ್ವಿಭ್ಯಾ᳚ಮ್ । ಸ್ವಾಹಾ॑ ಮೇ॒ಷಗ್ಂ ಸರ॑ಸ್ವತ್ಯೈ । ಸ್ವಾಹಾ॑ರ್ಷ॒ಭ-ಮಿನ್ದ್ರಾ॑ಯ ಸಿ॒ಗ್ಂ॒ಹಾಯ॒ ಸಹ॑ಸೇನ್ದ್ರಿ॒ಯಮ್ । ಸ್ವಾಹಾ॒-ಽಗ್ನಿ-ನ್ನ ಭೇ॑ಷ॒ಜಮ್ । ಸ್ವಾಹಾ॒ ಸೋಮ॑ಮಿನ್ದ್ರಿ॒ಯಮ್ । ಸ್ವಾಹೇನ್ದ್ರಗ್ಂ॑ ಸು॒ತ್ರಾಮಾ॑ಣಗ್ಂ ಸವಿ॒ತಾರಂ॒-ವಁರು॑ಣ-ಮ್ಭಿ॒ಷಜಾ॒-ಮ್ಪತಿ᳚ಮ್ । ಸ್ವಾಹಾ॒ ವನ॒ಸ್ಪತಿ॑-ಮ್ಪ್ರಿ॒ಯ-ಮ್ಪಾಥೋ॒ ನ ಭೇ॑ಷ॒ಜಮ್ । ಸ್ವಾಹಾ॑ ದೇ॒ವಾಗ್ಂ ಆ᳚ಜ್ಯ॒ಪಾನ್ ॥ 58 ॥

ಸ್ವಾಹಾ॒-ಽಗ್ನಿಗ್ಂ ಹೋ॒ತ್ರಾಜ್ಜು॑ಷಾ॒ಣೋ ಅ॒ಗ್ನಿ-ರ್ಭೇ॑ಷ॒ಜಮ್ । ಪಯ॒-ಸ್ಸೋಮಃ॑ ಪರಿ॒ಸ್ರುತಾ॑ ಘೃ॒ತ-ಮ್ಮಧು॑ । ವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷದ॒ಶ್ವಿನಾ॒ ಸರ॑ಸ್ವತೀ॒ಮಿನ್ದ್ರಗ್ಂ॑ ಸು॒ತ್ರಾಮಾ॑ಣಮ್ । ಇ॒ಮೇ ಸೋಮಾ᳚-ಸ್ಸು॒ರಾಮಾ॑ಣಃ । ಛಾಗೈ॒ರ್ನ ಮೇ॒ಷೈರ್-ಋ॑ಷ॒ಭೈ-ಸ್ಸು॒ತಾಃ । ಶಷ್ಪೈ॒ರ್ನ ತೋಕ್ಮ॑ಭಿಃ । ಲಾ॒ಜೈರ್ಮಹ॑ಸ್ವನ್ತಃ । ಮದಾ॒ ಮಾಸ॑ರೇಣ॒ ಪರಿ॑ಷ್ಕೃತಾಃ । ಶು॒ಕ್ರಾಃ ಪಯ॑ಸ್ವನ್ತೋ॒-ಽಮೃತಾಃ᳚ । ಪ್ರಸ್ಥಿ॑ತಾ ವೋ ಮಧು॒ಶ್ಚುತಃ॑ । ತಾನ॒ಶ್ವಿನಾ॒ ಸರ॑ಸ್ವ॒ತೀನ್ದ್ರಃ॑ ಸು॒ತ್ರಾಮಾ॑ ವೃತ್ರ॒ಹಾ । ಜು॒ಷನ್ತಾಗ್ಂ॑ ಸೌ॒ಮ್ಯ-ಮ್ಮಧು॑ । ಪಿಬ॑ನ್ತು॒ ಮದ॑ನ್ತು ವಿ॒ಯನ್ತು॒ ಸೋಮ᳚ಮ್ । ಹೋತ॒ರ್ಯಜ॑ ॥ 59 ॥

(ವೀ॒ರ್ಯಂ - ಁವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜ॒ - ನಾಸ॑ತ್ಯಾ॒ - ಸರ॑ಸ್ವತೀ॒ - ಮಧು॑ - ಹಿರ॒ಣ್ಯಯಂ॑ - ಭೇಷ॒ಜಂ - ಁವಿ॒ಯನ್ತ್ವಾಜ್ಯ॑ಸ್ಯ॒ ಹೋತ॒ರ್ಯಜಾ᳚ - ಜ್ಯ॒ಪಾ - ನ॒ಮೃತಾಃ॒ ಪಞ್ಚ॑ ಚ) (ಅ. 11)

ಸ॒ಮಿಧಾ॒-ಽಗ್ನಿಗ್ಂ ಷಟ್ । ತನೂ॒ನಪಾ᳚-ಥ್ಸ॒ಪ್ತ । ನರಾ॒ಶಗ್ಂಸ॒ಮೃಷಿಃ॑ । ಇ॒ಡೇಡಿ॒ತೋ ಯವೈ॑ರ॒ಷ್ಟೌ । ಬ॒ರ್॒ಹಿ-ಸ್ಸ॒ಪ್ತ । ದುರೋ॒-ಽಶ್ವಿನಾ॑ ಶು॒ಕ್ರನ್ನವ॑ । ಸು॒ಪೇಶ॑ಸೋ॒ಷೇ ನಕ್ತ॒ಮೃಷಿಃ॑। ದೈವ್ಯಾ॒ ಹೋತಾ॑ರಾ॒ ಸೀಸೇ॑ನ॒ ರಸಃ॑ । ತಿ॒ಸ್ರಸ್ತ್ವಷ್ಟಾ॑ರಮ॒ಷ್ಟಾವ॑ಷ್ಟೌ । ವನ॒ಸ್ಪತಿ॒ಮೃಷಿಃ॑ । ಅ॒ಗ್ನಿ-ನ್ತ್ರಯೋ॑ದಶ । ಅ॒ಶ್ವಿನಾ॒ ದ್ವಾದ॑ಶ॒ ತ್ರಯೋ॑ದಶ । ಸ॒ಮಿಧಾ॒-ಽಗ್ನಿ-ಮ್ಬದ॑ರೈ॒-ರ್ಬದ॑ರೈ॒-ರ್ಯವೈ॑ರ॒ಶ್ವಿನಾ॒ ತ್ವಿಷಿ॑ಮ॒ಶ್ವಿನಾ॒ ನ ಭೇ॑ಷ॒ಜಗ್ಂ ರೂ॒ಪಮ॒ಶ್ವಿನಾ॑ ಭೀ॒ಮ-ಮ್ಭಾಮ᳚ಮ್ ।

ಅನುವಾಕಂ 12 - ಪಶುತ್ರಯೇ ಪ್ರಯಾಜಯಾಜ್ಯಾ ಆಪ್ರಿಯಃ

ಸಮಿ॑ದ್ಧೋ ಅ॒ಗ್ನಿರ॑ಶ್ವಿನಾ । ತ॒ಪ್ತೋ ಘ॒ರ್ಮೋ ವಿ॒ರಾಟ್-ಥ್ಸು॒ತಃ । ದು॒ಹೇ ಧೇ॒ನು-ಸ್ಸರ॑ಸ್ವತೀ । ಸೋಮಗ್ಂ॑ ಶು॒ಕ್ರಮಿ॒ಹೇನ್ದ್ರಿ॒ಯಮ್ ॥ ತ॒ನೂ॒ಪಾ ಭಿ॒ಷಜಾ॑ ಸು॒ತೇ । ಅ॒ಶ್ವಿನೋ॒ಭಾ ಸರ॑ಸ್ವತೀ । ಮದ್ಧ್ವಾ॒ ರಜಾಗ್ಂ॑ಸೀನ್ದ್ರಿ॒ಯಮ್ । ಇನ್ದ್ರಾ॑ಯ ಪ॒ಥಿಭಿ॑-ರ್ವಹಾನ್ ॥ ಇನ್ದ್ರಾ॒ಯೇನ್ದು॒ಗ್ಂ॒ ಸರ॑ಸ್ವತೀ । ನರಾ॒ಶಗ್ಂಸೇ॑ನ ನ॒ಗ್ನಹುಃ॑ ॥ 60 ॥

ಅಧಾ॑ತಾಮ॒ಶ್ವಿನಾ॒ ಮಧು॑ । ಭೇ॒ಷ॒ಜ-ಮ್ಭಿ॒ಷಜಾ॑ ಸು॒ತೇ ॥ ಆ॒ಜುಹ್ವಾ॑ನಾ॒ ಸರ॑ಸ್ವತೀ । ಇನ್ದ್ರಾ॑ಯೇನ್ದ್ರಿ॒ಯಾಣಿ॑ ವೀ॒ರ್ಯ᳚ಮ್ । ಇಡಾ॑ಭಿರಶ್ವಿನಾ॒ವಿಷ᳚ಮ್ । ಸಮೂರ್ಜ॒ಗ್ಂ॒ ಸಗ್ಂ ರ॒ಯಿ-ನ್ದ॑ಧುಃ ॥ ಅಶ್ವಿ॑ನಾ॒ ನಮು॑ಚೇ-ಸ್ಸು॒ತಮ್ । ಸೋಮಗ್ಂ॑ ಶು॒ಕ್ರ-ಮ್ಪ॑ರಿ॒ಸ್ರುತಾ᳚ । ಸರ॑ಸ್ವತೀ॒ ತಮಾಭ॑ರತ್ । ಬ॒ರ್॒ಹಿಷೇನ್ದ್ರಾ॑ಯ॒ ಪಾತ॑ವೇ ॥ 61 ॥

ಕ॒ವ॒ಷ್ಯೋ॑ ನ ವ್ಯಚ॑ಸ್ವತೀಃ । ಅ॒ಶ್ವಿಭ್ಯಾ॒-ನ್ನ ದುರೋ॒ ದಿಶಃ॑ । ಇನ್ದ್ರೋ॒ ನ ರೋದ॑ಸೀ॒ ದುಘೇ᳚ । ದು॒ಹೇ ಕಾಮಾ॒ನ್-ಥ್ಸರ॑ಸ್ವತೀ ॥ ಉ॒ಷಾಸಾ॒ ನಕ್ತ॑ಮಶ್ವಿನಾ । ದಿವೇನ್ದ್ರಗ್ಂ॑ ಸಾ॒ಯಮಿ॑ನ್ದ್ರಿ॒ಯೈಃ । ಸ॒ಜಾ॒ನ್ನಾ॒ನೇ ಸು॒ಪೇಶ॑ಸಾ । ಸಮ॑ಞ್ಜಾತೇ॒ ಸರ॑ಸ್ವತ್ಯಾ ॥ ಪಾ॒ತ-ನ್ನೋ॑ ಅಶ್ವಿನಾ॒ ದಿವಾ᳚ । ಪಾ॒ಹಿ ನಕ್ತಗ್ಂ॑ ಸರಸ್ವತಿ ॥ 62 ॥

ದೈವ್ಯಾ॑ ಹೋತಾರಾ ಭಿಷಜಾ । ಪಾ॒ತಮಿನ್ದ್ರ॒ಗ್ಂ॒ ಸಚಾ॑ ಸು॒ತೇ ॥ ತಿ॒ಸ್ರಸ್ತ್ರೇ॒ಧಾ ಸರ॑ಸ್ವತೀ । ಅ॒ಶ್ವಿನಾ॒ ಭಾರ॒ತೀಡಾ᳚ । ತೀ॒ವ್ರ-ಮ್ಪ॑ರಿ॒ಸ್ರುತಾ॒ ಸೋಮ᳚ಮ್ । ಇನ್ದ್ರಾ॑ಯ ಸುಷವು॒ರ್ಮದ᳚ಮ್ ॥ ಅಶ್ವಿ॑ನಾ ಭೇಷ॒ಜ-ಮ್ಮಧು॑ । ಭೇ॒ಷ॒ಜ-ನ್ನ॒-ಸ್ಸರ॑ಸ್ವತೀ । ಇನ್ದ್ರೇ॒ ತ್ವಷ್ಟಾ॒ ಯಶ॒-ಶ್ಶ್ರಿಯ᳚ಮ್ । ರೂ॒ಪಗ್ಂ ರೂ॑ಪಮಧು-ಸ್ಸು॒ತೇ ॥ ಋ॒ತು॒ಥೇನ್ದ್ರೋ॒ ವನ॒ಸ್ಪತಿಃ॑ । ಶ॒ಶ॒ಮಾ॒ನಃ ಪ॑ರಿ॒ಸ್ರುತಾ᳚ । ಕೀ॒ಲಾಲ॑ಮ॒ಶ್ವಿಭ್ಯಾ॒-ಮ್ಮಧು॑ । ದು॒ಹೇ ಧೇ॒ನು-ಸ್ಸರ॑ಸ್ವತೀ ॥ ಗೋಭಿ॒ರ್ನ ಸೋಮ॑ಮಶ್ವಿನಾ । ಮಾಸ॑ರೇಣ ಪರಿ॒ಷ್ಕೃತಾ᳚ । ಸಮ॑ಧಾತಾ॒ಗ್ಂ॒ ಸರ॑ಸ್ವತ್ಯಾ । ಸ್ವಾಹೇನ್ದ್ರೇ॑ ಸು॒ತ-ಮ್ಮಧು॑ ॥ 63 ॥

(ನ॒ಗ್ನಹುಃ॒ - ಪಾತ॑ವೇ - ಸರಸ್ವ - ತ್ಯಧು-ಸ್ಸು॒ತೇ᳚-ಽಷ್ಟೌ ಚ॑) (ಅ. 12)

ಅನುವಾಕಂ 13 - ಪಶುತ್ರಯೇ ವಪಾದೀನಾಂ-ಯಾಁಜ್ಯಾನುವಾಕ್ಯಾಃ

ಅ॒ಶ್ವಿನಾ॑ ಹ॒ವಿರಿ॑ನ್ದ್ರಿ॒ಯಮ್ । ನಮು॑ಚೇರ್ಧಿ॒ಯಾ ಸರ॑ಸ್ವತೀ । ಆ ಶು॒ಕ್ರಮಾ॑ಸು॒ರಾದ್ವ॒ಸು । ಮ॒ಘಮಿನ್ದ್ರಾ॑ಯ ಜಭ್ರಿರೇ ॥ ಯಮ॒ಶ್ವಿನಾ॒ ಸರ॑ಸ್ವತೀ । ಹ॒ವಿಷೇನ್ದ್ರ॒-ಮವ॑ರ್ಧಯನ್ನ್ । ಸ ಬಿ॑ಭೇದ ಬ॒ಲಂ (ವ॒ಲಂ) ಮ॒ಘಮ್ । ನಮು॑ಚಾವಾಸು॒ರೇ ಸಚಾ᳚ । ತಮಿನ್ದ್ರ॑-ಮ್ಪ॒ಶವ॒-ಸ್ಸಚಾ᳚ ॥ ಅ॒ಶ್ವಿನೋ॒ಭಾ ಸರ॑ಸ್ವತೀ ॥ 64 ॥

ದಧಾ॑ನಾ ಅ॒ಭ್ಯ॑ನೂಷತ । ಹ॒ವಿಷಾ॑ ಯ॒ಜ್ಞಮಿ॑ನ್ದ್ರಿ॒ಯಮ್ ॥ ಯ ಇನ್ದ್ರ॑ ಇನ್ದ್ರಿ॒ಯ-ನ್ದ॒ಧುಃ । ಸ॒ವಿ॒ತಾ ವರು॑ಣೋ॒ ಭಗಃ॑ । ಸ ಸು॒ತ್ರಾಮಾ॑ ಹ॒ವಿಷ್ಪ॑ತಿಃ । ಯಜ॑ಮಾನಾಯ ಸಶ್ಚತ ॥ ಸ॒ವಿ॒ತಾ ವರು॑ಣೋ॒ ದಧ॑ತ್ । ಯಜ॑ಮಾನಾಯ ದಾ॒ಶುಷೇ᳚ । ಆದ॑ತ್ತ॒ ನಮು॑ಚೇ॒ರ್ವಸು॑ । ಸು॒ತ್ರಾಮಾ॒ ಬಲ॑ಮಿನ್ದ್ರಿ॒ಯಮ್ ॥ 65 ॥

ವರು॑ಣಃ, ಕ್ಷ॒ತ್ರಮಿ॑ನ್ದ್ರಿ॒ಯಮ್ । ಭಗೇ॑ನ ಸವಿ॒ತಾ ಶ್ರಿಯ᳚ಮ್ । ಸು॒ತ್ರಾಮಾ॒ ಯಶ॑ಸಾ॒ ಬಲ᳚ಮ್ । ದಧಾ॑ನಾ ಯ॒ಜ್ಞಮಾ॑ಶತ ॥ ಅಶ್ವಿ॑ನಾ॒ ಗೋಭಿ॑ರಿನ್ದ್ರಿ॒ಯಮ್ । ಅಶ್ವೇ॑ಭಿ-ರ್ವೀ॒ರ್ಯ॑-ಮ್ಬಲ᳚ಮ್ । ಹ॒ವಿಷೇನ್ದ್ರ॒ಗ್ಂ॒ ಸರ॑ಸ್ವತೀ । ಯಜ॑ಮಾನ-ಮವರ್ಧಯನ್ನ್ ॥ ತಾ ನಾಸ॑ತ್ಯಾ ಸು॒ಪೇಶ॑ಸಾ । ಹಿರ॑ಣ್ಯವರ್ತನೀ॒ ನರಾ᳚ । ಸರ॑ಸ್ವತೀ ಹ॒ವಿಷ್ಮ॑ತೀ । ಇನ್ದ್ರ॒ ಕಮ॑ರ್ಸು ನೋ-ಽವತ ॥ ತಾ ಭಿ॒ಷಜಾ॑ ಸು॒ಕರ್ಮ॑ಣಾ । ಸಾ ಸು॒ದುಘಾ॒ ಸರ॑ಸ್ವತೀ । ಸ ವೃ॑ತ್ರ॒ಹಾ ಶ॒ತಕ್ರ॑ತುಃ । ಇನ್ದ್ರಾ॑ಯ ದಧುರಿನ್ದ್ರಿ॒ಯಮ್ ॥ 66 ॥

(ಉ॒ಭಾ ಸರ॑ಸ್ವತೀ॒ - ಬಲ॑ಮಿನ್ದ್ರಿ॒ಯಂ - ನರಾ॒ ಷಟ್ಚ॑) (ಅ. 13)

ಅನುವಾಕಂ 14 - ಪಶುತ್ರಯೇ ಅನೂಯಾಜಪ್ರೈಷಾಃ

ದೇ॒ವ-ಮ್ಬ॒ರ್॒ಹಿ-ಸ್ಸರ॑ಸ್ವತೀ । ಸು॒ದೇ॒ವಮಿನ್ದ್ರೇ॑ ಅ॒ಶ್ವಿನಾ᳚ । ತೇಜೋ॒ ನ ಚಕ್ಷು॑ರ॒ಕ್ಷ್ಯೋಃ । ಬ॒ರ್॒ಹಿಷಾ॑ ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವೀರ್ದ್ವಾರೋ॑ ಅ॒ಶ್ವಿನಾ᳚ । ಭಿ॒ಷಜೇನ್ದ್ರೇ॒ ಸರ॑ಸ್ವತೀ । ಪ್ರಾ॒ಣ-ನ್ನ ವೀ॒ರ್ಯ॑-ನ್ನ॒ಸಿ । ದ್ವಾರೋ॑ ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 67 ॥

ದೇ॒ವೀ ಉ॒ಷಾಸಾ॑ವ॒ಶ್ವಿನಾ᳚ । ಭಿ॒ಷಜೇನ್ದ್ರೇ॒ ಸರ॑ಸ್ವತೀ । ಬಲ॒-ನ್ನ ವಾಚ॑ಮಾ॒ಸ್ಯೇ᳚ । ಉ॒ಷಾಭ್ಯಾ᳚-ನ್ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವೀ ಜೋಷ್ಟ್ರೀ॑ ಅ॒ಶ್ವಿನಾ᳚ । ಸು॒ತ್ರಾಮೇನ್ದ್ರೇ॒ ಸರ॑ಸ್ವತೀ । ಶ್ರೋತ್ರ॒-ನ್ನ ಕರ್ಣ॑ಯೋ॒ರ್ಯಶಃ॑ । ಜೋಷ್ಟ್ರೀ᳚ಭ್ಯಾ-ನ್ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 68 ॥

ದೇ॒ವೀ ಊ॒ರ್ಜಾಹು॑ತೀ॒ ದುಘೇ॑ ಸು॒ದುಘೇ᳚ । ಪಯ॒ಸೇನ್ದ್ರ॒ಗ್ಂ॒ ಸರ॑ಸ್ವತ್ಯ॒ಶ್ವಿನಾ॑ ಭಿ॒ಷಜಾ॑-ಽವತ । ಶು॒ಕ್ರ-ನ್ನ ಜ್ಯೋತಿ॒-ಸ್ಸ್ತನ॑ಯೋ॒ರಾಹು॑ತೀ ಧತ್ತ ಇನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವಾ ದೇ॒ವಾನಾ᳚-ಮ್ಭಿ॒ಷಜಾ᳚ । ಹೋತಾ॑ರಾ॒ವಿನ್ದ್ರ॑-ಮ॒ಶ್ವಿನಾ᳚ । ವ॒ಷ॒ಟ್ಕಾ॒ರೈ-ಸ್ಸರ॑ಸ್ವತೀ । ತ್ವಿಷಿ॒-ನ್ನ ಹೃದ॑ಯೇ ಮ॒ತಿಮ್ । ಹೋತೃ॑ಭ್ಯಾ-ನ್ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 69 ॥

