Kunti Stutih (bhagavata Purana)

ॐ

ಕುನ್ತೀ ಸ್ತುತಿಃ (ಭಾಗವತ ಪುರಾಣ)

Vyasa Kannada

(ಶ್ರೀಮದ್ಭಾಗವತ ಮಹಾಪುರಾಣೇ ಪ್ರಥಮಸ್ಕನ್ಧೇ ಅಷ್ಟಮಾಧ್ಯಾಯಃ)

ಕುನ್ತ್ಯುವಾಚ ।

ನಮಸ್ಯೇ ಪುರುಷಂ ತ್ವಾದ್ಯಮೀಶ್ವರಂ ಪ್ರಕೃತೇಃ ಪರಮ್ ।

ಅಲಕ್ಷ್ಯಂ ಸರ್ವಭೂತಾನಾಮನ್ತರ್ಬಹಿರವಸ್ಥಿತಮ್ ॥ 18 ॥

ಮಾಯಾಜವನಿಕಾಚ್ಛನ್ನಮಜ್ಞಾಧೋಕ್ಷಜಮವ್ಯಯಮ್ ।

ನ ಲಕ್ಷ್ಯಸೇ ಮೂಢದೃಶಾ ನಟೋ ನಾಟ್ಯಧರೋ ಯಥಾ ॥ 19 ॥

ತಥಾ ಪರಮಹಂಸಾನಾಂ ಮುನೀನಾಮಮಲಾತ್ಮನಾಮ್ ।

ಭಕ್ತಿಯೋಗವಿಧಾನಾರ್ಥಂ ಕಥಂ ಪಶ್ಯೇಮ ಹಿ ಸ್ತ್ರಿಯಃ ॥ 20 ॥

ಕೃಷ್ಣಾಯ ವಾಸುದೇವಾಯ ದೇವಕೀನನ್ದನಾಯ ಚ ।

ನನ್ದಗೋಪಕುಮಾರಾಯ ಗೋವಿನ್ದಾಯ ನಮೋ ನಮಃ ॥ 21 ॥

ನಮಃ ಪಙ್ಕಜನಾಭಾಯ ನಮಃ ಪಙ್ಕಜಮಾಲಿನೇ ।

ನಮಃ ಪಙ್ಕಜನೇತ್ರಾಯ ನಮಸ್ತೇ ಪಙ್ಕಜಾಙ್ಘ್ರಯೇ ॥ 22 ॥

ಯಥಾ ಹೃಷೀಕೇಶ ಖಲೇನ ದೇವಕೀ ಕಂಸೇನ ರುದ್ಧಾತಿಚಿರಂ ಶುಚಾರ್ಪಿತಾ ।

ವಿಮೋಚಿತಾಹಂ ಚ ಸಹಾತ್ಮಜಾ ವಿಭೋ ತ್ವಯೈವ ನಾಥೇನ ಮುಹುರ್ವಿಪದ್ಗಣಾತ್ ॥ 23 ॥

ವಿಷಾನ್ಮಹಾಗ್ನೇಃ ಪುರುಷಾದದರ್ಶನಾದಸತ್ಸಭಾಯಾ ವನವಾಸಕೃಚ್ಛ್ರತಃ ।

ಮೃಧೇ ಮೃಧೇಽನೇಕಮಹಾಱಥಾಸ್ತ್ರತೋ ದ್ರೌಣ್ಯಸ್ತ್ರತಶ್ಚಾಸ್ಮ ಹರೇಽಭಿರಕ್ಷಿತಾಃ ॥ 24 ॥

ವಿಪದಃ ಸನ್ತು ತಾಃ ಶಶ್ವತ್ತತ್ರ ತತ್ರ ಜಗದ್ಗುರೋ ।

ಭವತೋ ದರ್ಶನಂ ಯತ್ಸ್ಯಾದಪುನರ್ಭವದರ್ಶನಮ್ ॥ 25 ॥

ಜನ್ಮೈಶ್ವರ್ಯಶ್ರುತಶ್ರೀಭಿರೇಧಮಾನಮದಃ ಪುಮಾನ್ ।

ನೈವಾರ್ಹತ್ಯಭಿಧಾತುಂ ವೈ ತ್ವಾಮಕಿಞ್ಚನಗೋಚರಮ್ ॥ 26 ॥

