Shri Raghavendra Stotram

ॐ

શ્રી રાઘવેન્દ્ર સ્તોત્રમ્

Stotram Gujarati

શ્રીપૂર્ણબોધગુરુતીર્થપયોબ્ધિપારા

કામારિમાક્ષવિષમાક્ષશિરઃ સ્પૃશન્તી ।

પૂર્વોત્તરામિતતરઙ્ગચરત્સુહંસા

દેવાલિસેવિતપરાઙ્ઘ્રિપયોજલગ્ના ॥ 1 ॥

જીવેશભેદગુણપૂર્તિજગત્સુસત્ત્વ-

-નીચોચ્ચભાવમુખનક્રગણૈઃ સમેતા ।

દુર્વાદ્યજાપતિગિલૈર્ગુરુરાઘવેન્દ્ર-

-વાગ્દેવતાસરિદમું વિમલી કરોતુ ॥ 2 ॥

શ્રીરાઘવેન્દ્રઃ સકલપ્રદાતા

સ્વપાદકઞ્જદ્વયભક્તિમદ્ભ્યઃ ।

અઘાદ્રિસમ્ભેદનદૃષ્ટિવજ્રઃ

ક્ષમાસુરેન્દ્રોઽવતુ માં સદાઽયમ્ ॥ 3 ॥

શ્રીરાઘવેન્દ્રો હરિપાદકઞ્જ-

-નિષેવણાલ્લબ્ધસમસ્તસમ્પત્ ।

દેવસ્વભાવો દિવિજદ્રુમોઽય-

-મિષ્ટપ્રદો મે સતતં સ ભૂયાત્ ॥ 4 ॥

ભવ્યસ્વરૂપો ભવદુઃખતૂલ-

-સઙ્ઘાગ્નિચર્યઃ સુખધૈર્યશાલી ।

સમસ્તદુષ્ટગ્રહનિગ્રહેશો

દુરત્યયોપપ્લવસિન્ધુસેતુઃ ॥ 5 ॥

નિરસ્તદોષો નિરવદ્યવેષઃ

પ્રત્યર્થિમૂકત્ત્વનિદાનભાષઃ ।

વિદ્વત્પરિજ્ઞેયમહાવિશેષો

વાગ્વૈખરીનિર્જિતભવ્યશેષઃ ॥ 6 ॥

સન્તાનસમ્પત્પરિશુદ્ધભક્તિ-

-વિજ્ઞાનવાગ્દેહસુપાટવાદીન્ ।

દત્વા શરીરોત્થસમસ્તદોષાન્

હત્ત્વા સ નોઽવ્યાદ્ગુરુરાઘવેન્દ્રઃ ॥ 7 ॥

યત્પાદોદકસઞ્ચયઃ સુરનદીમુખ્યાપગાસાદિતા-

-સઙ્ખ્યાનુત્તમપુણ્યસઙ્ઘવિલસત્પ્રખ્યાતપુણ્યાવહઃ ।

દુસ્તાપત્રયનાશનો ભુવિ મહાવન્ધ્યાસુપુત્રપ્રદો

વ્યઙ્ગસ્વઙ્ગસમૃદ્ધિદો ગ્રહમહાપાપાપહસ્તં શ્રયે ॥ 8 ॥

યત્પાદકઞ્જરજસા પરિભૂષિતાઙ્ગા

યત્પાદપદ્મમધુપાયિતમાનસા યે ।

યત્પાદપદ્મપરિકીર્તનજીર્ણવાચ

-સ્તદ્દર્શનં દુરિતકાનનદાવભૂતમ્ ॥ 9 ॥

સર્વતન્ત્રસ્વતન્ત્રોઽસૌ શ્રીમધ્વમતવર્ધનઃ

વિજયીન્દ્રકરાબ્જોત્થસુધીન્દ્રવરપુત્રકઃ ॥ 10 ॥

શ્રીરાઘવેન્દ્રો યતિરાટ્ ગુરુર્મે સ્યાદ્ભયાપહઃ

જ્ઞાનભક્તિસુપુત્રાયુર્યશઃ શ્રીપુણ્યવર્ધનઃ ॥ 11 ॥

પ્રતિવાદિજયસ્વાન્તભેદચિહ્નાદરો ગુરુઃ ।

સર્વવિદ્યાપ્રવીણોઽન્યો રાઘવેન્દ્રાન્ન વિદ્યતે ॥ 12 ॥

અપરોક્ષીકૃતશ્રીશઃ સમુપેક્ષિતભાવજઃ ।

અપેક્ષિતપ્રદાતાઽન્યો રાઘવેન્દ્રાન્ન વિદ્યતે ॥ 13 ॥

દયાદાક્ષિણ્યવૈરાગ્યવાક્પાટવમુખાઙ્કિતઃ ।

શાપાનુગ્રહશક્તોઽન્યો રાઘવેન્દ્રાન્ન વિદ્યતે ॥ 14 ॥

અજ્ઞાનવિસ્મૃતિભ્રાન્તિસંશયાઽપસ્મૃતિક્ષયાઃ ।

