Vishnu Padadi Keshanta Varnana Stotram

ॐ

વિષ્ણુ પાદાદિ કેશાન્ત વર્ણન સ્તોત્રં

Vishnu Stotram Gujarati

લક્ષ્મીભર્તુર્ભુજાગ્રે કૃતવસતિ સિતં યસ્ય રૂપં વિશાલં

નીલાદ્રેસ્તુઙ્ગશૃઙ્ગસ્થિતમિવ રજનીનાથબિમ્બં વિભાતિ ।

પાયાન્નઃ પાઞ્ચજન્યઃ સ દિતિસુતકુલત્રાસનૈઃ પૂરયન્સ્વૈ-

-ર્નિધ્વાનૈર્નીરદૌઘધ્વનિપરિભવદૈરમ્બરં કમ્બુરાજઃ ॥ 1 ॥

આહુર્યસ્ય સ્વરૂપં ક્ષણમુખમખિલં સૂરયઃ કાલમેતં

ધ્વાન્તસ્યૈકાન્તમન્તં યદપિ ચ પરમં સર્વધામ્નાં ચ ધામ ।

ચક્રં તચ્ચક્રપાણેર્દિતિજતનુગલદ્રક્તધારાક્તધારં

શશ્વન્નો વિશ્વવન્દ્યં વિતરતુ વિપુલં શર્મ ધર્માંશુશોભમ્ ॥ 2 ॥

અવ્યાન્નિર્ઘાતઘોરો હરિભુજપવનામર્શનાધ્માતમૂર્તે-

-રસ્માન્વિસ્મેરનેત્રત્રિદશનુતિવચઃસાધુકારૈઃ સુતારઃ ।

સર્વં સંહર્તુમિચ્છોરરિકુલભુવન સ્ફારવિષ્ફારનાદઃ

સંયત્કલ્પાન્તસિન્ધૌ શરસલિલઘટાવાર્મુચઃ કાર્મુકસ્ય ॥ 3 ॥

જીમૂતશ્યામભાસા મુહુરપિ ભગવદ્બાહુના મોહયન્તી

યુદ્ધેષૂદ્ધૂયમાના ઝટિતિ તટિદિવાલક્ષ્યતે યસ્ય મૂર્તિઃ ।

સોઽસિસ્ત્રાસાકુલાક્ષત્રિદશરિપુવપુઃશોણિતાસ્વાદતૃપ્તો

નિત્યાનન્દાય ભૂયાન્મધુમથનમનોનન્દનો નન્દકો નઃ ॥ 4 ॥

કમ્રાકારા મુરારેઃ કરકમલતલેનાનુરાગાદ્ગૃહીતા

સમ્યગ્વૃત્તા સ્થિતાગ્રે સપદિ ન સહતે દર્શનં યા પરેષામ્ ।

રાજન્તી દૈત્યજીવાસવમદમુદિતા લોહિતાલેપનાર્દ્રા

કામં દીપ્તાંશુકાન્તા પ્રદિશતુ દયિતેવાસ્ય કૌમોદકી નઃ ॥ 5 ॥

યો વિશ્વપ્રાણભૂતસ્તનુરપિ ચ હરેર્યાનકેતુસ્વરૂપો

યં સઞ્ચિન્ત્યૈવ સદ્યઃ સ્વયમુરગવધૂવર્ગગર્ભાઃ પતન્તિ ।

ચઞ્ચચ્ચણ્ડોરુતુણ્ડત્રુટિતફણિવસારક્તપઙ્કાઙ્કિતસ્યં

વન્દે છન્દોમયં તં ખગપતિમમલસ્વર્ણવર્ણં સુપર્ણમ્ ॥ 6 ॥

વિષ્ણોર્વિશ્વેશ્વરસ્ય પ્રવરશયનકૃત્સર્વલોકૈકધર્તા

સોઽનન્તઃ સર્વભૂતઃ પૃથુવિમલયશાઃ સર્વવેદૈશ્ચ વેદ્યઃ ।

પાતા વિશ્વસ્ય શશ્વત્સકલસુરરિપુધ્વંસનઃ પાપહન્તા

સર્વજ્ઞઃ સર્વસાક્ષી સકલવિષભયાત્પાતુ ભોગીશ્વરો નઃ ॥ 7 ॥

વાગ્ભૂગૈર્યાદિભેદૈર્વિદુરિહ મુનયો યાં યદીયૈશ્ચ પુંસાં

કારુણ્યાર્દ્રૈઃ કટાક્ષૈઃ સકૃદપિ પતિતૈઃ સમ્પદઃ સ્યુઃ સમગ્રાઃ ।

કુન્દેન્દુસ્વચ્છમન્દસ્મિતમધુરમુખામ્ભોરુહાં સુન્દરાઙ્ગીં

વન્દે વન્દ્યામશેષૈરપિ મુરભિદુરોમન્દિરામિન્દિરાં તામ્ ॥ 8 ॥

યા સૂતે સત્ત્વજાલં સકલમપિ સદા સન્નિધાનેન પુંસો

ધત્તે યા તત્ત્વયોગાચ્ચરમચરમિદં ભૂતયે ભૂતજાતમ્ ।

ધાત્રીં સ્થાત્રીં જનિત્રીં પ્રકૃતિમવિકૃતિં વિશ્વશક્તિં વિધાત્રીં

વિષ્ણોર્વિશ્વાત્મનસ્તાં વિપુલગુણમયીં પ્રાણનાથાં પ્રણૌમિ ॥ 9 ॥

યેભ્યોઽસૂયદ્ભિરુચ્ચૈઃ સપદિ પદમુરુ ત્યજ્યતે દૈત્યવર્ગૈ-

-ર્યેભો ધર્તું ચ મૂર્ધ્ના સ્પૃહયતિ સતતં સર્વગીર્વાણવર્ગઃ ।

નિત્યં નિર્મૂલયેયુર્નિચિતતરમમી ભક્તિનિઘ્નાત્મનાં નઃ

પદ્માક્ષસ્યાઙ્ઘ્રિપદ્મદ્વયતલનિલયાઃ પાંસવઃ પાપપઙ્કમ્ ॥ 10 ॥

