Charcha Stavah — InfoLyter.in

ॐ

ಚರ್ಚಾ ಸ್ತವಃ

Charcha Stavah

Kannada

ಪಞ್ಚಸ್ತವಿ – 2 ಚರ್ಚಾಸ್ತವಃ >>

ಸೌನ್ದರ್ಯವಿಭ್ರಮಭುವೋ ಭುವನಾಧಿಪತ್ಯ-

-ಸಙ್ಕಲ್ಪಕಲ್ಪತರವಸ್ತ್ರಿಪುರೇ ಜಯನ್ತಿ ।

ಏತೇ ಕವಿತ್ವಕುಮದಪ್ರಕರಾವಬೋಧ-

-ಪೂರ್ಣೇನ್ದವಸ್ತ್ವಯಿ ಜಗಜ್ಜನನಿ ಪ್ರಣಾಮಾಃ ॥ 1 ॥

ದೇವಿ ಸ್ತುತಿವ್ಯತಿಕರೇ ಕೃತಬುದ್ಧಯಸ್ತೇ

ವಾಚಸ್ಪತಿ ಪ್ರಭೃತಯೋಽಪಿ ಜಡೀ ಭವನ್ತಿ ।

ತಸ್ಮಾನ್ನಿಸರ್ಗಜಡಿಮಾ ಕತಮೋಽಹಮತ್ರ

ಸ್ತೋತ್ರಂ ತವ ತ್ರಿಪುರತಾಪನಪತ್ನಿ ಕರ್ತುಮ್ ॥ 2 ॥

ಮಾತಸ್ತಥಾಪಿ ಭವತೀಂ ಭವತೀವ್ರತಾಪ-

-ವಿಚ್ಛಿತ್ತಯೇ ಸ್ತುತಿಮಹಾರ್ಣವ ಕರ್ಣಧಾರಃ ।

ಸ್ತೋತುಂ ಭವಾನಿ ಸ ಭವಚ್ಚರಣಾರವಿನ್ದ-

-ಭಕ್ತಿಗ್ರಹಃ ಕಿಮಪಿ ಮಾಂ ಮುಖರೀ ಕರೋತಿ ॥ 3 ॥

ಸೂತೇ ಜಗನ್ತಿ ಭವತೀ ಭವತೀ ಬಿಭರ್ತಿ

ಜಾಗರ್ತಿ ತತ್ಕ್ಷಯಕೃತೇ ಭವತೀ ಭವಾನಿ ।

ಮೋಹಂ ಭಿನತ್ತಿ ಭವತೀ ಭವತೀ ರುಣದ್ಧಿ

ಲೀಲಾಯಿತಂ ಜಯತಿ ಚಿತ್ರಮಿದಂ ಭವತ್ಯಾಃ ॥ 4 ॥

ಯಸ್ಮಿನ್ಮನಾಗಪಿ ನವಾಮ್ಬುಜಪತ್ರಗೌರೀಂ

ಗೌರೀಂ ಪ್ರಸಾದಮಧುರಾಂ ದೃಶಮಾದಧಾಸಿ ।

ತಸ್ಮಿನ್ನಿರನ್ತರಮನಙ್ಗಶರಾವಕೀರ್ಣ-

-ಸೀಮನ್ತಿನೀನಯನಸನ್ತತಯಃ ಪತನ್ತಿ ॥ 5 ॥

ಪೃಥ್ವೀಭುಜೋಽಪ್ಯುದಯನಪ್ರಭವಸ್ಯ ತಸ್ಯ

ವಿದ್ಯಾಧರ ಪ್ರಣತಿ ಚುಮ್ಬಿತ ಪಾದಪೀಠಃ ।

ತಚ್ಚಕ್ರವರ್ತಿಪದವೀಪ್ರಣಯಃ ಸ ಏಷಃ

ತ್ವತ್ಪಾದಪಙ್ಕಜರಜಃ ಕಣಜಃ ಪ್ರಸಾದಃ ॥ 6 ॥

ತ್ವತ್ಪಾದಪಙ್ಕಜರಜ ಪ್ರಣಿಪಾತಪೂರ್ವೈಃ

ಪುಣ್ಯೈರನಲ್ಪಮತಿಭಿಃ ಕೃತಿಭಿಃ ಕವೀನ್ದ್ರೈಃ ।

ಕ್ಷೀರಕ್ಷಪಾಕರದುಕೂಲಹಿಮಾವದಾತಾ

ಕೈರಪ್ಯವಾಪಿ ಭುವನತ್ರಿತಯೇಽಪಿ ಕೀರ್ತಿಃ ॥ 7 ॥

ಕಲ್ಪದ್ರುಮಪ್ರಸವಕಲ್ಪಿತಚಿತ್ರಪೂಜಾಂ

ಉದ್ದೀಪಿತ ಪ್ರಿಯತಮಾಮದರಕ್ತಗೀತಿಮ್ ।

ನಿತ್ಯಂ ಭವಾನಿ ಭವತೀಮುಪವೀಣಯನ್ತಿ

ವಿದ್ಯಾಧರಾಃ ಕನಕಶೈಲಗುಹಾಗೃಹೇಷು ॥ 8 ॥

ಲಕ್ಷ್ಮೀವಶೀಕರಣಕರ್ಮಣಿ ಕಾಮಿನೀನಾಂ

ಆಕರ್ಷಣವ್ಯತಿಕರೇಷು ಚ ಸಿದ್ಧಮನ್ತ್ರಃ ।

ನೀರನ್ಧ್ರಮೋಹತಿಮಿರಚ್ಛಿದುರಪ್ರದೀಪೋ

ದೇವಿ ತ್ವದಙ್ಘ್ರಿಜನಿತೋ ಜಯತಿ ಪ್ರಸಾದಃ ॥ 9 ॥

