5.29 Sundarakanda - Ekonatrimsha Sargah

ॐ

5.29 સુન્દરકાણ્ડ - એકોનત્રિંશ સર્ગઃ

Valmiki Gujarati

શ્રીમદ્વાલ્મીકીય રામાયણે સુન્દરકાણ્ડમ્ ।

અથ એકોનત્રિંશસ્સર્ગઃ ।

તથાગતાં તાં વ્યથિતામનિન્દિતાં વ્યપેતહર્ષાં પરિદીનમાનસામ્ ।

શુભાં નિમિત્તાનિ શુભાનિ ભેજિરે નરં શ્રિયા જુષ્ટમિવોપજીવિનઃ ॥ 1 ॥

તસ્યાઃ શુભં વામમરાલપક્ષ્મ રાજીવૃતં કૃષ્ણવિશાલશુક્લમ્ ।

પ્રાસ્પન્દતૈકં નયનં સુકેશ્યા મીનાહતં પદ્મમિવાભિતામ્રમ્ ॥ 2 ॥

ભુજશ્ચ ચાર્વઞ્ચિતપીનવૃત્તઃ પરાર્થ્યકાલાગરુચન્દનાર્હઃ ।

અનુત્તમેનાધ્યુષિતઃ પ્રિયેણ ચિરેણ વામઃ સમવેપતાઽશુ ॥ 3 ॥

ગજેન્દ્રહસ્તપ્રતિમશ્ચ પીન સ્તયોર્દ્વયોઃ સમ્હતયોઃ સુજાતઃ ।

પ્રસ્પન્દમાનઃ પુનરૂરુરસ્યા રામં પુરસ્તાત્ સ્થિતમાચચક્ષે ॥ 4 ॥

શુભં પુનર્હેમસમાનવર્ણ મીષદ્રજોધ્વસ્તમિવામલાક્ષ્યાઃ ।

વાસ સ્સ્થિતાયા શ્શિખરાગ્રદન્ત્યાઃ કિઞ્ચિત્પરિસ્રંસત ચારુગાત્ય્રાઃ ॥ 5 ॥

એતૈર્નિમિત્તૈરપરૈશ્ચ સુભ્રૂઃ સમ્બોધિતા પ્રાગપિ સાધુ સિદ્ધૈઃ ।

વાતાતપક્લાન્તમિવ પ્રણષ્ટં વર્ષેણ બીજં પ્રતિસઞ્જહર્ષ ॥ 6 ॥

તસ્યાઃ પુનર્બિમ્બફલાધરોષ્ઠં સ્વક્ષિભ્રુકેશાન્તમરાલપક્ષ્મ ।

વક્ત્રં બભાસે સિતશુક્લદંષ્ટ્રં રાહોર્મુખાચ્ચન્દ્ર ઇવ પ્રમુક્તઃ ॥ 7 ॥

સા વીતશોકા વ્યપનીતતન્દ્રી શાન્તજ્વરા હર્ષવિબુદ્ધસત્ત્વા ।

અશોભતાર્યા વદનેન શુક્લે શીતાંશુના રાત્રિરિવોદિતેન ॥ 8 ॥

ઇત્યાર્ષે શ્રીમદ્રામાયણે વાલ્મીકીય આદિકાવ્યે સુન્દરકાણ્ડે એકોનત્રિંશસ્સર્ગઃ ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ekonatriṃśassargaḥ |

tathāgatāṃ tāṃ vyathitāmaninditāṃ vyapetaharṣāṃ paridīnamānasām |

śubhāṃ nimittāni śubhāni bhejire naraṃ śriyā juṣṭamivopajīvinaḥ || 1 ||

tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam |

prāspandataikaṃ nayanaṃ sukeśyā mīnāhataṃ padmamivābhitāmram || 2 ||

bhujaśca cārvañcitapīnavṛttaḥ parārthyakālāgarucandanārhaḥ |

anuttamenādhyuṣitaḥ priyeṇa cireṇa vāmaḥ samavepatā'śu || 3 ||

gajendrahastapratimaśca pīna stayordvayoḥ samhatayoḥ sujātaḥ |

praspandamānaḥ punarūrurasyā rāmaṃ purastāt sthitamācacakṣe || 4 ||

śubhaṃ punarhemasamānavarṇa mīṣadrajodhvastamivāmalākṣyāḥ |

vāsa ssthitāyā śśikharāgradantyāḥ kiñcitparisraṃsata cārugātyrāḥ || 5 ||

etairnimittairaparaiśca subhrūḥ sambodhitā prāgapi sādhu siddhaiḥ |

vātātapaklāntamiva praṇaṣṭaṃ varṣeṇa bījaṃ pratisañjaharṣa || 6 ||

tasyāḥ punarbimbaphalādharoṣṭhaṃ svakṣibhrukeśāntamarālapakṣma |

vaktraṃ babhāse sitaśukladaṃṣṭraṃ rāhormukhāccandra iva pramuktaḥ || 7 ||

sā vītaśokā vyapanītatandrī śāntajvarā harṣavibuddhasattvā |

aśobhatāryā vadanena śukle śītāṃśunā rātririvoditena || 8 ||

ityārṣe śrīmadrāmāyaṇe vālmīkīya ādikāvye sundarakāṇḍe ekonatriṃśassargaḥ ||