રેખા લેખાદિવન્દ્યાશ્ચરણતલગતાશ્ચક્રમત્સ્યાદિરૂપાઃ

સ્નિગ્ધાઃ સૂક્ષ્માઃ સુજાતા મૃદુલલિતતરક્ષૌમસૂત્રાયમાણાઃ ।

દદ્યુર્નો મઙ્ગલાનિ ભ્રમરભરજુષા કોમલેનાબ્ધિજાયાઃ

કમ્રેણામ્રેડ્યમાનાઃ કિસલયમૃદુના પાણિના ચક્રપાણેઃ ॥ 11 ॥

યસ્માદાક્રામતો દ્યાં ગરુડમણિશિલાકેતુદણ્ડાયમાના

દાશ્ચ્યોતન્તી બભાસે સુરસરિદમલા વૈજયન્તીવ કાન્તા ।

ભૂમિષ્ઠો યસ્તથાન્યો ભુવનગૃહબૃહત્‍સ્તમ્ભશોભાં દધૌ નઃ

પાતામેતૌ પાયોજોદરલલિતતલૌ પઙ્કજાક્ષસ્ય પાદૌ ॥ 12 ॥

આક્રામદ્ભ્યાં ત્રિલોકીમસુરસુરપતી તત્ક્ષણાદેવ નીતૌ

યાભ્યાં વૈરોચનીન્દ્રૌ યુગપદપિ વિપત્સમ્પદોરેકધામઃ ।

તાભ્યાં તામ્રોદરાભ્યાં મુહુરહમજિતસ્યાઞ્ચિતાભ્યામુભાભ્યાં

પ્રાજ્યૈશ્વર્યપ્રદાભ્યાં પ્રણતિમુપગતઃ પાદપઙ્કેરુહાભ્યામ્ ॥ 13 ॥

યેભ્યો વર્ણશ્ચતુર્થશ્ચરમત ઉદભૂદાદિસર્ગે પ્રજાનાં

સાહસ્રી ચાપિ સઙ્ખ્યા પ્રકટમભિહિતા સર્વવેદેષુ યેષામ્ ।

પ્રાપ્તા વિશ્વમ્ભરા યૈરતિવિતતતનોર્વિશ્વમૂર્તેર્વિરાજો

વિષ્ણોસ્તેભ્યો મહદ્ભ્યઃ સતતમપિ નમોઽસ્ત્વઙ્ઘ્રિપઙ્કેરુહેભ્યઃ ॥ 14 ॥

વિષ્ણોઃ પાદદ્વયાગ્રે વિમલનખમણિભ્રાજિતા રાજતે યા

રાજીવસ્યેવ રમ્યા હિમજલકણિકાલઙ્કૃતાગ્રા દલાલી ।

અસ્માકં વિસ્મયાર્હાણ્યખિલજનમન પ્રાર્થનીયા હિ સેયં

દદ્યાદાદ્યાનવદ્યા તતિરતિરુચિરા મઙ્ગલાન્યઙ્ગુલીનામ્ ॥ 15 ॥

યસ્યાં દૃષ્ટ્વામલાયાં પ્રતિકૃતિમમરાઃ સમ્ભવન્ત્યાનમન્તઃ

સેન્દ્રાઃ સાન્દ્રીકૃતેર્ષ્યાસ્ત્વપરસુરકુલાશઙ્કયાતઙ્કવન્તઃ ।

સા સદ્યઃ સાતિરેકાં સકલસુખકરીં સમ્પદં સાધયેન્ન-

-શ્ચઞ્ચચ્ચાર્વંશુચક્રા ચરણનલિનયોશ્ચક્રપાણેર્નખાલી ॥ 16 ॥

પાદામ્ભોજન્મસેવાસમવનતસુરવ્રાતભાસ્વત્કિરીટ-

-પ્રત્યુપ્તોચ્ચાવચાશ્મપ્રવરકરગણૈશ્ચિન્તિતં યદ્વિભાતિ ।

નમ્રાઙ્ગાનાં હરેર્નો હરિદુપલમહાકૂર્મસૌન્દર્યહારિ-

-ચ્છાયં શ્રેયઃપ્રદાયિ પ્રપદયુગમિદં પ્રાપયેત્પાપમન્તમ્ ॥ 17 ॥

શ્રીમત્યૌ ચારુવૃત્તે કરપરિમલનાનન્દહૃષ્ટે રમાયાઃ

સૌન્દર્યાઢ્યેન્દ્રનીલોપલરચિતમહાદણ્ડયોઃ કાન્તિચોરે ।

સૂરીન્દ્રૈઃ સ્તૂયમાને સુરકુલસુખદે સૂદિતારાતિસઙ્ઘે

જઙ્ઘે નારાયણીયે મુહુરપિ જયતામસ્મદંહો હરન્ત્યૌ ॥ 18 ॥

સમ્યક્સાહ્યં વિધાતું સમમિવ સતતં જઙ્ઘયોઃ ખિન્નયોર્યે

ભારીભૂતોરુદણ્ડદ્વયભરણકૃતોત્તમ્ભભાવં ભજેતે ।

ચિત્તાદર્શં નિધાતું મહિતમિવ સતાં તે સમુદ્રાયમાને

વૃત્તાકારે વિધત્તાં હ્યદિ મુદમજિતસ્યાનિશં જાનુની નઃ ॥ 19 ॥

દેવો ભીતિં વિધાતુઃ સપદિ વિદધતૌ કૈટભાખ્યં મધું ચા-

-પ્યારોપ્યારૂઢગર્વાવધિજલધિ યયોરાદિદૈત્યૌ જઘાન ।

વૃત્તાવન્યોન્યતુલ્યૌ ચતુરમુપચયં બિભ્રતાવભ્રનીલા-

-વૂરૂ ચારૂ હરેસ્તૌ મુદમતિશયિનીં માનસે નો વિધત્તામ્ ॥ 20 ॥

પીતેન દ્યોતતે યચ્ચતુરપરિહિતેનામ્બરેણાત્યુદારં

જાતાલઙ્કારયોગં જલમિવ જલધેર્બાડબાગ્નિપ્રભાભિઃ ।

એતત્પાતિત્યદાન્નો જઘનમતિઘનાદેનસો માનનીયં