ದೇವಿ ತ್ವದಙ್ಘ್ರಿನಖರತ್ನಭುವೋ ಮಯೂಖಾಃ

ಪ್ರತ್ಯಗ್ರಮೌಕ್ತಿಕರುಚೋ ಮುದಮುದ್ವಹನ್ತಿ ।

ಸೇವಾನತಿವ್ಯತಿಕರೇ ಸುರಸುನ್ದರೀಣಾಂ

ಸೀಮನ್ತಸೀಮ್ನಿ ಕುಸುಮಸ್ತಬಕಾಯಿತಂ ಯೈಃ ॥ 10 ॥

ಮೂರ್ಧ್ನಿ ಸ್ಫುರತ್ತುಹಿನದೀಧಿತಿದೀಪ್ತಿದೀಪ್ತಂ

ಮಧ್ಯೇ ಲಲಾಟಮಮರಾಯುಧರಶ್ಮಿಚಿತ್ರಮ್ ।

ಹೃಚ್ಚಕ್ರಚುಮ್ಬಿ ಹುತಭುಕ್ಕಣಿಕಾನುಕಾರಿ

ಜ್ಯೋತಿರ್ಯದೇತದಿದಮಮ್ಬ ತವ ಸ್ವರೂಪಮ್ ॥ 11 ॥

ರೂಪಂ ತವ ಸ್ಫುರಿತಚನ್ದ್ರಮರೀಚಿಗೌರಂ

ಆಲೋಕತೇ ಶಿರಸಿ ವಾಗಧಿದೈವತಂ ಯಃ ।

ನಿಃಸೀಮಸೂಕ್ತಿರಚನಾಮೃತನಿರ್ಝರಸ್ಯ

ತಸ್ಯ ಪ್ರಸಾದಮಧುರಾಃ ಪ್ರಸರನ್ತಿ ವಾಚಃ ॥ 12 ॥

ಸಿನ್ದೂರಪಾಂಸುಪಟಲಚ್ಛುರಿತಾಮಿವ ದ್ಯಾಂ

ತ್ವತ್ತೇಜಸಾ ಜತುರಸಸ್ನಪಿತಾಮಿವೋರ್ವೀಮ್ ।

ಯಃ ಪಶ್ಯತಿ ಕ್ಷಣಮಪಿ ತ್ರಿಪುರೇ ವಿಹಾಯ

ವ್ರೀಡಾಂ ಮೃಡಾನಿ ಸುದೃಶಸ್ತಮನುದ್ರವನ್ತಿ ॥ 13 ॥

ಮಾತರ್ಮುಹೂರ್ತಮಪಿ ಯಃ ಸ್ಮರತಿ ಸ್ವರೂಪಂ

ಲಾಕ್ಷಾರಸಪ್ರಸರತನ್ತುನಿಭಂ ಭವತ್ಯಾಃ ।

ಧ್ಯಾಯನ್ತ್ಯನನ್ಯಮನಸಸ್ತಮನಙ್ಗತಪ್ತಾಃ

ಪ್ರದ್ಯುಮ್ನಸೀಮ್ನಿ ಸುಭಗತ್ವಗುಣಂ ತರುಣ್ಯಃ ॥ 14 ॥

ಯೋಽಯಂ ಚಕಾಸ್ತಿ ಗಗನಾರ್ಣವರತ್ನಮಿನ್ದುಃ

ಯೋಽಯಂ ಸುರಾಸುರಗುರುಃ ಪುರುಷಃ ಪುರಾಣಃ ।

ಯದ್ವಾಮಮರ್ಧಮಿದಮನ್ಧಕಸೂದನಸ್ಯ

ದೇವಿ ತ್ವಮೇವ ತದಿತಿ ಪ್ರತಿಪಾದಯನ್ತಿ ॥ 15 ॥

ಇಚ್ಛಾನುರೂಪಮನುರೂಪಗುಣಪ್ರಕರ್ಷ

ಸಙ್ಕರ್ಷಿಣಿ ತ್ವಮಭಿಮೃಶ್ಯ ಯದಾ ಬಿಭರ್ಷಿ ।

ಜಾಯೇತ ಸ ತ್ರಿಭುವನೈಕ ಗುರುಸ್ತದಾನೀಂ

ದೇವಃ ಶಿವೋಽಪಿ ಭುವನತ್ರಯಸೂತ್ರಧಾರಃ ॥ 16 ॥

ಧ್ಯಾತಾಸಿ ಹೈಮವತಿ ಯೇನ ಹಿಮಾಂಶುರಶ್ಮಿ-

-ಮಾಲಾಮಲದ್ಯುತಿರಕಲ್ಮಷಮಾನಸೇನ ।

ತಸ್ಯಾವಿಲಮ್ಬಮನವದ್ಯಮನನ್ತಕಲ್ಪಂ

ಅಲ್ಪೈರ್ದಿನೈಃ ಸೃಜಸಿ ಸುನ್ದರಿ ವಾಗ್ವಿಲಾಸಮ್ ॥ 17 ॥

ಆಧಾರಮಾರುತನಿರೋಧವಶೇನ ಯೇಷಾಂ

ಸಿನ್ದೂರರಞ್ಜಿತಸರೋಜಗುಣಾನುಕಾರಿ ।

ದೀಪ್ತಂ ಹೃದಿ ಸ್ಫುರತಿ ದೇವಿ ವಪುಸ್ತ್ವದೀಯಂ

ಧ್ಯಾಯನ್ತಿ ತಾನಿಹ ಸಮೀಹಿತಸಿದ್ಧಿಸಾರ್ಥಾಃ ॥ 18 ॥

ಯೇ ಚಿನ್ತಯನ್ತ್ಯರುಣಮಣ್ಡಲಮಧ್ಯವರ್ತಿ

ರೂಪಂ ತವಾಮ್ಬ ನವಯಾವಕಪಙ್ಕಪಿಙ್ಗಮ್ ।

ತೇಷಾಂ ಸದೈವ ಕುಸುಮಾಯುಧಬಾಣಭಿನ್ನ-

