Gitagovindam Tritiyah Sargah - Mugdha Madhusudanah

ॐ

ಗೀತಗೋವಿನ್ದಂ ತೃತೀಯಃ ಸರ್ಗಃ - ಮುಗ್ಧ ಮಧುಸೂದನಃ

Vishnu Gita Jayadeva Kannada

॥ ತೃತೀಯಃ ಸರ್ಗಃ ॥

॥ ಮುಗ್ಧಮಧುಸೂದನಃ ॥

ಕಂಸಾರಿರಪಿ ಸಂಸಾರವಾಸನಾಬನ್ಧಶೃಙ್ಖಲಾಮ್ ।

ರಾಧಾಮಾಧಾಯ ಹೃದಯೇ ತತ್ಯಾಜ ವ್ರಜಸುನ್ದರೀಃ ॥ 18 ॥

ಇತಸ್ತತಸ್ತಾಮನುಸೃತ್ಯ ರಾಧಿಕಾ-ಮನಙ್ಗಬಾಣವ್ರಣಖಿನ್ನಮಾನಸಃ ।

ಕೃತಾನುತಾಪಃ ಸ ಕಲಿನ್ದನನ್ದಿನೀ-ತಟಾನ್ತಕುಞ್ಜೇ ವಿಷಸಾದ ಮಾಧವಃ ॥ 19 ॥

॥ ಗೀತಂ 7 ॥

ಮಾಮಿಯಂ ಚಲಿತಾ ವಿಲೋಕ್ಯ ವೃತಂ ವಧೂನಿಚಯೇನ ।

ಸಾಪರಾಧತಯಾ ಮಯಾಪಿ ನ ವಾರಿತಾತಿಭಯೇನ ॥

ಹರಿ ಹರಿ ಹತಾದರತಯಾ ಗತಾ ಸಾ ಕುಪಿತೇವ ॥ 1 ॥

ಕಿಂ ಕರಿಷ್ಯತಿ ಕಿಂ ವದಿಷ್ಯತಿ ಸಾ ಚಿರಂ ವಿರಹೇಣ ।

ಕಿಂ ಧನೇನ ಜನೇನ ಕಿಂ ಮಮ ಜೀವನೇನ ಗೃಹೇಣ ॥ 2 ॥

ಚಿನ್ತಯಾಮಿ ತದಾನನಂ ಕುಟಿಲಭ್ರು ಕೋಪಭರೇಣ ।

ಶೋಣಪದ್ಮಮಿವೋಪರಿ ಭ್ರಮತಾಕುಲಂ ಭ್ರಮರೇಣ ॥ 3 ॥

ತಾಮಹಂ ಹೃದಿ ಸಙ್ಗತಾಮನಿಶಂ ಭೃಶಂ ರಮಯಾಮಿ ।

ಕಿಂ ವನೇಽನುಸರಾಮಿ ತಾಮಿಹ ಕಿಂ ವೃಥಾ ವಿಲಪಾಮಿ ॥ 4 ॥

ತನ್ವಿ ಖಿನ್ನಮಸೂಯಯಾ ಹೃದಯಂ ತವಾಕಲಯಾಮಿ ।

ತನ್ನ ವೇದ್ಮಿ ಕುತೋ ಗತಾಸಿ ನ ತೇನ ತೇಽನುನಯಾಮಿ ॥ 5 ॥

ದೃಶ್ಯತೇ ಪುರತೋ ಗತಾಗತಮೇವ ಮೇ ವಿದಧಾಸಿ ।

ಕಿಂ ಪುರೇವ ಸಸಮ್ಭ್ರಮಂ ಪರಿರಮ್ಭಣಂ ನ ದದಾಸಿ ॥ 6 ॥

ಕ್ಷಮ್ಯತಾಮಪರಂ ಕದಾಪಿ ತವೇದೃಶಂ ನ ಕರೋಮಿ ।

ದೇಹಿ ಸುನ್ದರಿ ದರ್ಶನಂ ಮಮ ಮನ್ಮಥೇನ ದುನೋಮಿ ॥ 7 ॥

ವರ್ಣಿತಂ ಜಯದೇವಕೇನ ಹರೇರಿದಂ ಪ್ರವಣೇನ ।

ಕಿನ್ದುಬಿಲ್ವಸಮುದ್ರಸಮ್ಭವರೋಹಿಣೀರಮಣೇನ ॥ 8 ॥

ಹೃದಿ ಬಿಸಲತಾಹಾರೋ ನಾಯಂ ಭುಜಙ್ಗಮನಾಯಕಃ ಕುವಲಯದಲಶ್ರೇಣೀ ಕಣ್ಠೇ ನ ಸಾ ಗರಲದ್ಯುತಿಃ ।

ಮಲಯಜರಜೋ ನೇದಂ ಭಸ್ಮ ಪ್ರಿಯಾರಹಿತೇ ಮಯಿ ಪ್ರಹರ ನ ಹರಭ್ರಾನ್ತ್ಯಾನಙ್ಗ ಕ್ರುಧಾ ಕಿಮು ಧಾವಸಿ ॥ 20 ॥