સાતત્યેનૈવ ચેતોવિષયમવતરત્પાતુ પીતામ્બરસ્ય ॥ 21 ॥

યસ્યા દામ્ના ત્રિધામ્નો જઘનકલિતયા ભ્રાજતેઽઙ્ગં યથાબ્ધે-

-ર્મધ્યસ્થો મન્દરાદ્રિર્ભુજગપતિમહાભોગસન્નદ્ધમધ્યઃ ।

કાઞ્ચી સા કાઞ્ચનાભા મણિવરકિરણૈરુલ્લસદ્ભિઃ પ્રદીપ્તા

કલ્યાં કલ્યાણદાત્રીં મમ મતિમનિશં કમ્રરૂપાં કરોતુ ॥ 22 ॥

ઉન્નમ્રં કમ્રમુચ્ચૈરુપચિતમુદભૂદ્યત્ર પત્રૈર્વિચિત્રૈઃ

પૂર્વં ગીર્વાણપૂજ્યં કમલજમધુપસ્યાસ્પદં તત્પયોજમ્ ।

યસ્મિન્નીલાશ્મનીલૈસ્તરલરુચિજલૈઃ પૂરિતે કેલિબુદ્ધ્યા

નાલીકાક્ષસ્ય નાભીસરસિ વસતુ નશ્ચિત્તહંસશ્ચિરાય ॥ 23 ॥

પાતાલં યસ્ય નાલં વલયમપિ દિશાં પત્રપઙ્ક્તીર્નગેન્દ્રા-

-ન્વિદ્વાંસઃ કેસરાલીર્વિદુરિહ વિપુલાં કર્ણિકાં સ્વર્ણશૈલમ્ ।

ભૂયાદ્ગાયત્સ્વયમ્ભૂમધુકરભવનં ભૂમયં કામદં નો

નાલીકં નાભિપદ્માકરભવમુરુ તન્નાગશય્યસ્ય શૌરેઃ ॥ 24 ॥

આદૌ કલ્પસ્ય યસ્માત્પ્રભવતિ વિતતં વિશ્વમેતદ્વિકલ્પૈઃ

કલ્પાન્તે યસ્ય ચાન્ત પ્રવિશતિ સકલં સ્થાવરં જઙ્ગમં ચ ।

અત્યન્તાચિન્ત્યમૂર્તેશ્ચિરતરમજિતસ્યાન્તરિક્ષસ્વરૂપે

તસ્મિન્નસ્માકમન્તઃકરણમતિમુદા ક્રીડતાત્ક્રોડભાગે ॥ 25 ॥

કાન્ત્યમ્ભઃપૂરપૂર્ણે લસદસિતવલીભઙ્ગભાસ્વત્તરઙ્ગે

ગમ્ભીરાકારનાભીચતુરતરમહાવર્તશોભિન્યુદારે ।

ક્રીડત્વાનદ્વહેમોદરનહનમહાબાડબાગ્નિપ્રભાઢ્યે

કામં દામોદરીયોદરસલિલનિધૌ ચિત્તમત્સ્યશ્ચિરં નઃ ॥ 26 ॥

નાભીનાલીકમૂલાદધિકપરિમલોન્મોહિતાનામલીનાં

માલા નીલેવ યાન્તી સ્ફુરતિ રુચિમતી વક્ત્રપદ્મોન્મુખી યા ।

રમ્યા સા રોમરાજિર્મહિતરુચિકરી મધ્યભાગસ્ય વિષ્ણો-

-શ્ચિત્તસ્થા મા વિરંસીચ્ચિરતરમુચિતાં સાધયન્તી શ્રિયં નઃ ॥ 27 ॥

સંસ્તીર્ણં કૌસ્તુભાંશુપ્રસરકિસલયૈર્મુગ્ધમુક્તાફલાઢ્યં

શ્રીવત્સોલ્લાસિ ફુલ્લપ્રતિનવવનમાલાઙ્કિ રાજદ્ભુજાન્તમ્ ।

વક્ષઃ શ્રીવૃક્ષકાન્તં મધુકરનિકરશ્યામલં શાર્ઙ્ગપાણેઃ

સંસારાધ્વશ્રમાર્તૈરુપવનમિવ યત્સેવિતં તત્પ્રપદ્યે ॥ 28 ॥

કાન્તં વક્ષો નિતાન્તં વિદધદિવ ગલં કાલિમા કાલશત્રો-

-રિન્દોર્બિમ્બં યથાઙ્કો મધુપ ઇવ તરોર્મઞ્જરીં રાજતે યઃ ।

શ્રીમાન્નિત્યં વિધેયાદવિરલમિલિતઃ કૌસ્તુભશ્રીપ્રતાનૈઃ

શ્રીવત્સઃ શ્રીપતેઃ સ શ્રિય ઇવ દયિતો વત્સ ઉચ્ચૈઃશ્રિયં નઃ ॥ 29 ॥

સમ્ભૂયામ્ભોધિમધ્યાત્સપદિ સહજયા યઃ શ્રિયા સન્નિધત્તે

નીલે નારાયણોરઃસ્થલગગનતલે હારતારોપસેવ્યે ।

આશાઃ સર્વાઃ પ્રકાશા વિદધદપિદધચ્ચાત્મભાસાન્યતેજા-

-સ્યાશ્ચર્યસ્યાકરો નો દ્યુમણિરિવ મણિઃ કૌસ્તુભઃ સોઽસ્તુભૂત્યૈ ॥ 30 ॥

યા વાયાવાનુકૂલ્યાત્સરતિ મણિરુચા ભાસમાના સમાના

સાકં સાકમ્પમંસે વસતિ વિદધતી વાસુભદ્રં સુભદ્રમ્ ।

સારં સારઙ્ગસઙ્ઘૈર્મુખરિતકુસુમા મેચકાન્તા ચ કાન્તા

માલા માલાલિતાસ્માન્ન વિરમતુ સુખૈર્યોજયન્તી જયન્તી ॥ 31 ॥

હારસ્યોરુપ્રભાભિઃ પ્રતિનવવનમાલાશુભિઃ પ્રાંશુરૂપૈઃ

શ્રીભિશ્ચાપ્યઙ્ગદાનાં કબલિતરુચિ યન્નિષ્કભાભિશ્ચ ભાતિ ।

