Devi Bhujanga Stotram — InfoLyter.in

ॐ

ದೇವೀ ಭುಜಙ್ಗ ಸ್ತೋತ್ರಂ

Devi Bhujanga Stotram

Devi Stotram Kannada

ವಿರಿಞ್ಚ್ಯಾದಿಭಿಃ ಪಞ್ಚಭಿರ್ಲೋಕಪಾಲೈಃ

ಸಮೂಢೇ ಮಹಾನನ್ದಪೀಠೇ ನಿಷಣ್ಣಮ್ ।

ಧನುರ್ಬಾಣಪಾಶಾಙ್ಕುಶಪ್ರೋತಹಸ್ತಂ

ಮಹಸ್ತ್ರೈಪುರಂ ಶಙ್ಕರಾದ್ವೈತಮವ್ಯಾತ್ ॥ 1 ॥

ಯದನ್ನಾದಿಭಿಃ ಪಞ್ಚಭಿಃ ಕೋಶಜಾಲೈಃ

ಶಿರಃಪಕ್ಷಪುಚ್ಛಾತ್ಮಕೈರನ್ತರನ್ತಃ ।

ನಿಗೂಢೇ ಮಹಾಯೋಗಪೀಠೇ ನಿಷಣ್ಣಂ

ಪುರಾರೇರಥಾನ್ತಃಪುರಂ ನೌಮಿ ನಿತ್ಯಮ್ ॥ 2 ॥

ವಿರಿಞ್ಚಾದಿರೂಪೈಃ ಪ್ರಪಞ್ಚೇ ವಿಹೃತ್ಯ

ಸ್ವತನ್ತ್ರಾ ಯದಾ ಸ್ವಾತ್ಮವಿಶ್ರಾನ್ತಿರೇಷಾ ।

ತದಾ ಮಾನಮಾತೃಪ್ರಮೇಯಾತಿರಿಕ್ತಂ

ಪರಾನನ್ದಮೀಡೇ ಭವಾನಿ ತ್ವದೀಯಮ್ ॥ 3 ॥

ವಿನೋದಾಯ ಚೈತನ್ಯಮೇಕಂ ವಿಭಜ್ಯ

ದ್ವಿಧಾ ದೇವಿ ಜೀವಃ ಶಿವಶ್ಚೇತಿ ನಾಮ್ನಾ ।

ಶಿವಸ್ಯಾಪಿ ಜೀವತ್ವಮಾಪಾದಯನ್ತೀ

ಪುನರ್ಜೀವಮೇನಂ ಶಿವಂ ವಾ ಕರೋಷಿ ॥ 4 ॥

ಸಮಾಕುಞ್ಚ್ಯ ಮೂಲಂ ಹೃದಿ ನ್ಯಸ್ಯ ವಾಯುಂ

ಮನೋ ಭ್ರೂಬಿಲಂ ಪ್ರಾಪಯಿತ್ವಾ ನಿವೃತ್ತಾಃ ।

ತತಃ ಸಚ್ಚಿದಾನನ್ದರೂಪೇ ಪದೇ ತೇ

ಭವನ್ತ್ಯಮ್ಬ ಜೀವಾಃ ಶಿವತ್ವೇನ ಕೇಚಿತ್ ॥ 5 ॥

ಶರೀರೇಽತಿಕಷ್ಟೇ ರಿಪೌ ಪುತ್ರವರ್ಗೇ

ಸದಾಭೀತಿಮೂಲೇ ಕಲತ್ರೇ ಧನೇ ವಾ ।

ನ ಕಶ್ಚಿದ್ವಿರಜ್ಯತ್ಯಹೋ ದೇವಿ ಚಿತ್ರಂ

ಕಥಂ ತ್ವತ್ಕಟಾಕ್ಷಂ ವಿನಾ ತತ್ತ್ವಬೋಧಃ ॥ 6 ॥

ಶರೀರೇ ಧನೇಽಪತ್ಯವರ್ಗೇ ಕಲತ್ರೇ

ವಿರಕ್ತಸ್ಯ ಸದ್ದೇಶಿಕಾದಿಷ್ಟಬುದ್ಧೇಃ ।

ಯದಾಕಸ್ಮಿಕಂ ಜ್ಯೋತಿರಾನನ್ದರೂಪಂ

ಸಮಾಧೌ ಭವೇತ್ತತ್ತ್ವಮಸ್ಯಮ್ಬ ಸತ್ಯಮ್ ॥ 7 ॥

ಮೃಷಾನ್ಯೋ ಮೃಷಾನ್ಯಃ ಪರೋ ಮಿಶ್ರಮೇನಂ

ಪರಃ ಪ್ರಾಕೃತಂ ಚಾಪರೋ ಬುದ್ಧಿಮಾತ್ರಮ್ ।

ಪ್ರಪಞ್ಚಂ ಮಿಮೀತೇ ಮುನೀನಾಂ ಗಣೋಽಯಂ

ತದೇತತ್ತ್ವಮೇವೇತಿ ನ ತ್ವಾಂ ಜಹೀಮಃ ॥ 8 ॥

ನಿವೃತ್ತಿಃ ಪ್ರತಿಷ್ಠಾ ಚ ವಿದ್ಯಾ ಚ ಶಾನ್ತಿ-

ಸ್ತಥಾ ಶಾನ್ತ್ಯತೀತೇತಿ ಪಞ್ಚೀಕೃತಾಭಿಃ ।

ಕಲಾಭಿಃ ಪರೇ ಪಞ್ಚವಿಂಶಾತ್ಮಿಕಾಭಿ-

ಸ್ತ್ವಮೇಕೈವ ಸೇವ್ಯಾ ಶಿವಾಭಿನ್ನರೂಪಾ ॥ 9 ॥

ಅಗಾಧೇಽತ್ರ ಸಂಸಾರಪಙ್ಕೇ ನಿಮಗ್ನಂ

