📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.10 અયોધ્યાકાણ્ડ - દશમ સર્ગઃ
2.10 Ayodhyakanda - Dashama Sargah
Valmiki Gujarati
શ્રીમદ્વાલ્મીકીય રામાયણે અયોધ્યાકાણ્ડમ્ ।
અથ દશમસ્સર્ગઃ ।
વિદર્શિતા યદા દેવી કુબ્જયા પાપયા ભૃશમ્ ।
તદા શેતે સ્મ સા ભૂમૌ દિગ્ધવિદ્ધેવ કિન્નરી ॥ 1 ॥
નિશ્ચિત્ય મનસા કૃત્યં સા સમ્યગિતિ ભામિની ।
મન્થરાયૈ શનૈસ્સર્વમાચચક્ષે વિચક્ષણા ॥ 2 ॥
સા દીના નિશ્ચયં કૃત્વા મન્થરાવાક્યમોહિતા ।
નાગકન્યેવ નિશ્વસ્ય દીર્ઘમુષ્ણં ચ ભામિની ॥ 3 ॥
મુહૂર્તં ચિન્તયામાસ માર્ગમાત્મસુખાવહમ્ ।
સા સુહૃચ્ચાર્થકામા ચ તં નિશમ્ય સુનિશ્ચયમ્ ॥ 4 ॥
બભૂવ પરમપ્રીતા સિધ્દિં પ્રાપ્યેવ મન્થરા ।
અથ સા રુષિતા દેવી સમ્યક્કૃત્વા વિનિશ્ચયમ્ ॥ 5 ॥
સંવિવેશાબલા ભૂમૌ નિવેશ્ય ભૃકુટીં મુખે ।
તતશ્ચિત્રાણિ માલ્યાનિ દિવ્યાન્યાભરણાનિ ચ ॥ 6 ॥
અપવિદ્ધાનિ કૈકેય્યા તાનિ ભૂમિં પ્રપેદિરે ।
તયા તાન્યપવિદ્ધાનિ માલ્યાન્યાભરણાનિ ચ ॥ 7 ॥
અશોભયન્ત વસુધાં નક્ષત્રાણિ યથા નભઃ ।
ક્રોધાગારે નિપતિતા સા બભૌ મલિનામ્બરા ॥ 8 ॥
એકવેણીં દૃઢં બદ્વા ગતસત્ત્વેવ કિન્નરી ।
આજ્ઞાપ્ય ચ મહારાજો રાઘવસ્યાભિષેચનમ્ ॥ 9 ॥
ઉપસ્થાનમનુજ્ઞાપ્ય પ્રવિવેશ નિવેશનમ્ ।
અદ્ય રામાભિષેકો વૈ પ્રસિદ્ધ ઇતિ જજ્ઞિવાન્ ॥ 10 ॥
પ્રિયાર્હાં પ્રિયમાખ્યાતું વિવેશાન્તઃપુરં વશી ।
સ કૈકેય્યા ગૃહં શ્રેષ્ઠં પ્રવિવેશ મહાયશાઃ ॥ 11 ॥
પાણ્ડુરાભ્રમિવાકાશં રાહુયુક્તં નિશાકરઃ ।
શુકબર્હિણસઙ્ઘુષ્ટં ક્રૌઞ્ચહંસરુતાયુતમ્ ॥ 12 ॥
વાદિત્રરવસઙ્ઘુષ્ટં કુબ્જા વામનિકાયુતમ્ ।
લતાગૃહૈશ્ચિત્રગૃહૈશ્ચમ્પકાશોકશોભિતૈઃ ॥ 13 ॥
દાન્તરાજતસૌવર્ણવેદિકાભિ સ્સમાયુતમ્ ।
નિત્યપુષ્પફલૈર્વૃક્ષૈર્વાપીભિશ્ચોપશોભિતમ્ ॥ 14 ॥
દાન્તરજતસૌવર્ણૈસ્સંવૃતં પરમાસનૈઃ ।
વિવિધૈરન્નપાનૈશ્ચ ભક્ષ્યૈશ્ચ વિવિધૈરપિ ॥ 15 ॥
ઉપપન્નં મહાર્હૈશ્ચ ભૂષિતૈસ્ત્રિદિવોપમમ્ ।
તત્પ્રવિશ્ય મહારાજસ્સ્વમન્તઃ પુરમૃદ્ધિમત્ ॥ 16 ॥
ન દદર્શ પ્રિયાં રાજા કૈકેયીં શયનોત્તમે ।
કામબલસંયુક્તો રત્યર્થં મનુજાધિપઃ ॥ 17 ॥
અપશ્યન્દયિતાં ભાર્યાં પપ્રચ્છ વિષસાદ ચ ।
ન હિ તસ્ય પુરા દેવી તાં વેલામત્યવર્તત ॥ 18 ॥
ન ચ રાજા ગૃહં શૂન્યં પ્રવિવેશ કદાચન ।
તતો ગૃહગતો રાજા કૈકેયીં પર્યપૃચ્છત ॥ 19 ॥
યથા પૂર્વમવિજ્ઞાય સ્વાર્થલિપ્સુમપણ્ડિતામ્ ।
પ્રતીહારી ત્વથોવાચ સન્ત્રસ્તા સુકૃતાઞ્જલિઃ ॥ 20 ॥
દેવ દેવી ભૃશં કૃદ્ધા ક્રોધાગારમભિદૃતા ।