તન્દ્રાકમ્પવચઃકૌણ્ઠ્યમુખા યે ચેન્દ્રિયોદ્ભવાઃ ।

દોષાસ્તે નાશમાયાન્તિ રાઘવેન્દ્રપ્રસાદતઃ ॥ 15 ॥

ૐ શ્રીરાઘવેન્દ્રાય નમઃ ઇત્યઽષ્ટાક્ષરમન્ત્રતઃ ।

જપિતાદ્ભાવિતાન્નિત્યં ઇષ્ટાર્થાઃ સ્યુર્ન સંશયઃ ॥ 16 ॥

હન્તુ નઃ કાયજાન્ દોષાન્ આત્માત્મીયસમુદ્ભવાન્ ।

સર્વાનપિ પુમર્થાંશ્ચ દદાતુ ગુરુરાત્મવિત્ ॥ 17 ॥

ઇતિ કાલત્રયે નિત્યં પ્રાર્થનાં યઃ કરોતિ સઃ ।

ઇહામુત્રાપ્તસર્વેષ્ટો મોદતે નાત્ર સંશયઃ ॥ 18 ॥

અગમ્યમહિમા લોકે રાઘવેન્દ્રો મહાયશાઃ ।

શ્રીમધ્વમતદુગ્ધાબ્ધિચન્દ્રોઽવતુ સદાઽનઘઃ ॥ 19 ॥

સર્વયાત્રાફલાવાપ્ત્યૈ યથાશક્તિપ્રદક્ષિણમ્ ।

કરોમિ તવ સિદ્ધસ્ય બૃન્દાવનગતં જલમ્ ॥ 20 ॥

શિરસા ધારયામ્યદ્ય સર્વતીર્થફલાપ્તયે ।

સર્વાભીષ્ટાર્થસિદ્ધ્યર્થં નમસ્કારં કરોમ્યહમ્ ।

તવ સઙ્કીર્તનં વેદશાસ્ત્રાર્થજ્ઞાનસિદ્ધયે ॥ 21 ॥

સંસારેઽક્ષયસાગરે પ્રકૃતિતોઽગાધે સદા દુસ્તરે

સર્વાવદ્યજલગ્રહૈરનુપમૈઃ કામાદિભઙ્ગાકુલે ।

નાનાવિભ્રમદુર્ભ્રમેઽમિતભયસ્તોમાદિફેનોત્કટે

દુઃખોત્કૃષ્ટવિષે સમુદ્ધર ગુરો મા મગ્નરૂપં સદા ॥ 22 ॥

રાઘવેન્દ્રગુરુસ્તોત્રં યઃ પઠેદ્ભક્તિપૂર્વકમ્ ।

તસ્ય કુષ્ઠાદિરોગાણાં નિવૃત્તિસ્ત્વરયા ભવેત્ ॥ 23 ॥

અન્ધોઽપિ દિવ્યદૃષ્ટિઃ સ્યાદેડમૂકોઽપિ વાક્પતિઃ ।

પૂર્ણાયુઃ પૂર્ણસમ્પત્તિઃ સ્તોત્રસ્યાઽસ્ય જપાદ્ભવેત્ ॥ 24 ॥

યઃ પિબેજ્જલમેતેન સ્તોત્રેણૈવાભિમન્ત્રિતમ્ ।

તસ્ય કુક્ષિગતા દોષાઃ સર્વે નશ્યન્તિ તત્ ક્ષણાત્ ॥ 25 ॥

યદ્વૃન્દાવનમાસાદ્ય પઙ્ગુઃ ખઞ્જોઽપિ વા જનઃ ।

સ્તોત્રેણાનેન યઃ કુર્યાત્ પ્રદક્ષિણનમસ્કૃતી ॥ 26 ॥

સ જઙ્ઘાલો ભવેદેવ ગુરુરાજપ્રસાદતઃ ।

સોમસૂર્યોપરાગે ચ પુષ્યાર્કાદિસમાગમે ॥ 27 ॥

યોઽનુત્તમમિદં સ્તોત્રમષ્ટોત્તરશતં જપેત્ ।

ભૂતપ્રેતપિશાચાદિ પીડા તસ્ય ન જાયતે ॥ 28 ॥

એતત્ સ્તોત્રં સમુચ્ચાર્ય ગુરોર્વૃન્દાવનાન્તિકે ।

દીપસંયોજનાજ્જ્ઞાનં પુત્રલાભો ભવેદ્ધ્રુવમ્ ॥ 29 ॥

પરવાદિજયો દિવ્યજ્ઞાનભક્ત્યાદિવર્ધનમ્ ।

સર્વાભીષ્ટપ્રવૃદ્ધિઃ સ્યાન્નાત્ર કાર્યા વિચારણા ॥ 30 ॥

રાજચોરમહાવ્યાઘ્રસર્પનક્રાદિપીડનમ્ ।

ન જાયતેઽસ્ય સ્તોત્રસ્ય પ્રભાવાન્નાત્ર સંશયઃ ॥ 31 ॥

