Narayaniyam Dashaka 68 - Gopikanam Ahladaprakatanam

ॐ

नारायणीयं दशक 68 - गोपिकानां आह्लादप्रकटनम्

Vishnu Devanagari

तव विलोकनाद्गोपिकाजनाः प्रमदसङ्कुलाः पङ्कजेक्षण ।

अमृतधारया सम्प्लुता इव स्तिमिततां दधुस्त्वत्पुरोगताः ॥1॥

तदनु काचन त्वत्कराम्बुजं सपदि गृह्णती निर्विशङ्कितम् ।

घनपयोधरे सन्निधाय सा पुलकसंवृता तस्थुषी चिरम् ॥2॥

तव विभोऽपरा कोमलं भुजं निजगलान्तरे पर्यवेष्टयत् ।

गलसमुद्गतं प्राणमारुतं प्रतिनिरुन्धतीवातिहर्षुला ॥3॥

अपगतत्रपा कापि कामिनी तव मुखाम्बुजात् पूगचर्वितम् ।

प्रतिगृहय्य तद्वक्त्रपङ्कजे निदधती गता पूर्णकामताम् ॥4॥

विकरुणो वने संविहाय मामपगतोऽसि का त्वामिह स्पृशेत् ।

इति सरोषया तावदेकया सजललोचनं वीक्षितो भवान् ॥5॥

इति मुदाऽऽकुलैर्वल्लवीजनैः सममुपागतो यामुने तटे ।

मृदुकुचाम्बरैः कल्पितासने घुसृणभासुरे पर्यशोभथाः ॥6॥

कतिविधा कृपा केऽपि सर्वतो धृतदयोदयाः केचिदाश्रिते ।

कतिचिदीदृशा मादृशेष्वपीत्यभिहितो भवान् वल्लवीजनैः ॥7॥

अयि कुमारिका नैव शङ्क्यतां कठिनता मयि प्रेमकातरे ।

मयि तु चेतसो वोऽनुवृत्तये कृतमिदं मयेत्यूचिवान् भवान् ॥8॥

अयि निशम्यतां जीववल्लभाः प्रियतमो जनो नेदृशो मम ।

तदिह रम्यतां रम्ययामिनीष्वनुपरोधमित्यालपो विभो ॥9॥

इति गिराधिकं मोदमेदुरैर्व्रजवधूजनैः साकमारमन् ।

कलितकौतुको रासखेलने गुरुपुरीपते पाहि मां गदात् ॥10॥

Roman (IAST) Transliteration

tava vilokanādgopikājanāḥ pramadasaṅkulāḥ paṅkajekṣaṇa |

amṛtadhārayā samplutā iva stimitatāṃ dadhustvatpurogatāḥ ||1||

tadanu kācana tvatkarāmbujaṃ sapadi gṛhṇatī nirviśaṅkitam |

ghanapayodhare sannidhāya sā pulakasaṃvṛtā tasthuṣī ciram ||2||

tava vibho'parā komalaṃ bhujaṃ nijagalāntare paryaveṣṭayat |

galasamudgataṃ prāṇamārutaṃ pratinirundhatīvātiharṣulā ||3||

apagatatrapā kāpi kāminī tava mukhāmbujāt pūgacarvitam |

pratigṛhayya tadvaktrapaṅkaje nidadhatī gatā pūrṇakāmatām ||4||

vikaruṇo vane saṃvihāya māmapagato'si kā tvāmiha spṛśet |

iti saroṣayā tāvadekayā sajalalocanaṃ vīkṣito bhavān ||5||

iti mudā''kulairvallavījanaiḥ samamupāgato yāmune taṭe |

mṛdukucāmbaraiḥ kalpitāsane ghusṛṇabhāsure paryaśobhathāḥ ||6||

katividhā kṛpā ke'pi sarvato dhṛtadayodayāḥ kecidāśrite |

katicidīdṛśā mādṛśeṣvapītyabhihito bhavān vallavījanaiḥ ||7||

ayi kumārikā naiva śaṅkyatāṃ kaṭhinatā mayi premakātare |

mayi tu cetaso vo'nuvṛttaye kṛtamidaṃ mayetyūcivān bhavān ||8||

ayi niśamyatāṃ jīvavallabhāḥ priyatamo jano nedṛśo mama |

tadiha ramyatāṃ ramyayāminīṣvanuparodhamityālapo vibho ||9||

iti girādhikaṃ modamedurairvrajavadhūjanaiḥ sākamāraman |

kalitakautuko rāsakhelane gurupurīpate pāhi māṃ gadāt ||10||