Gitagovindam Dvadashah Sargah - Suprita Pitambarah

ॐ

ಗೀತಗೋವಿನ್ದಂ ದ್ವಾದಶಃ ಸರ್ಗಃ - ಸುಪ್ರೀತ ಪೀತಾಮ್ಬರಃ

Vishnu Gita Jayadeva Kannada

॥ ದ್ವಾದಶಃ ಸರ್ಗಃ ॥

॥ ಸುಪ್ರೀತಪೀತಾಮ್ಬರಃ ॥

ಗತವತಿ ಸಖೀವೃನ್ದೇಽಮನ್ದತ್ರಪಾಭರನಿರ್ಭರ-ಸ್ಮರಪರವಶಾಕೂತಸ್ಫೀತಸ್ಮಿತಸ್ನಪಿತಾಧರಮ್ ।

ಸರಸಮನಸಂ ದೃಷ್ಟ್ವಾ ರಾಧಾಂ ಮುಹುರ್ನವಪಲ್ಲವ-ಪ್ರಸವಶಯನೇ ನಿಕ್ಷಿಪ್ತಾಕ್ಷೀಮುವಾಚ ಹರಃ ॥ 68 ॥

॥ ಗೀತಂ 23 ॥

ಕಿಸಲಯಶಯನತಲೇ ಕುರು ಕಾಮಿನಿ ಚರಣನಲಿನವಿನಿವೇಶಮ್ ।

ತವ ಪದಪಲ್ಲವವೈರಿಪರಾಭವಮಿದಮನುಭವತು ಸುವೇಶಮ್ ॥

ಕ್ಷಣಮಧುನಾ ನಾರಾಯಣಮನುಗತಮನುಸರ ರಾಧಿಕೇ ॥ 1 ॥

ಕರಕಮಲೇನ ಕರೋಮಿ ಚರಣಮಹಮಾಗಮಿತಾಸಿ ವಿದೂರಮ್ ।

ಕ್ಷಣಮುಪಕುರು ಶಯನೋಪರಿ ಮಾಮಿವ ನೂಪುರಮನುಗತಿಶೂರಮ್ ॥ 2 ॥

ವದನಸುಧಾನಿಧಿಗಲಿತಮಮೃತಮಿವ ರಚಯ ವಚನಮನುಕೂಲಮ್ ।

ವಿರಹಮಿವಾಪನಯಾಮಿ ಪಯೋಧರರೋಧಕಮುರಸಿ ದುಕೂಲಮ್ ॥ 3 ॥

ಪ್ರಿಯಪರಿರಮ್ಭಣರಭಸವಲಿತಮಿವ ಪುಲಕಿತಮತಿದುರವಾಪಮ್ ।

ಮದುರಸಿ ಕುಚಕಲಶಂ ವಿನಿವೇಶಯ ಶೋಷಯ ಮನಸಿಜತಾಪಮ್ ॥ 4 ॥

ಅಧರಸುಧಾರಸಮುಪನಯ ಭಾವಿನಿ ಜೀವಯ ಮೃತಮಿವ ದಾಸಮ್ ।

ತ್ವಯಿ ವಿನಿಹಿತಮನಸಂ ವಿರಹಾನಲದಗ್ಧವಪುಷಮವಿಲಾಸಮ್ ॥ 5 ॥

ಶಶಿಮುಖಿ ಮುಖರಯ ಮಣಿರಶನಾಗುಣಮನುಗುಣಕಣ್ಠನಿದಾನಮ್ ।

ಶ್ರುತಿಯುಗಲೇ ಪಿಕರುತವಿಕಲೇ ಮಮ ಶಮಯ ಚಿರಾದವಸಾದಮ್ ॥ 6 ॥

ಮಾಮತಿವಿಫಲರುಷಾ ವಿಕಲೀಕೃತಮವಲೋಕಿತಮಧುನೇದಮ್ ।

ಮೀಲಿತಲಜ್ಜಿತಮಿವ ನಯನಂ ತವ ವಿರಮ ವಿಸೃಜ ರತಿಖೇದಮ್ ॥ 7 ॥

ಶ್ರೀಜಯದೇವಭಣಿತಮಿದಮನುಪದನಿಗದಿತಮಧುರಿಪುಮೋದಮ್ ।

ಜನಯತು ರಸಿಕಜನೇಷು ಮನೋರಮತಿರಸಭಾವವಿನೋದಮ್ ॥ 8 ॥

ಮಾರಙ್ಕೇ ರತಿಕೇಲಿಸಙ್ಕುಲರಣಾರಮ್ಭೇ ತಯಾ ಸಾಹಸ-ಪ್ರಾಯಂ ಕಾನ್ತಜಯಾಯ ಕಿಞ್ಚಿದುಪರಿ ಪ್ರಾರಮ್ಭಿ ಯತ್ಸಮ್ಭ್ರಮಾತ್ ।

ನಿಷ್ಪನ್ದಾ ಜಘನಸ್ಥಲೀ ಶಿಥಿಲತಾ ದೋರ್ವಲ್ಲಿರುತ್ಕಮ್ಪಿತಂ ವಕ್ಷೋ ಮೀಲಿತಮಕ್ಷಿ ಪೌರುಷರಸಃ ಸ್ತ್ರೀಣಾಂ ಕುತಃ ಸಿಧ್ಯತಿ ॥ 69 ॥

