Ananda Lahari — InfoLyter.in

ॐ

ಆನನ್ದ ಲಹರಿ

Ananda Lahari

Lahari Adi Shankaracharya Kannada

ಭವಾನಿ ಸ್ತೋತುಂ ತ್ವಾಂ ಪ್ರಭವತಿ ಚತುರ್ಭಿರ್ನ ವದನೈಃ

ಪ್ರಜಾನಾಮೀಶಾನಸ್ತ್ರಿಪುರಮಥನಃ ಪಞ್ಚಭಿರಪಿ ।

ನ ಷಡ್ಭಿಃ ಸೇನಾನೀರ್ದಶಶತಮುಖೈರಪ್ಯಹಿಪತಿಃ

ತದಾನ್ಯೇಷಾಂ ಕೇಷಾಂ ಕಥಯ ಕಥಮಸ್ಮಿನ್ನವಸರಃ ॥ 1॥

ಘೃತಕ್ಷೀರದ್ರಾಕ್ಷಾಮಧುಮಧುರಿಮಾ ಕೈರಪಿ ಪದೈಃ

ವಿಶಿಷ್ಯಾನಾಖ್ಯೇಯೋ ಭವತಿ ರಸನಾಮಾತ್ರ ವಿಷಯಃ ।

ತಥಾ ತೇ ಸೌನ್ದರ್ಯಂ ಪರಮಶಿವದೃಙ್ಮಾತ್ರವಿಷಯಃ

ಕಥಙ್ಕಾರಂ ಬ್ರೂಮಃ ಸಕಲನಿಗಮಾಗೋಚರಗುಣೇ ॥ 2॥

ಮುಖೇ ತೇ ತಾಮ್ಬೂಲಂ ನಯನಯುಗಲೇ ಕಜ್ಜಲಕಲಾ

ಲಲಾಟೇ ಕಾಶ್ಮೀರಂ ವಿಲಸತಿ ಗಲೇ ಮೌಕ್ತಿಕಲತಾ ।

ಸ್ಫುರತ್ಕಾಞ್ಚೀ ಶಾಟೀ ಪೃಥುಕಟಿತಟೇ ಹಾಟಕಮಯೀ

ಭಜಾಮಿ ತ್ವಾಂ ಗೌರೀಂ ನಗಪತಿಕಿಶೋರೀಮವಿರತಮ್ ॥ 3॥

ವಿರಾಜನ್ಮನ್ದಾರದ್ರುಮಕುಸುಮಹಾರಸ್ತನತಟೀ

ನದದ್ವೀಣಾನಾದಶ್ರವಣವಿಲಸತ್ಕುಣ್ಡಲಗುಣಾ

ನತಾಙ್ಗೀ ಮಾತಙ್ಗೀ ರುಚಿರಗತಿಭಙ್ಗೀ ಭಗವತೀ

ಸತೀ ಶಮ್ಭೋರಮ್ಭೋರುಹಚಟುಲಚಕ್ಷುರ್ವಿಜಯತೇ ॥ 4॥

ನವೀನಾರ್ಕಭ್ರಾಜನ್ಮಣಿಕನಕಭೂಷಣಪರಿಕರೈಃ

ವೃತಾಙ್ಗೀ ಸಾರಙ್ಗೀರುಚಿರನಯನಾಙ್ಗೀಕೃತಶಿವಾ ।

ತಡಿತ್ಪೀತಾ ಪೀತಾಮ್ಬರಲಲಿತಮಞ್ಜೀರಸುಭಗಾ

ಮಮಾಪರ್ಣಾ ಪೂರ್ಣಾ ನಿರವಧಿಸುಖೈರಸ್ತು ಸುಮುಖೀ ॥ 5॥

ಹಿಮಾದ್ರೇಃ ಸಮ್ಭೂತಾ ಸುಲಲಿತಕರೈಃ ಪಲ್ಲವಯುತಾ

ಸುಪುಷ್ಪಾ ಮುಕ್ತಾಭಿರ್ಭ್ರಮರಕಲಿತಾ ಚಾಲಕಭರೈಃ ।

ಕೃತಸ್ಥಾಣುಸ್ಥಾನಾ ಕುಚಫಲನತಾ ಸೂಕ್ತಿಸರಸಾ

ರುಜಾಂ ಹನ್ತ್ರೀ ಗನ್ತ್ರೀ ವಿಲಸತಿ ಚಿದಾನನ್ದಲತಿಕಾ ॥ 6॥

ಸಪರ್ಣಾಮಾಕೀರ್ಣಾಂ ಕತಿಪಯಗುಣೈಃ ಸಾದರಮಿಹ

ಶ್ರಯನ್ತ್ಯನ್ಯೇ ವಲ್ಲೀಂ ಮಮ ತು ಮತಿರೇವಂ ವಿಲಸತಿ ।

ಅಪರ್ಣೈಕಾ ಸೇವ್ಯಾ ಜಗತಿ ಸಕಲೈರ್ಯತ್ಪರಿವೃತಃ

ಪುರಾಣೋಽಪಿ ಸ್ಥಾಣುಃ ಫಲತಿ ಕಿಲ ಕೈವಲ್ಯಪದವೀಮ್ ॥ 7॥

ವಿಧಾತ್ರೀ ಧರ್ಮಾಣಾಂ ತ್ವಮಸಿ ಸಕಲಾಮ್ನಾಯಜನನೀ

ತ್ವಮರ್ಥಾನಾಂ ಮೂಲಂ ಧನದನಮನೀಯಾಙ್ಘ್ರಿಕಮಲೇ ।

ತ್ವಮಾದಿಃ ಕಾಮಾನಾಂ ಜನನಿ ಕೃತಕನ್ದರ್ಪವಿಜಯೇ

ಸತಾಂ ಮುಕ್ತೇರ್ಬೀಜಂ ತ್ವಮಸಿ ಪರಮಬ್ರಹ್ಮಮಹಿಷೀ ॥ 8॥

ಪ್ರಭೂತಾ ಭಕ್ತಿಸ್ತೇ ಯದಪಿ ನ ಮಮಾಲೋಲಮನಸಃ

ತ್ವಯಾ ತು ಶ್ರೀಮತ್ಯಾ ಸದಯಮವಲೋಕ್ಯೋಽಹಮಧುನಾ ।

