Ganga Ashtakam 2 — InfoLyter.in

ॐ

ಗಙ್ಗಾ ಅಷ್ಟಕಂ 2

Ganga Ashtakam 2

Ashtakam Kannada

ಭಗವತಿ ಭವಲೀಲಾಮೌಲಿಮಾಲೇ ತವಾಮ್ಭಃ

ಕಣಮಣುಪರಿಮಾಣಂ ಪ್ರಾಣಿನೋ ಯೇ ಸ್ಪೃಶನ್ತಿ ।

ಅಮರನಗರನಾರೀಚಾಮರಗ್ರಾಹಿಣೀನಾಂ

ವಿಗತಕಲಿಕಲಙ್ಕಾತಙ್ಕಮಙ್ಕೇ ಲುಠನ್ತಿ ॥ 1 ॥

ಬ್ರಹ್ಮಾಣ್ಡಂ ಖಣ್ಡಯನ್ತೀ ಹರಶಿರಸಿ ಜಟಾವಲ್ಲಿಮುಲ್ಲಾಸಯನ್ತೀ

ಸ್ವರ್ಲೋಕಾದಾಪತನ್ತೀ ಕನಕಗಿರಿಗುಹಾಗಣ್ಡಶೈಲಾತ್ ಸ್ಖಲನ್ತೀ ।

ಕ್ಷೋಣೀಪೃಷ್ಟೇ ಲುಠನ್ತೀ ದುರಿತಚಯಚಮೂರ್ನಿರ್ಭರಂ ಭರ್ತ್ಸಯನ್ತೀ

ಪಾಥೋಧಿಂ ಪೂರಯನ್ತೀ ಸುರನಗರಸರಿತ್ಪಾವನೀ ನಃ ಪುನಾತು ॥ 2 ॥

ಮಜ್ಜನ್ಮಾತಙ್ಗಕುಮ್ಭಚ್ಯುತಮದಮದಿರಾಮೋದಮತ್ತಾಲಿಜಾಲಂ

ಸ್ನಾನೈಃ ಸಿದ್ಧಾಙ್ಗನಾನಾಂ ಕುಚಯುಗವಿಗಲತ್ಕುಙ್ಕುಮಾಸಙ್ಗಪಿಙ್ಗಮ್ ।

ಸಾಯಂ ಪ್ರಾತರ್ಮುನೀನಾಂ ಕುಶಕುಸುಮಚಯೈಶ್ಛಿನ್ನತೀರಸ್ಥನೀರಂ

ಪಾಯಾನ್ನೋ ಗಾಙ್ಗಮಮ್ಭಃ ಕರಿಕರಮಕರಾಕ್ರಾನ್ತರಹಸ್ತರಙ್ಗಮ್ ॥ 3 ॥

ಆದಾವಾದಿಪಿತಾಮಹಸ್ಯ ನಿಯಮವ್ಯಾಪಾರಪಾತ್ರೇ ಜಲಂ

ಪಶ್ಚಾತ್ಪನ್ನಗಶಾಯಿನೋ ಭಗವತಃ ಪಾದೋದಕಂ ಪಾವನಮ್ ।

ಭೂಯಃ ಶಮ್ಭುಜಟಾವಿಭೂಷಣಮಣಿರ್ಜಹ್ನೋರ್ಮಹರ್ಷೇರಿಯಂ

ಕನ್ಯಾ ಕಲ್ಮಷನಾಶಿನೀ ಭಗವತೀ ಭಾಗೀರಥೀ ಪಾತು ಮಾಮ್ ॥ 4 ॥

ಶೈಲೇನ್ದ್ರಾದವತಾರಿಣೀ ನಿಜಜಲೇ ಮಜ್ಜಜ್ಜನೋತ್ತಾರಿಣೀ

ಪಾರಾವಾರವಿಹಾರಿಣೀ ಭವಭಯಶ್ರೇಣೀಸಮುತ್ಸಾರಿಣೀ ।

ಶೇಷಾಙ್ಗೈರನುಕಾರಿಣೀ ಹರಶಿರೋವಲ್ಲೀದಲಾಕಾರಿಣೀ

ಕಾಶೀಪ್ರಾನ್ತವಿಹಾರಿಣೀ ವಿಜಯತೇ ಗಙ್ಗಾ ಮನೋಹಾರಿಣೀ ॥ 5 ॥

ಕುತೋ ವೀಚೀ ವೀಚಿಸ್ತವ ಯದಿ ಗತಾ ಲೋಚನಪಥಂ

ತ್ವಮಾಪೀತಾ ಪೀತಾಮ್ಬರಪುರವಾಸಂ ವಿತರಸಿ ।

ತ್ವದುತ್ಸಙ್ಗೇ ಗಙ್ಗೇ ಪತತಿ ಯದಿ ಕಾಯಸ್ತನುಭೃತಾಂ

ತದಾ ಮಾತಃ ಶಾನ್ತಕ್ರತವಪದಲಾಭೋಽಪ್ಯತಿಲಘುಃ ॥ 6 ॥

ಭಗವತಿ ತವ ತೀರೇ ನೀರಮಾತ್ರಾಶನೋಽಹಂ

ವಿಗತವಿಷಯತೃಷ್ಣಃ ಕೃಷ್ಣಮಾರಾಧಯಾಮಿ ।

ಸಕಲಕಲುಷಭಙ್ಗೇ ಸ್ವರ್ಗಸೋಪಾನಸಙ್ಗೇ

ತರಲತರತರಙ್ಗೇ ದೇವಿ ಗಙ್ಗೇ ಪ್ರಸೀದ ॥ 7 ॥

ಮಾತರ್ಜಾಹ್ನವಿ ಶಮ್ಭುಸಙ್ಗಮಿಲಿತೇ ಮೌಲೌ ನಿಧಾಯಾಞ್ಜಲಿಂ

ತ್ವತ್ತೀರೇ ವಪುಷೋಽವಸಾನಸಮಯೇ ನಾರಾಯಣಾಙ್ಘ್ರಿದ್ವಯಮ್ ।

ಸಾನನ್ದಂ ಸ್ಮರತೋ ಭವಿಷ್ಯತಿ ಮಮ ಪ್ರಾಣಪ್ರಯಾಣೋತ್ಸವೇ

ಭೂಯಾದ್ಭಕ್ತಿರವಿಚ್ಯುತಾ ಹರಿಹರಾದ್ವೈತಾತ್ಮಿಕಾ ಶಾಶ್ವತೀ ॥ 8 ॥

ಗಙ್ಗಾಷ್ಟಕಮಿದಂ ಪುಣ್ಯಂ ಯಃ ಪಠೇತ್ಪ್ರಯತೋ ನರಃ ।

ಸರ್ವಪಾಪವಿನಿರ್ಮುಕ್ತೋ ವಿಷ್ಣುಲೋಕಂ ಸ ಗಚ್ಛತಿ ॥ 9 ॥

ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಙ್ಕರಭಗವತಃ ಕೃತೌ ಗಙ್ಗಾಷ್ಟಕಂ ಸಮ್ಪೂರ್ಣಮ್ ।

Roman (IAST) Transliteration

bhagavati bhavalīlāmaulimāle tavāmbhaḥ