ಪಾಣೌ ಮಾ ಕುರು ಚೂತಸಾಯಕಮಮುಂ ಮಾ ಚಾಪಮಾರೋಪಯ ಕ್ರೀಡಾನಿರ್ಜಿತವಿಶ್ವ ಮೂರ್ಛಿತಜನಾಘಾತೇನ ಕಿಂ ಪೌರುಷಮ್ ।

ತಸ್ಯಾ ಏವ ಮೃಗೀದೃಶೋ ಮನಸಿಜಪ್ರೇಙ್ಖತ್ಕಟಾಕ್ಷಾಶುಗ-ಶ್ರೇಣೀಜರ್ಜರಿತಂ ಮನಾಗಪಿ ಮನೋ ನಾದ್ಯಾಪಿ ಸನ್ಧುಕ್ಷತೇ ॥ 21 ॥

ಭ್ರೂಚಾಪೇ ನಿಹಿತಃ ಕಟಾಕ್ಷವಿಶಿಖೋ ನಿರ್ಮಾತು ಮರ್ಮವ್ಯಥಾಂ ಶ್ಯಾಮಾತ್ಮಾ ಕುಟಿಲಃ ಕರೋತು ಕಬರೀಭಾರೋಽಪಿ ಮಾರೋದ್ಯಮಮ್ ।

ಮೋಹಂ ತಾವದಯಂ ಚ ತನ್ವಿ ತನುತಾಂ ಬಿಮ್ಬಾದರೋ ರಾಗವಾನ್ ಸದ್ವೃತ್ತಸ್ತನಮಣ್ದಲಸ್ತವ ಕಥಂ ಪ್ರಾಣೈರ್ಮಮ ಕ್ರೀಡತಿ ॥ 22 ॥

ತಾನಿ ಸ್ಪರ್ಶಸುಖಾನಿ ತೇ ಚ ತರಲಾಃ ಸ್ನಿಗ್ಧಾ ದೃಶೋರ್ವಿಭ್ರಮಾ-ಸ್ತದ್ವಕ್ತ್ರಾಮ್ಬುಜಸೌರಭಂ ಸ ಚ ಸುಧಾಸ್ಯನ್ದೀ ಗಿರಾಂ ವಕ್ರಿಮಾ ।

ಸಾ ಬಿಮ್ಬಾಧರಮಾಧುರೀತಿ ವಿಷಯಾಸಙ್ಗೇಽಪಿ ಚೇನ್ಮಾನಸಂ ತಸ್ಯಾಂ ಲಗ್ನಸಮಾಧಿ ಹನ್ತ ವಿರಹವ್ಯಾಧಿಃ ಕಥಂ ವರ್ಧತೇ ॥ 23 ॥

ಭ್ರೂಪಲ್ಲವಂ ಧನುರಪಾಙ್ಗತರಙ್ಗಿತಾನಿ ಬಾಣಾಃ ಗುಣಃ ಶ್ರವಣಪಾಲಿರಿತಿ ಸ್ಮರೇಣ ।

ತಸ್ಯಾಮನಙ್ಗಜಯಜಙ್ಗಮದೇವತಾಯಾಂ ಅಸ್ತ್ರಾಣಿ ನಿರ್ಜಿತಜಗನ್ತಿ ಕಿಮರ್ಪಿತಾನಿ ॥ 24 ॥

[ಏಷಃ ಶ್ಲೋಕಃ ಕೇಷುಚನ ಸಂಸ್ಕರಣೇಷು ವಿದ್ಯತೇ]