યો ભક્ત્યા ગુરુરાઘવેન્દ્રચરણદ્વન્દ્વં સ્મરન્ યઃ પઠેત્

સ્તોત્રં દિવ્યમિદં સદા ન હિ ભવેત્તસ્યાસુખં કિઞ્ચન ।

કિં ત્વિષ્ટાર્થસમૃદ્ધિરેવ કમલાનાથપ્રસાદોદયાત્

કીર્તિર્દિગ્વિદિતા વિભૂતિરતુલા સાક્ષી હયાસ્યોઽત્ર હિ ॥ 32 ॥

ફલશૃતિઃ

ઇતિ શ્રી રાઘવેન્દ્રાર્ય ગુરુરાજપ્રસાદતઃ ।

કૃતં સ્તોત્રમિદં પુણ્યં શ્રીમદ્ભિર્હ્યપ્પણાભિદૈઃ ॥

પૂજ્યાય રાઘવેન્દ્રાય સત્યધર્મરતાય ચ ।

ભજતાં કલ્પવૃક્ષાય નમતાં કામધેનવે ॥

આપાદમૌલિપર્યન્તં ગુરૂણામાકૃતિં સ્મરેત્ ।

તેન વિઘ્નઃ પ્રણશ્યન્તિ સિદ્ધ્યન્તિ ચ મનોરથાઃ ॥

દુર્વાદિધ્વાન્તરવયે વૈષ્ણવેન્દીવરેન્દવે ।

શ્રીરાઘવેન્દ્ર ગુરવે નમોઽત્યન્તદયાલવે ॥

મૂકોઽપિ યત્પ્રસાદેન મુકુન્દશયનાય તે ।

રાજરાજાયતે રિક્તો રાઘવેન્દ્રં તમાશ્રયે ।

ઇતિ શ્રી અપ્પણ્ણાચાર્યવિરચિતં શ્રીરાઘવેન્દ્ર સ્તોત્રં સમ્પૂર્ણમ્ ॥

Roman (IAST) Transliteration

śrīpūrṇabodhagurutīrthapayobdhipārā

kāmārimākṣaviṣamākṣaśiraḥ spṛśantī |

pūrvottarāmitataraṅgacaratsuhaṃsā

devālisevitaparāṅghripayojalagnā || 1 ||

jīveśabhedaguṇapūrtijagatsusattva-

-nīcoccabhāvamukhanakragaṇaiḥ sametā |

durvādyajāpatigilairgururāghavendra-

-vāgdevatāsaridamuṃ vimalī karotu || 2 ||

śrīrāghavendraḥ sakalapradātā

svapādakañjadvayabhaktimadbhyaḥ |

aghādrisambhedanadṛṣṭivajraḥ

kṣamāsurendro'vatu māṃ sadā'yam || 3 ||

śrīrāghavendro haripādakañja-

-niṣevaṇāllabdhasamastasampat |

devasvabhāvo divijadrumo'ya-

-miṣṭaprado me satataṃ sa bhūyāt || 4 ||

bhavyasvarūpo bhavaduḥkhatūla-

-saṅghāgnicaryaḥ sukhadhairyaśālī |

samastaduṣṭagrahanigraheśo

duratyayopaplavasindhusetuḥ || 5 ||

nirastadoṣo niravadyaveṣaḥ

pratyarthimūkattvanidānabhāṣaḥ |

vidvatparijñeyamahāviśeṣo

vāgvaikharīnirjitabhavyaśeṣaḥ || 6 ||

santānasampatpariśuddhabhakti-

-vijñānavāgdehasupāṭavādīn |

datvā śarīrotthasamastadoṣān

hattvā sa no'vyādgururāghavendraḥ || 7 ||

yatpādodakasañcayaḥ suranadīmukhyāpagāsāditā-