ಕಲತ್ರಾದಿಭಾರೇಣ ಖಿನ್ನಂ ನಿತಾನ್ತಮ್ ।

ಮಹಾಮೋಹಪಾಶೌಘಬದ್ಧಂ ಚಿರಾನ್ಮಾಂ

ಸಮುದ್ಧರ್ತುಮಮ್ಬ ತ್ವಮೇಕೈವ ಶಕ್ತಾ ॥ 10 ॥

ಸಮಾರಭ್ಯ ಮೂಲಂ ಗತೋ ಬ್ರಹ್ಮಚಕ್ರಂ

ಭವದ್ದಿವ್ಯಚಕ್ರೇಶ್ವರೀಧಾಮಭಾಜಃ ।

ಮಹಾಸಿದ್ಧಿಸಙ್ಘಾತಕಲ್ಪದ್ರುಮಾಭಾ-

ನವಾಪ್ಯಾಮ್ಬ ನಾದಾನುಪಾಸ್ತೇ ಚ ಯೋಗೀ ॥ 11 ॥

ಗಣೇಶೈರ್ಗ್ರಹೈರಮ್ಬ ನಕ್ಷತ್ರಪಙ್ಕ್ತ್ಯಾ

ತಥಾ ಯೋಗಿನೀರಾಶಿಪೀಠೈರಭಿನ್ನಮ್ ।

ಮಹಾಕಾಲಮಾತ್ಮಾನಮಾಮೃಶ್ಯ ಲೋಕಂ

ವಿಧತ್ಸೇ ಕೃತಿಂ ವಾ ಸ್ಥಿತಿಂ ವಾ ಮಹೇಶಿ ॥ 12 ॥

ಲಸತ್ತಾರಹಾರಾಮತಿಸ್ವಚ್ಛಚೇಲಾಂ

ವಹನ್ತೀಂ ಕರೇ ಪುಸ್ತಕಂ ಚಾಕ್ಷಮಾಲಾಮ್ ।

ಶರಚ್ಚನ್ದ್ರಕೋಟಿಪ್ರಭಾಭಾಸುರಾಂ ತ್ವಾಂ

ಸಕೃದ್ಭಾವಯನ್ಭಾರತೀವಲ್ಲಭಃ ಸ್ಯಾತ್ ॥ 13 ॥

ಸಮುದ್ಯತ್ಸಹಸ್ರಾರ್ಕಬಿಮ್ಬಾಭವಕ್ತ್ರಾಂ

ಸ್ವಭಾಸೈವ ಸಿನ್ದೂರಿತಾಜಾಣ್ಡಕೋಟಿಮ್ ।

ಧನುರ್ಬಾಣಪಾಶಾಙ್ಕುಶಾನ್ಧಾರಯನ್ತೀಂ

ಸ್ಮರನ್ತಃ ಸ್ಮರಂ ವಾಪಿ ಸಮ್ಮೋಹಯೇಯುಃ ॥ 14 ॥

ಮಣಿಸ್ಯೂತತಾಟಙ್ಕಶೋಣಾಸ್ಯಬಿಮ್ಬಾಂ

ಹರಿತ್ಪಟ್ಟವಸ್ತ್ರಾಂ ತ್ವಗುಲ್ಲಾಸಿಭೂಷಾಮ್ ।

ಹೃದಾ ಭಾವಯಂಸ್ತಪ್ತಹೇಮಪ್ರಭಾಂ ತ್ವಾಂ

ಶ್ರಿಯೋ ನಾಶಯತ್ಯಮ್ಬ ಚಾಞ್ಚಲ್ಯಭಾವಮ್ ॥ 15 ॥

ಮಹಾಮನ್ತ್ರರಾಜಾನ್ತಬೀಜಂ ಪರಾಖ್ಯಂ

ಸ್ವತೋ ನ್ಯಸ್ತಬಿನ್ದು ಸ್ವಯಂ ನ್ಯಸ್ತಹಾರ್ದಮ್ ।

ಭವದ್ವಕ್ತ್ರವಕ್ಷೋಜಗುಹ್ಯಾಭಿಧಾನಂ

ಸ್ವರೂಪಂ ಸಕೃದ್ಭಾವಯೇತ್ಸ ತ್ವಮೇವ ॥ 16 ॥

ತಥಾನ್ಯೇ ವಿಕಲ್ಪೇಷು ನಿರ್ವಿಣ್ಣಚಿತ್ತಾ-

ಸ್ತದೇಕಂ ಸಮಾಧಾಯ ಬಿನ್ದುತ್ರಯಂ ತೇ ।

ಪರಾನನ್ದಸನ್ಧಾನಸಿನ್ಧೌ ನಿಮಗ್ನಾಃ

ಪುನರ್ಗರ್ಭರನ್ಧ್ರಂ ನ ಪಶ್ಯನ್ತಿ ಧೀರಾಃ ॥ 17 ॥

ತ್ವದುನ್ಮೇಷಲೀಲಾನುಬನ್ಧಾಧಿಕಾರಾ-

ನ್ವಿರಿಞ್ಚ್ಯಾದಿಕಾಂಸ್ತ್ವದ್ಗುಣಾಮ್ಭೋಧಿಬಿನ್ದೂನ್ ।

ಭಜನ್ತಸ್ತಿತೀರ್ಷನ್ತಿ ಸಂಸಾರಸಿನ್ಧುಂ

ಶಿವೇ ತಾವಕೀನಾ ಸುಸಮ್ಭಾವನೇಯಮ್ ॥ 18 ॥

ಕದಾ ವಾ ಭವತ್ಪಾದಪೋತೇನ ತೂರ್ಣಂ

ಭವಾಮ್ಭೋಧಿಮುತ್ತೀರ್ಯ ಪೂರ್ಣಾನ್ತರಙ್ಗಃ ।

ನಿಮಜ್ಜನ್ತಮೇನಂ ದುರಾಶಾವಿಷಾಬ್ಧೌ

ಸಮಾಲೋಕ್ಯ ಲೋಕಂ ಕಥಂ ಪರ್ಯುದಾಸ್ಸೇ ॥ 19 ॥

ಕದಾವಾ ಹೃಷೀಕಾಣಿ ಸಾಮ್ಯಂ ಭಜೇಯುಃ