ನಮೋಽಕಿಞ್ಚನವಿತ್ತಾಯ ನಿವೃತ್ತಗುಣವೃತ್ತಯೇ ।

ಆತ್ಮಾರಾಮಾಯ ಶಾನ್ತಾಯ ಕೈವಲ್ಯಪತಯೇ ನಮಃ ॥ 27 ॥

ಮನ್ಯೇ ತ್ವಾಂ ಕಾಲಮೀಶಾನಮನಾದಿನಿಧನಂ ವಿಭುಮ್ ।

ಸಮಂ ಚರನ್ತಂ ಸರ್ವತ್ರ ಭೂತಾನಾಂ ಯನ್ಮಿಥಃ ಕಲಿಃ ॥ 28 ॥

ನ ವೇದ ಕಶ್ಚಿದ್ಭಗವಂಶ್ಚಿಕೀರ್ಷಿತಂ ತವೇಹಮಾನಸ್ಯ ನೃಣಾಂ ವಿಡಮ್ಬನಮ್ ।

ನ ಯಸ್ಯ ಕಶ್ಚಿದ್ದಯಿತೋಽಸ್ತಿ ಕರ್ಹಿಚಿದ್ದ್ವೇಷ್ಯಶ್ಚ ಯಸ್ಮಿನ್ವಿಷಮಾ ಮತಿರ್ನೃಣಾಮ್ ॥ 29 ॥

ಜನ್ಮ ಕರ್ಮ ಚ ವಿಶ್ವಾತ್ಮನ್ನಜಸ್ಯಾಕರ್ತುರಾತ್ಮನಃ ।

ತಿರ್ಯನ್ನೃಷಿಷು ಯಾದಃಸು ತದತ್ಯನ್ತವಿಡಮ್ಬನಮ್ ॥ 30 ॥

ಗೋಪ್ಯಾದದೇ ತ್ವಯಿ ಕೃತಾಗಸಿ ದಾಮ ತಾವದ್ಯಾತೇ ದಶಾಶ್ರುಕಲಿಲಾಞ್ಜನಸಮ್ಭ್ರಮಾಕ್ಷಮ್ ।

ವಕ್ತ್ರಂ ನಿನೀಯ ಭಯಭಾವನಯಾ ಸ್ಥಿತಸ್ಯ ಸಾ ಮಾಂ ವಿಮೋಹಯತಿ ಭೀರಪಿ ಯದ್ಬಿಭೇತಿ ॥ 31 ॥

ಕೇಚಿದಾಹುರಜಂ ಜಾತಂ ಪುಣ್ಯಶ್ಲೋಕಸ್ಯ ಕೀರ್ತಯೇ ।

ಯದೋಃ ಪ್ರಿಯಸ್ಯಾನ್ವವಾಯೇ ಮಲಯಸ್ಯೇವ ಚನ್ದನಮ್ ॥ 32 ॥

ಅಪರೇ ವಸುದೇವಸ್ಯ ದೇವಕ್ಯಾಂ ಯಾಚಿತೋಽಭ್ಯಗಾತ್ ।

ಅಜಸ್ತ್ವಮಸ್ಯ ಕ್ಷೇಮಾಯ ವಧಾಯ ಚ ಸುರದ್ವಿಷಾಮ್ ॥ 33 ॥

ಭಾರಾವತಾರಣಾಯಾನ್ಯೇ ಭುವೋ ನಾವ ಇವೋದಧೌ ।

ಸೀದನ್ತ್ಯಾ ಭೂರಿಭಾರೇಣ ಜಾತೋ ಹ್ಯಾತ್ಮಭುವಾರ್ಥಿತಃ ॥ 34 ॥

ಭವೇಸ್ಮಿನ್ಕ್ಲಿಶ್ಯಮಾನಾನಾಮವಿದ್ಯಾಕಾಮಕರ್ಮಭಿಃ ।

ಶ್ರವಣಸ್ಮರಣಾರ್ಹಾಣಿ ಕರಿಷ್ಯನ್ನಿತಿ ಕೇಚನ ॥ 35 ॥

ಶೃಣ್ವನ್ತಿ ಗಾಯನ್ತಿ ಗೃಣನ್ತ್ಯಭೀಕ್ಷ್ಣಶಃ ಸ್ಮರನ್ತಿ ನನ್ದನ್ತಿ ತವೇಹಿತಂ ಜನಾಃ ।