ಪಯೋದಃ ಪಾನೀಯಂ ದಿಶತಿ ಮಧುರಂ ಚಾತಕಮುಖೇ

ಭೃಶಂ ಶಙ್ಕೇ ಕೈರ್ವಾ ವಿಧಿಭಿರನುನೀತಾ ಮಮ ಮತಿಃ ॥ 9॥

ಕೃಪಾಪಾಙ್ಗಾಲೋಕಂ ವಿತರ ತರಸಾ ಸಾಧುಚರಿತೇ

ನ ತೇ ಯುಕ್ತೋಪೇಕ್ಷಾ ಮಯಿ ಶರಣದೀಕ್ಷಾಮುಪಗತೇ ।

ನ ಚೇದಿಷ್ಟಂ ದದ್ಯಾದನುಪದಮಹೋ ಕಲ್ಪಲತಿಕಾ

ವಿಶೇಷಃ ಸಾಮಾನ್ಯೈಃ ಕಥಮಿತರವಲ್ಲೀಪರಿಕರೈಃ ॥ 10॥

ಮಹಾನ್ತಂ ವಿಶ್ವಾಸಂ ತವ ಚರಣಪಙ್ಕೇರುಹಯುಗೇ

ನಿಧಾಯಾನ್ಯನ್ನೈವಾಶ್ರಿತಮಿಹ ಮಯಾ ದೈವತಮುಮೇ ।

ತಥಾಪಿ ತ್ವಚ್ಚೇತೋ ಯದಿ ಮಯಿ ನ ಜಾಯೇತ ಸದಯಂ

ನಿರಾಲಮ್ಬೋ ಲಮ್ಬೋದರಜನನಿ ಕಂ ಯಾಮಿ ಶರಣಮ್ ॥ 11॥

ಅಯಃ ಸ್ಪರ್ಶೇ ಲಗ್ನಂ ಸಪದಿ ಲಭತೇ ಹೇಮಪದವೀಂ

ಯಥಾ ರಥ್ಯಾಪಾಥಃ ಶುಚಿ ಭವತಿ ಗಙ್ಗೌಘಮಿಲಿತಮ್ ।

ತಥಾ ತತ್ತತ್ಪಾಪೈರತಿಮಲಿನಮನ್ತರ್ಮಮ ಯದಿ

ತ್ವಯಿ ಪ್ರೇಮ್ಣಾಸಕ್ತಂ ಕಥಮಿವ ನ ಜಾಯೇತ ವಿಮಲಮ್ ॥ 12॥

ತ್ವದನ್ಯಸ್ಮಾದಿಚ್ಛಾವಿಷಯಫಲಲಾಭೇ ನ ನಿಯಮಃ

ತ್ವಮರ್ಥಾನಾಮಿಚ್ಛಾಧಿಕಮಪಿ ಸಮರ್ಥಾ ವಿತರಣೇ ।

ಇತಿ ಪ್ರಾಹುಃ ಪ್ರಾಞ್ಚಃ ಕಮಲಭವನಾದ್ಯಾಸ್ತ್ವಯಿ ಮನಃ

ತ್ವದಾಸಕ್ತಂ ನಕ್ತಂ ದಿವಮುಚಿತಮೀಶಾನಿ ಕುರು ತತ್ ॥ 13॥

ಸ್ಫುರನ್ನಾನಾರತ್ನಸ್ಫಟಿಕಮಯಭಿತ್ತಿಪ್ರತಿಫಲ

ತ್ತ್ವದಾಕಾರಂ ಚಞ್ಚಚ್ಛಶಧರಕಲಾಸೌಧಶಿಖರಮ್ ।

ಮುಕುನ್ದಬ್ರಹ್ಮೇನ್ದ್ರಪ್ರಭೃತಿಪರಿವಾರಂ ವಿಜಯತೇ

ತವಾಗಾರಂ ರಮ್ಯಂ ತ್ರಿಭುವನಮಹಾರಾಜಗೃಹಿಣಿ ॥ 14॥

ನಿವಾಸಃ ಕೈಲಾಸೇ ವಿಧಿಶತಮಖಾದ್ಯಾಃ ಸ್ತುತಿಕರಾಃ

ಕುಟುಮ್ಬಂ ತ್ರೈಲೋಕ್ಯಂ ಕೃತಕರಪುಟಃ ಸಿದ್ಧಿನಿಕರಃ ।

ಮಹೇಶಃ ಪ್ರಾಣೇಶಸ್ತದವನಿಧರಾಧೀಶತನಯೇ

ನ ತೇ ಸೌಭಾಗ್ಯಸ್ಯ ಕ್ವಚಿದಪಿ ಮನಾಗಸ್ತಿ ತುಲನಾ ॥ 15॥

ವೃಷೋ ವೃದ್ಧೋ ಯಾನಂ ವಿಷಮಶನಮಾಶಾ ನಿವಸನಂ

ಶ್ಮಶಾನಂ ಕ್ರೀಡಾಭೂರ್ಭುಜಗನಿವಹೋ ಭೂಷಣವಿಧಿಃ

ಸಮಗ್ರಾ ಸಾಮಗ್ರೀ ಜಗತಿ ವಿದಿತೈವ ಸ್ಮರರಿಪೋಃ

ಯದೇತಸ್ಯೈಶ್ವರ್ಯಂ ತವ ಜನನಿ ಸೌಭಾಗ್ಯಮಹಿಮಾ ॥ 16॥

ಅಶೇಷಬ್ರಹ್ಮಾಣ್ಡಪ್ರಲಯವಿಧಿನೈಸರ್ಗಿಕಮತಿಃ

ಶ್ಮಶಾನೇಷ್ವಾಸೀನಃ ಕೃತಭಸಿತಲೇಪಃ ಪಶುಪತಿಃ ।

ದಧೌ ಕಣ್ಠೇ ಹಾಲಾಹಲಮಖಿಲಭೂಗೋಲಕೃಪಯಾ

ಭವತ್ಯಾಃ ಸಙ್ಗತ್ಯಾಃ ಫಲಮಿತಿ ಚ ಕಲ್ಯಾಣಿ ಕಲಯೇ ॥ 17॥

ತ್ವದೀಯಂ ಸೌನ್ದರ್ಯಂ ನಿರತಿಶಯಮಾಲೋಕ್ಯ ಪರಯಾ

ಭಿಯೈವಾಸೀದ್ಗಙ್ಗಾ ಜಲಮಯತನುಃ ಶೈಲತನಯೇ ।

