Gopika Gita (bhagavata Purana)

ॐ

ಗೋಪಿಕಾ ಗೀತಾ (ಭಾಗವತ ಪುರಾಣ)

Gita Vyasa Kannada

ಗೋಪ್ಯ ಊಚುಃ ।

ಜಯತಿ ತೇಽಧಿಕಂ ಜನ್ಮನಾ ವ್ರಜಃ

ಶ್ರಯತ ಇನ್ದಿರಾ ಶಶ್ವದತ್ರ ಹಿ ।

ದಯಿತ ದೃಶ್ಯತಾಂ ದಿಕ್ಷು ತಾವಕಾ-

ಸ್ತ್ವಯಿ ಧೃತಾಸವಸ್ತ್ವಾಂ ವಿಚಿನ್ವತೇ ॥ 1॥

ಶರದುದಾಶಯೇ ಸಾಧುಜಾತಸ-

ತ್ಸರಸಿಜೋದರಶ್ರೀಮುಷಾ ದೃಶಾ ।

ಸುರತನಾಥ ತೇಽಶುಲ್ಕದಾಸಿಕಾ

ವರದ ನಿಘ್ನತೋ ನೇಹ ಕಿಂ ವಧಃ ॥ 2॥

ವಿಷಜಲಾಪ್ಯಯಾದ್ವ್ಯಾಲರಾಕ್ಷಸಾ-

ದ್ವರ್ಷಮಾರುತಾದ್ವೈದ್ಯುತಾನಲಾತ್ ।

ವೃಷಮಯಾತ್ಮಜಾದ್ವಿಶ್ವತೋಭಯಾ-

ದೃಷಭ ತೇ ವಯಂ ರಕ್ಷಿತಾ ಮುಹುಃ ॥ 3॥

ನ ಖಲು ಗೋಪಿಕಾನನ್ದನೋ ಭವಾ-

ನಖಿಲದೇಹಿನಾಮನ್ತರಾತ್ಮದೃಕ್ ।

ವಿಖನಸಾರ್ಥಿತೋ ವಿಶ್ವಗುಪ್ತಯೇ

ಸಖ ಉದೇಯಿವಾನ್ಸಾತ್ವತಾಂ ಕುಲೇ ॥ 4॥

ವಿರಚಿತಾಭಯಂ ವೃಷ್ಣಿಧುರ್ಯ ತೇ

ಚರಣಮೀಯುಷಾಂ ಸಂಸೃತೇರ್ಭಯಾತ್ ।

ಕರಸರೋರುಹಂ ಕಾನ್ತ ಕಾಮದಂ

ಶಿರಸಿ ಧೇಹಿ ನಃ ಶ್ರೀಕರಗ್ರಹಮ್ ॥ 5॥

ವ್ರಜಜನಾರ್ತಿಹನ್ವೀರ ಯೋಷಿತಾಂ

ನಿಜಜನಸ್ಮಯಧ್ವಂಸನಸ್ಮಿತ ।

ಭಜ ಸಖೇ ಭವತ್ಕಿಙ್ಕರೀಃ ಸ್ಮ ನೋ

ಜಲರುಹಾನನಂ ಚಾರು ದರ್ಶಯ ॥ 6॥

ಪ್ರಣತದೇಹಿನಾಂ ಪಾಪಕರ್ಶನಂ

ತೃಣಚರಾನುಗಂ ಶ್ರೀನಿಕೇತನಮ್ ।

ಫಣಿಫಣಾರ್ಪಿತಂ ತೇ ಪದಾಮ್ಬುಜಂ

ಕೃಣು ಕುಚೇಷು ನಃ ಕೃನ್ಧಿ ಹೃಚ್ಛಯಮ್ ॥ 7॥

ಮಧುರಯಾ ಗಿರಾ ವಲ್ಗುವಾಕ್ಯಯಾ

ಬುಧಮನೋಜ್ಞಯಾ ಪುಷ್ಕರೇಕ್ಷಣ ।

ವಿಧಿಕರೀರಿಮಾ ವೀರ ಮುಹ್ಯತೀ-

ರಧರಸೀಧುನಾಽಽಪ್ಯಾಯಯಸ್ವ ನಃ ॥ 8॥

ತವ ಕಥಾಮೃತಂ ತಪ್ತಜೀವನಂ

ಕವಿಭಿರೀಡಿತಂ ಕಲ್ಮಷಾಪಹಮ್ ।

ಶ್ರವಣಮಙ್ಗಲಂ ಶ್ರೀಮದಾತತಂ

ಭುವಿ ಗೃಣನ್ತಿ ತೇ ಭೂರಿದಾ ಜನಾಃ ॥ 9॥

ಪ್ರಹಸಿತಂ ಪ್ರಿಯ ಪ್ರೇಮವೀಕ್ಷಣಂ

ವಿಹರಣಂ ಚ ತೇ ಧ್ಯಾನಮಙ್ಗಲಮ್ ।

ರಹಸಿ ಸಂವಿದೋ ಯಾ ಹೃದಿಸ್ಪೃಶಃ

ಕುಹಕ ನೋ ಮನಃ ಕ್ಷೋಭಯನ್ತಿ ಹಿ ॥ 10॥

ಚಲಸಿ ಯದ್ವ್ರಜಾಚ್ಚಾರಯನ್ಪಶೂನ್

ನಲಿನಸುನ್ದರಂ ನಾಥ ತೇ ಪದಮ್ ।

ಶಿಲತೃಣಾಙ್ಕುರೈಃ ಸೀದತೀತಿ ನಃ

ಕಲಿಲತಾಂ ಮನಃ ಕಾನ್ತ ಗಚ್ಛತಿ ॥ 11॥

ದಿನಪರಿಕ್ಷಯೇ ನೀಲಕುನ್ತಲೈ-

ರ್ವನರುಹಾನನಂ ಬಿಭ್ರದಾವೃತಮ್ ।

ಘನರಜಸ್ವಲಂ ದರ್ಶಯನ್ಮುಹು-

ರ್ಮನಸಿ ನಃ ಸ್ಮರಂ ವೀರ ಯಚ್ಛಸಿ ॥ 12॥

ಪ್ರಣತಕಾಮದಂ ಪದ್ಮಜಾರ್ಚಿತಂ

ಧರಣಿಮಣ್ಡನಂ ಧ್ಯೇಯಮಾಪದಿ ।

ಚರಣಪಙ್ಕಜಂ ಶನ್ತಮಂ ಚ ತೇ

ರಮಣ ನಃ ಸ್ತನೇಷ್ವರ್ಪಯಾಧಿಹನ್ ॥ 13॥

ಸುರತವರ್ಧನಂ ಶೋಕನಾಶನಂ

ಸ್ವರಿತವೇಣುನಾ ಸುಷ್ಠು ಚುಮ್ಬಿತಮ್ ।

ಇತರರಾಗವಿಸ್ಮಾರಣಂ ನೃಣಾಂ

ವಿತರ ವೀರ ನಸ್ತೇಽಧರಾಮೃತಮ್ ॥ 14॥

ಅಟತಿ ಯದ್ಭವಾನಹ್ನಿ ಕಾನನಂ

ತ್ರುಟಿರ್ಯುಗಾಯತೇ ತ್ವಾಮಪಶ್ಯತಾಮ್ ।