ದೇ॒ವೀ-ಸ್ತಿ॒ಸ್ರ-ಸ್ತಿ॒ಸ್ರೋ ದೇ॒ವೀಃ । ಸರ॑ಸ್ವತ್ಯ॒ಶ್ವಿನಾ॒ ಭಾರ॒ತೀಡಾ᳚ । ಶೂಷ॒-ನ್ನ ಮದ್ಧ್ಯೇ॒ ನಾಭ್ಯಾ᳚ಮ್ । ಇನ್ದ್ರಾ॑ಯ ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವ ಇನ್ದ್ರೋ॒ ನರಾ॒ಶಗ್ಂಸಃ॑ । ತ್ರಿ॒ವ॒ರೂ॒ಥ-ಸ್ಸರ॑ಸ್ವತ್ಯಾ॒ ಽಶ್ವಿಭ್ಯಾ॑ಮೀಯತೇ॒ ರಥಃ॑ । ರೇತೋ॒ ನ ರೂ॒ಪಮ॒ಮೃತ॑-ಞ್ಜ॒ನಿತ್ರ᳚ಮ್ । ಇನ್ದ್ರಾ॑ಯ॒ ತ್ವಷ್ಟಾ॒ ದಧ॑ದಿನ್ದ್ರಿ॒ಯಾಣಿ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 70 ॥

ದೇ॒ವ ಇನ್ದ್ರೋ॒ ವನ॒ಸ್ಪತಿಃ॑ । ಹಿರ॑ಣ್ಯಪರ್ಣೋ ಅ॒ಶ್ವಿಭ್ಯಾ᳚ಮ್ । ಸರ॑ಸ್ವತ್ಯಾ-ಸ್ಸುಪಿಪ್ಪ॒ಲಃ । ಇನ್ದ್ರಾ॑ಯ ಪಚ್ಯತೇ॒ ಮಧು॑ । ಓಜೋ॒ ನ ಜೂ॒ತಿಮೃ॑ಷ॒ಭೋ ನ ಭಾಮ᳚ಮ್ । ವನ॒ಸ್ಪತಿ॑ರ್ನೋ॒ ದಧ॑ದಿನ್ದ್ರಿ॒ಯಾಣಿ॑ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾಮ್ । ಅ॒ದ್ಧ್ವ॒ರೇ ಸ್ತೀ॒ರ್ಣಮ॒ಶ್ವಿಭ್ಯಾ᳚ಮ್ । ಊರ್ಣ॑ಮ್ರದಾ॒-ಸ್ಸರ॑ಸ್ವತ್ಯಾಃ ॥ 71 ॥

ಸ್ಯೋ॒ನಮಿ॑ನ್ದ್ರ ತೇ॒ ಸದಃ॑ । ಈ॒ಶಾಯೈ॑ ಮ॒ನ್ಯುಗ್ಂ ರಾಜಾ॑ನ-ಮ್ಬ॒ರ್॒ಹಿಷಾ॑ ದಧುರಿನ್ದ್ರಿ॒ಯಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃತ್ । ದೇ॒ವಾನ್.ಯ॑ಕ್ಷ-ದ್ಯಥಾಯ॒ಥಮ್ । ಹೋತಾ॑ರಾ॒-ವಿನ್ದ್ರ॑ಮ॒ಶ್ವಿನಾ᳚ । ವಾ॒ಚಾ ವಾಚ॒ಗ್ಂ॒ ಸರ॑ಸ್ವತೀಮ್ । ಅ॒ಗ್ನಿಗ್ಂ ಸೋಮಗ್ಗ್॑ ಸ್ವಿಷ್ಟ॒ಕೃತ್ । ಸ್ವಿ॑ಷ್ಟ॒ ಇನ್ದ್ರಃ॑ ಸು॒ತ್ರಾಮಾ॑ ಸವಿ॒ತಾ ವರು॑ಣೋ ಭಿ॒ಷಕ್ । ಇ॒ಷ್ಟೋ ದೇ॒ವೋ ವನ॒ಸ್ಪತಿಃ॑ । ಸ್ವಿ॑ಷ್ಟಾ ದೇ॒ವಾ ಆ᳚ಜ್ಯ॒ಪಾಃ । ಇ॒ಷ್ಟೋ ಅ॒ಗ್ನಿರ॒ಗ್ನಿನಾ᳚ । ಹೋತಾ॑ ಹೋ॒ತ್ರೇ ಸ್ವಿ॑ಷ್ಟ॒ಕೃತ್ । ಯಶೋ॒ ನ ದಧ॑ದಿನ್ದ್ರಿ॒ಯಮ್ । ಊರ್ಜ॒ಮಪ॑ಚಿತಿಗ್ಗ್ ಸ್ವ॒ಧಾಮ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 72 ॥

(ದ್ವಾರೋ॑ ದಧುರಿನ್ದ್ರಿ॒ಯಂ-ವಁ॑ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॒ - ಜೋಷ್ಟ್ರೀ᳚ಭ್ಯಾ-ನ್ದಧುರಿನ್ದ್ರಿ॒ಯಂ-ವಁ॑ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॒ -ಹೋತೃ॑ಭ್ಯಾ-ನ್ದಧುರಿನ್ದ್ರಿ॒ಯಂ-ವಁ॑ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜೇ᳚ - ನ್ದ್ರಿ॒ಯಾಣಿ॑ ವಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॒ - ಸರ॑ಸ್ವತ್ಯಾ॒ - ವನ॒ಸ್ಪತಿ॒-ಷ್ಷಟ್ಚ॑) (ಅ. 14)

(ದೇ॒ವ-ಮ್ಬ॒ರ್॒ಹಿ-ರ್ದೇ॒ವೀ-ರ್ದ್ವಾರೋ॑ ದೇ॒ವೀ ಉ॒ಷಾಸಾ॑ವ॒ಶ್ವಿನಾ॑ ದೇ॒ವೀ ಜೋಷ್ಟ್ರ॑ ದೇ॒ವೀ ಊ॒ರ್ಜಾಹೂ॑ತೀ ದೇ॒ವಾ ದೇ॒ವಾನಾ᳚-ಮ್ಭಿ॒ಷಜಾ॑ ವಷಟ್ಕಾ॒ರೈ-ರ್ದೇ॒ವೀಸ್ತಿಸ್ರಸ್ತಿ॒ಸ್ರೋ ದೇ॒ವೀ-ಸ್ಸರ॑ಸ್ವತೀ ದೇ॒ವ ಇನ್ದ್ರೋ॒ ನರಾ॒ಶಗ್ಂಸೋ॑ ದೇ॒ವ ಇನ್ದ್ರೋ॒ ವನ॒ಸ್ಪತಿ॑ರ್ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾ-ನ್ದೇ॒ವೋಅ॒ಗ್ನಿ-ಸ್ಸ್ವಿ॑ಷ್ಟ॒ಕೃ-ದ್ದೇ॒ವಾನ್) ।

(ಸ॒ಮಿಧಾ॒-ಽಗ್ನಿ-ನ್ದೇ॒ವ-ಮ್ಬ॒ರ್॒ಹಿ-ಸ್ಸರ॑ಸ್ವತ್ಯಾ॒ಶ್ವಿನಾ॒ ಸರ್ವಂ॑-ವಿಁಯನ್ತು । ದ್ವಾರ॑ಸ್ತಿ॒ಸ್ರ-ಸ್ಸಂರ್ವ॑ ವಿಯನ್ತು । ಅ॒ಜ ಇನ್ದ್ರ॒ಮೋಜೋ॒-ಽಗ್ನಿ-ಮ್ಪರ॒-ಸ್ಸರ॑ಸ್ವತೀಮ್ । ನಕ್ತ॒ಮ್ಪೂರ್ವ॒-ಸ್ಸರ॑ಸ್ವತಿ । ಅ॒ನ್ಯತ್ರ॒ ಸರ॑ಸ್ವತಿ । ಭಿ॒ಷ-ಕ್ಪೂರ್ವ॑-ನ್ದುಹ ಇನ್ದ್ರಿ॒ಯಮ್ । ಅ॒ನ್ಯತ್ರ॑ ದಧುರಿನ್ದ್ರಿ॒ಯಮ್ । ಸೌ॒ತ್ರಾ॒ಮ॒ಣ್ಯಾಗ್ಂ ಸು॑ತಾಸು॒ತೀ । ಅ॒ಞ್ಜನ್ತ್ಯ॒ಯಂ-ಯಁಜ॑ಮಾನಃ)

ಅನುವಾಕಂ 15 - ಸೂಕ್ತವಾಕಪ್ರೈಷಃ

ಅ॒ಗ್ನಿಮ॒ದ್ಯ ಹೋತಾ॑ರಮವೃಣೀತ । ಅ॒ಯಗ್ಂ ಸು॑ತಾಸು॒ತೀ ಯಜ॑ಮಾನಃ । ಪಚ॑-ನ್ಪ॒ಕ್ತೀಃ । ಪಚ॑-ನ್ಪುರೋ॒ಡಾಶಾನ್॑ । ಗೃ॒ಹ್ಣ-ನ್ಗ್ರಹಾನ್॑ । ಬ॒ದ್ಧ್ನನ್ನ॒ಶ್ವಿಭ್ಯಾ॒-ಞ್ಛಾಗ॒ಗ್ಂ॒ ಸರ॑ಸ್ವತ್ಯಾ॒ ಇನ್ದ್ರಾ॑ಯ । ಬ॒ದ್ಧ್ನನ್-ಥ್ಸರ॑ಸ್ವತ್ಯೈ ಮೇ॒ಷಮಿನ್ದ್ರಾ॑ಯಾ॒ಶ್ವಿಭ್ಯಾ᳚ಮ್ । ಬ॒ದ್ಧ್ನನ್ನಿನ್ದ್ರಾ॑ಯರ್ಷ॒ಭ-ಮ॒ಶ್ವಿಭ್ಯಾ॒ಗ್ಂ॒ ಸರ॑ಸ್ವತ್ಯೈ । ಸೂ॒ಪ॒ಸ್ಥಾ ಅ॒ದ್ಯ ದೇ॒ವೋ ವನ॒ಸ್ಪತಿ॑ರಭವತ್ । ಅ॒ಶ್ವಿಭ್ಯಾ॒-ಞ್ಛಾಗೇ॑ನ॒ ಸರ॑ಸ್ವತ್ಯಾ॒ ಇನ್ದ್ರಾ॑ಯ ॥ 73 ॥

ಸರ॑ಸ್ವತ್ಯೈ ಮೇ॒ಷೇಣೇನ್ದ್ರಾ॑ಯಾ॒ಶ್ವಿಭ್ಯಾ᳚ಮ್ । ಇನ್ದ್ರಾ॑ಯರ್ಷ॒ಭೇಣಾ॒ಶ್ವಿಭ್ಯಾ॒ಗ್ಂ॒ ಸರ॑ಸ್ವತ್ಯೈ । ಅಕ್ಷ॒ಗ್ಗ್॒ಸ್ತಾನ್ಮೇ॑ದ॒ಸ್ತಃ ಪ್ರತಿ॑ ಪಚ॒ತಾ-ಽಗ್ರ॑ಭೀಷುಃ । ಅವೀ॑ವೃಧನ್ತ॒ ಗ್ರಹೈಃ᳚ । ಅಪಾ॑ತಾಮ॒ಶ್ವಿನಾ॒ ಸರ॑ಸ್ವ॒ತೀನ್ದ್ರಃ॑ ಸು॒ತ್ರಾಮಾ॑ ವೃತ್ರ॒ಹಾ । ಸೋಮಾ᳚ನ್-ಥ್ಸು॒ರಾಮ್ಣಃ॑ । ಉಪೋ॑ ಉಕ್ಥಾಮ॒ದಾ-ಶ್ಶ್ರೌ॒ದ್ವಿಮದಾ॑ ಅದನ್ನ್ । ಅವೀ॑ವೃಧ-ನ್ತಾಙ್ಗೂ॒ಷೈಃ । ತ್ವಾಮ॒ದ್ಯರ್ಷ॑ ಆರ್ಷೇಯರ್ಷೀಣಾ-ನ್ನಪಾದವೃಣೀತ । ಅ॒ಯಗ್ಂ ಸು॑ತಾಸು॒ತೀ ಯಜ॑ಮಾನಃ । ಬ॒ಹುಭ್ಯ॒ ಆಸಙ್ಗ॑ತೇಭ್ಯಃ । ಏ॒ಷ ಮೇ॑ ದೇ॒ವೇಷು॒ ವಸು॒ ವಾರ್ಯಾ ಯ॑ಕ್ಷ್ಯತ॒ ಇತಿ॑ । ತಾ ಯಾ ದೇ॒ವಾ ದೇ॑ವ॒ದಾನಾ॒ನ್ಯದುಃ॑ । ತಾನ್ಯ॑ಸ್ಮಾ॒ ಆ ಚ॒ ಶಾಸ್ವ॑ । ಆ ಚ॑ ಗುರಸ್ವ । ಇ॒ಷಿ॒ತಶ್ಚ॑ ಹೋತ॒ರಸಿ॑ ಭದ್ರ॒ವಾಚ್ಯಾ॑ಯ॒ ಪ್ರೇಷಿ॑ತೋ॒ ಮಾನು॑ಷಃ । ಸೂ॒ಕ್ತ॒ವಾ॒ಕಾಯ॑ ಸೂ॒ಕ್ತಾ ಬ್ರೂ॑ಹಿ ॥ 74 ॥

(ಇನ್ದ್ರಾ॑ಯ॒ - ಯಜ॑ಮಾನ-ಸ್ಸ॒ಪ್ತ ಚ॑) (ಅ. 15)

ಅನುವಾಕಂ 16 - ಪಿತೃಯಜ್ಞಯಾಜ್ಯಾನುವಾಕ್ಯಾಃ

ಉ॒ಶನ್ತ॑ಸ್ತ್ವಾ ಹವಾಮಹ ಉ॒ಶನ್ತ॒-ಸ್ಸಮಿ॑ಧೀಮಹಿ । ಉ॒ಶನ್ನು॑ಶ॒ತ ಆ ವ॑ಹ ಪಿ॒ತೄನ್ ಹ॒ವಿಷೇ॒ ಅತ್ತ॑ವೇ ॥, ಆ ನೋ॑ ಅಗ್ನೇ ಸುಕೇ॒ತುನಾ᳚ । ರ॒ಯಿಂ-ವಿಁ॒ಶ್ವಾಯು॑ಪೋಷಸಮ್ । ಮಾ॒ರ್ಡೀ॒ಕ-ನ್ಧೇ॑ಹಿ ಜೀ॒ವಸೇ᳚ ॥। ತ್ವಗ್ಂ ಸೋ॑ಮ ಮ॒ಹೇ ಭಗ᳚ಮ್ । ತ್ವಂ-ಯೂಁನ॑ ಋತಾಯ॒ತೇ । ದಕ್ಷ॑-ನ್ದಧಾಸಿ ಜೀ॒ವಸೇ᳚ ॥,ತ್ವಗ್ಂ ಸೋ॑ಮ॒ ಪ್ರಚಿ॑ಕಿತೋ ಮನೀ॒ಷಾ ತ್ವಗ್ಂ ರಜಿ॑ಷ್ಠ॒ಮನು॑ ನೇಷಿ॒ ಪನ್ಥಾ᳚ಮ್ । ತವ॒ ಪ್ರಣೀ॑ತೀ ಪಿ॒ತರೋ॑ ನ ಇನ್ದೋ ದೇ॒ವೇಷು॒ ರತ್ನ॑ಮ ಭಜನ್ತ॒ ಧೀರಾಃ᳚ ॥। ತ್ವಯಾ॒ ಹಿ ನಃ॑ ಪಿ॒ತರಃ॑ ಸೋಮ॒ ಪೂರ್ವೇ॒ ಕರ್ಮಾ॑ಣಿ ಚ॒ಕ್ರುಃ ಪ॑ವಮಾನ॒ ಧೀರಾಃ᳚ । ವ॒ನ್ವನ್ನವಾ॑ತಃ ಪರಿ॒ಧೀಗ್ಂ ರಪೋ᳚ರ್ಣು ವೀ॒ರೇಭಿ॒ರಶ್ವೈ᳚ರ್ಮ॒ಘವಾ॑ ಭವಾ ನಃ ॥, ತ್ವಗ್ಂ ಸೋ॑ಮ ಪಿ॒ತೃಭಿಃ॑ ಸಂವಿಁದಾ॒ನೋ-ಽನು॒ ದ್ಯಾವಾ॑ಪೃಥಿ॒ವೀ ಆ ತ॑ತನ್ಥ । ತಸ್ಮೈ॑ ತ ಇನ್ದೋ ಹ॒ವಿಷಾ॑ ವಿಧೇಮ ವ॒ಯಗ್ಗ್ ಸ್ಯಾ॑ಮ॒ ಪತ॑ಯೋ ರಯೀ॒ಣಾಮ್ ॥ । ಬರ್ಹಿ॑ಷದಃ ಪಿತರ ಊ॒ತ್ಯ॑ರ್ವಾಗಿ॒ಮಾ ವೋ॑ ಹ॒ವ್ಯಾ ಚ॑ಕೃಮಾ ಜು॒ಷಧ್ವ᳚ಮ್ । ತ ಆ ಗ॒ತಾ-ಽವ॑ಸಾ॒ ಶ-ನ್ತ॑ಮೇ॒ನಾಥಾ॒ಸ್ಮಭ್ಯ॒ಗ್ಂ॒ ಶಂ-ಯೋಁರ॑ರ॒ಪೋ ದ॑ಧಾತ ॥, ಆ-ಽಹ-ಮ್ಪಿ॒ತೄನ್-ಥ್ಸು॑ವಿ॒ದತ್ರಾಗ್ಂ॑ ಅವಿಥ್ಸಿ॒ ನಪಾ॑ತ-ಞ್ಚ ವಿ॒ಕ್ರಮ॑ಣ-ಞ್ಚ॒ ವಿಷ್ಣೋಃ᳚ । ಬ॒ರ್ಹಿ॒ಷದೋ॒ ಯೇ ಸ್ವ॒ಧಯಾ॑ ಸು॒ತಸ್ಯ॒ ಭಜ॑ನ್ತ ಪಿ॒ತ್ವಸ್ತ ಇ॒ಹಾ-ಽಽ ಗ॑ಮಿಷ್ಠಾಃ ॥ । ಉಪ॑ಹೂತಾಃ ಪಿ॒ತರಃ॑ ಸೋ॒ಮ್ಯಾಸೋ॑ ಬರ್ಹಿ॒ಷ್ಯೇ॑ಷು ನಿ॒ಧಿಷು॑ ಪ್ರಿ॒ಯೇಷು॑ । ತ ಆ ಗ॑ಮನ್ತು॒ ತ ಇ॒ಹ ಶ್ರು॑ವ॒ನ್ತ್ವಧಿ॑ ಬ್ರುವನ್ತು॒ ತೇ ಅ॑ವನ್ತ್ವ॒ಸ್ಮಾನ್ ॥, ಅಗ್ನಿ॑ಷ್ವಾತ್ತಾಃ ಪಿತರ॒ ಏಹ ಗ॑ಚ್ಛತ॒ ಸದಃ॑ ಸದ-ಸ್ಸದತ ಸುಪ್ರಣೀತಯಃ । ಅ॒ತ್ತಾ ಹ॒ವೀಗ್ಂಷಿ॒ ಪ್ರಯ॑ತಾನಿ ಬ॒ರ್॒ಹಿಷ್ಯಥಾ॑ ರ॒ಯಿಗ್ಂ ಸರ್ವ॑ವೀರ-ನ್ದಧಾತನ ॥ ॥ ಅ॒ಗ್ನಿ॒ಷ್ವಾ॒ತ್ತಾನೃ॑ತು॒ಮತೋ॑ ಹವಾಮಹೇ । ನರಾ॒ಶಗ್ಂಸೇ॑ ಸೋಮಪೀ॒ಥಂ-ಯಁ ಆ॒ಶುಃ । ತೇ ನೋ॒ ಅರ್ವ॑ನ್ತ-ಸ್ಸು॒ಹವಾ॑ ಭವನ್ತು । ಶ-ನ್ನೋ॑ ಭವನ್ತು ದ್ವಿ॒ಪದೇ॒ ಶ-ಞ್ಚತು॑ಷ್ಪದೇ ॥ ಯೇ ಅ॑ಗ್ನಿಷ್ವಾ॒ತ್ತಾ ಯೇ-ಽನ॑ಗ್ನಿಷ್ವಾತ್ತಾಃ ॥ 75 ॥

