Devyaparadha Kshamapana Stotram

ॐ

ದೇವ್ಯಪರಾಧ ಕ್ಷಮಾಪಣ ಸ್ತೋತ್ರಮ್

Radha Stotram Adi Shankaracharya Kannada

ನ ಮನ್ತ್ರಂ ನೋ ಯನ್ತ್ರಂ ತದಪಿ ಚ ನ ಜಾನೇ ಸ್ತುತಿಮಹೋ

ನ ಚಾಹ್ವಾನಂ ಧ್ಯಾನಂ ತದಪಿ ಚ ನ ಜಾನೇ ಸ್ತುತಿಕಥಾಃ ।

ನ ಜಾನೇ ಮುದ್ರಾಸ್ತೇ ತದಪಿ ಚ ನ ಜಾನೇ ವಿಲಪನಂ

ಪರಂ ಜಾನೇ ಮಾತಸ್ತ್ವದನುಸರಣಂ ಕ್ಲೇಶಹರಣಮ್ ॥ 1 ॥

ವಿಧೇರಜ್ಞಾನೇನ ದ್ರವಿಣವಿರಹೇಣಾಲಸತಯಾ

ವಿಧೇಯಾಶಕ್ಯತ್ವಾತ್ತವ ಚರಣಯೋರ್ಯಾ ಚ್ಯುತಿರಭೂತ್ ।

ತದೇತತ್ ಕ್ಷನ್ತವ್ಯಂ ಜನನಿ ಸಕಲೋದ್ಧಾರಿಣಿ ಶಿವೇ

ಕುಪುತ್ರೋ ಜಾಯೇತ ಕ್ವಚಿದಪಿ ಕುಮಾತಾ ನ ಭವತಿ ॥ 2 ॥

ಪೃಥಿವ್ಯಾಂ ಪುತ್ರಾಸ್ತೇ ಜನನಿ ಬಹವಃ ಸನ್ತಿ ಸರಲಾಃ

ಪರಂ ತೇಷಾಂ ಮಧ್ಯೇ ವಿರಲತರಲೋಽಹಂ ತವ ಸುತಃ ।

ಮದೀಯೋಽಯಂ ತ್ಯಾಗಃ ಸಮುಚಿತಮಿದಂ ನೋ ತವ ಶಿವೇ

ಕುಪುತ್ರೋ ಜಾಯೇತ ಕ್ವಚಿದಪಿ ಕುಮಾತಾ ನ ಭವತಿ ॥ 3 ॥

ಜಗನ್ಮಾತರ್ಮಾತಸ್ತವ ಚರಣಸೇವಾ ನ ರಚಿತಾ

ನ ವಾ ದತ್ತಂ ದೇವಿ ದ್ರವಿಣಮಪಿ ಭೂಯಸ್ತವ ಮಯಾ ।

ತಥಾಪಿ ತ್ವಂ ಸ್ನೇಹಂ ಮಯಿ ನಿರುಪಮಂ ಯತ್ಪ್ರಕುರುಷೇ

ಕುಪುತ್ರೋ ಜಾಯೇತ ಕ್ವಚಿದಪಿ ಕುಮಾತಾ ನ ಭವತಿ ॥ 4 ॥

ಪರಿತ್ಯಕ್ತಾ ದೇವಾನ್ವಿವಿಧವಿಧಿಸೇವಾಕುಲತಯಾ

ಮಯಾ ಪಞ್ಚಾಶೀತೇರಧಿಕಮಪನೀತೇ ತು ವಯಸಿ ।

ಇದಾನೀಂ ಚೇನ್ಮಾತಸ್ತವ ಯದಿ ಕೃಪಾ ನಾಪಿ ಭವಿತಾ

ನಿರಾಲಮ್ಬೋ ಲಮ್ಬೋದರಜನನಿ ಕಂ ಯಾಮಿ ಶರಣಮ್ ॥ 5 ॥

ಶ್ವಪಾಕೋ ಜಲ್ಪಾಕೋ ಭವತಿ ಮಧುಪಾಕೋಪಮಗಿರಾ

ನಿರಾತಙ್ಕೋ ರಙ್ಕೋ ವಿಹರತಿ ಚಿರಂ ಕೋಟಿಕನಕೈಃ ।

ತವಾಪರ್ಣೇ ಕರ್ಣೇ ವಿಶತಿ ಮನುವರ್ಣೇ ಫಲಮಿದಂ

ಜನಃ ಕೋ ಜಾನೀತೇ ಜನನಿ ಜಪನೀಯಂ ಜಪವಿಧೌ ॥ 6 ॥

ಚಿತಾಭಸ್ಮಾಲೇಪೋ ಗರಲಮಶನಂ ದಿಕ್ಪಟಧರೋ

ಜಟಾಧಾರೀ ಕಣ್ಠೇ ಭುಜಗಪತಿಹಾರೀ ಪಶುಪತಿಃ ।

ಕಪಾಲೀ ಭೂತೇಶೋ ಭಜತಿ ಜಗದೀಶೈಕಪದವೀಂ

ಭವಾನೀ ತ್ವತ್ಪಾಣಿಗ್ರಹಣಪರಿಪಾಟೀ ಫಲಮಿದಮ್ ॥ 7 ॥

ನ ಮೋಕ್ಷಸ್ಯಾಕಾಙ್ಕ್ಷಾ ನ ಚ ವಿಭವವಾಞ್ಛಾಪಿ ಚ ನ ಮೇ

ನ ವಿಜ್ಞಾನಾಪೇಕ್ಷಾ ಶಶಿಮುಖಿ ಸುಖೇಚ್ಛಾಪಿ ನ ಪುನಃ ।

ಅತಸ್ತ್ವಾಂ ಸಂಯಾಚೇ ಜನನಿ ಜನನಂ ಯಾತು ಮಮ ವೈ