બાહુલ્યેનૈવ બદ્ધાઞ્જલિપુટમજિતસ્યાભિયાચામહે ત-

-દ્વન્ધાર્તિં બાધતાં નો બહુવિહતિકરીં બન્ધુરં બાહુમૂલમ્ ॥ 32 ॥

વિશ્વત્રાણૈકદીક્ષાસ્તદનુગુણગુણક્ષત્રનિર્માણદક્ષાઃ

કર્તારો દુર્નિરૂપસ્ફુટગુણયશસા કર્મણામદ્ભુતાનામ્ ।

શાર્ઙ્ગં બાણં કૃપાણં ફલકમરિગદે પદ્મશઙ્ખૌ સહસ્રં

બિભ્રાણાઃ શસ્ત્રજાલં મમ દધતુ હરેર્બાહવો મોહહાનિમ્ ॥ 33 ॥

કણ્ઠાકલ્પોદ્ગતૈર્યઃ કનકમયલસત્કુણ્ડલોત્થૈરુદારૈ-

-રુદ્યોતૈઃ કૌસ્તુભસ્યાપ્યુરુભિરુપચિતશ્ચિત્રવર્ણો વિભાતિ ।

કણ્ઠાશ્લેષે રમાયાઃ કરવલયપદૈર્મુદ્રિતે ભદ્રરૂપે

વૈકુણ્ઠીયેઽત્ર કણ્ઠે વસતુ મમ મતિઃ કુણ્ઠભાવં વિહાય ॥ 34 ॥

પદ્માનન્દપ્રદાતા પરિલસદરુણશ્રીપરીતાગ્રભાગઃ

કાલે કાલે ચ કમ્બુપ્રવરશશધરાપૂરણે યઃ પ્રવીણઃ ।

વક્ત્રાકાશાન્તરસ્થસ્તિરયતિ નિતરાં દન્તતારૌઘશોભાં

શ્રીભર્તુર્દન્તવાસોદ્યુમણિરઘતમોનાશનાયાસ્ત્વસૌ નઃ ॥ 35 ॥

નિત્યં સ્નેહાતિરેકાન્નિજકમિતુરલં વિપ્રયોગાક્ષમા યા

વક્ત્રેન્દોરન્તરાલે કૃતવસતિરિવાભાતિ નક્ષત્રરાજિઃ ।

લક્ષ્મીકાન્તસ્ય કાન્તાકૃતિરતિવિલસન્મુગ્ધમુક્તાવલિશ્રી-

-ર્દન્તાલી સન્તતં સા નતિનુતિનિરતાનક્ષતાન્રક્ષતાન્નઃ ॥ 36 ॥

બ્રહ્મન્બ્રહ્મણ્યજિહ્માં મતિમપિ કુરુષે દેવ સમ્ભાવયે ત્વાં

શમ્ભો શક્ર ત્રિલોકીમવસિ કિમમરૈર્નારદાદ્યાઃ સુખં વઃ ।

ઇત્થં સેવાવનમ્રં સુરમુનિનિકરં વીક્ષ્ય વિષ્ણોઃ પ્રસન્ન-

-સ્યાસ્યેન્દોરાસ્રવન્તી વરવચનસુધાહ્લાદયેન્માનસં નઃ ॥ 37 ॥

કર્ણસ્થસ્વર્ણકમ્રોજ્જ્વલમકરમહાકુણ્ડલપ્રોતદીપ્ય-

-ન્માણિક્યશ્રીપ્રતાનૈઃ પરિમિલિતમલિશ્યામલં કોમલં યત્ ।

પ્રોદ્યત્સૂર્યાંશુરાજન્મરકતમુકુરાકારચોરં મુરારે-

-ર્ગાઢામાગામિનીં નઃ શમયતુ વિપદં ગણ્ડયોર્મણ્ડલં તત્ ॥ 38 ॥

વક્ત્રામ્ભોજે લસન્તં મુહુરધરમણિં પક્વબિમ્બાભિરામં

દૃષ્ટ્વા દ્રષ્ટું શુકસ્ય સ્ફુટમવતરતસ્તુણ્ડદણ્ડાયતે યઃ ।

ઘોણઃ શોણીકૃતાત્મા શ્રવણયુગલસત્કુણ્ડલોસ્રૈર્મુરારેઃ

પ્રાણાખ્યસ્યાનિલસ્ય પ્રસરણસરણિઃ પ્રાણદાનાય નઃ સ્યાત્ ॥ 39 ॥

દિક્કાલૌ વેદયન્તૌ જગતિ મુહુરિમૌ સઞ્ચરન્તૌ રવીન્દૂ

ત્રૈલોક્યાલોકદીપાવભિદધતિ યયોરેવ રૂપં મુનીન્દ્રાઃ ।

અસ્માનબ્જપ્રભે તે પ્રચુરતરકૃપાનિર્ભરં પ્રેક્ષમાણે

પાતામાતામ્રશુક્લાસિતરુચિરુચિરે પદ્મનેત્રસ્ય નેત્રે ॥ 40 ॥

પાતાત્પાતાલપાતાત્પતગપતિગતેર્ભ્રૂયુગં ભુગ્નમધ્યં

યેનેષચ્ચાલિતેન સ્વપદનિયમિતાઃ સાસુરા દેવસઙ્ઘાઃ ।

નૃત્યલ્લાલાટરઙ્ગે રજનિકરતનોરર્ધખણ્ડાવદાતે

કાલવ્યાલદ્વયં વા વિલસતિ સમયા વાલિકામાતરં નઃ ॥ 41 ॥

લક્ષ્માકારાલકાલિસ્ફુરદલિકશશાઙ્કાર્ધસન્દર્શમીલ-

-ન્નેત્રામ્ભોજપ્રબોધોત્સુકનિભૃતતરાલીનભૃઙ્ગચ્છટાભે ।

લક્ષ્મીનાથસ્ય લક્ષ્યીકૃતવિબુધગણાપાઙ્ગબાણાસનાર્ધ-

-ચ્છાયે નો ભૂરિભૂતિપ્રસવકુશલતે ભ્રૂલતે પાલયેતામ્ ॥ 42 ॥