ಅ॒ಗ್ಂ॒ಹೋ॒ಮುಚಃ॑ ಪಿ॒ತರಃ॑ ಸೋ॒ಮ್ಯಾಸಃ॑ । ಪರೇ-ಽವ॑ರೇ॒-ಽಮೃತಾ॑ಸೋ॒ ಭವ॑ನ್ತಃ । ಅಧಿ॑ಬ್ರುವನ್ತು॒ ತೇ ಅ॑ವನ್ತ್ವ॒ಸ್ಮಾನ್ ॥ ವಾ॒ನ್ಯಾ॑ಯೈ ದು॒ಗ್ಧೇ ಜು॒ಷಮಾ॑ಣಾಃ ಕರ॒ಮ್ಭಮ್ । ಉ॒ದೀರಾ॑ಣಾ॒ ಅವ॑ರೇ॒ ಪರೇ॑ ಚ । ಅ॒ಗ್ನಿ॒ಷ್ವಾ॒ತ್ತಾ ಋ॒ತುಭಿಃ॑ ಸಂವಿಁದಾ॒ನಾಃ । ಇನ್ದ್ರ॑ವನ್ತೋ ಹ॒ವಿರಿ॒ದ-ಞ್ಜು॑ಷನ್ತಾಮ್ ॥ ಯದ॑ಗ್ನೇ ಕವ್ಯವಾಹನ ಪಿ॒ತೄನ್ ಯಕ್ಷ್ಯೃ॑ತಾ॒ವೃಧಃ॑ । ಪ್ರ ಚ॑ ಹ॒ವ್ಯಾನಿ॑ ವಕ್ಷ್ಯಸಿ ದೇ॒ವೇಭ್ಯ॑ಶ್ಚ ಪಿ॒ತೃಭ್ಯ॒ ಆ ॥, ತ್ವಮ॑ಗ್ನ ಈಡಿ॒ತೋ ಜಾ॑ತವೇ॒ದೋ-ಽವಾ᳚ಡ್ಢ॒ವ್ಯಾನಿ॑ ಸುರ॒ಭೀಣಿ॑ ಕೃ॒ತ್ವಾ । ಪ್ರಾದಾಃ᳚ ಪಿ॒ತೃಭ್ಯಃ॑ ಸ್ವ॒ಧಯಾ॒ ತೇ ಅ॑ಕ್ಷನ್ನ॒ದ್ಧಿ ತ್ವ-ನ್ದೇ॑ವ॒ ಪ್ರಯ॑ತಾ ಹ॒ವೀಗ್ಂಷಿ॑ । । ಮಾತ॑ಲೀ ಕ॒ವ್ಯೈರ್ಯ॒ಮೋ ಅಙ್ಗಿ॑ರೋಭಿ॒ ರ್ಬೃಹ॒ಸ್ಪತಿ॒ರ್-ಋಕ್ವ॑ಭಿ ರ್ವಾವೃಧಾ॒ನಃ । ಯಾಗ್ಶ್ಚ॑ ದೇ॒ವಾ ವಾ॑ವೃ॒ಧುರ್ಯೇ ಚ॑ ದೇ॒ವಾನ್-ಥ್ಸ್ವಾಹಾ॒-ಽನ್ಯೇ ಸ್ವ॒ಧಯಾ॒-ಽನ್ಯೇ ಮ॑ದನ್ತಿ ॥ ॥ ಯೇ ತಾ॑ತೃ॒ಪುರ್ದೇ॑ವ॒ತ್ರಾ ಜೇಹ॑ಮಾನಾಃ । ಹೋ॒ತ್ರಾ॒ವೃಧ॒-ಸ್ಸ್ತೋಮ॑ತಷ್ಟಾಸೋ ಅ॒ರ್ಕೈಃ । ಆ-ಽಗ್ನೇ॑ ಯಾಹಿ ಸುವಿ॒ದತ್ರೇ॑ಭಿರ॒ರ್ವಾಮ್ । ಸ॒ತ್ಯೈಃ ಕ॒ವ್ಯೈಃ ಪಿ॒ತೃಭಿ॑-ರ್ಘರ್ಮ॒ಸದ್ಭಿಃ॑ ॥ ಹ॒ವ್ಯ॒ವಾಹ॑ಮ॒ಜರ॑-ಮ್ಪುರುಪ್ರಿ॒ಯಮ್ । ಅ॒ಗ್ನಿ-ಙ್ಘೃ॒ತೇನ॑ ಹ॒ವಿಷಾ॑ ಸಪ॒ರ್ಯನ್ನ್ । ಉಪಾ॑ಸದ-ಙ್ಕವ್ಯ॒ವಾಹ॑-ಮ್ಪಿತೃ॒ಣಾಮ್ । ಸ ನಃ॑ ಪ್ರ॒ಜಾಂ-ವೀಁ॒ರವ॑ತೀ॒ಗ್ಂ॒ ಸಮೃ॑ಣ್ವತು ॥ 76 ॥

(ಅನ॑ಗ್ನಿಷ್ವಾತ್ತಾ॒ - ಜೇಹ॑ಮಾನಾ-ಸ್ಸ॒ಪ್ತ ಚ॑) (ಅ. 16)

ಅನುವಾಕಂ 17 - ಐನ್ದ್ರೋ ಪಶೌ ಏಕಾದಶ ಪ್ರಯಾಜಾಃ

ಹೋತಾ॑ ಯಕ್ಷದಿ॒ಡಸ್ಪ॒ದೇ । ಸ॒ಮಿ॒ಧಾ॒ನ-ಮ್ಮ॒ಹದ್ಯಶಃ॑ । ಸುಷ॑ಮಿದ್ಧಂ॒-ವಁರೇ᳚ಣ್ಯಮ್ । ಅ॒ಗ್ನಿಮಿನ್ದ್ರಂ॑-ವಁಯೋ॒ಧಸ᳚ಮ್ । ಗಾ॒ಯ॒ತ್ರೀ-ಞ್ಛನ್ದ॑ ಇನ್ದ್ರಿ॒ಯಮ್ । ತ್ರ್ಯವಿ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒ಚ್ಛುಚಿ॑ವ್ರತಮ್ । ತನೂ॒ನಪಾ॑ತಮು॒ದ್ಭಿದ᳚ಮ್ । ಯ-ಙ್ಗರ್ಭ॒ಮದಿ॑ತಿರ್ದ॒ಧೇ ॥ 77 ॥

ಶುಚಿ॒ಮಿನ್ದ್ರಂ॑-ವಁಯೋ॒ಧಸ᳚ಮ್ । ಉ॒ಷ್ಣಿಹ॒-ಞ್ಛನ್ದ॑ ಇನ್ದ್ರಿ॒ಯಮ್ । ದಿ॒ತ್ಯ॒ವಾಹ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷದೀ॒ಡೇನ್ಯ᳚ಮ್ । ಈ॒ಡಿ॒ತಂ-ವೃಁ॑ತ್ರ॒ಹನ್ತ॑ಮಮ್ । ಇಡಾ॑ಭಿ॒ರೀಡ್ಯ॒ಗ್ಂ॒ ಸಹಃ॑ । ಸೋಮ॒ಮಿನ್ದ್ರಂ॑-ವಁಯೋ॒ಧಸ᳚ಮ್ । ಅ॒ನು॒ಷ್ಟುಭ॒-ಞ್ಛನ್ದ॑ ಇನ್ದ್ರಿ॒ಯಮ್ । ತ್ರಿ॒ವ॒ಥ್ಸ-ಙ್ಗಾಂ-ವಁಯೋ॒ ದಧ॑ತ್ ॥ 78 ॥

ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ಥ್ಸುಬರ್ಹಿ॒ಷದ᳚ಮ್ । ಪೂ॒ಷ॒ಣ್ವನ್ತ॒-ಮಮ॑ರ್ತ್ಯಮ್ । ಸೀದ॑ನ್ತ-ಮ್ಬ॒ರ್॒ಹಿಷಿ॑ ಪ್ರಿ॒ಯೇ । ಅ॒ಮೃತೇನ್ದ್ರಂ॑-ವಁಯೋ॒ಧಸ᳚ಮ್ । ಬೃ॒ಹ॒ತೀ-ಞ್ಛನ್ದ॑ ಇನ್ದ್ರಿ॒ಯಮ್ । ಪಞ್ಚಾ॑ವಿ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ದ್ವ್ಯಚ॑ಸ್ವತೀಃ । ಸು॒ಪ್ರಾ॒ಯ॒ಣಾ ಋ॑ತಾ॒ವೃಧಃ॑ ॥ 79 ॥

ದ್ವಾರೋ॑ ದೇ॒ವೀರ್ಹಿ॑ರ॒ಣ್ಯಯೀಃ᳚ । ಬ್ರ॒ಹ್ಮಾಣ॒ ಇನ್ದ್ರಂ॑-ವಁಯೋ॒ಧಸ᳚ಮ್ । ಪ॒ಙ್ಕ್ತಿ-ಞ್ಛನ್ದ॑ ಇ॒ಹೇನ್ದ್ರಿ॒ಯಮ್ । ತು॒ರ್ಯ॒ವಾಹ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ಥ್ಸು॒ಪೇಶ॑ಸೇ । ಸು॒ಶಿ॒ಲ್ಪೇ ಬೃ॑ಹ॒ತೀ ಉ॒ಭೇ । ನಕ್ತೋ॒ಷಾಸಾ॒ ನ ದ॑ರ್ಶ॒ತೇ । ವಿಶ್ವ॒ಮಿನ್ದ್ರಂ॑-ವಁಯೋ॒ಧಸ᳚ಮ್ । ತ್ರಿ॒ಷ್ಟುಭ॒-ಞ್ಛನ್ದ॑ ಇನ್ದ್ರಿ॒ಯಮ್ ॥ 80 ॥

ಪ॒ಷ್ಠ॒ವಾಹ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ತ್ಪ್ರಚೇ॑ತಸಾ । ದೇ॒ವಾನಾ॑ಮುತ್ತ॒ಮಂ-ಯಁಶಃ॑ । ಹೋತಾ॑ರಾ॒ ದೈವ್ಯಾ॑ ಕ॒ವೀ । ಸ॒ಯುಜೇನ್ದ್ರಂ॑-ವಁಯೋ॒ಧಸ᳚ಮ್ । ಜಗ॑ತೀ॒-ಞ್ಛನ್ದ॑ ಇ॒ಹೇನ್ದ್ರಿ॒ಯಮ್ । ಅ॒ನ॒ಡ್ವಾಹ॒-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ತ್ಪೇಶ॑ಸ್ವತೀಃ ॥ 81 ॥

ತಿ॒ಸ್ರೋ ದೇ॒ವೀರ್ಹಿ॑ರ॒ಣ್ಯಯೀಃ᳚ । ಭಾರ॑ತೀ-ರ್ಬೃಹ॒ತೀರ್ಮ॒ಹೀಃ । ಪತಿ॒ಮಿನ್ದ್ರಂ॑-ವಁಯೋ॒ಧಸ᳚ಮ್ । ವಿ॒ರಾಜ॒-ಞ್ಛನ್ದ॑ ಇ॒ಹೇನ್ದ್ರಿ॒ಯಮ್ । ಧೇ॒ನು-ಙ್ಗಾ-ನ್ನ ವಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ-ಥ್ಸು॒ರೇತ॑ಸಮ್ । ತ್ವಷ್ಟಾ॑ರ-ಮ್ಪುಷ್ಟಿ॒ವರ್ಧ॑ನಮ್ । ರೂ॒ಪಾಣಿ॒ ಬಿಭ್ರ॑ತ॒-ಮ್ಪೃಥ॑ಕ್ । ಪುಷ್ಟಿ॒ಮಿನ್ದ್ರಂ॑-ವಁಯೋ॒ಧಸ᳚ಮ್ ॥ 82 ॥

ದ್ವಿ॒ಪದ॒-ಞ್ಛನ್ದ॑ ಇ॒ಹೇನ್ದ್ರಿ॒ಯಮ್ । ಉ॒ಕ್ಷಾಣ॒-ಙ್ಗಾ-ನ್ನ ವಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷಚ್ಛ॒ತಕ್ರ॑ತುಮ್ । ಹಿರ॑ಣ್ಯಪರ್ಣ-ಮು॒ಕ್ಥಿನ᳚ಮ್ । ರ॒ಶ॒ನಾ-ಮ್ಬಿಭ್ರ॑ತಂ-ವಁ॒ಶಿಮ್ । ಭಗ॒ಮಿನ್ದ್ರಂ॑-ವಁಯೋ॒ಧಸ᳚ಮ್ । ಕ॒ಕುಭ॒-ಞ್ಛನ್ದ॑ ಇ॒ಹೇನ್ದ್ರಿ॒ಯಮ್ । ವ॒ಶಾಂ-ವೇಁ॒ಹತ॒-ಙ್ಗಾ-ನ್ನ ವಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ ಹೋತಾ॑ ಯಕ್ಷ॒-ಥ್ಸ್ವಾಹಾ॑ಕೃತೀಃ । ಅ॒ಗ್ನಿ-ಙ್ಗೃ॒ಹಪ॑ತಿ॒-ಮ್ಪೃಥ॑ಕ್ । ವರು॑ಣ-ಮ್ಭೇಷ॒ಜ-ಙ್ಕ॒ವಿಮ್ । ಕ್ಷ॒ತ್ರಮಿನ್ದ್ರಂ॑-ವಁಯೋ॒ಧಸ᳚ಮ್ । ಅತಿ॑ಚ್ಛನ್ದಸ॒-ಞ್ಛನ್ದ॑ ಇನ್ದ್ರಿ॒ಯಮ್ । ಬೃ॒ಹದೃ॑ಷ॒ಭ-ಙ್ಗಾಂ-ವಁಯೋ॒ ದಧ॑ತ್ । ವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ॥ 83 ॥

(ದ॒ಧೇ - ದಧ॑-ದ್- ಋತಾ॒ವೃಧ॑ - ಇನ್ದ್ರಿ॒ಯಂ - ಪೇಶ॑ಸ್ವತೀ--ರ್ ವಯೋ॒ಧಸಂ॒ - ಁವೇತ್ವಾಜ್ಯ॑ಸ್ಯ॒ ಹೋತ॒ರ್ಯಜ॑ ಸ॒ಪ್ತ ಚ॑) (ಅ. 17)

ಇ॒ಡಸ್ಪ॒ದೇ᳚-ಽಗ್ನಿ-ಙ್ಗಾ॑ಯ॒ತ್ರೀ-ನ್ತ್ರ್ಯವಿ᳚ಮ್ । ಶುಚಿ॑ವ್ರತ॒ಗ್ಂ॒ ಶುಚಿ॑ಮು॒ಷ್ಣಿಹ॑-ನ್ದಿತ್ಯ॒ವಾಹ᳚ಮ್ । ಈ॒ಡೇನ್ಯ॒ಗ್ಂ॒ ಸೋಮ॑-ಮನ॒ಷ್ಟುಭ॑-ನ್ತ್ರಿವ॒ಥ್ಸಮ್ । ಸು॒ಬ॒ರ॒ಃಇ॒ಷದ॑ಮ॒ಮೃತೇನ್ದ್ರ॑-ಮ್ಬೃಹ॒ತೀ-ಮ್ಪಞ್ಚಾ॑ವಿಮ್ । ವ್ಯಚ॑ಸ್ವತೀ-ಸ್ಸುಪ್ರಾಯ॒ಣಾ ದ್ವಾರೋ᳚ ಬ್ರಾ॒ಹ್ಮಾಣಃ॑ ಪಾ॒ಙ್ಕ್ತಿಮಿ॒ಹ ತು॑ರ್ಯ॒ವಾಹ᳚ಮ್ । ಸು॒ಪೇಶ॑ಸೇ॒ ವಿಶ್ವ॒ಮಿನ್ದ್ರ॑-ನ್ತ್ರಿ॒ಷ್ಟುಭ॑-ಮ್ಪಷ್ಠ॒ವಾಹ᳚ಮ್ । ಪ್ರಚೇ॑ತಸಾ ಸ॒ಯುಜೇನ್ದ್ರ॒-ಞ್ಜಗ॑ತೀಮಿ॒ಹಾನ॒ಡ್ವಾಹ᳚ಮ್ । ಪೇಶ॑ಸ್ವತೀಸ್ತಿ॒ಸ್ತ್ರೋ ಭಾರ॑ತೀಃ॒ ಪತಿಂ॑-ವಿಁ॒ರಾಜ॑ಮಿ॒ಹ ಧೇ॒ನು-ನ್ನ । ಸು॒ರೇತ॑ಸ॒-ನ್ತ್ವಷ್ಟಾ॑ರ॒-ಮ್ಪುಷ್ಟಿ॑-ನ್ದ್ವಿ॒ಪದ॑ಮಿ॒ಹೋಕ್ಷಾಣ॒-ನ್ನ । ಶ॒ತಕ್ರ॑ತು॒-ಮ್ಭಗ॒ಮಿನ್ದ್ರ॑-ಙ್ಕ॒ಕುಭ॑ಮಿ॒ಹ ವ॒ಶಾಂ-ವೇಁ॒ಹತ॒-ಙ್ಗಾ-ನ್ನ । ಸ್ವಾಹಾ॑ಕೃತೀಃ, ಕ್ಷ॒ತ್ರಮತಿ॑ಚ್ಛನ್ದಸ-ಮ್ಬೃ॒ಹದೃ॑ಷ॒ಭ-ಙ್ಗಾಂ-ವಁಯಃ॑ । ಇ॒ನ್ದ್ರಿ॒ಯಮುಷಿ॑ವಸು॒ನವ॑ದ॒ಶೇಹೇ᳚ನ್ದ್ರಿಯ॒ಮಷ್ಟ॑ ನವ ದಶ॒ ಗಾ-ನ್ನ ವಯೋ॒ ದಧ॒-ಥ್ಸರ್ವ॑ವೇತು ।

ಅನುವಾಕಂ 18 - ಐನ್ದ್ರೋ ಪಶೌ ಪ್ರಯಾಜಯಾಜ್ಯಾಃ

ಸಮಿ॑ದ್ಧೋ ಅ॒ಗ್ನಿ-ಸ್ಸ॒ಮಿಧಾ᳚ । ಸುಷ॑ಮಿದ್ಧೋ॒ ವರೇ᳚ಣ್ಯಃ । ಗಾ॒ಯ॒ತ್ರೀ ಛನ್ದ॑ ಇನ್ದ್ರಿ॒ಯಮ್ । ತ್ರ್ಯವಿ॒ರ್ಗೌರ್ವಯೋ॑ ದಧುಃ ॥ ತನೂ॒ನಪಾ॒-ಚ್ಛುಚಿ॑ವ್ರತಃ । ತ॒ನೂ॒ನಪಾಚ್ಚ॒ (ತ॒ನೂ॒ಪಾಚ್ಚ) ಸರ॑ಸ್ವತೀ । ಉ॒ಷ್ಣಿಕ್ಛನ್ದ॑ ಇನ್ದ್ರಿ॒ಯಮ್ । ದಿ॒ತ್ಯ॒ವಾಡ್ಗೌರ್ವಯೋ॑ ದಧುಃ ॥ ಇಡಾ॑ಭಿರ॒ಗ್ನಿರೀಡ್ಯಃ॑ । ಸೋಮೋ॑ ದೇ॒ವೋ ಅಮ॑ರ್ತ್ಯಃ ॥ 84 ॥

ಅ॒ನು॒ಷ್ಟುಪ್ಛನ್ದ॑ ಇನ್ದ್ರಿ॒ಯಮ್ । ತ್ರಿ॒ವ॒ಥ್ಸೋ ಗೌರ್ವಯೋ॑ ದಧುಃ ॥ ಸು॒ಬ॒ರ್॒ಹಿರ॒ಗ್ನಿಃ ಪೂ॑ಷ॒ಣ್ವಾನ್ । ಸ್ತೀ॒ರ್ಣ-ಬ॑ರ್ಹಿ॒ರಮ॑ರ್ತ್ಯಃ । ಬೃ॒ಹ॒ತೀ ಛನ್ದ॑ ಇನ್ದ್ರಿ॒ಯಮ್ । ಪಞ್ಚಾ॑ವಿ॒-ರ್ಗೌರ್ವಯೋ॑ ದಧುಃ ॥ ದುರೋ॑ ದೇ॒ವೀರ್ದಿಶೋ॑ ಮ॒ಹೀಃ । ಬ್ರ॒ಹ್ಮಾ ದೇ॒ವೋ ಬೃಹ॒ಸ್ಪತಿಃ॑ । ಪ॒ಙ್ಕ್ತಿ-ಶ್ಛನ್ದ॑ ಇ॒ಹೇನ್ದ್ರಿ॒ಯಮ್ । ತು॒ರ್ಯ॒ವಾಡ್ ಗೌರ್ವಯೋ॑ ದಧುಃ ॥ 85 ॥

ಉ॒ಷೇ ಯ॒ಹ್ವೀ ಸು॒ಪೇಶ॑ಸಾ । ವಿಶ್ವೇ॑ ದೇ॒ವಾ ಅಮ॑ರ್ತ್ಯಾಃ । ತ್ರಿ॒ಷ್ಟು-ಪ್ಛನ್ದ॑ ಇನ್ದ್ರಿ॒ಯಮ್ । ಪ॒ಷ್ಠ॒ವಾದ್ಗೌರ್ವಯೋ॑ ದಧುಃ ॥ ದೈವ್ಯಾ॑ ಹೋತಾರಾ ಭಿಷಜಾ । ಇನ್ದ್ರೇ॑ಣ ಸ॒ಯುಜಾ॑ ಯು॒ಜಾ । ಜಗ॑ತೀ॒ ಛನ್ದ॑ ಇ॒ಹೇನ್ದ್ರಿ॒ಯಮ್ । ಅ॒ನ॒ಡ್ವಾನ್-ಗೌರ್ವಯೋ॑ ದಧುಃ ॥ ತಿ॒ಸ್ರ ಇಡಾ॒ ಸರ॑ಸ್ವತೀ । ಭಾರ॑ತೀ ಮ॒ರುತೋ॒ ವಿಶಃ॑ ॥ 86 ॥

ವಿ॒ರಾಟ್ಛನ್ದ॑ ಇ॒ಹೇನ್ದ್ರಿ॒ಯಮ್ । ಧೇ॒ನುರ್ಗೌರ್ನ ವಯೋ॑ ದಧುಃ ॥ ತ್ವಷ್ಟಾ॑ ತು॒ರೀಪೋ॒ ಅದ್ಭು॑ತಃ । ಇ॒ನ್ದ್ರಾ॒ಗ್ನೀ ಪು॑ಷ್ಟಿ॒ವರ್ಧ॑ನಾ । ದ್ವಿ॒ಪಾಚ್ಛನ್ದ॑ ಇ॒ಹೇನ್ದ್ರಿ॒ಯಮ್ । ಉ॒ಕ್ಷಾ ಗೌರ್ನ ವಯೋ॑ ದಧುಃ ॥ ಶ॒ಮಿ॒ತಾ ನೋ॒ ವನ॒ಸ್ಪತಿಃ॑ । ಸ॒ವಿ॒ತಾ ಪ್ರ॑ಸು॒ವನ್ಭಗ᳚ಮ್ । ಕ॒ಕುಚ್ಛನ್ದ॑ ಇ॒ಹೇನ್ದ್ರಿ॒ಯಮ್ । ವ॒ಶಾ ವೇ॒ಹದ್ಗೌರ್ನ ವಯೋ॑ ದಧುಃ ॥ ಸ್ವಾಹಾ॑ ಯ॒ಜ್ಞಂ-ವಁರು॑ಣಃ । ಸು॒ಕ್ಷ॒ತ್ರೋ ಭೇ॑ಷ॒ಜ-ಙ್ಕ॑ರತ್ । ಅತಿಃ॑ ಛನ್ದಾ॒-ಶ್ಛನ್ದ॑ ಇನ್ದ್ರಿ॒ಯಮ್ । ಬೃ॒ಹದೃ॑ಷ॒ಭೋ ಗೌರ್ವಯೋ॑ ದಧುಃ ॥ 87 ॥