-saṅkhyānuttamapuṇyasaṅghavilasatprakhyātapuṇyāvahaḥ |

dustāpatrayanāśano bhuvi mahāvandhyāsuputraprado

vyaṅgasvaṅgasamṛddhido grahamahāpāpāpahastaṃ śraye || 8 ||

yatpādakañjarajasā paribhūṣitāṅgā

yatpādapadmamadhupāyitamānasā ye |

yatpādapadmaparikīrtanajīrṇavāca

-staddarśanaṃ duritakānanadāvabhūtam || 9 ||

sarvatantrasvatantro'sau śrīmadhvamatavardhanaḥ

vijayīndrakarābjotthasudhīndravaraputrakaḥ || 10 ||

śrīrāghavendro yatirāṭ gururme syādbhayāpahaḥ

jñānabhaktisuputrāyuryaśaḥ śrīpuṇyavardhanaḥ || 11 ||

prativādijayasvāntabhedacihnādaro guruḥ |

sarvavidyāpravīṇo'nyo rāghavendrānna vidyate || 12 ||

aparokṣīkṛtaśrīśaḥ samupekṣitabhāvajaḥ |

apekṣitapradātā'nyo rāghavendrānna vidyate || 13 ||

dayādākṣiṇyavairāgyavākpāṭavamukhāṅkitaḥ |

śāpānugrahaśakto'nyo rāghavendrānna vidyate || 14 ||

ajñānavismṛtibhrāntisaṃśayā'pasmṛtikṣayāḥ |

tandrākampavacaḥkauṇṭhyamukhā ye cendriyodbhavāḥ |

doṣāste nāśamāyānti rāghavendraprasādataḥ || 15 ||

oṃ śrīrāghavendrāya namaḥ itya'ṣṭākṣaramantrataḥ |

japitādbhāvitānnityaṃ iṣṭārthāḥ syurna saṃśayaḥ || 16 ||

hantu naḥ kāyajān doṣān ātmātmīyasamudbhavān |

sarvānapi pumarthāṃśca dadātu gururātmavit || 17 ||

iti kālatraye nityaṃ prārthanāṃ yaḥ karoti saḥ |

ihāmutrāptasarveṣṭo modate nātra saṃśayaḥ || 18 ||

agamyamahimā loke rāghavendro mahāyaśāḥ |

śrīmadhvamatadugdhābdhicandro'vatu sadā'naghaḥ || 19 ||

sarvayātrāphalāvāptyai yathāśaktipradakṣiṇam |

karomi tava siddhasya bṛndāvanagataṃ jalam || 20 ||

śirasā dhārayāmyadya sarvatīrthaphalāptaye |

sarvābhīṣṭārthasiddhyarthaṃ namaskāraṃ karomyaham |

tava saṅkīrtanaṃ vedaśāstrārthajñānasiddhaye || 21 ||

saṃsāre'kṣayasāgare prakṛtito'gādhe sadā dustare

sarvāvadyajalagrahairanupamaiḥ kāmādibhaṅgākule |

nānāvibhramadurbhrame'mitabhayastomādiphenotkaṭe