ಕದಾ ವಾ ನ ಶತ್ರುರ್ನ ಮಿತ್ರಂ ಭವಾನಿ ।

ಕದಾ ವಾ ದುರಾಶಾವಿಷೂಚೀವಿಲೋಪಃ

ಕದಾ ವಾ ಮನೋ ಮೇ ಸಮೂಲಂ ವಿನಶ್ಯೇತ್ ॥ 20 ॥

ನಮೋವಾಕಮಾಶಾಸ್ಮಹೇ ದೇವಿ ಯುಷ್ಮ-

ತ್ಪದಾಮ್ಭೋಜಯುಗ್ಮಾಯ ತಿಗ್ಮಾಯ ಗೌರಿ ।

ವಿರಿಞ್ಚ್ಯಾದಿಭಾಸ್ವತ್ಕಿರೀಟಪ್ರತೋಲೀ-

ಪ್ರದೀಪಾಯಮಾನಪ್ರಭಾಭಾಸ್ವರಾಯ ॥ 21 ॥

ಕಚೇ ಚನ್ದ್ರರೇಖಂ ಕುಚೇ ತಾರಹಾರಂ

ಕರೇ ಸ್ವಾದುಚಾಪಂ ಶರೇ ಷಟ್ಪದೌಘಮ್ ।

ಸ್ಮರಾಮಿ ಸ್ಮರಾರೇರಭಿಪ್ರಾಯಮೇಕಂ

ಮದಾಘೂರ್ಣನೇತ್ರಂ ಮದೀಯಂ ನಿಧಾನಮ್ ॥ 22 ॥

ಶರೇಷ್ವೇವ ನಾಸಾ ಧನುಷ್ವೇವ ಜಿಹ್ವಾ

ಜಪಾಪಾಟಲೇ ಲೋಚನೇ ತೇ ಸ್ವರೂಪೇ ।

ತ್ವಗೇಷಾ ಭವಚ್ಚನ್ದ್ರಖಣ್ಡೇ ಶ್ರವೋ ಮೇ

ಗುಣೇ ತೇ ಮನೋವೃತ್ತಿರಮ್ಬ ತ್ವಯಿ ಸ್ಯಾತ್ ॥ 23 ॥

ಜಗತ್ಕರ್ಮಧೀರಾನ್ವಚೋಧೂತಕೀರಾನ್

ಕುಚನ್ಯಸ್ತಹಾರಾಙ್ಕೃಪಾಸಿನ್ಧುಪೂರಾನ್ ।

ಭವಾಮ್ಭೋಧಿಪಾರಾನ್ಮಹಾಪಾಪದೂರಾನ್

ಭಜೇ ವೇದಸಾರಾಂಶಿವಪ್ರೇಮದಾರಾನ್ ॥ 24 ॥

ಸುಧಾಸಿನ್ಧುಸಾರೇ ಚಿದಾನನ್ದನೀರೇ

ಸಮುತ್ಫುಲ್ಲನೀಪೇ ಸುರತ್ರಾನ್ತರೀಪೇ ।

ಮಣಿವ್ಯೂಹಸಾಲೇ ಸ್ಥಿತೇ ಹೈಮಶಾಲೇ

ಮನೋಜಾರಿವಾಮೇ ನಿಷಣ್ಣಂ ಮನೋ ಮೇ ॥ 25 ॥

ದೃಗನ್ತೇ ವಿಲೋಲಾ ಸುಗನ್ಧೀಷುಮಾಲಾ

ಪ್ರಪಞ್ಚೇನ್ದ್ರಜಾಲಾ ವಿಪತ್ಸಿನ್ಧುಕೂಲಾ ।

ಮುನಿಸ್ವಾನ್ತಶಾಲಾ ನಮಲ್ಲೋಕಪಾಲಾ

ಹೃದಿ ಪ್ರೇಮಲೋಲಾಮೃತಸ್ವಾದುಲೀಲಾ ॥ 26 ॥

ಜಗಜ್ಜಾಲಮೇತತ್ತ್ವಯೈವಾಮ್ಬ ಸೃಷ್ಟಂ

ತ್ವಮೇವಾದ್ಯ ಯಾಸೀನ್ದ್ರಿಯೈರರ್ಥಜಾಲಮ್ ।

ತ್ವಮೇಕೈವ ಕರ್ತ್ರೀ ತ್ವಮೇಕೈವ ಭೋಕ್ತ್ರೀ

ನ ಮೇ ಪುಣ್ಯಪಾಪೇ ನ ಮೇ ಬನ್ಧಮೋಕ್ಷೌ ॥ 27 ॥

ಇತಿ ಪ್ರೇಮಭಾರೇಣ ಕಿಞ್ಚಿನ್ಮಯೋಕ್ತಂ

ನ ಬುಧ್ವೈವ ತತ್ತ್ವಂ ಮದೀಯಂ ತ್ವದೀಯಮ್ ।

ವಿನೋದಾಯ ಬಾಲಸ್ಯ ಮೌರ್ಖ್ಯಂ ಹಿ ಮಾತಸ್-

ತದೇತತ್ಪ್ರಲಾಪಸ್ತುತಿಂ ಮೇ ಗೃಹಾಣ ॥ 28 ॥

॥ ಇತಿ ಶ್ರೀಮಚ್ಛಙ್ಕರಾಚಾರ್ಯವಿರಚಿತಾ ದೇವೀಭುಜಙ್ಗಂ ಸಮ್ಪೂರ್ಣಮ್ ॥

Roman (IAST) Transliteration

viriñcyādibhiḥ pañcabhirlokapālaiḥ

samūḍhe mahānandapīṭhe niṣaṇṇam |

dhanurbāṇapāśāṅkuśaprotahastaṃ