ಮೃಡಾನೀ ರುದ್ರಾಣೀ ಶಿವ ಶಿವ ಭವಾನೀತಿ ಜಪತಃ ॥ 8 ॥

ನಾರಾಧಿತಾಸಿ ವಿಧಿನಾ ವಿವಿಧೋಪಚಾರೈಃ

ಕಿಂ ರೂಕ್ಷಚಿನ್ತನಪರೈರ್ನ ಕೃತಂ ವಚೋಭಿಃ ।

ಶ್ಯಾಮೇ ತ್ವಮೇವ ಯದಿ ಕಿಞ್ಚನ ಮಯ್ಯನಾಥೇ

ಧತ್ಸೇ ಕೃಪಾಮುಚಿತಮಮ್ಬ ಪರಂ ತವೈವ ॥ 9 ॥

ಆಪತ್ಸು ಮಗ್ನಃ ಸ್ಮರಣಂ ತ್ವದೀಯಂ

ಕರೋಮಿ ದುರ್ಗೇ ಕರುಣಾರ್ಣವೇ ಶಿವೇ ।

ನೈತಚ್ಛಠತ್ವಂ ಮಮ ಭಾವಯೇಥಾಃ

ಕ್ಷುಧಾತೃಷಾರ್ತಾಃ ಜನನೀಂ ಸ್ಮರನ್ತಿ ॥ 10 ॥

ಜಗದಮ್ಬ ವಿಚಿತ್ರಮತ್ರ ಕಿಂ

ಪರಿಪೂರ್ಣಾ ಕರುಣಾಸ್ತಿ ಚೇನ್ಮಯಿ ।

ಅಪರಾಧಪರಮ್ಪರಾವೃತಂ

ನ ಹಿ ಮಾತಾ ಸಮುಪೇಕ್ಷತೇ ಸುತಮ್ ॥ 11 ॥

ಮತ್ಸಮಃ ಪಾತಕೀ ನಾಸ್ತಿ ಪಾಪಘ್ನೀ ತ್ವತ್ಸಮಾ ನ ಹಿ ।

ಏವಂ ಜ್ಞಾತ್ವಾ ಮಹಾದೇವೀ ಯಥಾ ಯೋಗ್ಯಂ ತಥಾ ಕುರು ॥ 12 ॥

ಇತಿ ಶ್ರೀಮಚ್ಛಙ್ಕರಾಚಾರ್ಯ ವಿರಚಿತಂ ದೇವ್ಯಪರಾಧಕ್ಷಮಾಪಣ ಸ್ತೋತ್ರಮ್ ।

Roman (IAST) Transliteration

na mantraṃ no yantraṃ tadapi ca na jāne stutimaho

na cāhvānaṃ dhyānaṃ tadapi ca na jāne stutikathāḥ |

na jāne mudrāste tadapi ca na jāne vilapanaṃ

paraṃ jāne mātastvadanusaraṇaṃ kleśaharaṇam || 1 ||

vidherajñānena draviṇaviraheṇālasatayā

vidheyāśakyatvāttava caraṇayoryā cyutirabhūt |

tadetat kṣantavyaṃ janani sakaloddhāriṇi śive

kuputro jāyeta kvacidapi kumātā na bhavati || 2 ||

pṛthivyāṃ putrāste janani bahavaḥ santi saralāḥ

paraṃ teṣāṃ madhye viralataralo'haṃ tava sutaḥ |

madīyo'yaṃ tyāgaḥ samucitamidaṃ no tava śive

kuputro jāyeta kvacidapi kumātā na bhavati || 3 ||

jaganmātarmātastava caraṇasevā na racitā

na vā dattaṃ devi draviṇamapi bhūyastava mayā |

tathāpi tvaṃ snehaṃ mayi nirupamaṃ yatprakuruṣe

kuputro jāyeta kvacidapi kumātā na bhavati || 4 ||