(ಅಮ॑ರ್ತ್ಯ - ಸ್ತುರ್ಯ॒ವಾಡ್ಗೌರ್ವಯೋ॑ ದಧು॒--ರ್ ವಿಶೋ॑ - ವ॒ಶಾ ವೇ॒ಹದ್ಗೌರ್ನ ವಯೋ॑ ದಧುಶ್ಚ॒ತ್ವಾರಿ॑ ಚ) (ಅ. 18)

ಅನುವಾಕಂ 19 - ಐನ್ದ್ರೋ ಪಶೌ ವಪಾದೀನಾಂ-ಯಁಜ್ಯಾನುವಾಕ್ಯಾಃ

ವ॒ಸ॒ನ್ತೇನ॒ರ್ತುನಾ॑ ದೇ॒ವಾಃ । ವಸ॑ವಸ್ತ್ರಿ॒ವೃತಾ᳚ ಸ್ತು॒ತಮ್ । ರ॒ಥ॒ನ್ತ॒ರೇಣ॒ ತೇಜ॑ಸಾ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ ಗ್ರೀ॒ಷ್ಮೇಣ॑ ದೇ॒ವಾ ಋ॒ತುನಾ᳚ । ರು॒ದ್ರಾಃ ಪ॑ಞ್ಚದ॒ಶೇ ಸ್ತು॒ತಮ್ । ಬೃ॒ಹ॒ತಾ ಯಶ॑ಸಾ॒ ಬಲ᳚ಮ್ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ ವ॒ರ॒.ಷಾಭಿ॑ರ್-ಋ॒ತುನಾ॑-ಽಽದಿ॒ತ್ಯಾಃ । ಸ್ತೋಮೇ॑ ಸಪ್ತದ॒ಶೇ ಸ್ತು॒ತಮ್ ॥ 88 ॥

ವೈ॒ರೂ॒ಪೇಣ॑ ವಿ॒ಶೌಜ॑ಸಾ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ ಶಾ॒ರ॒ದೇನ॒ರ್ತುನಾ॑ ದೇ॒ವಾಃ । ಏ॒ಕ॒ವಿ॒ಗ್ಂ॒ಶ ಋ॒ಭವಃ॑ ಸ್ತು॒ತಮ್ । ವೈ॒ರಾ॒ಜೇನ॑ ಶ್ರಿ॒ಯಾ ಶ್ರಿಯ᳚ಮ್ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ ಹೇ॒ಮ॒ನ್ತೇನ॒ರ್ತುನಾ॑ ದೇ॒ವಾಃ । ಮ॒ರುತ॑ಸ್ತ್ರಿಣ॒ವೇ ಸ್ತು॒ತಮ್ । ಬಲೇ॑ನ॒ ಶಕ್ವ॑ರೀ॒-ಸ್ಸಹಃ॑ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ ಶೈ॒ಶಿ॒ರೇಣ॒ರ್ತುನಾ॑ ದೇ॒ವಾಃ । ತ್ರ॒ಯ॒ಸ್ತ್ರಿ॒ಗ್ಂ॒ಶೇ॑ ಽಮೃತಗ್ಗ್॑ ಸ್ತು॒ತಮ್ । ಸ॒ತ್ಯೇನ॑ ರೇ॒ವತೀಃ᳚, ಕ್ಷ॒ತ್ರಮ್ । ಹ॒ವಿರಿನ್ದ್ರೇ॒ ವಯೋ॑ ದಧುಃ ॥ 89 ॥

(ಸ್ತೋಮೇ॑ ಸಪ್ತದ॒ಶೇ ಸ್ತು॒ತಗ್ಂ - ಸಹೋ॑ ಹ॒ವಿರಿನ್ದ್ರೇ॒ ವಯೋ॑ ದಧುಶ್ಚ॒ತ್ವಾರಿ॑ ಚ) (ಅ. 19)

(ವ॒ಸ॒ನ್ತೇನ॑ ಗ್ರೀ॒ಷ್ಮೇಣ॑ ವ॒ರ್॒ಷಾಭಿಃ॑ ಶಾರ॒ದೇನ॑ ಹೇಮ॒ನ್ತೇನ॑ ಶೈಶಿ॒ರೇಣ॒ ಷಟ್ )

ಅನುವಾಕಂ 20 - ಐನ್ದ್ರೋ ಪಶೌ ಅನೂಯಾಜಾನಾ-ಮ್ಮೈತ್ರಾವರಿಣಪ್ರೈಷಾಃ

ದೇ॒ವ-ಮ್ಬ॒ರ್॒ಹಿರಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವ-ನ್ದೇ॒ವಮ॑ವರ್ಧಯತ್ । ಗಾ॒ಯ॒ತ್ರಿ॒ಯಾ ಛನ್ದ॑ಸೇನ್ದ್ರಿ॒ಯಮ್ । ತೇಜ॒ ಇನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವೀರ್ದ್ವಾರೋ॑ ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೀರ್ದೇ॒ವ-ಮ॑ವರ್ಧಯನ್ನ್ । ಉ॒ಷ್ಣಿಹಾ॒ ಛನ್ದ॑ಸೇನ್ದ್ರಿ॒ಯಮ್ । ಪ್ರಾ॒ಣಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ 90 ॥

ದೇ॒ವೀ ದೇ॒ವಂ-ವಁ॑ಯೋ॒ಧಸ᳚ಮ್ । ಉ॒ಷೇ ಇನ್ದ್ರ॑ಮವರ್ಧತಾಮ್ । ಅ॒ನು॒ಷ್ಟುಭಾ॒ ಛನ್ದ॑ಸೇನ್ದ್ರಿ॒ಯಮ್ । ವಾಚ॒ಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ ದೇ॒ವೀ ಜೋಷ್ಟ್ರೀ॑ ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೀ ದೇ॒ವಮ॑ವರ್ಧತಾಮ್ । ಬೃ॒ಹ॒ತ್ಯಾ ಛನ್ದ॑ಸೇನ್ದ್ರಿ॒ಯಮ್ । ಶ್ರೋತ್ರ॒ಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ 91 ॥

ದೇ॒ವೀ ಊ॒ರ್ಜಾಹು॑ತೀ ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೀ ದೇ॒ವಮ॑ವರ್ಧತಾಮ್ । ಪ॒ಙ್ಕ್ತ್ಯಾ ಛನ್ದ॑ಸೇನ್ದ್ರಿ॒ಯಮ್ । ಶು॒ಕ್ರಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ ದೇ॒ವಾ ದೈವ್ಯಾ॒ ಹೋತಾ॑ರಾ ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವಾ ದೇ॒ವಮ॑ವರ್ಧತಾಮ್ । ತ್ರಿ॒ಷ್ಟುಭಾ॒ ಛನ್ದ॑ಸೇನ್ದ್ರಿ॒ಯಮ್ । ತ್ವಿಷಿ॒ಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೀತಾಂ॒-ಯಁಜ॑ ॥ 92 ॥

ದೇ॒ವೀ-ಸ್ತಿ॒ಸ್ರ-ಸ್ತಿ॒ಸ್ರೋ ದೇ॒ವೀರ್ವ॑ಯೋ॒ಧಸ᳚ಮ್ । ಪತಿ॒ಮಿನ್ದ್ರ॑-ಮವರ್ಧಯನ್ನ್ । ಜಗ॑ತ್ಯಾ॒ ಛನ್ದ॑ಸೇನ್ದ್ರಿ॒ಯಮ್ । ಬಲ॒ಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವಿಯನ್ತು॒ ಯಜ॑ ॥ ದೇ॒ವೋ ನರಾ॒ಶಗ್ಂಸೋ॑ ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೋ ದೇ॒ವಮ॑ವರ್ಧಯತ್ । ವಿ॒ರಾಜಾ॒ ಛನ್ದ॑ಸೇನ್ದ್ರಿ॒ಯಮ್ । ರೇತ॒ ಇನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ 93 ॥

ದೇ॒ವೋ ವನ॒ಸ್ಪತಿ॑-ರ್ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೋ ದೇ॒ವಮ॑ವರ್ಧಯತ್ । ದ್ವಿ॒ಪದಾ॒ ಛನ್ದ॑ಸೇನ್ದ್ರಿ॒ಯಮ್ । ಭಗ॒ಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವ-ಮ್ಬ॒ರ್॒ಹಿರ್ವಾರಿ॑ತೀನಾ-ನ್ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೋ (ದೇ॒ವಂ) ದೇ॒ವಮ॑ವರ್ಧಯತ್ । ಕ॒ಕುಭಾ॒ ಛನ್ದ॑ಸೇನ್ದ್ರಿ॒ಯಮ್ । ಯಶ॒ ಇನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃ-ದ್ದೇ॒ವಮಿನ್ದ್ರಂ॑-ವಁಯೋ॒ಧಸ᳚ಮ್ । ದೇ॒ವೋ ದೇ॒ವಮ॑ವರ್ಧಯತ್ । ಅತಿ॑ಚ್ಛನ್ದಸಾ॒ ಛನ್ದ॑ಸೇನ್ದ್ರಿ॒ಯಮ್ । ಕ್ಷ॒ತ್ರಮಿನ್ದ್ರೇ॒ ವಯೋ॒ ದಧ॑ತ್ । ವ॒ಸು॒ವನೇ॑ ವಸು॒ಧೇಯ॑ಸ್ಯ ವೇತು॒ ಯಜ॑ ॥ 94 ॥

(ವಿ॒ಯ॒ನ್ತು॒ ಯಜ॑ - ವೀತಾಂ॒-ಯಁಜ॑-ವೀತಾಂ॒-ಯಁಜ॑-ವೇತು॒ ಯಜ॑-ವೇತು॒ ಯಜ॒ ಪಞ್ಚ॑ ಚ) (ಅ. 20)

(ದೇ॒ವ-ಮ್ಬ॒ರ್॒ಹಿ-ರ್ಗಾ॑ಯತ್ರಿ॒ಯಾ ತೇಜಃ॑ । ದೇ॒ವೀರ್ದ್ವಾರ॑ ಉ॒ಷ್ಣಿಹಾ᳚ ಪ್ರಾ॒ಣಮ್ । ದೇ॒ವೀ ದೇ॒ವಮು॒ಷೇ ಅ॑ನು॒ಷ್ಟುಭಾ॒ ವಾಚ᳚ಮ್ । ದೇ॒ವೀ ಜೋಷ್ಟ್ರೀ॑ ಬೃಹ॒ತ್ಯಾ ಶ್ರೋತ್ರ᳚ಮ್ । ದೇ॒ವೀ ಊ॒ರ್ಜಾಹೂ॑ತೀ ಪ॒ಙ್ಕ್ತ್ಯಾ ಶು॒ಕ್ರಮ್ । ದೇ॒ವಾ ದೈವ್ಯಾ॒ ಹೋತಾ॑ರಾ ತ್ರಿ॒ಷ್ಟುಭಾ॒ ತ್ವಿಷಿ᳚ಮ್ । ದೇ॒ವೀಸ್ತಿ॒ಸ್ರಸ್ತಿ॒ಸ್ರೋ ದೇ॒ವೀಃ ಪತಿ॒-ಞ್ಜಗ॑ತ್ಯಾ॒ ಬಲ᳚ಮ್ । ದೇ॒ವೋ ನರಾ॒ಶಗ್ಂಸೋ॑ ವಿ॒ರಾಜಾ॒ ರೇತಃ॑ । ದೇ॒ವೋ ವನ॒ಸ್ಪತಿ॑-ರ್ದ್ವಿ॒ಪದಾ॒ ಭಗ᳚ಮ್ । ದೇ॒ವ-ಮ್ಬ॒ರ್॒ಹಿ-ರ್ವಾರಿ॑ತೀನಾ-ಙ್ಕ॒ಕುಭಾ॒ ಯಶಃ॑ । ದೇ॒ವೋ ಅ॒ಗ್ನಿ-ಸ್ಸ್ವಿ॑ಷ್ಟ॒ಕೃದತಿ॑ಚ್ಛನ್ದಸಾ ಕ್ಷ॒ತ್ರಮ್ । ವೇ॒ತು॒ ವಿ॒ಯ॒ನ್ತು॒ ಚ॒ತು-ರ್ವೀ॑ತಾ॒ಮೇಕೋ॑ ವಿಯನ್ತು ಚ॒ತುರ್ವೇ॑ತು । ಅ॒ವ॒ರ್ಧ॒ಯ॒ದ॒ವ॒ರ್ಧ॒ಯ॒ಗ್ಗ್॒ ಶ್ಚ॒ತುರ॑ವರ್ಧತಾ॒ಮೇಕೋ॑ ಽವರ್ಧಯಗ್ಗ್ ಶ್ಚ॒ತುರ॑ವರ್ಧಯತ್ ।)

(ಸ್ವಾ॒ದ್ವೀ-ನ್ತ್ವಾ॒ - ಸೋಮಃ॒ - ಸುರಾ॑ವನ್ತ॒ಗ್ಂ॒ - ಸೀಸೇ॑ನ - ಮಿ॒ತ್ರೋ॑-ಽಸಿ॒ - ಯ-ದ್ದೇ॑ವಾ॒ - ಹೋತಾ॑ ಯಕ್ಷ-ಥ್ಸ॒ಮಿಧೇನ್ದ್ರ॒ಗ್ಂ॒ - ಸಮಿ॑ದ್ಧ॒ ಇನ್ದ್ರ॒ - ಆಚ॑ರ್ಷಣಿ॒ಪ್ರಾ - ದೇ॒ವ-ಮ್ಬ॒ರ್॒ಹಿರಿನ್ದ್ರಗ್ಂ॑ ಸುದೇ॒ವಗ್ಂ - ಹೋತಾ॑ ಯಕ್ಷ-ಥ್ಸ॒ಮಿಧಾ॒-ಽಗ್ನಿಗ್ಂ - ಸಮಿ॑ದ್ಧೋ ಅ॒ಗ್ನಿರ॑ಶ್ವಿನಾ॒ - ಽಶ್ವಿನಾ॑ ಹ॒ವಿರಿ॑ನ್ದ್ರಿ॒ಯಂ - ದೇ॒ವ-ಮ್ಬ॒ರ್॒ಹಿ-ಸ್ಸರ॑ಸ್ವ - ತ್ಯಾ॒ಗ್ನಿಮ॒ - ದ್ಯೋಶನ್ತೋ॒ - ಹೋತಾ॑ ಯಕ್ಷದಿ॒ಡಸ್ಪ॒ದೇ - ಸಮಿ॑ದ್ಧೋ ಅ॒ಗ್ನಿ-ಸ್ಸ॒ಮಿಧಾ॑ - ವಸ॒ನ್ತೇನ॑ - ದೇ॒ವ-ಮ್ಬ॒ರ್॒ಹಿರಿನ್ದ್ರಂ॑-ವಁಯೋ॒ಧಸಂ॑-ವಿಁಗ್ಂಶ॒ತಿಃ)

(ಸ್ವಾ॒ದ್ವೀ-ನ್ತ್ವಾ-ಽ - ಮೀ॑ ಮದನ್ತ ಪಿ॒ತರಃ॒ - ಸಾಮ್ರಾ᳚ಜ್ಯಾಯ - ಪೂ॒ತ-ಮ್ಪ॒ವಿತ್ರೇ॑ಣೇ॒ ವಾಜ್ಯ॑ - ಮು॒ಷಾಸಾ॒ನಕ್ತಾ॒ - ಬದ॑ರೈ॒ - ರಧಾ॑ತಾಮ॒ಶ್ವಿನಾ॑ - ದೇ॒ವ ಇನ್ದ್ರೋ॒ ವನ॒ಸ್ಪತಿಃ॑ - ಪಷ್ಠ॒ವಾಹ॒-ಙ್ಗಾಂ - ದೇ॒ವೀ ದೇ॒ವಂ-ವಁ॑ಯೋ॒ಧಸ॒-ಞ್ಚತು॑ರ್ನವತಿಃ )

(ಸ್ವಾ॒ದ್ವೀನ್ತ್ವಾ॑ - ವೇತು॒ ಯಜ॑)

॥ ಹರಿಃ॑ ಓಮ್ ॥

॥ ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಬ್ರಾಹ್ಮಣೇ ದ್ವಿತೀಯಾಷ್ಟಕೇ ಷಷ್ಠಃ ಪ್ರಪಾಠಕ-ಸ್ಸಮಾಪ್ತಃ ॥

Roman (IAST) Transliteration

kṛṣṇa yajurvedīya taittirīya brāhmaṇe dvitīyāṣṭake ṣaṣṭhaḥ prapāṭhakaḥ - sautrāmaṇiḥ kaukilī hotra-ñca

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - grahāḥ

svā॒dvī-ntvā᳚ svā॒dunā᳚ | tī॒vrā-ntī॒vreṇa̭ | a॒mṛtā̭-ma॒mṛtḙna | madhṷmatī॒-mmadhṷmatā | sṛ॒jāmi॒ sagṃ somḙna | somo᳚-'sya॒śvibhyā᳚-mpacyasva | sara̭svatyai pacyasva | indrā̭ya su॒trāmṇḙ pacyasva || parī॒toṣi̭ñcatā su॒tam | somo॒ ya ṷtta॒magṃ ha॒viḥ || 1 ||

da॒dha॒nvā yo naryo̭ a॒phsva̭ntarā | su॒ṣāva॒ soma॒madri̭bhiḥ || pu॒nātṷ te pari॒sruta᳚m | soma॒gṃ॒ sūrya̭sya duhi॒tā | vārḙṇa॒ śaśva̭tā॒ tanā᳚ | vā॒yuḥ pū॒taḥ pa॒vitrḙṇa | prāṅkhsomo॒ ati̭drutaḥ | indra̭sya॒ yujya॒-ssakhā᳚ || vā॒yuḥ pū॒taḥ pa॒vitrḙṇa | pra॒tyaṅkhsomo॒ āti̭drutaḥ || 2 ||

indra̭sya॒ yujya॒-ssakhā᳚ || brahma̭ kṣa॒tra-mpa̭vate॒ teja̭ indri॒yam | sura̭yā॒ somaḥ̭ su॒ta āsṷto॒ madā̭ya | śu॒kreṇa̭ deva de॒vatāḥ᳚ pipṛgdhi | rase॒nānnaṃ॒-ya~ja̭mānāya dhehi || ku॒vida॒ṅga yava̭manto॒ yava̭-ñcit | yathā॒ dāntya̭nupū॒rvaṃ-vi~॒yūya̭ | i॒hehai̭ṣā-ṅkṛṇuta॒ bhoja̭nāni | ye ba॒ra॒ḥiṣo॒ namo̭vṛkti॒-nna ja॒gmuḥ || u॒pa॒yā॒ma-gṛ̭hīto-'sya॒śvibhyā᳚-ntvā॒ juṣṭa̭-ṅgṛhṇāmi || 3 ||

sara̭svatyā॒ indrā̭ya su॒trāmṇe᳚ || e॒ṣa te॒ yoni॒steja̭se tvā | vī॒ryā̭ya tvā॒ balā̭ya tvā || tejo̭-'si॒ tejo॒ mayi̭ dhehi | vī॒rya̭masi vī॒rya̭-mmayi̭ dhehi | bala̭masi॒ bala॒-mmayi̭ dhehi || nānā॒ hi vā᳚-nde॒vahi̭ta॒gṃ॒ sadaḥ̭ kṛ॒tam | mā sagṃsṛ̭kṣāthā-mpara॒me vyo̭mann | surā॒ tvamasi̭ śu॒ṣmiṇī॒ soma̭ e॒ṣaḥ | mā mā̭ higṃsī॒-ssvāṃ-yo~ni̭māvi॒śann || 4 ||

u॒pa॒yā॒magṛ̭hīto-'syāśvi॒na-ntejaḥ̭ | sā॒ra॒sva॒taṃ-vī~॒rya᳚m | ai॒ndra-mbala᳚m || e॒ṣa te॒ yoni॒rmodā̭ya tvā | ā॒na॒ndāya̭ tvā॒ maha̭se tvā || ojo॒-'syojo॒ mayi̭ dhehi | ma॒nyura̭si ma॒nyu-mmayi̭ dhehi | maho̭-'si॒ maho॒ mayi̭ dhehi | saho̭-'si॒ saho॒ mayi̭ dhehi || yā vyā॒ghraṃ-vi~ṣṷ̄cikā | u॒bhau vṛka̭-ñca॒ rakṣa̭ti | śye॒na-mpa̭ta॒triṇagṃ̭ si॒gṃ॒ham | sema-mpā॒tvagṃha̭saḥ || sa॒-mpṛcaḥ̭ stha॒ sa-mmā̭ bha॒dreṇa̭ pṛṅkta | vi॒pṛcaḥ̭ stha॒ vi mā̭ pā॒pmanā̭ pṛṅkta || 5 ||