રૂક્ષસ્મારેક્ષુચાપચ્યુતશરનિકરક્ષીણલક્ષ્મીકટાક્ષ-

-પ્રોત્ફુલ્લત્પદ્મમાલાવિલસિતમહિતસ્ફાટિકૈશાનલિઙ્ગમ્ ।

ભૂયાદ્ભૂયો વિભૂત્યૈ મમ ભુવનપતેર્ભ્રૂલતાદ્વન્દ્વમધ્યા-

-દુત્થં તત્પુણ્ડ્રમૂર્ધ્વં જનિમરણતમઃખણ્ડનં મણ્ડનં ચ ॥ 43 ॥

પીઠીભૂતાલકાન્તે કૃતમકુટમહાદેવલિઙ્ગપ્રતિષ્ઠે

લાલાટે નાટ્યરઙ્ગે વિકટતરતટે કૈટભારેશ્ચિરાય ।

પ્રોદ્ધાટ્યૈવાત્મતન્દ્રીપ્રકટપટકુટીં પ્રસ્ફુરન્તીં સ્ફુટાઙ્ગં

પટ્વીયં ભાવનાખ્યાં ચટુલમતિનટી નાટિકાં નાટયેન્નઃ ॥ 44 ॥

માલાલીવાલિધામ્નઃ કુવલયકલિતા શ્રીપતેઃ કુન્તલાલી

કાલિન્દ્યારુહ્ય મૂર્ધ્નો ગલતિ હરશિરઃસ્વર્ધુનીસ્પર્ધયા નુ ।

રાહુર્વા યાતિ વક્ત્રં સકલશશિકલાભ્રાન્તિલોલાન્તરાત્મા

લોકૈરાલોક્યતે યા પ્રદિશતુ સતતં સાખિલં મઙ્ગલં નઃ ॥ 45 ॥

સુપ્તાકારાઃ પ્રસુપ્તે ભગવતિ વિબુધૈરપ્યદૃષ્ટસ્વરૂપા

વ્યાપ્તવ્યોમાન્તરાલાસ્તરલમણિરુચા રઞ્જિતાઃ સ્પષ્ટભાસઃ ।

દેહચ્છાયોદ્ગમાભા રિપુવપુરગુરુપ્લોષરોષાગ્નિધૂમ્યાઃ

કેશાઃ કેશિદ્વિષો નો વિદધતુ વિપુલક્લેશપાશપ્રણાશમ્ ॥ 46 ॥

યત્ર પ્રત્યુપ્તરત્નપ્રવરપરિલસદ્ભૂરિરોચિષ્પ્રતાન-

-સ્ફૂર્ત્યાં મૂર્તિર્મુરારેર્દ્યુમણિશતચિતવ્યોમવદ્દુર્નિરીક્ષ્યા ।

કુર્વત્પારેપયોધિ જ્વલદકૃશશિખાભાસ્વદૌર્વાગ્નિશઙ્કાં

શશ્વન્નઃ શર્મ દિશ્યાત્કલિકલુષતમઃપાટનં તત્કિરીટમ્ ॥ 47 ॥

ભ્રાન્ત્વા ભ્રાન્ત્વા યદન્તસ્ત્રિભુવનગુરુરપ્યબ્દકોટીરનેકા

ગન્તું નાન્તં સમર્થો ભ્રમર ઇવ પુનર્નાભિનાલીકનાલાત્ ।

ઉન્મજ્જન્નૂર્જિતશ્રીસ્ત્રિભુવનમપરં નિર્મમે તત્સદૃક્ષં

દેહામ્ભોધિઃ સ દેયાન્નિરવધિરમૃતં દૈત્યવિદ્વેષિણો નઃ ॥ 48 ॥

મત્સ્યઃ કૂર્મો વરાહો નરહરિણપતિર્વામનો જામદગ્ન્યઃ

કાકુત્સ્થઃ કંસઘાતી મનસિજવિજયી યશ્ચ કલ્કિર્ભવિષ્યન્ ।

વિષ્ણોરંશાવતરા ભુવનહિતકરા ધર્મસંસ્થાપનાર્થાઃ

પાયાસુર્માં ત એતે ગુરુતરકરુણાભારખિન્નાશયા યે ॥ 49 ॥

યસ્માદ્વાચો નિવૃત્તાઃ સમમપિ મનસા લક્ષણામીક્ષમાણાઃ

સ્વાર્થાલાભાત્પરાર્થવ્યપગમકથનશ્લાઘિનો વેદવાદાઃ ।

નિત્યાનન્દં સ્વસંવિન્નિરવધિવિમલસ્વાન્તસઙ્ક્રાન્તબિમ્બ-

-ચ્છાયાપત્યાપિ નિત્યં સુખયતિ યમિનો યત્તદવ્યાન્મહો નઃ ॥ 50 ॥

આપાદાદા ચ શીર્ષાદ્વપુરિદમનઘં વૈષ્ણવં યઃ સ્વચિત્તે

ધત્તે નિત્યં નિરસ્તાખિલકલિકલુષ સન્તતાન્તઃ પ્રમોદમ્ ।

જુહ્વજ્જિહ્વાકૃશાનૌ હરિચરિતહવિઃ સ્તોત્રમન્ત્રાનુપાઠૈ-

-સ્તત્પાદામ્ભોરુહાભ્યાં સતતમપિ નમસ્કુર્મહે નિર્મલાભ્યામ્ ॥ 51 ॥

મોદાત્પાદાદિકેશસ્તુતિમિતિરચિતા કીર્તયિત્વા ત્રિધામ્ન

પાદાબ્જદ્વન્દ્વસેવાસમયનતમતિર્મસ્તકેનાનમેદ્ય ।

ઉન્મુચ્યૈવાત્મનૈનોનિચયકવચક પઞ્ચતામેત્ય ભાનો-

-ર્બિમ્બાન્તર્ગોચર સ પ્રવિશતિ પરમાનન્દમાત્મસ્વરૂપમ્ ॥ 52 ॥

ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છઙ્કરભગવતઃ કૃતૌ શ્રી વિષ્ણુ પાદાદિકેશાન્તવર્ણણ સ્તોત્રં સમ્પૂર્ણમ્ ।