ಕುಟಿಲಕುನ್ತಲಂ ಶ್ರೀಮುಖಂ ಚ ತೇ

ಜಡ ಉದೀಕ್ಷತಾಂ ಪಕ್ಷ್ಮಕೃದ್ದೃಶಾಮ್ ॥ 15॥

ಪತಿಸುತಾನ್ವಯಭ್ರಾತೃಬಾನ್ಧವಾ-

ನತಿವಿಲಙ್ಘ್ಯ ತೇಽನ್ತ್ಯಚ್ಯುತಾಗತಾಃ ।

ಗತಿವಿದಸ್ತವೋದ್ಗೀತಮೋಹಿತಾಃ

ಕಿತವ ಯೋಷಿತಃ ಕಸ್ತ್ಯಜೇನ್ನಿಶಿ ॥ 16॥

ರಹಸಿ ಸಂವಿದಂ ಹೃಚ್ಛಯೋದಯಂ

ಪ್ರಹಸಿತಾನನಂ ಪ್ರೇಮವೀಕ್ಷಣಮ್ ।

ಬೃಹದುರಃ ಶ್ರಿಯೋ ವೀಕ್ಷ್ಯ ಧಾಮ ತೇ

ಮುಹುರತಿಸ್ಪೃಹಾ ಮುಹ್ಯತೇ ಮನಃ ॥ 17॥

ವ್ರಜವನೌಕಸಾಂ ವ್ಯಕ್ತಿರಙ್ಗ ತೇ

ವೃಜಿನಹನ್ತ್ರ್ಯಲಂ ವಿಶ್ವಮಙ್ಗಲಮ್ ।

ತ್ಯಜ ಮನಾಕ್ ಚ ನಸ್ತ್ವತ್ಸ್ಪೃಹಾತ್ಮನಾಂ

ಸ್ವಜನಹೃದ್ರುಜಾಂ ಯನ್ನಿಷೂದನಮ್ ॥ 18॥

ಯತ್ತೇ ಸುಜಾತಚರಣಾಮ್ಬುರುಹಂ ಸ್ತನೇಷ

ಭೀತಾಃ ಶನೈಃ ಪ್ರಿಯ ದಧೀಮಹಿ ಕರ್ಕಶೇಷು ।

ತೇನಾಟವೀಮಟಸಿ ತದ್ವ್ಯಥತೇ ನ ಕಿಂಸ್ವಿತ್

ಕೂರ್ಪಾದಿಭಿರ್ಭ್ರಮತಿ ಧೀರ್ಭವದಾಯುಷಾಂ ನಃ ॥ 19॥

ಇತಿ ಶ್ರೀಮದ್ಭಾಗವತ ಮಹಾಪುರಾಣೇ ಪಾರಮಹಂಸ್ಯಾಂ ಸಂಹಿತಾಯಾಂ

ದಶಮಸ್ಕನ್ಧೇ ಪೂರ್ವಾರ್ಧೇ ರಾಸಕ್ರೀಡಾಯಾಂ ಗೋಪೀಗೀತಂ ನಾಮೈಕತ್ರಿಂಶೋಽಧ್ಯಾಯಃ ॥

Roman (IAST) Transliteration

gopya ūcuḥ |

jayati te'dhikaṃ janmanā vrajaḥ

śrayata indirā śaśvadatra hi |

dayita dṛśyatāṃ dikṣu tāvakā-

stvayi dhṛtāsavastvāṃ vicinvate || 1||

śaradudāśaye sādhujātasa-

tsarasijodaraśrīmuṣā dṛśā |

suratanātha te'śulkadāsikā

varada nighnato neha kiṃ vadhaḥ || 2||

viṣajalāpyayādvyālarākṣasā-

dvarṣamārutādvaidyutānalāt |

vṛṣamayātmajādviśvatobhayā-

dṛṣabha te vayaṃ rakṣitā muhuḥ || 3||

na khalu gopikānandano bhavā-

nakhiladehināmantarātmadṛk |

vikhanasārthito viśvaguptaye

sakha udeyivānsātvatāṃ kule || 4||

viracitābhayaṃ vṛṣṇidhurya te

caraṇamīyuṣāṃ saṃsṛterbhayāt |

karasaroruhaṃ kānta kāmadaṃ

śirasi dhehi naḥ śrīkaragraham || 5||

vrajajanārtihanvīra yoṣitāṃ

nijajanasmayadhvaṃsanasmita |

bhaja sakhe bhavatkiṅkarīḥ sma no

jalaruhānanaṃ cāru darśaya || 6||

praṇatadehināṃ pāpakarśanaṃ

tṛṇacarānugaṃ śrīniketanam |

phaṇiphaṇārpitaṃ te padāmbujaṃ

kṛṇu kuceṣu naḥ kṛndhi hṛcchayam || 7||

madhurayā girā valguvākyayā

budhamanojñayā puṣkarekṣaṇa |