-ವಕ್ಷಃಸ್ಥಲಾ ಮೃಗದೃಶೋ ವಶಗಾ ಭವನ್ತಿ ॥ 19 ॥

ತ್ವಾಮೈನ್ದವೀಮಿವ ಕಲಾಮನುಫಾಲದೇಶಂ

ಉದ್ಭಾಸಿತಾಮ್ಬರತಲಾಮವಲೋಕಯನ್ತಃ ।

ಸದ್ಯೋ ಭವಾನಿ ಸುಧಿಯಃ ಕವಯೋ ಭವನ್ತಿ

ತ್ವಂ ಭಾವನಾಹಿತಧಿಯಾಂ ಕುಲಕಾಮಧೇನುಃ ॥ 20 ॥

ಶರ್ವಾಣಿ ಸರ್ವಜನವನ್ದಿತಪಾದಪದ್ಮೇ

ಪದ್ಮಚ್ಛದದ್ಯುತಿವಿಡಮ್ಬಿತನೇತ್ರಲಕ್ಷ್ಮಿ ।

ನಿಷ್ಪಾಪಮೂರ್ತಿಜನಮಾನಸರಾಜಹಂಸಿ

ಹಂಸಿ ತ್ವಮಾಪದಮನೇಕವಿಧಾಂ ಜನಸ್ಯ ॥ 21 ॥

ಉತ್ತಪ್ತಹೇಮರುಚಿರೇ ತ್ರಿಪುರೇ ಪುನೀಹಿ

ಚೇತಶ್ಚಿರನ್ತನಮಘೌಘವನಂ ಲುನೀಹಿ ।

ಕಾರಾಗೃಹೇ ನಿಗಲಬನ್ಧನಯನ್ತ್ರಿತಸ್ಯ

ತ್ವತ್ಸಂಸ್ಮೃತೌ ಝಟಿತಿ ಮೇ ನಿಗಲಾಸ್ತ್ರುಟನ್ತಿ ॥ 22 ॥

ತ್ವಾಂ ವ್ಯಾಪಿನೀತಿ ಸುಮನಾ ಇತಿ ಕುಣ್ಡಲೀತಿ

ತ್ವಾಂ ಕಾಮಿನೀತಿ ಕಮಲೇತಿ ಕಲಾವತೀತಿ ।

ತ್ವಾಂ ಮಾಲಿನೀತಿ ಲಲಿತೇತ್ಯಪರಾಜಿತೇತಿ

ದೇವಿ ಸ್ತುವನ್ತಿ ವಿಜಯೇತಿ ಜಯೇತ್ಯುಮೇತಿ ॥ 23 ॥

ಉದ್ದಾಮಕಾಮಪರಮಾರ್ಥಸರೋಜಖಣ್ಡ-

ಚಣ್ಡದ್ಯುತಿದ್ಯುತಿಮಪಾಸಿತಷಡ್ವಿಕಾರಾಮ್ ।

ಮೋಹದ್ವಿಪೇನ್ದ್ರಕದನೋದ್ಯತಬೋಧಸಿಂಹ-

-ಲೀಲಾಗುಹಾಂ ಭಗವತೀಂ ತ್ರಿಪುರಾಂ ನಮಾಮಿ ॥ 24 ॥

ಗಣೇಶವಟುಕಸ್ತುತಾ ರತಿಸಹಾಯಕಾಮಾನ್ವಿತಾ

ಸ್ಮರಾರಿವರವಿಷ್ಟರಾ ಕುಸುಮಬಾಣಬಾಣೈರ್ಯುತಾ ।

ಅನಙ್ಗಕುಸುಮಾದಿಭಿಃ ಪರಿವೃತಾ ಚ ಸಿದ್ಧೈಸ್ತ್ರಿಭಿಃ

ಕದಮ್ಬವನಮಧ್ಯಗಾ ತ್ರಿಪುರಸುನ್ದರೀ ಪಾತು ನಃ ॥ 25 ॥

ರುದ್ರಾಣಿ ವಿದ್ರುಮಮಯೀಂ ಪ್ರತಿಮಾಮಿವ ತ್ವಾಂ

ಯೇ ಚಿನ್ತಯನ್ತ್ಯರುಣಕಾನ್ತಿಮನನ್ಯರೂಪಾಮ್ ।

ತಾನೇತ್ಯ ಪಕ್ಷ್ಮಲದೃಶಃ ಪ್ರಸಭಂ ಭಜನ್ತೇ

ಕಣ್ಠಾವಸಕ್ತಮೃದುಬಾಹುಲತಾಸ್ತರುಣ್ಯಃ ॥ 26 ॥

ತ್ವದ್ರೂಪೈಕನಿರೂಪಣಪ್ರಣಯಿತಾಬನ್ಧೋ ದೃಶೋಸ್ತ್ವದ್ಗುಣ-

-ಗ್ರಾಮಾಕರ್ಣನರಾಗಿತಾ ಶ್ರವಣಯೋಸ್ತ್ವತ್ಸಂಸ್ಮೃತಿಶ್ಚೇತಸಿ ।

ತ್ವತ್ಪಾದಾರ್ಚನಚಾತುರೀ ಕರಯುಗೇ ತ್ವತ್ಕೀರ್ತಿತಂ ವಾಚಿ ಮೇ

ಕುತ್ರಾಪಿ ತ್ವದುಪಾಸನವ್ಯಸನಿತಾ ಮೇ ದೇವಿ ಮಾ ಶಾಮ್ಯತು ॥ 27 ॥

ತ್ವದ್ರೂಪಮುಲ್ಲಸಿತದಾಡಿಮಪುಷ್ಪರಕ್ತಂ

ಉದ್ಭಾವಯೇನ್ಮದನದೈವತಮಕ್ಷರಂ ಯಃ ।

ತಂ ರೂಪಹೀನಮಪಿ ಮನ್ಮಥನಿರ್ವಿಶೇಷಂ