Roman (IAST) Transliteration

lakṣmībharturbhujāgre kṛtavasati sitaṃ yasya rūpaṃ viśālaṃ

nīlādrestuṅgaśṛṅgasthitamiva rajanīnāthabimbaṃ vibhāti |

pāyānnaḥ pāñcajanyaḥ sa ditisutakulatrāsanaiḥ pūrayansvai-

-rnidhvānairnīradaughadhvaniparibhavadairambaraṃ kamburājaḥ || 1 ||

āhuryasya svarūpaṃ kṣaṇamukhamakhilaṃ sūrayaḥ kālametaṃ

dhvāntasyaikāntamantaṃ yadapi ca paramaṃ sarvadhāmnāṃ ca dhāma |

cakraṃ taccakrapāṇerditijatanugaladraktadhārāktadhāraṃ

śaśvanno viśvavandyaṃ vitaratu vipulaṃ śarma dharmāṃśuśobham || 2 ||

avyānnirghātaghoro haribhujapavanāmarśanādhmātamūrte-

-rasmānvismeranetratridaśanutivacaḥsādhukāraiḥ sutāraḥ |

sarvaṃ saṃhartumicchorarikulabhuvana sphāraviṣphāranādaḥ

saṃyatkalpāntasindhau śarasalilaghaṭāvārmucaḥ kārmukasya || 3 ||

jīmūtaśyāmabhāsā muhurapi bhagavadbāhunā mohayantī

yuddheṣūddhūyamānā jhaṭiti taṭidivālakṣyate yasya mūrtiḥ |

so'sistrāsākulākṣatridaśaripuvapuḥśoṇitāsvādatṛpto

nityānandāya bhūyānmadhumathanamanonandano nandako naḥ || 4 ||

kamrākārā murāreḥ karakamalatalenānurāgādgṛhītā

samyagvṛttā sthitāgre sapadi na sahate darśanaṃ yā pareṣām |

rājantī daityajīvāsavamadamuditā lohitālepanārdrā

kāmaṃ dīptāṃśukāntā pradiśatu dayitevāsya kaumodakī naḥ || 5 ||

yo viśvaprāṇabhūtastanurapi ca hareryānaketusvarūpo

yaṃ sañcintyaiva sadyaḥ svayamuragavadhūvargagarbhāḥ patanti |

cañcaccaṇḍorutuṇḍatruṭitaphaṇivasāraktapaṅkāṅkitasyaṃ

vande chandomayaṃ taṃ khagapatimamalasvarṇavarṇaṃ suparṇam || 6 ||

viṣṇorviśveśvarasya pravaraśayanakṛtsarvalokaikadhartā

so'nantaḥ sarvabhūtaḥ pṛthuvimalayaśāḥ sarvavedaiśca vedyaḥ |

pātā viśvasya śaśvatsakalasuraripudhvaṃsanaḥ pāpahantā

sarvajñaḥ sarvasākṣī sakalaviṣabhayātpātu bhogīśvaro naḥ || 7 ||

vāgbhūgairyādibhedairviduriha munayo yāṃ yadīyaiśca puṃsāṃ

kāruṇyārdraiḥ kaṭākṣaiḥ sakṛdapi patitaiḥ sampadaḥ syuḥ samagrāḥ |

kundendusvacchamandasmitamadhuramukhāmbhoruhāṃ sundarāṅgīṃ

vande vandyāmaśeṣairapi murabhiduromandirāmindirāṃ tām || 8 ||

yā sūte sattvajālaṃ sakalamapi sadā sannidhānena puṃso

dhatte yā tattvayogāccaramacaramidaṃ bhūtaye bhūtajātam |

dhātrīṃ sthātrīṃ janitrīṃ prakṛtimavikṛtiṃ viśvaśaktiṃ vidhātrīṃ

viṣṇorviśvātmanastāṃ vipulaguṇamayīṃ prāṇanāthāṃ praṇaumi || 9 ||

yebhyo'sūyadbhiruccaiḥ sapadi padamuru tyajyate daityavargai-

-ryebho dhartuṃ ca mūrdhnā spṛhayati satataṃ sarvagīrvāṇavargaḥ |

nityaṃ nirmūlayeyurnicitataramamī bhaktinighnātmanāṃ naḥ

padmākṣasyāṅghripadmadvayatalanilayāḥ pāṃsavaḥ pāpapaṅkam || 10 ||

rekhā lekhādivandyāścaraṇatalagatāścakramatsyādirūpāḥ

snigdhāḥ sūkṣmāḥ sujātā mṛdulalitatarakṣaumasūtrāyamāṇāḥ |

dadyurno maṅgalāni bhramarabharajuṣā komalenābdhijāyāḥ

kamreṇāmreḍyamānāḥ kisalayamṛdunā pāṇinā cakrapāṇeḥ || 11 ||

yasmādākrāmato dyāṃ garuḍamaṇiśilāketudaṇḍāyamānā

dāścyotantī babhāse surasaridamalā vaijayantīva kāntā |

bhūmiṣṭho yastathānyo bhuvanagṛhabṛhat‍stambhaśobhāṃ dadhau naḥ

pātāmetau pāyojodaralalitatalau paṅkajākṣasya pādau || 12 ||

ākrāmadbhyāṃ trilokīmasurasurapatī tatkṣaṇādeva nītau

yābhyāṃ vairocanīndrau yugapadapi vipatsampadorekadhāmaḥ |

tābhyāṃ tāmrodarābhyāṃ muhurahamajitasyāñcitābhyāmubhābhyāṃ

prājyaiśvaryapradābhyāṃ praṇatimupagataḥ pādapaṅkeruhābhyām || 13 ||

yebhyo varṇaścaturthaścaramata udabhūdādisarge prajānāṃ

sāhasrī cāpi saṅkhyā prakaṭamabhihitā sarvavedeṣu yeṣām |

prāptā viśvambharā yairativitatatanorviśvamūrtervirājo

viṣṇostebhyo mahadbhyaḥ satatamapi namo'stvaṅghripaṅkeruhebhyaḥ || 14 ||

viṣṇoḥ pādadvayāgre vimalanakhamaṇibhrājitā rājate yā

rājīvasyeva ramyā himajalakaṇikālaṅkṛtāgrā dalālī |

asmākaṃ vismayārhāṇyakhilajanamana prārthanīyā hi seyaṃ

dadyādādyānavadyā tatiratirucirā maṅgalānyaṅgulīnām || 15 ||

yasyāṃ dṛṣṭvāmalāyāṃ pratikṛtimamarāḥ sambhavantyānamantaḥ

sendrāḥ sāndrīkṛterṣyāstvaparasurakulāśaṅkayātaṅkavantaḥ |

sā sadyaḥ sātirekāṃ sakalasukhakarīṃ sampadaṃ sādhayenna-

-ścañcaccārvaṃśucakrā caraṇanalinayoścakrapāṇernakhālī || 16 ||

pādāmbhojanmasevāsamavanatasuravrātabhāsvatkirīṭa-

-pratyuptoccāvacāśmapravarakaragaṇaiścintitaṃ yadvibhāti |

namrāṅgānāṃ harerno haridupalamahākūrmasaundaryahāri-

-cchāyaṃ śreyaḥpradāyi prapadayugamidaṃ prāpayetpāpamantam || 17 ||

śrīmatyau cāruvṛtte karaparimalanānandahṛṣṭe ramāyāḥ