ತ ಏವ ಪಶ್ಯನ್ತ್ಯಚಿರೇಣ ತಾವಕಂ ಭವಪ್ರವಾಹೋಪರಮಂ ಪದಾಮ್ಬುಜಮ್ ॥ 36 ॥

ಅಪ್ಯದ್ಯ ನಸ್ತ್ವಂ ಸ್ವಕೃತೇಹಿತ ಪ್ರಭೋ ಜಿಹಾಸಸಿ ಸ್ವಿತ್ಸುಹೃದೋಽನುಜೀವಿನಃ ।

ಯೇಷಾಂ ನ ಚಾನ್ಯದ್ಭವತಃ ಪದಾಮ್ಬುಜಾತ್ಪರಾಯಣಂ ರಾಜಸು ಯೋಜಿತಾಂಹಸಾಮ್ ॥ 37 ॥

ಕೇ ವಯಂ ನಾಮರೂಪಾಭ್ಯಾಂ ಯದುಭಿಃ ಸಹ ಪಾಣ್ಡವಾಃ ।

ಭವತೋಽದರ್ಶನಂ ಯರ್ಹಿ ಹೃಷೀಕಾಣಾಮಿವೇಶಿತುಃ ॥ 38 ॥

ನೇಯಂ ಶೋಭಿಷ್ಯತೇ ತತ್ರ ಯಥೇದಾನೀಂ ಗದಾಧರ ।

ತ್ವತ್ಪದೈರಙ್ಕಿತಾ ಭಾತಿ ಸ್ವಲಕ್ಷಣವಿಲಕ್ಷಿತೈಃ ॥ 39 ॥

ಇಮೇ ಜನಪದಾಃ ಸ್ವೃದ್ಧಾಃ ಸುಪಕ್ವೌಷಧಿವೀರುಧಃ ।

ವನಾದ್ರಿನದ್ಯುದನ್ವನ್ತೋ ಹ್ಯೇಧನ್ತೇ ತವ ವೀಕ್ಷಿತೈಃ ॥ 40 ॥

ಅಥ ವಿಶ್ವೇಶ ವಿಶ್ವಾತ್ಮನ್ವಿಶ್ವಮೂರ್ತೇ ಸ್ವಕೇಷು ಮೇ ।

ಸ್ನೇಹಪಾಶಮಿಮಂ ಛಿನ್ಧಿ ದೃಢಂ ಪಾಣ್ಡುಷು ವೃಷ್ಣಿಷು ॥ 41 ॥

ತ್ವಯಿ ಮೇಽನನ್ಯವಿಷಯಾ ಮತಿರ್ಮಧುಪತೇಽಸಕೃತ್ ।

ರತಿಮುದ್ವಹತಾದದ್ಧಾ ಗಙ್ಗೇವೌಘಮುದನ್ವತಿ ॥ 42 ॥

ಶ್ರೀಕೃಷ್ಣ ಕೃಷ್ಣಸಖ ವೃಷ್ಣ್ಯೃಷಭಾವನಿದ್ರುಗ್ರಾಜನ್ಯವಂಶದಹನಾನಪವರ್ಗವೀರ್ಯ ।

ಗೋವಿನ್ದ ಗೋದ್ವಿಜಸುರಾರ್ತಿಹರಾವತಾರ ಯೋಗೇಶ್ವರಾಖಿಲಗುರೋ ಭಗವನ್ನಮಸ್ತೇ ॥ 43 ॥

॥ ಇತಿ ಶ್ರೀಮದ್ಭಾಗವತೇ ಮಹಾಪುರಾಣೇ ಪಾರಮಹಂಸ್ಯಾಂ ಸಂಹಿತಾಯಾಂ ಪ್ರಥಮಸ್ಕನ್ಧೇ ಅಷ್ಟಮೇಽಧ್ಯಾಯೇ ಶ್ರೀಕುನ್ತೀಕೃತಕೃಷ್ಣಸ್ತುತಿಃ ಸಮ್ಪೂರ್ಣಾ ॥

Roman (IAST) Transliteration

(śrīmadbhāgavata mahāpurāṇe prathamaskandhe aṣṭamādhyāyaḥ)