ಆಲೋಕಯನ್ತ್ಯುರುನಿತಮ್ಬತಟಾಸ್ತರುಣ್ಯಃ ॥ 28 ॥

ಬ್ರಹ್ಮೇನ್ದ್ರರುದ್ರಹರಿಚನ್ದ್ರಸಹಸ್ರರಶ್ಮಿ-

-ಸ್ಕನ್ದದ್ವಿಪಾನನಹುತಾಶನವನ್ದಿತಾಯೈ ।

ವಾಗೀಶ್ವರಿ ತ್ರಿಭುವನೇಶ್ವರಿ ವಿಶ್ವಮಾತಃ

ಅನ್ತರ್ಬಹಿಶ್ಚ ಕೃತಸಂಸ್ಥಿತಯೇ ನಮಸ್ತೇ ॥ 29 ॥

ಕಸ್ತೋತ್ರಮೇತದನುವಾಸರಮೀಶ್ವರಾಯಾಃ

ಶ್ರೇಯಸ್ಕರಂ ಪಠತಿ ವಾ ಯದಿ ವಾ ಶೃಣೋತಿ ।

ತಸ್ಯೇಪ್ಸಿತಂ ಫಲತಿ ರಾಜಭಿರೀಡ್ಯತೇಽಸೌ

ಜಾಯೇತ ಸ ಪ್ರಿಯತಮೋ ಮದಿರೇಕ್ಷಣಾನಾಮ್ ॥ 30 ॥

ಇತಿ ಶ್ರೀಕಾಲಿದಾಸ ವಿರಚಿತ ಪಞ್ಚಸ್ತವ್ಯಾಂ ದ್ವಿತೀಯಃ ಚರ್ಚಾಸ್ತವಃ ।

Roman (IAST) Transliteration

pañcastavi – 2 carcāstavaḥ >>

saundaryavibhramabhuvo bhuvanādhipatya-

-saṅkalpakalpataravastripure jayanti |

ete kavitvakumadaprakarāvabodha-

-pūrṇendavastvayi jagajjanani praṇāmāḥ || 1 ||

devi stutivyatikare kṛtabuddhayaste

vācaspati prabhṛtayo'pi jaḍī bhavanti |

tasmānnisargajaḍimā katamo'hamatra

stotraṃ tava tripuratāpanapatni kartum || 2 ||

mātastathāpi bhavatīṃ bhavatīvratāpa-

-vicchittaye stutimahārṇava karṇadhāraḥ |

stotuṃ bhavāni sa bhavaccaraṇāravinda-

-bhaktigrahaḥ kimapi māṃ mukharī karoti || 3 ||

sūte jaganti bhavatī bhavatī bibharti

jāgarti tatkṣayakṛte bhavatī bhavāni |

mohaṃ bhinatti bhavatī bhavatī ruṇaddhi

līlāyitaṃ jayati citramidaṃ bhavatyāḥ || 4 ||

yasminmanāgapi navāmbujapatragaurīṃ

gaurīṃ prasādamadhurāṃ dṛśamādadhāsi |

tasminnirantaramanaṅgaśarāvakīrṇa-

-sīmantinīnayanasantatayaḥ patanti || 5 ||

pṛthvībhujo'pyudayanaprabhavasya tasya

vidyādhara praṇati cumbita pādapīṭhaḥ |