saundaryāḍhyendranīlopalaracitamahādaṇḍayoḥ kānticore |

sūrīndraiḥ stūyamāne surakulasukhade sūditārātisaṅghe

jaṅghe nārāyaṇīye muhurapi jayatāmasmadaṃho harantyau || 18 ||

samyaksāhyaṃ vidhātuṃ samamiva satataṃ jaṅghayoḥ khinnayorye

bhārībhūtorudaṇḍadvayabharaṇakṛtottambhabhāvaṃ bhajete |

cittādarśaṃ nidhātuṃ mahitamiva satāṃ te samudrāyamāne

vṛttākāre vidhattāṃ hyadi mudamajitasyāniśaṃ jānunī naḥ || 19 ||

devo bhītiṃ vidhātuḥ sapadi vidadhatau kaiṭabhākhyaṃ madhuṃ cā-

-pyāropyārūḍhagarvāvadhijaladhi yayorādidaityau jaghāna |

vṛttāvanyonyatulyau caturamupacayaṃ bibhratāvabhranīlā-

-vūrū cārū harestau mudamatiśayinīṃ mānase no vidhattām || 20 ||

pītena dyotate yaccaturaparihitenāmbareṇātyudāraṃ

jātālaṅkārayogaṃ jalamiva jaladherbāḍabāgniprabhābhiḥ |

etatpātityadānno jaghanamatighanādenaso mānanīyaṃ

sātatyenaiva cetoviṣayamavataratpātu pītāmbarasya || 21 ||

yasyā dāmnā tridhāmno jaghanakalitayā bhrājate'ṅgaṃ yathābdhe-

-rmadhyastho mandarādrirbhujagapatimahābhogasannaddhamadhyaḥ |

kāñcī sā kāñcanābhā maṇivarakiraṇairullasadbhiḥ pradīptā

kalyāṃ kalyāṇadātrīṃ mama matimaniśaṃ kamrarūpāṃ karotu || 22 ||

unnamraṃ kamramuccairupacitamudabhūdyatra patrairvicitraiḥ

pūrvaṃ gīrvāṇapūjyaṃ kamalajamadhupasyāspadaṃ tatpayojam |

yasminnīlāśmanīlaistaralarucijalaiḥ pūrite kelibuddhyā

nālīkākṣasya nābhīsarasi vasatu naścittahaṃsaścirāya || 23 ||

pātālaṃ yasya nālaṃ valayamapi diśāṃ patrapaṅktīrnagendrā-

-nvidvāṃsaḥ kesarālīrviduriha vipulāṃ karṇikāṃ svarṇaśailam |

bhūyādgāyatsvayambhūmadhukarabhavanaṃ bhūmayaṃ kāmadaṃ no

nālīkaṃ nābhipadmākarabhavamuru tannāgaśayyasya śaureḥ || 24 ||

ādau kalpasya yasmātprabhavati vitataṃ viśvametadvikalpaiḥ

kalpānte yasya cānta praviśati sakalaṃ sthāvaraṃ jaṅgamaṃ ca |

atyantācintyamūrteścirataramajitasyāntarikṣasvarūpe

tasminnasmākamantaḥkaraṇamatimudā krīḍatātkroḍabhāge || 25 ||

kāntyambhaḥpūrapūrṇe lasadasitavalībhaṅgabhāsvattaraṅge

gambhīrākāranābhīcaturataramahāvartaśobhinyudāre |

krīḍatvānadvahemodaranahanamahābāḍabāgniprabhāḍhye

kāmaṃ dāmodarīyodarasalilanidhau cittamatsyaściraṃ naḥ || 26 ||

nābhīnālīkamūlādadhikaparimalonmohitānāmalīnāṃ

mālā nīleva yāntī sphurati rucimatī vaktrapadmonmukhī yā |

ramyā sā romarājirmahitarucikarī madhyabhāgasya viṣṇo-

-ścittasthā mā viraṃsīccirataramucitāṃ sādhayantī śriyaṃ naḥ || 27 ||

saṃstīrṇaṃ kaustubhāṃśuprasarakisalayairmugdhamuktāphalāḍhyaṃ

śrīvatsollāsi phullapratinavavanamālāṅki rājadbhujāntam |

vakṣaḥ śrīvṛkṣakāntaṃ madhukaranikaraśyāmalaṃ śārṅgapāṇeḥ

saṃsārādhvaśramārtairupavanamiva yatsevitaṃ tatprapadye || 28 ||

kāntaṃ vakṣo nitāntaṃ vidadhadiva galaṃ kālimā kālaśatro-

-rindorbimbaṃ yathāṅko madhupa iva tarormañjarīṃ rājate yaḥ |

śrīmānnityaṃ vidheyādaviralamilitaḥ kaustubhaśrīpratānaiḥ

śrīvatsaḥ śrīpateḥ sa śriya iva dayito vatsa uccaiḥśriyaṃ naḥ || 29 ||

sambhūyāmbhodhimadhyātsapadi sahajayā yaḥ śriyā sannidhatte

nīle nārāyaṇoraḥsthalagaganatale hāratāropasevye |

āśāḥ sarvāḥ prakāśā vidadhadapidadhaccātmabhāsānyatejā-

-syāścaryasyākaro no dyumaṇiriva maṇiḥ kaustubhaḥ so'stubhūtyai || 30 ||

yā vāyāvānukūlyātsarati maṇirucā bhāsamānā samānā

sākaṃ sākampamaṃse vasati vidadhatī vāsubhadraṃ subhadram |

sāraṃ sāraṅgasaṅghairmukharitakusumā mecakāntā ca kāntā

mālā mālālitāsmānna viramatu sukhairyojayantī jayantī || 31 ||

hārasyoruprabhābhiḥ pratinavavanamālāśubhiḥ prāṃśurūpaiḥ

śrībhiścāpyaṅgadānāṃ kabalitaruci yanniṣkabhābhiśca bhāti |

bāhulyenaiva baddhāñjalipuṭamajitasyābhiyācāmahe ta-

-dvandhārtiṃ bādhatāṃ no bahuvihatikarīṃ bandhuraṃ bāhumūlam || 32 ||

viśvatrāṇaikadīkṣāstadanuguṇaguṇakṣatranirmāṇadakṣāḥ

kartāro durnirūpasphuṭaguṇayaśasā karmaṇāmadbhutānām |

śārṅgaṃ bāṇaṃ kṛpāṇaṃ phalakamarigade padmaśaṅkhau sahasraṃ

bibhrāṇāḥ śastrajālaṃ mama dadhatu harerbāhavo mohahānim || 33 ||

kaṇṭhākalpodgatairyaḥ kanakamayalasatkuṇḍalotthairudārai-

-rudyotaiḥ kaustubhasyāpyurubhirupacitaścitravarṇo vibhāti |

kaṇṭhāśleṣe ramāyāḥ karavalayapadairmudrite bhadrarūpe

vaikuṇṭhīye'tra kaṇṭhe vasatu mama matiḥ kuṇṭhabhāvaṃ vihāya || 34 ||

padmānandapradātā parilasadaruṇaśrīparītāgrabhāgaḥ

kāle kāle ca kambupravaraśaśadharāpūraṇe yaḥ pravīṇaḥ |

vaktrākāśāntarasthastirayati nitarāṃ dantatāraughaśobhāṃ