ಅಥ ಕಾನ್ತಂ ರತಿಕ್ಲಾನ್ತಮಪಿ ಮಣ್ಡನವಾಞ್ಛಯಾ ।

ನಿಜಗಾದ ನಿರಾಬಾಧಾ ರಾಧಾ ಸ್ವಾಧೀನಭರ್ತೃಕಾ ॥ 70 ॥

॥ ಗೀತಂ 24 ॥

ಕುರು ಯದುನನ್ದನ ಚನ್ದನಶಿಶಿರತರೇಣ ಕರೇಣ ಪಯೋಧರೇ ।

ಮೃಗಮದಪತ್ರಕಮತ್ರ ಮನೋಭವಮಙ್ಗಲಕಲಶಸಹೋದರೇ ।

ನಿಜಗಾದ ಸಾ ಯದುನನ್ದನೇ ಕ್ರೀಡತಿ ಹೃದಯಾನನ್ದನೇ ॥ 1 ॥

ಅಲಿಕುಲಗಞ್ಜನಮಞ್ಜನಕಂ ರತಿನಾಯಕಸಾಯಕಮೋಚನೇ ।

ತ್ವದಧರಚುಮ್ಬನಲಮ್ಬಿತಕಜ್ಜಲಮುಜ್ಜ್ವಲಯ ಪ್ರಿಯ ಲೋಚನೇ ॥ 2 ॥

ನಯನಕುರಙ್ಗತರಙ್ಗವಿಕಾಸನಿರಾಸಕರೇ ಶ್ರುತಿಮಣ್ಡಲೇ ।

ಮನಸಿಜಪಾಶವಿಲಾಸಧರೇ ಶುಭವೇಶ ನಿವೇಶಯ ಕುಣ್ಡಲೇ ॥ 3 ॥

ಭ್ರಮರಚಯಂ ರಚಹಯನ್ತಮುಪರಿ ರುಚಿರಂ ಸುಚಿರಂ ಮಮ ಸಮ್ಮುಖೇ ।

ಜಿತಕಮಲೇ ವಿಮಲೇ ಪರಿಕರ್ಮಯ ನರ್ಮಜನಕಮಲಕಂ ಮುಖೇ ॥ 4 ॥

ಮೃಗಮದರಸವಲಿತಂ ಲಲಿತಂ ಕುರು ತಿಲಕಮಲಿಕರಜನೀಕರೇ ।

ವಿಹಿತಕಲಙ್ಕಕಲಂ ಕಮಲಾನನ ವಿಶ್ರಮಿತಶ್ರಮಶೀಕರೇ ॥ 5 ॥

ಮಮ ರುಚಿರೇ ಚಿಕುರೇ ಕುರು ಮಾನದ ಮಾನಸಜಧ್ವಜಚಾಮರೇ ।

ರತಿಗಲಿತೇ ಲಲಿತೇ ಕುಸುಮಾನಿ ಶಿಖಣ್ಡಿಶಿಖಣ್ಡಕಡಾಮರೇ ॥ 6 ॥

ಸರಸಘನೇ ಜಘನೇ ಮಮ ಶಮ್ಬರದಾರಣವಾರಣಕನ್ದರೇ ।

ಮಣಿರಶನಾವಸನಾಭರಣಾನಿ ಶುಭಾಶಯ ವಾಸಯ ಸುನ್ದರೇ ॥ 7 ॥

ಶ್ರೀಜಯದೇವವಚಸಿ ರುಚಿರೇ ಹೃದಯಂ ಸದಯಂ ಕುರು ಮಣ್ಡನೇ ।