taccakravartipadavīpraṇayaḥ sa eṣaḥ

tvatpādapaṅkajarajaḥ kaṇajaḥ prasādaḥ || 6 ||

tvatpādapaṅkajaraja praṇipātapūrvaiḥ

puṇyairanalpamatibhiḥ kṛtibhiḥ kavīndraiḥ |

kṣīrakṣapākaradukūlahimāvadātā

kairapyavāpi bhuvanatritaye'pi kīrtiḥ || 7 ||

kalpadrumaprasavakalpitacitrapūjāṃ

uddīpita priyatamāmadaraktagītim |

nityaṃ bhavāni bhavatīmupavīṇayanti

vidyādharāḥ kanakaśailaguhāgṛheṣu || 8 ||

lakṣmīvaśīkaraṇakarmaṇi kāminīnāṃ

ākarṣaṇavyatikareṣu ca siddhamantraḥ |

nīrandhramohatimiracchidurapradīpo

devi tvadaṅghrijanito jayati prasādaḥ || 9 ||

devi tvadaṅghrinakharatnabhuvo mayūkhāḥ

pratyagramauktikaruco mudamudvahanti |

sevānativyatikare surasundarīṇāṃ

sīmantasīmni kusumastabakāyitaṃ yaiḥ || 10 ||

mūrdhni sphurattuhinadīdhitidīptidīptaṃ

madhye lalāṭamamarāyudharaśmicitram |

hṛccakracumbi hutabhukkaṇikānukāri

jyotiryadetadidamamba tava svarūpam || 11 ||

rūpaṃ tava sphuritacandramarīcigauraṃ

ālokate śirasi vāgadhidaivataṃ yaḥ |

niḥsīmasūktiracanāmṛtanirjharasya

tasya prasādamadhurāḥ prasaranti vācaḥ || 12 ||

sindūrapāṃsupaṭalacchuritāmiva dyāṃ

tvattejasā jaturasasnapitāmivorvīm |

yaḥ paśyati kṣaṇamapi tripure vihāya

vrīḍāṃ mṛḍāni sudṛśastamanudravanti || 13 ||

mātarmuhūrtamapi yaḥ smarati svarūpaṃ

lākṣārasaprasaratantunibhaṃ bhavatyāḥ |

dhyāyantyananyamanasastamanaṅgataptāḥ

pradyumnasīmni subhagatvaguṇaṃ taruṇyaḥ || 14 ||