śrībharturdantavāsodyumaṇiraghatamonāśanāyāstvasau naḥ || 35 ||

nityaṃ snehātirekānnijakamituralaṃ viprayogākṣamā yā

vaktrendorantarāle kṛtavasatirivābhāti nakṣatrarājiḥ |

lakṣmīkāntasya kāntākṛtirativilasanmugdhamuktāvaliśrī-

-rdantālī santataṃ sā natinutiniratānakṣatānrakṣatānnaḥ || 36 ||

brahmanbrahmaṇyajihmāṃ matimapi kuruṣe deva sambhāvaye tvāṃ

śambho śakra trilokīmavasi kimamarairnāradādyāḥ sukhaṃ vaḥ |

itthaṃ sevāvanamraṃ suramuninikaraṃ vīkṣya viṣṇoḥ prasanna-

-syāsyendorāsravantī varavacanasudhāhlādayenmānasaṃ naḥ || 37 ||

karṇasthasvarṇakamrojjvalamakaramahākuṇḍalaprotadīpya-

-nmāṇikyaśrīpratānaiḥ parimilitamaliśyāmalaṃ komalaṃ yat |

prodyatsūryāṃśurājanmarakatamukurākāracoraṃ murāre-

-rgāḍhāmāgāminīṃ naḥ śamayatu vipadaṃ gaṇḍayormaṇḍalaṃ tat || 38 ||

vaktrāmbhoje lasantaṃ muhuradharamaṇiṃ pakvabimbābhirāmaṃ

dṛṣṭvā draṣṭuṃ śukasya sphuṭamavataratastuṇḍadaṇḍāyate yaḥ |

ghoṇaḥ śoṇīkṛtātmā śravaṇayugalasatkuṇḍalosrairmurāreḥ

prāṇākhyasyānilasya prasaraṇasaraṇiḥ prāṇadānāya naḥ syāt || 39 ||

dikkālau vedayantau jagati muhurimau sañcarantau ravīndū

trailokyālokadīpāvabhidadhati yayoreva rūpaṃ munīndrāḥ |

asmānabjaprabhe te pracuratarakṛpānirbharaṃ prekṣamāṇe

pātāmātāmraśuklāsitarucirucire padmanetrasya netre || 40 ||

pātātpātālapātātpatagapatigaterbhrūyugaṃ bhugnamadhyaṃ

yeneṣaccālitena svapadaniyamitāḥ sāsurā devasaṅghāḥ |

nṛtyallālāṭaraṅge rajanikaratanorardhakhaṇḍāvadāte

kālavyāladvayaṃ vā vilasati samayā vālikāmātaraṃ naḥ || 41 ||

lakṣmākārālakālisphuradalikaśaśāṅkārdhasandarśamīla-

-nnetrāmbhojaprabodhotsukanibhṛtatarālīnabhṛṅgacchaṭābhe |

lakṣmīnāthasya lakṣyīkṛtavibudhagaṇāpāṅgabāṇāsanārdha-

-cchāye no bhūribhūtiprasavakuśalate bhrūlate pālayetām || 42 ||

rūkṣasmārekṣucāpacyutaśaranikarakṣīṇalakṣmīkaṭākṣa-

-protphullatpadmamālāvilasitamahitasphāṭikaiśānaliṅgam |

bhūyādbhūyo vibhūtyai mama bhuvanapaterbhrūlatādvandvamadhyā-

-dutthaṃ tatpuṇḍramūrdhvaṃ janimaraṇatamaḥkhaṇḍanaṃ maṇḍanaṃ ca || 43 ||

pīṭhībhūtālakānte kṛtamakuṭamahādevaliṅgapratiṣṭhe

lālāṭe nāṭyaraṅge vikaṭatarataṭe kaiṭabhāreścirāya |

proddhāṭyaivātmatandrīprakaṭapaṭakuṭīṃ prasphurantīṃ sphuṭāṅgaṃ

paṭvīyaṃ bhāvanākhyāṃ caṭulamatinaṭī nāṭikāṃ nāṭayennaḥ || 44 ||

mālālīvālidhāmnaḥ kuvalayakalitā śrīpateḥ kuntalālī

kālindyāruhya mūrdhno galati haraśiraḥsvardhunīspardhayā nu |

rāhurvā yāti vaktraṃ sakalaśaśikalābhrāntilolāntarātmā

lokairālokyate yā pradiśatu satataṃ sākhilaṃ maṅgalaṃ naḥ || 45 ||

suptākārāḥ prasupte bhagavati vibudhairapyadṛṣṭasvarūpā

vyāptavyomāntarālāstaralamaṇirucā rañjitāḥ spaṣṭabhāsaḥ |

dehacchāyodgamābhā ripuvapuraguruploṣaroṣāgnidhūmyāḥ

keśāḥ keśidviṣo no vidadhatu vipulakleśapāśapraṇāśam || 46 ||

yatra pratyuptaratnapravaraparilasadbhūrirociṣpratāna-

-sphūrtyāṃ mūrtirmurārerdyumaṇiśatacitavyomavaddurnirīkṣyā |

kurvatpārepayodhi jvaladakṛśaśikhābhāsvadaurvāgniśaṅkāṃ

śaśvannaḥ śarma diśyātkalikaluṣatamaḥpāṭanaṃ tatkirīṭam || 47 ||

bhrāntvā bhrāntvā yadantastribhuvanagururapyabdakoṭīranekā

gantuṃ nāntaṃ samartho bhramara iva punarnābhinālīkanālāt |

unmajjannūrjitaśrīstribhuvanamaparaṃ nirmame tatsadṛkṣaṃ

dehāmbhodhiḥ sa deyānniravadhiramṛtaṃ daityavidveṣiṇo naḥ || 48 ||

matsyaḥ kūrmo varāho narahariṇapatirvāmano jāmadagnyaḥ

kākutsthaḥ kaṃsaghātī manasijavijayī yaśca kalkirbhaviṣyan |

viṣṇoraṃśāvatarā bhuvanahitakarā dharmasaṃsthāpanārthāḥ

pāyāsurmāṃ ta ete gurutarakaruṇābhārakhinnāśayā ye || 49 ||

yasmādvāco nivṛttāḥ samamapi manasā lakṣaṇāmīkṣamāṇāḥ

svārthālābhātparārthavyapagamakathanaślāghino vedavādāḥ |

nityānandaṃ svasaṃvinniravadhivimalasvāntasaṅkrāntabimba-

-cchāyāpatyāpi nityaṃ sukhayati yamino yattadavyānmaho naḥ || 50 ||

āpādādā ca śīrṣādvapuridamanaghaṃ vaiṣṇavaṃ yaḥ svacitte

dhatte nityaṃ nirastākhilakalikaluṣa santatāntaḥ pramodam |

juhvajjihvākṛśānau haricaritahaviḥ stotramantrānupāṭhai-

-statpādāmbhoruhābhyāṃ satatamapi namaskurmahe nirmalābhyām || 51 ||

modātpādādikeśastutimitiracitā kīrtayitvā tridhāmna

pādābjadvandvasevāsamayanatamatirmastakenānamedya |

unmucyaivātmanainonicayakavacaka pañcatāmetya bhāno-

-rbimbāntargocara sa praviśati paramānandamātmasvarūpam || 52 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī viṣṇu pādādikeśāntavarṇaṇa stotraṃ sampūrṇam |