kaṇamaṇuparimāṇaṃ prāṇino ye spṛśanti |

amaranagaranārīcāmaragrāhiṇīnāṃ

vigatakalikalaṅkātaṅkamaṅke luṭhanti || 1 ||

brahmāṇḍaṃ khaṇḍayantī haraśirasi jaṭāvallimullāsayantī

svarlokādāpatantī kanakagiriguhāgaṇḍaśailāt skhalantī |

kṣoṇīpṛṣṭe luṭhantī duritacayacamūrnirbharaṃ bhartsayantī

pāthodhiṃ pūrayantī suranagarasaritpāvanī naḥ punātu || 2 ||

majjanmātaṅgakumbhacyutamadamadirāmodamattālijālaṃ

snānaiḥ siddhāṅganānāṃ kucayugavigalatkuṅkumāsaṅgapiṅgam |

sāyaṃ prātarmunīnāṃ kuśakusumacayaiśchinnatīrasthanīraṃ

pāyānno gāṅgamambhaḥ karikaramakarākrāntarahastaraṅgam || 3 ||

ādāvādipitāmahasya niyamavyāpārapātre jalaṃ

paścātpannagaśāyino bhagavataḥ pādodakaṃ pāvanam |

bhūyaḥ śambhujaṭāvibhūṣaṇamaṇirjahnormaharṣeriyaṃ

kanyā kalmaṣanāśinī bhagavatī bhāgīrathī pātu mām || 4 ||

śailendrādavatāriṇī nijajale majjajjanottāriṇī

pārāvāravihāriṇī bhavabhayaśreṇīsamutsāriṇī |

śeṣāṅgairanukāriṇī haraśirovallīdalākāriṇī

kāśīprāntavihāriṇī vijayate gaṅgā manohāriṇī || 5 ||

kuto vīcī vīcistava yadi gatā locanapathaṃ

tvamāpītā pītāmbarapuravāsaṃ vitarasi |

tvadutsaṅge gaṅge patati yadi kāyastanubhṛtāṃ

tadā mātaḥ śāntakratavapadalābho'pyatilaghuḥ || 6 ||

bhagavati tava tīre nīramātrāśano'haṃ

vigataviṣayatṛṣṇaḥ kṛṣṇamārādhayāmi |

sakalakaluṣabhaṅge svargasopānasaṅge

taralatarataraṅge devi gaṅge prasīda || 7 ||

mātarjāhnavi śambhusaṅgamilite maulau nidhāyāñjaliṃ

tvattīre vapuṣo'vasānasamaye nārāyaṇāṅghridvayam |

sānandaṃ smarato bhaviṣyati mama prāṇaprayāṇotsave

bhūyādbhaktiravicyutā hariharādvaitātmikā śāśvatī || 8 ||

gaṅgāṣṭakamidaṃ puṇyaṃ yaḥ paṭhetprayato naraḥ |

sarvapāpavinirmukto viṣṇulokaṃ sa gacchati || 9 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau gaṅgāṣṭakaṃ sampūrṇam |