yo'yaṃ cakāsti gaganārṇavaratnaminduḥ

yo'yaṃ surāsuraguruḥ puruṣaḥ purāṇaḥ |

yadvāmamardhamidamandhakasūdanasya

devi tvameva taditi pratipādayanti || 15 ||

icchānurūpamanurūpaguṇaprakarṣa

saṅkarṣiṇi tvamabhimṛśya yadā bibharṣi |

jāyeta sa tribhuvanaika gurustadānīṃ

devaḥ śivo'pi bhuvanatrayasūtradhāraḥ || 16 ||

dhyātāsi haimavati yena himāṃśuraśmi-

-mālāmaladyutirakalmaṣamānasena |

tasyāvilambamanavadyamanantakalpaṃ

alpairdinaiḥ sṛjasi sundari vāgvilāsam || 17 ||

ādhāramārutanirodhavaśena yeṣāṃ

sindūrarañjitasarojaguṇānukāri |

dīptaṃ hṛdi sphurati devi vapustvadīyaṃ

dhyāyanti tāniha samīhitasiddhisārthāḥ || 18 ||

ye cintayantyaruṇamaṇḍalamadhyavarti

rūpaṃ tavāmba navayāvakapaṅkapiṅgam |

teṣāṃ sadaiva kusumāyudhabāṇabhinna-

-vakṣaḥsthalā mṛgadṛśo vaśagā bhavanti || 19 ||

tvāmaindavīmiva kalāmanuphāladeśaṃ

udbhāsitāmbaratalāmavalokayantaḥ |

sadyo bhavāni sudhiyaḥ kavayo bhavanti

tvaṃ bhāvanāhitadhiyāṃ kulakāmadhenuḥ || 20 ||

śarvāṇi sarvajanavanditapādapadme

padmacchadadyutiviḍambitanetralakṣmi |

niṣpāpamūrtijanamānasarājahaṃsi

haṃsi tvamāpadamanekavidhāṃ janasya || 21 ||

uttaptahemarucire tripure punīhi

cetaścirantanamaghaughavanaṃ lunīhi |

kārāgṛhe nigalabandhanayantritasya

tvatsaṃsmṛtau jhaṭiti me nigalāstruṭanti || 22 ||

tvāṃ vyāpinīti sumanā iti kuṇḍalīti

tvāṃ kāminīti kamaleti kalāvatīti |