પ્રતીહાર્યા વચશ્શૃત્વા રાજા પરમદુર્મનાઃ ॥ 21 ॥
વિષસાદ પુનર્ભૂયો લુલિતવ્યાકુલેન્દ્રિયઃ ।
તત્ર તાં પતિતાં ભૂમૌ શયાનામતથોચિતામ્ ॥ 22 ॥
પ્રતપ્ત ઇવ દુઃખેન સોઽપશ્યજ્જગતીપતિઃ ।
સ વૃદ્ધસ્તરુણીં ભાર્યાં પ્રાણેભ્યોપિ ગરીયસીમ્ ॥ 23 ॥
અપાપઃ પાપસઙ્કલ્પાં દદર્શ ધરણીતલે ।
લતામિવ વિનિષ્કૃત્તાં પતિતાં દેવતામિવ ॥ 24 ॥
કિન્નરીમિવ નિર્ધૂતાં ચ્યુતામપ્સરસં યથા ।
માયામિવ પરિભ્રષ્ટાં હરિણીમિવ સંયતામ્ ॥ 25 ॥
કરેણુમિવ દિગ્ધેન વિદ્ધાં મૃગયુના વને ।
મહાગજ ઇવારણ્યે સ્નેહાત્પરિમમર્શ તામ્ ॥ 26 ॥
પરિમૃશ્ય ચ પાણિભ્યામભિસન્ત્રસ્તચેતનઃ ।
કામી કમલપત્રાક્ષીમુવાચ વનિતામિદમ્ ॥ 27 ॥
ન તેઽહમભિજાનામિ ક્રોધમાત્મનિ સંશ્રિતમ્ ।
દેવિ કેનાભિશપ્તાઽસિ કેન વાઽસિ વિમાનિતા ॥ 28 ॥
યદિદં મમ દુઃખાય શેષે કલ્યાણિ પાંસુષુ ।
ભૂમૌ શેષે કિમર્થં ત્વં મયિ કલ્યાણચેતસિ ॥ 29 ॥
ભૂતોપહતચિત્તેવ મમ ચિત્તપ્રમાથિની ।
સન્તિ મે કુશલા વૈદ્યાસ્ત્વભિતુષ્ટાશ્ચ સર્વશઃ ॥ 30 ॥
સુખિતાં ત્વાં કરિષ્યન્તિ વ્યાધિમાચક્ષ્વ ભામિની ।
કસ્ય વા તે પ્રિયં કાર્યં કેન વા વિપ્રિયં કૃતમ્ ॥ 31 ॥
કઃ પ્રિયં લભતામદ્ય કો વા સુમહદપ્રિયમ્ ।
મા રોદીર્મા ચ કાર્ષીસ્ત્વં દેવિ સમ્પરિશોષણમ્ ॥ 32 ॥
અવધ્યો વધ્યતાં કો વા કો વા વધ્યો વિમુચ્યતામ્ ।
દરિદ્રઃ કો ભવત્વાઢ્યો દ્રવ્યવાન્વાઽપ્યકિઞ્ચનઃ ॥ 33 ॥
અહં ચૈવ મદીયાશ્ચ સર્વે તવ વશાનુગાઃ ।
ન તે કિઞ્ચિદભિપ્રાયં વ્યાહન્તુમહમુત્સહે ॥ 34 ॥
આત્મનો જીવિતેનાપિ બ્રૂહિ યન્મનસેચ્છસિ ।
બલમાત્મનિ જાનન્તી ન માં શઙ્કિતુમર્હસિ ॥ 35 ॥
કરિષ્યામિ તવ પ્રીતિં સુકૃતેનાપિ તે શપે ।
યાવદાવર્તતે ચક્રં તાવતી મે વસુન્ધરા ॥ 36 ॥
પ્રાચીનાસ્સિન્ધુસૌવીરા સ્સૌરાષ્ટ્રા દક્ષિણાપથાઃ ।
વઙ્ગાઙ્ગમગધાઃ મત્સ્યાઃ સમૃદ્ધા કાશિકોસલાઃ ॥ 37 ॥
તત્ર જાતં બહુ દ્રવ્યં ધનધાન્યમજાવિકમ્ ।
તતો વૃણીષ્વ કૈકેયિ યદ્યત્ત્વં મનસેચ્છસિ ॥ 38 ॥
કિમાયાસેન તે ભીરુ ઉત્તિષ્ઠોત્તિષ્ઠ શોભને ।
તત્ત્વં મે બ્રૂહિ કૈકેયિ યતસ્તે ભયમાગતમ્ ॥ 39 ॥
તત્તે વ્યપનયિષ્યામિ નીહારમિવ રશ્મિવાન્ ।
તથોક્તા સા સમાશ્વસ્તા વક્તુકામા તદપ્રિયમ્ ॥ 40 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાણ્ડે દશમસ્સર્ગઃ ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha daśamassargaḥ |
vidarśitā yadā devī kubjayā pāpayā bhṛśam |
tadā śete sma sā bhūmau digdhaviddheva kinnarī || 1 ||