(ha॒viḥ - pra॒tyaṅkhsomo॒ āti̭druto - gṛhṇā - myāvi॒śan - viṣṷ̄cikā॒ pañca̭ ca) (a. 1)

anuvākaṃ 2 - grahopasthānam

somo॒ rājā॒-'mṛtagṃ̭ su॒taḥ | ṛ॒jī॒ṣeṇā̭jahānmṛ॒tyum | ṛ॒tena̭ sa॒tyami̭ndri॒yam | vipānagṃ̭ śu॒kramandha̭saḥ | indra̭syendri॒yam | i॒da-mpayo॒-'mṛta॒-mmadhṷ || soma̭ma॒dbhyo vya̭pibat | chanda̭sā ha॒gṃ॒sa-śśṷci॒ṣat | ṛ॒tena̭ sa॒tyami̭ndri॒yam | a॒dbhyaḥ, kṣī॒raṃ-vya~̭pibat || 6 ||

kruṅṅā᳚ṅgira॒so dhi॒yā | ṛ॒tena̭ sa॒tyami̭ndri॒yam | annā᳚-tpari॒sruto॒ rasa᳚m | brahma̭ṇā॒ vya̭piba-tkṣa॒tram | ṛ॒tena̭ sa॒tyami̭ndri॒yam || reto॒ mūtraṃ॒-vi~ja̭hāti | yoni̭-mpravi॒śadi̭ndri॒yam | garbho̭ ja॒rāyu॒ṇā-''vṛ̭taḥ | ulba̭-ñjahāti॒ janma̭nā | ṛ॒tena̭ sa॒tyami̭ndri॒yam || 7 ||

vedḙna rū॒pe vya̭karot | sa॒tā॒sa॒tī pra॒jāpa̭tiḥ | ṛ॒tena̭ sa॒tyami̭ndri॒yam || somḙna॒ somau॒ vya̭pibat | su॒tā॒su॒tau pra॒jāpa̭tiḥ | ṛ॒tena̭ sa॒tyami̭ndri॒yam | dṛ॒ṣṭvā rū॒pe vyāka̭rot | sa॒tyā॒nṛ॒te pra॒jāpa̭tiḥ | aśra̭ddhā॒-manṛ॒te-'da̭dhāt | śra॒ddhāgṃ sa॒tye pra॒jāpa̭tiḥ | ṛ॒tena̭ sa॒tyami̭ndri॒yam || dṛ॒ṣṭvā pa̭ri॒sruto॒ rasa᳚m | śu॒kreṇa̭ śu॒kraṃ-vya~̭pibat | paya॒-ssoma̭-mpra॒jāpa̭tiḥ | ṛ॒tena̭ sa॒tyami̭ndri॒yam | vipānagṃ̭ śu॒kramandha̭saḥ | indra̭syendri॒yam | i॒da-mpayo॒-'mṛta॒-mmadhṷ || 8 ||

(a॒dbhyaḥ, kṣī॒raṃ-vya~̭piba॒ - jjanma̭na॒rtena̭ sa॒tyami̭ndri॒yagg - śra॒ddhāgṃ sa॒tye pra॒jāpa̭tira॒ṣṭau ca̭) (a. 2)

(somo॒ rājā॒ vipāna॒gṃ॒ soma̭ma॒dbhyo-'nnā॒-dreto॒ mūtraṃ॒-ve~dḙna satāsa॒tī somḙna sutāsu॒tau dṛ॒ṣṭvā rū॒pe dṛ॒ṣṭvā pa̭ri॒sruto॒ rasaṃ॒-vi~pāna॒-ndaśa̭ )

anuvākaṃ 3 - grahahomaḥ

surā̭vanta-mbarhi॒ṣadagṃ̭ su॒vīra᳚m | ya॒jñagṃ hi̭nvanti mahi॒ṣā namo̭bhiḥ | dadhā̭nā॒-ssoma̭-ndi॒vi de॒vatā̭su | made॒mendraṃ॒-ya~ja̭mānā-ssva॒rkāḥ || yaste॒ rasa॒-ssambhṛ̭ta॒ oṣa̭dhīṣu | soma̭sya॒ śuṣma॒-ssura̭yā su॒tasya̭ | tena̭ jinva॒ yaja̭māna॒-mmadḙna | sara̭svatī-ma॒śvinā॒-vindra̭-ma॒gnim || yama॒śvinā॒ namṷcerāsu॒rādadhi̭ | sara̭sva॒tyasa̭nodindri॒yāya̭ || 9 ||

i॒ma-ntagṃ śu॒kra-mmadhṷmanta॒-mindu᳚m | soma॒gṃ॒ rājā̭nami॒ha bha̭kṣayāmi || yadatra̭ ri॒ptagṃ ra॒sinaḥ̭ su॒tasya̭ | yadindro॒ api̭ba॒cchacī̭bhiḥ | a॒ha-ntada̭sya॒ mana̭sā śi॒vena̭ | soma॒gṃ॒ rājā̭nami॒ha bha̭kṣayāmi || pi॒tṛbhyaḥ̭ svadhā॒vibhyaḥ̭ sva॒dhā namaḥ̭ | pi॒tā॒ma॒hebhyaḥ̭ svadhā॒vibhyaḥ̭ sva॒dhā namaḥ̭ | prapi̭tāmahebhya-ssvadhā॒vibhyaḥ̭ sva॒dhā namaḥ̭ | akṣa̭-npi॒taraḥ̭ || 10 ||

amī̭madanta pi॒taraḥ̭ | atī̭tṛpanta pi॒taraḥ̭ | amī̭mṛjanta pi॒taraḥ̭ | pita̭ra॒-śśundha̭ddhvam || pu॒nantṷ mā pi॒taraḥ̭ so॒myāsaḥ̭ | pu॒nantṷ mā pitāma॒hāḥ | pu॒nantu॒ prapi̭tāmahāḥ | pa॒vitrḙṇa śa॒tāyṷṣā | pu॒nantṷ mā pitāma॒hāḥ | pu॒nantu॒ prapi̭tāmahāḥ || 11 ||

pa॒vitrḙṇa śa॒tāyṷṣā || viśva॒māyu॒-rvya̭śnavai | agna॒ āyūgṃ̭ṣi pavasa॒ ā su॒vorja॒miṣa̭-ñca naḥ | ā॒re bā̭dhasva du॒cchunā᳚m || agne॒ pava̭sva॒ svapā̭ a॒sme varcaḥ̭ su॒vīrya᳚m | dadha॒-tpoṣagṃ̭ ra॒yi-mmayi̭ ||| pava̭māna॒-ssuva॒rjanaḥ̭ | pa॒vitrḙṇa॒ vica̭rṣaṇiḥ | yaḥ potā॒ sa pṷnātu mā || pu॒nantṷ mā devaja॒nāḥ | pu॒nantu॒ mana̭ vo dhi॒yā | pu॒nantu॒ viśva̭ ā॒yavaḥ̭ ||| jāta̭vedaḥ pa॒vitra̭vat | pa॒vitrḙṇa punāhi mā | śu॒kreṇa̭ deva॒ dīdya̭t | agne॒ kratvā॒ kratū॒gṃ॒ranṷ || yattḙ pa॒vitra̭-ma॒rciṣi̭ | agne॒ vita̭tamanta॒rā | brahma॒ tena̭ punīmahe ||| u॒bhābhyā᳚-ndeva savitaḥ | pa॒vitrḙṇa sa॒vena̭ ca | i॒da-mbrahma̭ punīmahe || vai॒śva॒de॒vī pṷna॒tī de॒vyāgā᳚t | yasyai̭ ba॒hvī-sta॒nuvo̭ vī॒tapṛ̭ṣṭhāḥ | tayā॒ mada̭nta-ssadha॒mādyḙṣu | va॒yagg syā̭ma॒ pata̭yo rayī॒ṇām |||| ye sa̭mā॒nā-ssama̭nasaḥ | pi॒taro̭ yama॒rājye᳚ | teṣāṃ᳚-lo~॒ka-ssva॒dhā namaḥ̭ | ya॒jño de॒veṣṷ kalpatām || 12 ||

ye sa̭jā॒tā-ssama̭nasaḥ | jī॒vā jī॒veṣṷ māma॒kāḥ | teṣā॒g॒ śrīrmayi̭ kalpatām | a॒smil ~lo॒ke śa॒tagṃ samāḥ᳚ || dve sru॒tī a̭śṛṇava-mpitṛ॒ṇām | a॒ha-nde॒vānā̭mu॒ta martyā̭nām | yābhyā̭mi॒daṃ-vi~śva॒meja॒-thsamḙti | yada̭nta॒rā pi॒tara̭-mmā॒tara̭-ñca || i॒dagṃ ha॒viḥ pra॒jana̭na-mme astu | daśa̭vīragṃ sa॒rvaga̭ṇagg sva॒staye᳚ | ā॒tma॒sani̭ prajā॒sani̭ | pa॒śu॒sanya̭bhaya॒sani̭ loka॒sani̭ | a॒gniḥ pra॒jā-mba̭hu॒lā-mmḙ karotu | anna॒-mpayo॒ reto̭ a॒smāsṷ dhatta | rā॒yaspoṣa॒-miṣa॒mūrja̭ma॒smāsṷ dīdhara॒-thsvāhā᳚ || 13 ||

(i॒ndri॒yāya̭ - pi॒taraḥ̭ - śa॒tāyṷṣā pu॒nantṷ mā pitāma॒hāḥ pu॒nantu॒ prapi̭tāmahāḥ-kalpatāg-sva॒staye॒ pañca̭ ca) (a. 3)

anuvākaṃ 4 - upahomāḥ

sīsḙna॒ tantra॒-mmana̭sā manī॒ṣiṇaḥ̭ | ū॒rṇā॒sū॒treṇa̭ ka॒vayo̭ vayanti | a॒śvinā̭ ya॒jñagṃ sa̭vi॒tā sara̭svatī | indra̭sya rū॒paṃ-va~rṷṇo bhiṣa॒jyann || tada̭sya rū॒pama॒mṛta॒gṃ॒ śacī̭bhiḥ | ti॒sro da̭dhurde॒vatā᳚-ssagṃrarā॒ṇāḥ | lomā̭ni॒ śaṣpai᳚-rbahu॒dhā na tokma̭bhiḥ | tvaga̭sya mā॒gṃ॒sama̭bhava॒nna lā॒jāḥ || tada॒śvinā̭ bhi॒ṣajā̭ ru॒drava̭rtanī | sara̭svatī vayati॒ peśo॒ anta̭raḥ || 14 ||

asthi̭ ma॒jjāna॒-mmāsa̭raiḥ | kā॒ro॒ta॒reṇa॒ dadha̭to॒ gavā᳚-ntva॒ci || sara̭svatī॒ mana̭sā peśa॒laṃ-va~sṷ | nāsa̭tyābhyāṃ-va~yati darśa॒taṃ-va~puḥ̭ | rasa̭-mpari॒srutā॒ na rohi̭tam | na॒gnahu॒rdhīra॒stasa̭ra॒-nna vema̭ || paya̭sā śu॒krama॒mṛta̭-ñja॒nitra᳚m | sura̭yā॒ mūtrā᳚jjanayanti॒ retaḥ̭ | apāma̭ti-ndurma॒ti-mbādha̭mānāḥ | ūva̭ddhyaṃ॒-vā~tagṃ̭ sa॒buva॒-ntadā॒rāt || 15 ||

indraḥ̭ su॒trāmā॒ hṛda̭yena sa॒tyam | pu॒ro॒ḍāśḙna savi॒tā ja̭jāna | yakṛ̭-tklo॒mānaṃ॒-va~rṷṇo bhiṣa॒jyann | mata̭sne vāya॒vyai᳚rna mi̭nāti pi॒ttam || ā॒ntrāṇi̭ sthā॒lī madhu॒ pinva̭mānā | gudā॒ pātrā̭ṇi su॒dughā॒ na dhe॒nuḥ | śye॒nasya॒ patra॒-nna plī॒hā śacī̭bhiḥ | ā॒sa॒ndī nābhi̭ru॒dara॒-nna mā॒tā || ku॒mbho va̭ni॒ṣṭhurja̭ni॒tā śacī̭bhiḥ | yasmi॒nnagre॒ yonyā॒-ṅgarbho̭ a॒ntaḥ || 16 ||

plā॒śīrvya̭kta-śśa॒tadhā̭ra॒ uthsaḥ̭ | du॒he na ku॒mbhīg sva॒dhā-mpi॒tṛbhyaḥ̭ || mukha॒gṃ॒ sada̭sya॒ śira॒ ithsadḙna | ji॒hvā pa॒vitra̭ma॒śvinā॒ sagṃ sara̭svatī | cappa॒-nna pā॒yurbhi॒ṣaga̭sya॒ vālaḥ̭ | va॒stirna śepo॒ hara̭sā tara॒svī || a॒śvibhyā॒-ñcakṣṷra॒mṛta॒-ṅgrahā᳚bhyām | chāgḙna॒ tejo̭ ha॒viṣā̭ śṛ॒tena̭ | pakṣmā̭ṇi go॒dhūmaiḥ॒ kva̭lairu॒tāni̭ | peśo॒ na śu॒klamasi̭taṃ-va~sāte || 17 ||

avi॒rna me॒ṣo na॒si vī॒ryā̭ya | prā॒ṇasya॒ panthā̭ a॒mṛto॒ grahā᳚bhyām | sara̭sva॒tyupa॒vākai᳚rvyā॒nam | nasyā̭ni ba॒ra॒ḥi-rbada̭rai-rjajāna || indra̭sya rū॒pamṛ̭ṣa॒bho balā̭ya | karṇā᳚bhyā॒g॒ śrotra̭ma॒mṛta॒-ṅgrahā᳚bhyām | yavā॒ na ba॒ra॒ḥi-rbhru॒vi kesa̭rāṇi | ka॒rkandhṷ jajñe॒ madhṷ sāra॒gha-mmukhā᳚t || ā॒tmannu॒pasthe॒ na vṛka̭sya॒ loma̭ | mukhe॒ śmaśrṷ̄ṇi॒ na vyā᳚ghralo॒mam || 18 ||

keśā॒ na śī॒ra॒.ṣan. yaśa̭se śri॒yai śikhā᳚ | si॒gṃ॒hasya॒ loma॒ tviṣi̭-rindri॒yāṇi̭ || aṅgā᳚nyā॒tman-bhi॒ṣajā॒ tada॒śvinā᳚ | ā॒tmāna॒maṅgai॒-ssama̭dhā॒-thsara̭svatī | indra̭sya rū॒pagṃ śa॒tamā̭na॒māyuḥ̭ | ca॒ndreṇa॒ jyoti̭ra॒mṛta॒-ndadhā̭nā || sara̭svatī॒ yonyā॒-ṅgarbha̭ma॒ntaḥ | a॒śvibhyā॒-mpatnī॒ sukṛ̭ta-mbibharti | a॒pāgṃ rasḙna॒ varṷṇo॒ na sāmnā᳚ | indragg̭ śri॒yai ja॒naya̭nna॒phsu rājā᳚ || tejaḥ̭ paśū॒nāgṃ ha॒viri̭ndri॒yāva̭t | pa॒ri॒srutā॒ paya̭sā sāra॒gha-mmadhṷ | a॒śvibhyā᳚-ndu॒gdha-mbhi॒ṣajā॒ sara̭svatyā sutāsu॒tābhyā᳚m | a॒mṛta॒-ssoma॒ induḥ̭ || 19 ||

(anta̭ra - ā॒rā - da॒nta--r va̭sāte - vyāghralo॒magṃ - rājā̭ ca॒tvāri̭ ca) (a. 4)

anuvākaṃ 5 - abhiṣekaḥ

mi॒tro̭-'si॒ varṷṇo-'si | sama॒haṃ-vi~śvai᳚rde॒vaiḥ || kṣa॒trasya॒ nābhi̭rasi | kṣa॒trasya॒ yoni̭rasi || syo॒nāmāsī̭da | su॒ṣadā॒māsī̭da | mā tvā̭ higṃsīt | mā mā̭ higṃsīt || niṣa̭sāda dhṛ॒tavra̭to॒ varṷṇaḥ | pa॒styā᳚svā || 20 ||

sāmrā᳚jyāya su॒kratuḥ̭ || de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m | pū॒ṣṇo hastā᳚bhyām | a॒śvino॒-rbhaiṣa̭jyena | teja̭se brahmavarca॒sāyā॒bhiṣi̭ñcāmi || de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m | pū॒ṣṇo hastā᳚bhyām | sara̭svatyai॒ bhaiṣa̭jyena || 21 ||

vī॒ryā̭yā॒nnādyā̭yā॒bhiṣi̭ñcāmi || de॒vasya̭ tvā savi॒tuḥ pra̭sa॒ve | a॒śvino᳚-rbā॒hubhyā᳚m | pū॒ṣṇo hastā᳚bhyām | indra̭syendri॒yeṇa̭ | śri॒yai yaśa̭se॒ balā̭yā॒bhiṣi̭ñcāmi || ko̭-'si kata॒mo̭-'si | kasmai᳚ tvā॒ kāya̭ tvā || suślo॒kā~(4) suma̭ḍga॒lā~(4) satya̭rā॒jā(3)n || śiro̭ me॒ śrīḥ || 22 ||

yaśo॒ mukha᳚m | tviṣiḥ॒ keśā᳚śca॒ śmaśrṷ̄ṇi | rājā̭ me prā॒ṇo̭-'mṛta᳚m | sa॒mrāṭ cakṣuḥ̭ | vi॒rāṭchrotra᳚m | ji॒hvā mḙ bha॒dram | vāmmahaḥ̭ | mano̭ ma॒nyuḥ | sva॒rāḍbhāmaḥ̭ | modāḥ᳚ pramo॒dā a॒ṅgulī॒raṅgā̭ni || 23 ||

ci॒tta-mme॒ sahaḥ̭ | bā॒hū me॒ bala̭mindri॒yam | hastaṷ me॒ karma̭ vī॒rya᳚m | ā॒tmā kṣa॒tramuro॒ mama̭ | pṛ॒ṣṭīrmḙ rā॒ṣṭramu॒dara॒magṃsau᳚ | grī॒vāśca॒ śroṇyau᳚ | ū॒rū a̭ra॒tnī jānṷnī | viśo॒ me-'ṅgā̭ni sa॒rvataḥ̭ | nābhi̭rme ci॒ttaṃ-vi~॒jñāna᳚m | pā॒yurme-'pa̭citirbha॒sat || 24 ||

ā॒na॒nda॒na॒ndāvā॒ṇḍau me᳚ | bhaga॒-ssaubhā᳚gya॒-mpasaḥ̭ || jaṅghā᳚bhyā-mpa॒dbhyā-ndharmo᳚-'smi | vi॒śi rājā॒ prati̭ṣṭhitaḥ || prati̭ kṣa॒tre prati̭tiṣṭhāmi rā॒ṣṭre | pratyaśvḙṣu॒ prati̭tiṣṭhāmi॒ goṣṷ | pratyaṅgḙṣu॒ prati̭tiṣṭhāmyā॒tmann | prati̭ prā॒ṇeṣu॒ prati̭tiṣṭhāmi pu॒ṣṭe | prati॒ dyāvā̭pṛthi॒vyoḥ | pratiti̭ṣṭhāmi ya॒jñe || 25 ||

tra॒yā de॒vā ekā̭daśa | tra॒ya॒stri॒gṃ॒śā-ssu॒rādha̭saḥ | bṛha॒spati̭ purohitāḥ | de॒vasya̭ savi॒tu-ssa॒ve | de॒vā de॒vaira̭vantu mā | pra॒tha॒mā dvi॒tīyaiḥ᳚ | dvi॒tīyā᳚stṛ॒tīyaiḥ᳚ | tṛ॒tīyā᳚-ssa॒tyena̭ | sa॒tyaṃ-ya~॒jñena̭ |ya॒jño yajṷrbhiḥ || 26 ||

yajūgṃ̭ṣi॒ sāma̭bhiḥ | sāmā᳚nyṛ॒gbhiḥ | ṛco̭ yā॒jyā̭bhiḥ | yā॒jyā̭ vaṣaṭkā॒raiḥ | va॒ṣa॒ṭkā॒rā āhṷtibhiḥ | āhṷtayo me॒ kāmā॒n-thsama̭rdhayantu || bhū-ssvāhā᳚ || lomā̭ni॒ praya̭ti॒rmama̭ | tvamma॒ āna̭ti॒rāga̭tiḥ | mā॒gṃ॒sa-mma॒ upa̭natiḥ | va svasthi̭ | ma॒jjā ma॒ āna̭tiḥ || 27 ||

(pa॒styā᳚svā - sara̭svatyai॒ bhaiṣa̭jyena॒ - śrī - raṅgā̭ni - bha॒sa--dya॒jñe - ya॒jño yajṷrbhi॒ - rupa̭nati॒rdve ca̭) (a. 5)

anuvākaṃ 6 - avabhṛthaḥ

ya-ddḙvā deva॒heḍa̭nam | devā̭saścakṛ॒mā va॒yam | a॒gnirmā॒ tasmā॒dena̭saḥ | viśvā᳚-nmuñca॒tvagṃha̭saḥ || yadi॒ divā॒ yadi॒ nakta᳚m | enāgṃ̭si cakṛ॒mā va॒yam | vā॒yurmā॒ tasmā॒dena̭saḥ | viśvā᳚-nmuñca॒tvagṃha̭saḥ || yadi॒ jāgra॒-dyadi॒ svapne᳚ | enāgṃ̭si cakṛ॒mā va॒yam || 28 ||

sūryo̭ mā॒ tasmā॒dena̭saḥ | viśvā᳚-nmuñca॒tvagṃha̭saḥ || yadgrāme॒ yadara̭ṇye | ya-thsa॒bhāyāṃ॒-ya~di̭ndri॒ye | yacchū॒dre yada॒rye᳚ | ena̭ścakṛ॒mā va॒yam | yadeka॒syādhi॒ dharma̭ṇi | tasyā̭va॒yaja̭namasi || yadāpo॒ aghni̭yā॒ varu॒ṇeti॒ śapā̭mahe | tato̭ varuṇa no muñca || 29 ||

ava̭bhṛtha nicaṅkuṇa nice॒rura̭si nicaṅkuṇa | ava̭ de॒vai-rde॒vakṛ̭ta॒meno̭-'yāṭ | ava॒ martyai॒rmartya̭kṛtam | u॒rorā no̭ deva ri॒ṣaspā̭hi || su॒mi॒trā na॒ āpa॒ oṣa̭dhaya-ssantu | du॒rmi॒trāstasmai̭ bhuyāsuḥ | yo᳚-'smā-ndveṣṭi̭ | ya-ñca̭ va॒ya-ndvi॒ṣmaḥ || dru॒pa॒dādi॒ve-nmṷmucā॒naḥ | svi॒nna-ssnā॒tvī malā̭diva || 30 ||

pū॒ta-mpa॒vitrḙṇe॒vājya᳚m | āpaḥ̭ śundhantu॒ maina̭saḥ || udva॒ya-ntama̭sa॒spari̭ | paśya̭nto॒ jyoti॒rutta̭ram | de॒va-ndḙva॒trā sūrya᳚m | aga̭nma॒ jyoti̭rutta॒mam || prati̭yuto॒ varṷṇasya॒ pāśaḥ̭ | pratya̭sto॒ varṷṇasya॒ pāśaḥ̭ || edho᳚-'syedhiṣī॒mahi̭ | sa॒mida̭si || 31 ||

tejo̭-'si॒ tejo॒ mayi̭ dhehi || a॒po anva̭cāriṣam | rasḙna॒ sama̭sṛkṣmahi | paya̭svāgṃ agna॒ ā-'ga̭mam | ta-mmā॒ sagṃsṛ̭ja॒ varca̭sā | pra॒jayā̭ ca॒ dhanḙna ca || sa॒māva̭varti pṛthi॒vī | samu॒ṣāḥ | samu॒ sūryaḥ̭ | samu॒ viśva̭mi॒da-ñjaga̭t | vai॒śvā॒na॒ra jyo̭ti-rbhūyāsam | vi॒bhu-ṅkāmaṃ॒-vya~̭śnavai || bhū-ssvāhā᳚ || 32 ||