ತದೇತಸ್ಯಾಸ್ತಸ್ಮಾದ್ವದನಕಮಲಂ ವೀಕ್ಷ್ಯ ಕೃಪಯಾ

ಪ್ರತಿಷ್ಠಾಮಾತನ್ವನ್ನಿಜಶಿರಸಿವಾಸೇನ ಗಿರಿಶಃ ॥ 18॥

ವಿಶಾಲಶ್ರೀಖಣ್ಡದ್ರವಮೃಗಮದಾಕೀರ್ಣಘುಸೃಣ

ಪ್ರಸೂನವ್ಯಾಮಿಶ್ರಂ ಭಗವತಿ ತವಾಭ್ಯಙ್ಗಸಲಿಲಮ್ ।

ಸಮಾದಾಯ ಸ್ರಷ್ಟಾ ಚಲಿತಪದಪಾಂಸೂನ್ನಿಜಕರೈಃ

ಸಮಾಧತ್ತೇ ಸೃಷ್ಟಿಂ ವಿಬುಧಪುರಪಙ್ಕೇರುಹದೃಶಾಮ್ ॥ 19॥

ವಸನ್ತೇ ಸಾನನ್ದೇ ಕುಸುಮಿತಲತಾಭಿಃ ಪರಿವೃತೇ

ಸ್ಫುರನ್ನಾನಾಪದ್ಮೇ ಸರಸಿ ಕಲಹಂಸಾಲಿಸುಭಗೇ ।

ಸಖೀಭಿಃ ಖೇಲನ್ತೀಂ ಮಲಯಪವನಾನ್ದೋಲಿತಜಲೇ

ಸ್ಮರೇದ್ಯಸ್ತ್ವಾಂ ತಸ್ಯ ಜ್ವರಜನಿತಪೀಡಾಪಸರತಿ ॥ 20॥

॥ ಇತಿ ಶ್ರೀಮಚ್ಛಙ್ಕರಾಚಾರ್ಯವಿರಚಿತಾ ಆನನ್ದಲಹರೀ ಸಮ್ಪೂರ್ಣಾ ॥

Roman (IAST) Transliteration

bhavāni stotuṃ tvāṃ prabhavati caturbhirna vadanaiḥ

prajānāmīśānastripuramathanaḥ pañcabhirapi |

na ṣaḍbhiḥ senānīrdaśaśatamukhairapyahipatiḥ

tadānyeṣāṃ keṣāṃ kathaya kathamasminnavasaraḥ || 1||

ghṛtakṣīradrākṣāmadhumadhurimā kairapi padaiḥ

viśiṣyānākhyeyo bhavati rasanāmātra viṣayaḥ |

tathā te saundaryaṃ paramaśivadṛṅmātraviṣayaḥ

kathaṅkāraṃ brūmaḥ sakalanigamāgocaraguṇe || 2||

mukhe te tāmbūlaṃ nayanayugale kajjalakalā

lalāṭe kāśmīraṃ vilasati gale mauktikalatā |

sphuratkāñcī śāṭī pṛthukaṭitaṭe hāṭakamayī

bhajāmi tvāṃ gaurīṃ nagapatikiśorīmaviratam || 3||

virājanmandāradrumakusumahārastanataṭī

nadadvīṇānādaśravaṇavilasatkuṇḍalaguṇā

natāṅgī mātaṅgī ruciragatibhaṅgī bhagavatī

satī śambhorambhoruhacaṭulacakṣurvijayate || 4||

navīnārkabhrājanmaṇikanakabhūṣaṇaparikaraiḥ

vṛtāṅgī sāraṅgīruciranayanāṅgīkṛtaśivā |

taḍitpītā pītāmbaralalitamañjīrasubhagā

mamāparṇā pūrṇā niravadhisukhairastu sumukhī || 5||

himādreḥ sambhūtā sulalitakaraiḥ pallavayutā