niścitya manasā kṛtyaṃ sā samyagiti bhāminī |
mantharāyai śanaissarvamācacakṣe vicakṣaṇā || 2 ||
sā dīnā niścayaṃ kṛtvā mantharāvākyamohitā |
nāgakanyeva niśvasya dīrghamuṣṇaṃ ca bhāminī || 3 ||
muhūrtaṃ cintayāmāsa mārgamātmasukhāvaham |
sā suhṛccārthakāmā ca taṃ niśamya suniścayam || 4 ||
babhūva paramaprītā sidhdiṃ prāpyeva mantharā |
atha sā ruṣitā devī samyakkṛtvā viniścayam || 5 ||
saṃviveśābalā bhūmau niveśya bhṛkuṭīṃ mukhe |
tataścitrāṇi mālyāni divyānyābharaṇāni ca || 6 ||
apaviddhāni kaikeyyā tāni bhūmiṃ prapedire |
tayā tānyapaviddhāni mālyānyābharaṇāni ca || 7 ||
aśobhayanta vasudhāṃ nakṣatrāṇi yathā nabhaḥ |
krodhāgāre nipatitā sā babhau malināmbarā || 8 ||
ekaveṇīṃ dṛḍhaṃ badvā gatasattveva kinnarī |
ājñāpya ca mahārājo rāghavasyābhiṣecanam || 9 ||
upasthānamanujñāpya praviveśa niveśanam |
adya rāmābhiṣeko vai prasiddha iti jajñivān || 10 ||
priyārhāṃ priyamākhyātuṃ viveśāntaḥpuraṃ vaśī |
sa kaikeyyā gṛhaṃ śreṣṭhaṃ praviveśa mahāyaśāḥ || 11 ||
pāṇḍurābhramivākāśaṃ rāhuyuktaṃ niśākaraḥ |
śukabarhiṇasaṅghuṣṭaṃ krauñcahaṃsarutāyutam || 12 ||
vāditraravasaṅghuṣṭaṃ kubjā vāmanikāyutam |
latāgṛhaiścitragṛhaiścampakāśokaśobhitaiḥ || 13 ||
dāntarājatasauvarṇavedikābhi ssamāyutam |
nityapuṣpaphalairvṛkṣairvāpībhiścopaśobhitam || 14 ||
dāntarajatasauvarṇaissaṃvṛtaṃ paramāsanaiḥ |
vividhairannapānaiśca bhakṣyaiśca vividhairapi || 15 ||
upapannaṃ mahārhaiśca bhūṣitaistridivopamam |
tatpraviśya mahārājassvamantaḥ puramṛddhimat || 16 ||
na dadarśa priyāṃ rājā kaikeyīṃ śayanottame |
kāmabalasaṃyukto ratyarthaṃ manujādhipaḥ || 17 ||
apaśyandayitāṃ bhāryāṃ papraccha viṣasāda ca |
na hi tasya purā devī tāṃ velāmatyavartata || 18 ||
na ca rājā gṛhaṃ śūnyaṃ praviveśa kadācana |
tato gṛhagato rājā kaikeyīṃ paryapṛcchata || 19 ||
yathā pūrvamavijñāya svārthalipsumapaṇḍitām |
pratīhārī tvathovāca santrastā sukṛtāñjaliḥ || 20 ||
deva devī bhṛśaṃ kṛddhā krodhāgāramabhidṛtā |
pratīhāryā vacaśśṛtvā rājā paramadurmanāḥ || 21 ||
viṣasāda punarbhūyo lulitavyākulendriyaḥ |