(svapna॒ enāgṃ̭si cakṛ॒mā va॒yaṃ - mṷñca॒ - malā̭diva - sa॒mida̭si॒ - jaga॒-ttrīṇi̭ ca) (a. 6)

anuvākaṃ 7 - aindre praśnau prayājānāmekādaśa maitrāvaruṇapraiṣāḥ

hotā̭ yakṣa-thsa॒midhendra̭-mi॒ḍaspa॒de | nābhā̭ pṛthi॒vyā adhi̭ | di॒vo varṣma॒n-thsami̭ddhyate | oji̭ṣṭhaścarṣaṇī॒sahāṋ | vetvājya̭sya॒ hota॒ryaja̭ || hotā̭ yakṣa॒ttanū॒napā̭tam | ū॒tibhi॒-rjetā̭ra॒-mapa̭rājitam | indra̭-nde॒vagṃ sṷva॒rvida᳚m | pa॒thibhi॒-rmadhṷmattamaiḥ | narā॒śagṃsḙna॒ teja̭sā || 33 ||

vetvājya̭sya॒ hota॒ryaja̭ || hotā̭ yakṣa॒diḍā̭bhi॒-rindra̭-mīḍi॒tam | ā॒juhvā̭na॒-mama̭rtyam | de॒vo de॒vai-ssavī᳚ryaḥ | vajra̭hastaḥ puranda॒raḥ | vetvājya̭sya॒ hota॒ryaja̭ || hotā̭ yakṣa-dba॒ra॒ḥiṣīndra̭-nniṣadva॒ram | vṛ॒ṣa॒bha-nnaryā̭pasam | vasṷbhī ru॒drairā̭di॒tyaiḥ | sa॒yugbhi̭-rba॒ra॒ḥirā 'sa̭dat || 34 ||

vetvājya̭sya॒ hota॒ryaja̭ || hotā̭ yakṣa॒dojo॒ na vī॒rya᳚m | saho॒ dvāra॒ indra̭mavardhayann | su॒prā॒ya॒ṇā viśra̭yantāmṛtā॒vṛdhaḥ̭ | dvāra॒ indrā̭ya mī॒ḍhuṣe᳚ | vi॒yantvājya̭sya॒ hota॒ryaja̭ || hotā̭ yakṣadu॒ṣe indra̭sya dhe॒nū | su॒dughḙ mā॒taraṷ ma॒hī | savā॒tarau॒ na teja̭sī | va॒thsamindra̭-mavardhatām || 35 ||

vī॒tāmājya̭sya॒ hota॒ryaja̭ || hotā̭ yakṣa॒-ddaivyā॒ hotā̭rā | bhi॒ṣajā॒ sakhā̭yā | ha॒viṣendra̭-mbhiṣajyataḥ | ka॒vī de॒vau pracḙtasau | indrā̭ya dhatta indri॒yam | vī॒tāmājya̭sya॒ hota॒ryaja̭ || hotā̭ yakṣatti॒sro de॒vīḥ | traya̭stri॒dhāta̭vo॒-'pasaḥ̭ | iḍā॒ sara̭svatī॒ bhāra̭tī || 36 ||

ma॒hīndra̭patnīr-ha॒viṣma̭tīḥ | vi॒yantvājya̭sya॒ hota॒ryaja̭ || hotā̭ yakṣa॒ttvaṣṭā̭ra॒-mindra̭-nde॒vam | bhi॒ṣajagṃ̭ su॒yaja̭-ṅghṛta॒śriya᳚m | pu॒ru॒rūpagṃ̭ su॒reta̭sa-mma॒ghoni᳚m | indrā̭ya॒ tvaṣṭā॒ dadha̭dindri॒yāṇi̭ | vetvājya̭sya॒ hota॒ryaja̭ || hotā̭ yakṣa॒-dvana॒spati᳚m | śa॒mi॒tāragṃ̭ śa॒takra̭tum | dhi॒yo jo॒ṣṭāra̭-mindri॒yam || 37 ||

maddhvā̭ sama॒ñjanpa॒thibhiḥ̭ su॒gebhiḥ̭ | svadā̭ti ha॒vya-mmadhṷnā ghṛ॒tena̭ | vetvājya̭sya॒ hota॒ryaja̭ || hotā̭ yakṣa॒dindra॒gg॒ svāhā-''jya̭sya | svāhā॒ meda̭saḥ | svāhā᳚ sto॒kānā᳚m | svāhā॒ svāhā̭kṛtīnām | svāhā̭ ha॒vyasū᳚ktīnām | svāhā̭ de॒vāgṃ ā᳚jya॒pān | svāhendragṃ̭ ho॒trājjṷṣā॒ṇāḥ | indra॒ ājya̭sya viyantu | hota॒ryaja̭ || 38 ||

(teja̭sā-'sada-davardhatāṃ॒-bhāra̭tī-ndri॒yaṃ-jṷṣā॒ṇā dve ca̭) (a. 7)

(sa॒midhendra॒-ntanū॒napā̭ta॒miḍā̭bhi-rba॒r॒hiṣyoja̭ u॒ṣe daivyā̭ ti॒srastvaṣṭā̭raṃ॒-va~na॒spati॒mindra᳚m | sa॒midhendra̭-ñca॒turvetveko̭ vi॒yantu॒ dvirvī॒tāmeko̭ vi॒yantu॒ dvirvetveko̭ vi॒yantu॒ hota॒ryaja̭ )

anuvākaṃ 8 - aindre praśnau prayājayājyāḥ

sami̭ddha॒ indra̭ u॒ṣasā॒manī̭ke | pu॒ro॒rucā̭ pūrva॒kṛdvā̭vṛdhā॒naḥ | tri॒bhirde॒vaistri॒gṃ॒śatā॒ vajra̭bāhuḥ | ja॒ghāna̭ vṛ॒traṃ-vi~ duro̭ vavāra || narā॒śagṃsaḥ॒ prati॒ śūro॒ mimā̭naḥ | tanū॒napā॒t-prati̭ ya॒jñasya॒ dhāma̭ | gobhi̭-rva॒pāvā॒-nmadhṷnā sama॒ñjann | hira̭ṇyaiśca॒ndrī ya̭jati॒ pracḙtāḥ || ī॒ḍi॒to de॒vairhari̭vāgṃ abhi॒ṣṭiḥ | ā॒juhvā̭no ha॒viṣā॒ śardha̭mānaḥ || 39 ||

pu॒ra॒daṃ॒ro ma॒ghavā॒n॒. vajra̭bāhuḥ | āyā̭tu ya॒jñamupa̭ no juṣā॒ṇaḥ || ju॒ṣā॒ṇo ba॒ra॒ḥirhari̭vānna॒ indraḥ̭ | prā॒cīnagṃ̭ sīdatpra॒diśā̭ pṛthi॒vyāḥ | u॒ru॒vyacāḥ॒ pratha̭mānagg syo॒nam | ā॒di॒tyaira॒ktaṃ-va~sṷbhi-ssa॒joṣāḥ᳚ || indra॒-nduraḥ̭ kava॒ṣyo̭ dhāva̭mānāḥ | vṛṣā̭ṇaṃ-ya~ntu॒ jana̭ya-ssu॒patnīḥ᳚ | dvāro̭ de॒vīra॒bhito॒ viśra̭yantām | su॒vīrā̭ vī॒ra-mpratha̭mānā॒ maho̭bhiḥ || 40 ||

u॒ṣāsā॒ naktā̭ bṛha॒tī bṛ॒hanta᳚m | paya̭svatī su॒dughe॒ śūra॒mindra᳚m | peśa̭svatī॒ tantṷnā saṃ॒vya~ya̭ntī | de॒vānā᳚-nde॒vaṃ-ya~̭jata-ssuru॒kme || daivyā॒ mimā̭nā॒ mana̭sā puru॒trā | hotā̭rā॒vindra̭-mpratha॒mā su॒vācā᳚ | mū॒rdhan. ya॒jñasya॒ madhṷnā॒ dadhā̭nā | prā॒cīna॒-ñjyoti̭rha॒viṣā̭ vṛdhātaḥ || ti॒sro de॒vīrha॒viṣā॒ vardha̭mānāḥ | indra̭-ñjuṣā॒ṇā vṛṣa̭ṇa॒-nna patnīḥ᳚ || 41 ||

acchi̭nna॒-ntantu॒-mpaya̭sā॒ sara̭svatī | iḍā̭ de॒vī bhāra̭tī vi॒śvatū᳚rtiḥ || tvaṣṭā॒ dadha॒dindrā̭ya॒ śuṣma᳚m | apā॒ko-'ci̭ṣṭurya॒śasḙ pu॒rūṇi̭ | vṛṣā॒ yaja॒n vṛṣa̭ṇa॒-mbhūri̭retāḥ | mū॒rdhan. ya॒jñasya॒ sama̭naktu de॒vān || vana॒spati॒-rava̭sṛṣṭo॒ na pāśaiḥ᳚ | tmanyā̭ sama॒ñjañcha̭mi॒tā na de॒vaḥ | indra̭sya ha॒vyairja॒ṭhara̭-mpṛṇā॒naḥ | svadā̭ti ha॒vya-mmadhṷnā ghṛ॒tena̭ || sto॒kānā॒mindu॒-mprati॒ śūra॒ indraḥ̭ | vṛ॒ṣā॒yamā̭ṇo vṛṣa॒bha-stṷrā॒ṣāṭ | ghṛ॒ta॒pruṣā॒ madhṷnā ha॒vyamu॒ndann | mū॒rdhan. ya॒jñasya̭ juṣatā॒g॒ svāhā᳚ || 42 ||

(śardha̭māno॒ - maho̭bhiḥ॒ - patnī᳚--r ghṛ॒tena̭ ca॒tvāri̭ ca) (a. 8)

anuvākaṃ 9 - aindre praśnau vapādīnāṃ-yā~jyānuvākyāḥ

āca̭rṣaṇi॒prā vṛ̭ṣa॒bho janā̭nām | rājā̭ kṛṣṭī॒nā-mpṷruhū॒ta indraḥ̭ | stu॒ta-śśra̭va॒syannava॒sopa̭ma॒drik | yu॒ktvā harī॒ vṛṣa॒ṇā ''yā᳚hya॒rvām ||, vi॒veṣa॒ yanmā̭ dhi॒ṣaṇā̭ ja॒jāna॒ stavai̭ pu॒rā pāryā॒dindra॒ mahnaḥ̭ | agṃha̭so॒ yatra̭ pī॒para॒dyathā̭ no nā॒veva॒ yānta̭ mu॒bhayḙ havante |||| tagṃ sa॒dhrīcī̭rū॒tayo॒ vṛṣṇi̭yāni | pauggsyā̭ni ni॒yutaḥ̭ saścu॒rindra᳚m | sa॒mu॒dra-nna sindha̭va u॒kthaśṷṣmāḥ | u॒ru॒vyaca̭sa॒giṃra॒ āvi̭śanti |||| sa॒tyamittanna tvāvāgṃ̭ a॒nyo asti̭ | indra̭ de॒vo na martyo॒ jyāyāṋ | aha॒nnahi̭-mpari॒śayā̭na॒marṇaḥ̭ | avā̭sṛjo॒-'po acchā̭ samu॒dram || prasa̭sāhiṣe puruhūta॒ śatrūṋ | jyeṣṭha̭ste॒ śuṣma̭ i॒ha rā॒tira̭stu | indrābha̭ra॒ dakṣi̭ṇenā॒ vasṷ̄ni | pati॒-ssindhṷ̄nāmasi re॒vatī̭nām || sa śevṛ̭dha॒madhi̭dhā dyu॒mnama॒sme | mahi̭ kṣa॒tra-ñja̭nā॒ṣāḍi̭ndra॒ tavya᳚m | rakṣā̭ ca no ma॒ghonaḥ̭ pā॒hi sū॒rīn | rā॒ye ca̭ na-ssvapa॒tyā i॒ṣe dhāḥ᳚ || 43 ||

(re॒vatī̭nā-ñca॒tvāri̭ ca) (a. 9)

anuvākaṃ 10 - aindre praśnau anuyājānāmekādaśa maitrāvaruṇapraiṣāḥ

de॒va-mba॒r॒hirindragṃ̭ sude॒va-nde॒vaiḥ | vī॒rava̭-thstī॒rṇaṃ-ve~dyā̭mavardhayat | vasto᳚rvṛ॒ta-mprākto᳚rbhṛ॒tam | rā॒yā ba॒r॒hiṣma॒to-'tya̭gāt | va॒su॒vanḙ vasu॒dheya̭sya vetu॒ yaja̭ || de॒vīrdvāra॒ indragṃ̭ saṅghā॒te | vi॒ḍvīryāma̭nnavardhayann | ā va॒thsena॒ tarṷṇena kumā॒reṇa̭ ca mīvi॒tā apārvā̭ṇam | re॒ṇuka̭kāṭa-nnudantām | va॒su॒vanḙ vasu॒dheya̭sya viyantu॒ yaja̭ || 44 ||

de॒vī u॒ṣāsā॒ naktā᳚ | indraṃ̭-ya~॒jñe pra̭ya॒tya̭hvetām | daivī॒rviśaḥ॒ prāyā̭siṣṭām | suprī̭te॒ sudhi̭te abhūtām | va॒su॒vanḙ vasu॒dheya̭sya vītāṃ॒-ya~ja̭ || de॒vī joṣṭrī॒ vasṷdhitī | de॒vamindra̭mavardhatām | ayā᳚vya॒nyā-'ghā dveṣāgṃ̭si | ā-'nyā vā᳚kṣī॒-dvasu॒ vāryā̭ṇi | yaja̭mānāya śikṣi॒te || 45 ||

va॒su॒vanḙ vasu॒dheya̭sya vītāṃ॒-ya~ja̭ || de॒vī ū॒rjāhṷtī॒ dughḙ su॒dughe᳚ | paya॒sendra̭mavardhatām | iṣa॒mūrja̭ma॒nyā 'vā᳚kṣīt | sagdhi॒gṃ॒ sapī̭tima॒nyā | navḙna॒ pūrva॒-ndaya̭māne | pu॒rā॒ṇena॒ nava᳚m | adhā̭tā॒-mūrja̭mū॒rjāhṷtī॒ vasu॒ vāryā̭ṇi | yaja̭mānāya śikṣi॒te | va॒su॒vanḙ vasu॒dheya̭sya vītāṃ॒-ya~ja̭ || 46 ||

de॒vā daivyā॒ hotā̭rā | de॒vamindra̭mavardhatām | ha॒tāgha̭śagṃ sā॒vābhā᳚rṣṭāṃ॒-va~su॒ vāryā̭ṇi | yaja̭mānāya śikṣi॒tau | va॒su॒vanḙ vasu॒dheya̭sya vītāṃ॒-ya~ja̭ || de॒vīsti॒srasti॒sro de॒vīḥ | pati॒mindra̭mavardhayann | aspṛ̭kṣa॒dbhāra̭tī॒ diva᳚m | ru॒drairya॒jñagṃ sara̭svatī | iḍā॒ vasṷmatī gṛ॒hān || 47 ||

va॒su॒vanḙ vasu॒dheya̭sya viyantu॒ yaja̭ || de॒va indro॒ narā॒śagṃsaḥ̭ | tri॒va॒rū॒tha-stri̭vandhu॒raḥ | de॒vamindra̭mavardhayat | śa॒tena̭ śitipṛ॒ṣṭhānā॒māhi̭taḥ | sa॒hasrḙṇa॒ prava̭rtate | mi॒trāvaru॒ṇeda̭sya ho॒tramarha̭taḥ | bṛha॒spatiḥ̭ sto॒tram | a॒śvinā-''ddhva̭ryavam | va॒su॒vanḙ vasu॒dheya̭sya vetu॒ yaja̭ || 48 ||

de॒va indro॒ vana॒spatiḥ̭ | hira̭ṇyaparṇo॒ madhṷśākha-ssupippa॒laḥ | de॒vamindra̭mavardhayat | diva॒magrḙṇāprāt | ā-'ntari̭kṣa-mpṛthi॒vīma̭dṛgṃhīt | va॒su॒vanḙ vasu॒dheya̭sya vetu॒ yaja̭ || de॒va-mba॒ra॒ḥirvāri̭tīnām | de॒vamindra̭mavardhayat | svā॒sa॒stha-mindre॒ṇāsa̭nnam | a॒nyā ba॒r॒hīgṣya॒bhya̭bhūt | va॒su॒vanḙ vasu॒dheya̭sya vetu॒ yaja̭ || de॒vo a॒gni-ssvi̭ṣṭa॒kṛt | de॒vamindra̭mavardhayat | svi̭ṣṭa-ṅku॒rvan-thsvi̭ṣṭa॒kṛt | svi̭ṣṭama॒dya ka̭rotu naḥ | va॒su॒vanḙ vasu॒dheya̭sya vetu॒ yajḙ || 49 ||

(vi॒ya॒ntu॒ yaja̭ - śikṣi॒te - śi̭kṣi॒te va̭su॒vanḙ vasu॒dheya̭sya vītāṃ॒-ya~ja̭-gṛ॒hān.-vḙtu॒ yajā̭-bhū॒-thṣaṭca̭) (a. 10)

de॒va-mba॒r॒hi-rde॒vīrdvāro̭ de॒vī u॒ṣāsā॒ naktā̭ de॒vī joṣṭrī̭ de॒vī ū॒rjāhṷtī de॒vā daivyā॒ hotā̭rā śikṣi॒tau de॒vīsti॒srasti॒sro de॒vīḥ pati̭-nde॒va indro॒ narā॒śagṃso̭ de॒va indro॒ vana॒spati̭-rde॒va-mba॒r॒hirvāri̭tīnā-nde॒vo a॒gni-ssvi̭ṣṭa॒kṛ-dde॒vam | ve॒tu॒ vi॒ya॒ntu॒ ca॒turvī̭tā॒meko̭ viyantu ca॒turvḙtu | a॒va॒rdha॒ya॒da॒va॒rdha॒ya॒-ntrira̭vardhatā॒meko̭ 'vardhayagg śca॒tura̭vardhayat | vasto॒rā va॒thsena॒ daivī॒rayā॒vīṣagṃ̭ ha॒tāspṛ̭kṣaccha॒tena॒ diva॒mindragg̭ svāsa॒sthagg svi̭ṣṭam | śikṣi॒te śi̭kṣi॒te śi̭kṣi॒tau |

anuvākaṃ 11 - paśutraye praya jārthā maitrāvaruṇapraiṣāḥ

hotā̭ yakṣa-thsa॒midhā॒-'gni-mi॒ḍaspa॒de | a॒śvinendra॒gṃ॒ sara̭svatīm | a॒jo dhū॒mro na go॒dhūmaiḥ॒ kva̭lairbheṣa॒jam | madhu॒ śaṣpai॒rna teja̭ indri॒yam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa॒ttanū॒napā॒-thsara̭svatī | avi̭rme॒ṣo na bhḙṣa॒jam | pa॒thā madhṷma॒tā ''bha̭rann | a॒śvinendrā̭ya vī॒rya᳚m || 50 ||

bada̭rairupa॒vākā̭bhi-rbheṣa॒ja-ntokma̭bhiḥ | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa॒nnarā॒śagṃsa॒na-nna॒gnahu᳚m | pati॒gṃ॒ surā̭yai bheṣa॒jam | me॒ṣa-ssara̭svatī bhi॒ṣak | ratho॒ na ca॒ndrya̭śvino᳚rva॒pā indra̭sya vī॒rya᳚m | bada̭rairupa॒vākā̭bhi-rbheṣa॒ja-ntokma̭bhiḥ | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || 51 ||

hotā̭ yakṣadi॒ḍeḍi॒ta ā॒juhvā̭na॒-ssara̭svatīm | indra॒-mbalḙna va॒rdhayanṋ | ṛ॒ṣa॒bheṇa॒ gave᳚ndri॒yam | a॒śvinendrā̭ya vī॒rya᳚m | yavaiḥ᳚ ka॒rkandhṷbhiḥ | madhṷ lā॒jairna māsa̭ram | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa-dba॒ra॒ḥi-ssu॒ṣṭarī॒mo-'rṇa̭mradāḥ | bhi॒ṣannāsa̭tyā || 52 ||

bhi॒ṣajā॒-'śvinā-'śvā॒ śiśṷmatī | bhi॒ṣagdhe॒nu-ssara̭svatī | bhi॒ṣagdu॒ha indrā̭ya bheṣa॒jam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa॒dduro॒ diśaḥ̭ | ka॒va॒ṣyo̭ na vyaca̭svatīḥ | a॒śvibhyā॒-nna duro॒ diśaḥ̭ | indro॒ na roda̭sī॒ dughe᳚ | du॒he kāmā॒n-thsara̭svatī || 53 ||

a॒śvinendrā̭ya bheṣa॒jam | śu॒kra-nna jyoti̭rindri॒yam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa-thsu॒peśa̭so॒ṣe nakta॒-ndivā᳚ | a॒śvinā̭ sañjānā॒ne | sama̭ñjāte॒ sara̭svatyā | tviṣi॒mindre॒ na bhḙṣa॒jam | śye॒no na raja̭sā hṛ॒dā | paya॒-ssomaḥ̭ pari॒srutā̭ ghṛ॒ta-mmadhṷ || 54 ||

vi॒yantvājya̭sya॒ hota॒ryaja̭ || hotā̭ yakṣa॒ddaivyā॒ hotā̭rā bhi॒ṣajā॒-'śvinā᳚ | indra॒-nna jāgṛ̭vī॒ divā॒ nakta॒-nna bhḙṣa॒jaiḥ | śūṣa॒gṃ॒ sara̭svatī bhi॒ṣak | sīsḙna duha indri॒yam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa-tti॒sro de॒vīrna bhḙṣa॒jam | traya̭stri॒dhāta̭vo॒-'pasaḥ̭ | rū॒pamindrḙ hira॒ṇyaya᳚m || 55 ||

a॒śvineḍā॒ na bhāra̭tī | vā॒cā sara̭svatī | maha॒ indrā̭ya dadhurindri॒yam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa॒ttvaṣṭā̭ra॒-mindra̭ma॒śvinā᳚ | bhi॒ṣaja॒-nna sara̭svatīm | ojo॒ na jū॒tiri̭ndri॒yam | vṛko॒ na ra̭bha॒so bhi॒ṣak | yaśa॒-ssura̭yā bheṣa॒jam || 56 ||