supuṣpā muktābhirbhramarakalitā cālakabharaiḥ |

kṛtasthāṇusthānā kucaphalanatā sūktisarasā

rujāṃ hantrī gantrī vilasati cidānandalatikā || 6||

saparṇāmākīrṇāṃ katipayaguṇaiḥ sādaramiha

śrayantyanye vallīṃ mama tu matirevaṃ vilasati |

aparṇaikā sevyā jagati sakalairyatparivṛtaḥ

purāṇo'pi sthāṇuḥ phalati kila kaivalyapadavīm || 7||

vidhātrī dharmāṇāṃ tvamasi sakalāmnāyajananī

tvamarthānāṃ mūlaṃ dhanadanamanīyāṅghrikamale |

tvamādiḥ kāmānāṃ janani kṛtakandarpavijaye

satāṃ mukterbījaṃ tvamasi paramabrahmamahiṣī || 8||

prabhūtā bhaktiste yadapi na mamālolamanasaḥ

tvayā tu śrīmatyā sadayamavalokyo'hamadhunā |

payodaḥ pānīyaṃ diśati madhuraṃ cātakamukhe

bhṛśaṃ śaṅke kairvā vidhibhiranunītā mama matiḥ || 9||

kṛpāpāṅgālokaṃ vitara tarasā sādhucarite

na te yuktopekṣā mayi śaraṇadīkṣāmupagate |

na cediṣṭaṃ dadyādanupadamaho kalpalatikā

viśeṣaḥ sāmānyaiḥ kathamitaravallīparikaraiḥ || 10||

mahāntaṃ viśvāsaṃ tava caraṇapaṅkeruhayuge

nidhāyānyannaivāśritamiha mayā daivatamume |

tathāpi tvacceto yadi mayi na jāyeta sadayaṃ

nirālambo lambodarajanani kaṃ yāmi śaraṇam || 11||

ayaḥ sparśe lagnaṃ sapadi labhate hemapadavīṃ

yathā rathyāpāthaḥ śuci bhavati gaṅgaughamilitam |

tathā tattatpāpairatimalinamantarmama yadi

tvayi premṇāsaktaṃ kathamiva na jāyeta vimalam || 12||

tvadanyasmādicchāviṣayaphalalābhe na niyamaḥ

tvamarthānāmicchādhikamapi samarthā vitaraṇe |

iti prāhuḥ prāñcaḥ kamalabhavanādyāstvayi manaḥ