ಹರಿಚರಣಸ್ಮರಣಾಮೃತಕೃತಕಲಿಕಲುಷಭವಜ್ವರಖಣ್ಡನೇ ॥ 8 ॥

ರಚಯ ಕುಚಯೋಃ ಪತ್ರಂ ಚಿತ್ರಂ ಕುರುಷ್ವ ಕಪೋಲಯೋ-ರ್ಘಟಯ ಜಘನೇ ಕಾಞ್ಚೀಮಞ್ಚ ಸ್ರಜಾ ಕಬರೀಭರಮ್ ।

ಕಲಯ ವಲಯಶ್ರೇಣೀಂ ಪಾಣೌ ಪದೇ ಕುರು ನೂಪುರಾ-ವಿತಿ ನಿಗತಿತಃ ಪ್ರೀತಃ ಪೀತಾಮ್ಬರೋಽಪಿ ತಥಾಕರೋತ್ ॥ 71 ॥

ಯದ್ಗಾನ್ಧ್ಗರ್ವಕಲಾಸು ಕೌಶಲಮನುಧ್ಯಾನಂ ಚ ಯದ್ವೈಷ್ಣವಂ ಯಚ್ಛೃಙ್ಗಾರವಿವೇಕತತ್ವಮಪಿ ಯತ್ಕಾವ್ಯೇಷು ಲೀಲಾಯಿತಮ್ ।

ತತ್ಸರ್ವಂ ಜಯದೇವಪಣ್ಡಿತಕವೇಃ ಕೃಷ್ಣೈಕತಾನಾತ್ಮನಃ ಸಾನನ್ದಾಃ ಪರಿಶೋಧಯನ್ತು ಸುಧಿಯಃ ಶ್ರೀಗೀತಗೋವಿನ್ದತಃ ॥ 72 ॥

ಶ್ರೀಭೋಜದೇವಪ್ರಭವಸ್ಯ ರಾಮಾದೇವೀಸುತಶ್ರೀಜಯದೇವಕಸ್ಯ ।

ಪರಾಶರಾದಿಪ್ರಿಯವರ್ಗಕಣ್ಠೇ ಶ್ರೀಗೀತಗೋವಿನ್ದಕವಿತ್ವಮಸ್ತು ॥ 73 ॥

॥ ಇತಿ ಶ್ರೀಜಯದೇವಕೃತೌ ಗೀತಗೋವಿನ್ದೇ ಸುಪ್ರೀತಪೀತಾಮ್ಬರೋ ನಾಮ ದ್ವಾದಶಃ ಸರ್ಗಃ ॥

॥ ಇತಿ ಗೀತಗೋವಿನ್ದಂ ಸಮಾಪ್ತಮ್ ॥

Roman (IAST) Transliteration

|| dvādaśaḥ sargaḥ ||

|| suprītapītāmbaraḥ ||

gatavati sakhīvṛnde'mandatrapābharanirbhara-smaraparavaśākūtasphītasmitasnapitādharam |

sarasamanasaṃ dṛṣṭvā rādhāṃ muhurnavapallava-prasavaśayane nikṣiptākṣīmuvāca haraḥ || 68 ||