mahastraipuraṃ śaṅkarādvaitamavyāt || 1 ||

yadannādibhiḥ pañcabhiḥ kośajālaiḥ

śiraḥpakṣapucchātmakairantarantaḥ |

nigūḍhe mahāyogapīṭhe niṣaṇṇaṃ

purārerathāntaḥpuraṃ naumi nityam || 2 ||

viriñcādirūpaiḥ prapañce vihṛtya

svatantrā yadā svātmaviśrāntireṣā |

tadā mānamātṛprameyātiriktaṃ

parānandamīḍe bhavāni tvadīyam || 3 ||

vinodāya caitanyamekaṃ vibhajya

dvidhā devi jīvaḥ śivaśceti nāmnā |

śivasyāpi jīvatvamāpādayantī

punarjīvamenaṃ śivaṃ vā karoṣi || 4 ||

samākuñcya mūlaṃ hṛdi nyasya vāyuṃ

mano bhrūbilaṃ prāpayitvā nivṛttāḥ |

tataḥ saccidānandarūpe pade te

bhavantyamba jīvāḥ śivatvena kecit || 5 ||

śarīre'tikaṣṭe ripau putravarge

sadābhītimūle kalatre dhane vā |

na kaścidvirajyatyaho devi citraṃ

kathaṃ tvatkaṭākṣaṃ vinā tattvabodhaḥ || 6 ||

śarīre dhane'patyavarge kalatre

viraktasya saddeśikādiṣṭabuddheḥ |

yadākasmikaṃ jyotirānandarūpaṃ

samādhau bhavettattvamasyamba satyam || 7 ||

mṛṣānyo mṛṣānyaḥ paro miśramenaṃ

paraḥ prākṛtaṃ cāparo buddhimātram |

prapañcaṃ mimīte munīnāṃ gaṇo'yaṃ

tadetattvameveti na tvāṃ jahīmaḥ || 8 ||

nivṛttiḥ pratiṣṭhā ca vidyā ca śānti-

stathā śāntyatīteti pañcīkṛtābhiḥ |

kalābhiḥ pare pañcaviṃśātmikābhi-

stvamekaiva sevyā śivābhinnarūpā || 9 ||

agādhe'tra saṃsārapaṅke nimagnaṃ

kalatrādibhāreṇa khinnaṃ nitāntam |

mahāmohapāśaughabaddhaṃ cirānmāṃ

samuddhartumamba tvamekaiva śaktā || 10 ||