kuntyuvāca |

namasye puruṣaṃ tvādyamīśvaraṃ prakṛteḥ param |

alakṣyaṃ sarvabhūtānāmantarbahiravasthitam || 18 ||

māyājavanikācchannamajñādhokṣajamavyayam |

na lakṣyase mūḍhadṛśā naṭo nāṭyadharo yathā || 19 ||

tathā paramahaṃsānāṃ munīnāmamalātmanām |

bhaktiyogavidhānārthaṃ kathaṃ paśyema hi striyaḥ || 20 ||

kṛṣṇāya vāsudevāya devakīnandanāya ca |

nandagopakumārāya govindāya namo namaḥ || 21 ||

namaḥ paṅkajanābhāya namaḥ paṅkajamāline |

namaḥ paṅkajanetrāya namaste paṅkajāṅghraye || 22 ||

yathā hṛṣīkeśa khalena devakī kaṃsena ruddhāticiraṃ śucārpitā |

vimocitāhaṃ ca sahātmajā vibho tvayaiva nāthena muhurvipadgaṇāt || 23 ||

viṣānmahāgneḥ puruṣādadarśanādasatsabhāyā vanavāsakṛcchrataḥ |

mṛdhe mṛdhe'nekamahāṟathāstrato drauṇyastrataścāsma hare'bhirakṣitāḥ || 24 ||

vipadaḥ santu tāḥ śaśvattatra tatra jagadguro |

bhavato darśanaṃ yatsyādapunarbhavadarśanam || 25 ||

janmaiśvaryaśrutaśrībhiredhamānamadaḥ pumān |

naivārhatyabhidhātuṃ vai tvāmakiñcanagocaram || 26 ||

namo'kiñcanavittāya nivṛttaguṇavṛttaye |

ātmārāmāya śāntāya kaivalyapataye namaḥ || 27 ||

manye tvāṃ kālamīśānamanādinidhanaṃ vibhum |

samaṃ carantaṃ sarvatra bhūtānāṃ yanmithaḥ kaliḥ || 28 ||

na veda kaścidbhagavaṃścikīrṣitaṃ tavehamānasya nṛṇāṃ viḍambanam |

na yasya kaściddayito'sti karhiciddveṣyaśca yasminviṣamā matirnṛṇām || 29 ||

janma karma ca viśvātmannajasyākarturātmanaḥ |

tiryannṛṣiṣu yādaḥsu tadatyantaviḍambanam || 30 ||

gopyādade tvayi kṛtāgasi dāma tāvadyāte daśāśrukalilāñjanasambhramākṣam |

vaktraṃ ninīya bhayabhāvanayā sthitasya sā māṃ vimohayati bhīrapi yadbibheti || 31 ||

kecidāhurajaṃ jātaṃ puṇyaślokasya kīrtaye |

yadoḥ priyasyānvavāye malayasyeva candanam || 32 ||

apare vasudevasya devakyāṃ yācito'bhyagāt |

ajastvamasya kṣemāya vadhāya ca suradviṣām || 33 ||

bhārāvatāraṇāyānye bhuvo nāva ivodadhau |

sīdantyā bhūribhāreṇa jāto hyātmabhuvārthitaḥ || 34 ||

bhavesminkliśyamānānāmavidyākāmakarmabhiḥ |

śravaṇasmaraṇārhāṇi kariṣyanniti kecana || 35 ||

śṛṇvanti gāyanti gṛṇantyabhīkṣṇaśaḥ smaranti nandanti tavehitaṃ janāḥ |

ta eva paśyantyacireṇa tāvakaṃ bhavapravāhoparamaṃ padāmbujam || 36 ||

apyadya nastvaṃ svakṛtehita prabho jihāsasi svitsuhṛdo'nujīvinaḥ |

yeṣāṃ na cānyadbhavataḥ padāmbujātparāyaṇaṃ rājasu yojitāṃhasām || 37 ||

ke vayaṃ nāmarūpābhyāṃ yadubhiḥ saha pāṇḍavāḥ |

bhavato'darśanaṃ yarhi hṛṣīkāṇāmiveśituḥ || 38 ||

neyaṃ śobhiṣyate tatra yathedānīṃ gadādhara |

tvatpadairaṅkitā bhāti svalakṣaṇavilakṣitaiḥ || 39 ||

ime janapadāḥ svṛddhāḥ supakvauṣadhivīrudhaḥ |

vanādrinadyudanvanto hyedhante tava vīkṣitaiḥ || 40 ||

atha viśveśa viśvātmanviśvamūrte svakeṣu me |

snehapāśamimaṃ chindhi dṛḍhaṃ pāṇḍuṣu vṛṣṇiṣu || 41 ||

tvayi me'nanyaviṣayā matirmadhupate'sakṛt |

ratimudvahatādaddhā gaṅgevaughamudanvati || 42 ||

śrīkṛṣṇa kṛṣṇasakha vṛṣṇyṛṣabhāvanidrugrājanyavaṃśadahanānapavargavīrya |

govinda godvijasurārtiharāvatāra yogeśvarākhilaguro bhagavannamaste || 43 ||

|| iti śrīmadbhāgavate mahāpurāṇe pāramahaṃsyāṃ saṃhitāyāṃ prathamaskandhe aṣṭame'dhyāye śrīkuntīkṛtakṛṣṇastutiḥ sampūrṇā ||