parityaktā devānvividhavidhisevākulatayā

mayā pañcāśīteradhikamapanīte tu vayasi |

idānīṃ cenmātastava yadi kṛpā nāpi bhavitā

nirālambo lambodarajanani kaṃ yāmi śaraṇam || 5 ||

śvapāko jalpāko bhavati madhupākopamagirā

nirātaṅko raṅko viharati ciraṃ koṭikanakaiḥ |

tavāparṇe karṇe viśati manuvarṇe phalamidaṃ

janaḥ ko jānīte janani japanīyaṃ japavidhau || 6 ||

citābhasmālepo garalamaśanaṃ dikpaṭadharo

jaṭādhārī kaṇṭhe bhujagapatihārī paśupatiḥ |

kapālī bhūteśo bhajati jagadīśaikapadavīṃ

bhavānī tvatpāṇigrahaṇaparipāṭī phalamidam || 7 ||

na mokṣasyākāṅkṣā na ca vibhavavāñchāpi ca na me

na vijñānāpekṣā śaśimukhi sukhecchāpi na punaḥ |

atastvāṃ saṃyāce janani jananaṃ yātu mama vai

mṛḍānī rudrāṇī śiva śiva bhavānīti japataḥ || 8 ||

nārādhitāsi vidhinā vividhopacāraiḥ

kiṃ rūkṣacintanaparairna kṛtaṃ vacobhiḥ |

śyāme tvameva yadi kiñcana mayyanāthe

dhatse kṛpāmucitamamba paraṃ tavaiva || 9 ||

āpatsu magnaḥ smaraṇaṃ tvadīyaṃ

karomi durge karuṇārṇave śive |

naitacchaṭhatvaṃ mama bhāvayethāḥ

kṣudhātṛṣārtāḥ jananīṃ smaranti || 10 ||

jagadamba vicitramatra kiṃ

paripūrṇā karuṇāsti cenmayi |

aparādhaparamparāvṛtaṃ

na hi mātā samupekṣate sutam || 11 ||

matsamaḥ pātakī nāsti pāpaghnī tvatsamā na hi |

evaṃ jñātvā mahādevī yathā yogyaṃ tathā kuru || 12 ||

iti śrīmacchaṅkarācārya viracitaṃ devyaparādhakṣamāpaṇa stotram |