tvāṃ mālinīti lalitetyaparājiteti

devi stuvanti vijayeti jayetyumeti || 23 ||

uddāmakāmaparamārthasarojakhaṇḍa-

caṇḍadyutidyutimapāsitaṣaḍvikārām |

mohadvipendrakadanodyatabodhasiṃha-

-līlāguhāṃ bhagavatīṃ tripurāṃ namāmi || 24 ||

gaṇeśavaṭukastutā ratisahāyakāmānvitā

smarārivaraviṣṭarā kusumabāṇabāṇairyutā |

anaṅgakusumādibhiḥ parivṛtā ca siddhaistribhiḥ

kadambavanamadhyagā tripurasundarī pātu naḥ || 25 ||

rudrāṇi vidrumamayīṃ pratimāmiva tvāṃ

ye cintayantyaruṇakāntimananyarūpām |

tānetya pakṣmaladṛśaḥ prasabhaṃ bhajante

kaṇṭhāvasaktamṛdubāhulatāstaruṇyaḥ || 26 ||

tvadrūpaikanirūpaṇapraṇayitābandho dṛśostvadguṇa-

-grāmākarṇanarāgitā śravaṇayostvatsaṃsmṛtiścetasi |

tvatpādārcanacāturī karayuge tvatkīrtitaṃ vāci me

kutrāpi tvadupāsanavyasanitā me devi mā śāmyatu || 27 ||

tvadrūpamullasitadāḍimapuṣparaktaṃ

udbhāvayenmadanadaivatamakṣaraṃ yaḥ |

taṃ rūpahīnamapi manmathanirviśeṣaṃ

ālokayantyurunitambataṭāstaruṇyaḥ || 28 ||

brahmendrarudraharicandrasahasraraśmi-

-skandadvipānanahutāśanavanditāyai |

vāgīśvari tribhuvaneśvari viśvamātaḥ

antarbahiśca kṛtasaṃsthitaye namaste || 29 ||

kastotrametadanuvāsaramīśvarāyāḥ

śreyaskaraṃ paṭhati vā yadi vā śṛṇoti |

tasyepsitaṃ phalati rājabhirīḍyate'sau

jāyeta sa priyatamo madirekṣaṇānām || 30 ||

iti śrīkālidāsa viracita pañcastavyāṃ dvitīyaḥ carcāstavaḥ |