samārabhya mūlaṃ gato brahmacakraṃ

bhavaddivyacakreśvarīdhāmabhājaḥ |

mahāsiddhisaṅghātakalpadrumābhā-

navāpyāmba nādānupāste ca yogī || 11 ||

gaṇeśairgrahairamba nakṣatrapaṅktyā

tathā yoginīrāśipīṭhairabhinnam |

mahākālamātmānamāmṛśya lokaṃ

vidhatse kṛtiṃ vā sthitiṃ vā maheśi || 12 ||

lasattārahārāmatisvacchacelāṃ

vahantīṃ kare pustakaṃ cākṣamālām |

śaraccandrakoṭiprabhābhāsurāṃ tvāṃ

sakṛdbhāvayanbhāratīvallabhaḥ syāt || 13 ||

samudyatsahasrārkabimbābhavaktrāṃ

svabhāsaiva sindūritājāṇḍakoṭim |

dhanurbāṇapāśāṅkuśāndhārayantīṃ

smarantaḥ smaraṃ vāpi sammohayeyuḥ || 14 ||

maṇisyūtatāṭaṅkaśoṇāsyabimbāṃ

haritpaṭṭavastrāṃ tvagullāsibhūṣām |

hṛdā bhāvayaṃstaptahemaprabhāṃ tvāṃ

śriyo nāśayatyamba cāñcalyabhāvam || 15 ||

mahāmantrarājāntabījaṃ parākhyaṃ

svato nyastabindu svayaṃ nyastahārdam |

bhavadvaktravakṣojaguhyābhidhānaṃ

svarūpaṃ sakṛdbhāvayetsa tvameva || 16 ||

tathānye vikalpeṣu nirviṇṇacittā-

stadekaṃ samādhāya bindutrayaṃ te |

parānandasandhānasindhau nimagnāḥ

punargarbharandhraṃ na paśyanti dhīrāḥ || 17 ||

tvadunmeṣalīlānubandhādhikārā-

nviriñcyādikāṃstvadguṇāmbhodhibindūn |

bhajantastitīrṣanti saṃsārasindhuṃ

śive tāvakīnā susambhāvaneyam || 18 ||

kadā vā bhavatpādapotena tūrṇaṃ

bhavāmbhodhimuttīrya pūrṇāntaraṅgaḥ |

nimajjantamenaṃ durāśāviṣābdhau

samālokya lokaṃ kathaṃ paryudāsse || 19 ||