tvadāsaktaṃ naktaṃ divamucitamīśāni kuru tat || 13||

sphurannānāratnasphaṭikamayabhittipratiphala

ttvadākāraṃ cañcacchaśadharakalāsaudhaśikharam |

mukundabrahmendraprabhṛtiparivāraṃ vijayate

tavāgāraṃ ramyaṃ tribhuvanamahārājagṛhiṇi || 14||

nivāsaḥ kailāse vidhiśatamakhādyāḥ stutikarāḥ

kuṭumbaṃ trailokyaṃ kṛtakarapuṭaḥ siddhinikaraḥ |

maheśaḥ prāṇeśastadavanidharādhīśatanaye

na te saubhāgyasya kvacidapi manāgasti tulanā || 15||

vṛṣo vṛddho yānaṃ viṣamaśanamāśā nivasanaṃ

śmaśānaṃ krīḍābhūrbhujaganivaho bhūṣaṇavidhiḥ

samagrā sāmagrī jagati viditaiva smararipoḥ

yadetasyaiśvaryaṃ tava janani saubhāgyamahimā || 16||

aśeṣabrahmāṇḍapralayavidhinaisargikamatiḥ

śmaśāneṣvāsīnaḥ kṛtabhasitalepaḥ paśupatiḥ |

dadhau kaṇṭhe hālāhalamakhilabhūgolakṛpayā

bhavatyāḥ saṅgatyāḥ phalamiti ca kalyāṇi kalaye || 17||

tvadīyaṃ saundaryaṃ niratiśayamālokya parayā

bhiyaivāsīdgaṅgā jalamayatanuḥ śailatanaye |

tadetasyāstasmādvadanakamalaṃ vīkṣya kṛpayā

pratiṣṭhāmātanvannijaśirasivāsena giriśaḥ || 18||

viśālaśrīkhaṇḍadravamṛgamadākīrṇaghusṛṇa

prasūnavyāmiśraṃ bhagavati tavābhyaṅgasalilam |

samādāya sraṣṭā calitapadapāṃsūnnijakaraiḥ

samādhatte sṛṣṭiṃ vibudhapurapaṅkeruhadṛśām || 19||

vasante sānande kusumitalatābhiḥ parivṛte

sphurannānāpadme sarasi kalahaṃsālisubhage |

sakhībhiḥ khelantīṃ malayapavanāndolitajale

smaredyastvāṃ tasya jvarajanitapīḍāpasarati || 20||

|| iti śrīmacchaṅkarācāryaviracitā ānandalaharī sampūrṇā ||