śri॒yā na māsa̭ram | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣa॒-dvana॒spati᳚m | śa॒mi॒tāragṃ̭ śa॒takra̭tum | bhī॒ma-nna ma॒nyugṃ rājā̭naṃ-vyā~॒ghra-nnama̭sā॒-'śvinā॒ bhāma᳚m | sara̭svatī bhi॒ṣak | indrā̭ya duha indri॒yam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || 57 ||

hotā̭ yakṣada॒gnigg svāhā-''jya̭sya sto॒kānā᳚m | svāhā॒ meda̭sā॒-mpṛtha̭k | svāhā॒ chāga̭ma॒śvibhyā᳚m | svāhā̭ me॒ṣagṃ sara̭svatyai | svāhā̭rṣa॒bha-mindrā̭ya si॒gṃ॒hāya॒ saha̭sendri॒yam | svāhā॒-'gni-nna bhḙṣa॒jam | svāhā॒ soma̭mindri॒yam | svāhendragṃ̭ su॒trāmā̭ṇagṃ savi॒tāraṃ॒-va~rṷṇa-mbhi॒ṣajā॒-mpati᳚m | svāhā॒ vana॒spati̭-mpri॒ya-mpātho॒ na bhḙṣa॒jam | svāhā̭ de॒vāgṃ ā᳚jya॒pān || 58 ||

svāhā॒-'gnigṃ ho॒trājjṷṣā॒ṇo a॒gni-rbhḙṣa॒jam | paya॒-ssomaḥ̭ pari॒srutā̭ ghṛ॒ta-mmadhṷ | vi॒yantvājya̭sya॒ hota॒ryaja̭ || hotā̭ yakṣada॒śvinā॒ sara̭svatī॒mindragṃ̭ su॒trāmā̭ṇam | i॒me somā᳚-ssu॒rāmā̭ṇaḥ | chāgai॒rna me॒ṣair-ṛ̭ṣa॒bhai-ssu॒tāḥ | śaṣpai॒rna tokma̭bhiḥ | lā॒jairmaha̭svantaḥ | madā॒ māsa̭reṇa॒ pari̭ṣkṛtāḥ | śu॒krāḥ paya̭svanto॒-'mṛtāḥ᳚ | prasthi̭tā vo madhu॒ścutaḥ̭ | tāna॒śvinā॒ sara̭sva॒tīndraḥ̭ su॒trāmā̭ vṛtra॒hā | ju॒ṣantāgṃ̭ sau॒mya-mmadhṷ | piba̭ntu॒ mada̭ntu vi॒yantu॒ soma᳚m | hota॒ryaja̭ || 59 ||

(vī॒ryaṃ - ~vi॒yantvājya̭sya॒ hota॒ryaja॒ - nāsa̭tyā॒ - sara̭svatī॒ - madhṷ - hira॒ṇyayaṃ̭ - bheṣa॒jaṃ - ~vi॒yantvājya̭sya॒ hota॒ryajā᳚ - jya॒pā - na॒mṛtāḥ॒ pañca̭ ca) (a. 11)

anuvākaṃ 12 - paśutraye prayājayājyā āpriyaḥ

sami̭ddho a॒gnira̭śvinā | ta॒pto gha॒rmo vi॒rāṭ-thsu॒taḥ | du॒he dhe॒nu-ssara̭svatī | somagṃ̭ śu॒krami॒hendri॒yam || ta॒nū॒pā bhi॒ṣajā̭ su॒te | a॒śvino॒bhā sara̭svatī | maddhvā॒ rajāgṃ̭sīndri॒yam | indrā̭ya pa॒thibhi̭-rvahān || indrā॒yendu॒gṃ॒ sara̭svatī | narā॒śagṃsḙna na॒gnahuḥ̭ || 60 ||

adhā̭tāma॒śvinā॒ madhṷ | bhe॒ṣa॒ja-mbhi॒ṣajā̭ su॒te || ā॒juhvā̭nā॒ sara̭svatī | indrā̭yendri॒yāṇi̭ vī॒rya᳚m | iḍā̭bhiraśvinā॒viṣa᳚m | samūrja॒gṃ॒ sagṃ ra॒yi-nda̭dhuḥ || aśvi̭nā॒ namṷce-ssu॒tam | somagṃ̭ śu॒kra-mpa̭ri॒srutā᳚ | sara̭svatī॒ tamābha̭rat | ba॒r॒hiṣendrā̭ya॒ pāta̭ve || 61 ||

ka॒va॒ṣyo̭ na vyaca̭svatīḥ | a॒śvibhyā॒-nna duro॒ diśaḥ̭ | indro॒ na roda̭sī॒ dughe᳚ | du॒he kāmā॒n-thsara̭svatī || u॒ṣāsā॒ nakta̭maśvinā | divendragṃ̭ sā॒yami̭ndri॒yaiḥ | sa॒jā॒nnā॒ne su॒peśa̭sā | sama̭ñjāte॒ sara̭svatyā || pā॒ta-nno̭ aśvinā॒ divā᳚ | pā॒hi naktagṃ̭ sarasvati || 62 ||

daivyā̭ hotārā bhiṣajā | pā॒tamindra॒gṃ॒ sacā̭ su॒te || ti॒srastre॒dhā sara̭svatī | a॒śvinā॒ bhāra॒tīḍā᳚ | tī॒vra-mpa̭ri॒srutā॒ soma᳚m | indrā̭ya suṣavu॒rmada᳚m || aśvi̭nā bheṣa॒ja-mmadhṷ | bhe॒ṣa॒ja-nna॒-ssara̭svatī | indre॒ tvaṣṭā॒ yaśa॒-śśriya᳚m | rū॒pagṃ rṷ̄pamadhu-ssu॒te || ṛ॒tu॒thendro॒ vana॒spatiḥ̭ | śa॒śa॒mā॒naḥ pa̭ri॒srutā᳚ | kī॒lāla̭ma॒śvibhyā॒-mmadhṷ | du॒he dhe॒nu-ssara̭svatī || gobhi॒rna soma̭maśvinā | māsa̭reṇa pari॒ṣkṛtā᳚ | sama̭dhātā॒gṃ॒ sara̭svatyā | svāhendrḙ su॒ta-mmadhṷ || 63 ||

(na॒gnahuḥ॒ - pāta̭ve - sarasva - tyadhu-ssu॒te᳚-'ṣṭau ca̭) (a. 12)

anuvākaṃ 13 - paśutraye vapādīnāṃ-yā~jyānuvākyāḥ

a॒śvinā̭ ha॒viri̭ndri॒yam | namṷcerdhi॒yā sara̭svatī | ā śu॒kramā̭su॒rādva॒su | ma॒ghamindrā̭ya jabhrire || yama॒śvinā॒ sara̭svatī | ha॒viṣendra॒-mava̭rdhayann | sa bi̭bheda ba॒laṃ (va॒laṃ) ma॒gham | namṷcāvāsu॒re sacā᳚ | tamindra̭-mpa॒śava॒-ssacā᳚ || a॒śvino॒bhā sara̭svatī || 64 ||

dadhā̭nā a॒bhya̭nūṣata | ha॒viṣā̭ ya॒jñami̭ndri॒yam || ya indra̭ indri॒ya-nda॒dhuḥ | sa॒vi॒tā varṷṇo॒ bhagaḥ̭ | sa su॒trāmā̭ ha॒viṣpa̭tiḥ | yaja̭mānāya saścata || sa॒vi॒tā varṷṇo॒ dadha̭t | yaja̭mānāya dā॒śuṣe᳚ | āda̭tta॒ namṷce॒rvasṷ | su॒trāmā॒ bala̭mindri॒yam || 65 ||

varṷṇaḥ, kṣa॒trami̭ndri॒yam | bhagḙna savi॒tā śriya᳚m | su॒trāmā॒ yaśa̭sā॒ bala᳚m | dadhā̭nā ya॒jñamā̭śata || aśvi̭nā॒ gobhi̭rindri॒yam | aśvḙbhi-rvī॒rya̭-mbala᳚m | ha॒viṣendra॒gṃ॒ sara̭svatī | yaja̭māna-mavardhayann || tā nāsa̭tyā su॒peśa̭sā | hira̭ṇyavartanī॒ narā᳚ | sara̭svatī ha॒viṣma̭tī | indra॒ kama̭rsu no-'vata || tā bhi॒ṣajā̭ su॒karma̭ṇā | sā su॒dughā॒ sara̭svatī | sa vṛ̭tra॒hā śa॒takra̭tuḥ | indrā̭ya dadhurindri॒yam || 66 ||

(u॒bhā sara̭svatī॒ - bala̭mindri॒yaṃ - narā॒ ṣaṭca̭) (a. 13)

anuvākaṃ 14 - paśutraye anūyājapraiṣāḥ

de॒va-mba॒r॒hi-ssara̭svatī | su॒de॒vamindrḙ a॒śvinā᳚ | tejo॒ na cakṣṷra॒kṣyoḥ | ba॒r॒hiṣā̭ dadhurindri॒yam | va॒su॒vanḙ vasu॒dheya̭sya viyantu॒ yaja̭ || de॒vīrdvāro̭ a॒śvinā᳚ | bhi॒ṣajendre॒ sara̭svatī | prā॒ṇa-nna vī॒rya̭-nna॒si | dvāro̭ dadhurindri॒yam | va॒su॒vanḙ vasu॒dheya̭sya viyantu॒ yaja̭ || 67 ||

de॒vī u॒ṣāsā̭va॒śvinā᳚ | bhi॒ṣajendre॒ sara̭svatī | bala॒-nna vāca̭mā॒sye᳚ | u॒ṣābhyā᳚-ndadhurindri॒yam | va॒su॒vanḙ vasu॒dheya̭sya viyantu॒ yaja̭ || de॒vī joṣṭrī̭ a॒śvinā᳚ | su॒trāmendre॒ sara̭svatī | śrotra॒-nna karṇa̭yo॒ryaśaḥ̭ | joṣṭrī᳚bhyā-ndadhurindri॒yam | va॒su॒vanḙ vasu॒dheya̭sya viyantu॒ yaja̭ || 68 ||

de॒vī ū॒rjāhṷtī॒ dughḙ su॒dughe᳚ | paya॒sendra॒gṃ॒ sara̭svatya॒śvinā̭ bhi॒ṣajā̭-'vata | śu॒kra-nna jyoti॒-sstana̭yo॒rāhṷtī dhatta indri॒yam | va॒su॒vanḙ vasu॒dheya̭sya viyantu॒ yaja̭ || de॒vā de॒vānā᳚-mbhi॒ṣajā᳚ | hotā̭rā॒vindra̭-ma॒śvinā᳚ | va॒ṣa॒ṭkā॒rai-ssara̭svatī | tviṣi॒-nna hṛda̭ye ma॒tim | hotṛ̭bhyā-ndadhurindri॒yam | va॒su॒vanḙ vasu॒dheya̭sya viyantu॒ yaja̭ || 69 ||

de॒vī-sti॒sra-sti॒sro de॒vīḥ | sara̭svatya॒śvinā॒ bhāra॒tīḍā᳚ | śūṣa॒-nna maddhye॒ nābhyā᳚m | indrā̭ya dadhurindri॒yam | va॒su॒vanḙ vasu॒dheya̭sya viyantu॒ yaja̭ || de॒va indro॒ narā॒śagṃsaḥ̭ | tri॒va॒rū॒tha-ssara̭svatyā॒ 'śvibhyā̭mīyate॒ rathaḥ̭ | reto॒ na rū॒pama॒mṛta̭-ñja॒nitra᳚m | indrā̭ya॒ tvaṣṭā॒ dadha̭dindri॒yāṇi̭ | va॒su॒vanḙ vasu॒dheya̭sya viyantu॒ yaja̭ || 70 ||

de॒va indro॒ vana॒spatiḥ̭ | hira̭ṇyaparṇo a॒śvibhyā᳚m | sara̭svatyā-ssupippa॒laḥ | indrā̭ya pacyate॒ madhṷ | ojo॒ na jū॒timṛ̭ṣa॒bho na bhāma᳚m | vana॒spati̭rno॒ dadha̭dindri॒yāṇi̭ | va॒su॒vanḙ vasu॒dheya̭sya viyantu॒ yaja̭ || de॒va-mba॒r॒hirvāri̭tīnām | a॒ddhva॒re stī॒rṇama॒śvibhyā᳚m | ūrṇa̭mradā॒-ssara̭svatyāḥ || 71 ||

syo॒nami̭ndra te॒ sadaḥ̭ | ī॒śāyai̭ ma॒nyugṃ rājā̭na-mba॒r॒hiṣā̭ dadhurindri॒yam | va॒su॒vanḙ vasu॒dheya̭sya viyantu॒ yaja̭ || de॒vo a॒gni-ssvi̭ṣṭa॒kṛt | de॒vān.ya̭kṣa-dyathāya॒tham | hotā̭rā॒-vindra̭ma॒śvinā᳚ | vā॒cā vāca॒gṃ॒ sara̭svatīm | a॒gnigṃ somagg̭ sviṣṭa॒kṛt | svi̭ṣṭa॒ indraḥ̭ su॒trāmā̭ savi॒tā varṷṇo bhi॒ṣak | i॒ṣṭo de॒vo vana॒spatiḥ̭ | svi̭ṣṭā de॒vā ā᳚jya॒pāḥ | i॒ṣṭo a॒gnira॒gninā᳚ | hotā̭ ho॒tre svi̭ṣṭa॒kṛt | yaśo॒ na dadha̭dindri॒yam | ūrja॒mapa̭citigg sva॒dhām | va॒su॒vanḙ vasu॒dheya̭sya viyantu॒ yaja̭ || 72 ||

(dvāro̭ dadhurindri॒yaṃ-va~̭su॒vanḙ vasu॒dheya̭sya viyantu॒ yaja॒ - joṣṭrī᳚bhyā-ndadhurindri॒yaṃ-va~̭su॒vanḙ vasu॒dheya̭sya viyantu॒ yaja॒ -hotṛ̭bhyā-ndadhurindri॒yaṃ-va~̭su॒vanḙ vasu॒dheya̭sya viyantu॒ yaje᳚ - ndri॒yāṇi̭ vasu॒vanḙ vasu॒dheya̭sya viyantu॒ yaja॒ - sara̭svatyā॒ - vana॒spati॒-ṣṣaṭca̭) (a. 14)

(de॒va-mba॒r॒hi-rde॒vī-rdvāro̭ de॒vī u॒ṣāsā̭va॒śvinā̭ de॒vī joṣṭra̭ de॒vī ū॒rjāhṷ̄tī de॒vā de॒vānā᳚-mbhi॒ṣajā̭ vaṣaṭkā॒rai-rde॒vīstisrasti॒sro de॒vī-ssara̭svatī de॒va indro॒ narā॒śagṃso̭ de॒va indro॒ vana॒spati̭rde॒va-mba॒r॒hirvāri̭tīnā-nde॒voa॒gni-ssvi̭ṣṭa॒kṛ-dde॒vān) |

anuvākaṃ 15 - sūktavākapraiṣaḥ

a॒gnima॒dya hotā̭ramavṛṇīta | a॒yagṃ sṷtāsu॒tī yaja̭mānaḥ | paca̭-npa॒ktīḥ | paca̭-npuro॒ḍāśāṋ | gṛ॒hṇa-ngrahāṋ | ba॒ddhnanna॒śvibhyā॒-ñchāga॒gṃ॒ sara̭svatyā॒ indrā̭ya | ba॒ddhnan-thsara̭svatyai me॒ṣamindrā̭yā॒śvibhyā᳚m | ba॒ddhnannindrā̭yarṣa॒bha-ma॒śvibhyā॒gṃ॒ sara̭svatyai | sū॒pa॒sthā a॒dya de॒vo vana॒spati̭rabhavat | a॒śvibhyā॒-ñchāgḙna॒ sara̭svatyā॒ indrā̭ya || 73 ||

sara̭svatyai me॒ṣeṇendrā̭yā॒śvibhyā᳚m | indrā̭yarṣa॒bheṇā॒śvibhyā॒gṃ॒ sara̭svatyai | akṣa॒gg॒stānmḙda॒staḥ prati̭ paca॒tā-'gra̭bhīṣuḥ | avī̭vṛdhanta॒ grahaiḥ᳚ | apā̭tāma॒śvinā॒ sara̭sva॒tīndraḥ̭ su॒trāmā̭ vṛtra॒hā | somā᳚n-thsu॒rāmṇaḥ̭ | upo̭ ukthāma॒dā-śśrau॒dvimadā̭ adann | avī̭vṛdha-ntāṅgū॒ṣaiḥ | tvāma॒dyarṣa̭ ārṣeyarṣīṇā-nnapādavṛṇīta | a॒yagṃ sṷtāsu॒tī yaja̭mānaḥ | ba॒hubhya॒ āsaṅga̭tebhyaḥ | e॒ṣa mḙ de॒veṣu॒ vasu॒ vāryā ya̭kṣyata॒ iti̭ | tā yā de॒vā dḙva॒dānā॒nyaduḥ̭ | tānya̭smā॒ ā ca॒ śāsva̭ | ā ca̭ gurasva | i॒ṣi॒taśca̭ hota॒rasi̭ bhadra॒vācyā̭ya॒ preṣi̭to॒ mānṷṣaḥ | sū॒kta॒vā॒kāya̭ sū॒ktā brṷ̄hi || 74 ||