kadāvā hṛṣīkāṇi sāmyaṃ bhajeyuḥ

kadā vā na śatrurna mitraṃ bhavāni |

kadā vā durāśāviṣūcīvilopaḥ

kadā vā mano me samūlaṃ vinaśyet || 20 ||

namovākamāśāsmahe devi yuṣma-

tpadāmbhojayugmāya tigmāya gauri |

viriñcyādibhāsvatkirīṭapratolī-

pradīpāyamānaprabhābhāsvarāya || 21 ||

kace candrarekhaṃ kuce tārahāraṃ

kare svāducāpaṃ śare ṣaṭpadaugham |

smarāmi smarārerabhiprāyamekaṃ

madāghūrṇanetraṃ madīyaṃ nidhānam || 22 ||

śareṣveva nāsā dhanuṣveva jihvā

japāpāṭale locane te svarūpe |

tvageṣā bhavaccandrakhaṇḍe śravo me

guṇe te manovṛttiramba tvayi syāt || 23 ||

jagatkarmadhīrānvacodhūtakīrān

kucanyastahārāṅkṛpāsindhupūrān |

bhavāmbhodhipārānmahāpāpadūrān

bhaje vedasārāṃśivapremadārān || 24 ||

sudhāsindhusāre cidānandanīre

samutphullanīpe suratrāntarīpe |

maṇivyūhasāle sthite haimaśāle

manojārivāme niṣaṇṇaṃ mano me || 25 ||

dṛgante vilolā sugandhīṣumālā

prapañcendrajālā vipatsindhukūlā |

munisvāntaśālā namallokapālā

hṛdi premalolāmṛtasvādulīlā || 26 ||

jagajjālametattvayaivāmba sṛṣṭaṃ

tvamevādya yāsīndriyairarthajālam |

tvamekaiva kartrī tvamekaiva bhoktrī

na me puṇyapāpe na me bandhamokṣau || 27 ||

iti premabhāreṇa kiñcinmayoktaṃ

na budhvaiva tattvaṃ madīyaṃ tvadīyam |

vinodāya bālasya maurkhyaṃ hi mātas-

tadetatpralāpastutiṃ me gṛhāṇa || 28 ||

|| iti śrīmacchaṅkarācāryaviracitā devībhujaṅgaṃ sampūrṇam ||