vidhikarīrimā vīra muhyatī-

radharasīdhunā''pyāyayasva naḥ || 8||

tava kathāmṛtaṃ taptajīvanaṃ

kavibhirīḍitaṃ kalmaṣāpaham |

śravaṇamaṅgalaṃ śrīmadātataṃ

bhuvi gṛṇanti te bhūridā janāḥ || 9||

prahasitaṃ priya premavīkṣaṇaṃ

viharaṇaṃ ca te dhyānamaṅgalam |

rahasi saṃvido yā hṛdispṛśaḥ

kuhaka no manaḥ kṣobhayanti hi || 10||

calasi yadvrajāccārayanpaśūn

nalinasundaraṃ nātha te padam |

śilatṛṇāṅkuraiḥ sīdatīti naḥ

kalilatāṃ manaḥ kānta gacchati || 11||

dinaparikṣaye nīlakuntalai-

rvanaruhānanaṃ bibhradāvṛtam |

ghanarajasvalaṃ darśayanmuhu-

rmanasi naḥ smaraṃ vīra yacchasi || 12||

praṇatakāmadaṃ padmajārcitaṃ

dharaṇimaṇḍanaṃ dhyeyamāpadi |

caraṇapaṅkajaṃ śantamaṃ ca te

ramaṇa naḥ staneṣvarpayādhihan || 13||

suratavardhanaṃ śokanāśanaṃ

svaritaveṇunā suṣṭhu cumbitam |

itararāgavismāraṇaṃ nṛṇāṃ

vitara vīra naste'dharāmṛtam || 14||

aṭati yadbhavānahni kānanaṃ

truṭiryugāyate tvāmapaśyatām |

kuṭilakuntalaṃ śrīmukhaṃ ca te

jaḍa udīkṣatāṃ pakṣmakṛddṛśām || 15||

patisutānvayabhrātṛbāndhavā-

nativilaṅghya te'ntyacyutāgatāḥ |

gatividastavodgītamohitāḥ

kitava yoṣitaḥ kastyajenniśi || 16||

rahasi saṃvidaṃ hṛcchayodayaṃ

prahasitānanaṃ premavīkṣaṇam |

bṛhaduraḥ śriyo vīkṣya dhāma te

muhuratispṛhā muhyate manaḥ || 17||

vrajavanaukasāṃ vyaktiraṅga te

vṛjinahantryalaṃ viśvamaṅgalam |

tyaja manāk ca nastvatspṛhātmanāṃ

svajanahṛdrujāṃ yanniṣūdanam || 18||

yatte sujātacaraṇāmburuhaṃ staneṣa

bhītāḥ śanaiḥ priya dadhīmahi karkaśeṣu |

tenāṭavīmaṭasi tadvyathate na kiṃsvit

kūrpādibhirbhramati dhīrbhavadāyuṣāṃ naḥ || 19||

iti śrīmadbhāgavata mahāpurāṇe pāramahaṃsyāṃ saṃhitāyāṃ

daśamaskandhe pūrvārdhe rāsakrīḍāyāṃ gopīgītaṃ nāmaikatriṃśo'dhyāyaḥ ||