ತಿರ್ಯಕ್ಕಣ್ಠ ವಿಲೋಲ ಮೌಲಿ ತರಲೋತ್ತಂ ಸಸ್ಯ ವಂಶೋಚ್ಚರದ್-

ದೀಪ್ತಿಸ್ಥಾನ ಕೃತಾವಧಾನ ಲಲನಾ ಲಕ್ಷೈರ್ನ ಸಂಲಕ್ಷಿತಾಃ ।

ಸಮ್ಮುಗ್ಧೇ ಮಧುಸೂದನಸ್ಯ ಮಧುರೇ ರಾಧಾಮುಖೇನ್ದೌ ಸುಧಾ-

ಸಾರೇ ಕನ್ದಲಿತಾಶ್ಚಿರಂ ದಧತು ವಃ ಕ್ಷೇಮಂ ಕಟಾಕ್ಷೋರ್ಮ್ಮಯ ॥ (25) ॥

॥ ಇತಿ ಶ್ರೀಗೀತಗೋವಿನ್ದೇ ಮುಗ್ಧಮಧುಸೂದನೋ ನಾಮ ತೃತೀಯಃ ಸರ್ಗಃ ॥

Roman (IAST) Transliteration

|| tṛtīyaḥ sargaḥ ||

|| mugdhamadhusūdanaḥ ||

kaṃsārirapi saṃsāravāsanābandhaśṛṅkhalām |

rādhāmādhāya hṛdaye tatyāja vrajasundarīḥ || 18 ||

itastatastāmanusṛtya rādhikā-manaṅgabāṇavraṇakhinnamānasaḥ |

kṛtānutāpaḥ sa kalindanandinī-taṭāntakuñje viṣasāda mādhavaḥ || 19 ||

|| gītaṃ 7 ||

māmiyaṃ calitā vilokya vṛtaṃ vadhūnicayena |

sāparādhatayā mayāpi na vāritātibhayena ||

hari hari hatādaratayā gatā sā kupiteva || 1 ||

kiṃ kariṣyati kiṃ vadiṣyati sā ciraṃ viraheṇa |

kiṃ dhanena janena kiṃ mama jīvanena gṛheṇa || 2 ||

cintayāmi tadānanaṃ kuṭilabhru kopabhareṇa |

śoṇapadmamivopari bhramatākulaṃ bhramareṇa || 3 ||

tāmahaṃ hṛdi saṅgatāmaniśaṃ bhṛśaṃ ramayāmi |

kiṃ vane'nusarāmi tāmiha kiṃ vṛthā vilapāmi || 4 ||

tanvi khinnamasūyayā hṛdayaṃ tavākalayāmi |

tanna vedmi kuto gatāsi na tena te'nunayāmi || 5 ||

dṛśyate purato gatāgatameva me vidadhāsi |

kiṃ pureva sasambhramaṃ parirambhaṇaṃ na dadāsi || 6 ||

kṣamyatāmaparaṃ kadāpi tavedṛśaṃ na karomi |

dehi sundari darśanaṃ mama manmathena dunomi || 7 ||

varṇitaṃ jayadevakena hareridaṃ pravaṇena |

kindubilvasamudrasambhavarohiṇīramaṇena || 8 ||

hṛdi bisalatāhāro nāyaṃ bhujaṅgamanāyakaḥ kuvalayadalaśreṇī kaṇṭhe na sā garaladyutiḥ |

malayajarajo nedaṃ bhasma priyārahite mayi prahara na harabhrāntyānaṅga krudhā kimu dhāvasi || 20 ||

pāṇau mā kuru cūtasāyakamamuṃ mā cāpamāropaya krīḍānirjitaviśva mūrchitajanāghātena kiṃ pauruṣam |

tasyā eva mṛgīdṛśo manasijapreṅkhatkaṭākṣāśuga-śreṇījarjaritaṃ manāgapi mano nādyāpi sandhukṣate || 21 ||

bhrūcāpe nihitaḥ kaṭākṣaviśikho nirmātu marmavyathāṃ śyāmātmā kuṭilaḥ karotu kabarībhāro'pi mārodyamam |

mohaṃ tāvadayaṃ ca tanvi tanutāṃ bimbādaro rāgavān sadvṛttastanamaṇdalastava kathaṃ prāṇairmama krīḍati || 22 ||

tāni sparśasukhāni te ca taralāḥ snigdhā dṛśorvibhramā-stadvaktrāmbujasaurabhaṃ sa ca sudhāsyandī girāṃ vakrimā |

sā bimbādharamādhurīti viṣayāsaṅge'pi cenmānasaṃ tasyāṃ lagnasamādhi hanta virahavyādhiḥ kathaṃ vardhate || 23 ||

bhrūpallavaṃ dhanurapāṅgataraṅgitāni bāṇāḥ guṇaḥ śravaṇapāliriti smareṇa |

tasyāmanaṅgajayajaṅgamadevatāyāṃ astrāṇi nirjitajaganti kimarpitāni || 24 ||

[eṣaḥ ślokaḥ keṣucana saṃskaraṇeṣu vidyate]

tiryakkaṇṭha vilola mauli taralottaṃ sasya vaṃśoccarad-

dīptisthāna kṛtāvadhāna lalanā lakṣairna saṃlakṣitāḥ |

sammugdhe madhusūdanasya madhure rādhāmukhendau sudhā-

sāre kandalitāściraṃ dadhatu vaḥ kṣemaṃ kaṭākṣormmaya || (25) ||

|| iti śrīgītagovinde mugdhamadhusūdano nāma tṛtīyaḥ sargaḥ ||