tatra tāṃ patitāṃ bhūmau śayānāmatathocitām || 22 ||
pratapta iva duḥkhena so'paśyajjagatīpatiḥ |
sa vṛddhastaruṇīṃ bhāryāṃ prāṇebhyopi garīyasīm || 23 ||
apāpaḥ pāpasaṅkalpāṃ dadarśa dharaṇītale |
latāmiva viniṣkṛttāṃ patitāṃ devatāmiva || 24 ||
kinnarīmiva nirdhūtāṃ cyutāmapsarasaṃ yathā |
māyāmiva paribhraṣṭāṃ hariṇīmiva saṃyatām || 25 ||
kareṇumiva digdhena viddhāṃ mṛgayunā vane |
mahāgaja ivāraṇye snehātparimamarśa tām || 26 ||
parimṛśya ca pāṇibhyāmabhisantrastacetanaḥ |
kāmī kamalapatrākṣīmuvāca vanitāmidam || 27 ||
na te'hamabhijānāmi krodhamātmani saṃśritam |
devi kenābhiśaptā'si kena vā'si vimānitā || 28 ||
yadidaṃ mama duḥkhāya śeṣe kalyāṇi pāṃsuṣu |
bhūmau śeṣe kimarthaṃ tvaṃ mayi kalyāṇacetasi || 29 ||
bhūtopahatacitteva mama cittapramāthinī |
santi me kuśalā vaidyāstvabhituṣṭāśca sarvaśaḥ || 30 ||
sukhitāṃ tvāṃ kariṣyanti vyādhimācakṣva bhāminī |
kasya vā te priyaṃ kāryaṃ kena vā vipriyaṃ kṛtam || 31 ||
kaḥ priyaṃ labhatāmadya ko vā sumahadapriyam |
mā rodīrmā ca kārṣīstvaṃ devi sampariśoṣaṇam || 32 ||
avadhyo vadhyatāṃ ko vā ko vā vadhyo vimucyatām |
daridraḥ ko bhavatvāḍhyo dravyavānvā'pyakiñcanaḥ || 33 ||
ahaṃ caiva madīyāśca sarve tava vaśānugāḥ |
na te kiñcidabhiprāyaṃ vyāhantumahamutsahe || 34 ||
ātmano jīvitenāpi brūhi yanmanasecchasi |
balamātmani jānantī na māṃ śaṅkitumarhasi || 35 ||
kariṣyāmi tava prītiṃ sukṛtenāpi te śape |
yāvadāvartate cakraṃ tāvatī me vasundharā || 36 ||
prācīnāssindhusauvīrā ssaurāṣṭrā dakṣiṇāpathāḥ |
vaṅgāṅgamagadhāḥ matsyāḥ samṛddhā kāśikosalāḥ || 37 ||
tatra jātaṃ bahu dravyaṃ dhanadhānyamajāvikam |
tato vṛṇīṣva kaikeyi yadyattvaṃ manasecchasi || 38 ||
kimāyāsena te bhīru uttiṣṭhottiṣṭha śobhane |
tattvaṃ me brūhi kaikeyi yataste bhayamāgatam || 39 ||
tatte vyapanayiṣyāmi nīhāramiva raśmivān |
tathoktā sā samāśvastā vaktukāmā tadapriyam || 40 ||
ityārṣe śrīmadrāmāyaṇe vālmīkīya ādikāvye ayodhyākāṇḍe daśamassargaḥ ||
InfoLyter.in — Sacred Vedic Knowledge Portal · Free forever