(indrā̭ya॒ - yaja̭māna-ssa॒pta ca̭) (a. 15)

anuvākaṃ 16 - pitṛyajñayājyānuvākyāḥ

u॒śanta̭stvā havāmaha u॒śanta॒-ssami̭dhīmahi | u॒śannṷśa॒ta ā va̭ha pi॒tṝn ha॒viṣe॒ atta̭ve ||, ā no̭ agne suke॒tunā᳚ | ra॒yiṃ-vi~॒śvāyṷpoṣasam | mā॒rḍī॒ka-ndhḙhi jī॒vase᳚ ||| tvagṃ so̭ma ma॒he bhaga᳚m | tvaṃ-yū~na̭ ṛtāya॒te | dakṣa̭-ndadhāsi jī॒vase᳚ ||,tvagṃ so̭ma॒ praci̭kito manī॒ṣā tvagṃ raji̭ṣṭha॒manṷ neṣi॒ panthā᳚m | tava॒ praṇī̭tī pi॒taro̭ na indo de॒veṣu॒ ratna̭ma bhajanta॒ dhīrāḥ᳚ ||| tvayā॒ hi naḥ̭ pi॒taraḥ̭ soma॒ pūrve॒ karmā̭ṇi ca॒kruḥ pa̭vamāna॒ dhīrāḥ᳚ | va॒nvannavā̭taḥ pari॒dhīgṃ rapo᳚rṇu vī॒rebhi॒raśvai᳚rma॒ghavā̭ bhavā naḥ ||, tvagṃ so̭ma pi॒tṛbhiḥ̭ saṃvi~dā॒no-'nu॒ dyāvā̭pṛthi॒vī ā ta̭tantha | tasmai̭ ta indo ha॒viṣā̭ vidhema va॒yagg syā̭ma॒ pata̭yo rayī॒ṇām || | barhi̭ṣadaḥ pitara ū॒tya̭rvāgi॒mā vo̭ ha॒vyā ca̭kṛmā ju॒ṣadhva᳚m | ta ā ga॒tā-'va̭sā॒ śa-nta̭me॒nāthā॒smabhya॒gṃ॒ śaṃ-yo~ra̭ra॒po da̭dhāta ||, ā-'ha-mpi॒tṝn-thsṷvi॒datrāgṃ̭ avithsi॒ napā̭ta-ñca vi॒krama̭ṇa-ñca॒ viṣṇoḥ᳚ | ba॒rhi॒ṣado॒ ye sva॒dhayā̭ su॒tasya॒ bhaja̭nta pi॒tvasta i॒hā-'' ga̭miṣṭhāḥ || | upa̭hūtāḥ pi॒taraḥ̭ so॒myāso̭ barhi॒ṣyḙṣu ni॒dhiṣṷ pri॒yeṣṷ | ta ā ga̭mantu॒ ta i॒ha śrṷva॒ntvadhi̭ bruvantu॒ te a̭vantva॒smān ||, agni̭ṣvāttāḥ pitara॒ eha ga̭cchata॒ sadaḥ̭ sada-ssadata supraṇītayaḥ | a॒ttā ha॒vīgṃṣi॒ praya̭tāni ba॒r॒hiṣyathā̭ ra॒yigṃ sarva̭vīra-ndadhātana || || a॒gni॒ṣvā॒ttānṛ̭tu॒mato̭ havāmahe | narā॒śagṃsḙ somapī॒thaṃ-ya~ ā॒śuḥ | te no॒ arva̭nta-ssu॒havā̭ bhavantu | śa-nno̭ bhavantu dvi॒pade॒ śa-ñcatṷṣpade || ye a̭gniṣvā॒ttā ye-'na̭gniṣvāttāḥ || 75 ||

a॒gṃ॒ho॒mucaḥ̭ pi॒taraḥ̭ so॒myāsaḥ̭ | pare-'va̭re॒-'mṛtā̭so॒ bhava̭ntaḥ | adhi̭bruvantu॒ te a̭vantva॒smān || vā॒nyā̭yai du॒gdhe ju॒ṣamā̭ṇāḥ kara॒mbham | u॒dīrā̭ṇā॒ ava̭re॒ parḙ ca | a॒gni॒ṣvā॒ttā ṛ॒tubhiḥ̭ saṃvi~dā॒nāḥ | indra̭vanto ha॒viri॒da-ñjṷṣantām || yada̭gne kavyavāhana pi॒tṝn yakṣyṛ̭tā॒vṛdhaḥ̭ | pra ca̭ ha॒vyāni̭ vakṣyasi de॒vebhya̭śca pi॒tṛbhya॒ ā ||, tvama̭gna īḍi॒to jā̭tave॒do-'vā᳚ḍḍha॒vyāni̭ sura॒bhīṇi̭ kṛ॒tvā | prādāḥ᳚ pi॒tṛbhyaḥ̭ sva॒dhayā॒ te a̭kṣanna॒ddhi tva-ndḙva॒ praya̭tā ha॒vīgṃṣi̭ | | māta̭lī ka॒vyairya॒mo aṅgi̭robhi॒ rbṛha॒spati॒r-ṛkva̭bhi rvāvṛdhā॒naḥ | yāgśca̭ de॒vā vā̭vṛ॒dhurye ca̭ de॒vān-thsvāhā॒-'nye sva॒dhayā॒-'nye ma̭danti || || ye tā̭tṛ॒purdḙva॒trā jeha̭mānāḥ | ho॒trā॒vṛdha॒-sstoma̭taṣṭāso a॒rkaiḥ | ā-'gnḙ yāhi suvi॒datrḙbhira॒rvām | sa॒tyaiḥ ka॒vyaiḥ pi॒tṛbhi̭-rgharma॒sadbhiḥ̭ || ha॒vya॒vāha̭ma॒jara̭-mpurupri॒yam | a॒gni-ṅghṛ॒tena̭ ha॒viṣā̭ sapa॒ryann | upā̭sada-ṅkavya॒vāha̭-mpitṛ॒ṇām | sa naḥ̭ pra॒jāṃ-vī~॒rava̭tī॒gṃ॒ samṛ̭ṇvatu || 76 ||

(ana̭gniṣvāttā॒ - jeha̭mānā-ssa॒pta ca̭) (a. 16)

anuvākaṃ 17 - aindro paśau ekādaśa prayājāḥ

hotā̭ yakṣadi॒ḍaspa॒de | sa॒mi॒dhā॒na-mma॒hadyaśaḥ̭ | suṣa̭middhaṃ॒-va~re᳚ṇyam | a॒gnimindraṃ̭-va~yo॒dhasa᳚m | gā॒ya॒trī-ñchanda̭ indri॒yam | tryavi॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣa॒cchuci̭vratam | tanū॒napā̭tamu॒dbhida᳚m | ya-ṅgarbha॒madi̭tirda॒dhe || 77 ||

śuci॒mindraṃ̭-va~yo॒dhasa᳚m | u॒ṣṇiha॒-ñchanda̭ indri॒yam | di॒tya॒vāha॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣadī॒ḍenya᳚m | ī॒ḍi॒taṃ-vṛ~̭tra॒hanta̭mam | iḍā̭bhi॒rīḍya॒gṃ॒ sahaḥ̭ | soma॒mindraṃ̭-va~yo॒dhasa᳚m | a॒nu॒ṣṭubha॒-ñchanda̭ indri॒yam | tri॒va॒thsa-ṅgāṃ-va~yo॒ dadha̭t || 78 ||

vetvājya̭sya॒ hota॒ryaja̭ || hotā̭ yakṣa-thsubarhi॒ṣada᳚m | pū॒ṣa॒ṇvanta॒-mama̭rtyam | sīda̭nta-mba॒r॒hiṣi̭ pri॒ye | a॒mṛtendraṃ̭-va~yo॒dhasa᳚m | bṛ॒ha॒tī-ñchanda̭ indri॒yam | pañcā̭vi॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣa॒-dvyaca̭svatīḥ | su॒prā॒ya॒ṇā ṛ̭tā॒vṛdhaḥ̭ || 79 ||

dvāro̭ de॒vīrhi̭ra॒ṇyayīḥ᳚ | bra॒hmāṇa॒ indraṃ̭-va~yo॒dhasa᳚m | pa॒ṅkti-ñchanda̭ i॒hendri॒yam | tu॒rya॒vāha॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣa-thsu॒peśa̭se | su॒śi॒lpe bṛ̭ha॒tī u॒bhe | nakto॒ṣāsā॒ na da̭rśa॒te | viśva॒mindraṃ̭-va~yo॒dhasa᳚m | tri॒ṣṭubha॒-ñchanda̭ indri॒yam || 80 ||

pa॒ṣṭha॒vāha॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣa॒-tpracḙtasā | de॒vānā̭mutta॒maṃ-ya~śaḥ̭ | hotā̭rā॒ daivyā̭ ka॒vī | sa॒yujendraṃ̭-va~yo॒dhasa᳚m | jaga̭tī॒-ñchanda̭ i॒hendri॒yam | a॒na॒ḍvāha॒-ṅgāṃ-va~yo॒ dadha̭t | vetvājya̭sya॒ hota॒ryaja̭ || hotā̭ yakṣa॒-tpeśa̭svatīḥ || 81 ||

ti॒sro de॒vīrhi̭ra॒ṇyayīḥ᳚ | bhāra̭tī-rbṛha॒tīrma॒hīḥ | pati॒mindraṃ̭-va~yo॒dhasa᳚m | vi॒rāja॒-ñchanda̭ i॒hendri॒yam | dhe॒nu-ṅgā-nna vayo॒ dadha̭t | vetvājya̭sya॒ hota॒ryaja̭ || hotā̭ yakṣa-thsu॒reta̭sam | tvaṣṭā̭ra-mpuṣṭi॒vardha̭nam | rū॒pāṇi॒ bibhra̭ta॒-mpṛtha̭k | puṣṭi॒mindraṃ̭-va~yo॒dhasa᳚m || 82 ||

dvi॒pada॒-ñchanda̭ i॒hendri॒yam | u॒kṣāṇa॒-ṅgā-nna vayo॒ dadha̭t | vetvājya̭sya॒ hota॒ryaja̭ || hotā̭ yakṣaccha॒takra̭tum | hira̭ṇyaparṇa-mu॒kthina᳚m | ra॒śa॒nā-mbibhra̭taṃ-va~॒śim | bhaga॒mindraṃ̭-va~yo॒dhasa᳚m | ka॒kubha॒-ñchanda̭ i॒hendri॒yam | va॒śāṃ-ve~॒hata॒-ṅgā-nna vayo॒ dadha̭t | vetvājya̭sya॒ hota॒ryaja̭ || hotā̭ yakṣa॒-thsvāhā̭kṛtīḥ | a॒gni-ṅgṛ॒hapa̭ti॒-mpṛtha̭k | varṷṇa-mbheṣa॒ja-ṅka॒vim | kṣa॒tramindraṃ̭-va~yo॒dhasa᳚m | ati̭cchandasa॒-ñchanda̭ indri॒yam | bṛ॒hadṛ̭ṣa॒bha-ṅgāṃ-va~yo॒ dadha̭t | vetvājya̭sya॒ hota॒ryaja̭ || 83 ||

(da॒dhe - dadha̭-d- ṛtā॒vṛdha̭ - indri॒yaṃ - peśa̭svatī--r vayo॒dhasaṃ॒ - ~vetvājya̭sya॒ hota॒ryaja̭ sa॒pta ca̭) (a. 17)

i॒ḍaspa॒de᳚-'gni-ṅgā̭ya॒trī-ntryavi᳚m | śuci̭vrata॒gṃ॒ śuci̭mu॒ṣṇiha̭-nditya॒vāha᳚m | ī॒ḍenya॒gṃ॒ soma̭-mana॒ṣṭubha̭-ntriva॒thsam | su॒ba॒ra॒ḥi॒ṣada̭ma॒mṛtendra̭-mbṛha॒tī-mpañcā̭vim | vyaca̭svatī-ssuprāya॒ṇā dvāro᳚ brā॒hmāṇaḥ̭ pā॒ṅktimi॒ha tṷrya॒vāha᳚m | su॒peśa̭se॒ viśva॒mindra̭-ntri॒ṣṭubha̭-mpaṣṭha॒vāha᳚m | pracḙtasā sa॒yujendra॒-ñjaga̭tīmi॒hāna॒ḍvāha᳚m | peśa̭svatīsti॒stro bhāra̭tīḥ॒ patiṃ̭-vi~॒rāja̭mi॒ha dhe॒nu-nna | su॒reta̭sa॒-ntvaṣṭā̭ra॒-mpuṣṭi̭-ndvi॒pada̭mi॒hokṣāṇa॒-nna | śa॒takra̭tu॒-mbhaga॒mindra̭-ṅka॒kubha̭mi॒ha va॒śāṃ-ve~॒hata॒-ṅgā-nna | svāhā̭kṛtīḥ, kṣa॒tramati̭cchandasa-mbṛ॒hadṛ̭ṣa॒bha-ṅgāṃ-va~yaḥ̭ | i॒ndri॒yamuṣi̭vasu॒nava̭da॒śehe᳚ndriya॒maṣṭa̭ nava daśa॒ gā-nna vayo॒ dadha॒-thsarva̭vetu |

anuvākaṃ 18 - aindro paśau prayājayājyāḥ

sami̭ddho a॒gni-ssa॒midhā᳚ | suṣa̭middho॒ vare᳚ṇyaḥ | gā॒ya॒trī chanda̭ indri॒yam | tryavi॒rgaurvayo̭ dadhuḥ || tanū॒napā॒-cchuci̭vrataḥ | ta॒nū॒napācca॒ (ta॒nū॒pācca) sara̭svatī | u॒ṣṇikchanda̭ indri॒yam | di॒tya॒vāḍgaurvayo̭ dadhuḥ || iḍā̭bhira॒gnirīḍyaḥ̭ | somo̭ de॒vo ama̭rtyaḥ || 84 ||

a॒nu॒ṣṭupchanda̭ indri॒yam | tri॒va॒thso gaurvayo̭ dadhuḥ || su॒ba॒r॒hira॒gniḥ pṷ̄ṣa॒ṇvān | stī॒rṇa-ba̭rhi॒rama̭rtyaḥ | bṛ॒ha॒tī chanda̭ indri॒yam | pañcā̭vi॒-rgaurvayo̭ dadhuḥ || duro̭ de॒vīrdiśo̭ ma॒hīḥ | bra॒hmā de॒vo bṛha॒spatiḥ̭ | pa॒ṅkti-śchanda̭ i॒hendri॒yam | tu॒rya॒vāḍ gaurvayo̭ dadhuḥ || 85 ||

u॒ṣe ya॒hvī su॒peśa̭sā | viśvḙ de॒vā ama̭rtyāḥ | tri॒ṣṭu-pchanda̭ indri॒yam | pa॒ṣṭha॒vādgaurvayo̭ dadhuḥ || daivyā̭ hotārā bhiṣajā | indrḙṇa sa॒yujā̭ yu॒jā | jaga̭tī॒ chanda̭ i॒hendri॒yam | a॒na॒ḍvān-gaurvayo̭ dadhuḥ || ti॒sra iḍā॒ sara̭svatī | bhāra̭tī ma॒ruto॒ viśaḥ̭ || 86 ||

vi॒rāṭchanda̭ i॒hendri॒yam | dhe॒nurgaurna vayo̭ dadhuḥ || tvaṣṭā̭ tu॒rīpo॒ adbhṷtaḥ | i॒ndrā॒gnī pṷṣṭi॒vardha̭nā | dvi॒pācchanda̭ i॒hendri॒yam | u॒kṣā gaurna vayo̭ dadhuḥ || śa॒mi॒tā no॒ vana॒spatiḥ̭ | sa॒vi॒tā pra̭su॒vanbhaga᳚m | ka॒kucchanda̭ i॒hendri॒yam | va॒śā ve॒hadgaurna vayo̭ dadhuḥ || svāhā̭ ya॒jñaṃ-va~rṷṇaḥ | su॒kṣa॒tro bhḙṣa॒ja-ṅka̭rat | atiḥ̭ chandā॒-śchanda̭ indri॒yam | bṛ॒hadṛ̭ṣa॒bho gaurvayo̭ dadhuḥ || 87 ||

(ama̭rtya - sturya॒vāḍgaurvayo̭ dadhu॒--r viśo̭ - va॒śā ve॒hadgaurna vayo̭ dadhuśca॒tvāri̭ ca) (a. 18)

anuvākaṃ 19 - aindro paśau vapādīnāṃ-ya~jyānuvākyāḥ

va॒sa॒ntena॒rtunā̭ de॒vāḥ | vasa̭vastri॒vṛtā᳚ stu॒tam | ra॒tha॒nta॒reṇa॒ teja̭sā | ha॒virindre॒ vayo̭ dadhuḥ || grī॒ṣmeṇa̭ de॒vā ṛ॒tunā᳚ | ru॒drāḥ pa̭ñcada॒śe stu॒tam | bṛ॒ha॒tā yaśa̭sā॒ bala᳚m | ha॒virindre॒ vayo̭ dadhuḥ || va॒ra॒.ṣābhi̭r-ṛ॒tunā̭-''di॒tyāḥ | stomḙ saptada॒śe stu॒tam || 88 ||

vai॒rū॒peṇa̭ vi॒śauja̭sā | ha॒virindre॒ vayo̭ dadhuḥ || śā॒ra॒dena॒rtunā̭ de॒vāḥ | e॒ka॒vi॒gṃ॒śa ṛ॒bhavaḥ̭ stu॒tam | vai॒rā॒jena̭ śri॒yā śriya᳚m | ha॒virindre॒ vayo̭ dadhuḥ || he॒ma॒ntena॒rtunā̭ de॒vāḥ | ma॒ruta̭striṇa॒ve stu॒tam | balḙna॒ śakva̭rī॒-ssahaḥ̭ | ha॒virindre॒ vayo̭ dadhuḥ || śai॒śi॒reṇa॒rtunā̭ de॒vāḥ | tra॒ya॒stri॒gṃ॒śḙ 'mṛtagg̭ stu॒tam | sa॒tyena̭ re॒vatīḥ᳚, kṣa॒tram | ha॒virindre॒ vayo̭ dadhuḥ || 89 ||

(stomḙ saptada॒śe stu॒tagṃ - saho̭ ha॒virindre॒ vayo̭ dadhuśca॒tvāri̭ ca) (a. 19)

(va॒sa॒ntena̭ grī॒ṣmeṇa̭ va॒r॒ṣābhiḥ̭ śāra॒dena̭ hema॒ntena̭ śaiśi॒reṇa॒ ṣaṭ )

anuvākaṃ 20 - aindro paśau anūyājānā-mmaitrāvariṇapraiṣāḥ

de॒va-mba॒r॒hirindraṃ̭-va~yo॒dhasa᳚m | de॒va-nde॒vama̭vardhayat | gā॒ya॒tri॒yā chanda̭sendri॒yam | teja॒ indre॒ vayo॒ dadha̭t | va॒su॒vanḙ vasu॒dheya̭sya vetu॒ yaja̭ || de॒vīrdvāro̭ de॒vamindraṃ̭-va~yo॒dhasa᳚m | de॒vīrde॒va-ma̭vardhayann | u॒ṣṇihā॒ chanda̭sendri॒yam | prā॒ṇamindre॒ vayo॒ dadha̭t | va॒su॒vanḙ vasu॒dheya̭sya viyantu॒ yaja̭ || 90 ||

de॒vī de॒vaṃ-va~̭yo॒dhasa᳚m | u॒ṣe indra̭mavardhatām | a॒nu॒ṣṭubhā॒ chanda̭sendri॒yam | vāca॒mindre॒ vayo॒ dadha̭t | va॒su॒vanḙ vasu॒dheya̭sya vītāṃ॒-ya~ja̭ || de॒vī joṣṭrī̭ de॒vamindraṃ̭-va~yo॒dhasa᳚m | de॒vī de॒vama̭vardhatām | bṛ॒ha॒tyā chanda̭sendri॒yam | śrotra॒mindre॒ vayo॒ dadha̭t | va॒su॒vanḙ vasu॒dheya̭sya vītāṃ॒-ya~ja̭ || 91 ||

de॒vī ū॒rjāhṷtī de॒vamindraṃ̭-va~yo॒dhasa᳚m | de॒vī de॒vama̭vardhatām | pa॒ṅktyā chanda̭sendri॒yam | śu॒kramindre॒ vayo॒ dadha̭t | va॒su॒vanḙ vasu॒dheya̭sya vītāṃ॒-ya~ja̭ || de॒vā daivyā॒ hotā̭rā de॒vamindraṃ̭-va~yo॒dhasa᳚m | de॒vā de॒vama̭vardhatām | tri॒ṣṭubhā॒ chanda̭sendri॒yam | tviṣi॒mindre॒ vayo॒ dadha̭t | va॒su॒vanḙ vasu॒dheya̭sya vītāṃ॒-ya~ja̭ || 92 ||

de॒vī-sti॒sra-sti॒sro de॒vīrva̭yo॒dhasa᳚m | pati॒mindra̭-mavardhayann | jaga̭tyā॒ chanda̭sendri॒yam | bala॒mindre॒ vayo॒ dadha̭t | va॒su॒vanḙ vasu॒dheya̭sya viyantu॒ yaja̭ || de॒vo narā॒śagṃso̭ de॒vamindraṃ̭-va~yo॒dhasa᳚m | de॒vo de॒vama̭vardhayat | vi॒rājā॒ chanda̭sendri॒yam | reta॒ indre॒ vayo॒ dadha̭t | va॒su॒vanḙ vasu॒dheya̭sya vetu॒ yaja̭ || 93 ||

de॒vo vana॒spati̭-rde॒vamindraṃ̭-va~yo॒dhasa᳚m | de॒vo de॒vama̭vardhayat | dvi॒padā॒ chanda̭sendri॒yam | bhaga॒mindre॒ vayo॒ dadha̭t | va॒su॒vanḙ vasu॒dheya̭sya vetu॒ yaja̭ || de॒va-mba॒r॒hirvāri̭tīnā-nde॒vamindraṃ̭-va~yo॒dhasa᳚m | de॒vo (de॒vaṃ) de॒vama̭vardhayat | ka॒kubhā॒ chanda̭sendri॒yam | yaśa॒ indre॒ vayo॒ dadha̭t | va॒su॒vanḙ vasu॒dheya̭sya vetu॒ yaja̭ || de॒vo a॒gni-ssvi̭ṣṭa॒kṛ-dde॒vamindraṃ̭-va~yo॒dhasa᳚m | de॒vo de॒vama̭vardhayat | ati̭cchandasā॒ chanda̭sendri॒yam | kṣa॒tramindre॒ vayo॒ dadha̭t | va॒su॒vanḙ vasu॒dheya̭sya vetu॒ yaja̭ || 94 ||

(vi॒ya॒ntu॒ yaja̭ - vītāṃ॒-ya~ja̭-vītāṃ॒-ya~ja̭-vetu॒ yaja̭-vetu॒ yaja॒ pañca̭ ca) (a. 20)

(svā॒dvī-ntvā॒ - somaḥ॒ - surā̭vanta॒gṃ॒ - sīsḙna - mi॒tro̭-'si॒ - ya-ddḙvā॒ - hotā̭ yakṣa-thsa॒midhendra॒gṃ॒ - sami̭ddha॒ indra॒ - āca̭rṣaṇi॒prā - de॒va-mba॒r॒hirindragṃ̭ sude॒vagṃ - hotā̭ yakṣa-thsa॒midhā॒-'gnigṃ - sami̭ddho a॒gnira̭śvinā॒ - 'śvinā̭ ha॒viri̭ndri॒yaṃ - de॒va-mba॒r॒hi-ssara̭sva - tyā॒gnima॒ - dyośanto॒ - hotā̭ yakṣadi॒ḍaspa॒de - sami̭ddho a॒gni-ssa॒midhā̭ - vasa॒ntena̭ - de॒va-mba॒r॒hirindraṃ̭-va~yo॒dhasaṃ̭-vi~gṃśa॒tiḥ)

(svā॒dvī-ntvā-' - mī̭ madanta pi॒taraḥ॒ - sāmrā᳚jyāya - pū॒ta-mpa॒vitrḙṇe॒ vājya̭ - mu॒ṣāsā॒naktā॒ - bada̭rai॒ - radhā̭tāma॒śvinā̭ - de॒va indro॒ vana॒spatiḥ̭ - paṣṭha॒vāha॒-ṅgāṃ - de॒vī de॒vaṃ-va~̭yo॒dhasa॒-ñcatṷrnavatiḥ )

(svā॒dvīntvā̭ - vetu॒ yaja̭)

|| hariḥ̭ om ||

|| kṛṣṇa yajurvedīya taittirīya brāhmaṇe dvitīyāṣṭake ṣaṣṭhaḥ prapāṭhaka-ssamāptaḥ ||