duḥkhotkṛṣṭaviṣe samuddhara guro mā magnarūpaṃ sadā || 22 ||

rāghavendragurustotraṃ yaḥ paṭhedbhaktipūrvakam |

tasya kuṣṭhādirogāṇāṃ nivṛttistvarayā bhavet || 23 ||

andho'pi divyadṛṣṭiḥ syādeḍamūko'pi vākpatiḥ |

pūrṇāyuḥ pūrṇasampattiḥ stotrasyā'sya japādbhavet || 24 ||

yaḥ pibejjalametena stotreṇaivābhimantritam |

tasya kukṣigatā doṣāḥ sarve naśyanti tat kṣaṇāt || 25 ||

yadvṛndāvanamāsādya paṅguḥ khañjo'pi vā janaḥ |

stotreṇānena yaḥ kuryāt pradakṣiṇanamaskṛtī || 26 ||

sa jaṅghālo bhavedeva gururājaprasādataḥ |

somasūryoparāge ca puṣyārkādisamāgame || 27 ||

yo'nuttamamidaṃ stotramaṣṭottaraśataṃ japet |

bhūtapretapiśācādi pīḍā tasya na jāyate || 28 ||

etat stotraṃ samuccārya gurorvṛndāvanāntike |

dīpasaṃyojanājjñānaṃ putralābho bhaveddhruvam || 29 ||

paravādijayo divyajñānabhaktyādivardhanam |

sarvābhīṣṭapravṛddhiḥ syānnātra kāryā vicāraṇā || 30 ||

rājacoramahāvyāghrasarpanakrādipīḍanam |

na jāyate'sya stotrasya prabhāvānnātra saṃśayaḥ || 31 ||

yo bhaktyā gururāghavendracaraṇadvandvaṃ smaran yaḥ paṭhet

stotraṃ divyamidaṃ sadā na hi bhavettasyāsukhaṃ kiñcana |

kiṃ tviṣṭārthasamṛddhireva kamalānāthaprasādodayāt

kīrtirdigviditā vibhūtiratulā sākṣī hayāsyo'tra hi || 32 ||

phalaśṛtiḥ

iti śrī rāghavendrārya gururājaprasādataḥ |

kṛtaṃ stotramidaṃ puṇyaṃ śrīmadbhirhyappaṇābhidaiḥ ||

pūjyāya rāghavendrāya satyadharmaratāya ca |

bhajatāṃ kalpavṛkṣāya namatāṃ kāmadhenave ||

āpādamauliparyantaṃ gurūṇāmākṛtiṃ smaret |

tena vighnaḥ praṇaśyanti siddhyanti ca manorathāḥ ||

durvādidhvāntaravaye vaiṣṇavendīvarendave |

śrīrāghavendra gurave namo'tyantadayālave ||

mūko'pi yatprasādena mukundaśayanāya te |

rājarājāyate rikto rāghavendraṃ tamāśraye |

iti śrī appaṇṇācāryaviracitaṃ śrīrāghavendra stotraṃ sampūrṇam ||