|| gītaṃ 23 ||

kisalayaśayanatale kuru kāmini caraṇanalinaviniveśam |

tava padapallavavairiparābhavamidamanubhavatu suveśam ||

kṣaṇamadhunā nārāyaṇamanugatamanusara rādhike || 1 ||

karakamalena karomi caraṇamahamāgamitāsi vidūram |

kṣaṇamupakuru śayanopari māmiva nūpuramanugatiśūram || 2 ||

vadanasudhānidhigalitamamṛtamiva racaya vacanamanukūlam |

virahamivāpanayāmi payodhararodhakamurasi dukūlam || 3 ||

priyaparirambhaṇarabhasavalitamiva pulakitamatiduravāpam |

madurasi kucakalaśaṃ viniveśaya śoṣaya manasijatāpam || 4 ||

adharasudhārasamupanaya bhāvini jīvaya mṛtamiva dāsam |

tvayi vinihitamanasaṃ virahānaladagdhavapuṣamavilāsam || 5 ||

śaśimukhi mukharaya maṇiraśanāguṇamanuguṇakaṇṭhanidānam |

śrutiyugale pikarutavikale mama śamaya cirādavasādam || 6 ||

māmativiphalaruṣā vikalīkṛtamavalokitamadhunedam |

mīlitalajjitamiva nayanaṃ tava virama visṛja ratikhedam || 7 ||

śrījayadevabhaṇitamidamanupadanigaditamadhuripumodam |

janayatu rasikajaneṣu manoramatirasabhāvavinodam || 8 ||

māraṅke ratikelisaṅkularaṇārambhe tayā sāhasa-prāyaṃ kāntajayāya kiñcidupari prārambhi yatsambhramāt |

niṣpandā jaghanasthalī śithilatā dorvallirutkampitaṃ vakṣo mīlitamakṣi pauruṣarasaḥ strīṇāṃ kutaḥ sidhyati || 69 ||

atha kāntaṃ ratiklāntamapi maṇḍanavāñchayā |

nijagāda nirābādhā rādhā svādhīnabhartṛkā || 70 ||

|| gītaṃ 24 ||

kuru yadunandana candanaśiśiratareṇa kareṇa payodhare |

mṛgamadapatrakamatra manobhavamaṅgalakalaśasahodare |

nijagāda sā yadunandane krīḍati hṛdayānandane || 1 ||

alikulagañjanamañjanakaṃ ratināyakasāyakamocane |

tvadadharacumbanalambitakajjalamujjvalaya priya locane || 2 ||

nayanakuraṅgataraṅgavikāsanirāsakare śrutimaṇḍale |

manasijapāśavilāsadhare śubhaveśa niveśaya kuṇḍale || 3 ||

bhramaracayaṃ racahayantamupari ruciraṃ suciraṃ mama sammukhe |

jitakamale vimale parikarmaya narmajanakamalakaṃ mukhe || 4 ||

mṛgamadarasavalitaṃ lalitaṃ kuru tilakamalikarajanīkare |

vihitakalaṅkakalaṃ kamalānana viśramitaśramaśīkare || 5 ||

mama rucire cikure kuru mānada mānasajadhvajacāmare |

ratigalite lalite kusumāni śikhaṇḍiśikhaṇḍakaḍāmare || 6 ||

sarasaghane jaghane mama śambaradāraṇavāraṇakandare |

maṇiraśanāvasanābharaṇāni śubhāśaya vāsaya sundare || 7 ||

śrījayadevavacasi rucire hṛdayaṃ sadayaṃ kuru maṇḍane |

haricaraṇasmaraṇāmṛtakṛtakalikaluṣabhavajvarakhaṇḍane || 8 ||

racaya kucayoḥ patraṃ citraṃ kuruṣva kapolayo-rghaṭaya jaghane kāñcīmañca srajā kabarībharam |

kalaya valayaśreṇīṃ pāṇau pade kuru nūpurā-viti nigatitaḥ prītaḥ pītāmbaro'pi tathākarot || 71 ||

yadgāndhgarvakalāsu kauśalamanudhyānaṃ ca yadvaiṣṇavaṃ yacchṛṅgāravivekatatvamapi yatkāvyeṣu līlāyitam |

tatsarvaṃ jayadevapaṇḍitakaveḥ kṛṣṇaikatānātmanaḥ sānandāḥ pariśodhayantu sudhiyaḥ śrīgītagovindataḥ || 72 ||

śrībhojadevaprabhavasya rāmādevīsutaśrījayadevakasya |

parāśarādipriyavargakaṇṭhe śrīgītagovindakavitvamastu || 73 ||

|| iti śrījayadevakṛtau gītagovinde suprītapītāmbaro nāma dvādaśaḥ sargaḥ ||

|| iti gītagovindaṃ samāptam ||